طوبى ☕شارع القهوة☕

الجزء_الثاني_والتسعين

#طوبى  "جنة طوبى"
#جمان_فريد
#الجزء_الثاني_والتسعين"العضيد"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الدعاء
‏مَنْ عوَّد لسانه وقلبه سُؤالَ الله في كل أموره ،
والالتجاء إليه في كل ما يقوم به ، والافتقار إليه في كل أحواله ؛ أورَثَه القوة في قلبه ، والبصيرة في شؤونه ،
والثبات في مبادئه ، والانشراح في صدره ،
والتوفيق في حياته ..
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃الإنسان لما بيوقع اول كلمه يقولا..آخ🍃
_________________________________________
"لاهي صغيره ولاالراجل صغير يارقيه عقولهم تحكمهم"
رقيه:لكن الناس ماتقولش هكي يامطيره..
مطيره بلامبالاة:خل اللي بيقولوه يقولوه أخر همي..
رقيه:باهي حق رفعلها كسوة؟
مطيره:ووااك غير من قاللكم بس!؟
رقيه:مافي شي يدرق في وقتنا هدا راهو..
مطيره هزت راسها وقالت..
/ايه..
رقيه:ومن رفعها؟
مطيره:مني بيرفعها يعني خواته..
رقيه :صار حتى هما خاشين فيها.
مطيره:مالاشنو كل شي مشي بالاصول..
رقيه:مسكينه كان لطفيه اللي خداها بالدرقه ولوحها تلويح..
مطيره:سميره مراة عازة نفسها...ماقالت اني ارمله وكبيره ناخد كيف مايجي..طلعت من حوش ماليها معززة مكرمه..
رقيه برفعة حاجب..
/صحة ليها..
🍃🍃🍃🍃
"جدك خدي مراة تانيه وجابها لحوشه!؟"
جوري:ايه..وحلوة ياحنينه..
لطفيه بضحكه دهشه:وحناك مغليه شن دارت؟
جوري بعدم معرفه..
/مانعرفش..
ضحكت لطفيه من قلبها بشماته بعدين قالت..
/نقدر نتخيل اللي صار فيها..ان شاء الله تقدر عليها وماتخيبش خيبتي..
جوري:حتى انتي مرت جدو ولا..
لطفيه بضحكه؛كنت من زمان..
جوري:عادي تولي مرة تانيه!؟
لطفيه بفزع..
/ووك عليا ماقدرت وحده بنقدر زوز..!
🍃🍃🍃🍃
وسميره بدت بتحركاتها للسيطره ع مملكة محمد شنيبه..
اول شي داراته بعد ماطلع..ضمت الحوش كله وهي تتعرف عليه..وبدت تخطط تغير فيه حاجات مش عاجبتها..
بعدين خشت للكوجينه وبدت طيب في الغدي ونوت تشكل وتنوع..وتسيطر ع اول طريق لقلب لراجل..
هدا كله وقوات العدو قاعد منسحبه في ثكناتها..تسحن وتحرق ومش قادره دير شي..
🍃وخديجه حابسه روحها في دارها في الشقه..دابها داب ولدها الصغير..
لكن هدا طبعا مايعنيش انها حتقعد عاقله..هادي استراحة محارب فقط لاغير..
🍃🍃🍃🍃
"امس هدرزت اني وعبد الرؤوف في الموضوع"
هادي غرفه تكلم في آلاء مكالمة فيديو .
"شن قالك؟"
غرفه بقلق:قالي ماتقولي شي لأختك اني تو نتصرف..
"حي!شن بيدير!؟"
غرفه؛قالي بيدبر كيف يشوف معتز ويهدرز عليه..لكن اني قلبي مش مطمن..
"علاش في شن فكرتي!"
بخوف قالت..
/خايفه يمشيله يكلمه ويتعاركوا ويرجع مختار يحطه في راسه مرة تانيه..
"كان مافيهاش كيف اني نكلمه خالي"
غرفه:لاردي بالك ماتعرفيش شن يديرلك..
"مستحيل يضرني..خالي كويس معاي هلبه ياروفي"
غرفه بحزن؛حتى اني كنت نقول هكي ياآلاء..
"صدقيني خالي مش سيء لهالدرجه ياروفي انتم راكبتكم منه فوبيا"
ابتسمت غرفه بحسره وتهكم...
🍃وراجلها في هالوقت كان قريب ع مدرسة معتز يراجي فيه امتى يطلع..
ومجرد ماشافه طالع قرب منه بالسياره وقعد ينادي فيه..
/عز..بو العز..
وقف معتز وشافه..وطول ابتسم..
قدمله وقال:عبروف شن جو؟
عبد الرؤوف؛مليح يازعيم..اركب..
فتح معتز الباب وركب وسكره..ورؤوف تحرك طول..
قطعوا مسافه قصيرة وهما يسألوا عن احوال عن بعض..
لعند ماوصلوا في مقهى...
~~~~~
معتز:كابتشينو..
عبد الرؤوف:قهوة وسط..
خدي العامل طلباتهم ومشي..
تنهد عبد الرؤوف وقال..
/شن داير في حياتك مع حوش جدك؟
معتز:ماشيه الامور..
عبد الرؤوف؛كله تمام مافيش مشاكل؟
معتز:لاكله تمام..
