طوبى ☕شارع القهوة☕

الجزء_السابع_والتسعين

#طوبى  "جنة طوبى"
#جمان_فريد
#الجزء_السابع_والتسعين"الأوركيد الأبيض"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#ذكر_الله
عن أبي موسى الأشعري رضي الله عنه، قال: قال رسول الله صلى الله عليه وسلم: (مَثَلُ الذي يَذْكُرُ رَبَّهُ وَالَّذِي لا يَذْكُرُ رَبَّهُ، مَثَلُ الْحَيِّ وَالْمَيِّتِ) (رواه البخاري) .
🌿🌿🌿🌿🌿🌿🌿🌿🌿🌿🌿🌿🌿🌿🌿
🍃لماذا أخاف من فقدك وقد فقدتك ولماذا أخاف تكون لغيري وانت لغيري !🍃
________________________________________
فجر ثالث يوم من ايام عيد الفطر..
في جنان الحوش..
هواء صافي..ونسمه بارده..وهدوء مريح..
وطوبى تتمشى وهي تسبح ع اصابع يدها اليمين..وفي يدها اليسار كانت شادة نظاراته..
كملت لفتها ع الحوش لما وصلت في الباب الفاصل بين حوشها وحوش جدها..
انفتح الباب وخش الحاج علي..
طوبى بإبتسامه؛صباح الخيرات..
شافها وقال..
/صباح الخير..
طوبى:شن حالك اليوم؟
رد عليها وهو يمرر في نظره ع المكان..
/الحمد لله..شافلها وقال..انتي بس فايقه؟
طوبى:لالا كلهم فاقوا بش يصلوا..مدتله النظارات وقالت..عطيهم للتارقي امس جنة شدتهم منه..
ضحك ضحكه خفيفه وخداهم وهو يقول..
/الله عليك جرينه وخلاص..
ابتسمت طوبى وعيونها ع النظارات..
شافلها جدها وقال..
/ماتبوا شي؟
طوبى:خبيزات سخينات للفطور يعني كان حصلت كوشه فاتحه..
علي:لا كوشة عمك المنصوري تفتح اليوم هو هكي قال..هي بالسلامه...
طوبى:في امان الله..
ومشي علي الواعر للباب..وطوبى مشت خشت للحوش..
🍃في الوقت اللي طلع فيه التارقي من حوش المهدي..
شاف جهة حوشها..لقي جدها كيف طلع..
مشاله طول..
وصل فيه وقال:صباح الخيرات..
علي بإبتسامه؛صباح الخير..مدله النظارات وهو يقول..خدتهم منك الجرينه..
هو ابتسم بشي من الضيق لما شافهم..خداهم منه وقال بضحكه..
/ايه مسكت فيهم بإيديها الزوز..
علي بضحكه؛جرينه..ومشي..
وعبد القيوم مشي معاه وهو يحط في النظارات في جيب السوريه العربيه اللي كان ع يسار الصدر مكان القلب..
🍃🍃🍃🍃🍃🍃
النمسا...العاصمه فيينا..
الساعه 4:30عصرا..
في فيلا مختار..
كانوا صابرين مقعمزين في الكوجينه يسمعوا مع امينه في برنامجها المفضل..
قدام كل وحده فيهم فنجان قهوة..بس اختلفوا في الحلو..
فاتن واميمه سينابون..وصابرين كيكة لوز خزايني..
🍃"وعيدكم مبارك مرة تانيه مستمعينا وعيدي اني عيدين بيكم..هيا ابعتوا التهاني والاماني ووصال وندى..ضحك وقال..هيا هيا نراجي فيكم"
ويطلع فاصل غنائي قالت فيه فاتن وهي تضحك..
/مبرده..
صابرين فنصت فيها وهي تقول..
/ردي بالك في ناس هني مايرضوش فيه..
امينه بضحكه..
/دمه زي العسل والله انتوا اللي مش فاهمينه..
صابرين؛ولا عايزين نفهمه..
شربت فاتن من قهوتها وهي مبتسمه بعدين قالت..
/مستعدين للرحله..
امينه؛ومتشوقين قوي..
صابرين؛درت بحث عن القريه وشفتلها صور وفيديوهات تمنيت لو نكمل عمري غادي..
