طوبى ☕شارع القهوة☕

الجزء_الثالث_والتسعين

وبى  "جنة طوبى"
#جمان_فريد
#الجزء_الثالث_والتسعين"خريف"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الصلاة_على_النبي
قال السخاوي رحمه الله :
‏الصلاة على النبيّ ﷺ ، من أبْـرَكِ الأعمال وأفضلها وأكثرها نفعا في الدّين والدّنيا .
‏القول البديع.أهـ.( ١٠٩)٦
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🍃 تذكّر أن شيئًا ما يجب أن ينتهي من أجل أن يبدأ شيء أفضل🍃
_________________________________________
واقفات حوالين طاوله..
ع تورته طويله طول..مكتوب عليها...
"طوبى لطوبى"
هي في وسطهم وفي حضنها جنتها يدها الصغيره ع يد امها اللي تقص في التورته..
ومجرد ماكملت..صدح صوت التصفيق في الصاله..
وجنه تمرر في نظرها عليهم وهي تصفق معاهم...
🌼🌼🌼🌼🌼
طوبى:لو كانت للوشه حاضرة راهو ماخلت لقطه ماصورتها..
اريج ضحكت وهي تبعت في فيديو صوراته لآلاء..وخالها يوسف..
زينب؛الفال لحفظ القرآن كامل..
طوبى بإبتسامه:اللهم آمين..تصدقي قبل فترة طويله حلمت بأني قاعده في مكان مظلم زي المهجور ونقرا في القرآن..
في الأول قريت سورة العصر بعدين سورة الأعلى..
زينب:الله أكبر..
طوبى وهي مبتسمه:حكيتها لجارتنا بوها شيخ يفسر في الاحلام..قاللها مرت ببلاء وصبرت عليه وهدا تأويل تلاوتها لسورة العصر..اما سورة الاعلى دل ع انها حتتعلم علوم الدين العلم الشرعي والقرآن وحتبدا في وقت الابتلاء.
زينب:فعلا بديتي تتعلمي في القرآن في الفترة اللي كنتي فيها مع الجالي قبل الله لايردها..
طوبى:آمين..الحمد لله ع كل شي هي محنه وربي عطاني فيها منحه..
زينب:مانزكيش ع الله حد..بس انتي ديما هكي سبحان الله.نحسك عبد محبوب عند الله..
دمعوا عيون طوبى من الاحساس اللي جاها لما سمعت كلام زينب وقالت..
/يارب..
واريج تسمع في حديثهم بإنتباه وهي مبتسمه..
زينب:بس تفسير تعلم العلم الشرعي لازم يصير..لازم تبدي ياطوبى..حنعطيك اسماء مجموعه كتب تكونلك بدايه..
طوبى:إن شاء الله..
سمعت صوت جنة تنغم في الكلام..شافتلها لقتها تلعب مع سدرة المهدي وتاله..
ركزت بنظرها ع سدره بعدين نادت بإبتسامه..
/سدرة..
شافتلها سدره..
اشرتلها طوبى تجي..
ناضت سدره وجتها طول...
/نعم؟
طوبى:قبل قلتيلي ان مكتبه ماما الله يرحمها قاعده زي ماهي..
سدرة؛ايه..
طوبى؛عادي تقولي لبابا ان خالتي طوبى تبيهم..
سدرة بإبتسامه؛باهي تو نقوله..
طوبى:شكرا ياقلبي..
ابتسمت سدرة بحب وولت لجنة وتاله..
أريج:لو خديتي من حد تاني خير..ولا شريتي..
زينب:اني اصلا كنت ناويه نجيبلك..
طوبى تنهدت وقال..
/اني مش حناخد الا كتب عيشه لو المهدي قال باهي نبيها تكسب اجر..
زينب ابتسمت وهزت راسها..
اما اريج التفتت تشوف لسدرة بتعاطف وعيونها تعبوا دموع..
🍃🍃🍃🍃🍃
وعند الرجاله في المربوعه..
كان عدي ضيف جديد عليها بعد مااصر عليه الحاج علي وهدا المطلوب بالنسبه ليه..
في وجوده معاهم قعد يدرس في الموجودين..
الحاج علي..المحجوب..حسين..عبد الرؤوف واسكندر..
كلهم بشكل عام خدي عنهم فكرة كويسه..وكان اعجابه كبير بالمحجوب بإعتبار ابن مجاله..عدي محامي..