عبد الرؤوف هز راسه بعدين قال..
/باهي..ماتفكرش في امك؟
ملامح وجه معتز تبدلت للضيق..
عبد الرؤوف:امك توا محتاجاتك هلبه..قعدت بروحها..
معتز؛لامش بروحها كلهم معاها..
عبد الرؤوف؛هي تبيك انت..تبي ولدها الولد اللي يساند امه ويكون الراجل متاعها بعد بوك..
معتزبشي من الحده؛ اني مش راجل مزال صغير نبي نعيش حياتي زي اندادي مانبيش نكبر قبل وقتي..
عبد الرؤوف:من قالك اكبر قبل وقتك! اللي تبيه منك امك انك تكون معاها وقدام عيونها..
معتز؛هي مفروض ماتبيش الا مصلحتي..اني نعرف الام هكي تفكر في صغارها ماتفكرش في نفسها..
عبد الرؤوف:واني نعرف ان مافي حد  يستاهل تقدمه ع نفسك في حياتك كان بوك وامك..امك بالذات يامعتز..معتز اني امي فقدت خوتي وعائلاتهم في يوم واحد..ماصبرها حد من بعدهم غيري اني..اني درت جهدي كله بش عوضت امي عنهم كبرت روحي قبل وقتي ع خاطرها..وماريتش اللي درته ولى عليا بشر ولاخساره بالعكس ربي كفائني بحاجات ماكنتش نتخيلها بكل..
معتز قاطعه بإنزعاج؛سامحني سامحني..اني مش زيك..اني نفكر في حاجات تانيه نبي حاجات تانيه..عندي احلام اكبر من هكي!..
عبد الرؤوف بتعجب..
/اكبر من برك لأمك!؟
معتز:امي مش عاجزه ولامريضه..تقدر تهتم بروحها وعايشه مع خواتها وعيلتها مش محتاجتني بكل..ومش ضروري ندفن روحي بالحياة بش نبرها..نقدر نبرها بعد مانكبر ونولي زي مانبي وقتها نجيها وناخدها تعيش معاي وتكمل عمرها ماناقصها شي..
☘كلام معتز كان كبير عليه..هو قال اللي حس بيه واللي علمتهوله الحياه...وقال اللي اقتنع بيه من افكار زاد كبرهم مختار في عقله..عبد الرؤوف حس انه عاجز ع تغيير ولو شي بسيط من طريقة تفكيره وقناعاته..خاف لو زاد ناقشه الولد يسكر راسه وتكون النتيجه اسوأ من الحال اللي هو عليه..
لهذا رسم ع وجهه ابتسامه وقال..
/بصراحه اقنعتني..كلامك فيه وجهة نظر..
ابتسم معتز..
ع جية العامل بطلباتهم حطهم ومشي..
عبد الرؤوف:اشرب..
خدي معتز الفنجان وقعد يشرب بهدوء..وعبد الرؤوف فتح موضوع تاني وهو يشرب في القهوة كان بعيد عن موضوعهم الاول غير بيه جو معتز وخلاه يرخي اعصابه ويرتاح في الكلام معاه..
🍃بعدين طلع بيه لحوش جده..حطه غادي وتوجه لمحلاته..
🍃🍃🍃🍃🍃
الساعه2:00ظهرا..
في الدار اللي ولت ليها بروحها بعد زواج بنات اختها..وع عيون بنتها..
خدت اللوحه وركبت فوق السرير متاعها وعلقتها والابتسامه ع وجهها..
بعد نزلت ومشت وقفت جنب سرير جنه وهي تقول..
/حلوة هكي ولا!؟..حلوة هلبه..شافت لبنتها وقالت..تعرفي عسولتي تسهفت نتعلم الخط.. تحسي هكي فيه متعه وفن...
جنه رفعت الشكشاكه وحركتها..
ضحكت طوبى وهي تقول..
/شن قصدك!؟ ع خاطره يعني!!؟..
حطت يدها ع خدها وقالت بإرتباك..
/شن ع خاطره هادي..شن نخرط اني!
غيرت نظرها لجنه لقتها حاطه يدها ع خدها..ضحكت بدهشه وقالت..ياسلم هالئلوده.."قلوده"..
وطلعتها من السرير وغرقت خدودها بالقبل..
🍃🍃🍃🍃🍃
"اني شويه تانيه بنمشي لحوش اختي بنطلع معاها للمول ونتلاقوا تمام"
مؤيد وهو بطريقه للحوش يكلم في مناسك هاتفيا..
/مافيش مشكله عادي!؟
"خيرك خايف مؤيد"
مؤيد بقلق:اني خايف عليك انتي مش ع روحي..
"قتلك ماتخافش مايصير شي..المهم انت شني"
ابتسم وقال:اكيد جاي..مستاحش نشوفك.
"خلاص ع موعدنا..باي توا"
نهت معاه المكالمه..وهو نزل تليفونه وكمل طريقه وقاعد في قلبه شي من القلق..
☘اما مناسك فكانت واصله لمرحلة من البرود مخليتها مش خايفه من اللي ناويه ديره..اللي داره مالك خلاها تفقد احترامها ليه بالمرة وخوفها منه....
🍃🍃🍃🍃
وتعدي الساعات..
ويجي موعد اللقاء..
خش مؤيد للمول متوجه لمكان لقائهم..