فاتن؛صح حلوة هلبه بس عيبها الوحيد الرطوبه..الرطوبه فيها عاليه شويه..
امينه بضيق:بكره الرطوبه..
فاتن:لا ماتخافيش تقدري تتأقلمي..اني استأجرت كوخ غادي..
صابرين؛كلهم ع البحر حتى الفنادق..
امينه: قلتيلي اسمها ايه!؟
فاتن:هالشتات..
امينه:هالشتات..كويس..
"وهادي روري تهني خطيبها بالعيد وتقوله كل سنة وانت طيب وتهديه اغنيه معاك قلبي لعمرو دياب..هي شويه وتسمعيها ياروري"
فاتن؛فناني المفضل..
امينه؛انا كمان بحبه قوي..
صابرين رشفت من القهوة وسرحت بتفكيرها في ولد البلاد ورسايله واغاني فنانه المفضل..تفكرت اللي صار بينهم اخر مرة..وجعها قلبها وحست برغبه في البكي لكن شدت روحها بقوة..
🍃وهو في هاللحظه خش الفيلا..
ماكانش عندهم علم بجيته..توجه ناحية داره بس وقف في نص الطريق لما سمع صوت ضحكتها..
غمض عيونه بألم من الشوق..فتحهم والتفت للممر اللي يرفع الكوجينه..وبدون مايفكر زياده رفعوه رجليه لمكانها..
🍃صابرين بضحكه..
/تموت ترعش من القطاطيس..
امينه:بقرف منهم مش بخاف..
صابرين برفعة حاجب:اهااا..تبيني نفكرك شن درتي يومها لما خشت علينا الكوجينه شن درتي!؟ عيطت عيطه جابت قلبي في رجليا قلت اكيد المراة انبكت في وجهها الكوشه ولاضربها الضي..وين خشيت عليها لقيتها خاشه في تركينه وتقرا في القرآن وهي ترعش والقطوسه واقفه تشوفلها وهي مش فاهمه شي..
امينه بإحراج؛بلاش مبالغه!..
صابرين بضحكه:تي اني ماحكيت شي اصلا..
وفاتن تسمع فيهم وهي تمرر في نظرها بيناتهم و دتضحك.
🍃اما هو كان واقف جنب الباب يسمع في صوتها وهي تتكلم بحماس وتضحك في نفس الوقت..وقلبه ملهوف لهفه لاتوصف ع شوفتها..
من اخر موقف صار بينه وبينها معاش شافها..هربت عن عيونه..ومختار زاد بعدها عنه لما نقلها للشقه..وهو زاد بعد لما شغل نفسه بالخدمه وسفرياتها...
وياريت قدر ينسى للحظه..حب ليها زاد.. بدي يحس في روحه عشقها تخطى الحب معاها...
عشق مرضه..خلاه يعاف الزاد والنوم...ومع العشق العقل مالاش سلطه ع صاحبه..
شوقه ليها معاش قدر يتحمله..خدي نفس..وخش عليهم..
عيونه جو عليها وهو يقول..
/مساء الخير..
شافوله فاتن وامينه وهما متفاجئات..اما هي فكانت ترجف بكل مافيها وعيونها لمعت فيهم الدموع..
امينه؛حمد لله ع السلامه..
رضا:الله يسلمك..
فاتن:حمد لله ع سلامتك.
رد عليها:الله يسلمك..كل سنة وانتم طيبين..
امينه وفاتن..
/كل عام وانت بخير..
اما هي التزمت الصمت..ولهت نفسها قصدا بالكيكه اللي تاكل فيها..
عيونه عليها وهو يسمع في فاتن تسأل..
/روح معاك مختار؟
تنهد ومشي جيهتهم وهو يقول..
/لا..
وصل في الكرسي اللي كان مقابلها وقعمز عليه وهو يقول..
/روحت بروحي..
فاتن؛علاش؟
رضا شافلها وقال..
/تعبت شويه غادي قالي روح ارتاح..
امينه بقلق..
/باين عليك..خاسس قوي ووشك أصفر..
رد نظره لصابرين وقال..
/عادي ماتخافيش..
امينه:لامش عادي..حقوم احضرلك الغدا..
