#بداية_جديدة
#الجزء_الثاني_من_وردة_الياسمين
#بقلم_أميرة_عادل
الحلقة الثانية عشر
اسلام قاعد في اوضته ماسك موبايله وعمال يبصله .. وبعدين طلع رقم وداس اتصال
مي : الو
اسلام (بتردد) : الو يا مي .. معلش انا عارف اني المفروض ما اتصلش .. بس .. كنت عايز اتكلم معاكي
مي : اسلام .. انا خلاص اتكتب كتابي .. بلاش احراج ارجوك
اسلام : انا عارف .. والف مبروك ..
مي : الله يبارك فيك .. عقبالك
اسلام : انا بس كنت عايز اسالك على حاجه وهقفل على طول
مي : اتفضل
اسلام : هو انتي فعلا كنتي بتحبي جارك من زمان
مي : مش فاهمه ايه سبب السؤال دلوقتي .. بس انا هرد عليك عشان انت ليك حق عندي ... ايوه بحبه من زمان
اسلام : طب وليه وافقتي اننا نرتبط اصلا .. طالما بتحبيه
مي (بتاخد نفس جامد وبتخرجه براحه ) : بص يا اسلام .. انا هقولك كل حاجه بصراحه ومن غير زعل
اسلام سكت عشان مي تكمل
مي : انا بحب عبدالله من زمان من وانا صغيره .. طول عمري وانا بحلم بيه جوزي وحبيبي .. لما قلتلي انا معجب بيكي .. منكرش اني اتشدتلك .. واحد امور .. مؤدب .. البنات كلها هتموت عليه .. واختارني انا ...وافقت يمكن زي ما قلت كنت برضي غرورى الانثوي .. معرفش .. بس كل ما تقولي احدد معاد مع بابا .. معرفش ليه كان قلبي بيتقبض قوي .. كنت بحاول آخر الموضوع علي اد ما اقدر لحد ما استقر .. لدرجه ان اخر مره لما تكلمنا وقلتلي اروح اكلم بابا وكده .. يومها من ساعه ما سيبتك وانا بفكر اني مش هقدر اكمل وانا قلبي متعلق بحد تاني .. لاني كده هكون بظلمك قبل ما اكون بظلم نفسي .. وفي نفس اليوم عبدالله فاتح بابا في انه عايز يتجوزني .. حكيت ليارا .. وهي ما ادتنيش فرصه افهمها حتي .. قالتلي لازم احسم قراري واني كده حرام عليا .. واتخانقت معايا .. وقعدنا يومين مبنتكلمش ... يمكن ترتيب من ربنا ان عبدالله يتقدملي في نفس اليوم عشان احسم الموضوع بسرعه .. وما اترددش تاني .. او اتكسف اقولك وافضل ااجل .. بس اللي متاكده منه .. ان علاقتنا كان محكوم عليها بالفشل .. لان الحب اساس اي حياه زوجيه سعيده طبعا جنب التفاهم والتكافؤ وحاجات كتير .. بس هو البذره او الحجر اللي بتبني عليه الباقي ... ولا انا حبيتك ولا انت كمان .. يعني الحته دى مش موجوده .. فهيبقي بيت مهزوز اي زقه توقعه ... وقبل ما تقول اي حاجه .. اه انا متاكده انك مكنتش بتحبني .. يمكن كنت معجب بيا لكن حب لأ .. لاني عمري ما شفت لمعه او نظره الحب في عنيك وانت بتكلمني .. بالرغم اني ... (سكتت شويه ) بشوفها لناس تانيه .. لو كنت اخدت بالي منها ساعتها .. مكنتش هوافق اصلا يبقي في كلام بينا .. نصيحه .. دور علي اللي بتحبها يااسلام .. ومتتجوزش اي حد والسلام تكون شايف انها مناسبه .. وتقول الحب هيجي بعد الجواز ..
اسلام كان ساكت خالص ومركز في كل كلمه مي قالتها .. وبيقارن كلامها مع كلام يارا .. ولما مي قالت بتشوف لمعه الحب في عنيه لناس تانيه .. شاف صورة يارا قدامه وابتسم
مي : انت معايا
اسلام : اه معاكي .. اسف اني ازعجتك .. والف مبروك .. ربنا يسعدك ان شاء الله
مي : اسلام .. عايزاك تسامحني اني مقلتلكش الكلام ده من الاول
اسلام : انا سامحتك .. عارفه ليه .. لاني كنت فاكر اني حبيتك واتعلقت بيكي واني هتحطم لما سبتيني وكده .. لكن اللي حصل مش كده خالص .. الموضوع كان عادي بالنسبه لي .. انا كان كل اللي مضايقني .. كرامتي كانت وجعاني .. كنت حاسس انك لعبتي بيا مش اكتر
مي : والله انا مكنتش بلعب بيك ولا كان في نيتي ابداا.. انا زي ما قلتلك ان
قاطعها اسلام : خلاص يا مي .. مفيش داعي للكلام ده تاني .. اه علي فكره .. لو تحبي ترجعي الدرس تاني انا معنديش مانع
مي (بفرحه) : بجد .. انا متشكره جداااا جداا بجد
اسلام (بضحك) : يالا سلام
قفل اسلام مع مي وهو مبسوط قوي .. اما مي بعد ما قفلت بصت جنبها ...
مي : كده احسن صح
عبدالله : ايوه طبعا ..(كمل بعصبيه بيحاول يداريها ) ولو اني كان هاين عليا اقوم اطبق في زماره رقبتك وانتي بتكلميه عن المشاعر والزفت .. بس انا عزرتك وعزرته عشان اي واحد في مكانه كان هيعمل اكتر من كده ..
