بَـقاية الظل

part 6

مُـلهم:: ها عمي شبي أبوي ؟
:: أبـوك راح تنكص رجلة على اثر الحادث الصار ويا "

بقيت صافن مامستوعب اليحجي احس رجليّه مايعيني اوكف شنو تنكص رجـلة كضني حسيـن وكعدني على واحد من كراسي المستشفى منتظرين أبوي يطلع ، طلعوا من العمليـات ورجلة مكصوصة.

راح حيلي من شفته صح موزيم ويانا بس يبقىٰ"ابونـا" انقهرت كلش واحس تعب الدنيا كُله عليّه ، بقىٰ أبوي بالمستشفى اسبـوع وبعدها طلعنـا.

وهنا لازم ارجع اشتغل والمصاريف كثرن عليّه بحكم أبوي مايكدر يشتغل بعد ! رجعت اجلت سنة ثانية بعد السنة الفاتتنـي وراحن عليّه سنتين وبقيت الصبح اشتغل عمالة والعصر بمطعـم.

من يعبرون عليّه طلاب احس روحي تنمر مـرد بس جنت "أحمد رب العالمين "واكول كلشي بي حكمة وصالح اليٰ ورب العالمين راح يعوضني اضـعاف.

استمريت بشغلي وصلاتـي وارجع ادلل خواتي ورُقية صايرة تفتهم لأن كبرت وعمرها 3 سـنوات ، بعدها بالأنسـتا كلساع اتعرف علىٰ بنية وفترة واتركها وفترة واتركها وهيج استمريت الىٰ اخيـر وحده زينب خمس اشهر وعفتها.

رجعت شلت هاي الدوخة من رأسيّ بعد ما أبوي حطولة رجل اصطناعيّة ورجع الشغلة هنا كدرت ارجع" لمدرستي" بس ماعرف شبي حضي ويَ الخامس ومايريدني أكـمل حلمي بس داومت رجعت حالتي تدهورت واضل ايـام ما ادوام و بالفراش من المرض وحماسي انطفى صرت بالأسبوع اداوم يومين ثلاثه بس وحتى من امتحنت طلعت راسب بكُل المواد ورجعت مقهور .

سارة:: ليش هيج مُـلهم شجاك ؟
مُـلهم:: إني بنفسيّ ماعرف دراستي راحت هيج.

حجت بس هيَّ مقـهورة اكثر مني
ـ يلا لا ضوج اوعدني السنة الجاية تنجح وبدرجات ترفع راس هاي ثلاث سنوات ضاعن عليك مُـلهم حرامات ؟

ـ اي وعد السنة التجي ارفع راسج وانجح لا تنقهرين تقهريني بزايد !

هزت راسها ساكتة رحت للبـنات بستهن وحده وحده يـامعزتجن .

رجعت اشتغلت بفترة العطلة حتى اعوضهن عن الأيـام الفاتت واشتريلهن شغلات حلوة مثلهن ، بس من اجت المدرسة حتى الشغل تركته واهتميت بس بدراستي حتى ما اخيب ضن سارة بيّه.

وفعلاً بعد ما استلمت شهادتي جانت درجاتي كلها بـ تسعينات وثمـانين ، وهنا نكول بقت سنة تفصلنا عن حلمنا بس وبديت احضر لسادس حتى اعوض السنين الفاتـتني وكل ما اتعب اكوم اصلي وارجع اكـمل وجنت دروس الحوزة بعد دراستي اروحلهن حتى ارتاح من اسمع كـلام الشيخ، رُغم جانت فترة السادس صعبة بس الحمدلله كدرت ادخل وزاري وكعدت ادرس للمدراجعة ومتحمس راح اجيب مُـعدل ...

بلش اول امتحان رحت متوتر كلش دخلت قاعة الأمتحـان وزعوا الدفاتر وبعدها الأسآلة جان الخوف متلبسني وبعدها كله تبخر من شفت الأسالة جايبين من الدرسته وجنت متحمس لأن سهلة وجاوبت وطلعت فرحان رجعت من الأمتحان الأببتسامة شاكة حلكي بس اختفت من شفت وضع سـارة.