#طوبى "جنة طوبى"
#جمان_فريد
#الجزء_الخامس_والتسعين"مراد قلبي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الأذكار
”البسُوا مِعطَف الأذكار لِيقيكم شُرور الإنس والجَان، ودثِّروا أرواحَكُم بالإستغفار لتمحي لكُم ذُنوب اللَّيل والنَّهار، وإن أصابكم ما تَكرهونه فسترضون وتتيقَّنون بأنَّه خير قدَّره لكم ربّكم لأنَّكم قد تحصَّنتُم باللّٰه
-ابن الكثير
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 - وَصفَ ضِحكتها فقال:
الأمر أشبه بِمجموعةِ أطفال صِغار يَركضون نَحوي و يدايَ لا تتسعان لِ ضَمّهم جَميعاً....🍃
__________________________________________
وفي نص الليل..
حدا بعض ع الارض راقدات..
اريج في النص وطوبى وآلاء حواليها ضامينها بإيديهم الزوز..
هالنومه جت بعد حكاوي وشكاوي وألم ودموع..
رقدوا وقلوبهم مفطورة من الألم..
🌼بس في ساهر الليل من الحب..
التارقي اللي ملمش وهو يكتب في اسمها بكل انواع الخطوط..
هالمرة بالخط "النستعليق" الفارسي..
يكتب ويتفكر في اللقاء اللي صار ع بابها..هما لحظات تمناهم قعدوا العمر كله...
🍃وفي من ساهر الليل حتى هو من الحب..
بس حب يسمو ويعلى فوق كل حب..
نضال اللي بدي عايش حاله حب جديد حس نفسه بيها قاعد يعلى..ويتطهر..ويرقى..حس فيها انه انسان بكل معنى الكلمه..
كان ع موعد مع المحبوب الأعلى..صلاله..وألح بطلب غفرانه وعفوه..
وبعد كمل..رجع لكتاب روضة المحبين اللي قرب يكمله وزاد عنده الشغف والشوق لقراية باقي كتب ابن القيم...
🍂🍂🍂🍂🍂🍂
وبعيد عنهم..
في سويسرا..رجع مختار لأخته ومرته عمه اللي كانوا هالمرة يراجوا فيه..
وطول خداهم وطلع بيهم من المركز وبطريقهم للنمسا..
🍃🍃🍃🍃
صفيه؛زينا حني وتونس ومصر ع يمينا ويسارنا..
مختار بضحكه؛لالا في فرق كبير..فرق في الحدود كيف شكلها وحتى في القرب..في مكان غادي في النمسا مدينه هي توقفي ع جسر تشوفي قدامك سويسرا والمانيا..
صفيه:سبحان الله..
مختار؛اني عشت 5سنين في المانيا بدايه شغلي كانت غادي..تعلمت لغه..وتعلمت هلبه حاجات تانيه اهمها طباع الألمان وطريقة تفكيرهم..السنتين الاخيرات بس انتقلت لنمسا الوضع فيها مازال احسن..
صفيه:انت متعلم تدوي بالانجليزي..
مختار بإبتسامه؛ ايه..لازم نتعلمها لاني شغلي مش بس مع العرب اكثريته مع الغرب..ولما تزوجت فاتن عشت مايقارب السنه في اسكتلندا..
...وهو يحكي عن نفسه وسدرة كانت تسمع في حديثه اللي كان يرد فيها للماضي البعيد..
🍂🍂🍂🍂قبل سنوات🍂🍂🍂🍂
في يوم صيفي كانوا مقعمزين ع ارضية الصاله اللي كانت عريانه...ياكلوا في جلوف الدلاع "البطيخ"..
وهو يحكي وهي وفردوس يسمعوا..
مختار:وفي الاخير ولى رجل اعمال يدور العالم كله ويربح في صفقات بالدولار..
فردوس:كلها دوة افلام خياليه..
مختار:لالا مش هكي..هادي قصه حقانيه..
فردوس:كيف هكي يولي غني وعنده فلوس بسرعه هكي!
مختار؛قتلك سافر برا بلادهم ولقي ناس ساعدوه..
سدرة:باهي وبعدين رجع لحوشهم؟
مختار:ايه..وولوا كلهم اغنياء زيه..
فردوس بضحكه؛دير زيه بش نولوا اغنياء حتى حني..
سدرة بخوف:لالا مانبيش مختار يخلينا..
مختار بضحكه؛نرفعك معاي.
سدره:وبوي وامي؟
مختار:بعدين لما نولي غني نوليلهم..وضحك..
