طوبى ☕شارع القهوة☕

الجزء_السابع_والتسعين

#طوبى  "جنة طوبى"
#جمان_فريد
#الجزء_السابع_والتسعين"الأوركيد الأبيض"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#ذكر_الله
عن أبي موسى الأشعري رضي الله عنه، قال: قال رسول الله صلى الله عليه وسلم: (مَثَلُ الذي يَذْكُرُ رَبَّهُ وَالَّذِي لا يَذْكُرُ رَبَّهُ، مَثَلُ الْحَيِّ وَالْمَيِّتِ) (رواه البخاري) .
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃عد تنازلي...النوم في العسل🍃
_______________________________________
عيونها ع خاتم الزواج..مش مستوعبه ان الخاتم هدا ليها..
طلب الزواج هدا ليها..جاها من الراجل الوحيد اللي حباته في حياتها..
☘طريقة زواجهم السابق كانت عاديه كلاسيكيه..
بوها دخل مختار العيله وخلاهم اصدقاء بعدين طلب منهم يتزوجوا وهما واقفوا..
هو كان يبي يكبر بهالزواج..وهي كانت معجبه بيه وراغباته..
عاش معاها وقلبه لغيرها بس معاملته ليها كانت لطيفه للغايه خلاها طيح في حبه تغرق فيه ومعاش طلعت منه برغبتها..
وبرغم هالحب لما حست انهم صعب يستمروا مع بعض وافقت ع طلبه للطلاق..
انفصلت عنه قانونيا..لكن قلبها قعد معلق بيه وقعدت ديما تحوم حواليه زي فراشة الضوء ع قد ماحرقها مازالت تطير حواليه..☘
التفتت لرضا لما سمعاته قال..
رضا بإبتسامه..
/مايصح الا الصحيح..
أمينه بإبتسامه فرح ودموعها في عيونها..
/استنيت اليوم ده كتير مافيش وحده تستاهل تكون ست بيتك غيرها..
صابرين كانت تشوفلها..تشوف لعيونها اللي باينه فيهم الصدمه زي ماباين فيهم الحب..
مختار؛عطيني جواب يريحني من الوضع اللي اني فيه..
غيرت عيونها ليه لما تكلم تسمع فيه وتتفكر في كلام سدره..
بدت ع وجهها ملامح ابتسامه ودموعها عبوا عيونها..
خدت منه علبة الخاتم..وناضت وقفت..
وهو مانزلش عيونه من عليها.
فاتن بإبتسامه حب..
/موافقه..نزلت عيونها ودموعها نزلوا .
هو ضحك وناض وقف..قربلها..شد راسها بإيديه وقربها ليه ووطبع قبله ع راسها..
وعيون رضا وصابرين وامينه عليهم وهما مبتسمين..
حاوطها وقال..
/تعالي..
ومشي بيها وطلعوا من الكوجينه..
امينه بضحكه فرح..
/مش مصدقه..
صابرين شافت لرضا وقالت..
/شن خطر عليه توا يردها؟
رضا؛كنت متوقع الحاجه هادي من زمان..من لما اطلقوا..فاتن اكثر وحده تفهم عليه واكثر من يرتاح معاها..
امينه:اخته سدرة المنتهى حبتها..يمكن ده اللي شجعوا يرجعلها..
شافت صابرين لورد التوليب..
ورضا يشوفلها بعدين قال..
/حبتيها؟
ابتسمت وشافتله وهي تقول.
/حلوة..وناعمه..
رضا؛تشبهلك..
امينه حمحمت وقالت وهي تأشر ع نفسها..
/انا هنا..لسا هنا..
ضحكوا..بعدين صابرين قالت..
/مش عارفه علاش تفائلت باللي صار..
رضا بإبتسامه..
/ممكن القدر متاعنا يتغير وتكبر الفرصه متاعنا..
امينه:انا خايفه عليكوا قوي..بس ابدتيت احس ان استاذ مختار متغير شويه المده الاخيره..بالزبط بعد مااخته دخلت حياته..
رضا:العيله...احساسه انه حيرجع لعيلته مرة تانيه اثر فيه..
امينه بحسره:صدقت..البني آدم مننا بينتمي لعيلته ومن غيرها يكون زي ورقة الشجر بعد ماتوقع وتاخدها الريح يمين وشمال.
بانت لمعة الدموع في عيون صابرين وهي تسمع فيهم..
جي بين عيونها يوم موت امها..اللي من بعده فقدت المعنى الحقيقي للعيله..
رفعت عيونها فيه لما حست بيده شاده يدها بقوة..
ابتسم وغمض عيونه بعدين فتحهم..
ابتسمت من قلبها وشدت يده بقوة..
وامينه تمرر في نظرها بيناتهم وهي مبتسمه بحزن..
🍃🍃🍃
☘العائلة هي أحد الأشياء التي تتباهى بها ، هي الأعمدة الثابتة داخل القلب ، والدّفء الأعمق الذي لا تملك إلا أن تنتمي إليه ، في كل مرةٍ يجرفك شيء توقن في داخلك بأن العائلة أثمن ما تملك☘
🌼العيله يلي قاعده تدعم اريج بش تطلع من حالة حزنها وترجع اريج الاولى المنطلقه المبهجه الحيويه..
دروس التقويه اللي تعطي فيهم عطوها طاقه ايجابيه
ردلها شغفها بالحياة من جديد..
وامها اللي لاحظت هالتغيير تريحت عليها بعض الشي المهم عندها انها قاعده تتخطى في حزنها..
☘وحواء اللي فقدت كل شي..العيله..والزوج...والاستقرار...
ولقت روحها هي وصغارها في مواجهة الحياة..
تخطت ضعفها وكسرتها ووقفت ع رجليها وعافرت في هالدنيا بش تربي صغارها..صانت نفسها عن الحرام وربي صانها لما سخرلها ناس طيبه وقفت معاها..
حواء بعد ماقعدت فتره عايشه في حوش سدره وعايشه هي وصغارها ع المساعدات..
