للحب حروب أيضا

سلاما على قلوب أنهكتها الحروب

-اهمممم باهي ، قولي لما بتطلع
مراد:امممم تعرفي ان النظاره تتهبل عليك؟
-شنوووووو ؟ وين انت ؟
قعدت نتلفت في كل مكان ، لين بحتت ورايا لقيتك مصبي متكي ع سيارتك تبحت فيا وتضحك والتليفون في يدك ، انجنيت بيك كنت لابس فلينه صوف زرقه وجينز ونظارتك ع شعرك وعيونك عسليات يلمعن من الشمس وكلك علي بعضك تهبل
ضحكت بجنون بحتت فيك وانا مش مستوعبه انك مجنزن للدرجه هدي ، كانت احلى مفاجأه بالنسبه ليا حبيتها منك وحبيت وجودك لين جيت وسلمت وقعمزت احدايا
مراد:حبيبتي حولي النظاره بنشوف عيونك
-ماتبحتش فيا هكي نتحشم
مراد:هههههههه نعشقك ياعبيه نعشق عفويتك
-هههههههه ع أساس راقد ونعسان وتتاوب تي نعستني معاك ..يناعلي من طروحك انت
مراد:ههههههه وقت رنيتي عليا كنت في استراحة اجدابيا وصلت غيرت دبشي وجيت قلت انا وحظي يالقيتك ياروحت، بس مفاجأه صقع صح هههههخخخ
-بكل يامجنون تقول حاس بيا كنت انقول ياريتك هنا را جيت قعدت معايا ﻷن بابا قالي بنطول
مراد:اهو جيتك ياروحي، وين احبيبتي
انصدمت من جرأتك :مراد كنك انجنيت ولا شني
مراد: اها من يوم حبيتك ونا مجنون هيا نبيها
-مراد قدام الناس كنك ؟
مراد:مادخنيش نبيها ولا انقرب ناخدها
-ماتقدرش حنعيط ونجري
مراد:هههههههه وحق ربي عارفك مغوليه وتديريها ، تي هيا عاد
-لااااا
مراد:نزعل منك؟
-ازعل ماهو مجنون
درت روحك زعلت وصبيت من ع الكرسي وعطيتني بظهرك وولعت سبسي ..وقتها جا بابا وقتلك اني بنروح بس ماسمعتنش
يومها ضحكنا لما رديت للحوش وكلمتك وقتلي انك خفت مني
-وعليش خفت هههههههه
مراد:تي درت روحي زعلان وصبيت ولما قلت لروحي بطل دلع وماتخربش اللحظه ورد لحبيبتك ..برمت مالقيتكش قاعده ، حسيتك مشعوده الزح تطلعي وتختفي امتى ماتبي
-بس انا قتلك ان بابا جا وبنروح
مراد:والله ماسمعتك ، بس مش قتلك في صفات اخرة حتطلع اهو طلعتي مشعوده ههههههههه
ومن يومها تمى اسمي (العبيه المشعوده) وياما طلع اسامي مع اﻷيام والمواقف.
كان يوم يهبل عمري ماننساه ومفاجأتك في حد داتها كانت معنى السعاده؛ جنونك وحبك وجرأتك وطفولتك وكلامك كان كل شي يهبل.
كنت ديمه نتعقد من امنيه واميمه خواتي لما يقولنلي انهن مش متريحات لك ، رغم انك ضايفهن ع  الفيس وديمه تحكي معاهن وتقوللهن انك تحبني وتبيني ، بس ﻷنهن يحبنني ويخافن عليا كانن يقولنلي رد بالك منه
رغم انهن اصغر مني بس ﻷني كنت معميه بحبك كنت نتصرف بلا عقل لدرجة اني نتعارك معاهن عشانك ويقولنلي افطني لروحك ﻷنك حتضيعي ..وفعلا ضعت انت وضيعتني معاك يامراد
مزلت هضا كله نحكي ع حسناتك معايا وبداية حبك ليا ومزال ماحد يعرف شن درت فيا ولا قديش تحملت منك ..ومع اﻷيام حنحكي كل شي ..