مي وهي بتمسك ايده وبتلعب في صوابعه : اهون عليك.. وبعدين مش انا قلتلك قبل ما ارد وانت قلتلي ردي عادي ..
عبدالله بهدوء من لمستها : ايوه .. عشان .. عشان متفضليش عايشه بعقده ذنب ناحيته طول عمرك .. وكمان عشان انا اكسر حوار اسلام ده من جوايا خالص
مي بفرحه وهي بتبوسه في خده : حبيبي يا ناس .. ربنا يخليك ليا
عبدالله (بغمز) : ده ايه ده .. لا احنا اتطورنا قوووي
مي (بكسوف ) : لا دماغك متروحش لبعيد .. انا بس من فرحتي معرفتش امسك نفسي
عبدالله (بغيظ) : تعالي هنا يا هانم .. يعني ايه تقوليله.. انت واحد امور دي ان شاء الله .. وكمان البنات هتجنن عليك
مي (بضحك) : بتغير
عبدالله : انتي شايفه ايه !!
مي (بدلع) : بحب اسمع
عبدالله (بحب) : انا بغير عليكي من نسمه الهوا اللي بتطير جنبك
مي (بصتله بحب وقالت ) : طب انت مخدتش بالك وانا بقول ... عبدالله بحبه من زمان .. وكنت بحلم بيه جوزي وحبيبي ولا ايه !!
عبدالله (ضحك وعرف انها بتتوه الكلام ) : لا خدت بالي .. بحبك يا مجنناني
........................................................................................................................
تاني يوم في الكليه .. قعدت مي مع يارا وحكتلها عن مكالمه اسلام امبارح ..
مي (براحه) : انا مبسوطه قووي قوي ان اسلام فهم الموضوع صح .. وسوء التفاهم ده خلص خلاص .. وهرجع احضر معاكي الدرس من بكره كمان
يارا (بسعاده) : الحمد لله يا حبيبتي .. وانا مبسوطه قوي انك هتحضري معايا تاني .. لاني الحصه اللي فاتت كنت هطق وانا قاعده لوحدي
مي (بغمز) : ليه مش كنتي مع امجد
يارا : مي بطلي عبط الله يكرمك .. انتي عارفه اني مبفكرش في امجد اصلا
مي : مش يمكن تكوني غيرتي رايك .. وبعدين مبتفكريش في امجد .. طب بتفكري في مين هاا ( وغمزتلها)
يارا (بعصبيه) : يووووه مش هنخلص .. انا قايمه وسيباكي
يارا بتقوم ومي بتقوم وراها : رايحه فين يا مجنونه .. استني بس
يارا كانت متعصبه وماشيه بسرعه ومش باصه قدامها كالعاده .. خبطت في اسلام
يارا بصتله وهي بتقول : سوري مخدتش (اول ما شافته .. قالت في سرها ... يادي النيله وكملت بارتباك) انا اسفه والله مكنش قصدي ..
اسلام بصلها قوي شزرا .. وسابها ومشي من غير ولا كلمه
يارا (بعصبيه ) : وده ماله ده كمان .. ما انا اعتذرتله .. اعمله ايه يعني
مي كانت واقفه وراها بتبص عليها وبتضحك قوي
يارا خدت بالها لفت بصتلها وقالت بعصبيه : بتضحكي علي ايه مش فاهمه ..
مي (وهي بتكتم ضحكها ) : مبضحكش .. يالا بينا علي المحاضرة يا ختي
يارا مشيت وهي متنرفزه جدا من اسلام ومستحلفاله
.....................................................................................................................
ايهاب .. راجع البيت بعد الشغل .. دخل علي نادين بالراحه عشان عايز يخضها ..
لقاها قاعده بتقلب في صور بيبيهات علي الموبايل ودموعها نازله علي وشها وسرحانه ...
ايهاب (عايز يفهمها انه لسه واصل ومشفهاش .. رجع علي باب الاوضه وقال بصوت عالي) : نادو .. حبيبتي .. بتعملي ايه
نادين مسحت دموعها بسرعه وقفلت الموبايل : خضتني يا بوب .. مش هتبطل الحركات دي
ايهاب وهو بيقرب منها ( وعايز يضحكها) : اعمل ايه بقا .. عاده خلاص
ايهاب باس راسها وحضنها : الجميل يجهز النهارده عشان هننزل مشوار بالليل
نادين بترفع دامغها تبصله : مشوار فين ؟
ايهاب : هنروح للدكتور تاني زي ما انتي عايزه
نادين اتعلقت في رقبته وهي بتتنطت من الفرحه : بجد .. بجد يا حبيبي
ايهاب وهو مبسوط عشان قدر يفرحها : بجد طبعا .. انتي تأمري وانا عليا التنفيذ
نادين (بحب وسعاده) : ربنا يخليك ليا يارب
ايهاب : ويخليكي ليا حبيبتي .. بس علي شرط
نادين : شرط ايه ؟؟
ايهاب (بيبصلها بترقب) : لو يعني .. لو ربنا ما ارادش .. ان يحصل حمل .. يبقي نرضي باللي كاتبهولنا .. ومتقوليش نجرب تاني .. ولا اشوف الدموع اللي في عنيكي دي
نادين سكتت ومتكلمتش
ايهاب : ها يا حبي .. موافقه .. انا خايف عليكي وبعمل ده عشانك .. صدقيني
نادين بهدوء : موافقه
........................................................................................................................