مااكتفاش بتركيزه ع الاشخاص..
ركز حتى عالضيافه اللي بينتله انهم اهل كرم وناس تعطي للضيف قدره..
شويه وخش عبد المطلب..دقق علي تفاصيله...لاحظ ان فيه اختلاف..ومن كلامه المتكرر عن اي شي ليه علاقه بالفلوس عرف علته..بس مااهتمش ليها هلبه جنب علاقته مع بوه اللي بانت كويسه..
*****
طلع حسين شويه بعدين رجع وولاد غرفه معاه..حطهم جنب بوهم وهو يقول..
/حصلوا لزة جماعيه..
علي ؛حتى الجرانه!؟
حسين بضحكه؛هي اولهم..وولى طلع بش يجيبها..
عدي عرف ان الكلام عن بنت طوبى تحمس بش يشوفها ويتعرف عليها..
ويدق باب الحوش..
وينوض المحجوب ويطلع من المربوعه..
علي؛سامحنا ولدي حني ديما بدوشتنا..
ضحك وقال..
/كان تشوف العرض اللي عندنا شن تقول...
ضحكوا..
ع خشة عبد القيوم ومعاه المحجوب وهو يقول..
/السلام عليكم..
ردوا عليه السلام..وهو لاحظ وجود عدي واستغربه..
سلم ع الكل من اليمين لليسار..لعند ماوصل في عدي..
الحاج علي:استاز "استاذ" عدي خو المعلمه اللي تقري في بنتنا القرآن..
صافحه عبد القيوم..
علي؛هدا عبد القيوم التارقي..ولدنا لانقولك جارنا ولاصاحبنا.
ابتسموا وهما يشوفوا لعبد القيوم اللي ضحك بإحراج وقال..
/بارك الله فيك..
عدي بإبتسامه:اهلا وسهلا..فرصة سعيده..
عبد القيوم بإيتسامه؛انا اسعد..وقعمز جنبه..
ع خشة حسين بجنه..
عدي لما شافها ابتسم وقال..
/اللهم بارك..
علي وحسين؛تسلم..
عبد الرؤوف:ياودي هادم كبروا خلاص معاش ينشدوا.. حسين:خلي عليك مادخلكش بيهم..
علي شاف لعدي وقال..
/عيونه الصغار ومايبيش يتزوج لتوا..
حسين:مالناش ساعه عارفين الراجل علاش الشهدرة من اولها..
ضحكوا..
علي:تزوج معاش نشهدر بيك..
حسين وهو لاهي بجنه اللي جوها ولاد خالتها يلعبوا معاها..
/ان شاء الله لما يجيب ربي المقسوم..
علي:قصدك بعد يفوت الفوت..شاف لعدي وقال..ماتواخذنيش انت كم عمرك؟
عدي بإبتسامه؛34عام..
علي:متزوج ولا اكيد متزوج..
عدي ابتسم بأسف:مريت بتجربه وماتوفقتش فيها..
علي؛اسف ياولدي سامحني..
عدي بإبتسامه؛لاابدا الموضوع عادي عندي مافيش مشكله..
حسين؛هادي اخر الشهدرة بحسين ياحاج..
ضحكوا وعلي قعد يشوف لعدي وهو مبتسم بإحراج..
شويه قال المحجوب..
/عدي عندك مكتب خاص؟
عدي:لانخدم مع محامي تاني في مكتبه..
هز المحجوب راسه وهو ساكت..
عبد القيوم؛محامي؟
عدي شافله وهز راسه بإبتسامه..
علي:جاي بيجاورنا يدور في حوش هني..
عبد القيوم بإبتسامه بمتهكمه :وين بيلقاه..
علي: حوش عمك خميس المشاي..اللي جنب العطريه بيبعيه..
عبد القيوم بمفاجأه..
/امتى صار!؟
علي؛اليوم بعد صلاة الفجر هدرز عليا وقال بيحول ويبي يحصل بيعه كويس للحوش..
عدي:بصراحه الشارع مكان حيوي وفرصه كبيره السكنه فيه .
علي:شويه ويأذن المغرب تمشي معانا للجامع وغادي نلاقيك بيه..
عدي بإبتسامه:ان شاء الله..
وعبد القيوم يسمع فيهم  هو عاقد حواجبه بضيق..
فرصة وراحت عليه..
