انا والماضي

القصه في منشور واحد #انا_والماضي

#زينب_الموسوي
قصه جديده من الواقع الذي نعيشه بناتنا العراقيات من صار العراق لحد الان عن بنيه اسمها امل تحچيلكم
السلام عليكم احبائي اسمي امل عراقيه من الحله عائلتي عاديه اب وام معلمين اخوان  تلاثه متزوجين علي ومحمد وحسين واختي رفل متزوجه قريب من بيتنا امي عودتنا على التنظيم ونعتمد على نفسنا بكلشي حتى الولد بيتنا عليه واجبات لحد متزوجوا صاروا مدللين ونسوانهم ينفذن الاوامر  امي واوامرأزواجهن واطفالهن كلن نسوان اخوتي حبابات وگرايبنا بقيت اساعد بامور البيت لحد السادس اعدادي تفرغت لدروسي اني چنت شاطرة بس مشكلتي الاحياء صعبه التعاريف الموقع الوظيفه كلها بكتاب واحد وفصل الوراثه اكرهه عدت السادس مرتين من ورا الاحياء ونجحت السنه الثانيه وطلعت تربيه  المهم خلصت من السادس اريد اطلع اتنفس ادخل كليه ويصير عندي خط ياخذني ويجيبني احف حواجبي البس تنورة بالدوام مو صدريه مادري تلبيسه انتظرت تخلص العطله واداوم مخليت شال ما شتريته. جنط مكياج عيني  فرحه متنوصف اختي رفل مادخلت كليه اني اول وحده راح تدخل اخواني كلهم خلصوا كليات وكل شويه مجتمعين بيه ومنطيني محاضرة اميي العطله كلها مو تضحكين هواي لاتگولين هلو گولي سلام عليكم وعينج بالگاع ومكياج خليه مو مال حفله أني قبلت تخلين لان اعرف اذا امنعچ راح تخلين من وراي من تشوفين البنات مخليه هو كحله واساس وحمرة باليل تخليها وتمسحيها والولد مالچ علاقه بيهم شلونكم مع السلامه بس تعارف وزحف مااريد وكلشي يصير تحچي الي الولد راح يزحفون مو علمود  خلقتج لا يحبون يجربون صير ثگيله ترى التفتح مجال حتى لو سعلوة الولد تركض عليها
ماما شنو القصه اني رايحه كليه مو لملهى وبعدين الولد هم جايين يدرسون ويحصلون شهادة وشدعوه هسه اني نانسي عجرم الولد راح يوگفون سرا
اريد افهمچ حتى تمشين عدل...يتبع
#انا_والماضي بارت2\#
#زينب_الموسوي
بديت الدوام بالكليه اني اول ايام كنت مثل المضيعه واحس العالم كلها تباوع عليه من امشي وبنات المرحله الاولى مبينات وحدتهن بس تحاچيها ودها تبچي عدت اول اسابيع وتعودنا على الدوام تقسمنا گروبات ولد وبنات بعض الطلاب كانوا جايين للتسليه وبعضهم الدراسه صح كل ميمر يوم نسمع هذا يريد يتعرف وهذا معجب وقسم كانوا يتراهنون على البنات
واحنا. البنات هم كل واحد مسمينه لقب بدون ميدرون كان عندي خط ياخذني ويجيبني ابو انعام بس واحد مينجرع اذا اتاخر دقيقه يعوفني ويروح مرت سنتين الاولى من الكليه حياتي ما بيها اي حدث يذكر اروح ادرس نوگف ويه اصدقائنه
عرفنا الكليه شنو وافتهمنا مو كل العلاقات بيها صدق ولا كلها كذب
كنت بالثاني كليه بالشتى نزلوا گبال بيتنا جيران جدد عائله كبيره لان بيتهم كبير وبناء حديث اني داصعد الخط نزل من سياره ولد شاب مرتب لابس ملابس عسكريه وعنده نجمتين فد شي مميز مو شكل بس اناقه ورجوله وترتيب عجبني المنظر وسمعت السايق يگوله سيدي ماانتبه عليه احسن لان اريد اراقب براحتي واعيد الصورة بالي  صعدت السيارة وعيني على بابهم حتى رقم السياره حفظته وبراسي نشيد الجيش سور للوطن 
رجعت الظهر من الكليه بابهم مسدوده سالت امي عليهم راحت سوت الواجب گالت اليوم ودينالهم غدى وباچر اني وام زهراء نروح نتعرف عليهم
ام زهراء مرت اخوي علي
زين ماما خلي اروح وياكم
شعندچ رايحه عدهم ولد شباب اخوانچ ميقبلون
ماما منين عرفتي عندهم شباب شفتيهم
شفت واحد عسكري واحد يروح بخط الصبح
يعني هذا العسكري ابنهم
شمدريني ابنهم نسيبهم  اخوهم
لانسيبهم شنو انشالله ابنهم
وانتي ليش تسالين
ماكو شي بس اذا ابنهم واحد.يحس بالامان جيرانهم ضابط
ليش شكو انتي گاعدة على خط النار
مارديت لان بديت اخربط وامي معلمه تعرف الكذب قبل لااحچيه
الله يساعد الطلاب عليها  راحت امي الهم ورجعت سولفت هم اربع ولد الچبير ضابط اسمه يزن واخوه الثاني موظف بالنفط واحد طالب الرابع امي نست تسال عليه وعدهم اخوات اثنين المهم عرفنا اسمه وشغله...يتبع
#انا_والماضي بارت3
#زينب_الموسوي
ظلت صورة الضابط بالي ماابالغ واگول الحقيقه عجبني فد شي بيه البدله العسكريه يمكن والنجوم على الاجتاف حلوة دخلت على الگوكل حتى اعرف نجمتين شتعني عرفت ملازم اول
ظليت اسبوع اريد الصورة تتكرر ماشفته وابو انعام دوم مستعجل يله اتاخرنا قبل الازدحام ليصير حجيت لصديقتي ايه عنه گالت
اذا عسكري اكيد ميبات عند أهله بالوحده وخفارات واجبات
وانتي شمدريچ بهذا الحچي
عائلتي كلهم بالجيش وبعدين هذا ضابط تلگيه عنده خمس صديقات واثنين امه حاجزتهن اله
مو شرط مبين ثكيل ومشال عينه على السياره وباوع علينا والسياره كلها بنات
لان جوارين وبنات المنطقه لچ هذا غيث كاتل روحه عليچ رايحه على واحد صاحباته كيا يله تكفيهن
هم جابت طاري غيث لچ هذا مدلل وشعره مثل  بنات وماادري شلونه ميعجبني
غيث وياي بنفس القسم بس مرحله ثالثه وحاول يتعرف عليه مقبلت لان هاي النماذج كلش مااطيقهابقيت انتظر يوم اشوف يزن اني حتى وجهه مادققت بيه مرت تلث اسابيع تاخرت على ابو انعام عافني وراح رجعت للبيت واني ابچي اخواني طلعوا للدوام تعرفون الازدحام  الصبح امي گعدت ابوي من النوم حتى يوصلني لان عندي امتحان ظليت ابجي طلعنا اني وابوي انفتح بابهم وطلع يزن والسيارة منتظرته سلم على ابو وحجاله ابوي على ابو الخط گله تعالوا اوصلكم بس ابوي گله ناخركم وانتم عدكم واجب اني ظليت ساكته بس يايابه خلي نصعد شصار هو حتى من سلم ماباوع عليه بس من صعد السيارة يمكن باوع ممتاكده 
