احببت رجل اعمال

البارت 7

                          &&&&&&&&&&&
عند نهال #
كي عيطتلي يسرى و قالتلي قريب زدت طحت انا تاني مي وليت شديت روحي و خرجت من البيرو مع لي انا خارجة تلاقيت ب ايهاب خارج من بيروه تان
انا : ميسيو ايهاب معليه نخرج دورك
ايهاب: مي مزال ما فهتكمش واش راح نديرو غدوة
انا : سمحلي ما نقدرش نريح لازم نروح
ايهاب : علاه واش كاين
انا : ختي راهي فالسبيطار
ايهاب : اجي معايا نوصلك
انا : لا مكلاه تشقي روحك دوك نشوف طاكسي
ايهاب : قلتك هيا نوصلك خرمن تزيدي تتعطلي و نتي تستناي فالطاكسي
وليت خذيت كلامو و رحت معاه مع لي وصلنا تقابلنا مع عايلتي تما رحت نجري لعندهم
انا : ماني . خالتي واش بيها هيبة علاه تغاشات
امير : قالنا الطبيب نفسيتها راهي تاعبة و تعرضت  لصدمة
انا : واش من صدمة تاع واش
ماني : مزال ما علبالناش اا بنتي و هي محبتش تحكي و قالنا طبيب ما تضغطوش عليها خلوها تريح و كي يخلاص الصيروم تقدرو تخرجوها
خالتي : و هذا واش جا يدير ( راها على ايهاب )
انا : وصلني بيسك ما لقيتش طاكسي
خالتي : ااممم
ليسونسيال قعدنا ستنينا حتى خلاص السيروم و دينا هيبة لدار و مام ايهاب جا معانا ماني و خالتي راحو مع امير و انا و يسرى مع هيبة رحنا مع ايهاب وصلنا لدار طلعت هيبة للبيت حطيتها فالبونك تريح و حبطت نوجدلها سوب باه تفطر و خليت خالتي مع ماني و امير و ايهاب فالصالون و يسرى جات معايا
انا : يسرى ماعلابالكش علاه هيبة صرالها هكاك
يسرى : ماعلاباليش كي جيت طالعة للبيت سمعتها تعيط و مع لي وصلت كانت طاحت
انا : يا ربي و ستر ما زال ما فهمت واش هي الصدمة لي تعرضتلها
يسرى : والله ماعلبالي صباح خرجت خليتها تريفيزي للباك بلون كانت نورمال
انا : خلي تريح و نسقسيها  
كملنا انا و يسرى وجدنا لاسوب و طلعناها ل هيبة دخلنا لقيناها تخزر فلبلافون و تبكي
انا : شبيه الزين ديالي حزين شكون زعفو
هيبة ( مزالها تخزر للبلافون ) : شحال صعيبة كي تكوني دايرة كونفيونس كبيرة في بنادم و يطعنك فظهرك
انا : و شكون هاذ لبنادم
هيبة ( دارت خزرت فيا ) : نهال نقولك حاجة كنت مخبيتها عليك مي ما تزعفيش
انا : ما نقدرش نزعف على الكبيدة ديالي
هيبة : انا كنت اون كوبل مع واحد من ليسي اسمو فارس و كنت متعلقة بيه بزاف و دايرة فيه كونفيونس نحكيلو الصغيرة و الكبيرة على حياتي و على دارنا  و فاللخر كان دايرني تحريشة و خاني مع صحبتي لانتيم سماح لي كنت دايرتها كي ختي و دخلتها لدارنا و عرفتها عليكم و درتها كيما نتي و كيما يسرى .... و كملت تبكي
انا : هيبة ختي انا مراحش نعيط عليك بيسك حبيتي ولا كنتي اون كوبل مي ديما نوصيك ما ديريش كونفيونس فلي جا علبالي قلبك راه يوجع فيك بيسك الضربة من عند القريب تقتل و اذا ما قتلتش تشل مي لازم عليك تقواي و توقفي على رجليك بينيلهم بلي هيبة قوية ماشي لي يجي يطيحها .. هيبة ختي نتي مزالك صغيرة و مزال الطريق طويلة قدامك نتي عندك عايلة كاين انا كاين يسرى كاين ماني و خالتي وهيبة و حتى امير و شهرة معانا حنا وحدنا نكفو روحنا و ان شاء الله هاذ الضربة تفيقك يعني مرانيش نقلك تستاهلي و لا نستشفى فيك راكي ختي و جامي لا وحدة تمنات الشر لختها  مي كامل نتلقاو ضرابي فهاذ الدنيا سوا من القريب سوا من البعيد مي كل ضربة تزيدك فالراس عقل و ان شاء الله تفهمي هدرتي و نعاودو نشوفو هيبة المهبولة لي على العام تضحك
هيبة : ربي يحفظك ليا يا اغلى اخت لوكان ما كنتيش نتي ما نعرفش واش ندير
تعانقنا بين ثلاثة انا و هيبة و يسرى ( شغل فهمتو كيفاه )
و حنا هكاك حتى تدخل خالتي : نهال روحي حطي حاجة للضيف
انا : اكي خالتي  هاني جاية
حبطت وجدت السنيوة فيها جو و الڨاطو ( بون كي تقاست شهرة دارو الڨاطو اونسي جامي كاش واحد يجي يطل عليها 😁) و رفدتها غير دخلت للصالون يقابلني قاعد على الفوتاي بهاذيك الكاريزما بقيت باهتة فيه حتى حمحم امير باه فقت لروحي و حطيت السنيوة فوق الطابلة سيربيتلو و حطيتلو قدامو قعد غير يخزر فيا و انا حشمت حطيت راسي و علبالي يكون وجهي دارها بيا و حمار 😂 ...... قعد يحكي مع ماني و مع امير تماك حسيتو جونتلمان 😅
ايهاب : بون هذاك هو الوقت انا نروح
ماني : ريح ااا وليدي مزال الحال اقعد للعشية تفطر معانا
ايهاب : والله هداك هو عندي شغل ... و دار ليا : اعطيني النيميرو باه نفهمك واش راح نديرو غدوة
اعطيتهولو و عيون امير و ماني دايرين بيا ياما خيتي كي تبهدلت 😂 و وصلتو عند الباب بقيتو على خير و راح
______________________________________

طيط طيط 😂😂
بون حبيت نسقسيكم شوية دي كاستيو باه نشوف رايكم فالكرو هاذايا
1_ واش رايكم فالكرو ؟
2_ واش من الشخصية لي عجبتكم بزاف ؟
3_ الشخصية لي ما عجبتكمش و حسيتوها تقيلة فهاذ الكرو ؟
4_ نكمل و لا نن ؟
5_ لي عندو افكار و منا و ملهيه يبعتلي بريفي !
6_ جام و كومنتار فطريقكم اذا حبيتو ماشي بسيف 🙂