طوبى ☕شارع القهوة☕

الجزء_الخامس_والتسعين

#طوبى  "جنة طوبى"
#جمان_فريد
#الجزء_الخامس_والتسعين"مراد قلبي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الأذكار
”البسُوا مِعطَف الأذكار لِيقيكم شُرور الإنس والجَان، ودثِّروا أرواحَكُم بالإستغفار لتمحي لكُم ذُنوب اللَّيل والنَّهار، وإن أصابكم ما تَكرهونه فسترضون وتتيقَّنون بأنَّه خير قدَّره لكم ربّكم لأنَّكم قد تحصَّنتُم باللّٰه.“

🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 يا غائبينَ وعرش القلبِ مسكنهم ،
هذي المواجعُ رغم البعدِ هل تصلُ؟🍃
______________________________________
🍂🍂🍂بعد مرور ثلاته ايام🍂🍂🍂
يوم الإربعاء...
22مايو...2019
اليوم السابع عشر من شهر رمضان..
🍃في النمسا...
قبل المغرب بربع ساعه..
كانوا فاتن وصفيه وسدره مقعمزات في حديقه الفيلا..الجو كان حلو شجعهم يفطروا فيها..
☘فاتن:مختار مع الخدمه ينسى نفسه بالذات لو كان فيه حاجه مهمه يعطيها وقته كله..
صفيه:طبع جده علي هكي كان زمان..
سدرة ابتسمت وقالت..
/قداش نقعمز معاه ونهدرز عليه..
ابتسمت فاتن..
ع طلعة امينه بسفره العصير وهي تقول..
/آذن المغرب..
بدوا في الفطور فاتن وصفيه..اما سدره خدت شيشة مية الرقيه اللي كانت حاطتها صفيه ع الطاوله..
امينه؛بالهنا والشفا...ومشت خشت بش تاخد فطورهم هي وصابرين وتركبلها الدار..
☘في الحديقه.
فاتن وهي تفطر كانت تراقب في سدره كيف بتشرب من الميه..
وصفيه تشوفلها بقلق..
شربت سدره الميه وحطت الطاسه ع الطاوله..
لحظات..ولون المكان بدي يتغير في عيونها..غمضت عيونها وفتحتهم..الرؤيه ولت ضبابيه..
مررت نظرها عليهم وهما يشوفولها..
وهي في لحظه حست بشي ركب معاها من أسفل رجليها لأعلى راسها بعده ع طول فقدت الوعي..

ناضولها الزوز..وصفيه قربت منها خدت شويه من الميه وقعدت تمسح ع وجهها وهي تقرا في سورة المعوذتين..ودموعها ينزلوا ألما عليها..
فاتن بخوف:خل ندخلوها..
صفيه؛لالا لما تجيها الحاله هادي ماتبيش تقعد في مكان مسكر..ورجعت تقرا عليها.
وفاتن تشوف لسدره بحزن وتتفكر في الحديث اللي دار بينها وبين صابرين من فتره قريبه..
🔺️🔺️🔺️في وقت سابق🔺️🔺️🔺️
صابرين ودموعها ينزلوا..
/لو الواحد قبل ليدير حاجه يضر بيها غيره يعرف قداش حيندم بعدين مادارهاش..واللي درناه اني واختي في حياة هلبه ناس رجع علينا بالأسوأ..اني توا يافاتن نبي نفتك من الثقل اللي حطاته ع صدري نبي نرتاح..رشفت وكملت تقول..اللي ضريتهم قبل ناس تستاهل الأذى لكن سوا طوبى ولا اختها ماضرونا في شي..مايستاهلوش اللي صار فيهم..
فاتن بصدمه..
/مختار يعرف؟
صابرين:يعرف ان نجاة دارت سحر لطوبى بس..
فاتن سكتت وع وجهها باديه ملامح الأسف والوجع..
صابرين مسحت دموعها وقالت..
/حاولي تخبريهم بأي طريقه اني مانقدرش نواجههم وفي نفس الوقت خايفه من مختار..
فاتن شافتلها بضيق وهي ساكته..