فردوس:صدقتي حتى انتي يامهبوله!؟
مختار:وعلاش ماتصدقش مرات نديرها..
سدرة؛لالا..تقعد هني معانا ماتمشيش لولا مكان..
ضحك وقعد ياكل الدلاع..
وسدرة تشوفله بنظره فيها خوف وزعل..
🍂🍂🍂وفي الحاضر...
مسحت سدرة دمعتها اللي هربت من عينها وقعدت مركزه ع بنظرها ع روشن السياره تتفرج ع المناظر الحلوة اللي تقابلهم في الطريق..
🍃وبعد ماقطعوا مسافه قصرتها الهدرزة والتمتع بالمناظر الخلابه..سواء كانت من صنع الله او خلقه..
وصلوا للمدينه اللي يسكن فيها مختار..
صفيه كانت مبهورة طول الوقت ومش مصدقه اللي يشوفوا فيه عيونها..
اما سدرة ع قد ماعجبها المكان ع قد ماحست بضيق لما خشتله..
🍃في الفيلا..
فاتن؛جميله بشكل ياامينه وعندها هيبه حتى وهي ع الكرسي المتحرك..
امينه بحماس؛متشوقه اشوفها قوي..
ويرن جرس الفيلا..
فاتن؛اهو جو..
مشت امينه بسرعه للباب..وصلت فيه وفتحاته..
وعيونها يجو طول ع سدره..
شافت وصف فاتن واكثر..ابتسمت وقال..
/حمد لله ع السلامه..
مختار بإبتسامه:الله يسلمك..هيا خشوا..
خشت سدره بالكرسي وصفيه معاها وهي تتفرج ع الفيلا..
ع جية فاتن وهي تقول..
/ياهلا ياهلا..حمد لله ع السلامه..
وصلت فيهم..طبست على سدرة وسلمت عليها بالخد..وبعدين سلمت ع صفيه بنفس الطريقه..
وتفجع سدره وصفيه لما تسلم ع مختار بالخد حتى هو..
قبل كانت تجي معاه للمركز..وقدامهم ماصارش اي تقارب من اي نوع..
شافتلهم وقالت..
/نورتوا..
صفيه وهي مبتسمه بإرتباك..
/بوجودك..
وسدرة تشوف لخوها من فوق لتحت..
رفع حاجبه بعدين عقدهم الزوز واشر ع امينه وهو يقول..
/امينه..الكل في الكل هني من غيرها نضيعوا..
ضحكت بإحراج وقالت..
/ماتبالغش بقا ياأستاذ..
فاتن؛ماقال الا الحق..
هي بإبتسامه:متشكره قوي لذوق حضرتك..
صفيه وسدره شافولها بإبتسامه..
مختار؛الغدي واتي؟
امينه؛ايوه تتغدوا دلوقتي!؟
مختار:وبسرعه..شاف لأخته ومرت عمه وقال..تفضلوا..
حركت سدرة الكرسي وهما مشوا معاها للصالون..
وامينه مشت تجهز في الغدي...
🍃لحظه..صابرين!...صابرين وين!؟
صابرين في مركز تجميل مشهور في المدينه تتجهز للليله..
الليله حفلة خطوبتها هي وايهم..
🍂ونار تاكل في رضا..نار حب انولد في الوقت الغلط..وبيئه غلط..مافيش امل انه يعيش ويطول..
حاول ع قد مايقدر يتعايش مع الواقع بس حبه الشديد لصابرين كان غالبه..
ماحاولش معاها..لأنه خاف ترد عليه رد يزيد يكسره اكثر ماكسراته بموافقتها ع الارتباط بغيره وهي اللي كانت تقول اعتزلت الرجاله لأخر عمري..!
🍃🍃🍃🍃🍃
اليوم الموسم..اخر يوم في شهر شعبان..
القتال مازال مستمر..والصراع كان ع المناطق اللي رجعها طرف وخسرها الاخر بعد ماكان كاسبها..
رمضان..عاشوراء..عيد..حالفين مايطفوا نار الحرب كرامة لأي شي...لا لدم ولا لأيام مباركه...
🍃وفهيمه واقفه في جنان حوشها تسقي في شجيراتها وتسمع في اصوات الضرب البعيده عنهم وهي تردد
/لاحول ولاقوة الابالله..لاحول ولاقوة الابالله..
مشت بطوبو الميه..حطاته تحت وحده من الشجرات..