يومها اتصلت بيا وحكينا واجد وضحكنا وفرحنا اكثر، بعدهت سكرنا المكالمه عشان نرقدو ﻷننا تعبانين من النوضه بدري ، واتفقنا ان الي ينوض قبل يتصل بالتاني
رقدت فعلا ﻷني تعبانه والخريف ديمه يتعبلي الجيوب اﻷنفيه فماصدقت حصلت نومه.
المهم نضت بحتت في تليفوني ومالقيتش ولا رنه منك ، قلت في عقلي اكيد مزال راقد ، ولما رنيت عليك لقيتك مقفل ، قلت اكيد شحن كمل
لكن ساعه ورا ساعه وانت مزال ماتصلتش وتليفونك مقفل
جا الليل ومزلت مارنيت ، قلقت وخفت عليك واجد وكل شويه انرن عليك نغس القصه سبيت ولعنت الاسطوانه لين طاح سعدي وانت مزال تيليفونك مقفل
تأخر الوقت واستسلمت للنوم بعد صراع مع التفكير الشيطاني الف فكره شينه تخطر عليا لين رقدت.
تاني يوم نضت اتصلت بيك ومزال مقفل لعنت ام الاسطوانه وعزقت التليفون ..كنت بريئه ومعميه وماكنتش نحساب اني حيجي عليا يوم ونلعن ام اليوم الي عرفتك فيه  .
مشى يوم كامل وانت لا حياة لمن تنادي لين معش قدرت نتحمل تميت منهاره ونبكي وندعي ربي مايحرمني منك
قعدت نسأل في روحي ونتخيل لو جا يوم وتفارقنا كيف حنعيش كيف حنتحمل
ماقدرتش نتحمل اكثر بكيت لين اغمى عليا ورقدت من التعب وقلى الايكال
بعد قريب ساعه جاني مسج من رقم مانعرفش
)حبيبتي افتحي النت)
ماكانش عندي رصيد ﻷني نفتح بليبيانا ، رنيت عليك بشفرتي المدار بس مارديتض عليا ، بعدها دزيتلك مسج وكتبتلك (مراد انا سميه)
شويه ورنيت عليا بنفس الرقم
-مراد وينك حرام عليك
مراد:كنك تبكي ياروحي اسف والله غصب عني شفرتي اسكرت برمز pin والعقد في راس لانوف هضا رقم سندس اختي ماحوتك بيش عطاته ليا بيش انطمنك عليا
-المهم اطمنت عليك والله قريب متت من خوفي
مراد:آسف ياعمري بكرا نمشي للدعوه انطلع شفره..توا بنسكر ﻷن سندس اتعيطلي ع الرصيد
-اوكي حبيبي سلام.
وفعاا تامي يوم رنيت عليا برقمك الجديد
انصلن بيا والشوق واللهفه باينات من صوتك حكينا واجد بعدها جوك صحابك وطلعت معاهم.
كنت نتنفسك يامراد ، نمسك كتاباتي بيش نقرا نلقى رزحي نكتب في اسمك في كل ورقه ضاعت كلماتي وحروفي وامتلكت انت كل شي يخصني حتى كتاباتي
وﻷني نعشق الكتابه ونعجز عن الكلام نعبرلك عن حبي لك بكلمات مكتبهن لك واندزهن ع الفيس
كنت ديمه اتحايل عليا اندزلك صوري بس كنت ديمه نرفض رغم ثقتي الكبيره فيك بس كان في خطوط حمرا تحت صوري .
مرت اﻷيام وانا وياك مزلنا عامينا الحب حتى علي سيئاته .