قررت تطلع رزقها بنفسها وطلبت من طوبى تشغلها عندهم في المحل..
ولأن في زوز بنات سيبوا خدمة في المحل لظروف خاصه هي خدت مكانهم..
🍃بعد العصر..
خشت طوبى من الباب الفاصل للمحل..
لقت فيه حواء ترتب في حافظات حلو وتحط فيهم في المكان المخصص ليهم..
طوبى بإبتسامه:السلام عليكم..
حواء:وعليكم السلام..كيف حالك..
طوبى:الحمد لله شن حالك انتي والصغار؟
حواء: خليتهم عند فايزة وبناويتها يلعبوا مع تاله وسدرة..امس مارقدوش وهما يحكوا عن الحفله..
☘حفلة بلوغ جنة شهرها العاشر☘
طوبى بضحكه:سلمهم ياربي..ومشت تساعد فيها في ترتيب حافظات الحلو..
ع خشة باقي البنات اللي يخدموا في المحل..
طلقوا السلام..وكل وحده مشت وقفت في الركن متاعها وبدوا يهدرزوا..
:ريتوا شعيره كيف ولى..
:والله ماعرفته..سبحان الذي يغير ولايتغير..
:ماتبيشي يتغير وهو واخد هولنديه عييت امي وهي توصف في زينها..
:ماتقولوليش شن قصة ولاد الشارع مع الأجنبيات ولد شهوب حتى هو قالوا خدي سوريه..
:هالسوريات ياكبدي..
طوبى كانت تسمع في حديثهم بصمت لعند ماجابوا سيرة السوريات بدت تضايق..
حواء:نصيبات يابنات..
:عارفينه نصيب لكن حني قعدنا هكي ياهمي..
ضحكت حواء..
طوبى صفقت بإيديها وهي تقول.
/هي خلاص الهوا بالخدمه في ناس جايه..
ويخشوا زوز نساوين للمحل وانشغلوا بيهم البنات..
وطوبى عيونها عليهم وهي تفكر في كلامهم اللي ضايقها..
غيرت نظرها عنهم للوحه اللي كاتب عليها بخط يده..
"الله يحلي ايامكم"
تلقائيا ابتسمت..
"طوبى"..
اختفت ابتسامها وشافت لحواء..
حواء:ترا شوفيها..
طوبى شافت للزبونه بإبتسامه ومشتلها وهي تقول..
/تفضلي..
🍃🍃🍃🍃🍃
وفي قهوة نضال..
كانوا مقعمزين التارقي وربيع يهدرزوا..
ربيع بضيق:كرهت نروح للحوش ياراجل..
عبد القيوم:معليشي هذى ظرف قاهر وانت مجبور تتحمل..شوف لهم كم نازحين وقاعدين عند خوك لازم تاخد نصيبك حتى انت..
ربيع:اني ماقلت شي لكن يديروا شويه قدر لصاحبة الحوش..
عبد القيوم بأسف..
/لاحول ولاقوة الا بالله..
ربيع:عارف هادم اهلي وع عيني وراسي لكن حتى هي مرتي قدرها من قدري واللي يوجعها يوجعني..
عبدالقيوم قعد ساكت شويه وهو يفكر بعدين قال..
/انت مش عندك خوك قاعد عنده صاحبه؟
ربيع:ايه..
عبد القيوم؛شن رايك تخليه يجي يقعد معاهم وانت تاخد عيلتك وتعدوا تقعدوا في شقتي...
ربيع بضيق..
/يزيدوا يكبروها بعدين ويقولوا خلانا ع خاطر مرته..
عبد القيوم؛جيبهالهم وحده وحده..قوللهم انك مش راضي ع وضع خوك اللي قاعد عند صاحبه وحياش خوته مفتوحات وبش ياخد راحته وانتم تاخدوا راحتكم انا نطلع بهلي في شقه..
مسح ربيع بيده ع وجهه وهو يتنهد بعدين قال..
/تو نشوف..
عبد القيوم:امتى يخطرلك تعالى خود مفتاح الشقه..
ربيع:تسلم ياغالي بارك الله فيك..
عبد القيوم؛مش بينا انا حاسبك خوي الكبير..
ربيع؛خوي ساده مش لازم منه الكبير..
عبد القيوم؛مفروض قلت باتي مش خوي الكبير..
ربيع ضحك ضحكه خفيفه بعدين قال..
/باهي قولي مافيش جديد..
نزل عيونه للفنجان وابتسم..بعدين رفعهم ومسح ع ذقنه وقال..
/ومش اي جديد..
ربيع بفضول؛جديات!
غير عبد القيوم نظره للمحل شاف سيارة مدرسة قدامه..
وهي تطلع للسيارة  وفيدها بوكس حلو..
عطاته للي في السيارة وهي تكلم فيها بإبتسامه..
وهو سرحان فيها..وفي ابتسامتها الحلوة تفكر ملامحها الخجوله اللي زادتها جمال ع جمالها..
مشت السيارة  وهي قبل ماتخش بنظرة عابره شافت جهة المقهى جو عيونها في عيونه..
بسرعه هربت بعيونها عنهم ولفت وخشت داخل..
ابتسم بتنهيده ورجع يشوف لصاحبه..
ربيع بضحكه:تي غير شن صاير ياراجل احكي!؟
🌼وهي لما خشت للمحل..
ولت وقفت في مكانها ومازالت تحت تأثير الموقف..
قلبها يدق بسرعه..ووجهها احمر..وحرارتها ارتفعت..
رفعت عيونها للوحه..ابتسمت ابتسامه خفيفه..
"طوبى"..
استاقظت وشافت لوحده من البنات نادتها..
وحده من البنات واقفه في باب الحجرة الداخليه
/بالله تعالي ذوقيها وقولي رايك..
ابتسمت وقالت:هاني جايه..
ومشت ناحيتها..
☘ربيع بدهشة:اوباااا هدا كله صار واني اخر من يعلم!سامي يعرف واني لا!؟
عبد القيوم؛انت الايام اللي فاتن جوك مش تمام..