حجيت لايه الصار گالت يعني كل واحد وعشرين يوم يله يجي
بيوم الجمعه طلعنا اني وامي العصر شفناه ديطلع بملابس مدني وگف وسلم علينا وحچت وياه امي 
شلونك يمه يزن جاي لاجازه
لا والله خاله اني ادوام هنا بس ارجع باليل ومرات ابات هناك بالواجب وانذارات
تعال يم الولد باليل يريدون يتعرفون عليك
انشالله اجي وحتى هم اشكرهم ماقصروا امي تگول ركبوا الدش والنت
تگول ركبوا الدش والنت
ويه اخواني اليله انشالله اجي عليهم
اهلا بيك يمه
وراح هم ماباوع مدنگ ويحچي هذا شبيه عرفت باليل جاي على اخواني  چنت نايمه
مرت ايام تعرفنا العائلتين اكثر البنات اخواته كان بالمتوسطة عرفنا ابوهم متوفي والبيت الاخوان ماخذين سلف وبانيه تصير عدنا قرايات يجون يمنا ونروح يمهم بس يزن على طول ماموجود
لحد يوم مطر اريد اطلع ابو انعام واگف بعيد عن البيت يخاف يفوت بالشارع اخاف تطمس السيارة شايله شمسيه طلع يزن يصعد السيارة شافني امشي
وگف سلم
شلونج امل وين الخط مالتچ
ميقبل يوگف بالفرع اني اتمشى
هذا شلون حچي تعاي بالسيارة اوصلچ اله
لا عفيه ماكو داعي
ماكو داعي شنو اصعدي المطر نگعني
دخلت السيارة گلبي مادري خايفه الي سويته غلط نزل اثنين من الي وياه وشتغلت الفيكات مالته على السايق نزل عينك وامشي عدل وهو حاضر سيدي سالته
خطيه ذولي يبقون بالمطر
همه عسكر يتحملون اوصلچ وارجع الهم
وصلت شافني صعدت للخط حچه ويه ابو انعام
ميصير تخليها هي تمشي انت خط مو سخره توگفلها بالباب المرة الجايه
حاضر سيدي
گعدت يم ايه اخذت أيدها گتلها شوفي گلبي شلون يدگ
لچ شنو هاي الفيكات من الصبح
لچ سلم ويعرف اسمي
من سلم گتيله سيدي لو يزن
طبعا يزن ليش لازم اگول سيدي
ماادري اليوم اسال ابوي
زين شنو رائيج بالقالب شي على شي
شايل روحه    احسن من غيث
عوع من الصبح لچ هذا تقارنيه بغيث والله حرام هسه اني شلون اعرف مواعيده
سالي اخواته الصغار بلكي يعرفن
لا عفيه عيب يروحن يحچن يم امهن
لعد انتظري الصدف
وفعلا ظليت انتظر الصدف لحد يوم
اريد اطلع وگفت بالباب انتظر الخط وهو هم طلع بدون السيارة الي وياه سلم وسألني
ها انشالله ابو الخط واگف بعيد
لاهسه يجي اني اطلع من وكت حتى ميعوفني ويروح
هذا مو سايق وزير الدفاع
يمكن والله
انتي يامرحله هسه
ثاني 
الله يوفقچ
الله يحميك يارب
الله دعوة حلوة محتاجهه
انت وين السيارة مالتك
اليوم يتأخرون راح نروح بسيارة اكبر وياي ضباط اثنين رايحين الفاتحه
يمه اسم الله فاتحة منو
ضابط ويانا ابنه مريض ومات
خوفتني اگلك انت شغلك مابيه خطورة عليك
لا انشالله ماكو شي
اكو ايه للحفظ تگول الله خير حافظا وهو ارحم الراحمين على طول رددها حتى تحميك يله اجى ابو انعام
الله وياچ اموله
صديقتي ايه شافته واگف وياي يحچيي
ها نگول مبروك
اگلچ اخر كلمه ماسمعتها زين يمكن گال اموله
هلو ياب عاش الجيش هاهيه ربطت سالتيه على مواعيد دوامه
لا نثولت
هو انتي ثوله.
مرت يومين شفته اول مطلعت كان واگف بالباب اول مشافني ابتسم وسلم
سالته اشو مالابس عسكري بطلت
لا بعد وكت بعدين ابدل
لعد شعندك واگف بالباب
منتظر ابو الخط مالتكم احب اصبح بوچهه
ابو انعام وجهه يطرد النعمه اسالني اني
لا بالعكس وجهه حلو وبرئ وسماره فد شي
انت متباوع شلون شفت وجهه وسمارة
هسه انتي شعليج عاجبني واگف منتظره
على راحتك انتظره هو خمس دقائق ويجي
اليوم اگدر اشوفه بس باچر مااگدر
ليش وين باچر
دوامي اليوم ابات هناك
خطيه لعد گله لابو انعام اخاف يظل باله عليك
شلون اگله
ادليك على بيتهم اذا تريد
غير اعرفه يعرفني اول مرة مو نحكم على الشكل 
اني الي اعرفه هو ميحچي ويه واحد  ابد ولامرة مسويها
اني مو غريب واحسن مواگفين بالشارع ونسولف رقمچ عند دعاء اختي رقمي ينتهي ٦٨جاوبي اذا خابرت 
اول مگال هاي الجمله عدة أفكار جتي بالي والله العظيم اني ولامرة حاچيه ويه ولد ولاعندي علاقه وي اي ولد ولد عمي من يجوونه اسلم وافوت للمطبخ ويه امي مااعتقد اني مستعده لعلاقه فكرت اگول لأمي بس گلت انتظر اشوف شنو يگول...يتبع
#انا_الماضي٤
#زينب_الموسوي
اظليت انتظر يومين يله خابر باليل مچان من النوع الي يريد يتعرف وخلص ولا ابو بنات فهمني ليش خابرني
شوفي امل مو من طبعي اخابر بنات وواعد ولو اكو وسيله ثانيه اتفاهم وياچ بيها چان سويتها وصعبه وگفتنا بالشارع وياچ وطول ما انتي وياي راح احافظ عليج مثل عيني اذا مو لخاطرچ لخاطر الجورة بينا واخوانچ اصدقائي
اريد اگول شي والله العظيم اني اول مرة احچي ويه ولد ولاعندي علاقة باحد وماادري ليش انت قبلت تخابرني
اعرف انتي ماعندچ هاي السوالف صار ست اشهر گبالكم متطلعين من البيت الكليه واذا طلعتي ويا امچ ومن احچي وياچ وجهچ يصير احمر من الخجل
زين انت اكيد تعرف بنات
ليش اكيد شنو فنان رياضي چنت احب بت خالتي من السادس اعدادي وخطبتها تعاركت امي وامها وكبرت المشكله هي صفت ويه امها واني صفيت ويه امي وفسخنا
خطيه اذا تگول تحبها
صار سنتين من عفتها ونسيتها انتي ناويه تشتغلين اذا تخرجتي
اذا لگيت تعيين اشتغل
واذا تزوجتي والرجال ممحتاج شغلچ
وين اكو واحد هسه ميريد زوجته تشتغل اصلا يتزوجنهن علمود الراتب
اني مااريد مرتي تشتغل اريدها تبقى نايمه الظهر ومو تگعد من الصبح تطلع ويه طلعت العماله