تعرف كنت انحبك لدرجة ان حتى الغرباء عرفو اني عاشقه من لمعان عيني ..تميت نهتم بروحي اكثر نتخيل انك معايا في كل وقت، كنت ديمه نحلم بالحوش الصغير الي حيجمعنا ونرتبوه بذوقنا ، ونتعاندو ع لون دار فرج وريماس عيالنا
كنت ديمه تبيني نتعلم السواقه
-عليش تبيني نتعلمها؟
مراد:ﻷني بعد كم سنه حنكون مشغول وانتي الي توصلي عيالنا لمدارسهم، نتخيل فيك وانتي ام هههههههع
-عليش تضحك توا ..صقع عليك توا اتحقني نقعد انهبل، حنزيد جمال
مراد:هههههه ردي بالك تقعديلي من الصبايا الي يلهن ف الحوش والعيال وينسن رجاجيلهن
-ماتخافش انا حبيتك قبل مانحقهم كيف نهنلك ونهتم بيهم
مراد:نعشقك ياعبيتي
-انحبك يامجنوني
مراد:يا حي ع العيله المتخلفه وخلاص ههههخ
ضحكنا وهدرزنا وكان جونا يهبل
نتدكر يوم ماحكينا ع الكرامه بين العشاق
مراد:تهيالي مافيش كرامه بين العشاق
-لا الكرامه موجوده في كل وقت ومع اي حد لازم اتحافظ عليها
مراد:لكن الي يحبك يحافظ ع كرامتك
-صح المفروض هكي
مراد:باهي نسألك سؤال
-اسأل حبيبي
مراد:يعني انا لو في يوم قتلك سيبيني حتتعاملي معايا بكرامتك واتسيبيني
-اكيد كرامتي فوق كل شي
مراد:حتى انا؟
-حتى انت
مراد:ماتوقعتش هكي يكون ردك .
تعرف مش عارفه ليش كنت ديمه نتظاهر بالقوه مش عارفه ليش نقول في نفسي اني انا اقوى منك ﻷنك ضعيف مع الدنيا
بس سيبتني لين اعلنت ضعفي وطغيت عليا وتميت انت القوي الضعيف .
شن صار لو ماتغيرتش ؟ لو قغدت كيف ماانت لو وفيت بوعودك؟
راهو انا توا فرحانه ومتريحه وحالتي احسن من اي حال
بس لو عمرها ماتنفع
ﻷنها تمني ..وانا نسيت كيف نتمنى او نرجى منك شي يفرحني .
شهر واثنين وثلاثه ونحنا كل يوم يزيد حبنا ، كنت نحلم بيك في نومي وفي وعيي كنت مجنونه بيك نضحك بروحي كل ماندكرك ولا نسمع رنتك..حتى لما نسمع اغنية اصغيرونه الي هديتها ليا وقتلي اسمعيها
(مانبي غلا من حد، يسلم حبيبي كل شي عطاني، سقاني مناه الود ، وعطف وحنان وشوق لين رواني، من قال عندي غيره.يكثر حبيبي خيره، ماقصر معاي ونهار نساني)
كنت نسمع فيها وانا فرحانه بكلامها ونضحك
.اما توا وصلتني لمرحله كل مانسمعها انسكر وداني ونبكي .
ندكر اليوم الي عرفت فيه ماما بحبنا
كنت مقعمزه حداها ومعانا اختي نهى اكبر مني متزوجه وجتما يومها زياره، كنت ماسكه في يدي كتاباتي ع اساس نقرى بس كنت في عالم اخر عالم الحب الي مافيشي حد في نظري غيري انا وياك
ماما :سميه كنك رايحه تسرحي واجد ..انحق فيك الايام هدن ديمه سارحه ومبتسمه
-لا شي عادي تهيالك بس
نهى (اختي الكبيره) :بنتك اتحب ياماما
صدمتني بكلمتها :شن تخرفي انتي من قالك مافيش منها الدوه هدي
نهى:من عيونط باينه واسم مراد الي في كل ورقه من كتاباتك افتحي توا اكتابك حتلقيه
-اسكتي انتي مادخلكش
ماما:خشيتي ع الجو هضا ياسميه
ابتسمت ، تنهدت ، تدكرتك يامرتد قلت في عقلي ااه او نقدر نقول للدنيا كلها اني انحبك يامراد ..ااه ياماما لو تعلمي قديش انحبه
وعيت ع صوت ماما :ها ردت سرحت، تي ندويلك انا، من هو مراد هضا
