في طُرفةِ عَين

بارت 18

طالع
وي منو طالع وي ابو
لا مو وي ابو
هسه حيصير مغرب شون تامنونه وحده بره وهو عمره 11بعده زغير خطيه
والله شبيدي اني هو عمار كله روح اني هسه راح اسويلكم شي تاكلونه مبين من الطريق انتم جوعانين.

واحنه كاعدين طب عمار للهول وعلى راسه خاولي ينشف براسه ويغني رفع الخاولي شويه وظل يباوع

ضحك كال هلا عمي هلا بنت عمي شجابكم
كمت وكفت كتله اجينه يعني شجابنه بعد.

هااا زين سوبرمان مالتج اجه وياج
لا وحدنه اجينه
هههه مبين شبع وشمرج مووو؟ ؟
باوعتله بحقد وبقلبي اكول الحمدلله مو هيج جان صدك هسه يشمت بيه عمار. كتله لاااا
تقرب عليه ويهمس بازدراء
هههه مبين كطفج مثل كطف الجكاره مو؟  هههه اي لعد شتتوقعين من هيج زواج؟ومن هيج بشر بابا ذوله هي شغلتهم ياخذون البنيه وره مايشبعون يعوفوها 

وخر عمار مسوي نفسك ابو العريف كتلك ماعافني فرات ميعوفني بس تعرض لحادث ودخل بغيبوبه والهسه ماصحى منها
هههههه حيييييل والله حييييل هي حوبتي اني مسوي نفسه مراد علم دار وجايب جماعته يضربون بيه الله كله اوكف والله مايطك بعصا ان شاءالله بعد يموت والله يكمل جميله.
اسكت عمار لاتفاول عليه اسكت ؛ ياسر وين. هاا وين وديته. ؟
ياسر صار رجال وطلعته يشتغل.
لطمت على صدري وشهكت ياعزاك ياصخامك ولك شيشتغل وهو بهالعمر.
ايييه شبيييج خلي يتعلم يصير زلمه.
ادرييي شيشتغل؟ ؟
يبيع كلينكس بالتقاطع
صخاااام مطلعه بالشارع ولك الشارع كله بلاوي مجرمين ومدمنين انت شنو ماتكوولي
رحت صيحت على انهار
انهار انهار
جتي من المطبخ كالت خير شكو شبيج؟
انت شون تخلينه يطلع ياسر يشتغل بالتقاطع هاا؟ ؟
اشرتلي انهار بايديها عود يشرب عمار
و مابيدي شي.
رحت يم عمار كتله انت شون ماصيرلك جاره هااا؟  بس كولي ماصيرلك؟ ؟؟

ظل يضحك عليه ويستهزأ وطب جوه اني بقيت مفرفحه على ياسر.
كعدت افكر وبالي راح البعيد يمكن لو اني باقيه ويا عمار ومخلفه منه بعد جان انظلمت اكثر واطفالي هم انظلموا ويايه مثل ياسر.
للمغرب اجه ياسر رحت اله حضنتها وكعدت بي بالكاع وبجيت وبجيت احس دموع حزن العالم كلها بعيوني ووجع الكون كله بروحي ؛ بجيت عليه وعليّه وعلى فرات وعلى كل شييي.
هو يباوعلي مصدووم وبادلني الحضن حركته هي حركت بداخلي مشاعر فرح ولو شويه.
ظليت امسح على وجهه وراسه بثنين ايديه كتله وين جنت؟؟
رد عليه بصوته البرئ ،الهادئ والمشبع بالحزن؛ عيونه ليجوه ميباوع بعيوني.
ابيع بالتقاطع
وجيت وحدك حبييي بهالظلمه
لا نجي سويه اني والولد
يا ولد ومنين ذول؟
من المنطقه هنا.
بعدهه صاحت عليهِ انهار يغسل ويبدل ملابسه.
راح مثل متكوله يسوي شكد يطيعها اباوعلهم صدك ابن وامه انقهرت وكرهت انهار.
نام ابويه بعد ما فرشتله انهار دوشك بالارض

رحت يمها للمطبخ وهي دتسوي عشاا
كتلها انهار هي ليش هيج ياسر يشتغل حرام عليكم هو بعده زغير؟ ؟
شسوي ياندى والله موبيدي
تدرين  حيلي بايد اني منا امي مريضه السرطان اسم الله عليج نخر جسمها نخر وابوي محتار بيها وانمار ميهمه من تزوج لهسه ميهتم غير بمرته وهي شوفت عينج تدخل غرفتها متطلع وعمار محد يرده صاير كلش مو مثل قبل ابوي جان يسيطر عليهِ وهي اني صحتي بالنازل وشكل ويايه الضغط يصعد ومدينزل ابد والله
ومسحت دموعها ودارت ع الطباخ تطلع البتيته من الطاوه.
شفت حالتها متسمح اذيها بكلامي رغم قلبي مليان عليها بس بقلبي حجيت كلت هي ضريبة الي سويتو بيه الله بعد عيوني اخذ حقي وزايد.
بعدها اجه عمي تفاجأ بينه گابل ابوي وظل يبجي وابوي متمدد ويبجي وياه.
كله سامحني ماوكفت وياك بمرضك.
شافني واعتذر مني كال ظلمناج بنيتي سامحينه.
صبوا العشا وتعشينا.