تاني يوم .. في السنتر اللي فيه درس بتاع يارا ومي مع اسلام
دخلت يارا ومي من بدري وقعدوا سوا يتكلموا ويضحكوا .. شويه ولقوا امجد ومعاه احمد بيقرب منهم
امجد : اهلا يا مي .. رجعتي تحضري تاني يعني
مي (برخامه) : اه عندك مانع .. مرضتش اسيب صاحبتي لوحدها
احمد : ازيكم يا بنات عاملين ايه .. امال فين باقي الناس
مي / يارا : الحمد لله
مي : زمانهم جاين هيروحوا فين يعني
امجد : ازيك يا يارا
يارا : الحمد لله ازيك انت
امجد : الحمد لله .. (وبص لمي بغيظ) كنت كويس لحد ما شفت مي
مي : نعم!!!
احمد كتم ضحكه هو ويارا ..
امجد اخد كرسي وراح حطه جنب يارا وقعد واحمد راح قعد جنبه
مي ميلت علي يارا وبتقول بصوت واطي : مش قلتلك الواد الرخم ده عينه منك
يارا (بضحك) : حرام عليكي هو عملك ايه ..
مي : وده اسمه ايه ده ان شاء الله .. قلبك بدأ يحن ولا ايه ( وغمزتلها)
يارا : بقولك ايه .. قلبي لا بيحن ولا بتاع .. انا مليش في الجو ده .. واسكتي بقا عشان محدش يسمعنا
قرب عليهم باقي اصحابهم وسلموا عليهم وقعدوا يتكلموا ويضحكوا سوا .. ودخل اسلام عشان يدي الدرس
اسلام : صباح الخير يا دكاتره
كلهم : صباح النور
اسلام وهو بيبص ناحيه يارا اللي شافها جنب امجد فقال : مش عايز اي كلام جانبي لو سمحتم
يارا بصتله قوي بغيظ .. راح لف وشه ناحيه ال board وبدأ شرح ...
في نص الحصه تقريبا ..
امجد بصوت واطي : يارا .. انتي فهمتي الحته دي
يارا بنفس الصوت الواطي : اه .. بيقول .....( بتشرحله الجزء اللي سال عليه)
اسلام اخد باله و وقف شرح .. وسكت خالص .. الكل سكت طبعا ..
اسلام (بصوت عالي و حده) : هو انا مش قلت مش عايز كلام جانبي .. ولا كلامي مبيتفهمش .. عايزين ترغوا اتفضلوا بره عندكم الكافيتريا
يارا (من كتر نرفزتها قامت وقفت ) : اولا .. احنا مكناش بنرغي ده كان بيسالني عن ........ وانا كنت بقولهاله .. ( وكملت وهي بتلم حاجتها ) ثانيا .. اسفه اني ضيعت وقت حضرتك الثمين وعطلت الحصه .. عن اذنك
امجد : استني يا يارا ..( وبص لاسلام) انا اللي غلطان يا دكتور اني سالتها .. بس مرضتش اضيع وقت الحصه .. وقلت هفهم بسرعه واكمل تركيز مع حضرتك عشان افهم الباقي
عدت يارا من قدام مي .. ولسه هتمشي
اسلام (بعصبيه ) : استني عندك
يارا من خضتها من صوته .. وقفت مكانها متحركتش
اسلام (بحزم) : انا مقولتلكيش تخرجي .. اتفضلي ارجعي مكانك .. انا مبحبش الدلع ده
يارا فضلت واقفه مكانها عايزه تمشي .. بس مش قادره تحرك رجليها .. مي عماله تشد فيها بالراحه عشان ترجع تقعد ... رجعت يارا وقعدت مكانها وحطت كتبها قدامها وسانده ايدها الاتنين عليهم ..
اسلام وهو بيوجه كلامه لامجد : يا ريت لو اي حد مش فاهم حاجه .. يسالني انا
واداهم ضهره وكمل شرح .. وسط همهمات الطلبه اللي بيتكلموا عن اللي حصل ..
اسلام وهو ضهره ليهم : مش عايز اسمع صوت
كله سكت ..اسلام بيكمل شرح .. يارا كانت ماسكه دموعها بالعافيه عشان متنزلش .. بس عنيها كانت بتلمع من كتر الدموع المحبوسه فيها .. مي مدت ايدها طبطت علي ايد يارا عشان حاسه بيها .. يارا طبطبت بايدها التانيه علي ايد مي وشالت ايدها ربعتها قدامها .. كانت حاسه ان لو مي استمرت تطبطب عليها دموعها هتنزل ومش هتعرف تمسكها
اسلام اخد باله من كل ده .. وكان مضايق من نفسه جداا انه شايف دموع يارا المحبوسه .. ومش عارف عمل كده ليه اصلا ... اول مره يتعصب علي حد في درس ليه بالشكل ده ... طول الحصه وهو بيشرح .. وهو بيأنب نفسه علي اللي عمله
خلصت الحصه ... وقبل ما حد يتحرك
اسلام : كده خلصنا النهارده .. في حد عنده اي اسئله
كلهم : تمام يا دكتور .. مفيش
اسلام : انا اسف يا دكتور يارا اني اتعصبت عليكي .. تقدروا تتفضلوا
وبدأ يلم حاجته بالراحه وهو متابع رد فعل يارا
يارا (بصتله باستغراب علي عصبيه وهي بتقول لنفسها ) : ده مجنون ده ولا ايه
امجد (بحنان) : انا اسف يا يارا ..