دويت لماما عليك وفي نفس اليوم الي قلتلي ان امك سمعاتك وانت تحكي معايا وسألاتك عليا وبصت عليك اختك الكبيره سندس زي مابصت عليا نهى اختي
صدفه صارت ان امهاتنا يعرفو بحبنا في نفس اليوم وبنفس الطريقه بس اختلاف المكان واﻷشخاص
كنت نحكي لماما عليك بفرحه وثقه في حبك بس حبطتني بكلام عمري ماننساه ، تعرف شن قالتلي يومها ؟
قالتلي:حيحبك سنه اثنين ولو كثر ثلاثه بعدها حتجيني تبكي من وجع الفراق
تمردت ع كلتمها وماعجبنيش ردها ﻷني واثقه او متوهمه انك تحبني ومستحيل تتخلى عني
-مستحيل يصير هكي ياماما مراد ايحبني ويبيني وحنكونو لبعضنا
ماما:مش حنرد عليك توا بس اﻷيام تلف وتوا اتشوفي
وهضا الي صار فعلا رديتلك ياماما رديت لكلامك وقسمت ان مافيش حد يفهمني ولا يحبني كيفك
سامحيني ياماما تهزيت ع كلامك وقلت شن فهمك في حبنا ..تمردت على الواقع وتميت انا الضحيه ، ااااه ياماما ياريتني سمعن كلامك ، لكن كنت عميه مش فاطنه لشي خدا مني عقلي وقلبي وسيبني انعاني ونشكي وجع الفراق كيف ماقلتي ..عشقته بس دمرني وعدبني كأنه وحش يتمتع بعداب فريسته ...
ندكر في يوم اتصلت بيا وكنت فرحان بكل لأنك بتسافر برا يقرى ، تظاهرت بالفرحه وتميت انشجع فيك وندعم في رأيك
سكتت وسمعتك وبادلت كلامك بالضحك بس فجأه معش قدرت نتحمل تميت نبكي ودموعي كأنهن مطر في يوم تجمع في جوه كل الفصول
فرحة الربيع مع حرارة الصيف مع رعشة صقع الشتاء ورماد الجو ف الخريف
هكي كان شعوري لأني عارفه إن شباب بلادي ديمه يستسلمو لحرية الغرب ..وإن كم علاقة حب انتهت بسبب السفر وبسبب بعد المسافات
كنت خايفه ونبكي 😢
مراد:كنك حبيبي
-مراد حتتغير عليا 😩
مراد:مش حنتغير عليك حبيبي اقسملك بالله مانقدر نتغير لأني انحبك..حبيبتي عبيتي نور حياتي ماتبكيش
-مش بيدي ادمنتك،تفهم ولالا تعرف شن معنى ادمنتك ؟.مانقدرش انعيش بدونك يامراد
مراد :مش حتعيشي بدوني حنكمل بسرعه وانردلك بيش نزوجو ياام فرج
-ماتسيبنيش تعرف حنقتلك لو سيبتني ،مش حتكون لغيري🔫
مراد:بنفهم بس من وين اتجيبي ف الدموع هدي كلها 😂
-اتشفط عليا انت😤
ههههههههه اها يابكايه ..نعشقك انحبك ماتبكيش خلاص
-امباه،انحبك.
نتدكر اليوم هضا كنت في داري مطفيه الضي ونحكي معاك وانا في عالم القلوب والفراشات.
مراد:حبيبتي خاطري نسمع صوتك تغنيلي
-صوتي شين مش حيعجبك
مراد:مادخلكش انتي غني بس
(بطمنك ياحبيبي من أولها.سكتنا لو عاندتنا حنكملها .دنيتنا لو تعبتنا من عمايلها.بالصبر انا وانت حنستحملها.على قدنا حنعيش مع بعضينا.وحبنا من الدنيا دي يكفينا .دا انت وانا ولا عمرنا اتمنينا.غير بيت صغير وباب مقفول علينا)
غنيتلك الاغنيه هدي كان صوتي مقبول مش شين وبشهادة ناس واجد
-مراد تسمع فيا كنك سكتت
مراد:تعرفي تخيلتك قدامي تلعبي في شعري وتغنيلي غمضت عيني عشان نتخيلك قدامي ..قريب رقدت من عذوبة صوتك
-ههههههه لنقنك كداب .. صوتي بشع بكل
مراد:مانسمحلكش تقولي هكي ع حبيبتي تسمعي ولالا
-هههههههه حاضر
مراد:وراس حبيبتي تعاوديها
استغربت بكل من طلبك :حاضر😲 !