رضا:لا مانبيش..نبي قهوة..واللي تاكل منه صابرين..
حطت الشوكه وناضت وهي تقول..
/بنمشي نكلم ايهم نقوله ع الرحله ونعزمه عليها..
ومشت بسرعه طلعت من الكوجينه..
امينه شافت لرضا بضيق..
وفاتن شافتله بطرف عينها لأنه كان مقعمز جنبها..
هو تنهد..بعدين مد يده للصونيه متاع صابرين خداها حطها قدامه وكمل ياكل في باقي الكيكه..
فاتن اشفقت على حالته هلبه وفي نفس الوقت مش مستوعبه ان  رضا الجاف القاسي يصير فيه هكي!
وامينه كان حالها من حال فاتن بس هي كانت حزينه ع وضعه وخايفه عليه..
🍃🍃🍃
ركبت صابرين لدارها..
خشتلها وسكرتها عليها..ومشت قعمزت ع سريرها وانهارت بالبكي..
زاد وجع قلبها لما شافت حاله..ماتخيلتش ان مشاعره اتجاهها قويه لهالحد..
تمددت ع السرير ورقدت ع الجنب..حطت ايديها الزوز تحتها وهي تبكي بحرقه..
وفي قلبها الف صرخه بكلمة ياريت....
وزي مايقولوا كلمة ياريت ماتعمر بيت...
🍀🍀🍀🍀🍀
عدت الساعات..
وجي وقت الرحله..
جهزت نفسها..وجهزت شنطه صغيره في ملابسها وحاجاتها..
خشت عليها امينه شافتها تلبس في طاقية منظرها حلو..
ابتسمت وقالت..زي القمر.
صابرين بإبتسامه؛انتي القمر..خلاص ننزلوا..
امينه؛اه انا جيت استعجلك..يللا..
خدت صابرين شنطه صغيره حزامها طويل رفعاته فوق راسها بعدين نزلاته لرقبتها خلاته محاوط يمينها وحطت ال الشنطه ع خصرها بالجنب من اليسار...
بعدين مشت خدت شنطه حوايجها وطلعت هي وامينه من الدار...
🍃نزلوا من الدروج وامينه تسأل فيها..
/عزمتي ايهم؟
صابرين؛اكيد لا..نبوا نقعدوا برواحنا نساوين في بعض..
امينه هزت راسها بصمت بعد مافهمت قصدها..
وصلوا لوطا..
لقوا فاتن تراجي فيهم.
فاتن؛واتيات خلاص..
امينه؛كله جاهز..
فاتن اشرت بيدها ومشت للباب وهي تقول..
/lats go
فتحت الباب وهما وراها كلهم حماس..
🍃هو كان واقف في الحديقه متاع الفيلا بعيد عنهم..
شافها وهي طالعه..كان يحب يشوفها لما تلبس طاقيه تبان احلى واكثر نعومه ولطافه..
قبل شافها بالشتويات وتوا بوحده صيفيه..بس طريقة لبسها للشنطه جديدة عليه..
🍀هو هكي المحب او العاشق يقعد مركز في ادق تفاصيل معشوقه..او محبوبه..🍀
ركبت السيارة من الخلف بعد ماحطت شنطة في صندوق السيارة..ولحظات وتحركت فاتن..
بس طبعا اكيد هو مش حيخليهم يمشوا برواحهم..
استنى شويه..بعدين مشي ركب سيارته ولحقهم...
🍃🍃🍃🍃
ومن فيينا..لطرابلس..
تحديدا في واحد من المطاعم اللي عزمت عليه ميار سلافه واختها..
وين وصلوا الزوز للمطعم..انصدمت لبانه لما شافت قريبات ميار معاها..واضايقت ع الآخر..
سلافه بإستياء:لك ليش ماحكيتي ياميار! بنات عمتا مابينطاقوا..
شافتهم ميار..اشرتلهم يجوا..
الزوز ابتسموا مجامله ومشوا لطاولتهم..
وبدت نظرات بنات العيله اللي كلها غيره وتكبر تحاصر في سلافه في اختها لين وصلوا فيهم..
سلافه:مسا الخير..
ردوا بأصوات متقطعه..
/مساء الخير..
وميار جتهم سلمت عليهم بحرارة وعيدوا ع بعضهم بعدين قعمزتهم في كراسيهم..