هنيالها المرتك عيني تنام للظهر وشغل البيت اكيد راح تخلليلها خدامه مو
ياخدامه وين احنا تخلص شغلها على كيفها اني طول اليوم مموجود بدال متروح الوظيفه تخلص شغل بيتها
يعني تتعين عندك بدون راتب
انطيها راتب وتقاعد اذا تريد
والله انت غريب ماادري شگولك
گوليلي انتي شتريدين شنو تحبين مستقبلج شلون
اني باقي سنتين اتخرج اذا حصلت تعيين خير على خير واذا لا اگعد بيت اهلي اباوع مسلسلات تركي طول الليل واگعد العصر اكل وافتح نت إلى أن يجيني نصيب أخذه واخلف منه ست جهال واصيح عليهم وادرسهم وافتح نت من ينامون
خوش مستقبل ليش تباوعين مسلسلات تركي علمود الممثلين
لا ليش قصص حلوة احسن من المصريين
لاتباوعين تركي لخاطري
والله ترى مسلسلاتهم حلوة وهادفه اكو مسلسل اسمه فاطمه گول هسه اوديلك مقطع منه إذا مابجيت هسه تشوف والممثله تجنن
وين شفتيها تجنن اذا هي كاميرا وضاربيها ميه قاط صبغ بالعراق صارن تطبق للصالون جبار ابو المولد تطلع هيفاء وهبي
لعد شنسوي اذا انتم عيونكم على هاي وذيچ متكفيكم وحده هسه اوديلك المقطع
اذا ما عجبني تبطلين تباوعين
حاضر سيدي
حلوة منج سيدي
اذا عجبك اگول سيدي على طول
لا خلينا ميانه احسن
تكررت الاتصالات بيناتنه اوديله مقاطع من من مسلسلات تركي ونتناقش بيها كان قصده اعرفه اكثر ويعرفني الاتصالات كانت بين التسعه والعشره باليل لان عندي دوام مااگدر اسهر والصبح قبل لااطلع ادك عليه حتى يشوفني مقبل ابد نوگف سوا بالشارع عنده چانت افكار قديمه تختلف عن شباب هسه كان يگول العلاقات الي تنبني على الشكل فاشله شنو فائده الجمال اذا ماكو اخلاق وتربيه شنو فائده واحد ياخذ حلوة ومتصونه وتصون غيبته افرضي واحد حب وحده تگطع ورا الزواج صار حاد ث تشوهت احترگت يعوفها عرفت يخاف يرتبط وضروف شغله ماتتحملها زوجته لان جيش. على طول بالواجب واحتمال ينتقل من مكان لمكان
بالبدايه كنت اخاف من حچيه وتصورت رجعي. متخلف بس صار موقف خلاني اتعلق بيه اكثر وعرفت هو انسان محترم يريد يقترب مني ويعودني على طباعه قبل لانرتبط رسمي
بالعطله صادفت وفاة الزهراء عليها السلام وهواي بيوت بالمنطقه مسويه قرايه خابرني العصر سالته اريد اطلع للقرايات گال لا مااحب تفترين بالبيوت احضري القرايه بيتكم وبيتنا واسمعي الباقي بالتلفزيون فاطمة الزهراء تگول المرأة بيتها محرابها
زين بيت ايه همين من زمان مشايفتها
لا بيتها شارعين عنكم متطلعين اموله اتفقنا
خلص مااطلع انت البوم موجود لو بالوحده
لا بالوحده ماارجع
انشالله ترجع بالسلامه نويت اروح لقرايه ايه مدام هو ماموجود من زمان مشايفتها وحاچين سوا
خلصت القرايه مالتنا ورحت للقرايه بيتهم وطلعنا اني وامي لبيت ايه امي چانت تمشي ويه النسوان خلصت القرايه رجعنا لبيتنا نريد ندخل البيت سيارته وگفت وشافني عرف رايحه لبيت ايه ضيعت الطريق من الخوف وگف سلم على امي وگلها مأجورة خاله ام علي وين جنتوا
امي جاوبته امل ثبرتني اريد اروح لبيت ايه واخذيني لبيت ايه اخذتها
مشكورة نبع الحنان لصتيها
دخلت اني مااگدر اتصل بيه ميقبل هو يتصل انجبرت اتصل وجاوبني
ها اموله بعدنه بسم الله تچذبين وتسأليني تجي لو لا
بس انت هم چذبت گلت مراح اجي
والله مچذبت طلبت من صديقي يبقى بمكاني حتى الحگ على قرايتنا واشوفچ
اسفه والله لان مشايفتها من زمان وبعد مااسويها
وشلون اصدگج بعد
شدعوة اني ماچذبت ضميت عليك
لاتسويها بعد ارجوچ واذا شي تشوفين نفسچ ممقتنعه بيه ناقشيني بيه ونوصل لحل بس الجذب والضم مو حلو
صحيح والله اول مرة وآخر مرة
العبايه حلوة عليچ
عزا بس لا ناوي تلبسني عبايه
وليش لا شبيها العبايه
مااحبها تكبرني
خلص اذا متحبيها لاتلبسيها على راحتچ بس اذا فد يوم قنعتج بيها تلبسيها
اذا اقتنعت أي بس مو تجبرني
اذا جبرتچ يعني اضحك على روحي ومراح تلتزمين بيها العبايه الي تلبسها كون تعرف قيمتها
بهاي اليله اول مرة يفاتحني بالخطوبه واتفقنا نهاية الشهر ويه الرواتب يجيب أهله وگلي گولي لامچ اول وفهمني زواجنا يتأخر لان همه مطلوبين على بناء البيت واني هم اريد اكمل وحچيت ويه امي گالت خوش
كالت خوش ولد واهله مستورين وعلى الاقل تبقين قريبه مني سألتني شلون فاتح حجيتلها صار اربعه اشهر يتصل بيه زعلت مني بس فهمتها استحي اكللها ظليت انتظر على نهاية الشهر باقي 9ايام....يتبع
#انا_والماضي٥
#زينب_الموسوي
ورا مفاتحت امي بيومين مات عمي سليم هو عمي الچبير وشيخ عشيرتنا هو صار سنه مريض ودوه للهند مفاد عفنا البيت ورحنا الفاتحه وديت رساله على الوتس اب ليزن حتى يعرف ابوي حيل تأثر على اخوه وخطيه عمي ماعنده ولد كلهن بنات ومتزوجات عرفت ثاني يوم يزن وأخوانه جايين على ابوي الفاتحه وامه همين وشفتها تباوع عليه بنظرات فاحصه وسالتني هاي گاصه شعرچ على عمچ گتلها لا شعري خفيف واذا اطوله يوگع گالت ليش اسم الله يوگع
والله خاله ماادري يمكن من الماي
ظلت تباوع وكل شويه تلزمني تشوف اخاف لابسه اسفنج واني ساكته اكيد راح تنقل كلشي لابنها خلصت الفاتحه وامي گايله لابوي على خطوبتي راد عليها خلي يأجلوها هسه بس طبعا مگالتله يعرفها ويتصل بيها ويزن هم أتفهم الوضع وبقينه نتخابر مرت عشرين يوم اتصل بيه يزن الفجر هو ابد ميخابر الفجر لان غرفتي فوگ يم اخواني وباليل يسمعون صوتي كله نحچي رسائل رديت عليه برساله مااگدر اجاوب
زين من تگدرين تجاوبين اتصلي بيه ظروري
قلقني اتصاله وظليت على نار اول مطلع الصبح نزلوا للريوك اتصلت بيه