يارا : محصلش حاجه عن اذنك
كانت مي لمت حاجتها .. وخارجه ورا يارا وهي بتهمس : وده اسمه ايه اللي عمله اسلام ده ها
يارا مشيت ومبتروضش عليها .. ومي وراها لحد ما وصلوا عربيه يارا .. ركبت يارا وركبت مي جنبها ... سمحت يارا لدموعها اللي كانت محبوسه انها تنزل
مي لفت يارا ليها .. بقي كل واحده ضهرها للباب و حضنتها بالراحه وهي بتطبطب عليها وبتمسح علي شعرها
مي (بحنان) : خلاص بقا يا حبيبتي .. محصلش حاجه لكل ده .. وبعدين هو اعتذرلك قدام الكل اهه
يارا (من بين دموعها ) : انتي شوفتي بيعاملني ازاي .. مش من النهارده .. مش فاهمه ماله ده .. زي ما اكون قتلاله قتيل .. ولا اكون مراه ابوه
مي بضحك وبعدت يارا عنها وبتبصلها : يخربيت فقرك .. بتألشي وانتي بتعيطي
يارا (دموعها قلت ) : مش طايقاه بجد .. انا يتعصب عليا كده ليه .. مش قادره افهم
مي لسه هترد .. كانت عربيه اسلام وقفت جنب عربيه يارا .. من ناحيه شباك يارا .. وفتح الازاز اللي ناحيه الكرسي اللي جنب عربيه يارا
اسلام : واقفين كده ليه .. في حاجه في العربيه
يارا اول ما سمعت صوته رفعت راسها عدل وفضلت زي ما هي مدياله ضهرها
مي (بابتسامه) : شكرا يا اسلام .. العربيه مفيهاش حاجه .. هنمشي دلوقتي اهو
اسلام (بتردد وهو نفسه يكلم يارا ويصالحها بس مش عارف .. فقال ) : طيب
وبصلهم وساق عربيته ومشي ... اما يارا لفت قعدت عدل ومسحت دموعها ودورت العربيه ومشيت وسط ضحك مي اللي مش مفهوم واللي كان غايظ يارا
........................................................................................................................
ياسمين حياتها مفيهاش جديد بين حضانه سيلا وشغل البيت وشغلها الاون لاين ويامن .. ومكنش في جديد في حياتهم
عمرو جاب فعلا ليسرا واحده ست كبيره تقعد معاها وتساعدها طول اليوم .. وتمشي بالليل .. وده ريح يسرا قووي
نادين وايهاب مستنين المعاد اللي الدكتور هيحدده عشان تعمل العمليه
اما يارا واسلام ففضل الحال بينهم زي ما هو ... يارا بقت بتتجنب اسلام علي اد ما تقدر .. بس هو مش سايبها في حالها .. لحد ما جت اجازه نص السنه
مي بتكلم يارا : بقولك هنطلع رحله الاقصر واسوان
يارا : لا مليش مزاج
مي : ليه يا يويو
يارا : كده .. مش عايزه اطلع انا مع سي اسلام ده وهو المشرف بتاع الرحله ..
مي (بضحك) : سي اسلام
يارا (بغيظ) : ايوه مش ناقصه نكد انا .. ويقعد يتخانق معايا ويكشر في خلقتي .. بدأت احس اني مراه ابوه فعلا ...
مي : ههههههه
يارا : انا مش فاهمه بيعاملني كده ليه .. ده انتي صاحبه المشكله اصلا .. بيعاملك عادي جدا .. انا مالي انا
مي : بقولك ايه .. انتي طالعه كده كده .. انا رحت النهارده انا وعبده دفعنا لينا وليكي
يارا : مع نفسك يا ماما
مي : بقولك ايه انا دفعت خلاص .. وبعدين بابا وافق اصلا عشان انتي رايحه ... واتطمن انك معانا
يارا (بضحك) : الحج قلقان منك يا بت ولا ايه
مي (بضحك) : مش عارفه .. مع اننا بنعملش حاجه والله .. المهم انا كلمت طنط اصلا الصبح وقلتلها وهي وافقت .. ملكيش حجه
يارا : بس ..
قاطعتها مي : ما بسش..
...................................................................................................................
يامن رجع من الشغل..
يامن : ياسووو .. انتي فين ؟
خرجت سيلا جري عليه
سيلا وهي بترفع ايدها عشان يشيلها : باباي حبيبي
يامن بيشلها : حبيبه بابي .. وحشتيني قوي .. اد كده .. وبيبعد ايده عنها
سيلا ضحكت : انت كمان وحشت سيلا .. فين الشيكولاته
يامن وبيحط ايده في جيبه ويطلع منها شيكولاته : اه يا نصابه .. مبتسلميش عليه غير عشان عايزه حاجه
ياسمين وهي خارجه من الاوضه ورايحالهم : طالعالك
يامن : والله !!!.. بقا هي طالعالي ها (وبيقرب منها )
ياسمين (بضحك) : انت بتزعل من الحق ليه .. مش فاهمه .. ههههههه
يامن : صبرك عليا انا هوريكي كلمه الحق .. بس مش دلوقتي .. يالا روحي البسي ولبسي سيلا عشان خارجين
ياسمين : رايحين فين دلوقتي .. مش هتتغدي
يامن : هنتغدي طبعا بس في حته تانيه
ياسمين : الله .. عازمنا علي الغدا .. اهو انت كده حبيبي وكفاءه
يامن : هههههههههههه
ياسمين : بس مش كنت قلت من بدري بدل وقفه المطبخ .. يالا تتعوض
يامن : اخلصي يا رغايه ... بدل ما اغير رائي
ياسمين (بضحك) : قال تغير رايك قال .. هو دخول الحمام زي خروجه برضه
يامن (بضحك) : لا طبعا .. الواحد بيدخل تعبان .. وبيخرج ايه بقا .. مقولكيش راحه كده وخفيف خفيف
........................................................................................................................
في نفس الوقت عند ايهاب
ايهاب : نادو .. حبي فينك
نادين : انا هنا يا بوب في المطبخ
ايهاب راحلها المطبخ ...