ربيع:الاخبار هادي تعدل جوي تي اني نراجي فيها اكثر منك ياراجل..
عبد القيوم بإبتسامه..
/هذى اللي صار...لكن تعرف مازلت خايف..خايف نأمل روحي بزياده ويطلع مافي شي من اللي في بالي..
ربيع:شوف مادام ملاحظ عليها التوتر والحشم وين تكون قريب عليها معناها اللي في بالك صح ميه في الميه..ركز انها قبل ماكانتش معاك هكي..
ضحك وهو يحك في ذقنه بإبهام يده اليسار..
ربيع بإبتسامه:اني متفائل هلبه..واضح اللي قاعد يصير معاكم توا بش يقربكم لبعض..
عبد القيوم تنهد من قلبه وقال..
/يارب..
ربيع:لكن نعطيك نصيحه لو صار نصيب..رد بالك ترفعها للكفرة..
عبد القيوم بإستغراب..
/ليش..
ربيع:نقصد ماترفعهاش بش تعيشوا غادي خليها زيارات بس..
عبد القيوم..
/هو هذى اللي بيصير بس انا مافهمتش ليش قلت هكي!؟
ربيع بضيق:مادام تبي تاخد مراة بظرفها هي خليك بعيد عن اهلك..مش حيهونك ولايهنوها..
عقد حواجبه وقال..
/قتلك قبل مايقدر حد يدخل في حياتي..وبإذن الله بعد يصير نصيب مش حنخلي حد يوصل فيها بنظره..والمكان اللي هي ماترتاحش فيه مانخليهاش تخشله..
☘الأنثى تستحق رجلاً يُنافس أباها في تدليلها، وليس رجلاً يُنافس الحياة في تذليلها.☘
🍃🍃🍃🍃🍃
مقعمزين في حديقة الفيلا..مقابلين بعض..وعيونهم متلاقيه.. بإبتسامة سألت..
/علاش توا؟
مختار:مالا امتى كنتي تبيها؟
بضحكه قالت..
/من زمان..
ضحك بعدين قال..
/قبل ماكنتش نبيك اكثر من صديقه مقربه..بس حضرتك ماخلتنيش في حالي وفوق هكي خليتي اهلي يحبوك سدرة هادي كل مانكلمها تسأل فيا عليك وتقولي مراة كويسه خسارتها..
ضحكت فاتن ..
مختار:هادي كلها كانت عوامل مؤثرة خلتني نستسلم ونسلم ونرجع للقفص..
فاتن بإبتسامه..
/يعني بسببهم مش بسببي..
مختار:قبل قلت اكثر من مرة اني لو بتزوج مرة تانيه مش حتكون غيرك انتي..
حطت يدها تحت خدها وهي تشوفله بحب..
وهو يشوفلها بنظراته الساحره اللي تأسر في قلبها..
قعدوا في لحظه صمت دامت لدقيقه بعدين هو قال..
/نتزوجوا الاسبوع الجاي!؟
ضحكت..بعدين هزت راسها بالموافقه..
هو ابتسم وخدي يدها وطبع عليها قبله وهي تضحك بخجل..
🍃وفي حديقة الفيلا من الخلف..
كانوا رضا وصابرين واقفين يتأملوا في الورد..
او بالأحرى هي تتأمل في الورد وهو يتأمل فيها..
صابرين:نبي نخبر اختي نجاه..
رضا:عادي..
شافتله بإبتسامه وقالت..
/تصدق..صح اللي حني بنديروه خطير ويخوف بس اني متحمسه..متحمسه نعيش معاك كل لحظه مهما كانت..حلوة تخوف..توجع..المهم نكون معاك..
هو بإبتسامه قال..
/يعني مش حتندمي بعدين وتقولي شن درت في عمري!؟
صابرين بحب..
/اني كل شي درته في عمري غلط الا حبي ليك الحاجه الوحيده الصح..
قعد يتأمل في عيونها بدون مايرد ..
هي هربت بعيونها خجلا وقالت..
/معاش تركز في عيوني هكي توتر فيا..
ابتسم وقال..
/نسأل فيهم نبيهم يقولولي شن داروا فيا..
ضحكت..وهو تنهد بإبتسامه وقعد يتأمل فيها ..
ع طلعة امينه من الروشن قالت بصوت مسموع ليهم وهي متوترة..
/صابرين خشي يللا..
صابرين هزت راسها بخوف..شافت لرضا وقالت بسرعه..
/نحبك..
وفاتت تجري..
تبعها بعيونه وهو يضحك لين خشت للفيلا من باب الكوجينه..
بعدين قال..
/امتى تولي حلالي بس..
🍃🍃🍃🍃🍃
"قشطه هكي يابنات"
هادي اريج تكلم في طالبات التقويه..
هما ردوا عليها مع بعض بإبتسامه..
/قشطه..
حطت القلم في لفة شعرها وهي تقول..
/هي توا ناخدوا بريك صغيرون شويه وجايتكم..
وناضت طلعت من حداهم..
وحده من البنات قالت..
/مروة البنت المرسومه في اللوحه هديكا نفسها بنت ابلة طوبى ؟
مروة بإبتسامه:ايه هي راسمتها..
وحده تانيه قالت:الله يبارك رسامه هي!؟
مروة:ايه..
مناسك:باين ع شخصيتها..
:ايه صح تهبل اني نحب نتفرج عليها لما تشرح لطيفه هلبه..
:مش عارفه كيف طلقها راجلها..
مروة:ماطلقهاش بالساهل..
مناسك:افتكت منه واحد حقير للمليون..
:شكله خانها..
مروة:خلاص سكروا ع السيرة يابنات..
ع خشة اريج وفي يدها سفرة فيها صحون جيلاطي..
بدت تفرق عليهم وهي تقول..
/هي بردوا عمايل ايديا واللي خلق عينيا..
ضحكوا البنات وبدوا ياخدوا..