وقدمت للمستراح اللي مقعمزات فيه كناينها وبناتها المتزوجات وبنتها الصغيره وع هدرزة وضحك وتعليقات ع الحرب واللي صاير فيها..ولاكأن عندهم فيها حد..ولاتليعوا منها زمان..
هالبرود والقوة اكتسبوها من هي اللي قررت تقعد متماسكه وواقفه ع رجليها ع خاطر عيلتها مهما صار..
وقفت عليهم وقالت..
فهيمه؛مانعرفش وحده غدوة ترقدلي للعصر..كلكم من 12 نشوفوكم واقفات قدامي..
كنتها الكبيره؛حاضر اللاي..
🍃في نفس الوقت..
ينفتح باب الحوش الخارجي..
ويخشوا ولادها الاربعه..
منهم زوز كانوا في جبهة القتال جو بش يفطروا مع امهم اول يوم رمضان..
الزوز كانوا لابسين عكسري..
واحد حاط ع كتفه كلاشن والتاني ماباش يدخل مع سلاحه..
كانوا يحكوا مع بعض ويبصروا ع بعض ويضحكوا..
لين وصلوا للباب اللي يطلع للجنان..
واحد من الصغار شافهم وقال بفرح..
"بابا".
وامه فزت من مكانها ومشت تشوف من يكلم ويجي قدام راجلها اللي كانت مشتاقتله موت..
وسلفتها حتى سمعت صغارها ينادوا ع بوهم..فرحت من قبلها بس قعدت في مكانها خجلا من عزوزتها اللي كانت تشوف في ولادها وهو يسلموا ع صغارهم بإبتسامه فخر...
☘خوت معين كلهم تزوجوا عن حب..بدون علاقه..
واحد خدي بنت جيرانهم..والتاني بنت خالته..والتالت وحده تخدم معاه عجباته وخشت قلبه خطبها طول وعرف بعدين انها تبادله نفس الشعور..
وكلهم تزوجوا في عمر 24عام..
حتى الكبير المتوفي كان واخد صاحبة اخته اللي حبها حب كبير ياما حكوا بيه..وبعد موته اللي ليه 6سنوات تفرغت لصغارها ورفضت تتزوج بعده ع قد ماجوها..☘
:امي..
فتحت ايديها وقالت..
/تعالوا جريواتي تعالوا..
ضحكوا لما سمعوها شن قالت..ومعين حرك راسه يمين ويسار بعدم رضا..
ضمتهم الزوز..وكبوا ع راسها..
فهيمه؛تبوسوا ع الكعبه وربي يرضا عليكم دنيا واخره..ايه خبرونا شن الوضع..لاامتى بتقعدوا تتعاركوا هكي!..
:خليني ساكت يام..
فهيمه؛احسن..الدوة في المواضيع هادي تحرقلي فدمي..مانبي نقول غير ربي يحزها قريب ويريحنا وتروحوا لعويلتكم بخير وسلامه..
الزوز قالوا..
"امين..ان شاء الله يام"
فهيمه؛ان شاء الله ان شاء الله..نبي ندير عرس ونفرح نبي نقلب الشارع كله..حتى هو عرس مونا..
كلهم وجهوا انظارهم ليه..
هو مرر نظره عليهم وقال..
/شن تشبحولي هكي!امي تدوي عن احلامها بس..
فهيمه؛واللي عطاك ياولدي الا واقع وحقيقه باهي..
:تي فهمونا ياعيله خطبتوله ولاشنو؟
فهيمه؛قريب ان شاء الله..
معين؛احلمي كان الحلم بالبلاش..
فنصوا فيه خوته..
معين بعصبيه:طلع الواحد عن طوره...
فهيمه:توا لما تتزوج تهدا وتعقل..
هو شافلها شويه بعدين مشي لخوه اللي شاد سلاح..خداه منه..
خوه قال متعجبا:شن بدير!؟؟
وكلهم يشوفوله كيف تباعد عنهم ووقف في مكانه وبدي يرمي في الرصاص فوق..
ناضوا وقفوا خواته ونساوين خوته وهما مفجوعات..
والصغار خشوا يجروا..
وخوته يصيحوا عليه..
"بطل ياراجل..الصغار ياهوو"
وقف ضرب..وشاف لأمه بتحدي..
التفت الولد صاحب السلاح لأمه وقال..
/فوتيه يام لاجعنه تزوج..
هي قالت؛ترا حولوا من قدامي..
تباعدوا عن طريقها وهي مشت بإتجاهه وكلهم يتفرجوا..