***
قعدوا يهدرزوا بعدين عن وضع البلاد والحرب المنتظرة واندمج عدي وقعد يناقش...وآرائه كانت مقنعه عبد القيوم نفسه اعجب بيها لأن يتفق معاه فيها..
بس الانسجام في هالحديث خربوه الصغار بمشاغباتهم اللي خلت عبد الرؤوف يدخل ولاده لأمهم..
لكن جنه وين جي حسين يرفعها زحفت بسرعه لعبد القيوم وشدت في رجله وهي تتكلم بلغتها الخاصه اللي ترجمها اسكندر...
اسكندر: قالتلك انا دخيلتك جيرني .
خداها عبد القيوم وهو يضحك..
عبد الرؤوف بالبدوي..
/مجارة يازليطنيه مجارة..
وعدي يضحك..
عبد القيوم بضحكه:ياسمحه شن جو..قولي عبدو..ياعبدو..
وجنه من فرحتها انها قالت وراه بحماس زايد..
"دو" وهي تمد في الواو وشفايفها ممدوده وحواجبها مرفوعات من الانفعال..
وهما يضحكوا عليها..
عدي بضحكه؛اللهم بارك..
علي بإبتسامه:جرينه...
🍃🍃🍃🍃🍃🍃
وفي الكوجينه..
بدوا يوتوا في العشي للصاله والمربوعه الخارجيه..
بعد كملوا رفعوا مطيره وهاديه السفر للصاله..
وقعدوا اريج وسميره مع بعض بش يمدوا لإسكندر السفر للمربوعه..
سميره كانت تراقب في حال اريج مع خوها لاحظت انها منسجمه معاه ويبان جوها حلو..وشافت الحب بدي باين هلبه في عيون خوها.
بعد مشي اسكندر بالسفره هي شدت اريج وقالت..
/شن جوك معاه..
اريج بإبتسامه..
/يهبل..خو متفهم وعسول هلبه..
سميرة بضحكه؛وباله واسع..اهم شي ردي بالك تجي جنبه كان ناض عليه البوري..
اريج بضحكه..
/في الشك..عارفه روحي حنقعد ناشبه لين نضحكه..
سميره بضحكه؛تقدري حتى انتي..
ضحكت اريج..
"سميرة..اريج"..
سميرة:هانا جايين..هي تعالي..
ومشوا طلعوا مع بعض من الكوجينه..
🍃🍃🍃🍃🍃
في الطريق..
عدي:ناس مريحه ويخلوك تنسجمي معاهم طول..
زينب؛باهي الحمد لله..
عقد حواجبه وقال..
/بس بنسألك..طليقها ماحاولش يتواصل بيها نهائي..
زينب؛طليقها قاعد يتعالج برا وضعه صعب  الله اعلم كان مازال يصير منه..اني بس نفكر في حكاية حضانه البنت اني شبه متأكده ان جدتها مش حتاخدها بس مانعرفش شن يصير بعدين..
عدي:يصير كل خير ان شاء الله الموضوع مش صعب هلبه..توا نقولوا ربك يعديها ع الخير ولايصير من حرب ولامشاكل تانيه ونقعدوا مستقرين..
زينب:اللهم آمين..
🍂🍂🍂🍂🍂🍂🍂🍂🍂🍂🍂🍂🍂🍂🍂
ماشيه ناحيه باب الفيلا...وصلت فيه وفتحاته..
مختار بإبتسامه..
/امينه ازيك؟
امينه بإبتسامه:كويسه..الحمد ع سلامتك..وسكرت الباب..
وهو مكمل طريقه لجناحه قال..
/الله يسلمك..
🍃وصل في جناحه..
فتح الباب وخش..حول شاله..وبالطوه..
ومشي بيحطهم ع السرير...لكن وقف مكانه فجأه وهو يتفكر في اللي صار اليوم..
تعبوا عيونه بالدموع وحس بشعور شوق مفاجئ لأخته..
ولما حس هالشعور بيسيطر عليه..
غمض عيونه وفتحهم وحرك راسه يمين ويسار بسرعه رفضا..
رمي الشال والبالطو ع السرير..وتوجه للحجره اللي فيها مكتبه الخاص كانت في وسط الجناح..
خشلها...
عيونه جو ع رقعة الشطرنج...قدملها لين وصل فيها..
مد يده خدي ملك الابيض ونظراته ليه كانت حاده..
