عمدة كفر البهايم

ملحوظة مهمة قبل أن تقرأ الإسكتش :
الاسكتش ده كتبته قبل الثورة المصرية بمدة طويلة
والآن أشعر بإني محتاجة أقراه تاني
وأفتكر تفاصيله
وأضحك أو أصوت ...
متفرقش
أتمنى يعجبكم
........................................
بسم الله الرحمن الرحيم
والصلاة والسلام على خير المرسلين المرسل رحمة للعالمين

عمدة كفر البهايم........ (اسكتش ساخر)
(طريقة عمل الفرعون!)

بلدنا..

كفر البهايم....
تلقاها لما تركب قطر طريق مصر...وتنزل فى المحطة اللى حدا سجرة الكافور اللى نازله تغسل شعرها فى الترعه....هاتلقى حمارة عم بسطويسى... تركبها ...وهاتوصّلك طوالى على كفر البهايم
العمده ...
عمدة كفر البهايم......تلقاه قاعد دايما فى المندره
العمده يصقف : واد يا سرحان
ييجى سرحان جرى : نعمين ياحضرة العمده
العمده : شيعت لأبو المفهوميه زى ما قلتلك
سرحان : حصل يا حضرة العمده
العمده : أمال اتأخر كده ليه؟؟..
سرحان : خدمه تانيه يا حضرة العمده؟؟
تحب أقرالك الجرانين؟
العمده : تانى يا وش النحس ..ما كفايه الأخبار اللى زى وشك اللى صبّحتنى بيها على غيار الريق..سديت نفسى الله يسد نفسك
يالله امشى غور ..شيّع تانى لأبو المفهوميه خليّه ياجى بسرعه...هاتوا من تحت الأرض
سرحان : حاضر يا حضرة العمده
يروح جرى
ياحضرة العمده ...ياحضرة العمده
ينط العمده من على كرسى العموديه من خضته
هو انت يا بوز الإخص؟؟ جعزتنى ياللى تنشك فى بطنك
حمبولى العبيط ابن أبو بلطيه وست أبوها : الحقنى يا حضرة العمده
العمده : حصل ايه يا وله..انطق ... الزرع غرق ؟
حمبولى : ياريت يا حضرة العمده يا ريت
العمده : البلد ولعت ؟
حمبولى : ياريت ياحضرة العمده ياريت
العمده : الدوده كلت البهايم؟؟
حمبولى : ياريت ياحضرة العمده ياريت
العمده : أمال حصل ايه طلعت روحى
حمبولى بيعيط : اهئ .اهئ .اهئ شيخ الغفر ضربنى بالبلغه على راسى....ليه وليه بعتنى أشتريله بجنيه جبنه وبجنيه حلاوه قمت رجعت له من غير ما أجيب الجبنه والحلاوه
العمده : الله ينكد عليك يا بعيد ..وماجبتش الجبنه والحلاوه ليه يا حيله؟
حمبولى : اهئ .اهئ .أصل الفلوس وقعت منى
العمده : يعنى ضاعو؟
حمبولى : لا..لا ..مانى لاقيتهم تانى
العمده : امال ماجبتش الجبنه والحلاوه ليه؟؟
حمبولى : أصل الفلوس اتلخبطط قمت ما عرفتش الجنيه بتاع الجبنه من الجنيه بتاع الحلاوه اهئ ..اهئ
العمده بغيظ وهو بيخلع البلغه : كده ؟؟ شيخ الغفر ضربك على راسك بالبلغه ..وانى بقى هاضربك على قفاك
يجرى حمبولى بسرعه قبل ما ينضرب وهو بيعيط ويخبط فى أبو المفهوميه ...ويشتمه أبو المفهوميه : داهيه فيك وفى اللى مشغلينك
أما صحيح كفر بهايم
العمده : يا أهلا وسهلا يا سى أبو المفهوميه ....شاحوالك كده
أبو المفهوميه من طرطوفة مناخيره : إيوه يا عمده؟؟شيعتلى ليه؟
العمده : آآآآآآآه ..ياسى أبو المفهوميه ....دانى دماغى هاتوّج بعد الخبر اللى سمعته
أبو المفهوميه : خير يا عمده ؟
العمده :آل ايه...الحكومه عاوزه تخلى العموديه بالإنتخابات
أبو المفهوميه : ياراجل ...دى اشاعات
العمده : لا مش اشاعات...الوله سرحان قرالى الخبر النهارده الصبح فى الجرنان
أبو المفهوميه : يبقى كلام جرايد...
العمده : مانى كنت فاكر كده ...لحد ما جتلى الأوامر من المركز
آل ايه....هايسمحوا للناس ترشح نفسها وتعمل دعايه وبلاوى وتروح الناس تنتخب اللى همه عاوزينه.......