وصلت فيه وهي تشوفله بحزم..جبدت منه السلاح..
ورفعت الفوهه متاعه فوق..
كلهم نساوين ورجاله حتى اللي كانوا في الجبهه خشوا يجروا..
هي تباعدت عن معين شويه وبدت تضرب وعيونها في ولدها بتحدي وهو يبادل فيها نفس النظرات..
ضربت بعدد الطلقات اللي ضربهم ووقفت ونزلت السلاح..
جاهم صوت خوه صاحب السلاح وهو يقول..
"تي اسمع الكلام وتزوج ياراجل والله الزواج حاجه باهيه الله"
رد عليه معين..
/تزوج انت..وعطي لأمه نظره تحدي اخيره ولف ومشي..
هي حركت راسها يمين ويسار بعدم رضا..
🍃وولادها وهما داخل قالوا..
:الله يرحمك يابوي من نهار علمها بالسلاح معاش مشينا القدام..
:علمها بش تحامي ع روحها والنساوين بيه تسلطت علينا حني..
"اطلعوا اطلعوا"..طول طلعوا كلهم مع بعض...
لوحت السلاح لولدها وتلقاه وقالت..
/المغرب قريب خل نخش نتوضا..وانتم ابدوا بالعشي..
ومشت خشت داخل...
واحد من الاولاد قال؛شن القصه فهمونا!؟
اخته الصغيره بضحكه..
/تو نحكيلكم...
🍃🍃🍃🍃🍃
واقف قدام القهوة..
حاط تليفونه ع وذنه بعد مااجرى اتصال..ويرد عليه اللي اتصل بيه..
"ملوكه"
مالك بضحكه ودموعه في عيونه.
/فوزيشن قلبي..شن جو..
سمع صوت بكاها تمالك نفسه وقال..
/نسكر يام!..
"لالا ماتسكرش اهو سكتت..قولي شن حالك وحال نسوكه وخوتك وخواتك كلهم"
مالك؛الحمد لله يام كلنا كويسين وامورنا تمام..مازن قعد معانا في الحوش ومرته مونسه مناسك..
"باهي الحمد لله...مناسك شن تقول عليا!؟"
مالك:مافي حد يقول عليك في شي يذمك كلهم عاذرينك صدقيني..
"الله غالب والله لو بيدي مانخليكم لكن"
ورجعت تبكي مرة تانيه..
مالك بإبتسامة حزن..
/والله فاهم عليك مش لازم تبرري يام..المهم اني كلمتك بش نطمن عليك انتي شن دايرة..
"الحمد لله ولدي عايشه.."
مالك؛امي كان احتجتي اي شي بالله عليك كلميني طول..
"تسلم ياربي..ربي مايحرمني منك ياغالي..باهي قول امك دورتكم"
ضحك سخريه وقال.
/ولاتندري علينا..هي مشكلتها كانت معاك انتي بالذات وتوا بعد مشيتي خلاص ماعندهاش مصلحه معانا..
"لاحول ولاقوة الا بالله..باهي مروة قاعدة مع مناسك؟"
ابتسم من قلبه وقال..
/صحبتهم زادت تقوت..
"والله عرفتها هالبنيه طيبه وقلبها كبير"
سكت وهو مبتسم بحسره وقلبه موجوع..
"ربي يريح بالك ياولدي"
مالك بإبتسامه:آمين ياغلاي..هي مالا يام بنسكر توا..كلمينا مرة مرة
"حاضر حبيبي"
مالك؛كل سنة وانتي طيبه..
بنبرة مخنوقه قالت..
"كل عام وانتم بخير..بالسلامه"..
ونهت المكالمه..
شد دموعه بقوة بعدين خدي نفس..وولى خش للمقهى..
🍃🍃🍃🍃🍃🍃
"مراة راقيه ومحترمه هلبه ولامرة ادخلت فينا ولا سألت ع شي يخصنا حتى لما نجوا بنطلعوا مرات لين نحلفوا عليها بش تمشي معانا"
طوبى:من الاول واضحه حتى في طريقة قلبها
اريج:صح مريحه وتخش القلب..
فردوس:الحمد لله..باهي وعزيز شن دايره معاه؟
آلاء:الحمد لله مراعيني ومراعياته..
☘مابتش توصف شكل حياتها بأكثر من هكي مراعاة لوضع اختها فردوس:الحمد لله..
مطيره:المهم خديتي ع الغربه..
آلاء:كيف باديه ناخد عليها..
سكتوا شويه بعدين امها قالت..
/ماطولوش هني اكثر من اسبوع..