في وحده من البنات كانت تشوف للبانه بنظرات كلها حقد..
ولبانه كانت تتجنب فيها هي بالذات..
سلافه:كيفكن..
وحده منهم بنبرة سخريه قالت..
/مناح تشكلي قاسي.
ضحكوا..
ميار تفادت الموقف وهي تقول..
/جابكم عمو نبيه؟
سلافه وهي تحاول تبان عاديه..
/ايه..
ميار بضحكه وهي تحاول تلطف الجو..
/عيدتوا في مصراته؟.
سلافه بإبتسامه..
/ايه اليوم كله كان ع البحر عن جد مصراته حلوة كتير..
وحده منهم قالت:من عندكم فيها؟
سلافه؛بيت عمي نزحوا من هون لهونيك..
:اممم..كان تنزحوا حتى انتم تحصلوا عرسان لئطه...
:عاد جماعتنا يرعشوا ع المستورد..
لبانه شافت لاختها..
وسلافه بتجاهل قالت..
/كيف كانوا اول يومين كيف مرقوا ع عمو فتحي..
ميار وهي مبتسمه بالغصب..
/الحمد لله حاله باهي لكن مكدره وضع البلاد.
سلافه؛والله كلنا ماحسينا بطعم العيد هالسنه.
:مفروض تكونوا متعودين حالكم من حالنا..
ميار:وشن دخل هدا في هدا..كان تعودت مفروض مايضيقهاش الوضع!؟
:لامش هكي بس هي مش عارفه كيف قالتها..
سلافه ببرود..
/حكيت عادي جدا..
:يللا فوتي بيبي..هيا شن بتطلبوا جعنا..
ميار؛كل وحده تشوف شن تبي..
خدوا قائمه الأكل وقعدوا يتفرجوا عليها..
سلافه ولبانه بش مايكلفوش ع ميار اختاروا سلطه بس..
شويه وكل وحده فيهم قالت شن تبي..
لين جي عليهم الدور وقالوا طلبهم..
:دايت شكله!؟
ميار:راكم تقولوا تعشيتوا قبل لتجوا؟
لبانه؛مابنحب نتقل ع العشا..
:يااااي.
وضحكوا اللي حواليهم..
سلافه:مثل ماقالت لبانه..
ميار فهمت ع صاحبتها..مابتش تصر عليهم وتحرجهم..نادت النادل..جاها طول..سموله طلباتهم وهو سجلها ومشي طول..
تكلمت بعدين البنت اللي كارهه وجود لبانه وقالت..
/ترا قوليلي يا..لبانه..شن معنى اسمك!!؟ اني ماشي في بالي ان معناه لبان..
:لبان مذكر لبانه مؤنث..
ضحكوا..
ميار قعدت تشوفلهم بنظرات استياء..
سلافه ابتسمت بثقه وقالت..
/خبريها شو معنى اسمك؟
ابتسمت لبانه بثقة استمدتها من اختها وقالت..
/لبانه..هو بلوغ الحاجه من همة لامن فاقه..لحتى بسطلك اياها..يعني حدا بيكون عنده هدف او طموح بالحياه لما بيوصلوا بيقول بلغت لبانتي..معناها وصلت لهدفي..تمام!؟..وكمان شجرة الصنوبر بيسموها لبانه..
ردت عليها وقالت تهكما..
/ماشاء الله محاضرة..
لبانه بضحكه:لتصيري تفرقي بين اللبان ولبانه..
ضحكت ميار..وسلافه ابتسمت برفعه حاجب وهي تشوف للبنت..
وهي ابتسمت من فوق نفسها وبنات خالها كانوا يشوفلهم بحده..
🍃ومن باب المطعم خشوا معز ومع صحابه..
كان يدور بعيونه في طاولة اخته..جو طول ع حبيبة القلب..
ابتسم..بعدين رد نظره لصحابه ومشي معاهم للطاوله اللي كان حاجزها..وقعمز في الكرسي اللي يخليه مقابل لبانه...
🍃🍃🍃🍃
وقعد الوضع ع طاوله ميار مشحون وهي تحاول تلطفه لما تفتح مواضيع ممتعه..
