بقلمي
زينب
...
الضياع الحقيقي
من تعيش وحدك وسط اهوال جبيرة
مصايب ماتكدر تعديها وتبقى عايشة بروحك
تكبر وانت تتمنى تحلص يوم براحه
ماتريد شي يتغير بس ينتهي اليوم وانت متطمن على عائلتك ومرتاح نفسيا
وفجاة تجيك لحظة ادراك ترجعك سنين ليورا
انت شكد انسان حارم نفسك وظالم نفسك
او المجتمع اليمك حارمك وظالمك
هل يترى الانسان يولد محظوظ
لو يعيش ويسوي الروحه حظ
ليش اكو فروقات ليش انسان عايش بحنان
وانسان عايش بضياع
اكو عداله بيهن لو اكو عوض جبير
كل هاي الاسئلة تدور براسي بعد ما طلعت من امتحاني
بعد مادكتورتي استلمت مني ورقة الاجوبه وهيه تكلي
_انشالله تنجحين بنيتي يارب مايضيعلج تعب
صفنت بكلماتها
الدعاء الاسمعه بس من الناس الغرب الي اسويلهم زين بس امي ولا مره دعتلي بشي
جانت الغصه تارسة صدري
الغصة البيه مو نتسجة الحزن
بس لان ضليت صامدة كل هاي الفتره واجتني لحظه امان حسستني لازم افرغ طافتي وابجي
رجعت للبيت وانا لافه روحي ب الجاكيت من البرد دخلت ساعة ١١
البيت سنطه اليوم خميس
يعني زوج امي يجي اتمنه بهذا اليوم اختفي من الوجود ولا اسمع صوت امي ولا اسمع صوت امي وضحكتها ودلعها
دخلت للغرفه لكيت ملك فاتحة التلفون وتباوع كارتون
شبكت علي وهيه تكول
جاوبتي
هزيت راسي باي وكوة علي ابتسم من التعب والسهر راسي يريد يطك
ملك
اختي الوسطانية بعمر العشر سنوات
بس ملك مو انسانه طبيعية مثلنه ماتمارس اي نشاط طبيعي مثلنه
بسبب اهمال امي نولدت هيج انسانه
عازله روحها
عرضتها على اكثر من طبيب ودخلتها باكثر من كورس علاجي الى ان صارت تاكل وتسولف وتمشي وتمارس حياة طبيعه بس بقت العزلة محتله جزء جبير من طفولتها
_ملوكه البنات برا جاي يلعبون اطلعج تلعبين وياهم
_لا ماحب
_اطلع وياج حبيبتي ليش تضلين كاعده هواي ع التلفزيون مايصير
راحت كعدت بمكانها زعلانه
شلتها من بطنها العبها وطلعنه انا وياها وكفت بباب الحوش وهيه واكفه يمي وتباوع للبنات والولد يلعبون سوا طوبه
_روحي
_يطكوني ب الطوبه
_انا يمج شحده اليطكج تعالي مي
اجت مي تركض جانت طفلة عاقلة شاورتها وانا اكلها
_لعبيها والج مني هدية بس خلي بالج عليها
ضحكت بفرح من سمعت الهدية ضليت واكفه بمكاني ملك تلعب وترجع تباوعلي عبالها اعوفها
صفت سيارة حسن يم الباب
حسن زوج امي الي تزوجها على ثنين نسوان وهيه الثالثه بدون علم نسوانه الاثنين ويجيها بس الخميس
ضحكلي ودخل طلعت من الباب وكفت برا وملك تحت انظاري الغيض تارس صدري
