ကိုယ် မင်းကို ဘယ်လိုဖွင့်ပြောရမလဲ (IQ Team ကစာစဥ်တစ်ခုပါ) (Completed)

53 - 54

စာကိုမြင်လိုက်သည့်အခါ ဟွမ်မိန်ရွှမ်၏ နှလုံးသားတစ်ခုလုံး နွေးထွေးသွားတော့သည်။ ကျိမြန်၏ ခံစားချက်တို့မှာမူ သူမနှင့် ဆန့်ကျင်ဘက်ပင်။ သူက လင်းလဲ့ယန်ကို စကားတစ်ခွန်းမှ မပြောဘဲ မြေအောက်ကားပါကင်အထိ မျက်နှာ ရှစ်ခေါက်ချိုးဖြင့် ဆွဲခေါ်လာလိုက်သည်။ ဤအဆောက်အဦးမှာ တင်းကျန်းခိုင်၏ အပိုင်ဖြစ်ကာ အနုပညာလောကသားများကို ဖျော်ဖြေရန် တည်ဆောက်ထားခြင်းဖြစ်သည့်အတွက် လုံခြုံရေး တင်းကြပ်လွန်း၍သာ တော်သေးသည်။ မဟုတ်ပါလျှင် မနက်ဖြန်မနက်ခင်းတွင် သူတို့နှစ်ယောက်အကြောင်း သတင်းစာခေါင်းကြီးပိုင်း၌ ပါလာတော့မည်ဖြစ်သည်။

အနောက်မှ တိတ်တဆိတ်လိုက်လာသော ချိန်ဖမ်းရှင်းမှာလည်း သူ့ဘော့စ်ကို တွေ့လိုက်ရသည့်အခါ သူတို့နှစ်ဦးကြားရှိ လေထုမှာ မူမမှန်ကြောင်း သတိထားလိုက်မိသော်လည်း အကြောင်းပြချက်ကိုတော့ မမှန်းဆနိုင်ချေ။ ရင်းရင်းနှီးနှီး မျက်နှာချိုသွေးလိုဟန်ဖြင့် ကျိမြန်၏ အင်္ကျီစကို လှမ်းဆွဲလိုက်သည့် လင်းလဲ့ယန်မှာ သူဌေးနှင့် ဝန်ထမ်းအကြား ဆက်ဆံရေးနှင့် မတူဘဲ ရန်ဖြစ်နေသည့် စုံတွဲနှင့်ပင် တူနေသေးသည်။

အကျိုးနည်း .. ဖြစ်နိုင်ပါ့မလား ...

အလွန်အမင်း ထိတ်လန့်နေစဉ်မှာပင် ကျိမြန်၏ စကားသံကို ကြားလိုက်ရသည်။

"မင်း အရင်ပြန်နှင့်လိုက် လင်းလဲ့ယန်ကို ငါ လိုက်ပို့လိုက်မယ် ..."

"ဟုတ်ကဲ့ပါ ကျိကော ..."

ချိန်ဖမ်းရှင်းက သဘောတူလိုက်သည်။ သူ့အာရုံတို့ ပြန်ကပ်လာသည့်အချိန်တွင် ရုပ်ဖျက်ထားသော SUV ကားမှာ ထွက်သွားနှင့်နေပြီဖြစ်သည်။

ကျိမြန်မှာ အသံတိတ်နေဆဲဖြစ်သည့်အတွက် လင်းလဲ့ယန်တစ်ယောက် နေမထိထိုင်မသာ ဖြစ်လာတော့သည်။ လမ်းမထက်မှ နီယွန်မီးသီးများကိုသာ စိုက်ကြည့်နေရင်း အံ့ဩတကြီး မေးလိုက်၏။

"ကျိကော ဘယ်လိုလုပ် အဲဒီ့ကို ရောက်လာတာလဲ ကျွန်တော့်ကို လာကြိုဖို့ သီးသန့်ပဲလား ..."

ကျိမြန်ကမူ အသံတိတ်နေဆဲပင်။ သူ့မျက်ဝန်းတို့ကအစ တုန့်ပြန်မလာခဲ့။