ايهاب (وهو بيحضنها من ضهرها ) : الجميل بيعمل ايه ؟
نادين : بعمل السلطه خلاص .. علي ما تغير هدومك يكون الاكل جاهز
ايهاب بيمسك السكينه والخياره اللي كانت بتقطع منها وبيحطهم في الطبق
ايهاب : لا يالا ادخلي انتي البسي عشان عازمك علي الغدا بره
نادين : خليها بكره .. انا خلاص خلصت الاكل
ايهاب وهو بيمسكها من ايدها وبيخرجها من المطبخ : يالا بقا بطلي غلاسه
نادين : حاضر
..................................................................................................................
نزل ايهاب ونادين ويامن وياسمين وسيلا واتقابلوا قدام العماره .. نادين وياسمين سلموا علي بعض
ياسمين : احنا خارجين سوا ولا ايه
نادين : مش عارفه .. ياريت بقالنا كتير مخرجناش سوا
ياسمين : احنا كنا رايحين نتغدي .. تعالوا معانا
نادين : واحنا كمان .. ايه رايك يا بوب
ايهاب ويامن بيضحكوا : احنا اصلا نازلين سوا .. يالا اركبوا
ياسمين / نادين : تمام
وصلوا مكان هادى عباره عن فلل قدام البحر ..وقفوا قدام فلتين صغيرين علي الناحيه التانيه من البحر وركنوا العربيات
يامن لياسمين : يالا
ونزل .. نزلت ياسمين ونزلت سيلا
ياسمين : هنروح فين ؟؟
نزل ايهاب ونادين من عربيتهم
نادين : انا مش فاهمه انتوا جبتونا هنا ليه
ايهاب لنادين : ايه رايك يا حبي .. (بيشاور علي فيلا من الاتنين ) الفيلا دي بتاعتك
نادين بصتله ولفت ايدها علي رقبته وهي مبسوطه قوي : بجد يا حبيبي .. يعني احنا هنعيش هنا .. ربنا يخليك ليا يارب
ايهاب : ويخليكي ليا .. تعالي افرجهالك من جوه
سابهم واخد نادين تتفرج علي الفيلا
اما يامن مسك ايد ياسمن وايد سيلا ومشي بيهم .. وقف قدام باب السور بتاع الفيلا ..
يامن : ايه رايك
ياسمين قرت اليافطه المكتوبه جنب الباب كانت " فيلا الياسمين "
ياسمين بسعاده باست يامن في خده ..: ربنا يخليك لينا يا حبيبي
يامن : ويخليكي لينا يا حبيبتي يارب .. يالا تعالو افرجكم الفيلا من جوه
دخل يامن يفرجهم الفيلا .. كانت عباره عن جنينه صغيره .. وبعدين مدخل الفيلا .. هي عباره عن دورين .. الدور الاول .. ريسبشن كبير واسع .. وفي مطبخ نظام اميريكن واسع .. ... وحمام و اوضه مكتب ليامن
طلعوا الدور الثاني .. عباره عن اربع اوض ... كل اوضه فيها حمام وبلكونه بتبص علي الجنينه .. وفيه مطبخ صغير اوفس .. اسيل سابتهم وفضلت تجري بين الاوض الفاضيه وهي مبسوطه
ياسمين بسعاده : حلوه قووي يا حبيبي ..
يامن : اهم حاجه انها عجبتك ... بصي بقا انا مرضتش افرشها . .. قلت تفرشيها علي ذوقك
ياسمين : اوضه نومنا مش هغيرها .. انا بحبها قوي .. وكفايه انها شاهده علي ذكرياتنا سوا
يامن : كنت متأكد انك هتعملي كده .. باماره ... يوم الفرح .. لازم نروح بيتنا ومنباتش في الاوتيل وسفرتينا بالليل ها ( وغمزلها )
ياسمين : اه هههههه ... تعالي بقا ( ودخلوا الاوضه التانيه ) دي بقا انا هنقل فيها اوضه سيلا وهزود فيها سرير صغير للبيبي الجديد .. مش حابه اخليهم بعاد عن بعض وهما صغيرين .. ولما يكبروا ان شاء الله .. لو البيبي طلع ولد .. يبقي نعمل لكل واحد اوضه .. ولو بنت .. هما يقرروا عايزين كل واحده لوحدها ولا يفضلوا سوا
يامن : تمام .. يعني في اوضه هتتقفل دلوقتي لحين اشعار اخر .. والاوضه الثالثه
ياسمين : دي ياسيدي .. نعملها ليفنج .. وتلفزيون وترابيزه .. عشان تبقي قعدتنا كلها هنا .. ايه رايك
يامن : حبيبتي .. ده بيتك يعني مملكتك .. تعملي فيه اللي انتي عايزاه .. البيت وصاحب البيت بتوعك يا جميل انتي
ياسمين وهي بتحضنه : ربنا يخليك ليا
يامن ضمها ليه قوي وقرب من شفايفها وباسها
رجعت سيلا وهي مبسوطه قووي
سيلا : باباي .. بابي
يامن بعد بسرعه عن ياسمين .. اللي كان وشها احمر جدااا
يامن وهو بينهج : حبيبه بابي عايزه ايه ؟
سيلا : ده بيتنا الجديد
يامن وهو بيشلها : اه .. ايه رايك حلو ..
سيلا : اه حلو قوي
يامن : ها يا ياسمين .. شوفي هننقل امتي ؟
ياسمين : اديني اسبوع الم الرفايع من البيت .. وبعدين جيب حد ينقل الفرش .. و واحده واحده نبقي نشتري اللي ناقص
يامن : خدي وقتك عشان متتبعيش وانتي حامل
ياسمن : ان شاء الله
يامن : طب يالا بينا ولا ايه
ياسمين : يالا ..
