رغد"انتبهت ونور الشمس بعيوني ...غطيتهم وجيت بلف ع الجهه الثانيه
...فتحت عيوني ع الاخر..وشلون ..متى..وكيف نمت بحضنه...قمت
بسرعه....وانا مو مستوعبه كيف صار هذا من دون مااحس..كانت يديه
محاوطنتي ...وراسي ع صدره..وكان مغطيني بالفروة وهو لابسها...
لمت حالي..وشلون نمت ولا حسيت الحين وش بيظن..بيظن اني ميته
عليه ..وابي قربه....قربت من السيارة وشفت جنى نايمه...فتحتها بشويش
وركبت وقفلت الباب..جلست اناظر فيه..كيف ساند ظهره ع السيارة
وفارد رجلينه يالي كنت نايمه بوسطهم...لمت نفسي مليون مره...كنت
مقهورة حيل... وجافاني النوم..كنت انتظر البنات يصحون..او جنى
تصحى وارجع المخيم......
سعود"صحيت والم بظهري مو طبيعي من نومتي...ناظرت حضني
وكانت مهيب موجوده...لفيت يمين ويسار ..وماشفتها ..وقفت بصعوبه
بسبب ظهري...يمكن بالسيارة.. وناظرت ومثل ماتوقعت ... كانت
بالسيارة ... وسرحانه...تقدمت وضربت قزاز النافذه...":........
رغد"كنت للحين مقهورة من يالي صار.. الا بطق النافذه...ناظرته
وكشرت بوجهي.. نزلت النافذه":نعم
سعود"تفاجاءت بتكشيرتها يوم شافتني ..واسلوبها بالرد..."رفعت حاجبي
":نعم!!!
رغد"وماكنت طايقته":ايه نعم
سعود"وش فيها هذي":فيك شئ
رغد"بقله صبر": لا تبي شئ
سعود"احترت منها":ليه تتكلمين كذا
رغد: وشلون تبيني اتكلم
سعود"لا مب صاحيه ":.............
رغد"لفيت بوجهي عنه..وبرفع النافذه "..............
سعود"استفزتني ..بحركتها..وبصوت عالي":رغددد
رغد"بلعت ريقي":..............
سعود"بغيض":وش حركات المبزرة هذي اتكلم معتس وتردين بنفس
خايسه"وفتحت باب السيارة وسحبتها بقووة ..وهي منصدمه..بعدتها
عن السيارة يوم انتبهت لجنى ..انزعجت من صوتي....":وش صايرن
معتس وش قالب حالتس
رغد"ماصدقت فتح لي باب": هي انت لاتظن اني للحظه انك يوم فرضت
نفسك على ..انه بقتنع وبرضى فيك كزوج.. وتستحلى الجلسه والنومه ع
كيفك.... اصحى..يابابا "وبنبرة سخريه"...انت صحيح تملك الجسد
لكن الروح والقلب مستحيل تملكه....قلبي وروحي...لانسان واحد
وبس..وانت مستحيل توصله...فااااهم
سعود"كلماتها..شعلت نار...فيني...اي واحد بمكاني..يسمع حرمته ..
تقول له كذا..وش بيسوي...يوم يسمع هالكلام الكبير...وبكل قوة
صفعتها":ولا كلممممه...سامعه
رغد"مااستغربت وبالاصح توقعتها":يعني بتظن كذا بخاف..وماراح
اقول الصدق..."وبصوت يرجف" صحيح انا عطيتك وجه..وتناسيت
كل احساس حقد وقرف من ناحيتك امس... بس مو معناه..تستغل الوضع
وتحاول...تقص ع حالك..وتصدق انه ممكن نكون مث أي زوج وزوجه
يحبون بعض...انت ولاشئ..سامع... ولاشئ..وبتظل لاخر نفس بحياتي
ولا شئ...فرضت نفسك بالاجبار..مشيتها لانه مااقدر احتج او اشتكي عليك
لكن تحاول تفرض نفسك وتستغل غفلتي ونومتي..لا والف لا سااامع
سعود"ماني مستوعب وش هالثوران المفاجئ..وكلماتها يالي تستفزني
وتحرق اعصابي...عمري ماسمحت لحرمه..تطاول بلسانها..او اني اعطيها
مجال ...مسكتها من زندها وشديت عليه..شفت علامات الالم بوجهها..
وزادني شعور بالانبساط وشديت اكثر..."وبكل قرف":انتي يالي اسمعي
ولاتصدقين نفستس...يوم رضيت فييك زوجتن لي ..اشاركها الفراش
مو معناه..اني برضا فيك كزوجه...اعرفي حدودك ..واعرفي مكانتك
انتي يالي اسمعي..واسمعي زين...وكل يالي صار شفقه لا اكثر ولا اقل
مثل أي متشرده بالشارع..عطفت عليها بالبرد..وبما انك..زوجتن لي
شفقت عليتس..."وبضحة سخريه"يعني بالله تظني سعود..ال..يفكر
فيك..كذا.. والله انك ماخذتن مقلب بحالتس...اصحي ومن جد اصحي
رغد"وجع يدي يالي بتحمله ولا وجع كلماته.. يالي يصوبها بكل اتجاه
لي.. جرح كرامتي... انوثتي..":ودامي مااشرفك ولا ممكن تتقبلني
ليه.. تفرض نفسك على
سعود"ورافع حاجبه"وبنبرة..احتقار":تحللين مصرفتس..واكلتس..