صباح الخير شكو يزن شصاير
مصاير شي شبيچ خايفه
فدوة احچي وگفت گلبي
اموله تدرين اني عسكري وين ميريدني الجيش اروح
اصخام بوجهي وين حتروح
الفرقه كلها نقلت لبغداد ويومين نتحرك
ظليت ساكته اول مرة انصدم بحقيقه يزن ضابط وشغله خطر وبغداد يوميه انفجار
ليش سكتي اذا خايفه من شغلي گولي واني أتفهم واقدر خوفچ
لا يزن خايفه عليك بغداد مو امان
حبيبتي محد ينهزم من قدره والموت باي لحظه مو بس الجيش ل
شنو موت وقدره لاتحچي هيچ الله يخليك انت متموت گولي مااموت والله اذا متت أظل ليوم القيامه مااسامحك گول متموت
ها شبيچ اموله لاتخافين هو بس مقر الفرقه تغير ماكو شي
ميخالف عاهدني متموت
ليش هو بكيفي الموت بيد الله
فدوه بس گولها يزن ها شسويت بيه من الصبح ليش هيچ هو انت هنا ومااشوفكا انوب تروح لبغداد
دروحي هسه لازم اسوي تعداد ا
لا گول مااموت
يابه مااموت شتريدن بعد كافي تبچين ساعه واخابرج
يزن كل علاقته وياي كانت بالتلفون مرات اشوفه بالباب وهو چان ميقبل الگه حجه واطلع وياه يگول هم عيب وهم حرام مافد يوم گال حچايه خارجه عن الحياء والادب صح ت
يگول حبيبتي واحبج وانتي اغلى من عيني كان يختلف عن الشباب بالكليه احسه چبير بالعمر مع أن هو عمره ٢٦يحب يزعلني ويصالحني لان چان يقلد على المسلسلات التركي يگول نفس الافلام الهنديه بنيه حلوة يحبوها اثنين واحد زين واحد شرير وتحبل قبل الزواج ويوكع الطفل وتتزوج الي تحبه هو كان يتشاقى من يشوفني منفعله على المسلسلات وابجي مرات احچيله المشهد يگول والله عمي خوش ا لممثلات متونسات وانتي شابعه بچي ازعل من حچيه يخابر ورا ساعه يخابر يصالحني يگلي دزي المقطع اريد اشوفه
گلت الامي راح ينقل لبغداد امي رادت تروح عليهم حتى تشوف امه بس گالت هسه تگول منين عرفتوا توسلت بيه اجي اني وامي اشوفه قبل ليروح مقبل گال اهلي يأخذون. عليج نظرة مبقى شي تطلع اربعين عمچ وننخطب باليل اجى على اخواني يودعهم بس مشفته خابرني قبل ليطلع طلب صورتي وديتها اله وگلي متريدين صورتي گتله اخاف من هذا الحچي عبالك تريد تروح ومترجع
اموله انتي بيوم من الايام راح تصيرين زوجتي انشالله وعدنا اطفال واني على طول ماموجود وكل يوم بمكان ويمكن تصير حرب انقلابات. ثورات متعرفين لازم تصيرين قويه واعتمد عليچ بيتي و تربيه اطفالي حتى لو اني ماموجود انتي بمكاني
والله حچيك يخوف والله يدري انت وين رايح عندي احساس مو بغداد
احساسج صحيح اني منقول للانبار تنتظريني لو لا
بس ابقى سالم وعمري كله انتظرك يزن انت تگول اني اغلى من عينك اني عينك عندي اغلى من روحي
والله مأثرة بيج المسلسلات التركي يمكن سامع هاي الجمله بين فاطمه وكريم
موصوچك روح الله وياك...يتبع
#انا_والماضي بارت6
#زينب_الموسوي
الاتصالات صارت صعبه بينه بس هم نتخابر هو مقرهم كان خارج المدينه الاتصالات كانت محدوده لان مااگدر اجاوب دائما لو اهلي موجودين لو عندي شغل بالبيت وهو هم ماعنده وكت اتفقنا نتخابر الصبح يوميه ساعه سبعه اذا توفر الاتصال وگلت لأمي ترى يزن بس يجي راح يجيب أهله امي حچت ويه ابوي عرفت بابا رافض گايله الانبار خطرة خلي تخلص الاعتصامات والمظاهرات بالمحافظه بلكي يرجع هنا يزن من رجع كان باقي على دوامي اسبوعين مگدرت اشوفه ولايشوفني فاتح اخواني بالخطوبه واخواني فرحوا بيه حيل هو المنطقه كلها تحبه اخواني گدروا يضغطون على ابوي گال خلي يجون نقرا الفاتحه وبدون هوسه وحفله يوم الي سمعت الخبر مو بس فرحت عبالك انولدت من جديد بالمشيه مال الزلم مو بس عمامه وضباط وحتى شباب المنطقه بابا صار عصبي لان اخوه صار شهرين متوفي مراد احد يعرف ثاني يوم اني وياه لبسنا حلقات كانت اول مرة اگعد قريب منه اول مرة يلزم ايدي وماادري اخر مرة قبل ليروح للانبار طلب من ابوي نعقد عقد سيد لان گدام الناس راح يطب علينا وافق ابوي
اهلي كانوا فرحانين اكثر مني واني ظليت كل شويه اباوع على الحلقه عجبتني أهله ظلوا يصيحولي مرت يزن داومت بالكليه والبنات خبصوني مبروك وصايره غير شكل وليش مگلتي
الإجازة الي وراها مر عليه للكليه واخذني بتكسي للبيت كان من النوع اي شي يتصرف يفكر بالسمعه واني لحيت عليه يجي عليه وگتلي احنا عاقدين عادي
حتى لو الناس تشوفنا ميعرفون عاقدين واخوانچ اذا عرفوا شگلهم
گلهم ونطلع سوا
لا اصبري تصيرين بيتنا ونسوي الي نريده
اگلك يمكن انت متحبني
لو مااحبچ ما خفت عليج وعلى سمعتچ
زين تعال يمنا باليل
صار اجي باليل
حتى لمن يجي عدنا خجلان من اخواني التحق للفرقه وظلينا نتخابر الصبح يگعدني من يتصل كومي ارسمي اللوحه على وجهچ
شوكت راسمه لوحه هي اساس وحمرة وحتى كحله متخليني
والحمره المن مخليتها بطليها اذا تحبيني
ميصير يعني اروح للكليه شفتي بيضه شيكولون مريضه راح اخلي خفيف
بسيطه خلي نتزوج وهواي راح اخليج تطلعين مخليه حمره
يعني حتى بالبيت مااخلي من نتزوج
بالبيت خلي بس مو گدام اخواني
الله كريم خلي نتزوج ويصير خير
اخذي صورة قبل لاتطلعين وديها الي
حاضر سيدي
اتصل
بعد كم يوم وگلي نازل إجازة باچر هذا الحچي بالسته العصر گعدت الصبح مخابرني يزن شعجب يوميه اگعد على صوته اتصلت بيه ميجاوب ظل بالي طلعت لگيت بابهم مفتوح گلت يمكن جاي باليل وناسي يسد الباب دخلت عليهم اخوه يعرب سالته شكو شصاير
يزن البارحه صاير تعرض على مقر وحدتهم ومتصوب
يمه يزن وهسه وين احچي وين متصوب.