خرج يامن .. واتصل علي ايهاب :
يامن : ها ماشي ولا شكل الجو عندك عجبك
ايهاب : اه عجبني .. اتكل علي الله .. مش كل واحد جاي بعربيته .. طريقك ذراعي يابا
يامن : ايوه يا عم .. ما انت فرشت ومخلص
ايهاب : يالهووي علي النق .. غور ياض
يامن(بضحك) : سلام
قفل ايهاب مع يامن ولف بص لنادين اللي كان وشها احمر (وغمزلها) : احنا كنا بنقول ايه
........................................................................................................................
كلمت ياسمين مديحه وفرحتها بالفيلا .. ويامن كمان كلم سميره وقالها وفرحتلهم قوي
بالليل اتصلت يارا علي ياسمين
يارا : ياسو الندله
ياسمين : يويو وحشاني قوي .. بقالي يومين مكلمتكيش
يارا : ما هو انا متصلتش فانتي معبرتنيش .. ولا كأن ليكي اخت اسمها يارا .. اه ياني يا مامتي .. مفيش حد يسال عليكي يا يويو يا قمر انتي
ياسمين (بضحك) : بت انتي .. الدخله دي وراها حاجه .. انطقي
يارا : فهماني علي طول ..
ياسمين : تربيتي .. هاتي ما عندك
يارا : بقا يا ستي .. الكليه عامله رحله الاقصر واسوان
ياسمين : قلتيلي .. وقلتي مش عايزه تروحي عشان اسلام هو المشرف
يارا : شاطوره بالضبط كده .. مي بقا دفعتلي الاشتراك الصبح وقالت لماما وماما وافقت
ياسمين : بمعني!!
يارا : يعني كده هضطر للاسف اطلع الرحله .. اعمل ايه .. مي دفعت خلاص
ياسمين : يويو يا حبي .. انتي لو مش عايزه تروحي فعلا .. والموضوع مجاش علي هواكي .. كنتي رحتي الكليه بكره سحبتي الفلوس .. وتديها لمي وشكرا .. لكن انتي نفسك اصلا تطلعي الرحله
يارا (بارتباك عشان ياسمين واجهتها بالحقيقه) : مش نفسي قوي يعني
ياسمين ضحكت : لا قوي
يارا : اه قوي ... ارتاحتي .. وحشني قوي ونفسي اشوفه .. حتي رخامته وغلاسته وحشوني .. من اخر حصه في الدرس قبل الامتحانات ومشفتوش تاني .. معرفش اتبخر راح فين .... بس .. بس يعني
ياسمين : بس ايه .. كملي
يارا : بس خايفه يفضل يعاملني وحش وبرخامه كده .. انا لحد دلوقتي مش قادره افهم بيعمل معايا كده ليه .. كل شويه يبصلي وهو مكشر ويكلمني بعصبيه .. مش فاهمه ماله ده
ياسمين (بجديه) : يارا .. لو كلمك وحش تاني .. متسكوتيلوش .. اديلوا علي دماغه .. اوعي تسمحي لحد ايا كان مين .. يكلمك باسلوب ميعجبكيش حتي لو بتموتي فيه .. فاهمه .. (كملت بضحك) وبعدين ياختي فين طوله لسانك اللي كنتي سايبه علينا طول النهار .. ولا هو لحد اسلام واتقص
يارا (بضحك) : بس خلاص .. سخنتيني عليه .. هروح الرحله اضربه وارجع
ياسمين (بضحك) : ايوه يا معلمي
........................................................................................................................
يوم الرحله الصبح
عدت مي وعبدالله علي يارا
يارا : ديحه يا قمر .. انا نازله عايزه حاجه
مديحه : لا يا حبيبتي .. خلي بالك من نفسك وطمنيني عليكي كل شويه ها .. وكلي كويس
يارا وهي بتقرب منها وبتبوسها : بس كده انت تامر يا جميل .. هتروحي لياسمين امتي
مديحه : كمان شويه .. يسرا وعمرو هيعدوا عليا وهنروح سوا خميس وجمعه وسبت .. عشان نلم معاها باقي الحاجات .. حرام سميرة هلكت معاها .. يومين كده علي ما تنقل ونرص معاها الدنيا في الفيلا ونرجع
يارا : ما تخليكي معاها لحد ما ارجع انا يا ماما عشان مقلقش عليكي
مديحه : اولا معنديش اجازه كل ده .. ثانيا اطلعي من دماغي انا هقعد في بيتي براحتي حبه هدوء ... وانجزي يالا صاحبتك عماله ترن
يارا : ماشي يا ماما .. خلي بالك من نفسك .. لا اله الا الله
مديحه : محمد رسول الله .. يارب استودعتك بنتي فاحفظاها بحفظك الكريم
نزلت يارا
مي : كل ده .. هنتاخر علي القطر يا بنتي
يارا : فين التاخير ده .. ازيك يا عبدالله
عبدالله : ازيك يا يارا .. هاتي عنك الشنطه
ركبت يارا جنب مي .. وحط عبدالله شنطتها مع شنطهم علي شبكه التاكسي .. واتحركوا علي محطه مصر
وصلوا وكان معظم اصحابهم اللي طالعين وصلوا .. وقفوا سوا وعرفتهم مي علي عبدالله .. وقعدوا يتكلموا ويضحكوا
وصل اسلام اللي كان لابس شورت باجي بيج وتي شيرت ابيض وسنيكرز ابيض
اسلام (بصوت عالي ) : شباب خلونا نتمم علي العدد ونركب عشان القطر هيتحرك
بدأ اسلام وباقي المشرفين اللي معاه يتمموا علي العدد .. وكان هو مسؤول عن جروب يارا واصحابها
طول الطريق كانوا عمالين يغنوا ويلعبوا كوتشينه .. وصلوا الاقصر .. واتوزعوا علي الاوض ..كل بنتين مع بعض وكل ولدين مع بعض .. مي ويارا كانوا في اوضه سوا .. ونفس الكلام في اسوان .. طول الرحله اسلام كان بيتعمد ميكلمش يارا وهي كمان .. بقت بتتجاهله تمام ... لحد اخر يوم
.....................................................................................................................