في الوقت اللي كانت فيه امها جايه مع وحده من صديقاتها للتسوق..
ويشاء الله بصدفه..يخليها تمشي لمحل قريب ع مكان لقائهم..وتشوفهم مع بعض..
المراة قلبها كان مليان ع صغارها ومرت بوهم وتبي تبرده بأي شكل..
وسرعان مافكرت..وقررت تنفذ..
🍃ام مناسك؛خشي  لاحقاتك..
استنت صاحبتها تخش..وتباعدت شويه عن المحل واتصلت بولدها مالك وعيونها عليهم..
نادى الخط لين فصل ماردش عليها..كتبت رساله وبعتتهاله..
اقل من دقيقه واتصل بيها طول ردت..
:تعالى شوف بعيونك ربايه مرت بوك اللي قريب حرقتني ع خاطرها..العنوان عندك ..وسكرت عليه..
شافت لمناسك بحده بعدين مشت خشت للمحل..
🍃مناسك بحزن؛حاسه بفراغ يامؤيد..مروة كانت قريبه عليا لدرجة حاستها توأمي..مادرتش صاحبه زيها نظيفه هلبه من داخل ماعندهاش في جو الخبث والمظاهر وعقلها كبير نحبها لما تنصحني ولما تسمعني واني نحكيلها عن اتفه تفاصيل حياتي ولت تفهم عليا من قبل ماندوي..اني يامؤيد خواتي كبار مش من جيلي مايقدروش يكونوا صاحباتي..تنهدت بحزن وقالت..بنبكي..
وبدت تبكي..وهو يشوفلها بتعاطف ويقول..
/خلاص بالله عليك لما نشوف بنت تبكي نقعد نفرفش..
ضحكت من بين دموعها وقالت..
/قداش شفت وحده تبكي قبل..
هو رفع حاجبه وقال..
/عدي واغلطي لكن مافيش فيهم وحده احلى منك..
مسحت دموعها وهي تضحك..
ضحك وشاف للمحل اللي في جنبهم كان محل هدايا..غير نظره ليها وقال..
/شويه وجاي..
ومشي طول خش للمحل وهي تشوفله بإبتسامه من بين دموعها...
🍃وتوصل سيارة معين قدام المول..
نزل مالك وهو يقول..
/خليك مستاقظ..
ومشي طول خش للمول..ومعين معاه بنظرات قلق..
🍃مشي مالك بإتجاه المكان اللي وصفاته امه في رسالتها..
وصل في الممر اللي فيه المحلات
شاف امه واقفه قدام واحد من المحلات مشالها طول..
وهو ماشي شاف اخته واقفه ع سياج بروحها..رد نظره الحاد لأمه لما وصل فيها وقال..
/امتى تبطليه الجو متاعك هدا!
امه:والله العظيم كان معاها ريتهم بعيوني..
مالك بإزدراء:خسارة جيتي امي..
امه وهي تشوف جهة مناسك..
/باهي علاش قاعده واقفه غادي !..
شاف لمناسك وهو عاقد حواجبه..
ويطلع في هاللحظه مؤيد وفي يده كيسة هديه ومشالها وقف عليها وهو عاطي بالظهر..
امه بإبتسامة نصر..
/تفضل شوف..
مالك بغضب..
/ياعن فيتها الكلبه..
🍃مناسك وهي تاخد في الهديه من مؤيد عيونها جو ع مالك جاي ناحيتهم..
بفزع قالت..
/رد بالك تتلفت واهرب طول..
مؤيد قعد يشوفلها بإستغراب..
هي بعصبيه وخوف..
/اهرب..اهرب..
مؤيد طول هرب يجري..
وهي هربت من جهة تانيه..
ومالك قعد يجري ورا مؤيد وهو يسب ويلعن فيه..
ومؤيد يجري بخوف..ويتخطى في الناس وفي قلبه خوف كبير ع مناسك اكثر من نفسه..
🍃مناسك اللي هربت للمكان اللي فيه اختها ومرت بوها..
وصلت فيهم وهي تقول بهلع..
/نوضي روحي بيا لحوشك..
فوزيه بفجعه:خيرك!
مناسك بخوف:مش وقته ياماما..هيا ياجيداء..
جيداء بخوف:باهي..هيا..
ومشت بسرعه وفوزيه ومناسك وراها..
فوزيه بخوف:قولي شن دايره تكلمي!
مناسك وهي تبكي بخوف..
/شافنا مالك ياجيداء!
جيداء بصدمه:غبارة سودا...
🍃🍃🍃
ويطلع مؤيد من المول وهو يجري ومالك وراه..
شافهم معين..شغل سيارته وتحرك ناحيتهم طول..
وصل في مؤيد وطلع ع الرصيف وسكر عليه..
مؤيد وقف في مكانه وهو مستسلم..حس وكأنها نهايته..
ويشده مالك من الخلف ويجبده ليه ويضربه بقبضة يده ضربه حذفاته ع سيارة معين..
جاه مرة تانيه شده من الخلف وفتح باب سيارة معين وركبه من الخلف وهو شبه دايخ..سكر الباب وركب القدام..
مالك وهو يلهث:ارفعنا لهديكا الجيهه..
معين شاف لمؤيد وهو دايخ والدم ينزل من انفه بعدين تحرك طول...
