للحب حروب أيضا

سلاما على قلوب أنهكتها الحروب

كنت تفرحني تضحكني وتغنيني عن كل شي ،تخليني انطير من الفرحه بوجودك معايا

بس عمرها مافرحتي دامت .....
ندكر في يوم حكينا عن الحاجات الي نحبوهن ..احلى لون واحلى اكلات وعصائر والهوايات ونوع الأغاني والمغني المفضل
مراد:حبيبتي قوليلي شن تحبي؟
-انحب اﻷلوان الهاديه ،وانحب المشويات وعصائر الكوكتيل ،وهوايتي الكتابه ،انحب اﻷغاني الهاديه والطرب
مراد:نجك ليا كل شي اتحبيه ناعم ورقيق
-باهي وتوا دورك ؟
مراد:انحب اللون اﻷزرق مش لوني المفضل بس انحب انشوفه ع البنت الي انحبها يعني انحب حبيبتي لما تلبس ازرق يجذبني اللون هضا،وانحب اللازانيه وعصير البرتقال ،ماعندش هوايات ممكن شويه السباحه ، وهذسنا الحاجات الي انحبهن ..قوليلي شن الاغاني المفضله؟
-اممم ماعنديش مغني مفضل ..انميل لأغاني تامر ووائل كفوري وشيرين ..واﻷجنبي ماعنديش عليه
مراد:ههههههه يناعلي ع البلبوله هههههه شيرين معاك حتى نا انحب نسمعلها ..لكن وائل وتامر يمللوني وننعس لما نسمعهم
-ههههههه بالعكس انت الي ماتعرفش تسمع ؛وشن تحب تسمع انشاءالله ؟
مراد:انحب الريقي غنا ورقص
-لايق عليك اصلا ههههه
مراد:وعليش ياعبيه
-هههههه ﻷنك مجنون
مراد : اهااااا؛باهي قوليلي اي نوع شوكلاطه تحبي
-نموت في كندر بوينو يناعلي تهبل،وانت اين نوع
مراد:انحب الشوكلاطه السويسريه..ضايقتيها من قبل ؟
-لا عمري ماضقتها
مراد:انشالله انضوقها لكي
-انشالله حبيبي
حلمنا ..وتمنينا خليتني انعيش ف اﻷوهام
بعد 5شهور من علاقتنا بديت انحس انك تغيرت ،رغم انك كيف ماانت
بس اتصالاتك قلن وديمه تتعذر بإنك ماعندكش فلوس تشري رصيد ،كنت مستغربه بس ساكته ،معش تكلم فيا ف الليل كيف قبل ولو كلمتك ترد عليا وصوتك متغير
ماكنتش انحط في بالي ﻷني واثقه فيك وقلت ممكن عنده مشاكل ايام ويرد كيف قبل
ايام وايام وانت كل يوم تزيد بعد رغم قربك ..فجأه ومش عارفه كيف تغيرت ..انا بروحي توا لما ندكر نستغرب ونسأل روحي شن الي صار
تميت في حيره وتعب لين في يوم دزيتلي مسج وقتلي افتحي النت بنحكي معاك
-مراد كنك متغير شن في
مراد :عارف روحي صمطتها وعارفك فاقدتيني بس انا صايراتلي مشاكل مع خوالي ولزوني من الحوش ..وبنمشي نقرى في سرت ..يعني احتمال معش نكلمك كيف قبل ..اعذريني حبيبي
انصدمت من كلامك .. مااقتنعتش بيه بس سكتت عشان ماننكدش عليك ونحسسك اني ضدك ..رغم خوفي من الي جاي وتعبي بدونك بس صبيت معاك ومابيتش انكد عليك
كنت انا الي اندزلك ف الرصيد وانكلم فيك عشان انكون معاك وكنت احيانا انحس من صوتك انك تعبان مجرد نقولك كنك باحبيبي تضعف وتقعد تبكي
وفجأه بديتلي في اسطوانة(مش حتكوني ليا وخايف نخسرك)
كنت نتعدب من جوه بس نحاول انضحكك وانغبرلك جوك بيش مانزيدكش
شهر واثنين وانت ع نفس الحال لين جا يوم  اختفيت
تليفونك مقفل  وماتردش ع الفيس ..
