بعدها ايهاب ابتسم ابتسامة عريضة ، وشافو لبعض ل لحظات ، حست باعجاب وجاذبية تجاهه ، وانحرجت ف حطت عيونها ع اوراقها ، وهوا سألها : ما شفتكش قبل هنايا ، قصدي تقريباً نعرف طلبة الادبي كلهم اني !😎البنت : اي صح ، اني روحت للبلاد من اسبوعين بس ، كنت في بريطانيا ل 3 سنين ، وبعدها رجعت !
ايهاب : اووو بريطانيا مرة وحدة ! شن كنتي تديري غادي ؟
البنت بتوتر : نقرا !
ايهاب : والله كان زيك معاش نرجع للبلاد !
البنت ضحكت ضحكة خفيفة : مانقدرش استاحشت البلاد ! نبي نقضي فيها اكثر وقت ممكنايهاب ابتسم لها ، وهي انحرجت للمرة المليون من نظراته 🙈 وبعدها استطردت : راهو غدوة بكري تعالى للتقوية !
على جيت ولاء صديقة ايهاب ، وهوا سألها : وين ؟
البنت : هنايا ف الجامعة ، اغلب الوقت نقروا ف الحديقة برا ، ونقعمزوا ع العشب !ايهاب يمازحها : صار حركات سقراطية ! 😂
ضحكت بخجل ، ع وصول ولاء ليهم.
ولاء بجمود : هلا !
هما : اهلين !ولاء ماعطتش اي اهتمام للبنت ، وقالت بازدراء لايهاب : ماشالله بكري اليوم
ايهاب بجفاف : وين بكري عادي !
ولاء : امم ، به هيا نوض ! المحاضرة بتبدأ !
ايهاب قام كتابه ف ايده وناض يتململ معها : اوكي هي !وقال للبنت بابتسامة عريضة ع وجهه : سلام !
وهي ردت بنفس الطريقة : سلام !ومشي هوا و ولاء ، ولما قرّبوا من الباب تذكر انه ما سألش البنت ع اسمها ، فالتفت ولقاها حاطة نظرها عليه ، تراقب ف خطواته ، وقال : ما قلتيليش ع اسمك !
كانت حاطة ايدها ع خدها مبتسمة ، وقالت : جيلان !هوا ابتسم ، وبعدها طلع مع ولاء.
ولاء سألاته بجمود : منو هادي ؟!
وهوا رد ببرود وحرك كتافه لا مبالي : جيلان .
ولاء تنرفزت من طريقة رده عليها : اممم !
وصلو للقاعة وهي قالت : ماصارليش ، ماخاطريش فيها المحاضرةايهاب عقد حواجبه وما حبش يناقشها : براحتك ! نتلاقو !
وخش(دخل) وهي قعدت برا متنرفزة ، قعدت تتمشى برا وتلاقت مع صاحباتها من كلية الفنون ؛ سلمو عليها ،وحضنوها : استاحشناك !
ولاء تنهدت : حتى اني !
ردت عليها وحدة منهم : خيرك ؟ مش عاجبتيني !
ولاء : متضايقة
صديقتها : انتي وايهاب ؟
ولاء : هوا وينه ايهاب ؟ مش عاطيني وجه ! سيبت (تركت) تخصصي اللي نحلم بيه ، تصميم الازياء ، وجيت نقرا معاه وهوا ولا كأنه .ردت عليها صديقتها الثانية : به هوا ما يعرفش بتضحياتك ! كيف تبيه يجري وراك ، هذا غير انك ديما معاه ، خليه يستاحشك شوية
ولاء عصبت : شن قصدك ! اني نجري وراه؟ لمعلومك ما نذل ف نفسي لحد و يجروا وراي زي النمل ، وانتي عارفة .صديقتها : به خلاص ما تعصبيش
ولاء بعدت عليهم !ولاء كان كل همها تبعد ع صديقاتها اللي نفخولها قلبها بالكلام ع ايهاب ، كانت مش متحملة ولا كلمة سيئة عليه ، بس مش عاجبها عدم ادراكه لحبها ليه ؛ نفسيتها تعبت هلبة وكل مرة كانت تحاول تخلي الكلية بس اول ما تشوفه تبرد ، وتقول ف نفسها وجوده يكفيني !
أنت تقرأ
لا تَذْهبي (بالليبي)
Romanceقصة تضحية و حب من نوع آخر روايتي هادي هي الاكثر شعبية على انستغرام ❤ باللهجة الليبية المبسطة سهلة الفهم ? قراءة ممتعة ~(^з^)-♡