🍃ومناسك في سيارة اختها تسمع في شتايم وهزايب فوزيه..وجيداء كلت نصيبها حتى هي..
لين وصلوا لحوشها..
🍃🍃🍃
جيداء بقلق..
/حي عليا تو يروح راجلي ويصير العار قدامه..
فوزيه بغضب:وخيرك مافكرتيش في العار وانتي تساعدي فيها!
مناسك ببكي..
/والله ياماما ماني ناقصه خلاص!
فوزيه بعصبيه..
/سكري فمك مانبيش نسمع صوتك..
مناسك غمضت عيونها بشده وهي تبكي..
ويجي اتصال لجيداء..شافت تليفونها شهقت وقالت..
/ياحليلي يتصل ياايامي سود..
مناسك بخوف..
/زعمه شن دار في مؤيد!
فوزيه رفعت يدها وقالت..
/اسكتي ..
سكتت مناسك وولت تبكي.
فصلت المكالمه عند جيداء وهي في حالة خوف وذعر قالت..
/اكيد جاي هني اكيد..
لحظات وسمعوا باب الحوش يدق..
فوزيه بدي قلبها يرجف من الخوف..
جيداء بخوف:بنفتحله قبل مايديرلي العار قدام الجيران..
ومشت طلعت بسرعه..
مناسك سكتت عن البكي فجأه وهي في قمة الخوف قالت..
" حي عليا ياماما"..
🍃برا..
فتحت جيداء الباب ويخش مالك زي الوحش الغضب عامي عيونه..
جيداء تلحق فيه وهي تقول بتوسل..
/بالله عليك اهدا تربح ..مراد قريب يروح ماديرليش العار قدامه..
مالك بصوت عالي كله غضب..
/مناسك ياكلبه..
وصل في وسط الحوش..
لقي فوزيه واقفه قدام مناسك تحامي عليها وهي تقول..
/عاركتها وضربتها..قريب قتلتها..
مالك وهو يحاول يضبط نفسه..
/يام ارجوك حولي ماتخلنيش نغلط قدامك..
فوزيه برجاء..
/سلم ولدي خل نروحوا للحوش ونتفاهموا غادي راجل اختك قريب يخش..
ماردش عليها وقدم وجبد مناسك من وراها..
فوزيه بذعر:لا!..
وجيداء ترجف من الخوف...
وينزل ع وجه اخته بصفعات خدروا وجهها..
بكل قوتها فوزيه بعداته عنها وهي تقول ببكي..
/خلاص ياسر..
مالك بغضب شديد..
/بنقتلها الكلبه اللي تقرن فيا درتها بنادمه وعطيها حريتها شوفي شن دارت الوسخه..
مناسك..بعد ماسمعت اللي قاله راح خوفها وحل محله الغضب اللي خلاها تقول..
/واللي دايره انت شني!!؟ حاسبت روحك عليه! لما تشوه في سمعة بنات الناس وتلبسهم تهم شرف بش ترضي صاحباتك شن مفروض يسموك!
هو جمد فمكانه حتى لسانه حسه انشل..
جيداء بصدمه:شن تخرفي انتي!
مناسك بغضب ودموعها ينزلوا..
/اللي سمعتيه..اللي قلته كله داره خوك المحترم لمروة..
زادت صدمة  امه واخته فيه..نظراتهم ليه كان فيها شي خلاه يحس بإحتقار شديد اتجاه نفسه..وفي نفس الوقت غضب شديد ع اخته..
ويقدملها بإبندفاع مخيف..
ويشدها ويقعد يضرب فيها ضرب مبرح..
وامه واخته يحاولوا يحزوا..
فوزيه بدت تدهش وهي تقول..
/تربح يامالك تربح..
مناسك بوجع:ياحقير..ياوسخ..ان شاء الله تموت..
زادت غضبه عليها ضربها بقوة خلاها ترتمي ع الارض..
ورفع رجله بيضربها بيها..
جاته امه بدفه..ولأن الغضب كان مسيطر عليه وعامي عيونه دفها بقوة وخلاها طيح ع يد الكنبه تضرب جبهتها وتنزل ع الارض..
صاحت جيداء ع طول حسها وهي تقول..
"امي"..
التفت مالك شافها مرميه ع الأرض والدم ينزل منها..خرس عنه الغضب فجأه..والصدمه جمداته..
ومناسك وهي ع الارض تتوجع كانت تشوف لحال فوزيه وهي تبكي وتقول بصوت مخنوق..
"ماما"..
🍃🍃🍃🍃🍃
"هاك ولدي عشاكم"
يزن بضحكه؛كان تعودينا بهكي تحصلي فينا..
سميره بإستغراب..
/كيف كان نعودكم بهكي!؟ قصدك قبل كنتوا طيبوا بارواحكم!؟
يزن:مرة بوي ومرة نمشوا لحوش عمتي نسرين ومرة ناخدوا من برا..
سميره في نفسها..
"عديها سحيقه! قاعده بصحتها تهد الحيط تصرعه مستخسرة طيب لهالمساكين!"..
ابتسمت وقالت..
/من اليوم وبرا غادي غداكم وعشاكم من هني متفاهمين!
ابتسم يزن وقال..
/متفاهمين..
سميره:هي برا سلم ولدي طاحوا ايديك وانت رافع الصفره..
مشي يزن وهو يقول..