اريج؛صح..الوضع من سيء لأسوأ..
الاء بضيق:حسبنا الله وخلاص..شافت لغرفه لقتها سرحانه ومش معاهم...من الصبح وهي ملاحظه عليها الضيق والكآبه..ساكته اغلب الوقت ويدوب تعاني في صغارها..
غيرت نظرها لطوبى لقتها تشوفلها..
اشرتلها بعيونها "شن في"
طوبى اشرت ع البنصر متاع يدها اليسار..بعدين عقدت صوابع السبابه في بعض..
ضمت آلاء شفايفها لداخل بأسف ورجعت شافت لغرفه..
🍃وقلب غرفه..في الحوش بروحه..
راقد ع السرير وهو موجه نظره للسقف..
حاط رجليه ع بعض..ومشبك صوابع ايديه اللي حاطهم ع صدره..
وسرحان في همومه...هم وضع البلاد..وهم فراق صديق المقرب..وهم بعده عن غرفه وصغارهم..
كان حاس بالإحتياج الشديد ليها..كان يبيها تكون حواليه حتى لو قعدت زعلانه منه..
المشاعر اللي حاسهم توا..فكروه بحالته ع أيام المبروك لما اختفت غرفه اللي كانت بإسم "ميسم" من حياته فجأه..
وحشه..وضيق..والدنيا كلها معاش تسوى في عيونه شي..
تأكد وقتها بس..انه حبه لغرفه تحول لعشق خلاها تسري في دمه..
تنهد بألم وغمض عيونه...
🍃🍃🍃🍃🍃
وبعيد عن ليبيا...
كانت في قلوب مجروحه وموجوعه وتعاني الامرين من الحب..والحب لما يكون عقاب للمحبين مافيش اقوى من عذابه...
وسط قاعه كبيره في احد الفنادق المشهورة في النمسا..
كانت حفلة خطوبة ايهم وصابرين..
الحضور محدود..وكان من ضمنهم ناس ليها مركزها ووزنها..
يعني حفله منظمه جدا وراقيه..
خلت صفيه تحس روحها عايشه في عالم تاني..
بينما سدرة ماكان في شي عاجبها..بس اختارت تجي بش تعرف اكثر عن عالم خوها وحياته..
طلبت بلبس محتشم وبحجابتها ومش مدايره في وجهها ولاحاجه..لكن كانت ملفته للإنتباه بتميزها عن الموجودين.
وزي ماقالت فاتن حتى وهي ع الكرسي المتحرك قاعده بهيبتها..
🍃من بعيد ع طاوله وحده واقفين ياسمين وامها وفاتن يحكوا عنها..
ياسمين؛جميله جدا..مش عارفه علاش فكرتني بالعراقيات..
فاتن بضحكه:صح جمالها يشبههم..
ام ياسمين:لكن يوجع حالها ان شاء الله تشفى بسرعه وترجع توقف ع رجليها..
فاتن:إن شاء الله..
ياسمين غيرت نظرها عن سدره حي ع خالها اللي كيف خش..
ابتسمت من قلبها وقالت..
/ياعمري ايهومي..
التفتوا شافوه يسلم ع ناس من المعازيم وكان واضح عليه انه فرحان ومتحمس..
اخته قالت:مش عارفه صابرين شن درتله خدت قلبه وعقله..
فاتن:صابرين جميله ونعومه..
ياسمين بإبتسامه:صح وتنحب..
فاتن ابتسمت بضيق وقعدت دور بنظرها ع رضا اللي كان مختفي..لين جو عيونها ع امينه..
امينه شافتلها بضيق..وفاتن بادلتها نفس النظره بعدين رجعت نظرها لأيهم..
🍃قدام الفندق..
كان رضا بكامل اناقته اللي طلعاته احلى من مكان يوم خطوبته اكثر جاذبيه..
كان واقف ياخد في النفس ويطلع فيه بش يهدا ..
كان يبي يتقبل..يبي قلبه غصب عنه يتقبل..
🍃وهي داخل..
واقف عليها مختار يكلم فيها..
مختار:جميلة الجميلات..
ابتسمت مجامله..
تنهد وقال..
/عمري ماكنت معاك صادق وصريح زي حنكون معاك توا..
هكي..اصلحلك..هكي احسنلك..رفع حواجبه وقال..تمام!؟
حست صابرين انه يرمي في الكلام ع قصتها مع رضا..
خافت لحظتها..خافت هلبه..
مدلها ذراعه وقال..