واريج قعمزت وخدت حصتها وهي تقول..
/لمن طالعه عيونك حور هكي؟
البنت ضحكت وقالت..
/حناي..
اريج:الله يبارك شكلها كانت قالبه شارعهم ع راسها.
ضحكوا..
اريج؛اكيد مبيده شباشب لجدك وهو ماشي جاي ع مربوعتهم..
البنات يسمعوا ويضحكوا..
والبنت اللي تكلم فيها قالت بضحكه..
/تو نشدها نقصقصها..
اريج:وخبرينا..وحطت الكاشيك في فمها وهي تسمع في ضحكاتهم..
🍃🍃🍃🍃🍃
"يادماغ ال...استغفر الله واتوب اليه"
:والله ياعرفي حطيتهم في الثلاجه من امس..
نضال:باهي بابني آدم وانت تحط فيهم في التلاجه ماركزتش عليها مظلمه!!؟
:كيف!! قدم شويه شاف الخيط متاع الثلاجه محول من الضي..بصدمه كمل يقول..والله ماشفته بالله! من البهيم اللي فاكه..
ضربه ع قفاه وقاله..
/فكيته امس لما هرب الضي يا..متخلف..
:وعلاش تفك فيه مش المولد يولع طول بعد مايهرب الضرب..
ضربه مرة تانيه ع قفاه وقال..مش كان فاسد وجبنا واحد امس صلحه وانت اللي كنت واقف عليه يا...جاهل..
تحسس رقبته من الخلف وقال..
/والله نسيت بكل..سامحني ياعرفي عقلي مش عليا الفترة هادي..
نضال شافله شويه بعدين قال..
/خيرك!؟
بضيق قال..
/خليها لربي
نضال مشي بيشغل الثلاجه وهو يقول..
/ونعم بالله..لكن الناس لبعضها..قول شن صاير معاك بالك نقدر نساعد..
تنهد العامل وحط ايديه في نصه وهو يقول..
/في وحده نبيها بالحلال وقعدت نحط في القرش ع القرش بش نخطبها عطيتها كلمه بعد العيد نجيب ماليا لكن الوضع تلخبط معاي شويه..
نضال:من اي ناحيه..
:تعرف ياعرفي الواحد لما بيخطب بيبدا في مواييل ماتمش..تلبيسه ولا بيان وكله يبي ووضع البلاد زي ماتشوف فيه..هي قالت مش مهم المهم اعطي فيا كلمه..لكن اني عارفه الجو هدا في البدايه تقول هكي بعدين يضغطوا عليها ماليها ويخلوها تقول نبي ونبي..
نضال؛اول شي انت امتى ناوي الزواج؟
؛في الشتي ان شاء الله نتم اموري كلها..
نضال؛باهي..انت وياها تكلموا في بعض؟
هز راسه بصمت..
نضال:شوف..شن بدير تلبيسه ولابيان حقه هديه مني..
تفاجئ وهو يقول..
/لا ياعرفي شن تقول!!
نضال؛ياسيدي اعتربها مكافأه ع غبائك..قصدي ع تعبك ليك سنين معاي..
ضحك العامل وقال وهو يمسح ع لحيته..
/والله ماعارف شن نقولك..بارك الله فيك.
نضال بإبتسامه: فيك بارك الله..ونصيحة  بش تمشي امورك بسلاسه وربك ييسرهالك معاش تكلمها لين ديروا حاجه رسميه..
العامل بإبتسامه..
/بارك الله فيك..
ضربه ع صدره بقفا يده وقال..
/خلاص برا اخدم خدمتك..
هز براسه وقال..
/حاضر..بارك الله فيك..
ومشي طلع من حداه..
تنهد نضال وشاف للثلاجه اللي كان فيها جيلاطي..
خطرت عليه..وتفكر قداش كانت تحبه..ابتسم تلقائيا وهو يتفكر فيها كيف كانت تفرح بيه وين يجيبهولها..حتى في الشتي كانت تحب ديره وتاكله..
غمض عيونه بشده وهو يقول همسا..
/استغفر الله..
بعدين فتحهم وهو ياخد نفس..طلعه وكان يبي يطلع معاه الوجع اللي يحسه وين تخطر عليه..
بعدين هرب من ذكرياته وطلع من المكان الخالي اللي فكره بيها..لزحمة الناس اللي تقدر تخليه يتناسى التفكير بيها..
🍃🍃🍃🍃
الحب الحقيقي..لما يكون محله القلب..صافي ونظيف ومشاعره راقيه..مهما مر عليه من ظروف ووقت مايتحولش..
لما يكون نابت في القلب ومثبت جذروه فيه صعب يطلع وينتسى بسهوله..مرات مايطلعش بكل ويقعد في القلب العمر كله...
☘في العاصمه الكنديه اتاوا..
كان اسامه في شقته يدير في حاجه ياكلها ع السريع قبل ليولي للمستشفى..
لما كمل وجي بياكل جاه اتصال سكايب..
التفت شاف للاب توب اللي كان مفتوح في الصاله..
خلا اللي في يده ومشي بيرد..
اسامه؛اكيد امي..
قعمز ورا الطاوله ع الكنبه وفتح الاتصال..
شاف امه ومعاها وحده من خواته..
ضحك وقال..
/ياهلا..
"اسامه حبيبي شن حالك ياامي"
اسامه:تمام التمام حبيبتي انتي شن حالك وشن حال البهلوله اللي حداك..
"برا يازفت باهي"
ضربتها امها..
"اضربيه هو اكبر منه ويقولي بهلوله"
"ماقال كان الحق"
اسامه بضحكه؛تجيبي في الدوة لروحك..
"تعرف جايه بنقولك خبر يفرحك باهي لكن مدام انت هكي خلاص"
"بالناقص منك اني نقوله"
اسامه بضحكه؛غيرقولوا اللي عندكم وراي خدمه..
"ياسيدي حددنا موعد عرسها اخر شهر 11 "
اسامه؛اووو مبارك مبارك..