على كيفج امي متدري هسه رايحين لبغداد هو بالمستشفى
انتظرني اروح اگل لاهلي واجي وياكم طلعت دفرت الباب رجليه بعد متشيلني اخواني بعدهم موجودين اريد احچي مااگدر بس گلت يزن ركضوا اخواني عليهم وصار العياط امهم عرفت ركضت على الشارع اصرخ اخذوني لاتعوفوني وادگ على تلفونه صعد اخوي محمد وابوي وأخوانه وراحوا جرتني امي ونسوان اخوتي دخلني جوا گلبي أحسه يريد يطفر من مكانه ياربي يكون عايش بس عايش شيصبرني الى ان يجون عيوني تجرحت من البچي حيل اگوم مابيه رحت يم امه هي تبچي واني ابچي امي اخذت التلفون من عندي لان تشوفني ارجف واني ادگ بالتلفون وحتى اخوانه واهلي ميجاوبون الظهر نايم على الكاع بيتهم ابوي اتصل بامي گلها استلمنا من الثلاجه سمعته امي صرخت واني طلعت الشارع اريد اذب نفسي جوا سياره مااريد اسمع احد يگول يزن مات المن باقيه حتى اشوف فاتحته يزن ينام جوا التراب الشريف العاقل المؤدب امداچ يادنيا اذا بقيتي مابيج يزن وصلوا جايبه بتابوب صعبه هاي الكلمه عليه اكتبها يزن صار صار بتابوت اباوع على الناس مابيهم واحد مايصرخ عليه مو بچي صريخ امه حالها الموت ارحملها اني مااشوف بس خيالات گدامي اهدومي شگيتهم شعري گطعته وخدودي ملختها امي كل شويه تضربني على وجهي تريدني احس على روحي وتگلي كافي اريد واحد يجاوبني ليش هو مراح يحارب احد ولا يغزي ولايحتل مدن راح يساعد المدينه تستقر ويصير بيها امان والي صوبه يعرف مو كتله بس هو وأحلامه وشبابه وامه وفرحتها واني واول انسان يدخل گلبي يعرف شچان يزن تواضع وطيبه واخلاق اخر ايام صرت حلال عليه يباوعلي والله ماشفته يباوع فد يوم على جسمي من هاي رادته الجنه امه رادت تشوفه امي رادت تطلعني گالت تموتين اذا شفتيه گتلها اني اريد اموت شفت عبالك نايم مو ميت مضروب بگلبه وجهه صافي مابيه ملامح خوف بطل نايم ماتحملت الصورة كانت عدهم طابوگه خاليها ورا الباب شلتها اضرب راسي ضربتني امي ونسوان اخوتي اخذوني للبيت ابوي من شاف حالتي گلها رجعيها خلي تشوفه طلعوا بيه والشباب دگ موسيقى وطلقات وصريخ النسوان وهلاهل واخواته بلا حجابات يركضن وراح يزن مثل الالاف الشباب الي صفوا بالتراب مرت ايام الفاتحه الناس الي تجي تحتار تبچي على امه لو عليه لو اخواته ظليت بيتهم مرحت لحد السابع امي اخذتني گوه تلگوني اخواني حضنوني كلهم ويبچون وكلهم الله يرحمه انسيه لا تعذبيه هم انتي وهم امه
عفت كلشي بالدنيا وحبست نفسي بغرفتي إنساه ليش هو النسيان. بيدنا برنامج ونحمله زر وندوسه...يتبع.
#انا_والماضي ٧
#زينب_الموسوي
اني لو احچي عن الاشهر شلون چانت تمر عليه مراح تكفي هاي القصه ولاعشرة الشعور من تحتاج شوفة شخص تعرف مراح تشوفه يخنگ من تلزم آلتلفون الف مرة باليوم تقرأ الرسائل القديمه وعندك امل تلگه رساله جديده من تروح تنام وتتمنى تشوفه بحلم من تفتح الباب وتتصور واگف ينتظر اطلع من اروح لبيتهم وبالي يگولولي رجع الم يوميه أعيشه امي مخلت سيد ماودتني يقرون عليه نسوان اخوتي زرعن براسها اخاف مسويله عمل ايه صديقتي توسلت بيه ارجع للكليه ماگدرت مرت شهور اشوف امه تروح لگبره اخواني ميقبلون اروح وياها
بعد ثمن اشهر من وفاة بدت اسطوانة اتزوجي ذبي الاسود اخواني بدوا ميتقبلون يشوفوني ابچي وحزينه يگلولون لأمي اذا تبجي على رجل انجيبلها رجل
اني اريد يزن مااريد غيره هيج گلت لأمي فهمتني بطلي بچي وحزن اخوانچ عرفوا چانت عندچ علاقه بيه ويظلون يشكون بيچ ويراقبوچ من تخابرين
اخذي التلفون يمه ماريده بس عوفوني ظليت اروح لبيت اهل يزن من يروحون اخواني للدوام حتى ابچي ويه امه
امه گالتلي تحلم بيه يوميه ويحچي وياها بالحلم
خاله لعد ليش مااحلم بيه يمكن زعلان مني اني علموده مااطلع وبطلت من الكليه فدوه خاله گوليله يجيني بحلم والله راح اموت
بس ولامرة اجاني بحلم يمكن زعلان لان مااجيت لگبره والله لو يقبلون اروح
اجتي ليالي القدر ظليت ادعي واصلي يارب انساه
بليلتها حلمت بيزن لابس ابيض سألني ليش مترجعين للكليه ارجعي ونسيني اخوانج من يضربوج تأذيني انسيني اني اتزوجت
گعدت اصرخ اخواني عبالهم اتخبلت ودوني للمستشفى گالوا انهيار عصبي انطوني مهدئات وصار الحچي على امي فضحتنا كافي دلليها
بيوم كنت بيت أهله امه حچتلي عن ابنها الي بالخارج اسمه ياسين اني ادري بيه يزن حاچيلي قصته وليش ميحچون بيه هو اكبر من يزن بسنه أبوه عرف بيه مبطل من المدرسه بدون ميدرون ويشتغل طرده من البيت حتى يتبهذل ويعرف قيمه الشهاده ظل سنين يشتغل الى أن طلع للاردن وافترت بيه الدنيا وصل لامريكا وعاش حاول يصلح علاقته بابوه وامه مقبلوا يحچون وياه أبوه مات وهو مراضي عنه اخوانه يتصلون بيه بدون علم ابوهم وخاصة يزن امه من وفاة يزن حچت وياه ورادته يجي للعراق وگالتلي راح يجي گتلها يعني متريديني اجي الصبح عليكم
لا يمه ابقي بيتكم اني اجي عليچ وكافي تبچين وبالعيد ذبي الاسود
خاله اذب الاسود يزن صار ثمن اشهر من راح ماذبه لو اهلي يموتوني كتل
ولچ يزن گلي بالحلم وگلي لاتبچي بعد تأذيني
زين خاله صدوگ هو متزوج هناك هو گلي بالحلم
انشالله متزوج بالجنه وانتي هم اتزوجي
اني راح ازوجچ ماتحمل بيوم من الايام تطلع زفتچ گدام عيني لواحد غريب انتي چنتي متصيرين چنت غيري
مافتهمت كلامه بس گلت المرة خرفت من موت ابنها وخلصت الدنيا من الرياجيل مابقوا الا اخوانه اصلا همه يدرون بيه احبه...يتبع
#انا_والماضي٨
#زينب_الموسوي