جي بين عيونه مواقف فكراته بهزيمته قدامها الهزيمه اللي كانت متبعه فيها نفس اسلوبه في المحاربه..
رد القطعه لمكانها وهو يشوفلها وقال بالألمانيه..
/ Ende gut, alles gut.
العبرة بالنهايه...
🍃🍃🍃🍃🍃🍃
تاني يوم..
2إبريل...سنة 2019...
يوم الثلاثاء..
الساعه 9:30صباحا..
سقدت سميره راجلها بعد الفطور..وولت للكوجينه بس ضم الحوسه..
فهالوقت نزل نضال من فوق..
ومشي تلقائيا خش للكوجينه..
وقف في مكانه لما شاف سميره تلم في الماعين..
هي ابتسمت وقالت..
/صباح الخير..
عقد حواجبه وقال..
/صباح الخير..
سميره:قهوة ولا فطور..
هو تنهد وقرب للكرسي شده من فوق بيد والتانيه حطها في جيبه..
سميره:عندك كلمتين حاصلات في رقبتك صح؟
نضال:هو طلب بس..شن ماكانت الطريقه اللي خديتي بيها بوي ماتهمنيش في النهايه النصيب جابك..وبوي واضح انه مرتاح معاك..طلبي انك ماتخليشي يحقد ع امي ولايهينها بعد هالعمر..امي صح مش هديكا المراة الطيبه لكن تقعد امي..فاهمه عليا..
ابتسمت وقالت..
/فاهمه..اني اللي مايجيش جنبي مانديرله شي لكن اللي بيعفسلي ع طرف مش حنسكتله..
نضال:تمام لكن خلوها بيناتكم..امي مش ساهله عارف..لكن حتى انتي عندك ماتحكي..
ضحكت بعدين هزت راسها وقالت..
/يصير خير..
حك لحيته وقال..
/شوفي لو تبي تكسبي حليف جديد ماعنديش مشكله لكن لازم تعرفي ان اني عندي اسلوب خاص حاولي تفهميه صح..
رفعت حاجبها بعدين هزت راسها وقالت.
/امم..نشوفوا..
نضال:قهوة..
ابتسمت وقالت..
/للصاله..
هز راسه بعدين مشي طلع..
بعد طلع تنهدت سميره..وولت تلم في الماعين...
🍃🍃🍃🍃
هو قعمز في الصاله وشغل الشاشه وحط طول ع قناة اخبار ليبيه كانت جايبه اعاده لبرنامج سياسي يحكي عن اخر المستجدات...
كانت يتابع بقلق وغضب باديين ع وجهه..
ع خشتها هي وفي يدها سفرة القهوة..
حطتها قدامه ولفت جهة الشاشه وقعدت تتفرج والخوف والغضب بانوا ع وجهها..
هو شافها..ع راس لسانه سؤاله ع وضع خوها بس بلعه وسكت..
سميره بقلق..
/والله مرتاحين وماناقصتنا حاجه والوضع بدي يتعدل..علاش هالحروب وهالبلي بس..الناس وين بتجلى وين بتهج..!
هو تنهد بضيق وقعدت محتفظ بصمته..
وهي مشت طلعت وهي تقول..
/حسبنا الله ونعم الوكيل...
خدي فنجان القهوة وبدي يشرب فيها..
ع خشة امه قالت..
/صباح الخير وليدي..
هو قال:صباح الخير ياغاليه..
قعمزت قريبه عليه  وقالت بإنزعاج..
/بالله وليدي غير هالبلي مش ناقصين نكد..
هو خدي الريموت وحط ع القائمه اختار قناة الدراما البدويه..
ابتسمت مغليه..
وهو رشف من القهوة بعدين قال..
/اهم حتى هما غايرين عليهم حتى هماحروب وايام سود..
مغليه:فطرت؟
نضال؛نشرب قهوة قبل..
وتخش سميره وهي تقول..
/شن تبي غدي؟
مغليه شافتلها بإحتقار..
اما هو قال؛اللي يبيه بوي..
سميره؛رز مسقي..
نضال:خلاص..
مغليه:ديري لمن تبي غدي..لكن غدي نضال اني نديره..
فنص عيونه  بعدين رخاهم وقال..
/يام..مالك ومال التعب قعمزي زي البيه وغداك وعشاك يجوك لعندك وخليها هي دير كل شي..
شافت مغليه لسميره برفعة حاجب..