/هيا خل نرفعك لخطيبك..
خدت نفس..وتعنقت ذراعه..
ابتسم ومشي بيها...
🍃وتطل ع الحضور بفستانها السماوي المحتشم والجميل فصلت تفصيل عند دار ازياء شهيره..وشرطت يكون محتشم مايبانش من جسمها شي الا رقبتها..كان نظامه ضابط لعند اسفل الرجلين يكون واسع شويه..تسريحتها ومكياجها غير مبالغ فيهم كانت طالعه ناعمه زي ماايهم تمناها تكون...
ولما شافوها عيونه قلب فر فران عليها..
🍃لكن هو لما جي خاش وشافها..حس بقلبه انخلع من مكانه..
عيونه بنظراتهم اللي كلها الم وصدمه وانبهار في نفس الوقت يلحقوا فيها...
كان متمني وقتها لو يصير اي شي ومايخليهاش توصل في ايهم..
رغبة في قتل ايهم وقتها كانت قويه بس ماعنداش القدره ينفذها..
ويشوفها وصلت فيه..ومختار سلمهاله..
🍃خدي ايهم يدها وهو يشوفلها بإعجاب احرجها..
مختار:في عيونك تزعلها نطلعهم..
ايهم وهو يتأمل فيها..
/مستحيل..
رفع مختار حواجبه ونزلهم وهو يأشر بيده ع راسه ويحرك فيها..بمعنى..عقله مش عليه .
ومشي وخلاهم..وخلا الحضور يضحكوا..
🍃سدرة بإستغراب شديد..
/هادي..اخت نجاه..مرت طاهر ولا؟
صفيه وهي مستغربه اكثر منها .
/بقولي هي!!..لكن شن جابها هني وشن دير مع مختار!!؟
سدرة شافت لخوها لقاته منسجم في الهدرزة مع المعازيم..
وحداهم امينه..تشوف لرضا اللي قاعد واقف في مكانه بعيد ويتفرج وقلبها واجعها عليه..
🍃ركبوا اخت ايهم وفاتن...وكل وحده في يدها علبه دبله صغيره...
وقفوا حداهم..فاتن جنب صابرين..ايهم اخته جنبه..
عطاته الدبله..خداها..
وشاف لصابرين بإبتسامه..
رفع يدها اليمين ولبسها الدبله..
🍃وعيون رضا وهي تشوف غرقوا بالدموع..
وياقداش ناره تقوت لما شافه وهو يقبل يدها بعد ما لبسها الدبله...
جي دورها هي..عطتها فاتن الدبله..خدت يده اليمين وجت بتلبسهاله..جبد يده..
هي انصدمت..وهما ضحكوا مع الحضور..
اخته:ياسر من البراده...
ضحك ومد يده مرة تانيه..
هي ابتسمت وخدتها وجت بتلبسه هو قرب يدها وطبع عليها قبله تانيه..
والحضور يضحكوا..ورضا قاعد يموت..
اما صفيه وسدره..
🍃صفيه؛الستر! تو هادم ليبين!؟
سدره بإمتعاض:ليبين بايزين.."بالمصري قالتها"
☘واخيرا خلا ايهم صابرين تلبسه الدبله..
زفرت بعدين قالت بضحكه..
/واخيرا..
ضحكتها خلت ايهم يسلم عليها بالخد..هي تفاجئت..
واللي حواليها شافوها لقطه"رومانسيه"
🍃سدرة بسخريه:العب يا...
ضحكت صفيه من قلبها في عز اشمئزازها من اللي تشوف فيه..
اما امينه ماكانتش معاهم عيونها ع رضا وبس..
🍃اللي شافاته فاتن وتعكرت ضحكتها لما لقاته لف ومشي طلع بسرعه من القاعه.
وخطيبته مش قادره تركز هلبه مع خالها وخطيبته وهي تراجي فيه...
🍂طلع من الفندق ومخنوق ومش قادر يتنفس..
فك الدبوس اللي شاد الياقه متاع قميصه وحط يده ع رقبته وهو يفرك فيها..
وهو يمشي ويمشي ومش عارف رجليه وين رافعينه..
يمر قدام عيونه شريط ذكرياته معاها بحلوها ومرها..هو توا قاعد يشوف حتى المر من هالذكريات حلو..
ضحكتها..غضبها..صوتها وهي تتكلم بفرح..بهدوء..بحماس بعصبيه..ابتسامتها الهاديه وحتى الماكره..نظرات عيونها الحلوة وحتى الحاقده..لما تضحك في عز بكاها..
