Every Beast Needs A Beauty (GLS#1)(Published under Pop Fiction, and MPress)

Kabanata 23

Hindi naman ako makatingin ng diretso sa kanya. Dulot siguro ng guilt na hindi ko masabi sa kanya ang nangyari sa loob. Nakakahiya. Kumunot ang kanyang noo nang tinitigan niya ako at pakiramdam ko agad ay may alam siya sa ginawa ko!

"Natagalan ako sa table nina Rage." Pasimple kong sinabi.

"Kumpleto na?" Sigaw ni Ma'am at mabilis na sinarado ang pintuan ng van.

Puno ng bulung bulungan at hiyawan ang ibang girls at may sariling mundo naman kami ni Mia dito.

"Natagalan? Anong nangyari? May development ba?" Tanong niya.

Umiling ako. "May kasama siyang ibang babae."

"Ano? Na naman?" Umirap si Mia at umiling.

"Oo. Hindi ko kilala. Bago na naman." Hindi ako makatingin sa kanya habang sinasabi ko ito.

Humalukipkip siya at parang nawalan ng gana. "Ay grabe. Lintik 'yang Del Fierro na 'yan. Sana minura mo! Tsk! Nawawalan na ako ng pag asa sa mga lalaki!" Umirap siya.

Tahimik kaming bumyahe hanggang sa nakarating na kami sa building. Mabilis kaming pumasok. Pagod na pagod ako at hindi ko alam kung bakit. Tiningnan ko ang skirt ng damit ko at naalala ko ang ginawa ni Rage kanina. Nag init ang pisngi ko.

"Okay ka lang?" Tanong ni Mia nang narealize na hindi ako nakikinig sa kanyang mga kinikwento.

"Okay lang." Sabi ko at kinuha ang cellphone ko.

Nakita kong may iilang mensahe doon galing kay Kid. Binasa ko iyon lahat at medyo natagalan ako sa pag proseso.

Kid:

Free ka tomorrow?

Kid:

I miss you.

Kid:

Are you done for tonight?

"Sinong nag text?" Dumungaw si Mia sa cellphone ko.

Nanuyo ang lalamunan ko nang nag angat ako ng tingin sa kanya. "Tingin ko ay kailangan ko ng isoli 'tong cellphone kay Kid."

"Bakit naman?" Tanong niya.

Nagbihis ako at hindi ko siya sinagot. Tiningnan niya lang ako habang nag bibihis din siya. Nanliit ang mga mata niya sa akin.

"Kanya 'to, e. Bibili na ako ng bago." Sagot ko.

Naramdaman kong hindi niya tinanggap ang aking sagot pero hinayaan niya akong manahimik.

Pagkatapos binigay sa amin ang pera para sa gabing iyon at pagkatapos naming mag bihis ay lumabas na kami ng building.

"Nga pala, nakahanap ako ng bed space. Gusto mo tayong dalawa ang tumuloy doon?"

Napatingin ako sa kanya. "Mura ba?"

"Oo naman. Ano?"

Tumango ako. "Mabuti pa nga."