نضال قعد يغمز لسميره وهو يعض ع شاربه..
شدت سميره ضحكتها ودارت روحها مضايقه بعدين مشت طلعت..
شافتله مغليه وقالت..
/بردت ع قلبي الله يبرد ع قلبك وليدي جاها من يحطلها حد الشلولح هادي..
نضال؛حتى انتي اعرفي كيف تخدمي عقلك يام تشوفي فيها تحوس وطيب ومش عارف شني خليها لين تبيد..وانتي قعمزي وحطي رجل ع رجل..راهو بوي دار فيك من غير مايعرف..
مغليه اقتنعت بكلامه اللي عجبها وقالت..
/صحه عليك والله مانك ساهل يادعوة..قلتها لأختك روحلي نضال بش ياخد حقي..
نضال:مال شنو رجالك رانا..ورشف من فنجان القهوة وهو يشوف للتلفزيون بعدين قال..
/توا هدا مش نفسه غليص يام..!؟
مغليه؛الممثل نفسه لكن هدا مسلسل تاني.
رفع حاجبه وقال
/..اااها.....ورجع يرشف من القهوة..
🍂🍂🍂🍂🍂🍂🍂
وفي النمسا..
كان مختار موجود في قاعة اجتماعات مترأس اجتماع بحضور شركائه اللي من ضمنهم ايهم  ورضا المدير التنفيذي للشركه..
رضا اغلب الوقت كان يسرق في النظرات الحاده لأيهم..
وايهم كان مركز في الاجتماع زي ماكان مركز فيه مختار ومعاه بكل حواسه..
فاتوا ساعتين..وانتهي الاجتماع..
طلعوا الحاضرين كلهم مع رضا وايهم..
ناض ايهم من كرسي ومشي قعمز ع كرسي جنب مختار بالزبط.
ورضا يشوفله..
ايهم:نبيك في موضوع بعيد عن الشغل..
مختار:تفضل..
ايهم:شخصي شويه..
شاف مختار لرضا وقال..
/رضا ماندرق عليه في شي..
ايهم:لامش القصد رضا خطيب بنت اختي مافيش مشكله لو عرف اللي بنحكي فيه..
مختار:تمام احكي..
تنهد وقال..
/قررت نقبر العزوبيه..
شد رضا ع البيرو "قلم الحبر" اللي في يده بقوة..
مختار بضحكه..
/تشوف فيا خطابه جاي تحكيلي!..
ايهم بضحكه.
/بنخطب من عندك..صابرين..
ساد الصمت المكان..
رضا اللي كان ع شعره وينوض يضرب ايهم يشوف لمختار بنظرات ترقب لإجابته...
ومختار يشوف لأيهم وهو رافع حواجبه بمفاجأه..بعدين رخاهم وقال متسائلا للتأكيد..
/صابرين مافيش غيرها..
ايهم بإبتسامه ارتباك قال..
/ايه..
كيف جي مختار بيرد غير نظره بسرعه لرضا اللي رد عنه وهو يقول..
"لا طبعا"..
ايهم بإستغراب..
/علاش!؟
رضا وهو شاد البيرو بقوة بإيديه الزوز قال.
/لأن صابرين تعني هلبه لأستاذ مختار..يعني شخص خاص بالنسبه ليه..
غير ايهم نظره لمختار وهو متفاجئ.
ومختار قاعد يشوف لرضا بإبتسامه واسعه..
ايهم؛كيف شخص خاص ياريت توضحلي مختار..
غير مختار نظره لأيهم وقال..
/يقصد انها قريبتي..في صلة قرابه بينا بعيده شويه ولأنها مرت بظروف صعبه خبرتكم عن بعض منها بالنسبه ليا وضعها خاص عندي..فلو..
توسعوا عيون رضا فزعا من اللي بيجي بعد كلمة ..فلو..
ومختار مكمل يقول..
/انت صادق في رغبتك بيها وجاد جدا بموضوع الارتباط بيها..
"ماعنديش مشكله"..
جمله من تلاثه حروف نزلت عليه زي السيوف..
قعد يشوف لمختار بصدمه..وقلبه يدق بعنف من الالم اللي حسه..
ايهم بإبتسامه..
/جاد فوق ماتتصور...
مختار:معناها الموضوع واقف ع موافقتها هي..
ايهم؛رجاء خاص افتح الموضوع معاها في اقرب وقت..
مختار بضحكه..