صابرين وهي تبكي قالت برجاء..
/بالله عليك..
🔺️🔺️في الوقت الحاضر🔺️🔺️
فاقت سدرة مفجوعه..تمعنت بالنظر في وجه صفيه..
وصفيه تمسح ع وجهها وهي تقول بألم..
/سديرة..
خشت سدره في حضنها وهي ترجف من الخوف..وشويه شويه بدت تبكي وبكائها كان قوي وبوجع..
فاتن معاش تحملت بعده نظرها عنها وهي تمسح ف دموعها.
صفيه بقهر:حسبي الله ونعم الوكيل..غير كان نعرفوا من اللي دار فيها هكي بس..
فاتن تماسكت وقالت..
/مش مهم تعرفوا المهم توا تتعالج ياابله صفيه..
🍃🍃🍃
بعد لحظات هدت سدره..دخلتها صفيه داخل..
وفاتن ركبت طول لصابرين..
****
خشت عليها الدار لقتها مقعمزة ع السرير وتبكي..
فاتن:سمعتيها!؟
صابرين ببكي:ياريتني متت..
فاتن بأسف؛مانبيش نزيدك ع مابيك بس بجد حاسه روحي كارهاتك ومشمئزة منك..
بنبره باكيه؛عندك حق في اي شي تقوليه عليا لكن بالله عليك مانبيهمش يعرفوا..
فاتن؛حتى لو نبي نقول مانقدرش..قلت لمرت عمها ان مختار يعرف المعلومه وقالي عليها بس..
صابرين بقلق:اكيده بيسألوه عليها!
فاتن؛وقتها اني حنتصرف..بس اني جيتك نبي نقولك حاجه وحده..مهما تحاول فيك اختك بش تساعديها في الشر مرة تانيه تفكري اللي قاعده تعيشه هالمسكينه من وراكم تفكري ان ربي حيعاقبكم عليه اشد عقاب..
ومشت طلعت من حداها وخلتها تبكي بألم..وندم شديد..
🍃🍃🍃🍃🍃
وفي ليبيا..تحديدا العاصمه الجريحه..
كانت طوبى تراجي في اتصال من صفيه..
☘صفيه عطتها علم بكل شي وبرغم خوفها من اللي عرفاته الا انها بسرعه دورت ع حل...
زوج زينب صاحبتها كان راقي شرعي لفترة..كلمتها وحكتلها عن حالة اختها كامله...وزينب كلمت زوجها اللي طلب منهم يديروا شي يأكدلهم انها فعلا مسحورة...
وهي طول خبرت صفيه وطلبت منها دير اللي قال عليه..وقعد الامر سر بيناتهم ☘
ويجي اتصال صفيه المنتظر..
ردت طول طوبى وهي تقول .
/السلام عليكم..
"وعليكم السلام"
طوبى بقلق:شن صار؟
"حق يابنتي اختك مسحورة"
طوبى حطت قبضة يدها ع فمها ودموعها ينزلوا..
"لما شربت الميه قعدت شويه واعيه بعدين اغمى عليها ووين فاقت بكت بطريقه تقول في حاجه توجع فيها ولاتحرق فيها لكن ماطولتش وهي تبكي..المهم توا قالتلي ياأمي لما فقت شفت قدامي الدنيا سوداء وفي طلاسم تنكتب بالأصفر قدامي..هكي قالت.."
طوبى بألم:واضحه سحر..بس اني نبي نعرف من اللي دار هكي مني!!؟..كان اللي تعاني منه بدي فيها بعد عرسي الأسود..معناها اللي دار هكي وحده بس مافيش غيرها..نجاة الشيطانه..دارتهولي وسدرة تخطاته عني..خنقتها العبرة وانهارت بالبكي..
وصفيه تبكي معاها..
طوبى ببكي:سنين عمرها عاشتهم وهي تعاني بسببي لعند هاليوم وهي تعاني بسببي اني..
"غير اهدي يابنتي مرات مش هديكا"
طوبى بنبرة بكاء وغضب قالت..
/لاهي..ومختار عرف المعلومه هادي من الحقيرة التانيه اختها صابرين الكلبه مصاحباته..