/صحيتي..
هي حركت راسها يمين ويسار اسفا وخشت للكوجينه..
ضمت الحوسه اللي فيها..
بعدين مشت لدار مغليه..
وقفت قدامها ودقت الباب بعدين قالت.. /حسبتك في العشي ياضريرتي..تلقيه ع الرخامه ياحنه..
ومشت لجناحها وهي تضحك بكتمان..
وصلت فيه وخشتله وسكرت الباب..
وتطلع مغليه من الدار..
وتمشي للكوجينه..
تلقى السفرة ع الطاوله مغطيه..
وتعريها وتاخد اللي فيها بالصونيه وتصب اللي فيهم غ الطاوله وع ارضية الكوجينه..
واخر شي تمشي دور ع الشيباني تلقاه في الكوشه..
وطلعه ودير مادارت في السفرة الاولى..
وين مشت بتطلع مررت نظرها ع الكوجينه بمكر بعدين طلعت لدارها...
🍃عشرة دقايق ويوصل محمد شنيبه..
وتطلع سميره تستقبله..
/مرحبتين مرحبتين بنور العين..
ضحك ومدلها سفرة حلو صغيره وقال..
/وهادي البكلاوة اللي طلبتيها..
خدتها منه  هي تقول..
/سلمك جياب..يرعاك العاطي الوهاب..
وهو يسمع فيها ويضحك..
سكرت الباب وهي تقول..
/جعان..
محمد شنيبه:بنطيح من الجوع..
سميره:ماطيحش وسميره وراك ياغالي درتلك عشي منغنغ..
وهما فايتين من قدام الكوجينه تلامحت سميره شي خلاها ابتسامتها تتلاشى...
/ترا شويه حميدا..
وقدمت للكوجينه..وتخشلها وتشهق..
خش معاها وشاف اللي شافاته انصدم..
سميره بصدمه مصطنعه..
/هدا شنو!!؟ معقوله نعمة ربي ديرلها هكي!..
شافت الكوشه مفتوحه..غيرت نظرها للسفره اللي جنبها شهقت شهقه اقوى من اللي قبلها وقالت..
/عشاك يانهاري!!.
محمد شنيبه بنفاد صبر..
/وصلتها حدها خلاص..وجي بيطلع هي شداته وقالت..
/والله ماك ماشيلها ولانخليها تنكد علينا اكثر مانكدت..صل ع النبي وبرا بدل حويجاتك واني نتصرف..
محمد بضيق:هلبه عليك هكي!
هي قالت بضحكه..
/شن قالولك عليا مرخيه ! راني لهلوبه تو تشوف كيف نردها زي الطاسه ونديرلك عشي تاني..
ضحك وقال؛المهم خاطرك مش ضايق بس..
هي بإبتسامه ساحره قالت..
/كيف تبي خاطري يضيق وانت حداي..
محمد بهيام:والله قبلك ماكنت عايش..
ضحكت سميره..
🍃ومشي محمد للجناح..
وهي تنطرت زي الطقاشه كيف مانقولوا..نظفت الكوجينه كلها  وغسلت الماعين..
وطلعت لحم ذايب كان في الثلاجه ودارت قلايه وقرضت  وطماطم وخيار وحطتهم حداها مع مشروب ومشت طول للجناح وهي تغني..
/بو عيون سماح انا غزالي بو عيون سماح..
🍃ومغليه في دارها تسمع وهي تغلي من الغضب ودموعها ينزلوا...
🍃🍃🍃🍃
"والله كان صارت فيها حاجه حرقت الدنيا حرق"
معين:قول الحمد لله جت بسيطه..
مالك بغضب:ياريتك خليتني ع الكلب هداكا خديت روحه..
معين:وتولي قاتل!
مالك سكت وهو في قمة الغضب..
معين تنهد وقال..
/خلاص توا اللي صار صار..اهم شي امك بخير..والباقي تحصيل حاصل..
مالك بضيق:انفضحت قدامها ياصاحبي عارفها بتقاطعني..
معين؛حقها تزعل وتقاطع..انتم امانه عندها الغلط اللي ديروه في وجهها هي..
مالك بتهكم؛هدا ماقالت هديكا المراة اللي ينقاللها امي..زادت قهرتني لما وصلت فيها..
معين بأسف:لاحول ولاقوة الا بالله..
مالك بعصبيه وقلق..
/عارفها مش  حترتاح لين توصل الدوة لبوي..
🍃الحديث دار بين مالك ومعين في جنان حوشهم..
وفي الحوش داخل...
تحديدا في دار فوزيه وراجلها..
فوزيه وهي متكيه ع السرير:يالاش شافها لابسه لبسة مش عاجباته وتضحك بصوت عالي..
:ينوض يدير فيها قريب قتلها!
فوزيه:مالك وتعرف طبعه واعر..ومناسك لسانها طويل استفزاته..
تنهد بعدين قال..
/باهي انتي شنو توا؟
فوزيه؛مافيا شي..خبيطه عاديه زي الخبشه عاد سمعت الدكتور بروحك شن قال..
حرك راسه يمين ويسار وهويقول..
/هالولد طلع من دون خوته طبعه زي الزفت والدلال فسده وخلاه لانفع في قرايه ولادار لروحه مقام..
فوزيه:حرام عليك مش لهالدرجه هونا فاتح قهوة الله يبارك كل يوم تملا وتفرغ..