/نهاتك البنت..
ضحك ايهم وقال..
/ع الاخر ياصديقي..
طبطب مختار ع كتفه وناض وهو يقول..
/الليله نفتح معاها الموضوع..
ناض ايهم وهو يقول..
/نراجي منك في خبر.
هز راسه وشاف لرضا وقال..
/كمل شغل بكري موعد طيارتك بعد تلاته ساعات..
وخدي التاب متاعه وتليفونه وقال لأيهم..
/تعالى قولي شن صار في الموضوع هداكا اللي وصيتك عليه..
ومشي معاه ايهم وهو يحكيله..
ورضا معاهم بعيونه اللي نظراتهم كانت بين الخيبة وعدم الإستيعاب...
🍃🍃🍃🍃🍃
"هي قالت تبيهم"
المهدي:بالنسبه ليا اني عادي..بس نشاور خوتك قبل..
سدرة:باهي..
مسح ع شعرها وقال..
/بتنزلي لوطا؟
سدرة:ايه خالتي سميره مدايرة سينابون..
ضحك وقال..
/خلولي منه..
سدره بإبتسامه؛باهي..
ومشت تجري خدت وشاحها من ع الشماعه
وقفت ع مراية المدخل لبساته..بعدين مشت طلعت من الشقه..
ابتسم بوها براحه لما شاف فرحة بنته اللي كانت واضحه في عيونها...
ويجيه اتصال يخليه يمشي لدار النوم..
خشلها وخدي تليفونه من ع الكامدينو..
فتح الخط ورد..
/ايوه نسرين..
"ايوه مهدي كيف حالك وحال الصغار"
المهدي:الحمد لله..شن اموركم انتم..
"ماشيه الحمد لله..مهدي بعد العصر ماعندك شي"
المهدي:لامافي شي مهم..
"تجيني"
المهدي:نجيك لكن علاش ان شاء الله خير..!
"لما تجي نهدرزوا"..
هز راسه وقال..
/خلاص بعد العصر عندك..
🍃🍃🍃🍃🍃
"اني ديما في الهم وخلاص"
فردوس بضحكه..
/تي غير علاش بس..
مطيره:في وحده تحصل واحد مستعد يخلي البلاد توقف ع رجل وحده ع خاطرها.
فايزة:والله الموضوع مايضحك..
فردوس:اهي جايه حرب تخليك معاش تشوفيه بكل..
فايزة بقلق:استغفر الله وخلاص..
ويرن تليفون فردوس بنغمة اتصال ماسنجر..
فردوس كانت مكالمة فيديو..
/خالتي صفيه..وفتحت عليها وقالت بلهفه..سدرة سدرة..
فايزة خدت التليفون وشافت للشاشه..
طول نزلوا دموعها..وتسمع صوتها المميز ببحته يقول..
"شراده"
فايزة بعدم استيعاب..
/ياربي والله سدره!
"قاعده..مهبوله.."
ضحكوا..
"راك..بتولي..جده..حي عليك"
فايزة بضحكه ودموعها ينزلوا..
/ياقلبي قداش استاحشك واستاحشت لسانك الحار...
"مبروك..على صفو"
فايزة:ياروحي الله يبارك فيك..والفال لما نزوج مروة وتاله في وجودك وانتي تقيمي اعراسهم..
"آمين..امين...شن..حال...عيشه ونسرين"
سكتوا لحظه بعدين فايزة قالت..
/الحمد لله..
"واجع..واجعتني من عيشة..هلبه الوحيده اللي..مادورتش..قولي..صاير شي..بينها.
وبين...المهدي!؟"
فايزة وهي شاده دموعها بقوة..
/لا..لكن امها..خالتي عتيقه مريضه وقاعده في تونس وهي معاها..
"خيرها!؟"
بلعت ريقها وقالت..
/اللهم عافينا..ورم في البنكرياس..
"لاحول..ولاقوة..الابالله..ربي يشفيها..لو كلماتك..سلمي عليها قوليلها..سدرة تنشد عليك"
حست مطيره ان فايزة حتنهار..قربت صبعها من الشاشه وسكرت ع سدره وخدت التليفون..
وفايزة انهارت بالبكي..
سكرت مطيره النت ودموعها في عيونها..
وفردوس تبكي بصمت..
🍂🍂🍂🍂
سدرة بضيق..
/التغطيه..شكلها..
خدت صفية التليفون وهي متمالكه نفسها بقوة...
