ملاذي الاخير

القصه كامله

اعاده نشر القصه كامله بالتعليقات
#ملاذي_الاخير
#الجزءالاول
بقلمي ام مريم  #اماسي_الليل
اسمي هديل عندي اخت  وحده  اكبر مني اسمها هيام  وامي   ووالدي متوفي  عايشين في بغدادويا خالي الچبير الي هو شيخ عشيره  متزوج وعنده ولد وبنات  تقريبا بنفس اعمارنا زوجته متسلطه بس مو  ظالمه لكن عصبيه وحريصه كلش وبت عشاير
اهل امي ما عدهم بنيه تبقى بدون زواج من يموت زوجها ام تطلق لازم ترجع تزوج
صار عمري  ١٠ سنوات 
وتقدم شخص لامي  وخالي وافق امي مجانت تريد تزوج لان تعرف اذا اتزوجت راح نبقى عد خالي ميقبل نروح ويا امنا لان زوجها رجال غريب  بس المشكله امي تخاف من خالي لذلك قبلت واصلا مو قبلت وانما خالي جبرها وصارت الخطبه وبعدها بفتره قصيره تزوجت امي 
بقينا اني وهدير يم مرت خالي  صرنا نشتغل ويا بناتها وعلمتنا خياطه وطبخ وسوتنا نسوان بس بالشده والعصبيه انخاف من عدها لان عدها هيبه وحقانيه ما فد يوم فرقت الي ياكلوا بناتها ناكل منه والي يلبسوا نلبس مثله  مرت عمي اصلا هي بت خالة امي يعني قريبتهم  جانت شكد قويه لكن الشي الوحيد الي يكسرها وتشوفوها تبجي ومكسوره سوالف خالي ويا النسوان وعلاقاته طبعا خالي مو كلش چبير عمره بوسط الاربعينات
مرته مو كلش حلوه بس تزوجها من هم صغار هو ١٨ وهي ١٤ سنه  لان بت خالته
اني جنت انقهر عليها واشوفها شكد ادوس على نفسها حتى تحافظ على بيتها يعني مثلا اجتي وحده  گلتلها ترى رجلج عنده علاقه بفلانه وابني شافه بفلان مكان وياها
تشوفوها تبجي وتنقهر لكن من يجي خالي تتلگاه وتبتسم بوجهه ولا كأنها تعرف شي  هو برغم سوالفه لكن يحبها ويقدرها وحجايتها عنده متصير اثنين يمكن لان هذا اسلوبها وياه
بقينا اني واختي هدير نتعلم منها الصبر والحكمه والرزانه والشرف
بالمناسبه امي تزوجت بكركوك وكل كم شهر يله انشوفها وبعد ماصار عدها طفل كامت اطول يله تجي تشوفنا لان رجلها ميقبل تجينا علمود متعلق بأبنه المهم
خالاتي ٢ جانو كلش حنينات علينا يجون يشوفونا ويجيبولنا ملابس وعندي خالتي مديحه جانت تموت على اختي هيام اول ما صار عمرها ١٥ سنه گامت كل متجي تجيبها شغلات مال بنات مكياج جنط اخذيه دشاديش ورا كم شهر عمتي فاتحت خالي تريد هيام لابنها حسنين  وخالي عنده البنيه مستقبلها الرجال
مو المدرسه  لذلك وافق بعد كم شهر اتزوجت اختي هيام واحت ببيت خالتي  والحمد لله عاشت مرتاحه يمهم لان رجلها حباب وخالتي ورده وحتى خلوها ترجع للمدرسه

#ملاذي_الاخير
#الجزء٢
اني صرت اروح كل فتره يمها ابات ببيت خالتي لان سابقا خالي مجان يقبل لان خالتي عدها ولد يخاف علينا ميخلينا نروح عد احد الي يريد يشوفنا يجينا
وهسه من تزوج ابن خالتي اختي خالي وافق اروح كل فتره ابقى يمهم كم يوم وارجع
وبيوم رجعت من المدرسه  جنت صف ثالث بوقتها
دخلت للبيت لگيت يمنا ضيوف 
رحت بدلت ملابس وركض للمطبخ سألت عمتي  منو يمنا گلتلي خالج ضياء وعائلته اجى ديصالح خالج الشيخ(رياض)
ولزمناهم على الغدا بسرعه ساعديني وصيحيلي ورود بسرعه
رحت على ورود  گتلها عمتي تريدج تعالي ساعدينا
ورود :لج عمي رياض عنده ولد ٢ كلش حلوين
هديل :ادري شايفتهم قبل من صغار قبل ما يتعاركون خوالي
طبعا خوالي صارلهم ١٠سنوات ميتحاجون 
لان خالي ضياء ضعيف ومرته وكحه وبوقتها زنت براسه علمود الورث وخلت براسه اخوك باگ الورث وانطاك تفاليس
طبعا المشكله جانت علمود بيت جدي الي بكربلاء بي مزرعه جبيره خالي رياض مقبل يبيعوا ويقسمون الورث لذلك گللهم اتنازلولي عن البيت واخذوا كل الاملاك الباقيه وزعوها بينكم اني ما اريد شي بس هذا البيت وطبعا من كبرت يله افتهمت ليش خالي راد هذا البيت علمود خالاتي حتى الي تطلق او يموت رجلها  عدها مكان ومتحتاج منية احد من بعد عينه
خالي كلش حنين على خواته وعلينا طبعا ميبين بالعواطف والحجي بس بالافعال .
من خلصنا الطبخ  نقلنا الاكل بالصاله ومن دخلت صار بوجهي ابن خالي ضياء( محمد )صاير رجال شكله حلو .
كلش انعجبت بي  بقيت كل شويه استرق النظر وادرس تفاصيله
بعد ما خلصنا الاكل عرفت راح يباتون اليوم عدنا خالي رياض چلب بيهم
طبعا حسيتهم شايفين روحهم  بالاول ومتشنجين
بس للمغرب فكوا وصاروا بنات وولد يضحكون ويشاقون ويشاركون بالحديث 
وبقيت ويا وجدان اخت محمد كلش اندمجت وياها هي اكبر مني بسنه صرنا صديقات
بعدين گلتلي تجين عدنا بالعطله  تبقين يمنا فتره
جاوبتها ما اعرف وما اتصور خالي يقبل
وجدان :كدام الكل انداريت على ابويه بابا خلي هديل تجي تبقى يمنا بالعطله
خالي ضياء :بكيف عمج رياض اذا يقبل هلا بيها
خالي رياض :اذا هديل تريد تروح ماعندي مانع انت هم خالها وحريص عليها