هويت ولا دريت ان الهوى كل اسى وذنوب

الفصل الاول

كان جالس بغرفته وهو يدخن .. كان يفكر كيف وصل لهنا كيف كانت حياته وكيف صارت بيوم وليلة ! كانت عيونه فيها لمعة فيها حزن فيه قهر للحين مو قادر ينسى كيف خسرها بيوم وليلة وبسبب مين ابوه !
دخل عليه وشافه كيف جالس ويدخن وماهو حول احد تكه على الكنبة وهو يناظره وهو شبه عارف وش قاعد يفكر فيه ووش اللي مضايقه خصوصاً انه ما يدخن الا اذا تضايق وحييل بعد ..
سهم بهدوء : وش تفكر فيه
الليث اللي لف عليه وهو يناظره بهدوء صد وهو يرجع يناظر نفس المكان ولا اهتم لسواله
سهم : حلو يعني مافي جواب !
الليث وهو يناظر الدخان : تصدق ودي اترك الدخان
سهم اللي ابتسم وهو متعجب : الليث يترك الدخان ! طيب لو تضايقت بعدها وش تسوي ؟
الليث ابتسم ابتسامة المقهور وهو رجع يدخن : انتحر وبكذا تركت الدخان ولا لي رجعه بعدها شرايك انت ؟
ناظر سهم اللي كان مصدوم وهو مو مستبعد يسويها الليث .. ضحك وهو يحاول يرقع الموضوع : تنتحر وتتركني تترك خوي عهدك ؟
تنهد الليث وهو يحس جبال الدنيا كلها على صدره نزل الدخان وهو يطفيه بالطفايه وهو يقوم يعدل شماغه وعيونه حمرا له يومين مانام من التفكير : ابد والله ما اتركك ولا اخليك بس حبيت استظرف عليك
سهم اللي كان صدق خايف على الليث : كفو عليك لكن لا تتركني لدنيا لاتخليني انت الوحيد اللي ءامن عليه من لي غيرك
الليث ابتسم له وهو محد مصبره ع الدنيا الا سهم خويه اللي يحبه ويخاف عليه صدق ويحميه من كل قلبه مايقدر يفرط فيه ابد ولا يتركه للدنيا .. ضرب بيده على كتف سهم وهو يبتسم له وهو نازل
سهم : بتروح الحين ؟
تنهد الليث بحزن : ايه
سهم : لا تكدر نفسك عشان خاطري
ابتسم الليث : ابشر

..

بمكان ثاني ..

كان يدندن وهو مروق بشكل غريب قدام طاولة مليء بالاوراق وعنده كوب قهوة وبيده قلم وكان قاعده يناظر بالاوراق وعلى وجه ابتسامة انتصار ..

جاا وهو ينسدح على سريره بتعب وكان يناظر السقف قام وهو يناظره بتعجب من روقانه وهو عارف ان " نهيان " مايروق الا اذا فيه مصيبة ..
الباتر بشك : وش عندك ؟
ناظره نهيان وهو يشرب قهوته بكل روقان : ماعندي الا كل خير
الباتر وهو يرجع جسمه للخلف ويناظر نهيان وهو شبه عارف سبب روقانه : قول ..
نهيان قام وبدا يشرح للباتر : ابد طال عمرك سويت خطة محكمه اقدر فيها ابيد الشرطي الفاسد " عبدالله بن ذياب " اللي مسوي اللي فيها المواطن الشريف
الباتر ابتسم بسخرية : انت ما بتتخطى ؟ بعدين وشوله حاط راسك براس الشرطي هو ماله دخل هو عليه يقوم بشغله وينفذه على اكمل وجه
نهيان : تستهبل انت ؟ الباتر انت عارف وش شغلنا صح ومين احنا وقاعدين نشتغل مع مين احنا مظلمين ي باتر تعرف وش يعني مظلمين ؟ ونعرف مين يكون " عبدالله بن ذياب بالنسبة لناس مثلنا " سنتين ضاعت من حياتي بسبب ظلمه لي والله ما اتركه يا شيخ

الباتر ناظره بصمت بعدين قال : عنده عيال ي نهيان وعيال ثانوي بعد ماشافو شي من الدنيا وشوله تحرمهم ابوهم ؟
نهيان ابتسم بسخرية : من متى الضمير ي باتر كلنا ندري لو يرجع فيك الزمن وش تسوي باللي سوا فيك كل هذا .. كل ندري ي باتر انك سوداوي وعدءاي درجة اولى ! وكلنا ندري انك للحين تدور عليه مرت ٧ سنين ي باتر وانت حاقد للحين .. يمديك تضحك على الليث وسهم لكن انا غير انا ثعلب ماكر وانت تعرفني زين ي باتر ..
ناظره الباتر وهو كل كلام نهيان صح بمية بالمية ولا يقدر ينكر ولا يقدر حتى يقول شي سكت وصد عن نهيان اللي يناظره وهو ينسدح على سريره ويحط يده على عيونه يبي يمنع نفسه من التفكير لان مجرد التفكير باللي مضى يتعبه حييل ..