بوه بعدم رضا:مش زي مانبي يافوزيه قارني بينه وبين خوته ماتقولش خوهم بكل..
فوزيه؛رد بالك تقول دوة زي هادي قدامه..الحمد لله حاله بدي ينصلح وولى شاد في الصلاه ماتشوفش فيه..
:ان شاء الله مش طهقه..
فوزيه:قول ياربي ثبته..
هز راسه وقال:ربي يثبته...
🍃🍃🍃🍃🍃
تاني يوم...
27مارس...سنة2019..
الساعه 10:15صباحا..
في احد الحدائق العامه في العاصمة..
كانت نجاه مقعمزة وحواليها صغارها يراجو في جية صابرين..
شافتها جوري جايه وقالت بفرح..
/خالتو..
ومشتلها تجري..
وصابرين سرعت خطواتها بش وصلت فيها وضمتها..
بعدين خدتها من يدها ومشت بيها لأمها وخوتها..
سلمت عليهم كلهم ..وخدت معاذ وقعمزت جنب نجاة وهي حاطاته ع رجليها..
🍃صابرين:نفكر نقعد برا ومعاش نروح بحرب ومن غيرها..
نجاة:صدقيني هكي احسنلك مدام عندك كيف تحققي ذاتك ماضيعيش الفرصه..
صابرين شافتلها بإبتسامة حزن وقالت..
/حتى انتي فكري في نفسك يانجاه..
تنهدت نجاه وهي تشوف القدام بدون ماترد عليها..
بدت ع وجه صابرين ملامح الأسف بعدين قالت..
/تفطروا مرة تانيه..
شافتلها بإبتسامه وقالت.
/نفطروا..
🍃وخدوا فطروا وفطروا مع بعض في الجردينه..
هدرزوا هدرزة حلوة..وضحكوا ع هدرزة معاذ ومشاغباته..
وسرعان ماتمر الساعات الحلوة..ويجي وقت الوداع..
لاصابرين ولانجاه قدروا يمنعوا دموعهم..
والصغار حسوا بحزن من سلام خالتهم عليهم حضنها ليهم كان حضن مودع..
جوري اكثر من حس بهالشي.. ومن بعدهم جي وداعها لأختها..
حضنوا بعض بقوة وصابرين قالت لنجاه..
/حاولي تعيشي سعيده..
نجاة ودموعها ينزلوا..
/حتى انتي..
تباعدوا عن بعض بالغصب..
ونجاه كانت حاسه بشعور مخيف عمرها ماحست زيه في حياتها..
صابرين بإبتسامه من بين دموعها..
/باي ياعيوني..
ولوحت بيدها مودعه وهما ردوا عليها..
معاش قدرت تتمالك نفسها طول هربت ببكاها عنهم...
وهما معاها بنظراتهم الحزينه..
جوري ودموعها في عيونها..
/معاش بنشوفوا خالتي؟
نجاه بنبرة مخنوقه..
/إن شاء الله نشوفوها مرة تانيه..
🍃وروحت صابرين في سيارة بسواق..
كانت تبكي بالعبره وهي تتفكر في ايامها الحلوة مع خواتها..
وقداش تمنت لحظتها لو كانت انسانه تانيه وعاشت حياة نظيفه ماخلتش مصيرها يؤول لما هي عليه الآن..
بعد ماهدت شويه..كتبت رساله وداع لأختها الكبيره اللي ماتقدرش تشوفها وبعتتها..وبعدين طفت التليفون...
🍃🍃🍃🍃🍃
"باب سحاب؟"
علي الواعر:يسهل عليكم الخشه والطلعه..
طوبى:كان بنديروه هكي يعني بالمحرك بيكلف..
علي:حسين قال عليا..
طوبى بضيق:حسين..
علي:ايه حسين ماعندك علاش تقلبي وجهك هكي هدا توا راجلكم ومسؤول عليكم مايقدر حد يتكلم..
هزت راسها بالموافقه وهي تقول..
/مادام هو يبي خلاص..
علي:باهي خشي ديريلي طويسة شاهي خضرا هدا وقتها وانتي طالعه بيها جيبي جرينتك معاك..
طوبى بضحكه؛حاضر..
وناضت من قدامه ومشت خشت للكوجينه..
بعد ماخشت هو تنهد وقعد يمرر في نظره ع الجنان اللي حلا منظره فصل الربيع..
🍃🍃🍃🍃🍃
"شن تبي نديرلك غدي"
محمد؛اللي ديريه انتي باهي..
سميره ابتسمت بصمت..
وصلوا في الباب عطاته طاسه ميه مرقيه يشربها..
شربها وسقداته بدعواتها اللي ع القافيه وخلاته يضحك..
سكرت الباب وراه وهي تقول..
/وتو نبدا بالحمله متاعي..بس قبلها خل نشغل البقره..
🍃وبدت سميره بحملة تنظيف الحوش وهي تسمع في سورة البقره..
وضرتها محبوسه في دارها تاكل في بعضها وخلاص..
شويه وبدت تفكر في طريقه تبين فيها لسميره انها مولاة هالحوش الوحيده ومافيش وحده تقدر تاخد مكانها..
وبعد مافكرت وصلت لشي وبدت بتنفيذه..