واسمي يالي شايلته
رغد"الكف يالي عطاني اياه..وجعه مايوصل للوجع يالي صابني ..من
كلماته...للدرجه هذي انا رخيصه...ويعتبرني تسليه...ماقدرت امسك
دموعي.. ولا انهياري...":وربي حرررام تكون اخو وليد وربي حرام
سعود"طاريها لوليد..زاد من عصبيتي..ودمي..يغلي بعروقي..من نطقها له
شديت زندها اكثر...وضغطت بقوة ..وقربتها لعندي حتى صارت لاصقه
فيني..ومايفصلنا الا انفاسنا..."وبوعيد..وصوت اقرب للهمس..":اسمه
ماابي اسمعه بلسانتس..سامعه"وشديت اكثر ع يدها"....ولا والي خلق
سابع سما ماتلومين الا نفسك...وربي...بتشوفين يالي مايسرك.."ووجهت
نظري..لجنى..ورجعت ناظرتها"...سامعه
رغد"جمدت بمكاني..ورجفت من الخوف من قربه ونبرته..وتهديده
شكله كان يخوف بالحيل..عروقه يالي بارزة بجبينه...عيونه يالي حمرت
طريقه رصه ع اسنانها..كلها ارعبتني..ومنعتني من الكلام":......
سعود"انفاسي صارت سريعه...حسيت اني بذبحها..خلاص..ورفعت
يدي..الا صوت الشيبان وقفني...ناظرتها بحده..وفلت يدها بقرف..
وبقوة حتى طاحت ع الارض...":يلا خذي بنتك وانقلعي عند الحريم
رغد"مصدومه..مجروحه...منهارة...كل هذا مايعبر عن احساسي المتفجر
بداخلي كان ودي اصرخ...واضربه..اذبحه...ماقدرت عجزت حتى عن
الحركه....وينك ياحبيبي وينك...ابي حضنك...ابي الامان يالي فقدته..
آآآآآآآآآهـ ياوليد ليه تركتني ورحت ..لييييه....":.........
سعود"بصرخه":فزي اخلصي وانقلعي عند الحريم
رغد"انتفضت من صرخته..وبالحيل شلت نفسي..رحت للسيارة
واخذت بنتي واغراضها..ومشيت للمخيم...وعيوني...مغطيها ضباب
دموعي....وصلت للخيمه...ورحت وراها...احاول اهدى العاصفه
يالي بداخلي...احاول اوقف...دموعي...يالي انزلت ..مثل الشلال...
قلبي يالي من سرعه نبضه احسه بيطلع من مكانه....جلست ..وبحضني
جنى...ناظرتها...وهي نايمه وماهي عارفه وش يصير ..ماهي عارفه
وش نوع الظلم والضيم يالي امها عايشته...يوم ناظرتها..عرفت ليه
استحمل هذا كل...وربي كله يهون ولا افقدك...حضنتها بقوة لصدري
وصرت استغفر واقرا يالي حافظته من القران...ربع ساعه..وحسيت
اني احسن...وهديت شوي...طلعت من شنطه جنى..قرشة المويه..
وغسلت وجهي....رتبت نفسي ...وسميت بالله ..ودخلت الخيمه كانت
خالتي.. وباقي الحريم صاحيين..والبنات نايمين....
ام راشد"بفرح":هلا هلا ببنتي هلا صباح الخير يايمه
رغد"حاولت ابتسم":هلا فيك خالتي"حبيت راسها":صباح النور والسرور
ام راشد: ها ياميمتي عساتس ارتحتي بنومتس
رغد"ايه بالحييل": الحمدالله ...
ام راشد"تمد لي كوب حليب":يلا سمي بالله وافطري
رغد"ماكان لي نفس ابد...وريحته لوعت كبدي...."كشرت بوجهي":لا
خالتي..ماابي
ام راشد:ليه اشربي يدفيتس
رغد"مايحتاج ياخالتي حرقه يالي صار..دفتني وحرقتني":لا مايحتاج
ام راشد:طيب كلي لك شئ..الغداء مطول..واذا بتنتظرين هالقرود
منتي ماكله..شئ
رغد"وجع بطني رجع ...غريبه..انا من بعد اول يوم..مايرجع الالم
..اااهـ مع هالنفسيه والظغط..كل شئ بيتغير يارغد": لا خالتي والله
ماني مشتهيه
ام راشد"بابتسامه وراح بالها لبعيد":لايكون
رغد"عقدت حواجبي":لايكون وش
ام راشد: يمكن انتس حامل يايمه عشان كذا منتي مشتهيه
رغد"مسسستحيل": لا لا لا يمه مني حامل ولا شئ
ام راشد: وش دراتس انتي الوكاد انتس حامل يايمه ومنتي حاسه
رغد"كنت منحرجه اقول لها بس عشان اقطع الشك باليقين لها وما
اخليها تبني امال..":لا مب حمل ياخالتي انا معذورة من يومين
ام راشد"بخيبه ..حاولت تخبيها": الله يرزقك ان شاءالله وعقبال ماتبشريني
بحملك ان شاءالله
مزنه: وليه ياعمتي حملي مهب مفرحك ومكفيك
رغد"لاعت كبدي من جد من صوتها مو ناقصتها ابد...قمت من بعد
مااستاذنت من خالتي..وتركت جنى..عندها...ومزنه ناشبه لها ..
مشيت لمشاعل...":مشاعل
مشاعل:هممم
رغد"هزيت كتفها":شعوله تكفين اصحي
مشاعل"خافت على وصحت":وش فيك ياقلبي
رغد"انسدحت ع مخدتها واحاول اني مااناظرها عشان ماتهل دموعي..
":ابي انام جنبك
مشاعل"ع الفترة يالي مرت علينا فهمت اني محتاجه لحضن ..":ولايهمك
"رفعت راسي وحطتها ع رجولها وصارت تمسح ع راسي"
رغد"ماقدرت امسك دموعي وصرت اصيح بصمت..وامنع شهقاتي عن
تفضحني...مر الوقت والنوم غلبني.......................