"كيف!"
طوبى رشفت وقالت..
/ايه ياخالتي الكلبه صابربن صاحبة مختار..لكن والله والله لو تصير في سدرة حاجه لما نسود عيشتهم وربي يشهد عليا اللي عيشوه لسدرة لما نخليهم يعيشوا احرف منه السافلات..
🍃وفم باب الدار كانوا مطيره واريج وفردوس واقفات يسمعوا فيها وهما في حالة صدمة وخوف..
طوبى تمالكت نفسها وقالت..
/راجيني مني اتصال نقولك شن ديري مافيش فرصه احسن من شهر رمضان للعلاج..تو نزيد نسأل ونرد عليك..
"حاضر يابنتي حاضر"
طوبى؛تصير اي حاجه خبريني طول..
"إن شاء الله"
طوبى؛عارفه مانوصيش حريص لكن ردي بالك عليها حاولي ماتفارقيهاش بكل..
"اكيد يابنتي مانقدرش نخليها بروحها بكل"
طوبى مسحت دموعها وقالت..
/السلام عليكم..
"وعليكم السلام"..
نهت طوبى المكالمه وسمعت بعدها الباب يدق..
ناضت ومشت فتحاته وولت قعمزت ع السرير..
خشوا عليها الثلاثه ومطيره تقول بعدم استيعاب..
/شن اللي سمعناه هدا ياطوبى!؟
🍃🍃🍃🍃🍃
"اصرت تجي بروحها.."
مروة؛احسنلك افتكيتي من مشوار طويل..
فايزة بضجر:ماعنديش نيه نخدم الفترة هادي لولا انها معرفة اهل مناسك راني طفشتها..
مروة:معليشي اهو تشغلي روحك شويه بدل هالكساد..
ويجي اتصال لفايزة قامت تليفونها وقالت..
/هي..انزلي استقبليها ماما..
مروة:حاضر..
ومشت للشماعه جنب المدخل خدت منها العبايه والشاربه..
لبستهم وبعدين طلعت من الشقه...
🍃قدام حوش سدره..
درست سيارة واحد من ولافهيمه..
فهيمه تفحصت الشارع كله بعيونها انتهاءا بحوش سدره اللي كان يبان عادي من برا..
ولدها جنبها قال:هو هدا يام ولا؟
فهيمه:بابه قهوي ولا خلاص هو هدا..
وينفتح الباب ..وتطلع مروة لما شافتها فهيمه ابتسمت وفتحت الباب وهي تقول.
/خليك قريب نديرلك رنه ننزل نلقاك..
:حاضر يام..
نزلت من السيارة وسكرت الباب ومشت ناحية مروة..
مروة لما شافتها حست شكلها مألوف وماعرفتش لو كانت مشبهه عليها ولاشايفتها من قبل..
فهيمه وصلت فيها وقالت بإبتسامه..
/السلام عليكم..مساء الخير..
مروة بإبتسامه..
/وعليكم السلام مساء الخيرات..جايه لفايزة الخويلدي؟
فهيمه بإبتسامه:ايه فايزة الخويلدي امك ولا؟
مروة بإبتسامه:ايه امي..تفضلي..
مشت خشت فهيمه وهي تقول..
/يزيد فضلك..
وتخش مروة وراها وتسكر الباب..
🍃🍃🍃🍃
"غير راجي شويه وحده وحده..سدرة توا في حوش مختار؟"
مطيره تسائلت بعدم استيعاب واريج وفردوس عايشين نفس الحاله..
طوبى بضيق..
/ايه..من قبل الحرب بشويه مشالها مختار المركز زيارة..اول مرة يشوفها بعد فاقت..قالت خالتي صفيه لما شافاته ناضت وقفت بروحها..
بدت ع وجوههم ملامح الدهشه..
طوبى:الدكاترة وين شافوا ردة فعلها هادي طلبوا منه يقعد معاها الفترة هادي من علاجها..وهو..تنهدت وكملت تقول..وافق..وقعد يمشي ويجي عليها وساعدها هلبه في العلاج..وبعدين خداها من المركز في سويسرا لحوشه في النمسا وتوا بتكمل علاجها غادي..