🍃وخوها ع طاولته كان مخلي صحابه وهدرزتهم ومركز بكل حواسه مع حبيبته..
كان يبيها تشوفه..رفع تليفونه وكتب رساله وبعتهالها..
قعد مركز بنظره عليها..لقاها قامت تليفونها وقعدت تشوفله..
شويه ورفعت عيونه وهي دور بيهم لين جو عليه..
ابتسم من قلبه..
هي شافتله بضيق وغيرت نظرها عنه..
خفت ابتسامته..ورجع لهي مع صحابه لما كلمه واحد فيهم..
🍃🍃🍃
جاهم العشي وبدوا يتعشوا..
لبانه وسلافه كانوا متسهفات ع الاصناف اللي طلبوها البنات لكن ظاهريا ياكلوا في السلاطه عادي..
ركز معز عليهم وشبه فهم كل شي لأنه الأدرى بالظروف اللي يمروا بيها حاليا..
🍃:البيتزا هني تحفه ماذقتش زيها قبل..
ميار:هني ماكلتهم كلها حلوة..
:ريحتوها عليكم ياسلافه وانتي..ياشن سماك ربي..
لبانه بهمس:يارب صبرني..
سلافه بإبتسامه..
/صحتين وهنا حبيبتي..
:ع قلبك ياشاضوما قصدي ياقضامه..
وطبعا اللي حواليها دعموا خفة دمها التي لاتوصف بضحكهم..
ميار بضحكه:ديما هكي هادي بصارتها مالغه..
لبانه؛مبينه..
شافوا بنظرات حاده والحواجب مرفوعه..
لبانه بضحكه؛عم بمزح معك ياشينه..قصدي ياسموحه..
سلافه بضحكه..
/مزحا غليظ شوي..
وميار تسمع بصمت وهي شاده ضحكتها..
ع جية نادل وفي يده سفره..
حط قدام لبانه مكرونه الفريدو..
وقدام سلافه بيتزا بالخضرة..
سلافه بإستغراب..
/عفوا نحنا ماطلبنا غير السلطه..
رد عليها؛هادم هديه من الاستاذ اللي غادي..
شافوا كلهم لوين ماهوا اشر..
لقوا معز داير روحه لاهي بصحابه بالماكله..
لبانه نزلت عيونها للصونيه بضيق..
وبنت عمة ميار تشوفلها بغيره وكره..
ميار شكرت النادل وخلاته يمشي وقالت لسلافه واختها..
/خلاص عاد ماتردوهاش عليه جاملوه مجامله..
:معز طيب وكريم هلبه..
:صدقتي اللي في يده مش ليه يعطي للي عنده واللي ماعنداش..
سلافه قعدت تشوف للبيتزا بنظرات غضب..
ميار:سلافه ولبانه يعزوا عليه..
خدت لبانه الشوكه وبدت تاكل من المكرونه بعدين قالت..
/تجنن مثل مابحبا تمام..
سلافه ابتسمت وهي تشوفلها بعدين رفعت شويه من اكمامها وبدت تاكل في البيتزا..
ميار بإبتسامه..
/سلمهم اللي ماردوش عزومة خوي..
شافت لبانه لمعز لقاته قاعد مشغول بالهدرزة مع صحابه..
غيرت نظرها للبنات اللي حواليها لقتهم ولوا ياكلوا بعصبيه..
ابتسمت بمكر وهي تشوفلهم..بعدين ولت تاكل..
شويه وجتها رساله..
شافتلها البنت طول لما سمعت نغمة الرساله..
فتحتها لبانه وقرتها..
(مطرح مايسري يمري ويأسس ويبني)
رفعت عيونه شافتله..لقاته يشوفلها..
وابتسم بغمزة..
نزلت عيونها للصونيه وهي شاده ابتسامتها..
وتوصلها رساله تانيه..فتحتها طول وقرتها...
(يامحلا الشامي ع المغربي)
قامت عيونها وشافتله..
لقاته يمرر في نظره ع صحابه وهو رافع ايديه داير روحه يتكسل..شافلها..بعدين اشر بعيونه لفوق..
هي شافت ايديه لقاته مداير بصوابعه شكل قلب..
نزلت عيونها وهي شاده ضحكتها..