نقلت نادين وايهاب فيلتهم من قبل يامن .. لان ايهاب كان فرشها .. يادوب لموا هدومهم وكام حاجه وخلاص .. اما ياسمين ..فاخيرا بعد مرور اسبوع كانت نقلت حاجتها وساعدهم سميره ويسرا ومديحه وعمرو وكمان اسر ونورا اللي جم يساعدوهم في فرش الدنيا وترتيبها .. وكلهم كانوا مبسوطين لهم قوي .. بعد ما خلصوا كل حاجه .. وهما قاعدين في الجنينه كانوا عاملين حفله شوي .. بمناسبه الفيلا الجديده
يامن : اخيراااا.. خلصت .. الموضوع طلع كبير .. كنت فاكره اسهل من كده
عمرو : معلش .. المهم كله تمام الحمد لله .. ربنا يباركلكم فيها ويديكم خيرها ويكفيكم شرها
كلهم : امين
اسر : المكان هنا جميل قوي كمان وهادي
يسرا : والبحر اهه .. يادوب تعدي الشارع وتبقي عنده يا ست ياسمين
ياسمين (بضحك) : ايوه ..اي حد عايزني بعد كده ..انا علي البحر
يامن : لا يا شيخه
ياسمين : حبيبي يا بو اليمن انت والله .. بضحك معاك .. كركر
يامن وهو بيلف ايده حوالين رقبتها و بيقرب راسها لصدره وبيخبطها بالراحه علي دماغها : ضحكي ياختي .. ضحكي
سميره : ربنا يسعدكم يا ولاد
جودي وملك وسيلا كانوا عمالين يجروا في الجنينه ويلعبوا .. سيلا سابتهم وجت جري تشد يامن وهي زعلانه
يامن : مالك يا حبيبيتي .. مين زعلك
سيلا : انت
يامن : انا .. ليه
سيلا : عشان انت بتضحك مع ماما .. وانا قلتلك .. تضحك معايا انا وبس .. صح
يامن (ضحك جامد قوووي ) : انا اسف يا حبيبتي .. انا بحبك انتي يا سيلا ... تعالي اقعدي علي رجلي عشان تاكلي معايا
سيلا : لا انت تعالي اقعد معايا هناك وناكل لوحدنا
ياسمين : لا والله .. انتي ضرتي يا بنتي
كلهم بيضحكوا
يسرا : من اعمالكم صولت عليكم
عمرو : يعني ايه !!
مديحه : عشان ياسمين هانم وهي صغيره كانت كده .. ضرتي .. وكانت اسوء كمان .. تستني وتاكل لوحدها معاه .. وتاخده ويخرجوا لوحدهم .. وتكلمه في التليفون قبلي ..ههههههه
يامن : عارف .. و الحمد لله امنيتي اتحققت وجالي بنوته تعمل معايا كده
ياسمين ( بغيظ) : ماشي يا يامن .. ماشي
يامن وهو بيقوم وياخد طبقه ..: معلش يا جماعه هستاذنكم .. معزوم علي الغدا مع سيلا ( وطلع لسانه لياسمين )
ياسمين (بغيظ) : يارب يطلع البيبي ولد يارب .. عشان بس اغيظ يامن .. واخرج مع ابني حبيبي ويدلعني
يامن وهو ماشي : حتي لو طلع ولد .. اللي بتحلمي بيه ده بعينك ..
ياسمين : هنشوف ها (وطلعته لسانها )
نورا (بضحك) : ده انتوا مسخره
سميرة : مش هيكبروا ابدا ويعقلوا
عمرو : ربنا يخليهم لبعض
كملوا سهرتهم سوا .. روح اسر ونورا وملك يباتوا مع سميرة و مديحه باتت مع سيلا في اوضتها و عمرو ويسرا وبناتهم في اللينفج .. تاني يوم الصبح صحيوا وفطروا سوا وسافروا
.......................................................................................................................
اخر يوم في الرحله .. مي ويارا في اوضتهم
مي : يويو انا هنزل اتمشي مع عبدالله .. تيجي معانا
يارا : لا ياحبي .. روحوا انتوا .. انا هنام
مي : تعالي وبطلي رخامه .. هتنامي ايه دلوقتي
يارا : لا ياستي مبحبش ابقي عزول .. وكمان هنام بجد .. انتي عارفه مبعرفش انام في القطر .. يالا اتكلي علي الله ..
مي نزلت وقابلت عبدالله وخرجوا يتفسحوا سوا ...
خبط باب اوضه يارا بعدها بشويه
يارا : مين؟
اصحابها البنات : افتحى يا يويو
فتحت يارا الباب ودخل البنات وقفلوا الباب وراهم
لولو صاحبتهم : بتعملي ايه لوحدك يا جميل
يارا : كنت هنام حضرتك زي ما انتي شايفه
ضحي : لا مفيش نوم .. النهارده اخر يوم .. قومي البسي يالا وتعالي هننزل نتمشي شويه ونركب حنطور
واحده تانيه وهي بتغني : واركب الحنطور ..