قداش تكون حلوة في عيونه ويموت عليها..
بدي يحس ان صدره ينحرق...حول جاكيته ..وقعد يمشي ع صدره وهو يبلع في ريقه اللي كان ينزل سم في جوفه..
قعمز ع اول مقعد شافه ع الطريق..
قعمز بهده وهو يشوف للشارع حواليه..ويجي بين عيونه اللي شافه قبل شويه..ويتسائل بجنون في نفسه..
بأي حق هو ياخدها!!؟ يحبها!!؟ مستحيل..
حتى لو يحبها مش اكثر مني..
هو شن شاف معاها..شن عاش معاها..!؟
لاشاف ولاعاش شي من اللي عاشه هو معاها...
مات من الخوف عليها لما جت بتنهي حياتها!؟
قعد يهتم بيها لين رجعتلها صحتها!!؟
حاول يدير اللي داره بش يضحكها!!؟
حاول يدير اللي داره بش يطيب جروحها!؟
مش حيقدر مهما حاول يحبها قد عشر الحب اللي هو حبه ليها..
لكن مع هدا..لبست دبلته ولبس دبلتها وولت تخصه هو وبس..
غطا وجهها بإيديه..بعدين حولهم..ورغم ملامح الغضب اللي باديات ع وجهه..نزلوا دموعه..
🍃وهي في الحفله دوراته..كانت تبي تشوف القهرة في عيونه..
لكن رضا ماكانش موجود طول الحفله..
هي في لحظه نست حقدها وبدت تخاف عليه...
زي ماخافت ياسمين اللي تتصل بيه وتعاود وهو مايردش عليها..
لكن مختار لااتصل ولادور حده كذب ع ياسمين واهلها وقال..
"جاه شغل مستعجل"...
🍃🍃🍃🍃
وانتهت الحفله..
وروحوا كلهم للفيلا...
سدرة وصفيه اللي روحوا راعشات من اللي شافوه علقوا وتمسخروا وضحكوا..لين جاهم النوم ورقدوا..
وفاتن حتى هي رقدت طول..
ومختار في داره في الدور الأول..سهر ع روايته لين جاه النوم..
وقعدت صابرين سهرانه مع القلق والخوف..
كلمها ايهم سايراته مسايره وتحججت بالنوم بش تنهي المكالمه..
طلعت من دارها..
ونزلت للدور الأول...وصلت نص الدروج ووقفت..
لما شافت باب الفيلا انفتح..
خش وسكر الباب..ويجو عيونه عليها..
نظراته وجعت قلبها..خلت دموعها تنزل..
غير نظره عنها ومشي بشي من التعب لداره..
قعدت معاه بعيونها وهي تشوف لحالته ووجع قلبها يزيد..
اختفي من قدام عيونها..بعدين سمعت باب داره انفتح وتسكر..
قعمزت ع الدروج وحطت ايديها ع وجهها وبدت تبكي بصمت..
🍃اما هو..
كان في الحمام..تحت الميه..مغمض عيونه ويتفكر في اللي صار..ولاقالت ناره نهدا..
🍃🍃
وقفت بكي وناضت ركبت فوق ومشت لدار امينه..
دقت عليها...شويه وفتحت امينه الباب وهي تقول بقلق..
/رضا رجع؟
صابرين ودموعها في عيونها..
/انزلي شوفيه حالته ماعجبتنيش.
طلعت امينه من دارها وسكرتها ومشت طول وصابرين وراها..
🍃هو طلع من الحمام وكان حاط المنشف ع راسه ومغطي شويه من وجهه..
حول تب التوته متاعه وحطه ع السرير وقعد في تيشرت نص كم وسروال..
والمنشف قاعد ع راسه..قعمز ع السرير ورجع سرح بتفكيره فيها..
دق باب داره..
"رضا"..
رضا:خشي..
فتحت امينه الباب وخشت..شافت حالته قالت..
/انت كويس..
هو قال..
/لا..
تنهدت بضيق..
حول المنشف ولوحه ع الارض..ورقد بعد ماعطاها بالظهر..
قدمت للمنشف طبست وخداته ومشت طلعت وسكرت الباب وخلاته مع عذابه..
🍃صابرين بقلق..
/شني؟!
امينه؛كويس اخد دوش وبينام دلوقتي..
هزت راسها بحزن بعدين ركبت ..
تنهدت امينه وقالت..
/رحمتك يارب...
🍃🍃🍃🍃🍃
وتفوت ساعه..وبعدين تفيق امينه الكل للسحور..
