گعدت من النوم على صوت امي فتحت عيون وضليت اتمغط اليوم اول يوم اداوم بالصف الرابع علمي گمت احاول اكون نشيطه نزلت وغسلت وجهي صعدت لبست ملابسي وببالي "شلون حتكون هاي السنه وشون حيكون لقائي ويه صديقاتي" كملت تبديل ونزلت وصلني بابا للمدرسة "العباسيه" نزلت ودخلت للمدرسة تلگتني صديقتي
سَمر: شنو ماكو عيطه ركضه
اني وامشي بهدوء وضحكتي تارسه وجهي جاوبتها
خديجه: لا ماكو
وصلتلها وشبگتها حيللل وثنينا نضحك سَمر صديقتي اكثر صديقه اعزها واحب شخصيتها تعرفت عليها ببداية صف الثالث
دخلنا جوة ونزعت حجابي ضليت افتر ويه سَمر بالساحه واني اشوف البنات هاي التعيط وهاي الشابگه صديقتها بكل قوتها وهاي الشايله صديقتها وتفتر بيها التقيت ويه كل صديقاتي وسوينا گعده جان اول يوم وما يدخللولنا مدرسات بعد ما سوولنا اصطفاف ووزعونا على صفوفنا دخلت كم مدرسة مجرد تعرف عن نفسها وتتعرف علينا مرت الأيام تشبه بعضهن بالمدرسه وبيوم سمعنا اخبار انو المدرسه راح تنقل صف الرابع كله بسبب انو المدرسه صارت متوسطه فقط سوولنا اصطفاف ووادعنه المدرسات والمديرة نقلونا المدرسة "بانيقيا"
كانت مدرسة مفتتحيها بالجديد مابيها كادر دراسي ومن نداوم لحد مانطلع ماندخل صف وندرس نگعد سوة بالساحه وبأحد الايام جمعنا كل وحده من مصروفها وگاللي روحي انطي الفلوس للحارس ووصي هو يجيبلنا من المحلات البرة لان الحانوت ميوفر الاشياء النحبها بعد ماجمعت الفلوس ووصني على الاشياء اليردنها طلعت للحارس چان رجال جبير وماقبل يروح گال ماگدر اعوف المحرس هيچ گتله عادي اني اروح وهم ماقبل لأن هالشي مسؤليه عليّ
خديجه: عمو والله ما تأخر ثواني وارجع اشتري من هذا المحل وارجع
الحارس: فوتي گولي للمديرة ماگدر اتصرف بكيفي
خديجه: عمو هذا اسمي الكامل خديجه.......... اذا تأخرت اكثر من ثلاث دقايق فوت وانطي للمديرة وگوللها هيه شردت
واخيراً وافق ورحت ركض للمحل واني گلبي يرجف لأن اول مرة اسويها واطلع من المدرسه وخصوصاً جنت ما لابسه جبه لان متوقعت اطلع بس الحمدلله بيومها لابسه صدرية عريض وفليت حزامها وطلعت دخلت للمحل اشتريت ثلاث اجباس ليز ابو الالف من مختلف النكهات وحجيت بدون وعي واني احط الاچباس على الميز
خديجه: عمو بسرعه حط بالعلاگه شاردة من المدرسه
جان اكو ثنين ولد على صفحه ما شفتهم واني داخله ضحكوا بصدمة همه وابو المحل وواحد منهم كال بضحكه
الولد: ياااا هسه يفصلوچ
جاوبته بهدوء واني اخذ حب بدون ما اباوعله
خديجه: لا گايله للحارس بس گال لا تتأخرين
ضحكوا ابو المحل والولد واني ودي اغم نفسي على الفشله اخذت بطل ببسي ونساتل على عددنا حطيتهن على الميز وسألت ابو المحل
خديجه: عمو وين الگه گلاصات سفري؟!