وغطينى وصوّتى يامه
أبو المفهوميه : أنا مش فاهم انت قلقان ليه يا عمده ؟ هوّ حد هايرشح نفسه غيرك؟..داكلهم بهايم
العمده : لهو انت مادرتشى؟؟الحكومه عامله نظام تانى ...اللى يرشح نفسه يدوله عشر تلاف جنيه علشان يصرف على الدعايه والقماش والعزايم والذى منه
أبو المفهوميه : الله الله الله ..ليه كده يا عمده ؟ ده كده ممكن البهايم تطمع فى الفلوس وحد يوزه الشيطان ويرشح نفسه...دى الحكومه قالبه عليك خالص ياعمده...انت عملت ايه؟؟
يفكر أبو المفهوميه : لكن ولا يهمك ...طول مانا معاك ..اوعى تشيل هم..محلوله ان شاء الله
وبعدين انت خايف من ايه ؟البلد فى جيبنا ..والبهايم بتوعنا
وتبقى أمه داعيه عليه اللى يرشح نفسه قدامك
اسمع ..أول حاجه ...تطلق الواد خليل الموقعاتى عليهم ...خليه يدوّر الإشاعات فى البلد ويفكرهم بحسنين أبو حطب اللى اختفى من سبع سنين...ولقوا جتته عايمه على وش الترعه
العمده يفرح : ايوه...ايوه...ولا سليمان أبو الوفا ...اللى انطس له خمسه وعشرين سنه فى قضية حشيش أونطه
أبو المفهوميه : مانت واخد بالك أهه يا عمده...بقى معقول بعد دا كله حد حايقدر يقف قصادك؟؟
العمده : ياسلام عليك ياسى أبو المفهوميه ...أما عليك دماغ ..تتاقل بالدهب
العمده يفكر : طب والبهايم ..لو حد منهم اتكلم ؟؟ ولا العيال اللى معاهم شهادات ؟؟ لو حد فيهم رفع صوته؟
أبو المفهوميه : ماحدش فيهم ممكن يرفع صوته
طول ماهمه عوطليه ومالطوعين عالقهوه طول النهار...وطول ما قهوة عزوز مفتوحه...والدش شغال فيها طول النهار...وآخر الليل ..الحشيش وأفلام الفيديو اللى بالى بالك شغاله على ودنه .....مش هايلاقوا وقت يفكروا ..ولا صحه يرفعوا صوتهم.....
وان كان ده ما يكفيش ....نعملهم مولد
العمده : مولد؟؟ مولد ايه؟؟
أبو المفهوميه : أى مولد والسلام ...ان شالله نبنيلهم مقام فى أى خرابه ونقولهم ده واحد من الواصلين...نقول دا مقام سيدى المفتوش
بس ..ونعملهم المولد أربعين ليله ...ونبعت نجيب لهم الغوازى من البندر...يفرفشوهم ويرقصوهم ...
العمده : براوه عليك ياسى أبو المفهوميه ...ياسلام عالدماغ النضيفه
أبو المفهوميه : وان حد بعد كده فكر ولا اتكلم ...نخلى حسب الله شيخ الغفر يتقّل العيار عليهم ....هايمشوا يكلموا نفسهم
العمده : الله ...الله ..عليك ..بالك لو الحكايه دى عدت على خير ...لهاتشوف منى اللى عمرك ماشوفتوا
وله ياسرحان ...انت ياوله
سرحان ييجى جرى : نعم يا حضرة العمده
العمده : هم ياوله....علق الإعلان ده فى البلد
سرحان : اعلان ايه ياحضرة العمده؟
العمده : اعلان عن اللى عاوز يرشح نفسه فى الإنتخابات....يتقدم حدانا ويسجل اسمه.......
ويبقى يقابلنى .......
.................................................. ............
وفى قهوة عزوز............
حجازى وحموده اتنين شباب متخرجين من الجامعه عواطليه ضاربهم السلك...طول النهار عالقهوه يشربوا شيشه ويلعبوا طاوله وكوتشينه
حموده : شفت الإعلان اللى علقه الواد سرحان فى القهوه؟؟
حجازى : مش بتاع الإنتخابات ؟...يا عم سيبك ...تلقاه طعم من العمده ..يصطاد بيه اللى بيعارضه
حموده : لا لا دا الحكايه بينها بصحيح...بيقول ان اللى هايرشح نفسه الحكومه هاتديله سبع تلاف جنيه لزوم الدعايه
حجازى : ايه ايه؟؟..قلت ايه؟؟ سبع تلاف !!
بقى العمده بتاعنا ده هايدى المرشحين سبع تلاف ...ليه؟؟ هى الحدايه بتحّدّف كتاكيت!!