فردوس حطت يدها ع راسها وقالت..
/ضغطي رقي مش قادره نستوعب شي من اللي سمعته..سدرة طلعت مسحوره واللي سحرتها الكلبه نجاه..ومختار رفع سدره لحوشه وهي راضيه عادي..
طوبى بضيق:سدره توا مريضه ووضعها النفسي مش مستقر..
فردوس:لكن انتي تعرفي مختار كويس.
طوبى سكتت وهي تفكر في الجمله اللي قالتها فردوس..
مطيره بحمق وغيظ؛عطيها مايسحق جرتها شيطانة الرجيم نجاة هادي..الله لايربحها ولايهنيها ولايخليها تشوف الراحه لأخر عمرها السحارة الوسخه..
اريج ودموعها في عيونها قالت بكره..
/هي والشيطانه التانيه خديجه لولاها هي ماصار شي من هدا كله..
طوبى:هادي بالذات نشوف في اخرتها بعيوني من قبل لتصير..
فردوس:اعوذ بالله منها مافي حد سالم من شرها وخلطت عليها نجاة..
سكتوا شويه وهما يفكروا في كل شي صار معاهم بسبب اصحاب الشر خديجه ونجاه..
بعدين مطيره قالت..
/باهي توا كيف بيصير في سدره؟!...
🍃🍃🍃🍃🍃
"تاكل اللي يجي من يالاك نشوف فيك"
المهدي وهو متمدد ع مندار في دار المعيشه وبنته مقعمزة عند راسه تمسح ع شعره قال..
/والله يام مانكثر حاجه اتنين ماضرش..
مغليه؛ماكله هديكا الشومه كلها دهانات تاكل طريف تنكمد 
تنهد المهدي وقعد ساكت..
سدرة بقلق:خيرك بابا وجعك قلبك؟
ابتسم وهو يشوفلها وقال..
/كيف تبيه يوجعني وانتي حداي؟
ابتسمت سدره وطبست ع جبينه وباساته..
ومغليه تشوفلهم بإبتسامه..
ع خشة سميره قالت..
/هاه ولدي شن حالك توا؟
المهدي:الحمد لله خالتي احسن..
مغليه؛في الجديد تفطر حدانا لكن بروحك..
سميرة:عندها الحق..
مغليه عكرشت وجهها بإزدراء..
وسميره شافتلها بإبتسامه مستفزة وقالت..
/حتى انتي ردي بالك مراة صاحبة ضغط وسلامتك وين تقعمزي ع السفره ماتخلي شي..
مغليه:بالك ناكل من رزقك!؟
سميره بإبتسامه مستفزة..
/اني نحكي لمصلحتك وفي النهايه انتي حرة كيدك ع روحك..
المهدي شاف لبنته وبنته شافتله بقلة حيله .
مغليه:ايوه كيدي ع روحي وانتي فوتي الطروح هادم طاحت موضتهم..
تنهدت سميره بملل وقالت...
/خاشة نتكا شويه سيدا لما تجي الساعه 2نوضيني..
سدرةالمهدي:حاضر..
سميره للمهدي:لاباس عليك مرة تانيه..
ومشت طلعت وهو يرد عليها..
/لايوريك باس.
مغليه:لفعة كبيره..
المهدي:يام معليشي يطفوا الضي بنرقد شويه..
مغليه:نوضي سديره اطفي الضي حتى بنت عمك رقدت..
ناضت سدره وطفت الضي..وولت قعمزت حدا بوها..
وهو رقد ع جنبه الايمن وربع ايديه وغمض عيونه...
🍃🍃🍃🍃
"نوريك شعري تشوفيه قبل"
هادي فهيمه وهي تكلم في فايزة ع اللي تبيه منها..
حولت وشاحها وطلقت شعرها وهي تقول..
/الله يبارك..
هما لما شافوا شعرها تفاجئوا بجماله وطوله وكثافته غير لونه الاشقر اللي زي الذهب..
