الأيسر "سلاسل الاحرار" (الاصليه)

السلسله الرابعه عشر

ام ضياء ::- ولج يمه ابوج راح يموت اخوج!

تنهدت بتعب وكلت

ضي ::- لا تدخلين يمه خلي يربي شنو اول تالي بيت حجي سالم ابنهم سكران بنص اليل شنهاي شصارت صرنه علج بحلك الناس

طلع ابويه من الغرفه يحجي

سالم ::- اطلعي جيبي هل عار واني أعلمه اليوم الي بكده يشتغلون وموظفين وعدهم عوائل الا هو بس يشرب بهل سم النعل ويوميه تهديد منين اجيب اني اشو ورثي وورث امج واجينه من سليمانيه وبعنه الفوكانه والجوانه علمود نسدد ٧٠٠ مليون منين اجيبهم منين اشو لا عقار ضل ولا كلشي جيبي خليني اربي كومي...!

عاط بيه طلعت اتنهد وامي تبجي، جنه عايشين ب السليمانيه وحالتنه الماديه عال العال نكدر نكول جنه عايشين ملوك...

عقارات وابويه موظف اصلا ما جنه نشتغل بدينه ابد اني اطلع من مدارس المتفوقين لدروس الكاراتيه وارجع للبيت وكلشي جاهز كلشي منسوي بس اله اجت ذيج الليله السوده...

في تلك الليله :

اخويه ضياء عمره 22 سنه صار فتره يتأخر بس ابويه يلزمه تحقيق ف الساعه ب 11 ضياء ماكو و 11 ونص وضياء ماكو و 12 الافندي ولا شرف ابويه يحوس وامي تبجي...

وصارت ب 1

كال ابويه بتعب ومبين الخوف والقلق عليه

سالم ::- بابا ضي روحي نامي باجر وراج دوام بلكت الله انتي تعوضيني عن هذا العار...
الولد نعمه ابني نقمه وين مولي والله صارلي فتره ملاحظ هل شي بس كله بسبب سعاد تركع وراه اخ يا سعاد..

جاوبت امي بدموع

سعاد ::- سالم الله عليك ابني اريد ابني وينه...

وانهارت بجي نزل ابويه حضنها رغم كبر عمرهم الا ان حبهم يزداد ما ينقص ابويه شويه عصبي وامي كلش حساسه بس هو حيل زين وياها...

اندك الباب وطلعنه نركض اجوي الحرس شايلين ضياء مزورك مكتول ومثل وغف ابيض يطلق من حلكه وورقه بظرف و٤ طلقات...

شيب راسنه من محتوى الرساله.......

اساور..

بعد ما خلصت مده بقاء سامر بالمستشفى من عرف خبر وفاه اهلي جن جنانه حته جرح رجله انفتح ويصيح وشكد أساطير جانت فد مره الا ان سامر كلب المستشفى كلب بالصياح ويصيح

سامر ::- اريدد ابويه اريد امي خواني وينهم اريدهمممم.....

كوه الأطباء انطوه مهدئ ونام وحته وهو نايم دموعه تجري واني كاعده يم راسه هو نايم ودموعه ما نشفت اول مره بحياتي اشوف سامر بهل ضعف جانت أساطير من احنه وصغار تبجي بليل بوكت متأخر من ننام حته محد يشوفها ضعيفه ومن تغفه أثر البجي يجي بابا يحضنها وتبقه دموعها تجري حته وهي نايمه