الصابر ينال كرونيك باللهجة الجزائرية

1

نغسل فالماعين في دار عمي بالزربة و نشوف فالساعة . طايرة بالفرحة كي بنات عمي قبلو ندخل عندهم للشومبرة و نشوف معاهم جهاز عديلة .عايشين كامل مع بعض .. يعني كل واحد بدارو بصح عندنا حوش واحد مشترك .عمي لكبير هو لمقلش تع جدي و عاطيه الدار لكبيرة و عايش فيها معاه . عمومي لخرين ديارهم ملاح بسكو كي جا يقسم جدي الدراهم وقفو على حقهم و عرشو لعمي لكبير باش مايديش كلشي . اما الجحر تاعنا اا قصدي دارنا حنا هي اصغر دار فيها زوج شنابر و كوزينة .. ماقدرناش نزيدو نبنو فوقها بسكو بابا ماعندوش .. كان يخاف بزاف من باباه لدرجة مايقدرش يريكلامي قدامو و خاصة عمي لكبير جاي يتحكم فيه بزاف .. حياتنا هما لي مسيرينها . كملت غسيل و بقيت نمسح في يديا و نشوف فالحالة : - خلاص سيقت الدار امم .. و طبقت القش و ضرك كملت ماعين . نحيت الطابلية سقمت شعري و طلعت عندهم .. طبطبت و دخلت فرحانة و الضحكة مرسومة على وجهي : - هاني جيت مازالت ماغلقتش لباب مورايا دارت عندي ناديا (بنت عمي لكبير اخت عديلة و قدي فالعمر) : - وه وه وين جايا زادمة . نطقت بنت عمي الزاوج : - واش جابك لهنا تبسمت و انا خايفة يرجعوني .. شفت فيهم في ستة : - ياك قلتولي تغسلي علينا لماعين و تنظفي الدار ن..نخلوك تقعدي معانا . فاطيمة لناديا : - صح قلتولها هكذا ؟ شافت فيا ناديا : - ايه قلنالك على التسعة .. راها تسعة و ربع ايا بداي طيري . - عديلة : ديجا مازلتي صغيرة على هاذ لحوايج روحي من. - هاهي ناديا قدي و خليتوها معاكم . - عيدلة : ناديا و نتي مشي كيف كيف (عيطت فوجهي) ااياا خرجي منا لانخرجك من شعر .. يخي لصقة و ماتفهمش روحها. كمشت شواربي و زيرت عليهم باش مانبكيش قدامهم .. هبطت راسي و خرجت

 ....يتبع

تفاعلوو اميرااتي