فايزة:الله يبارك..مفروض مانقولش هكي لكن الحق حرام شعر زي هدا يمسه مقص ولاتقربه صبغه..
فهيمه بإبتسامه..
/تسلمي..حتى بناتي قالولي هكي لكن اني مليت من منظره هدا..
مروة:شن رايك ماما تقصيه طروف؟
فهيمه بإبتسامه:نجيها ياربي..
ابتسمت مروة بخجل وقالت..
/شكرا..
فايزة بإبتسامه؛شن رايك؟
فهيمه:نرد الشيرة ونشوف..
فايزة:ع راحتك....
ناضت مروة وهي تقول؛نستأذن..
ومشت طلعت من الصالون..
فهيمه:بنتي قالتلي عندك بنيه متزوجه
قداش عمرها؟.
فايزة:السنه هادي شهاده ثانويه ماشيه في 18..
فهيمه:معناها ماعندكش مشكله تزوجي وخيتها في عمر صغير؟
فايزة بضحكه مجامله..
/لامروة مازال شويه ع الاقل توصل لسن اختها وفي النهايه تقرر بروحها اختها الكبيره قررت بروحها اني ماجبرتهاش..
فهيمه؛باهي كان خطوبه توا ولاكلمه ووين توصل لعمر اختها العرس ولابعد تطلع من الثانوي!
ضحكت فايزة بإستغراب بدون تعليق .
لمت فهيمه شعرها وقالت..
/خل نكون معاك صريحه..اني جايه نتعرف عليكم  ونبي نخطب منكم..بنتك هادي شفتها في حوش**** بنيه محترمه وعاقله ونويشطه وقنينه اللي يبارك خشت خاطري بعقالتها ورزانتها اللي ماشفتهاش عند بنات جيلها ومانبيش نضيعها من يدي..
فايزة:والله شن بنقولك..حاليا مانبيش نفتح موضوع زي هدا مع بنتي بش مانشغلهاش عن قرايتها سامحيني..
ع خشة مروة بسفرة الضيافه جت بيها لفهيمه وقالت بإبتسامه...
/تفضلي..
تمعنت فهيمه بالنظر في السفره وصواني الموالح..
لاحظت النظافه والتنسيق الحلو..ابتسمت وخدت صونيه وقالت...
/ربي يحفظك حبيبتي..
مروة بإبتسامه..
/تسلمي يارب..والتفتت ومشت لأمها بش تعطيها.
وفايزة تسرق في النظر لفهيمه وهي تفكر الموضوع..
☘قعدت فهيمه لين كلت من ضيافتهم بعدين ناضت روحت وخلت فايزة طايحه في حيره..
🍃🍃🍃🍃
"من فم الباب تقابلك الريحه الحلوة..هديكا الشقيقه زي الطاسه وهما رايحات زي الغزالات..قنانه ع نزاكه..وامها ترتاحي معاها في الكلام مراة بسيطه وعاديه مش رافعه خشمها"
:ياريتني مشيت معاك..
فهيمه:بعدين ناضت طلعت السفيره المقومه الله يبارك ع بنة تطييبهم..
:خلاص يام معاش تزيدي تشوقيني.
سمعوا باب الحوش انفتح وتسكر..
فهيمه بصوت عالي.
/مونا..كانك مونا تعالى..
بنتها قالت بخوف:يارب سترك!
ع خشته هو قال..
/نعم يام..
فهيمه؛قعمز واسمع..
قدم شويه وقعمز ع ركابه وقال..
/نعم..
فهيمه؛قول وين كنت ؟
معين:في القهوة مع الولاد..
فهيمه:ياراس القومبالي نسأل فيك عليا اني قول اني وين كنت؟
عقد حواجبه وقال..
/وين؟
ابتسمت وقالت..
/في حوش البنيه هديكا..
طول صورة مروة جت بين عيونه..حس وكأنه في شي فداخله انتفض..سأل امه وقال..
/من هي البنيه هديكا!؟..
فهيمه تأففت وقالت.
/صاحبة اخت مالك..
جمد في مكانه وهو يشوفلها..
واخته تشوفله بتوتر..
هو بهدوء مخيف..