مراد:هههههه قولي ميكرويف
-ميكرويف؟! وشن فيها يعني
مراد:يناعلي انا قتلني نعشقه منك ههههه
-الميكرويف ؟!؟ 😱
مراد:هههههه ينعن جد غبائك ، حرف الراء ياعبيه
-مراد جاتك الحراره 😲😰
مراد:لا والله
-معناها انجنيت
مراد :بيك ياعبيه كل شي فيك نعشقه ياام فرج
-عليك اسم بشع
مراد: اها مش لايق عليك
-وشن يليق بيا انشاءالله
مراد:يليق عليك ام مراد حبيبة مراد مرات مراد بنت مراد
-مراد انحبك
مراد: تي وحق ربي نعشقك .ادمنتك كيف ادماني القديم
-بس انت سيبته ،حتسيبني حتى انا 😩
مراد : مانقدرش انتي من النوع الي مستحيل نتخلى عنه ..تسري في الوريد من غير مقاومه.
تأثرت بكلانك وصدقتك كأني سكرت من كلامك وخليتني في عالم آخر ،،كنت كأني بنت اصغيره تحلم بعابم القلوب والفراشات ،،كنت مجنونه بيك نعشقك ومازلت لعند توا ورغم كل شي درته فيا انحبك
اااااه يامراد لو كنت استمريت معايا علي حبك لو انا توا في حوشك ،لو قعدت توا ام فرج وريماس ،لكن الي ظنيت انك بعدت عنه وانك سيبت ادمانه عشان تدمنني انا هو الي دمرك ودمر كل شي بيننا. 😢
كنت ننظر لحبنا بتحدي للقدر ، كنت انقول مستحيل شي يفرقنا ،تهزيت ع الأقدار فلعبت بيا لعبتها الي خلتني نخسر البنت البريئه البسيطه الي ماتعدلش ع الهموم ،كل همها في انها تعسش حياتها مع حبيبها وتنجح.
عمري ماشكيت فيك ،وعمرك مادرت شي يخليني نفقد الثقه فيك ، كنت صريح معايا حتى لما انحق بنت في صفحتك ع الفيسبوك تقترحها ليا وتقولي تعرفي عليها واسأليها كيف نحكيلك عليها
حتى لو اتصلت بيك ولقيتك انتظار مانعدلش لأني واثقه فيك ثقه عميه
ماعدا يوم واحد ،هضك اليوم حسيت فيه اني حننخنق من الغيره
اتصلت بيك ف الليل لقيتك انتظار
ساعة ورا ساعه قريب انجنيت ،كتبت رساله كنت نبي انبي اني حامقه بكل لكن امنيه اختي قالتلي ماتسرعيش راجي شويه
اتصلت بيك مره اخرى رد عليا سراج خوك
سراج:ايوا سميه كيف حالك
-اهلين ..من معايا؟
سراج:انا سراج خو مراد ..مراد عاطيني التليفون انكلم بيه هديل (هديل حبيبة سراج ونعرفها ع الفيس)
-اها كيف هو وين
سراج:رقد من بدري قالي توا انوض اشويه اخرى انكلم سميه ولما قتله متعارك انا وهديل قالي خلاص خود تليفوني وبكرا توا نحكيلها ليش ماكلمتهش
-اهاااا باهي سامحني سكنتلك وازعجتك
سراج:لا بالعكس انتي الي سامحيني.
وقتها تريحت وغلطت روحي لأني شكيت فيك وحسيت روحي ظلمتك
وفعلا تاني يوم كلمتني ولمتني لأني شكيت فيك وتصالحنا وكانت هدي المره الآولى والآخيره الي يصير بيننا شي كيف هضا.