وهو نزل ايديه وع وجهه ابتسامه حب وعيونه عليها..
🍃🍃🍃🍃🍃
وعيون رضا مافارقتش صابرين من بعد ماوصلوا لقرية هالشتات..
حجز في فندق قريب عليهم...ومشي لنفس المكان اللي قاعدين فيه..
لقاهم طلعوا منه وكملوا طريقهم مشي..
وهو يلحق فيهم من بعيد..
☘☘☘
الأجواء في القريه هادي كانت خياليه..
تنسي اللي يجيها همومه كلها..
فاتن كانت تمشي وتصور بالكاميرا متاعها في معالم هالقريه التاريخيه..
وصابرين واميمه يتفرجوا وهما مبهورات..
امينه؛تصدقي بالله..احنا طلعنا مش عايشين خالص..
صابرين؛صدقتي يامنمن حتي مقبورين مش عايشين..
🍀وكملوا طريقهم..
لين وصلوا في طريق جايه بين جبل وبحر كانت فاضيه وحلوة بالمرة..
صابرين بضحكه:خاطري نجري..
وطلعت تجري..وفات وامينه لحقوها وهما يجروا ويضحكوا..
بعدهم بشويه هو كان يمشي بسرعه..
ع وجهه ابتسامه وهو يحرك في راسه يمين ويسار..
🍃وفي النهايه حطوا رحالهم في مطعم مطل  ع البحر..
صابرين وهي تمرر في نظرها ع المكان..
..معاش نبي نروح خلاص خلوني هني..
امينه بشي من الضيق..
/بس الجو رطوبه ومقلق شويه..
صابرين؛كان جت رطوبه عادي نتحملها تحملنا مااحرف منها..
فاتن:اني عايشه في الريف الاسكتلندي مانحبش جو المدن نهائي..
امينه؛عشان كدا وشك دايما منور..الله اكبر..
ابتسمت فاتن..
وصابرين تسمع فيهم وهي هايمه في المكان ومسحورة بيه..
ناضت وقالت:نبي نمشي نقعمز غادي شويه لين يجيبوا العشي..
امينه:حرن عليكي..خودي بالك من نفسك..
صابرين:حاضر..ومشت بإتجاه مقعد خشي قريب ع البحر..
☘وصلت فيه وقعمزت..
ابتسمت براحه وهي تمرر في نظرها ع الطبيعه الساحره..
ماحستش لما قعمز جنبها بمسافه الا لما سمعاته قال..
/انتي احلى من المكان بألف مرة..
غيرت نظرها ليه وقالت بحزن..
/ماتملش!
هو قال..
/لين نموت..
غيرت نظرها للبحر..
رضا بإبتسامه..
/كنتي حاسه بيا وراكم..
هي قالت..
/عارفاتك حتلحقنا..
هو قال..
/حافظتيني..
سكتت ماردتش عليه..
تنهد وقال..
/عجباتك هالشتات؟
شافتله وقالت..
/جيتها قبل؟
هو قال..
/كذا مرة..
قالت:بروحك؟!
رضا:مرة وحده وبروحي..لما نفدت طلبك..
صابرين؛اي طلب؟
رضا:النسيان..
ردت نظرها للبحر..
رضا؛ماتحرمنيش نشوفهم مستاحشهم لين تالف..
صابرين بحزن:رضا حرام عليك اللي دير فيه..
تنهد بيأس وغير نظره للبحر..
التزموا الصمت الزوز وفي داخلها هلبه دوشه..كلام..وعراك..وحتى دموع..
شويه هو بدي يغني..
مكتوب علينا نشتاق للحب الهني.
ليخلص عمر الاشواق لتفنى الدني..
بدك حبك اكثر بعد..بدي اعطي عيونك وعد..
رح نبقى ديما لبعض..لولا بكرا تركنا بعض..
هي اكبر غلطه..
تنهدت بألم وقعدت ساكته..
اما هو قال..
/تعرفي..اني امي سيبتني وعمري 3سنين  وروحت لبلادها ومعاش دورتني بكل..ماتفاهمتش هي بوي وطلقها..وهي بإرداتها خلتني...
شافتله بنظرات حزن..
وهو يشوف للبحر ومكمل يحكي..