"زعمه تقدر تجي اوسا"
"لالا شن يجي خليك في مكانك"
اسامه:والله نتمنى..لكن ظروف الخدمه تحكم فيا..
"حتى وضع البلاد المشكشك وليدي حني حددنا الموعد وفي الشك يصير منه"
"ماما قولي خير ولااسكتي "
"ماهو من طولة لسانك هادي مش متفائله"
"حي ماما ريحة حريقه"
"الطاجين حي عليا"..
وناضت تجري من حداها..
واسامه يضحك بعدين ركز ع اخته كيف خدت اللاب وناضت بيه..
مشت وهي تقول..
"في دوة نبي نقولها بيني وبينك"
عقد حواجبه بقلق وهو يشوفلها كيف خشت دارها وسكرت الباب..بعدين مشت قعمزت ع سريرها وحطت اللاب توب قدامها وقالت بإبتسامه..
"الخبر الحلو الحقاني اهوا..عن اميمه"
حول نظاراته طبيه وهو يشوف لأخته بلهفه بدون مايتكلم..
"بنت خالك تلاقت هيا وياها في عرس من فتره وهدرزت عليها طبعا ماعرفتش هلبه عن حياتها الشخصيه الا لما تلاقت من اسبوع مع داليا اللي تقرا معاكم تتفكرها"
اسامه؛ايه تلاقيت اني وياها هني كانت جايه مع راجلها عنده خدمه..
"تمام..المهم في وحده من قروبكم كانت دايرة لمه عزمت عليها بنت خالك شافتها غادي..هدرزوا علي اميمه وقالتلها ليها فوق العام مطلقه"
اسامه بصدمه..
/كيف!؟
"ايه قالت ماتفاهموش بعد شهرين من زواجها اطلقت"
بدت ع وجه اسامه ملامح الاستياء..
" حسيتك مافرحتش!؟"
اسامه بضيق:شن يفرح في حاجة زي هادي..الله اعلم شن شافت وشن عاشت معاه بش اطلقت بسرعه هكي..والله ماليها من الاول لكن هي....
وسكت وهو مضايق ع الآخر..
"اللي فهمته من بنت خالك انها عايشه حياتها تخدم وتخصصت زي ماتبي وخدت الزماله الليبيه.."
في لحظه تبدلت ع وجهه ملامح الضيق لإبتسامه..
"ايوه هدا االلي نبي نشوفه.."
مسح بيده ع لحيته بعدين قال..
/امتى عرسك بالزبط..
ضحكت اخته..
اسامه بإبتسامه:هيا قولي..
"خل نقولك بسرعه...امك دور فيا شهر 11 يوم 25.."
وينفتح باب دارها وتخش امها وهي تقول..
"وين رفعتي خوك"..
بعد سمع شن قالت قعد يضحك من قلبه..قلبه اللي كان ينبض بقوة وكأنه كان ميت وتوا بس رجعت فيه الحياة..
🍃🍃🍃🍃🍃
"بنطلع من مطار مصراته"
سميره؛قصدك معاش بتولي!؟
مغليه؛شورك هدا اللي تبيه انتي..
سميره بنفاد صبر:اللهم طولك ياروح..تو كان رديت عليك طلعيني اني ندير في المشاكل..
عمر:ياودي بنولي بنولي..بنقعد نمشي ونجي زي قبل..
مغليه؛كان حصلت كيف طق في خوك سلم ولدي..
عمر؛صعب هلبه بس نحاول..
سميره بضحكه؛وكان حصلت كيف ارفع امك تشوفه بروحها..
عمر شاف لأمه..
مغليه؛هدا اللي تراجي فيه انتي..
سميره بضحكه؛في هادي عندك حق..
شد عمر ضحكته..
مغليه ضيقت عيونها وقالت..
/اني نبي نفهم مقعمزة اني وولدي انتي شن ديري معانا؟
سميره:كاني مقعمزة في دارك ليك الحق تسألي السؤال هدا لكن انتم مقعمزين في الصاله..والصاله للجميع..
مغليه؛لامش هكي انتي اللي صحيحة وجه وماتتحشميش وكان تتحشمي راك مش في الحوش من اصله..
ابتسمت سميره وقالت..
/اني بنوض احترام لولدك بس..وناضت ومشت طلعت من الصاله..
عمر:يام مايجيش هكي هي مقعمزة في حالها ماقالت شي..
مغليه برفعة حاجب؛وجعاتك!؟
عمر:الحق ايه.. قالتله بحمق..
/وجعاتك هي وامك ماوجعاتكش!؟
عمر بإنزعاج:يام خلاص تخطي بالله عليك وخلينا نعيشوا في هدوء سادنا مشاكل ووجع راس..
مغليه ودموعها في عيونها..
/خسارة..ماجبت فيكم واحد يحس امه كان الجالي..ربي يشفيه ويردهولي سالم..ناضت ومشت وهي تقول...ااه ياولدي العين ماجت كان فيك..مال في من بتجي غير فيك انت الباهي فيهم..
غمض عمر عيونه بملل وهو يحط في يده ع وجهه..
🍃🍃🍃🍃
حطت مطيره حوت "الكوالي" بعد مالبساته في الدقيق وسط القلايه وهي تسمع في بنت خوها تقول..
اميمه:حسين قال في حاجه بتصير اليومين هادم..
مطيره:يستر الله..غير انتي راك تعاودي اللي يقولك فيه لحد..
اميمه:شن تشوفي فيا جنه!!؟
ع خشة طوبى وهي رافعه جنه في حضنها قالت..
/خيرها جنونه..
اميمه بإبتسامه:نمولتي النموله...
قربت طوبى لصحن الفواكه خدت منه تفاحه وهي تقول..
/ ع شن كنتوا تحكوا.
تلاحقت جنة التفاحه تبي تاخدها..
مطيره:ع هالحرب قالت هدرزت ع حسين اليوم قاللها اليومين هادم بتصير حاجه..
طوبى بقلق:يالطيف...
