للحب حروب أيضا

سلاما على قلوب أنهكتها الحروب

وين مشيت انا ..خلوني انرد ﻷول يوم تقابلنا فيه :
تحشمت بكل ﻷن حركة شفايفي عفويه وانت فسرتها بشي آخر .معش عرفت شن انرد
بس قاطعت سكوتي وقلتلي :وراس حبيبي تعاوديها
-مراد ماتحرجنش حركه عفويه مانقصدهش
مراد:حركه عفويه عندك انتي بس ماتعلميش شن دارت فيا
تحشمت ونزلت راسي وقعدت انت تدويلي وتحايل عليا انعاودها بعدها سكتت فجأه
رفعت راسي انشوفك ليش سكتت لقيتك تنفخ ف الدخان وتبحت في الجيهه الأخرى وكأنك تشوف في شي بعيد
-مراد فيش تبحت
مراد:انبحت في البنت هدكي تحقي فيها
تعصبت بكل ومؤشر الغيره ضرب عندي وبعفويه مني عاودت حركة شفايفي وحواجبي الي عجباتك بس المره هدي مش خجل بالعكس عصبيه وغيره
مراد:هههههههه حقيتي توا خليتك تثبتيلي غيرتك عليا وتعاودي الحركه الي عجبتني بلا ماتفطني لروحك
-خزي عليك لئيم
مراد:تي ظلم الزح عشان انحبك نبقى لئيم ..تي نعشقك ياعبيه
-عجباتك البنت ياباتي
مراد:ههههههه بدينا في جو العزايز..يامجنونه والله مافي بنات بكل غير درت هكي انشوف ردة فعلك
-مراد نسألك سؤال
مراد :اسألي ميه لوتبي
-كيف تعشقني وانت ماشفتنيش غير اليوم
مراد:حنرد عليك بكلمة وحده وياريت تفهميها ومعش تسأليني السؤال الغبي هضا (حبي لك جوهري مش مظهري ياعمري )
كلماتك زادت جنوني بيك ..رجولتك شكلك وانت اتدخن ابتسامتك كل شي فيك خلاني نعلن استسلامي لبداية الحرب معاك قصدي الحب ..وفعلا طحت اسيرة حبك.
حكينا واجد وسألتك وسألتني عن عرم تفاصيل ..بعدها ولعت سبسي اخرى، بحتت فيك بتعجب
-مراد سادك لازم انقول اني انخاف ونغير عليك منه
ضحكت ضحكه مزال صدى صوتها في وذني :تعرفي انك اتهبلي وانتي حامقه هو السبسي الي محمق حبيبتي.
عزقتها يامراد وعفست عليها بكرعيك ، عجبتني ردة فعلك وزدت حب لكل شي فيك بس ماكنتش نعلم شن الي يراجي فيا من القدر والزمان بعد السبسي هضا ..ولا شن حيصير فيا معاك
ماكنتش نعلم انك حتعفس ع قلبي كيف مادرت ف السبسي
ديمه نسأل في روحي :
هل الي صار بيننا هو انتقام السبسي مني ؟
شفت فعلا تميت غبيه حتى في تفكيري وكله بسببك .
تعرف يامراد شن الفرق بيني وبينك؟
الفرق اني انخاف الله في حبنا وانت اتخاف من الدنيا والزمان ..اتخاف من انتقام اﻷيام اكثر من خوفك من الله وخوفك عليا.

رديت لحوشنا بعد اول مقابله بيننا والي تمى تاريخها عيد لحبنا ع مرور 3سنين مع بعضنا
روحت فرحانه بكل وعايشه في عالم القلوب والفراشات مانحقش في شي غير صورتك في عقلي وصوتك في ودني وكلمة انحبك لما قلتها ودق معاها قلبي،نسيت نفسي نسيت عيلتي ..وانت بس في ذاكرتي.