صابرين مابتش تنزل..وهو ماطلعش من داره..
وتسحروا مختار وفاتن وسدره وصفيه مع بعض..
سدره كانت تعلق في نفسها..
"قاعده في حوش راجل غريب وبتصيم عادي!"
صفيه حتى هي علقت في نفسها..
"سمعنا وسلمنا اني شفت العجب ع اخر عمري"
ومختار اللي كان قاصد يصيم المرة هادي عارف الحديث اللي يدور بينهم وبين نفسهم ومرة مرة يسرقلهم في النظر...
🍃🍃🍃🍃🍃
يوم الإثنين..
6مايو...سنة2019..
اول ايام شهر رمضان المبارك..
كان الجو كئيب والناس فالعاصه مش حاسه بخشة رمضان ولا مستطعمه بنته.
ولو انه شهر عباده المفروض يفرح بجيته المؤمن شن ماكان حاله..بس في بعض الأحيان يكون الشي هدا صعب..
🍃🍃🍃
الساعه 12:00قبل الظهر
في حوش محمد شنيبه...
كانت سميره مع معاذ وسدرة المهدي وجوري في دار المعيشه..
تفطر في معاذ وهي تقول..
/سيدا جوجي كان تعبكم الصيام مش لازم تكملوا اليوم..
جوري:لا نقدر..
سدرة:اني مفروض عليا..
شافت سميره لسدره شويه بعدين هزت راسها وولت توكل في معاذ وقلبها وجعها شويه ع سدره..في نظرها مازال صغيره..
جوري؛رمضان هدا نبي نصيمه كله.
سدرة:تعلمي معاش تكذبي وبعدين صيمي..
ضايقت جوري..
وسميره شافت لسدرة وقالت..
/عندك علم ياسيدا ان اللي ديري فيه حتى انتي غلط وينقص من اجر صيامك..
سكتت سدره وهي مش راضيه..
سميره:تبي ربي يقبل صيامك تسامحي مع بنت عمك يللا..
شافت سدره لجوري بطرف عينها بعدين مدت يدها..
ابتسمت جوري وصافحتها..
"هدا وقد تم فض النزاع وتصالح الطرفين بوساطه الامم المتحده وعودة المياه لمجاريها...نضال شنيبه..من امام دار التقعميز..حوش محمد شنيبه..شارع القهوة.."
سميره بضحكه:شن نوضك؟
نضال حط ايديه في جيوب سرواله وقال بإبتسامه..
/ديما اول يوم هكي طاهقين نوضوا من 11 وبعدين ربي يعفو عنا وخلاص..لكن اني السنه هادي بإذن الله بنغير السيستم كله..ايه حقه نسيت نقولك..نسرين قالت ماديري شي هي بدير الفطور..
سميرة بإبتسامه؛خبرتني.
ابتسم وقال؛مليح بكل..وانتم الزوز تتعاركوا مرة تانيه نربط قريناتكم في بعض...
ضحكوا البنات..
هو قال:ماشي نشوف السلطانه..
وطلع من حداهم..
سميره تنهدت وقالت..
/خلاص معاش تبي.
معاذ:ايه..
سميره؛هي نوضوا نغسلوا ايدينا..
🍃في هالوقت..
خش نضال ع امه لقاها تقرا في القرآن..
قرب منها وباس راسها..
سكرت المصحف وقالت..
/فيك الخير..
نضال:خيرك يام!
مغليه:عارفني خيرني..ماني عارفه صغاري انتم لمن طالعين هكي! تحمقوا لأمكم ويوجعكم حالها فرحانين بضرتها اكثر من بوكم!!؟
نضال:ماتبالغيش يام..المراة كويسه وكفايه خيرها شرها تبيني نحط راسي براسها!!؟
مغليه:ع الاقل ماتتعاملش معاها بكل..
نضال؛المراة عندها ظرف صعب خوها سكر عشرة ايام بس ميت..
مغليه:بتفهمني انه واجعك!!؟
نضال حس بشي غم ع قلبه رد عليها..
/يام ارجوك الموضوع هدا انسيه زي اني نسيته خلاص..
مغليه:عطيني كفين بش ننساه..
تنهد نضال وقال..
/باهي سامحيني..وطبس باس ع راسها ومشي طلع من حداها..
مغليه بإزدراء:خزي وتفي عليكم واحد واحد..
ورجعت فتحت المصحف وقرت وين ماوقفت...
#مراد_قلبي
#طوبى
...يتبع....