🍃🍃🍃🍃🍃
الساعه 2:00بعد الظهر
كانت مروة في الكوجينه تجهز في سفرة الغدي ليها ولأختها..
خشت عليها تاله وهي تقول..
/كان نقولك شن صار لمؤيد ولد جيرانا..
مروة بقلق:شن صارله؟
تاله:لمار قالت لقوه ملوح قدام حوشهم مغمى عليه وواكل طريحه باهيه..
مروة حست بخوف شديد ع مناسك..
تاله بقلق:زعمه مالك شافه مع اخته ولاحاجه!؟
حطت مروة يدها ع ذقنها وهي تفكر بقلق..
حاولت تمنع في نفسه من اللي بديره لكن ماقدرتش..
مشت طلعت من الكوجينه لدارها..
خشتلها وخدت تليفونها من ع طاوله المكتب اللي تقرا عليه..
طلعت رقم مناسك من قائمة الحظر بعدين اتصلت بيها..
🍃وفي هالوقت..
مناسك كيف راحت في النوم بعد ماغدتها امها..
وين جت فوزيه بتطلع من الدار..رن التليفون..
مشت تشوفه..لقت مروشه يتصل بيك..
خدت التليفون هي تشوف لمناسك ومشت طلعت بيه من الدار..
☘فتحت الخط وردت..
فوزيه؛ايوه مروة..
"خالتي فوزيه!..كيف حالك"
فوزيه:الحمد لله كيف حالك انتي وحال امك وخواتك..
"الحمد لله..خالتي وين مناسك؟"
فوزيه تنهدت بضيق وقالت..
/والله شن بنقولك يابنتي صارت مشكله وحصلت ع خاطرها طريحة من مالك قريب قتلها..
كان الصمت جواب مروة ع اللي سمعاته..
فوزيه بأسف واحراج..
/اني عرفت كل شي بنتي..مناسك قالت كل شي..والله ماعارفه شن نقولك..مافيش كلام ينقال..حتى لو قتلك سامحيني مش حتنفع بشي..لكن بنقولك بارك الله فيك اللي ماحكتيش لحد من اهلك..
"مانبيش المشاكل تكبر بس"
فوزيه؛عارفه بنتي عارفه..بس بالله بنطلب منك طلب نسألك بالله ماترديني..مادخليش صحبتك بمناسك ف اللي داره خوها..راهو ليها وقت مقاطعاته وماتشوفش لوجهه..واني يابنتي والله ماعرفت بحاجه كان امس راهو..
"خالتي اني اتصلت بش نعرف حال مناسك بس وسامحيني مانقدرش نرجع علاقتي بمناسك بعد اللي صار"
فوزيه توقعت هالإجابه من مروة لأن الموقف صعب جدا..يصعب تجاوزه..ردت ع مروة تقول..
/معذورة يابنتي وعندك حق..انتي بنيه طيبه ومحترمه وتستاهلي كل خير..
"بارك الله فيك خالتي..بالسلامه"
فوزيه بضيق:بالسلامه بنتي بالسلامه...
ونهت المكالمه وهي تقول...
/الله يسامحك يامالك..
🍃🍃🍃🍃
الساعه 5:00عصرا..
كان محمد شنيبه برا ماروح من لما طلع لصلاة العصر..
وسميره مقعمزة في جناحها لابسه ومتأنقه وتراجي فيه يجي بش يرفعها لحوش الواعر..
سمعت باب الحوش يدق استغربت..وقالت في نفسها بالك حد من صغار المهدي..
مشت طلعت من الجناح..ولما جت بتتوجه للباب..
شافت مغليه طالعه من دارها وهي بكامل اناقتها وتمشي بإتجاه الباب وهي نافشه ريشها..
وصلت فيه وفتحاته..
ويخشوا خوات مغليه ونساوي خوتها وحده ورا التانيه..
ومغليه ترحب وتأهل وتسهل..
رفعت سميره حاجبها وهي تشوفلهم..
مغليه:خشوا الصاله خشوا..
وحده من خواتها شافت سميره تصنعا استغربت وهي تقول..
/من هادي!؟
مغليه ضحكت وقالت .
/تكسيده محمد الجديده عارفتيه كل 30عام يكسد عام وبعدين يولي..
ضحكوا خواتها ونساوين خوتها..
مغليه وهي تشوف لسميره بإبتسامه كبر..
/خشوا خشوا..
كلهم وحده ورا التانيه خشوا للصاله ومغليه في الباب تراجي فيهم يخشوا كلهم..
بعد ماخشوا..قدمت لسميرة وهي تمشي بعجرفه..
لين وصلت فيها وقالت..
/وتي القهوة والحلوات ياضريرتي..وضحكت نص ضحكه
بعدين مشت للصاله...
مررت سميرة نظرها حواليها..بعدين ضحكت وهزت راسها..
وينفتح باب الحوش ويخش محمد..
مشتله طول بدون ماتتكلم..
وصلت فيه وهو قال..
/شن زحمة الشلايك في الباب هادي!؟
سميره:قبيلة مغليه جت..
محمد:بدينا..
سميره:تحسابني بنعدل عليهم ولاندورهم ولايحركوا فيا شعره..المهم نلبس عبايتي ونطلعوا حميدا..
ابتسم وقال:نراجي فيك في القراج..
ابتسمت وهي تقول..