حموده : ده مش هوّه دا الحكومه
يرفع حجازى حواجبه ويفكر : الحكومه ؟؟ هى الحكومه قلبت عليه ولا ايه؟
حموده : حجازى ....بتفكر فى ايه؟؟
حجازى : والله بينها هاتسلك ...انت قلت سبع تلاف؟؟
ماشى ياعمده ..أهى جاتلى عالطبطاب
حموده : بينك اتجنيت ..عاوز ترشح نفسك يا حجازى؟
حجازى : ليه هو أنى حمار؟؟...علشان الرصاصه اللى طاشت السنه اللى فاتت ..تصيب المره دى وأعوم على وش الترعه؟
حموده : أمال ناوى تعمل ايه؟
حجازى : ايه رأيك ..لونضرب عصفورين بحجر واحد؟........ ناخد الفلوس...ونزغزغ دماغ العمده؟ونخليه ماينامش الليل
حموده : ازاى؟؟
حجازى : نطلعها فى دماغ واحد من الكفر ...أى واحد ..ونخليه يرشح نفسه قدام العمده
حموده : يا حلاوه ..ومين ده اللى هايرضى يعمل كده؟؟
حجازى : أى واحد ...دا كلهم بهايم
حموده : بهايم آه ..لكن مش مجانين...مين ده اللى هايرضى يناطح العمده ويستحمل أذاه؟؟..الا اذا كان أهبل...تعرف واحد أهبل؟؟
يامعلم عزوووووووووووز ...أمى بتقولك عاوزين تلاته متر جاز
حموده وحجازى تطلع عينيهم على حمبولى الغلبان اللى دخل القهوه ساعتها فى الوقت ده ...لقضاه
.................................................. ...
وفى بيت حجازى .............
حجازى : فهمت يا حمبولى؟
حمبولى : لا
حموده : داحنا واقعتنا سوده معاك
حجازى يضربه على قفاه : بقالنا تلات ساعات بنفهم فيك وبرده مش فاهم؟؟ دانت مخك ضلم
حموده : ماتشوفلك واحد تانى
حجازى : مافيش حد غيره هايرضى يعمل كده
حمبولى ...فتح مخك معايا...بكره الصبح حاتيجى معايا المركز وتقول لهم........ أنى عاوز أبقى عمده
حمبولى يفرح : وأقعد فى المندره على كرسى العمده؟؟
حجازى : وهاتلبس العبايه واللاثه كمان...وهاتاخد فلوس كتير وكل الكفر هايسمع كلامك ويبوس ايدك...اتفقنا؟؟
حمبولى : ياحلاوه ...هابقى عمده ....ولا حدش فى الكفر هايستجرى يضربنى على قفايه تانى
حجازى : حلو آديك فهمت...ودلوقتى ...هاتختارالرمز بتاعك ايه؟
حمبولى : يعنى ايه؟
حجازى : يعنى التصويره اللى هانحطها جنب صورتك والناس تعلمك بيها
حمبولى : ايوه ايوه مانى فاهم ...هو أنى حمار؟؟
هاختار ......................الشبشب
حجازى يلزقه على قفاه : ايه ؟؟؟الشبشب يابن ال....
حمبولى : ايه دى .....انت بتضرب العمده؟؟ طب والله مانى لاعب
حجازى : استنى ..استنى...طب والله رمز حلو
حموده : الله يخرب بيتك يا حجازى....دانت نويت تهلهل العمده وتمسخره وتجيب له نقطه
حجازى : أحسن ...مش فاكر اللى عمله فينا
انما اشمعنى الشبشب يا حمبولى؟؟
حمبولى : أصل أمى كل يوم تضربنى بيه..... وانت بقى ماتعرفش شبشب أمى حنين قد ايه
حجازى : يافرحة أمك بيك....بينا عالمركز علشان نقدم الأوراق
حموده : وتفتكر هايوافقوا عليه؟؟ دا عبيط
حجازى : طبعا هايوافقوا....مش كل الشروط موجوده....سنه عدى الخمسه وتلاتين ..ومن الكفر أبا عن جد...وبيعرف يفك الخط
مش دى شروطهم...
حموده : الحمد لله انهم ماطلبوش يكشفوا على دماغه
خد بالك ...لو العمده عرف هايطينها على دماغك
حجازى : لا...على مايعرف أكون أنى هجيت من البلد كلتها ...أمال أنى عاوز الفلوس ليه؟...يالله عالمركز....
حموده : استنى ......ومانقدمش الورق هنا ليه؟
حجازى : انت عاوز العمده يطخه الأول ..وبعدين ياخد منه الورق؟ ؟..كده هايبقى متسجل عند الحكومه انه رشح نفسه قبل العمده ما ياخد باله...
...............................................
فى بلدنا كفر البهايم لف ودار الكلام .............