نتدكر يامراد لما سألتني عن شعور البنت لما يسيبها خبيبها
قتلك وانا نتخيل في روحي نحكي بحرقة قلب وقهره :تعرف شن شعورها ، حنقولك يامراد تضيق بيها حياتها وتزرع فيها الام فوق حملها وروحها وفكرعا وعمرها ،ماتفكرش في شي غير انها تبي تسألك ليش قربت وليش حبيتني وليش كدبت عليا وبعتني تغلبها دمعتها وتبكي لين ترقد.
كنت تسمع فيا بعدين قتلي :والله مانسيبك مانخليكش تتعدبي انحبك ياعمري
وانا كيف الهبله صدقتك ومشيت علي الوعد هضا ..مشيت وتعرقلت خطواتي في طريقي لين طحت في وحل من الكدب نستنشق عطرالذكريات في الهواء وانشوف في سيول الفراق تقرب مني عشان تغرقني في الوحل الي انا طحت فيه ومافيش نجاة منه لأني تميت وحيده...
ديما في اعتقادي بإني نقدر نتخطى نقطة النهايه بتحدي عشان انكمل الطريق ،لكن ديما ننسى ٱن النقطه هدي هي الحد الأدنى للتنافس الشريف وان الي بعدها
مش مهيء للمنافسه
قلت لي في يوم :ياسموحتي ماتعدليش ع كرامتك معايا عشان ماتتكبريش عليا ونخسرو رحلتنا
-ياسلام ،تشبه حبنا برحله ؟
مراد:اها رحلة عشقي معاك
-اممم باهي ،وليش ماتبينيش انعدل ع كرامتي؟
مراد:لأن في رحلة الحب لو حسبتي الف حساب لكرامتم حتخسري كل شي
نحسابك اتبالغ في كلامك لكن صدقا كلامك توا لأني فعلا حسبت لكرامتي الف حساب وخسرت كل شي
مش خطأ مني لأني كنت خايفه الله عليك وفيك
وانت تحسابني مانحبكش
كيف مانحبكش وانا مدمنه في حبك،عارفه انك اتضرنب ومانقدرش نتخلى عنك ،كنت كيف الي مريحه عقلها ،اندير في كل شي من غير تفكير
تغيرت واجد يامراد .. غيرتني بعشقك ، معش تميت البنت البريئه الساكته المسالمه الطموحه ..تغيرت كل صفاتي
تميت مجنونه فوضويه مانعدلش ع شي
كنت اتكلم معايا عن كل شي في حياتك عن باتك المتزوج غير امك وعنده بنتين توأم .. وعن أمك الي تعبتها بتصرفاتك ايام طيشك وعن خواتك الي ماتعدلش عليهن بكل وعن حاجات واجده .
في يوم كنت مقعمز قدام حوش جدك وتحكي معايا ع الفون ..
سألتني عن اخباري وعن احوانا ،كنا انهدرزو ،ندكر انه كان عطله جا ولد جيران جدك عيل صغير قعمز حداك وكنت تحكي معايا
-ياخيا من هضا صوته يهبل
مراد:نعم ياحنه شن قلتي
-تي عيل صغير ياحبيبي
سكتني العيل بسؤاله:مراد مراد من هدي الجو امتاعك ؟
حمقت انت بكل وقلتلي : هضا هو العيل الصغير الي قلتي عليه
نتدكر انك ضربته ع راسه وقلتله : ياحيوان هدي المدام ..اقلب وجك يافرخ
ضحكت عليك لين شهقت وخليتك تضحك ع ضحكتي ..وكنت ديمه انت سبب ضحكتي
سألتني في يوم
مراد:حبيبتي انا املقبك بعبيتي ..بيش ملقبتيني انتي ؟
-انت جرعة السعاده
مراد:هههههه انتي يافرخه تتعاطي من ورايا
-ههههههههه نتعاطاك انت
مراد:كيف صار قصدك انا في مني انواع؟هههههه
-اها انت مقسم لجرعة السعاده في كل وقت، وكاس العشق الي نسكر بيه ، وابرة الدفا والأمان الي تعبي دمي بالنشاط،وحبوب الأمل ف الدنيا
مراد:ههههههه حي حي تاريته ياما يطلع مني ..سيبت انا التعاطي ومسكتيه انتي ههههههه
-مجنون هههههههه
مراد:نعشقك بجنون