اميمه؛من طريقه كلامه حسيتها حاجه باهيه..
قربت طوبى التفاحه لفمها وهي تقول..
/يارب..وكلت منها..
وتنقض عليها جنه وتحاول تاكل حتى هي..
ضحكت اميمه وهي تقول..
/هاتيها هاتي..قربت منها.
مدتها طوبى لأميمه وجنه تصرخ تبي التفاحه..
طوبى بأسلوب طفولي:إلاااا..
جنه قلدتها وقالت لا بنفس الطريقه..
وهما يضحكوا..
☘وجي وقت العشي..
وتعشوا مع بعض في الجنان وحداهم علي الواعر...
جاته اميمه بصونيه فيها سمك مفصص وفي تقول..
/وهادوا حويتات الحاج علي..
علي شاف للصونيه وقال..
/وين الليم..
اميمه؛عصرت عليهم..
هز راسه وقالت..
/احسنتي..
اميمه؛صحتين..وولت قعمزت مع النساوين..
علي وهو ياكل..
/ماكلمكم حد من السعوديه؟
مطيره؛كلمني يوسف..
علي؛شن يحكي؟
مطيرة:زي قبل مافيش جديد.
علي:سدرة حالها باهي؟
مطيره:الحمد لله شاده حيلها وماشيه ع العلاج..لكن قالت حرجانه من جدي مايبيش يكلمني..
علي:تو تروح ونشوفها ان شاء الله..
طوبى شافت لجدها وهي تقول في نفسها..
"يبي يشوفها واقفه قدامه بصحتها"
ومن حديثها لنفسها امنت معاهم في العلن بعد دعائه...
قام علي عيونه يشوف في جنه..
كانت مقعمزه ع كرسيها قدامها صونية بطاطا تاخد بالطرف وتاكل..
ضحك وقال:ياالله عليك جرينه..
وجهوا انظارهم لجنة وهما يضحكوا.
علي ضيق عيونه وقال..
/ايييه نسيت بكل..عمك دودو بعتلك معاي هديه..
حالة من الارتباك صابت طوبى وهي تسمع في دقات قلبها..حست انهم يسمعوا فيها حتى هما..
مطيره بضحكه؛شن جابلها..
علي:هادي اللي طير شن سماها ربي..قنينه هي وملونه..
اريج بضحكه؛فراشه..
علي؛ايوه..مد يده وقال..كبر يدي هكي..
مطيره؛وين درتها؟
علي:في الحوش حطيتها ع الزيانه ..
اميمه؛بعدين نمشي نجيبها..
مطيره بإبتسامه؛سلمه ياربي..
علي:غاليه عليه جنه..
فردوس وهي تشوف لجنة بإبتسامه قالت..
/ومن مش غاليه عليه هالكركوبه..
وطوبى تسمع فيهم ودايره روحها تاكل عادي...
وعيون اريج تراقب فيها..
🍃🍃🍃🍃🍃
"بنعطل"
خديجه؛وين ع خير!..
محي الدين؛فوزي المعداني عرس دخول خوه الليله..مش مصدقه هونا رقم مرته عندك واسأليها..
خديجه؛ماقلت شي انت اللي منخوص من مرافقك..
تنهد بعدين طبس عليها وقربلها وهو حاط عيونه في عيونها وقال..
/نهار اللي بنديرها وناخد عليك بنجيبهالك هني زي مادار بوك بالزبط..باس جبينها..بعدين وقف ع حيله ومشي طلع من حداها..
هي قالت بنبرة شر..
/ نقتلك ونقتلها..
قلبت عيونها بعدين ناضت بولدها وحطاته في سريره..وولت لوين ماكانت خدت تليفونها واتصلت بإبتسام.
نادي اربع مرات بعدين فتحت الخط..
/باهي اللي تنازلتي ورديتي..
"ماكنتش فاضيه..كيف حالك خديجه"
خديجه؛الحمد لله..شن حالك انتي وين مغطسه ياحنه!؟
"قاعده"
خديجه؛باهي شن رايك تركبي تسهري عندي محي بيعطل الليله..
"انزلي انتي البنات مدايرات سهريه حتى عيلة كريم جو"
خديجه؛فكينا منهم ومن داره كبدهم وتعالي.
"والله جوهم حلو الحق فكرني بأيام زمان"
خديجه؛قصدك ماتبيش تركبي.
"الحق لا مانبيش نفوت عليا الجو حتى ماتفوتيشي عليك وانزلي"
خديجه برفعة حاجب قالت..
/لاياعيوني ماعنديش فيها لمات النفاق اني تصبحي..
ونهت المكالمه وهي تقول بغل.. انتهازيه خبيثة..تحساب الجو اللي دير فيه مش فاهماته..
🍃🍃🍃
"مش مهم عندي صدقني المهم مافيش مشاكل ووجع راس"
عبدالفتاح بإبتسامه..
/ماريتش مراة زيك..تخلي ننقم ع روحي اللي درت فيك هكي..
سميره بضحكه:وهو المطلوب..
قعد يضحك..
سميره بإبتسامه؛خلاص برا توا يجي بوك ولا واحد من خوتك
هو قرب منها باس ع راسها وقال..
/راكم تنسونا من الجو  اللي دايرينه..
سميره بضحكه:باهي..
ومشت بإتجاه الكوجينه..
قبل لتخش التفتت شافاته مشي..
خشت داخل وهي مبتسمه..
صفاء وهي طلع تخلص في الفطاير من الطاجين قالت..
/سعدودك اشرف مش رومانسي هكي
ضحكت سميره بعدين قالت..
/تصدقي صفاء اول ماسمعت ان اشرف بيخطب بنيه مواليد الفين..قلت ايااه.تو بتجينا فرخة مايعه درهلنا كبودنا..وتوا لما تعاملت معاك وعرفتك خليتيني مرات نحسك من عمري عقلك كبير ورزينه..
صفاء بإبتسامه:لأني جيت الكبيره في خواتي وتحملت المسؤوليه بكري..وراهو مش بالساهل وليت هكي ياما تعبت امي معاي..