صار العيد ام يزن اجتي عليه جايبتلي گلبيه جوزي وگالتي يزن بالحلم گال ذبي الاسود اخذت الكلبيه لغرفتي وظلت امي وياهايحچن العصر امي گالت تعاي نروح لبيت ام يزن سألتها ليش گالت تريد تتأكد ذبيتي الاسود لبست عبايه اسلاميه وحجاب الوان دخلنا گعدنا عبالي الگاهم يبچون لان عيد محد بچى ورا شويه گا لت خاله ياسين يريد يسلم عليكم دخل اني ظليت گاعده بسى فزيت الصوت نفس يزن رفعت عيني يشبه يزن بس لونه افتح لان هذا بامريكا ماعرفت اجاوب بس عيوني انملت دمع راح اموت على شوفة يزن گعد يمنا وبقوا يحچون هو وأمي وامه عرفت سبب الي خلا امي تجيبني وياسين كل شويه يباوع يزن كان ميباوع خاصة إذا. احد من اهلي موجودين بس هذا تربيه امريكا لحد مجابوا سيرة يزن ظلينا كلنا نبچي
رحت على البيت لزمت تلفون سمعت اخر مكالمه بينا اخواني رادوني انطوني فلوس وگالوا لأمي اخذيها للسوگ تشتري ملابس اختي رفل حچت وياي على حماها گتلها ديري بالچ تفتحين الموضوع والله انهزم منكم وافضحكم ورا اسبوعين جتي ام يزن علينا صاحتني، وگعدنا اني وياها وگالت جايه اخطبچ لياسين هاي وصيه يزن
خاله شتگولين مو عيب عليه گدام الناس
ليش عيب هواي نسوان تترمل وياخذن حموينهن انتي خطوبه بس يزن حتى مالمسچ وهو بالاربعين مالته رجعت من گبره حلمت بيه گلي لاتعوفين امل مؤدبه وحبابه واني جربتچ وشفتج وفيه مااريد يوم تتزوجين غريب وزفتچ تطلع گبال عيني وياسين شافچ ويريد يتزوج گتله عليچ وافق
شلون يوافق ميدري اني احب يزن ومااگدر احب غيره
يمه اخذيه هو احسن متاخذين واحد غريب كل شويه يعيرچ بالماضي
خاله اني مااريد اتزوج ابد مستحيل
معناها تريدين تعذبين يزن بگبره ويضيع عمرچ وامچ وابوچ مدايمين ولچ والله يزن متاذي من وضعچ وانتي مو اول وحده نتزوج اخو رجلها وهو مصار رجلج خاله ذني يتزوجن لخاطر أطفالهن اني ليش اتزوج اخوه واني احبه تدرين يوميه اسمع صوته بالتلفون يله انام
معناها مراح تنسينه الا اذا تزوجتي وياسين يشبه
اني ماحبيت يزن على شكله
يزن اني گتله شوف امل بت جيرانه اذا عجبتك نخطبها الك اني شفتچ بالقرايه وعجبتيني ثاني يوم شافج گال خوش بنيه عرفچ والله مقسم تتزوجون اني الي ردتچ اول وهسه بعدني اريدچ بسل لياسين ولچ والله يزن كل ميجي بحلم يگلي مرتاح بس امل ماذيتني ام علي احچي ويه ابوها واخوانها هسه هي خطوبه مو زواج راسأ
من طلعت امي حچت وياي امل يزن چان خطيبچ مو رجلچ واخوانچ ممصدگين كل الي تسويه حب عبالهم غلطانه وياهن اعرف تفكيرهم
يمه يزن يسوي غلط شكوا بيه مو بيه عندي المكالمات مالته كلها خطبني وميقبل يطلع وياي
هذا تفكيرهم شنو تفسرين البچي ليل ونهار والحبسه بالغرفه وتركتي الكليه صديقاتچ متجاوبين تلفونهن اي، واحد يتقدملج تگولين انهزم منكم هسه اني عايشه وحاميتج اذا متت يزوجوچ لو چلب يتقدملج على الأقل ياسين. ظروفه زينه تطلعين من العراق ومأسيه ويعرف انت وفيتي لاخوه وامه رادتچ وعهد مني ماكو زواج بس خطوبه لحدمتعرفيه وتتعلقين بيه والله هسه بسرعة تحبيه لان يشبه اخوه
اخواني وابوي عرفوا وكل شويه رزاله وغلط اني بس عندي سؤال شلون يقبل يتزوج وحده مخطوبه لاخوه وتحبه اكيد مجبور كتبت رساله ليزن ادري متواصل والجهاز مغلق گتله تعال عليه بحلم فدوة اروحلك احچي وياي انت متت مرة وعفتني اموت يوميه اخذت منوم ونمت يمكن احلم
باليل اندگ الباب عرفت من امي ياسين ويعرب جايين يم اخواني يتعرف عليهم اني الحبوب ساطرتني. رجعت نمت الصبح حديث البيت ياسين شلون وصل. لامريكا ويدرس ويشتغل وعنده ورشه مال سيارات الظهر دگ تلفوني اني مااجاو ب حتى صديقاتي شفت رساله قريتها اني ياسين جاوبي الله يخليج قفلت التلفون حتى يعرف اني رافضه تكرر الاتصال ثاني يوم مجاوبت. دزت رساله هذا مو اسلوب اني مراح اگلچ اذا جاوبتي اگدر اتصل بيج من رقم امي وتجاوبين العصر اتصل جاوبت عرفت يريد يسمع رائي بالخطوبه سألته ليش قبلت وانت تعرف اني احب يزن جاوبني
اولا ابوي مات وهو مراضي عني اريد امي ترضى عني وثانيا امي تگول يزن بالحلم وصاها هيچ تسوي ثالثا يزن حاچيلي عنج عن اخلاقچ واعرف علاقتكم بريئه بس تحبون بعض ولي وحده راح اتزوجها هم راح يكون عدها ماضي على الأقل انتي چنتي ويه اخوي واني اعرف يزن اخلاقه لو شايف عليچ شي ماخطبچ وامي هم متمسكه. بيچ وتگول وفيه ومؤدبه
اذا تعرفني وفيه شلون تريدني انسى يزن واتزوجك
ليش تنسيه لاتجبرين نفسج على النسيان هو يجي لوحده من تفتحين گلبچ الحياة وعهد مني انطيج كل الوقت الي تريديه هسه خطوبه وعقد لان احتاجه بالمعاملة وتجين وقرري زواجنا اي وقت تريديه
ماادري ميهون عليه يزن
يزن اخوي مهاين علينا كلنا بس هاي الحياة وهو مرتاح احسن منه فاز بالجنه
بس الجنه ثمنه غالي فراگه صعب
لگيت نفسي گدام امر مفروض اهلي مراح يقبلون ارفض والولد متقبل حزني وامه رايدتني بس هاي غربه لأمي ولا ابوي ومااعرف ياسين شنو طباعه اذا راح اتزوجه علمود الشبه بينه وبين يزن بلكي اخلاقه همين مثله ولو مستحيل يزن ماكو مثله...يتبع
#انا_والماضي٩
#زينب_الموسوي
صارت الخطوبه رسمي وعقدنا بدون هوسه وحفله لان السنه بعد مطالعه ولان اني وياه ممقعتنين بهذا الزواج هو يريد يتزوج وينفذ إرادة امه واني اريد انسى والدليل.ياسين ورا يومين من العقد سافر واني قافله تلفوني من وصل لامريكا ظل يتصل بيه يحجي عن حياته شغله دراسته اموره الماديه عنده بيتين واحد
ساكن بيه واحد ماجر عنده محل تصليح سيارات ويدرس باليل حچينا عام يسألني شنو الالوان الي احبها لان ديأثث البيت مره سألني شنواكثر شي تحبيه بالدنيا جاوبته الدنيا ماتت بعيني من يوم وسكتت وتذكرت هذا خطيبي ميصير جاوبني كملي ليش سكتي من يوم موت يزن ليش مصرة تعذبين نفسج شراح يفيدج ترى حتى امي تقبلت موته وصابره قابل تحبيه اكثر من امي لو ماعندج ايمان بالله
انت گتلي متجبرني انساه