ويدق باب الحجره..
صفيه:تفضل..
انفتح الباب شويه وبانت عليهم باقة ياسمين..
سدرة ع بالها مختار حست بفرحه في قلبها..
وشويه وبان عليها اياد..
اياد بإبتسامه:الله يبارك..
ابتسمت مجامله..
صفيه بإبتسامه..
/مفاجأة حلوة..
اياد:شكلها ليك انتي بس..
سدرة؛لا..مش هكي..بس..وسكتت..
صفيه:هو في حاجه نسينا ماخبرناكش عنها..
اياد:لاااا هكي بنحرج معليش..معقوله حاجه زي هادي تنسوها مفروض اول حاجه تعرفها..
سدرة بإستغراب..
/شني!؟
صفيه:قبل فترة من الغيبوبه..اياد خطبك من بوك الله يرحمه وانتي وافقتي..وكان مفروض فضانيتك في اليوم اللي بعد يوم الحادث..
سدرة غيرت نظرها لإياد وهي مصدومه..
واياد يشوفلها بإبتسامه..
بعدين قدملها وحطلها الياسمين ع رجليها وقال..
/راجيتك سنين من عمري ومازال نراجي...
نزلت نظرها للياسمين..جي بين عيونها المهدي ودموعه..قلبها وجعها...لكن سرعان ماتفكرت عائشه واللي عرفاته عنها..
مدت يدها وخدت الباقه..وقامت عيونها لإياد..وابتسمتله..
🍃🍃🍃🍃🍃🍃
"حذرتها وقلتلها ولدك خاش في لبز..لكن توا بنمشي لبوه طول"
نسرين بقلق..
/هو هدا الكلام معاها ماينفعش تركبك انت الحق بعدين..
المهدي بعصبيه
/داك خشمها في حياة هدا وهداكا ومسيبه صغارها..وحتى هو لاهي يجري في جرة رزق الدنيا وناسيهم..
نسرين:مش منه من اختك وذلها ليه وطلباتها اللي تقسم الظهر..
المهدي:تعرفي نادم اشد الندم اللي كبرتلها راسها عليه حسيت الراجل فقد احترامه حتى في حوشه
نسرين:حق هادي اكبر غلطه..خديجه حتى لو كانت ع حق ماتبيش من يناصرها سكت المهدي وهو يشوف لنسرين اللي لاحظ عليها وكأنها حاقده ع خديجه..لكن ماباش يسأل فكر انها لو تبي تقول حكت من تلقاء نفسها..
ناض وقال..
/خل نمشي نشوف محي الدين ونتفاهم معاه..وهي رد بالك تكلميها..
نسرين:كان نبيها تعرف راهو قلتلها طول..
المهدي:حتى ربيع ماتحكيله شي..
نسرين بإبتسامة تهكم
/أكيد عرف من اهله..
تنهد المهدي بضيق وقال..
/السلام عليكم..
ومشي بيطلع وهي وراه سقداته بعدين سكرت الباب وهي تقول بقلق
/استرنا بسترك يارب..
🍃🍃🍃🍃
"والله بديت نكره نمشي غادي ياراجل"
مدله طاسة الشاهي وقال..
عبد القيوم:لاتزر وازرة وزر اخرى..ردبالك ضغظ هلك يخليك ديرها وطلق المراة ع سبة ذنب مالهاش بيه دخل..
ربيع؛مستحيل لو شن يصير والله مانديرها..
عبد القيوم:تحمل معليش وفي نفس الوقت ماتكثرش زيارات لحوش هلك لأنهم كل مايحقوا وجهك بيفتحوا معاك نفس السيرة خليهم يفهموا انك مضايق منهم لهالسبب بالك يخفوا عليكم شوي..
ربيع تنهد بضيق وقال..
/تو نشوف..
عبد القيوم:خليها ع ربك واشرب شاهي..
ربيع؛ننصحك نصيحه!
عقد عبد القيوم حواجبه وهو يسمع فيه..
ربيع:كان صار منه موضوع شوف ماليك قبل كانهم راضيين ولالا خير ماينكدوا عليك وعليها بعدين..
عبد القيوم..
/مافي حد يقدر يدخل في حياتي ويفرض عليا شي..وفي النهايه انا بعيد عنهم كان صار من زيارات مرتين في العام في اعياد الاسلام وكان الله ويبقى الله..
