-- Katy Kardashian😘
1.Then ebe some Friday gb3k3 bi laidat for school. I bed tinop like the 6 inside. I no boff the whole day oo charr, ma money all too fini make e lef like ghc6
2. Already naa nu I make ma mind say I go go house that day... The Sunday nu too, I do mind say I dey go Merries go see Judith-Vanessa so man for go make fine for house😸
3. I tinop gbele ma locker inside search some shada bi mia wey I mia mia some shommy bi put ma body kwraaa ( just in case😺) Leg di33 anything go fit happen😅
4. I fini nu wey I carry some ma Louis Vuitton strap bag bi take ma lapee den some small small nibiz bi put inside Wey I lef ma hall...(Alex Kwapong Hall)
5.I gally come stand the bus stop for okponglo (the Legon niqqas go knorr the place😅) I dey the bus stop der dey wedge Lapaz- Dansoman troski like some 2minutes bi Wey some old rickety one bi pull over for ma body..
6.Den I do ma mind say I go wedge another one sake of this one old too much😹. There n)) Wey I spot this fine bébe for the backseat... Then I sure say she be Leg girl p33😌
7. I smile for ma head inside naaa Wey I flow the mate say I dey go dansoman. (Sake of the shoddy oo😺) As I climb the troski naaa wey as if on impulse, the bebé shift. There naaa wey I tok for ma head inside-- Apae ooo!!!
8. I start dey lick ma lips dey do fresh boy tins meanwhile ma face too no be ahiaa😂😂 wey I go tap the bebé ein body.
9. Emmom!! I for tok, the shoddie fine.... Ei🙆. She fine basabasa make ma heart sef start dey cut😦. Then she dey mia some blue tattered jeano bi den crop top.
10. She cute roff... She get dem Katy Perry faces some plus Kim kardashian ein eyes some😅. (Man no for do dull😌). Bébé ein thighs all dey show sake of the tattered nu... É fair roff😋
11. You dey Kai say I tok say anything go fit happen??... The shommy save me roff.... As the troski start dey move all nu, I dey plan how I go chat Katy Kardashian😅.
12. Ei chale, sorry say I no intro ma body sef, ma paddies dey bell me Jay Manuel. I plete botwe this year naaa wey I dey Leg atm... I no sh3da dey love Shoddies mmom, I just dey preach preach dem small small😆😆
13.Yea so back to the shoddy nu, I rec say She dey zuk some windows cell bi...the new microsoft lumia 535 nu some, wey she dey Watsapp Watsapp plenty....
14. Ein all den I dey pick ma mind on how I go chat am... The shoddy just fine... Ei🙆. I no dey barb sef😩
15. I spy saaa Wey I Jie ma lapee nu ( abi you dey kai?) That lapee nu, I take catch bunch shoddies dema eye sake of then ebe cute wey Ebe touch screen wey you sana fit convert am to tablet by flipping the screen backwards.
16. Then Leg boys sef dey trost the lapee.... That one be by the way....
17. So yea, I jie the lapee wey I on am like I dey come do something bi aama (but ma guy, notin😂 I dey wan catch Katy Perry ein eye😋)
18.That time den we ketch spanner(the mall der) sake of traffic no sh3da bunch. The lock screen come naa wey I key in the password like some IT expert bi😎.
19. Ebe windows 8 machine too so the start screen be catchy. There naa wey Oboi, I start dey navigate the touch screen plus ma hand.
20.I check plus the corner of ma eye nu, I see say 'Katy Kardashian' dey spy....(I start dey smile for ma head inside😏)
21. Ridee I barb ein attention di33, I for do the back flip nu... Der n)) wey I raise the lapee wey I zuk the screen flip am go back like I dey break am bi laidat.