سميره؛الله يخلف عليها عرفت تربي سوا انتي ولا خواتك..
صفاء بإبتسامه:تسلمي يارب..
ع خشة ابتسام وهي تقول..
/طلعتيهم؟!
صفاء:ايه..
وخشت دايره روحها تعاون فيهم..
هي وصفاء كانوا يتكلموا عادي..بس مع سميره مافيش بينهم الا عبارات مقتضبه...
🍃🍃🍃🍃🍃
"اطفي الضي ترا"..
ناضت طوبى ومشت طفت الضي..فجأه الدار كلها تعبت اضواء ملونه تولع وتطفي..
كانت مدايرة شكل فراشه ع الحيط..
جنه مبهورة..
وامها مبهورة اكثر منها..
اريج بضحكه:تهبل تهبل..
جنه قعدت تصفق بإيديها واريج تصيح حماسا..
"هيه"
وطوبى تتفرج ع الفراشه بنظرات طفوليه زي نظرات بنتها..
جنة خدت عقلها اللعبه..لكن امها خدي عقلها صاحب اللعبه اللي ع قد مايبان راجل جلف وخشن ع قد ماهو لطيف ورقيق طباع ومشاعر..
🍃وهو في هالوقت سهران مع صحابه..
المهدي وربيع وعبد الرؤوف..
وسامي اللي كان يغني في اغنيه ليبيه قديمه..
ودي نقي ياام العيون ذبايل..
ودي نقي كيف الربيع جدايل..
ودي نقي كيف المناهل سايل..
ودي نقي ياأم العيون ذبايل...
☘ربيع وعبد الرؤوف كانوا منسجمين معاه..
لكن المهدي وعبد القيوم كانوا رايحين في عالم بنات الواعر وهايمين فيه..وكل واحد قلبه متمني الوصال اللي يرضي ربه..ورب هالقلوب شايف اللي فيها وعارف ماتتمنى...
🍀🍀🍀🍀🍀
ويمروا الايام..
ومختار وفاتن يستعدوا لزواجهم الثاني.
زي ماكانوا رضا وصابرين يستعدوا لأكبر مغامرة حيديروها في حياتهم..مغامرة عشق...
وغالبا اللي يغامر يكون حاط في باله احتمال الخسارة...
معرفه رضا بمختار واسلوبه خلاته يدير خطة هروب في نظره مش حتخليه يفيق بيهم من البدايه بش يمنعهم عن اللي ناويين عليه..
رضا كانت الخطه متاعه مبينه ع معاكسة توقعات مختار..
وكان متأكد مليون في الميه انه حينجح فيها..
حاجتين اعتمد عليهم رضا في تنفيد الخطه متاعه...
اولهم انشغال مختار بأخته سدره وهدفه اللي يبي يوصله عن طريقها وهو اللي عارف تمام المعرفه ان خطوة زواجه من فاتن حتخدم هالهدف..ومختار كان انشغل في شي يحط تركيزه كله فيه..
وتانيهم  غرور مختار اللي مايخليشي يتصور ان ممكن لحد قاعد تحت يده يتحداه ويطلع عن طوعه..
🍃🍃🍃🍃
وجي يوم الزواج...
داروا حفله مفتوحه في الهواء الطلق ع البحر..
واستمرت ليوم كامل..حضروها اصدقاء مقربين الى جانب اب فاتن وافراد من عيلتها..
وطبعا ياسمين واهلها حضروا العرس..
كان تعاملهم مع صابرين عادي لأن اللي صار بينها وبين ايهم يقعد بيناتهم مافيش داعي يدخلوا فيه بأي شكل..
بس صابرين كانت ع اعصابه وهي تشوف في ياسمين مع رضا طول الوقت...
☘انتهت الحفله في ساعة متأخرة من الليل..
ومختار وفاتن بيمشوا طول للمطار بيسافروا للمالديف شهر عسل..
🍃"توصلوا بالسلامه"
شاف مختار لرضا بعد ماقال هالجمله بنظره مع ابتسامه..
بانت عاديه لرضا..بس اللي يركز اكثر حيلاحظ لمعه حزن في عيون مختار..
حط يده ع خد رضا وقال..
/عقبالك..
ابتسم رضا وقال..
/شكرا..
ضمه بقوه وهو يقول في نفسه..
"سامحني ماكنتش نتمنى نخونك حتى بالنظر..ياريت بجد تسامحني وتعطيني عذر"
مختار:خيرك مش مهاجر ماشي شهر عسل ومروح..
تباعدوا عن بعض ورضا قال..
/حاسك حتبعد اكثر مش عارف علاش..
مختار بضحكه؛هدا خيره مولي حساس هكي!
فاتن بإبتسامه؛يحبك ويشوف فيك زي بوه..
مختار:ايااه عاد فتون ماتكبريناش..
فاتن برفعة حاجب:كبير وشايب..
رفع حاجبه حتى هو وقال
/وجذاب..
فاتن ضحكت بسخريه وحطت الباقه في وجهه..
ضحكوا..
ياسمين:هيا قبل لتمشي احدفيها..
فاتن:شويه بس..شافت جهة صابرين وامينه..
هما ابتسمولها..وهي مشتلهم...
وصلت فيهم..حضنت امينه..
امينه بدموع:مبروك ياحبيبتي الف مبروك ربنا يسعدكم..
فاتن؛آمين..
بعدت عنها وشاف لصابرين بإبتسامه..
وصابرين تبادل فيها الابتسامه..
قربتلها وضموا بعض..
فاتن؛ نقدر عليه حنخليه يتقبل خليك واثقه فيا..
صابرين:شكرا ع كل شي..
تباعدت عنها فاتن وشدت ايديها الزوز بقوة بعدين رختهم ومشت ولت لراجلها...
وقفت في جنبه ونادت البنات..
كلهم تجمعوا..لفت وتباعدت كم خطوة..