/شن درتي يام!
امه قالت:غير اهدا سلم ولدي واسمعني قبل..
بعصبيه مفاجئه قال..
/مانبي نسمع شي ماتقولي شي..
اخته بدت تبلع في ريقها من الخوف.
وامه تشوفله برفعة حاجب..
وهو بإنفعال يقول..
/قتلك مانبيش قتلك لا..البنت هادي اصلا قتلك فوتيها..فوتيها..خيرك يام هكي قوليلي بالله عليك!
فهيمه:اهدا اهدا..ماصار شي رسمي راهو هدرزة وخلاص..
معين خبط ايديه ببعض بعدين شاف لاخته وقال..
/نوضي اطلعي.
ناضت اخته طول ومشت بسرعه طلعت من دار المعيشه  وسكرت الباب..
معين بأسف وضيق..
/يام البنت هادي يبيها مالك..
عضت ع شاربها بدهشه بعدين رخاته وقالت..
/وعلاش ماقلتش من الاول!..
مالقاش اجابه ع سؤالها اللي صدمه..قعد يشوفلها وخلاص..
بعدين ناض وهو يقول..
/واهوا قتلك..ومشي بسرعه فتح الباب وطلع..
وامه معاه بعيونها وهي تهز ف راسها بأسف...
🍃🍃🍃
طلع من الحوش وهو مخنوق بكل معنى الكلمه..
ركب الموطو متاعه وشغله وطلع بيه ..
☘قعد يدور بيه في الشوارع بدون هدف..
كان هارب..هارب من كل شي واولهم نفسه..
الموت اهون عليه من اللي قاعد يصير معاه..
وفي النهايه استقر بالموطو متاعه قريب ع البحر وقعد يفكر مع نفسه اللي مالقاش مفر من مواجهتها...
🍃🍃🍃🍃
"الله يعطيك العافيه ياابني ويرزقك ويكرمك "
خدي عبد القيوم المفتاح بإبتسامه وقال..
/بارك الله فيك..ومش كان طلعتوا من الشقه تنسونا..
نبيه بضحكه؛ولو..مابننسى ولاد الاصل لك ابني..
عبد القيوم بإبتسامه..
/تسلم وربي يطول في عمرك..وبالله كان احتجتوا اي شي كلموني ع طول..
نبيه بإبتسامه؛تسلم الله يحفظك يابني...بالإذن..
عبد القيوم؛في امان الله..
نبيه رفع يده وقال؛بخاطرك..ومشي لسيارته اللي كانت عيلته راكبه فيها..
عيون سلافه مافارقوش عبد القيوم كان حاسه بضيق شديد لأنه حيبعد مرة تانيه ومعاش تشوفه كل زي قبل لما يجي تحت العمارة وياخد منهم في الفطور..
هو مشي ركب سيارته..وهي مازال تلحق فيه بنظرها واختها مركزه عليها..
ومجرد مابدي يختفي من قدام عيونها تعبوا دموع...
🍃اما هو بعد ماتحركوا..تحرك طول ووجهته شارع الحبايب..
🍃🍃🍃🍃
حبيبة القلب اللي كملت باقي هديكا الليله وهي منعزله عن الكل حتى عن بنتها..
تصلي وتبكي وتدعي لأختها من أعماق قلبها الموجوع عليها..وجعه وجع الشعور بالذنب اتجاهها اللي عمره مافارقها..
🍀اما سدرة في هديكا الليله..
كانت تفكر في حالتها..لازم زي ماقاومت مرضها تقاوم السحر وتنتصر عليه وطلعه
🍃ومرت عمها جنبها تفكر كيف طلعها من المكان اللي فيه صابرين..ع بالها انها لو تعرف كل شي ممكن تقول لأختها وأختها تاذي طوبى...
🍀🍀🍀🍀🍀
ويعدوا يومين...وطوبى قاعده في حالة انعزالها بالصمت..
تعول معاهم..تهتم ببنتها..لكن مجرد ماتفضى تختلي بنفسها مع الله سبحانه وتعالى..تحكي وتبكي وتدعي..