بس مو معناها تفكرين بيه ليل. ونهار لازم تحاولين تعيشين تذكري انت مرتي حرام عليج تفكرين بغيري يله روحي هسه احسن مااتعصب عليچ واگول شي يجرحچ ل
سولفت لأمي الصار واكيد امي تگول بهذلتني انت متستحين النسوان ترملن من رجالهن وبينهم نومه وگعده وتزوجن وراهم لچ يزن خطيبچ وما ت راح تخلين اخوه يكرها من وراچ عليمن فضحتي نفسچ والكل عرف بيچ
اذا هسه ياسين فسخ شنگول واخوانج راح يسكتون الچ صيري مثل البنات شوفي ايه صاحبتچ مو حبت ولد بالكليه وعافها وتزوجت ومتونسه وانتي حاطتلي الموبايل وتباوع صور يزن خطبها اربعين يوم وتريد تخلص عمرها كله تتذكره انطيني التلفون امسح كلشي
لاماما فدوه والله اموت الله يخليچ لا
اخذت التلفون ومسحت الصور والمكالمات اخر شي گالته عندچ خطيب عايش روحي خابري اخلي يدز صورهه الچ بقيت يومين ابچي على الصور لحدما جتي ام يزن علينا گعدت يمها وظلينا نسولف سألتها تلفون يزن عندچ انطون الچ گالت عد يعرب ومسح صورچ لاتخافين وظميناه محد يشوفه رجع ياسين يتصل و صرت حذرة بالحچي وياه گلي محصل عقد كفتريا بالجامعه ومسميها هوب سألني تعرفين شنو معنى هوب گتله امل
سميتها على اسمچ واذا اجيتي خليج تشتغلين بيها
گلت ويه روحي لو يدري يزن بيك تريد تشغلني بكفتريا جاوبته اني مااحب الشغل وانت ممحتاج
على راحتج اني قصدي تتسلين لعد ادرسي احسن
ولا اريد ادرس اريد اگعد بالبيت واجيب جهال
اي بين ميجون الجهال ادرسي الشهاده مهمه للبنيه وتخلصين و قت
الله كريم عندك بالبيت حديقه اني احب الحديقه وبيتنا ماكو
عندي حديقه وداشتغل بيها ارتبها
لا خليها اجي واني وياك نرتبها
هاهيه اتفقنا
تگدر تصورلي الحديقه و
هسه اصورلج الحديقة والبيت كله وابو البيت متريدين صوره
بكيفك اذا تريد دز
لا گولي دزلي صورك حبابه گوليها
يأبه دز صورك
تعرفون من شفت الصور عبالي يزن ياربي حسرة بگلبي اسمها يزن
مرت الشهور نتخابر وجى موعد سفري يعني راح اصير زوجه لواحد غير يزن وهذا ياسين شعاجبه من هذا ا لزواج. ربدت امي توصيني وابوي واخواني ودتني امي للزيارة الائمه قبل السفر توسلت بيها ازور گبر يزن وبست أيدها قبلت ودتني گعدت يم الگبر معقوله يزن تدري بيه يمك ومتگوم اطلع فدوة اروحلك والله مااريد اتزوج غيرك بس مغصوبه ياريت متزوجتك يوم واحد ومچان خليتهم يزوجوني بعدك ياريت تاركني ارمله صدوگ ا نت تريدني اتزوج لخاطرالله اذا تسمعني خليني احلم. بيك ظليت الى أن امي گومتني
خابر ياسين عرفت اول يوم اوصل الظهر وباليل يسوون عرس وحفله لان عيب گدام جماعته نبات سوا بدون عرس ذكرته هو وعدني منتزوج بسرعه گال بس عرس عيب من الناس...يتبع
#انا_والماضي بارت10
#زينب_الموسوي
وصلت يم ياسين كان المطار بيه أصدقائه وعوائلهم وصلنا البيت هو راح ويه أصدقائه ظلوا نسوان اثنين يمي حتى يجهزوني للعرس رتبن البدله عليه وكلشي حچيهن چان كله عن ياسين وأخلاقه وراح يدللچ عفتهن يسون اكل ونمت لان الطائرة والطريق شي متعب وخائفة لان تصرفات ياسين ممبين راح ينتظر مثل ماوعدني بدت الحفله وخلصت ياسين يراقب كل حركه
مني رجعنا للبيت الطريق كله هورنات ودگ وموسيقى راسي يريد ينفجر بالسياره ياسين انتبه على اديه گلي
شنو هاي الادين مخلصتها دلال والشغل على الچناين الاظافر مال واحده مغاسله مواعين ابد
منا وجاي راح اغسل مواعين لاتخاف
دخلت البيت ظل برا يم اصدقائه اتصلت بامي تعرفون شنو سألتني وجاوبتها كلشي تمام لا تقلقين وگلتلي عفيه بنتي صيري عاقله وانتي بغربه مالچ غير رجلچ انفتح الباب مااريد اباوع اعرفالي دخل شخص يشبه يزن بس مو هو اخوه وماادري من هاي اللحظه مسموحلي افكر بيمن شي ممتوقعته من يوم الي شفت يزن بالبدله العسكريه اول مرة واني احلم بهذا اليوم وياه هسه صار اخوه اني بذيچ الفترة كنت افكر بنفسي وبس مفكرت بياسين هم مثلي بشر يوم بالغربه يريد زوجه وماثث بيت وأجور طائره ومهر وحفله كنت اشوفه شخص يريد ياخذ مكان اخوه اول مدخل مااقترب ظل بعيد وسألني تعبتي مو
اي السفر مزعج والطائره اريد ارتاح شفتي البيت عجبچ اذا تريدين تغييرين اي شي گولي
لا بالعكس البيت كلش حلو وذو قك حلو
تعاي نگعد نسولف وبعدين نروح نام
باچر نسولف الله يخليك والله تعبانه
على راحتج روحي نامي
هو البيت كان غرفتين وحده زغيره والثانيه على أساس غرفتنا شافني اريد ادخل غرفه الصغيره سألني راح تنامين هنا گتله اي
بس هاي الغرفه مسكونه بيها جني نامي بغرفتج احسن
اذا بيها جني ليش ماثثها لعد للجن
بكيفچ روحي نامي تصبحين على خير ج
عرفت بدينا بدايه خطأ واني السبب بس هو وعدني ينطيني وقت الصبح گعدت على صوت الموبايل أصدقائه وأخوانه ظليت گاعدة بالغرفه مااريد اطلع مسويه نفسي نايمه دخل الغرفه بدون ميدگ الباب گمت من مكاني فزيت شافني
ها شبيچ فزيتي من شفتيني
غير انت گتلي جني وخليتني الليل كله ماانام
تستاهلين حتى تنامين بغرفتچ وتبطلين دلال
انت گتلي اخذي الوقت الي تريديه
اي مو كافي اربع اشهر مخطوبين
خلي تصير خمسه شيصير
لا هواي شهر خمس ايام ميخالف
اوكي خمس ايام
چنت اريده يطلع من الغرفه گتله اي شي من اليوم الأول الخامس كانت طلعات وعزايم ونگعد نسولف وداني بكل مكان ولايتهم من كثر العرب البيها تحس نفسك بدوله عربيه عرف اني مااعرف اطبخ لان بيتنا كان الطبخ على نسوان اخوتي وامي هو يعرف ظلينا نوگف سوا ويعلمني ومرات يجيب جاهز من يجي الليل انهزم وأقفل غرفتي اعرف تصرف غريب بس يزن كان حاجز بينه وهو كل ميشوفني صافنه يگلي بيمن تفكرين اگله اهلي اليوم الخامس باليل