/بوي كان يخدم ع بطاح..كانوا متشاركين وهو وعمي وضعنا المادي كان كويس هلبه..كويس زياده عن اللزوم..يعني اني عشت في عز زي مايقولوا..بس من غير ام...من غير عيلة..
عايش مع بوي وعمي ومرة مرة كانت تجي مراة تقعدي معاي وهما مهناش...
بعد تخطيت 16عام بوي دخلني معاه الخدمه لكن ماحرمنيش من قرايتي..
خشيت لعالم الخدمه متاعه اللي ياما علمني..وبعد تخرجت من الثانوي..فقدت بوي في حادث..وقعدنا اني وعمي..
اضطر عمي بعدين يعرفني ع حقيقة الخدمه متاعهم..تهريب..
ومش أي تهريب..لدرجة انهم كانوا مدعومين من فوق!
بدون تردد خشيت الخدمه هادي..ممكن اللي فكرت فيه وقتها..اني نملك القوة اللي تخليني نقدر نعيش في الدنيا هادي..
تنهد بعدين قال..تعلمت بسرعه وتمكنت وعمي بدي عابي عليا في كل شي..لعند ماجي يوم سافر فيه لمالطا ع خاطر الخدمه..سافر...ودار مشكله كبيره غادي دخلاته الحبس..
وقعدت بروحي بكل معنى الكلمه.وولى كل شي عليا اني..شديت الخدمه وسيبت القرايه..العالم اللي عشت فيه وقتها..قسا قلبي وخلاني بنادم ماعنداش أي نوع من المشاعر..
المهم..قعدت ع الحال هدا لين جت 2011..وقفت شغلي كله وبمساعده واحد من الكبار طلعت برا البلاد ومشيت لمالطا..
اول حاجه درتها بعد ماوصلت غادي مش للحبس اللي قاعد فيه عمي ولما سألت عنه طلع متوفي من 2009..متوفي ليه قريب عامين وقتها واني مانعرفش..!
كان نقولك..بعد ماعرفت بموت عمي..تمنيت لو لحقته..
شعور الوحده..وانك تكون بنادم مقطوع من شجرة واعر هلبه...ماتلقاش من يطبطب عليك من يحمل معاك همك..من ينسيك سواد العالم اللي عايش فيه..
قعدت فتره حابس روحي في شقة في مالطا قريب اسبوع مش عارف وقتها لو كانت عايش حزني ع عمي ولاع بوي ولا ع حالي...وفي عز الهم اللي اني فيه..في ليله اندق عليا باب الشقه اللي اني قاعد فيها..فتحت الباب ونلقى وراه واحد..
شكله وهيئته خلوني نتوقعه انجليزي..الماني..ولما كلمني وقالي رضا****..طلع ليبي..
صابرين:مختار..
شافتلها بإبتسامه وقال..
/ايه..
صابرين:وبعدين؟
رضا:دخلته للشقه طول..وثبته ع الباب وشديت عليه سلاحي..ضحك وقالي اني كنت صاحب عمك في الحبس..
رخيته ودخلته وقعمزت معاه وسمعت منه..قالي اني كنت مع عمك في الحبس وكنا زي الخوت وماإلى ذلك..المهم قالي انه مرض في الحبس وفي ايامه الاخيره وصاه عليا..قال وصاني ندورك ونوصلك سلامه وراهو يطلب منك فالسماح..
اني ماكنتش مهتم لشي غير ان عمي اخر ايام تفكرني ووصى حد عليا..
صابرين؛كيف خدمت مع مختار!؟
تنهد وقال:هديكا اليله ماروحش من عندي الا وهو مخليني حاكيله قصة حياتي كلها..تفاجئت بيه وهو يعطي فيا رقم تليفونه ويعزم فيا ع الغدي في الفندق اللي هو قاعد فيه..
بيني وبينك ماصدقت..حسيته راجل مهم وعنده قوه واني نحب نكون قريب ع الناس اللي زيه..
وتكررت لقاءاتنا وتعرفنا ع بعض كويس..هو كشخصيه يفرض عليك احترامه..بس كان في شي داخلي مش مريحني اتجاهه..تجاهلت مادورتش كنت نبي نقعد قريب عليه بس..