خشيت لداري غيرت دبشي وصليت بعدها عزقت روحي ع السرير اتفكر فيك وبس لدرجة مانفطنش لروحي إلا وأنا نضحك كأنك قدامي ..لين وعيت لروحي ع صوت رنتك
مراد:حبيبي رايفت عليك
-يناعلي عليك حاويات لحقت اسمالله
مراد:تي ينعن بو الرومانسيه الي عندك ..وحق ربي اشتقتلك
-باهي انحبك يامجنون
مراد:انموت فيك ياعبيه
-ههههههه ليش ديمه تقوللي ياعبيه
مراد:مش عارف عندك عفويه مخلطه بالغباء السمح الي اما انحبه ..مش غباء هبل ..غباء يدل ع عفويتك وحنانك وطيبتك ..وربي الي يهلم مرات مع اﻷيام نكتشف فيك صفات اخرى
-امممم بلكي عادي توقع مني اي شي..بس ماتاخدش ع الغباء هضا في من وراه كوارث
مراد:ياودددي مانظني
-صار ياودي ههههه
مراد:امالا شني العرق الغرباوي يضرب
-لنقنه يضرب هههههه
قعدت ندوي معاك ساعات وهلي يحسابوني راقده ..كنت فرحانه يامراد، كنت نتنفس العشق عشانك .
أيام تمر وانا كل يوم نزيد حب ليك وﻹهتمامك
حكيت عليك لكل الي نعرفهم ..صحباتي وخواتي أمنيه وأميمه ولو كان بيدي راهو حكيت للكون كله عن اني مالقيتش راجل كيفك ولا عمري حنحب غيرك حتى لو ازوجت وجبت عرم اعيال مش حنحب حد كيف حبي لك ..ﻷني يوم ماحبيتك خشيت في حرب نتيجتها اني طحت اسيره لحبك.
ندكر في يوم كنت في الجامعه انراجي في المحاضره ف الصبح بدري ، اتصلت بيك انشوفك امتى بتجي للجامعه.رديت عليا وصوتك ثقيل ومبحوح من النوم تتاوب وتتكسل بجد قريب انجنيت بيك يومها
مراد:صباح الخير ياعمري
-صباح النور حبيبي
مراد:قبل كل شي نطلب منك طلب؟
-تدلل حبيبي
مراد:نوضيني كل يوم كيف اليوم
-عليش عندك حاجه مهمه
مراد:تي وشن اهم من اني انوض ع صوت حبيبتي وتعطيني جرعة نشاط وحنان يخلنني انصحصح وانكمل يومي جوي فوق الريح
-ياخيا والله انحبك
مراد:تي انموت فيك ..وين قاعده انتي
-ف الجامعه نرجى في محاضرتي توا تبدا
مراد:وعندك وحده بعدها صح
-نجي حبيبي حافظ مواعيدي
مراد:امالا شني نعجبك را
-عاجبني بلا شي
مراد:نجك ليا ياروحي
-خلاص توا سلام حبيبي
سكرت منك وانا فرحانه بكل ..كنت خايفه من فرحتي ماتكملش ..ﻷني تميت مانقدرش انعيش بدونك
كنت ديمه انقولك هكي ..وكنت ديمه ندعي ربي مايحرمني منك
وصلت لمرحلة اني ندعيلك بالدعوه الي ندعي فيها لماما وبابا (يارب اجعل يومي قبل يومه عشان مانموتش مرتين)
وياريتك متت ولا إنك درت فيا الي درته ع اﻷقل كنت حتقعد ذكرى حلوه في حياتي ..تخيل انت لما توصل لمرتبة الشرف انك تزاحم امي وباتي في دعائي لهم 
وياريتك تستحق ..
تعودت عليك واجد وتعودت ع كثرة دوتنا
كنت تتصل بيا طول اليوم ومع بعضنا ديمه لين نرقدو
كنت ترقد بس ماكانش تغمضلي عين
انفكر ونتخيل كيف حتكون حياتنا
اتفقنا انا حنزوجو بعد 4سنين وحنجيبو عيل وبنت بس بعد سنه من زواجنا وع قولتك عشان نتمتعو بحياتنا
سألتك؟
-حبيبي شن حنسمو عيالنا
مراد:البنت سميها انتي والعيل انسميه انا، هيا 1.2.3 نقولو الاسماء مع بعضنا
ريماس ..فرج
-شنوووووو فرج ؟ لا ارجوك شنو الاسم هضا
مراد:كنك انصدمتي هكي .. وليدي بنسميه فرج
-حرام عليك شن دنب العيل
مراد:وعليش دنب الزح بنسميه ع اسم خالي وصاحبي الله يرحمهم
-الله يرحمهم بس ..