قبل ماتقفله بيوم ونحنا انهدرزو ع الفيس:
حبيبي بكرا بنقفل فوني معش نفتحه
-علييييش
مراد:حبيبي انا حياتي تلخبطت بكل وعرم مشاكل مش حنبعد عنهن الا لما نقفله
-باهي وانا يامراد
مراد:قاعد ع الفيس مش حنبعد عنك
-امباه براحتك يامراد
مراد:سميه رد بالك تفكري اني معش نبيك انا انحبك بس ظروفي تغيرت
-انشالله خير
ماكنتش مقتنعه بكلامك بس صبرت وسكتت عشانك ونسيت روحي وتناسيت العداب الي انا فيه وعفست ع قلبي عشانك انت.
جا يوم ماكانش عندي رصيد ومافتحتش نت ليا يومين ،كنت مشغوله عليك ،
الساعه 1ف الليل حايلت ع ماما اتدزلي جنيه بيش نفتح الفيس ونطمن عليك وللأسف ياريتني مافتحت ﻷني شفت اكبر صدمه في حياتي
لقيت مسج منك كتبتلي فيه :
(حبيبتي سميه نقول في كلمة حبيبتي وانا نتعذب ﻷني مانستاهلش اني انقولها لك ..سميه والله كنت ناوي معاك كل خير وكنت ناوي تكوني حلالي بس انتي تستاهلي واحد خير مني
سميه انا انسان مافيش فايده مني طول عمري حقير انا رديت للحشيش ورديت نشرب ،قعدت انسان سيء ومتنبيكش تشوفيني او تحبيني بحالتي هدي
سامحيني ياعمري ..ربي يعوضك بخير مني ..واعرفي اني مزلت انحبك بس الدنيا ضرت حبنا
ربي يهنيك في حياتك ياحياتي ..انحبك بس انا اصغر من اني انحافظ ع حب كبير كيف حبك ليا
صبيتي معايا ورغم عدابك كنتي اقرب وحده ليا ورعم معاملتيي لك وبعدي عنك تحملتيني
بس انا مانستاهلش هكي ..ماترديش ع المسج بيش ماتعدبيش واتعدبيني معاك
سلام وﻵخر مره انحبك ....
حبيبك مراد)
كلمه منك اتنسيني الحاضر والماضي..بسمه منك هذا حلمي ومرادي..لما تكون قريب انحس بالفرحه معاه..خلوني مع الحبيب انا ماعندي سواه..ياريت ياالدنيا ماتزيدي اللوم عليا خليني انعيش مع حبيبي شويه..من غيرو مابغيت حبيبي انا من بعدو..هو الي بغيت وبقيت على وعدو..
عجبتني اﻷغنيه لما سمعتها ﻷنها وصفتلي شعوري وقتها
تميت نقرا ف المسج ومش مستوعبه شي كيف كيف مراد يقوللي هكي بسهوله كل شي يمشي ا
كنت مصدومه دموعي ينزلن بلا مانحس انفنص نقرى كلمه ونرد انعاود بيش نتأكد الكلام هضا منك ولا انا تهيالي .
كانن مقعمزات حدايه خواتي تمن يهزن فيا ويقولنلي شن في كنك احكي ..تميت نقرالهمطن ف المسج ونبكي
امنيه:اصلا نحنا وقضناك منه من قبل ماسمعتينش ..
-شن اندير قولنلي بس شن اندير مش مستوعبه بنموت ليش يامراد هكي ليش
اميمه:حقير هضا مايستاهل دموعك
امنيه:ماترديش عليه خلاص انهيها هالعلاقه
-شن بالساهل هو واعره را انا قاعده نتعدب مش مستوعبه شي حاسه روحي في كابوس
تميت نبكي ماعرفتش شن انرد عليك ..وكنت انت وقتها اوف لاين وتليفونك مقفل ..دزيتلك (كيف ماتبي يامراد ربي يهنيك)
وسكرت الفيس وعزقت فوني ..حسيت بقلبي يوجع فيا بكل نرعش مع بعضي انفنص ومش مصدقه دموعي ينزلن بس مش حاسه اني نبكي ..كل دكرياتي وحركاتك وكلامك تميت ندكر فيهن وقتها
صبيت خشيت لداري قفلت فوني ورقدت غطيت وجي وبكيت لين رقدت
تاني يوم نضت ماعندش نيه في شي كل شويه نبكي حتى قدام هلي لين بابا فطنلي
بابا:سميه كنك ليا ايام انحس فيك مش تمام واليوم زايده بكل ودمعتك باينه ف عيونك
-شي يابابا مضايقه بكل