وحال اللي حواليها مش خير من حالها...
🍃ومعين ماكانش خير منهم حالا حتى هو..من هداكا اليوم معاش روح للحوش..
امه اللي عرفت مافيه مابتش تكلمه..لكن قاعده تسأل في خوته عن حاله وهما يطمنوا فيها انه كل يوم يفطر عن واحد منهم..
ماحد فيهم عرف اللي صاير بينه وبين امهم بالزبط لكن كلهم عارفين السبب..
🍃مالك بصدمه:شني!!
معين:اللي سمعته..
شد ذراعه وقال؛شن جاك! قبل قتلي مستحيل تخش فيها الحرب هادي!
معين:غيرت رايي..
مالك:زيد فكر ياراجل..الحرب هادي مش ساهله وكل يوم ترفع ساد خوتك فيها بتلحقهم حتى انت!؟
معين تنهد وقال..
/ماتعبش روحك ياصاحبي اني قررت ومعاش مولي في قراري خلاص..
رخي مالك يده وهو يشوفله بخوف وألم..
شد معين ذراعه وقاله..
/اني بنتسقد غدوة..وقبل لنمشي بنوصيك ع امي كان صار فيا شي خود مكاني..
لمعوا عيون مالك بالدموع وهو يسمع فيه..
زاد شد ع ذراعه وقال بإبتسامه وهو عاقد حواجبه..
/وماتسلمش..فاهم عليا!؟
مالك ضمه بقوة..
وهو حط يده ع ظهره وقال بإبتسامه..
/اشحط روحك خليك راجل..
تباعد عنه مالك وهو شاد دموعه بقوة وقاله..
/ربي يردك سالم مانتحملش فراقك انت بالذات..
طبطب معين ع ذراعه وهو مبتسم وقاله..
/ربي معاك...
ورخاه ولف ومشي بسرعه وهو يسمع في مالك يقوله..
"نراجي فيك"..
ابتسم معين بألم..وركب الموطو متاعه وشغله وتحرك طول..
وعيون مالك معاه..
طلعوا صحابهم من القهوة وهما يشوفوا وين مايشبح..
واحد منهم قال؛بيحارب ولا..
هز مالك راسه بإيجاب..
بدت ع وجوههم ع الضيق وكلهم مع بعض طبطبوا ع مالك لأنهم عارفين قوة صحبتهم اللي مخليتهم خوت مش بس صحاب...
🍃وهالصداقه القويه هادي هي اللي خلت معين يهرب للموت...
🍃🍃🍃🍃🍃
"علاش؟!"
صفيه:مانبيش نقعدوا في مكان واحد مع اللي اسمها صابرين هادي..
مختار:السبب؟
صفيه:السبب اننا عرفنا اللي صاير لسدره..سحر داراته اختها الشيطانه..
مختار عقد حواجبه وقال..
/كيف عرفتوا؟
صفيه:الاعراض اللي طالعه ع سدره لما سألنا عنها طلعت اعراض سحر واللي صار لسدره صار بعد عرس طوبى بالزبط..يعني اللي دار هكي لسدره كان ناوي طوبى في الاصل غير تخطاته هي..مافي حد تاني عنده سبب يخليه  يدير في سدرة هكي بكل..
مختار:هدا كله مجرد توقع وشك ..
صفيه:حتى لو كان شك الواحد لازم احتياطه..
سكت مختار وهو يفكر..حس ان صفيه تتكلم وهي متيقنه مش مجرد شك..
وهي مابتش تصارحه بأن فاتن اللي خبراته بش ماتصيرش مشاكل بيناتهم..
تنهد وقال:انتم تقعدوا وهي تطلع..تو ندورلها وين تقعد..
صفيه:كويس..وفي حاجه تانيه..سدرة توا لازم تتعالج والعلاج ماينفعش هني؟
مختار بإستغراب؛مالا وين؟!!
🍃🍃🍃🍃🍃
"في السعوديه"
المحجوب بتهكم؛من بيرفعها غادي! مختار!؟
طوبى:حيرفعها صدقني..
المحجوب:علاش متأكده هكي!