شغل اغاني واخذني من اديه گعدني يمه بچيت اول مقترب مني گلي روحي نامي اليوم الي بعده الصبح گتله تعال وياي للمطبخ واگفين اثنينه بالمطبخ طلع مي من الثلاجه وصبه عليه سالته شدتسوي جاوبي بارد المي انتي ابرد منه اقترب مني بدا يبوسني دفعته حيل ودموعي نزلت ابتعد اول جمله گالها منين اجيب يزن هسه
كرهت الدنيا من گالها اذا يعرفني احب يزن ليش اتزوجني جاوبته يايزن منو جابه بالطاري
ها لعد والصفنات ودموعچ هاي عليمن لچ وفأئچ اله صار خيانه إليه من يوم الي انكتب اسمي واسمچ سوا بعقد واحد انتي مرتي وماكو واحد يتحمل مرته نايمه بغرفة ثانيه والله ليش حزينه على خطيبها الميت واني شنو طرطور
والله مو هذا السبب وانت راح تخلص عمرك وياي يوميه تگلي يزن اني ردت وقت اعرفك بيه وانت گلت ميخالف
يعني هسه انتي لو متزوجه واحد غيري ينتظرچ وينطيچ وقت تدرين بشعوري شنو بليلة عرسنا من عفتيني ورحتي بغرفة ثانيه لعد المن سافرتي و١٩طيران گوليلي شنو الحل وياچ
خلي نطلگ احسن وارجع لاهلي انت متتحمل ومراح تنسى ليش وعدتني اذا متگدر على الوعد
لچ بابا اني رجال وانتي مرتي شنو وعد شنو طلگني الله يسامحچ يمه على هيچ زواج شوفي اني طالع من البيت وخابريني من توصلين لقرار المن باقي يمچ للتعذيب جمع اغراض وملابس وطلع ولو باقي دقيقه بعد يمكن يذبحني اي احد يحكم عليه هسه راح يگول اني السبب وفعلا اني السبب بس والله مو بيدي وصعبه الولد نسخه من اخوه وخفت يتقرب مني اتصور يزن واظل بهالوضع طول العمر مزوجه واحد وافكر بواحد ثاني لحد ميجيني يوم ويفيض بيه وماتحمل الخيانه للرجال الماخذني ويمكن بذيچ الساعه عندي اطفال منه هذا كان تفكيري يعني شصار اذا انتظر شنو عند اكسباير مكتوب...يتبع
#انا_والماضي النهاية
#زينب_الموسوي
ظليت بالبيت وحدي فكرت ويه نفسي هواي ياسين هسه رجلي ولازم اكون زوجه اله مابيه حيل كسر جديد وحچي العالم واحد مات واحد طلگها قررت امثل اني شايفه مشاهد حب بالمسلسلات والاغاني وحافظه حواراتها اتذكر صديقتي ايه هم مرت بنفس التجربه حبت واحد وعافها وتزوجت سألتها شلون گدرتي گالت بس اول ليله صعبه تصوري نفسچ تمثلين مشهد حب وانتي البطله وبعدين تتعودين بس هو لاخابر ولا سال الجو برد حيل ومااعرف اشغل تدفئه گلت اخابره واگله بحجة التدفئة بدلت لبست شي ابيض من يشوفه راح يفتهم وسويت شعري ومكياج اتصل هو جاوبته سويت نفسي اگح گلي اريد اسافر باچر لكندا تريدن شي قبل لااروح
البيت بارد تعال شغل التدفئة تمرضت من البرد .
شبيچ مريضه
متسمعني اگح تعال شغل التدفئة وروح مراح اچلب بيك گال عشر دقائق واجي
اول مشفت سيارته شغلت السشوار على وجهي على أساس مصخنه اني شايفه هذا بفلم مصري ورحت لغرفته وتغطيت راح الغرفه الثانيه ملگاني افتهم
لزم وجهي لچ هاي شنو حرارتچ من شوكت راح يجيب الادويه بالحمام بدا تاثير السشوار يروح من انطاني الادويه شاف اللابسته والله امرچ عجيب من اني موجود لابسه دشداشه ومن اطلع مصلخه وتگولين البيت بارد
وين چنت صار يومين ويامن.
بالفندق لوحدي
احلف جنت لوحدك .
والله لوحدي هاي الوصالات وشوفيها شنو تغارين
وليش مغار مو رجلي
ها من شوكت صرت رجلچ وشعندچ تنامين هنا
بيتي وبكيفي وين ميعجبني انام
شفته راح بدل واجى نام يمي خليت يسوي كل الي يريده اني مالي علاقة بالموضوع ومن تجي عيني بعينه ابتسم هو مشهد تمثيلي علي تتوقف حياتي الجايه لو اصخمها لو اصير زوجه مثل الاف الزوجات الي حبيبها تركه والي انغصبت والي مات ولگت نفسها وي واحد ثاني خلص المشهد البطل چان فرحان واني سويت نفسي فرحانه وحتى اكمل الدور اعرف ياسين يريد يشوف ردت فعلي اتقربت منه ومسحت وجه سألني ندمانه
لا ليش اندم انت زوجي ندمانه لان عاندت بالبدايه بس ردت وقت انت افتهمت غلط وگلبتها مأساة
والله امل اني غلطان
والله غلطان منو عندي غيرك حبيبي انت
لچ امل دتحچين صدگ وتگولين حبيبي
اكيد حبيبي ليش انت متحبني
شلون مااحبچ هسه الايام تثبتلچ والله الا اخليچ اسعد انسانه بالدنيا باچر اجيب دش واشر تعرفين شنو غساله مواعين حتى اديچ متخرب وگولي اي شي تريديه گولي
مااريد شي سلامتك بس صدك شتسوي تروح لكندا
لچ ياكندا ردت اخابرچ اتحارش بيچ
واني ترى مچنت مريضه بس ردتك تجي
تكررت المشاهد التمثيليه كلها ناجحه وممتعه بالنسبه الياسين
وحتى اخليه ينسى اني كنت حبيبة وخطيبه اخوه افتعلت الغيره عليه وين رايح اروح وياك ليش خال عطر ليش تاخرت ليش متجاوب تلفون بسرعه لان الي يحب يغار ويهتم بهاي التفاصيل لحد ما حسيت على نفسي التمثيل صار حقيقه اريده وملهوفه عليه واشتاقله وأغار عليه ضميت يزن بزاويه عزيزه بحياتي اسمها ذكرياتي الي بيوم ما كانت اغلى ما املك سمحت لنفسي اسميه ماضي حبيته وحلم تمنيت أعيشه وياسين حاضر ومستقبل زوجي الي مختارني ولااختاريت القدر جمعنا وحبينا بعضنا حب موده ورحمه مثل ما الله وصف الزواج حاولت كل جهدي اكون مخلصه اله حتى بالتفكير والحنين من احس بيه اتصل بياسين نطلع نسولف نطبخ اي شي يذكرني اني شايله اسمه وميستاهل أنزله لو اسئ اله صار سنتين وياه ما جرحني بكلمه وصار عنده عادي يحچي عن اخوه ويسويله ثواب ويگول لو مايزن ماعرفتچ چنا مقررين نسمي ابنه يزن لكن اخوه يعرب صار عنده ولد قبلنا وسماه يزن احنا زرعنا شجرة بالحديقه وسميناها يزن واذا صار عدنا طفل راح نسميه عراق
قصتي هاي تذكير بسيط لدماء الالف الشباب الي نزفت دمائهم من اجل العراق وشاهد على وفائي لرجال كان يستحق الوفاء وتوقفت عنه لمن صار وفائي خيانه لحدود الله سبحانه وتعالى هذا الي تعلمته من الشهيد البطل يزن الله يجعل مثواه الجنه وقصتي إشارة بسيطه لحياة ومعاناة الزوجات والامهات والخطيبات والحبيبات بعد رحيل اعزائهم الله يصبرهن ويجازيهن على صبرهن خير الجزاء شكرا لكل المتابعين