بابا:كنك ياامي شن في
اول ماسألني معش قدرت نمسك روحي تميت نبكي قدامه بشهقه تضبطني حسيت اني هضا الي محتاجته حد يضبطني ونبكي قالي وقتها كلام عمري ماننساه
بابا:انا مانندريش عليش تبكي بس ياامي الرسول عليه الصلاة والسلام قال (انما الصبر ف الصدمة الاولى) امشي صلي ركعتين وفضفضي لربك خلاص ياامي معش تبكي
حسيت روحي تطمنت في حضن بابا تريحت حسيت روحي معايا حد ومش وحيده بدونك كيف ماكنت نحساب ..ماقدرتش نحكي لماما لأني ادكرت كلامها لما قالتلي (حيحبك سنه اثنين ولاثلاثه وحتجيني تبكي من وجع الفراق)
خشيت صليت ودعيت ربي (يارب انت عارف اني انحبه يارب لو كان راحته في بعده عني صبرني ..ولو هو يتعدب بدوني ردنا لبعضنا )
كملت صلاتي وطلعت قعمزت مع خواتي ع التليفزيون
اميمه:وااااو ع وجك كيف تي سادك بكا
-غيري الموضوع ماصدقت سكتت
امنيه :تي ياغبيه غيري فكينا منه الفيلم هضا
سمعت كلمة غبيه قلبي رد وجعني ودموعي تمن شلالات
امنيه :كنك اسمالله مش كنتي ساكته توا
-وراس امك خليني في حالي
صبيت ركبت فوق اسطاح
السطاح الي كنت ديمه نركب انكلمك فيه وكنت ديمه اتهزب فيا لما تسألني شن لابسه وانتي فوق سطاح ولما انقولك اتهزبني لأنك ع قولتك ماتبيش حد يشوفني غيرك
تميت انبحت في كل تركينه وانا مش مستوعبه
تدكرت كلماتك (عبيه .. سموحتي..مشعوده ..ام فرج ..روحي ..قلبي ..هب شقلب !.. خت فت !.. اميرتي.....)
كلماتك كلهن مرن عليا
اااه يا قلبي بنموت من تعبي
جا في بالي ليش ليش نسكت انشوف حبي يضيع مني ونسكت ..ليش لازم ندوي معاه انشوف ليش دار هكي ..مستحيل يتحمل بدوني عارفته يحبني لازم نحكي معاه ...وتحملت ان اليوم يمشي عليا بدونه بعداب وبكا وقهر ربي مايضوقه لحد ..وف الليل فتحت فيس دزيتلك مسج وربي يعلم بحالي كيف كتبته وتحملت اني اندل روحي بس لو مادرتش هكي كنت حنموت (انت قتلي انك معش تبيني وانك تغيرت وانك انسان سيء
بنسألك سؤال رغم الي درته في امك وتعبتها عمرها تخلت عنك وسيباتك ؟كيف جاي تبيني نسكت بسهوله وتنهي كل شي عادي
ياحمار افهم انا انحبك انموت بدونك كيف تطلب مني هكي كيف تقدر تفكر في شي كيف هكي ؛مراد تدكر لما قتلي انا لو جيتك يوم وقتلك سيبيني حتسيبيني ..رديت عليك اهم شي كرامتي زعلت مني وقتها
انا نكدب والله نكدب ينعن بو الكرامه الي تفرقنا ..لا يامراد كل شي الا فراقك ..والله راضيه بيك كيف ماكنت خلينا انكملو حياتنا كيف ماخططنا ..انحبك يامجنوني )
بعد كتبت الكلام هضا حسيت روحي تريحت بعدها رقدت
تاني يوم اول مانضت فتحت فيس لقيت مسج منك
(اولا انا ماقتلكش معش نبيك انا انحبك ياحبيبة الحمار بس مش حتتحملي حتكرهيني ياسميه والله انا تميت واحد ماتعرفيش صدقيمي خايف عليك مني
-كيف تخاف عليا من روحي ..نكرهك ؟تدكر انت لما قتلي لو سيبتيني حنكرهك كيف توا تبيني انسيبك واتخيرني بين فراقك او كرهك ..انا انحبك افهم
مراد:خلاص انسي كل شي وخلينا نعيشو وكيف مايصير يصير
-ايوا هك يابارد
مراد:ياعبيه شن درتي فيا اول مره نقعد ضعيف مع حد هكي
-والله زعلانه منك
مراد:الا زعلك ياروحي بس مزال مش حنقدر انكلمك
-عادي نحكو ع الفيس