كلهم : درجن درجن واتحنطر
وغنوا الاغنيه وهما بيسقفوا و لولو قامت ترقص في النص وهما بيضحكوا قوي .. بعد ما خلصوا
واحده منهم : يالا يا رخمه تعالي معانا
يارا وهي بتدخل السرير وتتغطي : يالا منك ليها علي بره .. صدعتوني .. وانا عايزه انام عشان اكون فايقه بكره في رحله الشقا بتاعه القطر دي
ضحي : اه ومين سمعك .. الطريق طووووويل
لولو : خلاص سيبوها براحتها .. يالا بينا يا بنات .. لو معرفتيش تنامي ولا غيرتي رايك .. كلمينا نقولك احنا فين وتيجي بيس
يارا : بيس ا لولو
خرجوا البنات .. حاولت يارا تنام معرفتش .. قالت تدخل تقف في البلكونه .. الجو كان حلو قوي والهوا يجنن .. اتصلت بصاحبتها
يارا : فينكم يا لولو
لولو (بضحك ) : ما كان من الاول
يارا : اخلصي يا رخمه .. قوليلي انتوا فين .. معرفتش انام
لولو : قاعدين في كفايه .... اللي قريب من الاوتيل .. الجو تحفه .. الجروب كله هنا اصلا
يارا : طب هقوم البس واجيلكم ..
لولو : تمام مستنينك
لبست يارا جينز اسكيني كحلي وعليه تي شيرت بولو اصفر وسنيكرز اصفر .. وسابت شعرها علي ضهرها .. وحطت LIP GLASS وحطت موبايلها في جيبها .. وفلوس في الجيب التاني .. مكنتش عايزه تشيل شنط .. ونزلت خرجت من الاوتيل وعدت الناحيه التانيه عشان تتمشي علي النيل لحد ما توصلهم ..
........................................................................................................................
في نفس الوقت اللي يارا كانت فيه في البلكونه .. كان اسلام واقف في بلكونه اوضته اللي كانت فوق بلكونه يارا .. وعمال يفكر .. وهو ساند علي سور البلكونه .. لحد ما ابتسم زي ما يكون اتاكد من حاجه كان بيفكر فيها .. سمع صوت يارا وهي بتكلم صاحبتها في الفون ..
دخل بسرعه غير هدومه عشان يحصلها .. نزل شافها وهي خارجه من باب الاوتيل وعدت وماشيه علي النيل .. مشي بسرعه ناحيتها عشان يحصلها .... ابتسم قووي
اسلام (بجديه) : علي فين ان شاء الله
يارا اتخضت ولفت بصتله : بسم الله الرحمن الرحيم ... هما بيطلعوا امتي!
اسلام (كان نفسه يضحك ... بس كمل بنفس الجديه ) : بقول علي فين
يارا (وهي بتبصله قوي ) : افندم!!
اسلام( بجديه وهو بيبصلها وبتأمل في ملامحها المكشره) : بقول علي فين ان شاء الله لوحدك كده
يارا : رايحه اقابل اصحابي .. (كملت بتريقه ) عند سيادتك مانع
اسلام وهو بيربع ايده قدام صدره ويارا بتبصله قوي ومعجبه بشكله .. كان لابس جينز كحلي وتي شيرت بولو ابيض برضه .. كانت شايفاه امور قوي اكتر من قبل كده ..بس بسرعه نفضت الفكره من دماغها وبصتله وهي مكشره
اسلام بيكمل بنفس النبره : اه طبعا عندي الف مانع .. مش مانع واحد
يارا (بسخريه ) : الف مانع .. اتفضل اشجيني .. ايه موانع سيادتك
اسلام ( بالرغم انه حس انها بتتريق وكان نفسه يضحك .. بس كمل بنفس الجديه ) : مش هحاسبك دلوقتي علي طريقه كلامك والتريقه اللي في صوتك
يارا رفعت حواجبها بدهشه بمعني : نعم!!!!!
كمل اسلام بنفس طريقته : اولا .. حضرتك ما اخدتيش الاذن مني قبل ما تخرجي
يارا : لا والله !!!!!
كمل ولا كأنه سمع حاجه : ثانيا .. ماشيه لوحدك .. ثالثا
قاطعته يارا وهي بتتكلم بنفس طريقته : اولا ... اخد اذن منك ليه ان شاء الله .. انت اصلا سايبلنا اليوم النهارده فري نعمل اللي احنا عايزينه .. ثانيا بقا .. انت مالك امشي لوحدي ولا امشي مع حد .. ملكش فيه .. عن اذنك
ولفت وشها وقبل ما تتحرك خطوه واحده
اسلام (بحده وقفتها مكانها ) : استني هنا
يارا وقفت مكانها زي ما هي متحركتش .. وهي عماله تنفخ .. وتقول بصوت واطي : اللهم طولك يا روح
وكملت بصوت عالي : يا نعم .. ايه تاني
اسلام مشي وقف قدامها وابتسملها : سمعتك علي فكره
يارا اخدت ريقها بصعوبه
كمل اسلام (بابتسامه ) : معنديش بنات حلوه كده تمشي في الشارع لوحدها سوا صبح ولا ليل
يارا بصتله وهي مستغربه كلامه وطريقته اللي اتغيرت 180 درجه فجأه .. وكان علي وشها علامه تعجب كبيره قالت : انا قلت مجنون محدش صدقني !
اسلام كمل بنفس الابتسامه ونبره حنيه كانه مسمعش حاجه : وايه تمشي مع حد دي .. ما اقبلش اصلا تمشي مع حد غيري .. ( وهو بيشاور بايده تحت رقبته ) ده انا ادبحك
يارا قلبها بيدق جامد .. وحست انها متلغبطه قوي .. وعماله تهدي قلبها اللي اتجنن فجأه من نبره اسلام الحنينه وكلامه اللي فاجأها .. قالت بصوت بتحاول يطلع طبيعي : وده من ايه ده ان شاء الله
اسلام (بيبصلها بنظرة مليانه حب ) : يارا .. انا بحبك
#مستنيه رايكم.. اسفه مره تانيه علي التاخير