طوبى بإبتسامه اسف..
/لأني نعرفه كويس..
سكت المحجوب وهو يفكر في كلامها..
طوبى بقلق؛إن شاء الله تقدر تتحمل..
المحجوب:باهي مايقدروش يعرفوا من دار فيها هكي!؟
طوبى:لا مايقدروش..
المحجوب:اللي نعرفه انه ممكن يتجدد يعني اللي دار فيها هكي لو عرف انها تتعالج يجدده..
طوبى:كان تعالجت حتاخد مناعه..
المحجوب بإستغراب:مناعه!؟
طوبى:ايه..
المحجوب:تمام..باهي توا مرتبين اموركم يعني كان سفرها للسعوديه بيقعدوا يدوروا ولاكيف!؟
طوبى:الابله اللي قتلك عليها راجلها سافر للسعوديه من يومين عن طريق تونس بيكمل رمضان غادي..قال انه يعرف حد يساعدها غادي..
المحجوب برفعة حواجب..
/اني لتوا مش متخيل ان مختار بيدير هدا كله..
ضحكت طوبى ومابتش تعلق ع كلامه بعدين قالت..
/برا لحق ع القهوة والمعمول تلقى حسين مسحه كله .
ضحك بعدين قال..
/ماشي..غير بنوصيك خبريني باللي يصير اول بأول..
طوبى بإبتسامه..
/حاضر..
ومشي المحجوب متوجه للمربوعه وهي تشوفله وفي لحظه خطر عليها شي خلاها تناديه..
هو التفتلها طول..
مشتله وقالت..
/بنقولك حاجه ومانبيكش تفهم غلط..
المحجوب:قولي..
طوبى:ياريت ماتخبر نبيله بشي بالذات حكايه ان سدرة قاعده عند مختار..
عقد حواجبه وقال..
/ماتبيش خوها يعرف..
سكتت طوبى وهي مضايقه..
المحجوب:اني لاحظت الحاج علي موطي عليه العين وشبه فهمت علاش وانتي توا اكدتيلي..
طوبى:مش عارفه شن نقولك..بس مرات الغلط منا حني اللي خليناه يدخل في مشاكلنا في النهايه يقعد نسيب..
المحجوب تنهد وقال..
/حاضر مش حيطلع مني شي..
هزت طوبى راسها بصمت..
وهو لف ومشي للمربوعه وكان مستاء ع الآخر...
🍃🍃🍃
والإنسان بيده يقدر يرفع قدره بين الناس وهو الوحيد اللي يقدر ينزله..وهو بس اللي يقدر يكبر مكانته في قلوب ناسه وهو كذلك اللي يقدر يقللها..
كلمة في لحظه غضب خسرت رؤوف هلبه وخلت اهل زوجته ينزلوه من مكانة الإبن للنسيب...
وهو واقف يراجي في مرته حدا سيارته كان يشوف في الحاج علي كيف واقف ع حسين والتارقي وواضح انه يكلم فيهم في موضوع مهم..
🍃عبد القيوم:هو خير وخير لو تعالجت غادي المهم تقدر عليه  لأنه حيكون متعب..
علي:هي توا حالها خير من قبل كيف مايحكوا عنها انطلقت في الكلام وولت تاكل وتشرب عادي..
عبد القيوم؛كويس..
حسين تنهد وقال..
/إن شاء الله خير..اني توا متسقد ادعولنا..وقدم لجده وباس راسه..
علي:ربي يحفظكم..
عبد القيوم:في وديعة الله..
رفع يده ومشي لسيارته العسكريه..فات من جنب سيارته عبد الرؤوف وحياه وعبد الرؤوف ردله التحيه..
ع طلعة غرفه ركبت للسيارة والتفت للكرسي الخلفي لقت صغارها راقدين..
عبد الرؤوف ابتسم وقال..
/لعبوا مع حسين لين داخو ورقدوا..
غرفه ابتسمت بصمت..
هو تنهد بعدين تحرك بالسيارة لحوشهم..
وحسين تحرك بعدهم وطلع من الشارع...

#مراد_قلبي
#طوبى

...يتبع....