مراد : باهي وع أساس اسم ريماس سمح
-اها انحبه الاسم هضا وحنجيب بنتين انسميهن ريناس وايناس
مراد:وشن دخلنا بالناس
-مراد اتهزا ع بناتي
مراد:ههههههه ماتنسيش انهن بناتي..توا انتي طموحك اتجيبي عيال واجد
-اها انا الي حنتعب ونكبر كلا انت شن بتدير غير انك...
مراد:هههههههه غير اني شنو ههههه
-شي
مراد:وحق ربي عبيه صح ..حبيبتي عيل وبنت سادنا ..مانحبش العيال واجد هرجتهم واجده
استغربت منك كيف ماتحبش اﻷطفال ؟ في حد مايحبهمش
رغم اني تعاندت معاك واجد بس فرحت ﻷنك تنظر لمستقبلك معايا حتى لو حنسمو ولدنا فرج اهم شي انه منك وهضا يكفيني.
قلتلي انا اول مانزوجو حنمشو انعيشو في مسقط رأسك مع هلك في راس لانوف ﻷن بنغازي عايش فيها عند عيت جدك عشان تقرى بس
حتتخرج وتقعد مهندس اتصالات ونكونو عيلتنا ونعيشو مع بعضنا
توهمت ان كل شي خططناله حيتحقق بس ماهي الا احلام يقظه....
في يوم كنت ماشيه للجامعه بنجدد قيدي، وكنت إنت عند هلك في راس لانوف ﻷن عطله ومزال كليتك مابدتش .
اتصلت بيك كالعاده في الصبح بيش اننوضك
مراد:صباحو ياروحي
-صباح النور حبيبي ؛ شنجوك
مراد:تمام تعبان ومش راقد كويس سهرت مع سراج(خو مراد) امس نلعبو في صوني، مزلت نعسان بنسكر منك نرد نرقد
-باهي معش تتاوب نعستني معاك ، امتى بتجي تجدد قيدك؟
مراد:والله ماني عارف كلمت سليمان(صاحب مراد) امس قالي تجديد القيد اﻷسبوع الجاي ،بس احتمال انوض بعدين نسقد..خاطري انروح بنغازي
-باهي كان طلعت رن عليا قولي
مراد:حاضر،وانتي جددتي قيدك ولا كيف صار؟
-لا مزال توا بنخش للمدرج ..زحمه بكل ويستر الله
مراد:باهي حبيبتي رد بالك ع روحك
-انشالله، سلام توا
مراد:انحبك
-انموت فيك
خشيت للمدرج جددت قيدي بعد قطمره وزحمه ونراجي في صحباتي مانهيتش اموري الا بعد قريب 5ساعات ، كانت الساعه تقريبا 12 الظهر .
رنيت ع بابا بيش يجيني وقالي مزال قدامي ساعه اصبري عليا خودي تركينه ظل وراجيني
صبيت في مكاني الي ديمه انصبي فيه وطبعا انت كنت تعرفه ﻷنه تلاقينا فيه كم مره
بصراحه كنت خايفه ﻷن صحباتي كلهن روحن، تمنيت لو إنك معايا ولا تتصل بيا اتمشي عليا الوقت بس مابيتش انرن عليك ﻷنك قلتلي انك نعسان وبترقد
قعدت قريب 10دقايق بعدها كأنك حسيت بيا ورنيت عليا
مراد:حبيبتي وينك
-انراجي في بابا كملت اوراقي وقاعده بروحي ، هاصارلك اليوم من الجيه لبنغازي؟
مراد:لا مانظنيش الجو عجاج بكل صعب نطلع فيه طريق طويله