آل ايه ...الواد حمبولى العبيط حط راسه براس العمده ورشح نفسه فى الإنتخابات
وناس تقول : يوه يا ندامه ...ينيلك ياواد ياحمبولى ...عاوز يعمل راسه براس العمده
وناس تقول دا عبيط وغلبان...ياعينى عليه دا العمده هايدوسه بجزمته زى الخنفسه
أما الشيخ عبد الواحد امام الجامع لما سألوه عن رأيه قال : بلا مسخره وقلت قيمه ...خلاص ...عليه العوض فى البلد دى
الناس واقفه تتفرج والبلد بتخرب
والله ده غضب من ربنا
احنا اللى نستاهل علشان ساكتين
واحد يسأله : طب ماترشح نفسك انت يامولانا...على الأقل انت الناس هاتنتخبك علشان حافظ كتاب ربنا ...ويعنى ان سقطت ..هاتبقى خدت الفلوس
الشيخ : اخرس يا فاسق ...فاكرنى من طلاب السلطه ولا المال ...حاش لله
أنا من طلاب الآخره
واحد تانى : أمال نعمل ايه فى المصيبه اللى حطت على دماغ البلد دى يا عم الشيخ؟؟
الشيخ : أحسن حاجه بعد صلاة الجمعه نصلى ركعتين ونستغيث ربنا يرفع الهم والغم والمصايب عن بلدنا
ولما لف الكلام ودار ...وصل لودان العمده
وكانت سنه سوخه على دماغ حمبولى ابن أبو بلطيه وست أبوها
وجرجروه عالمندره وضربوه لما عدموه العافيه
والعمده علقه فى الفلكه لما ورّم له رجليه
العمده : بقى انت يابن أبو بلطيه يا مدهوّل...يا عبيط..يابو مخ مليان تراب .تعمل راسك براسى وتمهزأنى وسط البلد؟
حمبولى : أبوس رجلك ياحضرة العمده ...حرمت ...
العمده : وآدينى بعت أجيب اللى وزك وطلعها فى مخك ..شوف هاينفعك بإيه..لما أ طخك عيار وأسيب الديابه تنهش فى جتتك
أبو المفهوميه : لا ...لا.يا عمده
دم لأ..خلاص..ده بقى فى حمى الحكومه من ساعة مارشح نفسه وأى حاجه هاتجراله أكيد هايتهموها فيك ..لأنك صاحب مصلحه فى أذيته
العمده : آآآآآآآآآخ متغاااااااااظ ...بس لما يقع تحت ايدى الكلب اللى اسمه حجازى
سرحان : ياحضرة العمده...الواد حجازى طفش من البلد
العمده : ايه ..بتقول ايه ياغراب البين انت...هو انت ماتخشش عليا بخبر يبل ريقى أبدا جتك البلاوى وش نحس
سرحان : والوليه ست أبوها مراة أبو بلطيه..أم الواد حمبولى عامله مناحه قدام المندره وبتعيط على ابنها
ولمه حواليها شوية نساوين عمالين يندبّوا
العمده : وبعدين ؟؟أعمل ايه ياسى أبو المفهوميه؟
أبو المفهوميه : خلاص ياعمده ..لازم تسيبه..الإنتخابات بعد أسبوع والشوشره مش فى مصلحتك دلوقتى..وماتخافش منه..داحتة واد عبيط ..واللى كان بيحركه طفش وهو لوحده مافيش منه خوف
العمده : قولى يا سى أبو المفهوميه... عندى سؤال عمال ينقح عليا ويبرم فى صواميل نافوخى ...ليه مارشحتش نفسك للعموديه؟؟
أبو المفهوميه : جرى ايه يا عمده ..انت خايف منى ولا ايه؟؟
على العموم ماتخافش ..دى مش لعبتى..أنى مش ممكن أدفن دماغى ومواهبى وامكانياتى فى منصب عمده...أنا أكبر من كده بكتير
المهم دلوقتى سيبه قبل الناس ما تكتر قدام المندره
العمده : ماشى ..لكن لازم يتأدب...احرقوله العشه اللى عايش فيها علشان مايستجريش بعد كده يعمل راسه براس أسياده
..............................................
تتلم الناس علشان تتفرج على غفر العمده وهمه بيحرقوا عشة حمبولى
ولما النارتشعلل ..................
ياااااااااااالهوتىىى...الحقووووووووونىىىىى
يانبويه ...ياضنايا...البت كانت بتلعب حدا عشة حمبولى
كل الكفر يصوّت : طفوا الحريقه..طفوا الحريقه...
يا نبويه....البت جوه العشه....حد ينجدها يا ناس
ييجى حمبولى من آخر الدنيا جرى وجلابيته فى سنانه وينط جوه العشه والنارقايده ومشعلله فيها..
وبعد شويه.........