وهو قربني لدرجة دارني ولده رغم ان فرق العمر بيني وبينه مش كبير..خلاني نكمل قرايتي في وحده من اهم جامعات العالم..تخرجت وحضرت حتى الماجستير في ادارة الاعمال..
لكن برغم قربي ليه..كنت حريص هلبه ع الحدود اللي بيني وبينه..مهما كنت قريب عليه نقعد واحد يخدم عنده...
نصارحك..اني نحبه ونعزه هلبه ومعاهد نفسي لو ع موتي مستحيل نخونه ولانخالفه...لين طلعتي انتي في حياتي وخلتيني لأول مرة ننفر منه..ومعاش نرضى عن اللي يدير فيه ولاعن حياتي معاه..وتمنيت لو امي خدتني معاها..
اني كنت كارهك هلبه في البدايه..او ممكن كنت مقهور منك..
بس قلبي غلبني..وحبيتك..واول مرة نحب ونعرف الحب في حياتي كانت معاك..انتي وصلتيني لمرحلة خلتيني فيها نعشقك عشق ومستعد نموت ع خاطرك..
نزلوا دموع صابرين وهي تشوف لعيونه..
هو ابتسم بيأس وقال..
/ماتخافيش مش حنطلب منك شي..اني جيت طلعت اللي فقلبي ليك لأخر مرة..
قلبها انقبض بقوة ...
رضا:صدقيني مش حتلقي بنادم في الدنيا يحبك زي مااني حبيتك..هدا علاش رضيت بالامر الواقع بش نشوفك عايشه مرتاحه وسعيده بس..معاش نبي شي تاني غير هكي..
ناض وقف وقال..
/بريلهم يراجوا فيك..
تمعنت النظر في عيونه وهي تذرف في الدموع..
وهو ابتسم بحسره بعدين قال.
/تصبحي ع خير..
ومشي وخلاها...
خلاها جثه بس..ورفع معاه عقلها وقلبها وكل شي فيها ماخلالها شي..
مجرد مااختفي من قدام عيونها..انهارت..قعدت تبكي بألم وحرقه..وحسرة..
وامينه وفاتن اللي شافوها معاه وعطوهم فرصه بش يحكوا مع بعض..
مشولها..
قعمزت امينه جنبها وحدتها في حضنها..
اما فاتن قعدت واقفه تشوفلها بتعاطف وألم...
🍃🍃🍃🍃🍃
وكلمت صابرين ليلتها في الكوخ وهي تتفكر في كلامه وتبكي..وقلبها واجعها..واجعها بقوة..وحاسه في صدرها نار والعه ماتبيش تخمد..
صابرين ببكي..
/مانقدرش..مانقدرش..اني نبيه هو بس مانقدرش نعيش من غيره..حتى كان فيها موتي..المهم نموت واني معاه..
ناضت قعمزت وهي تمسح في دموعها..
بعدين خدت تليفونها واتصلت بيه...
نادى مرة...اتنين..تلاته..وبعدين انفتح الخط ورد واحد يتكلم بالألماني..
بدت ع وجهها ملامح الاستغراب مافهمت منه شي..نهت المكالمه وهي تشوف للرقم بش تتأكد انها مش غالطه..
والرقم كام لرضا فعلا..
خافت خوف شديد خلاها تنوض وتطلع تجري من الدار وهي تنادي ع فاتن..
فاقوا فاتن واميمه وطلعوا يجروا من ديارهم..
صابرين بخوف..
/توا كلمت رضا رد عليا واحد يتكلم بلغه مافهمتهاش خودي كلميه بالله عليك انتي تعرفي لغة البلاد هادي..
فاتن بقلق:باهي باهي..اتصلي..
اتصلت صابرين وهي ترجف برقم رضا وعطت لفاتن التليفون..
خداته فاتن وقعدت تراجي في حد يرد عليها..
وصابرين وامينه بيقتلهم القلق..
سمعوها تكلمت..بعدين لاحظوا ع وجهها ملامح الصدمه..
صابرين بخوف شديد ودموعها ينزلوا..
/شن في!؟
نزلت فاتن التليفون وهي تشوف لصابرين بأسف ودموعها في عيونها وقالت...
"رضا دار حادث"

#الاوركيد_الأبيض
#طوبى

....يتبع....