بعدين عدت بصوت عالي وهي ترفع في الباقه ..
/واحد..اتنين...تلاته..
وحدفتها...
سمعت اصوات ضحك..
التفتت لقت مختار خاش وسط البنات وشادها في يده وهو يشوفلها بإيتسامه وحواجبه مرفوعات..
غمضت عيونها بيأس وهي تضحك..
هو تباعد عن البنات بعدين لف وهو يمشي ويحدفها فجأه..
وتشدها وحده فيهم وهي تضحك بفرحه..
جاته فاتن وقفت جنبه وقال..
/ندادك بأحفادهم اعقل..
شافلها شويه وهو رافع حواجبه..
وفي لحظه رفعها في حضنه وقعد يدور بيها وهي شاده في رقبتع وتضحك وتعيط في نفس الوقت..
مختار؛زيدي كلمة تانيه نرفعك للمطار ع موطو..
فاتن بضحكه؛يامتخلف..
🍃🍃🍃🍃
وانتهت الحفله...وانطلقوا العرسان لرحلة شهر العسل..
وروحوا المعازيم...
وقعدوا صابرين وامينه في السيارة يراجو في رضا اللي كان واقف ع ياسمين..
ياسمين؛مازال بكري تولي الخدمه زي اسبوع تاني..
رضا؛مش مستاهله شفتيني اليوم قدامك زي الجن..
بضحكه قالت..
/ربي يسلمك من كل شر..
كان قلبه واجعه عليها لدرجة انه مش قادر يصارحها بالحقيقه...
ابتسم وقال؛ويسلمك..هي بري للأهلك يراجو فيك..
ياسمين بإبتسامه؛غدوة لما توصل كلمني..
هو قال:إن شاء الله..تصبحي ع خير.
ولف ومشي لسيارته..
وصابرين تشوف لياسمين كيف ماشيه ناحية سيارة اهلها..
تبدل شعور الغيره للشفقه والاحساس بالذنب..
مجرد ماركب رضا للسياره غيرت نظرها ليه في المرايه..
ابتسملها..ردتله الابتسامه بحب.
امينه ودموعها في عيونها..
/ربنا يسعدهم..ويحميكم انتم ياحبايبي..
شافولها بإبتسامة حب ورضا قال..
/ويحفظك يامنمن...
ضحكت امينه وهي تمسح في دموعها..
وهو شغل السيارة وتحرك...
مد يده للمنظومه وشغلها..
وبدت اغنيه "بدك اعرف شو مبكيكي"
سمعوها ضحكوا الزوز..
وهو ابتسم وبدي يغني معاها...
🍀🍀🍀🍀
بعد مرور يومين...
28يونيو...سنة 2019..
في المركز الاسلامي في النمسا..
تم عقد قران صابرين ورضا حسب الشريعة الاسلاميه..
هما الزوز كانوا يكونوا مع بعض بالحلال اللي يرضاه الله..
يبوا هالحب يقعد صافي ونظيف لأخر لحظه...
🍃طلعوا من المركز الاسلامي وهما شادين في ايدين بعض بقوة وكأنهم خايفين يريحوا من بعض ومعاهم الشهود اللي جابهم رضا وكانوا اصدقاء عرب مسلمين..
باركوله وهو شكرهم بعدين خدي مرته ومشوا لسيارتهم..
فتح رضا الباب لصابرين..
ركبت وهو مشي ركب..وشغل السيارة وتحرك..
صابرين بضحكه حماس وفرح..
/مش مصدقه حاسه روحي بنطير من الفرحه..
خدي يدها وحطها ع قلبه وقال..
/شوفي اني شن صاير فيا..
ضحكت..
رفع يدها وطبع عليها قبله..بعدين قعد شادها وهو يسوق..
🍃كملوا الزوز اجراءات الزواج قانونيا..بعدين توجهوا للفيلا بش يودعوا امينه..
🍃🍃🍃
امينه وهي حاضنه صابرين بقوة وتبكي..
/ربنا مايسمعني عنكم وحش..ربنا يحنن قلبه عليكم..
صابرين وهي تبكي:يارب..
امينه ببكي؛ياحبايبي حتوحشوني قوي..
رضا وهو شاد دموعه بقوة قال..
/حنرجعوا نشوفوا بعض مرة تانيه ان شاء الله..
امينه:يارب..يارب..
تباعدت صابرين عن امينه وهي تبكي..
ومشت طلعت من الفيلا بسرعه..
امينه بنبرة باكيه:حطها في عينيك ياحبيبي اوعى تكسرها ماتخليهاش تندم ..
قرب لأمينه وباس راسها بعدين قال..
/كوني هانيه..نشوفك ع خير..
امينه برجاء وصوت يدوب طالع من البكي..
/يارب..
🍃طلع رضا لقي.صابرين واقفه تتفرج ع الشجر وهي تبكي..
جاها..وضمها لقلبه..وهي شدت فيه بقوة..
رضا:هي تعالي ياروحي..
ومشي بيها للسيارة ..ركبها بعدين ركب..
وقبل ليطلع..شافوا مع بعض لأمينه اللي كانت واقفه في الباب رافعه ايديها تودع فيهم..
رفعوا ايديهم وودعوها..وتحرك رضا بالسيارة..
امينه برجاء..
/يارب يارب...
🍃🍃🍃🍃🍃
بعد ماقطعوا مسافه لابأس بيها..
هدت صابرين ووقفت بكي..
سرقلها النظر..بعدين خدي يدها وبدي يغني..
/من حبيبي انا رد عليا وقول...
ضحكت وردت عليه...
/انت اللي بحبه انا..انت اللي بحبه انا..
ساكن بقلبي وروحي انت البلسم لجروحي.
انت حياتي وغرامي انا...
رفع يدها وباسها بعدين حطها ع قلبه..
صابرين وهي تشوفله بحب..
/نحبك موت..
رضا بنبرة حب...
/واني نعشقك موت ياعمري انتي..

#الاوركيد_الابيض
#طوبى

...يتبع....