ربيع:انت توا تقول هكي بعدين تنصدم بالواقع..
عبد القيوم بضيق:سكر ع الموضوع ماضيقش علمي..
ربيع:حاضر..وسامحني..وشرب من الشاهي وهو يشوفله ويفكر في اللي سمعه من مرته عن معلومه خطوبة التارقي للسوريه اللي سمعتها من نسرين قبل..ماقدرش يحكيله طول خاف يدير مشكله مع اهله..فأختار يلمح تلميح وكانت هادي النتيجه..
اما عبد القيوم فكلام ربيع ضايقه هلبه..هو مايبيش يكون سبب تعاسه ووجع لطوبى..مايبيش مأساتها ترجع تتكرر..
يبي يعوضها وينسيها المرار اللي عاشاته كله..
🍃وطوبى في فهالايام اللي عايشتهم في هدوء.
كان في داخلها ضجه رهيبه..
من الخوف ع اختها المريضه والمتغربه..
وخوف ع اختها التانيه وبنت اختها من شبح الحرب..
🍃تحت شجرة الياسمين هي وصديقتها المقربه كانوا يتبادلوا همومهم..
اميمه بقلق..
/بلاد مايقدر فيها حد يخطط لمستقبله وهو مرتاح..
طوبى بضيق..
/صدقتي..كنت عابيه نتخرج توا ونرتاح..
اميمه:لكن تعرفي مازال متفائله بالمؤتمر اللي بيديروه..
طوبى:مااظنش يقدم ولايأخر الامر محسوم خلاص..
اميمه بخوف..
/حرب زي هادي..حرب يااني ياأنت تخيلي اللي بيصير فيها..
طوبى رفعت عيونها فوق بقلق وقالت..
/يارب لطفك بينا..شافت لأميمه وقالت..خايفه هلبه ع حسين ورجالة غرفه واريج...
اميمه:عبد الرؤوف مسيبه الجو هدا من قبل ماياخد غرفه..
طوبى:كان اني عرفت عبد الرؤوف كويس..مستحيل مايخشش الحرب هادي..
اميمه بضيق:يقعمز ويهني روحه صغاره صغيرين ومرته حامل..
طوبى بقلق:ان شاء الله يبديهم عن مبادئه..
🍃🍃🍃🍃🍃
"عبروف انت تعرف كويس ان اسكندر واحد من الناس البارزة عندنا يعني لو صار ماصار لازم يحضر هو الاول.."
عبد الرؤوف بضيق..
/الراجل كيف تزوج لو تعفوه مرة وحده..انتم سيبوه قولوله معاش نبوك..
:شن تقول ياراجل مش لعب هي وانت عارف كويس لما سيبت ماسيبتش بالساهل..
عبد الرؤوف سكت وهو مضايق ع الآخر..
:ياصاحبي كله بيد ربك وليلة قبرك ماتباتش برا..
شافله عبد الرؤوف شويه وهو يفكر بعدين قال..
/صدقت ليلة قبرك ماتباتش برا...
🍃🍃🍃🍃🍃
"تكلم ياكلب تكلم"
محمد بخوف:والله يابوي كذب ومافي منها الدوة هادي بكل..مشيت مرة صح وكانت في عرس خو صاحبي بس..
خديجه بخوف.
/معقوله تصدق دوة زي هادي عن ولدك يامحي!
محي الدين بعصبيه..
/انتي تسكري فمك مانبيش نسمع حسك...وانت..تعرف لو صارت وشدوك بالله العظيم وقدام امك اللي ماتعرفش تربي نتبرا منك والله نتبرا منك وننسى انك ولدي..وانت اختار.
ولف ومشي بيطلع..خبط الباب برجله بعصبيه وهو يقول.
/تفوا عليكم وعلى من رباكم..
التفتت خديجه لولدها وقالت بغضب..
/عاجبك ياحيوان في جرتك جتني الدوة..تعرف لو تطلع الدوة هادي حق نطلق عمك اشرف نخليه يربيك من اول وجديد ياتافه..خزي ضنوه تقصر العمر.
ومشت طلعت من الدار..
وهو من بعد ماطلعت قال لفظ نابي ودار حركه غير اخلاقيه..
بعدين ناض ومش سكر باب داره بقوة...
🍃واخته في دارها تسمع في اللي صاير والخوف مسيطر عليها...

#خريف
#طوبى

....يتبع.....