/خمسة بس..
ومشت طول للجناح..
🍃🍃🍃🍃
وفي حوش لطفي الواعر ..
كانوا كلهم مجتمعين..
نبيله جتهم وهاديه جتهم..وحتى اميمه روحت من الخدمه بكري اليوم ع خاطرها..
اميمه بضحكه حماس..
/تبوني نفوت عليا الاخبار اللي تمسح ع الكبد!
مطيره؛نعاودوها شن عندنا نديروا...
اميمه:مش زي لما تسمعيهم من المصدر نفسه..
ضحكوا..
فجاه سمعوا باب الحوش دق..
مطيره؛اني نفتح اني..
وناضت تجري وطلعت من حداهم..
ع جية طوبى من الدار وفي يدها جنه..
خشت عليهم وهي تقول..
/متشوقه..
غرفه:جيبي بنيتي جيبي..
ابتسمت وقدمت بيها لغرفه مدتهالها..
خدتها غرفه وهي نقول..
/قميرتي ياناس..ركزت فيها وقالت..تعرفي بيبو بنتك ولت معاش تجيبلك بكل..
طوبى:حتى اني ملاحظه شكلها تغير هلبه حتى عيونها مش زي عيوني لاشكل ولالون..
ركزت مطيره في عيون جنه وقالت في نفسها..
"سبحان الله..عيونه هو"
فردوس:يقعد شكلها يتغير كل ماتكبر..
طوبى:لكن شبهها لبوها واضح..
غرفه:مش هلبه..هي تشبه حد تاني مانبيش نقول اسمه..
كلهم شافوا لطوبى..
طوبى قعدت تشوف لبنتها بضيق وهي تقول..
/عارفه..وملاحظه..
وفجأه..
سمعوا زغرودة مطيره..
شافوا لفم الصاله لقوها خاشه بسميره اللي كانت باينه عروسه من جميع النواحي..
هاديه بدت تصفق وهي تغني..
/حصلها ياعليك ذهيبه..خير من الف جني في جيبه..
بدوا يصفقوا ويردوا وراها..
وسميره تتفرج عليهم وهي تضحك..
مطيره..
ياسعدودي عندي قسمي..والحساد محارم خشمي..
ضحكوا وردوا وراها..
سميره تحمست و بدت تصفق وتغني..
حسادي ماندور فيهم..عارفه روحي صقع عليهم..
زغردوا هاديه مطيره..
ومطيره شدت سميره وقعدت ترقص فيها وهي تغني..
زيدي في عزك يابنيه..جكتوره والعين قويه..
صاحت سميره وهي ترقص..
هاديه..
صممتي ياعين عليهم..
دونك جبيتهم جبتيهم..
وسميره شاشت معاش في شي يشدها..
خلوني بنطير طيارة..خلوني زي الفرارة..
ووقفوا تصفيق وقعدوا يضحكوا...
غرفه:ماتوقفوش جننوتي ترقص..
طوبى شافت لبنتها وهي تضحك..
وهما رجعوا يصفقوا ويغنولها..
زيدوا السنافر زيدوا..شيشة وحليب النيدو..
وجنونه ترقص..وامها تضحك من قلبها ع حركاتها..
🍃🍃🍃🍃🍃
" توا طلعت بيهم الطيارة..لما يوصلوا بلغني طول"
هدا مختار يتكلم هاتفيا و يوصي في حد من معارفه ع امينه وصابرين..
مختار:تمام.مشكور..تحياتي..
ونهي المكالمه..وحط تليفونه ع المكتب قدامه..قرب اللاب توب ليه بيفتحه..
وينفتح عليه باب المكتب فجأه..
وجه نظره ليه وهو عاقد حواجبه بإستغراب..
فردهم لما شاف نسيبه خاش ومعاه السكرتيره تقول بتوتر..
/ماقدرتش نمنعه استاذ..
عبد الرؤوف وهو يشوف لمختار..
/قلنالها نسيبه راجل اخته ماتبيش تفهم..
مختار حرك نظره لسكرتيره وأشرلها بيده تطلع..
هي هزت راسها ومشت طلعت وسكرت الباب..
ناض مختار..وطلع من ورا المكتب وقدمله وهو يقول..
/شن الريح اللي حذفاتك علينا!
تنهد عبد الرؤوف وتكلم بهدوء وهو يقول..
/مش جاي ناخد ونعطي معاك..جاي نحذرك بس..
رفع مختار حواجبه تعجبا بتهكم..
عبد الرؤوف وهو يأشر بأصابعه السبابه والوسطى..
/هما كلمتين..خلي خواتك في حالهم..
ابتسم مختار ابتسامه واسعه وهو يقول..
/ولوا اربعه..
عبدالرؤوف:قتلك مش جاي ناخد ونعطي معاك..يامختار تحت ايديا مايدمرك..يدمر اللي قعدت سنين تجري وانت تبني فيه..الاعمال المشبوهه الجرائم المقيده ضد مجهول..غسيل الاموال..طبعا الكوارث هادي كلها لو عطينا بيها الدوله اللي مجنساتك علم..حتكمل عقاب عمرك في الحبس..
تبدلت ملامح وجه مختار المتهكمه لملامح ع قد ماتبان هاديه ع قد ماهي مخيفه..
حط عبد الرؤوف يده في جيب جاكيته وطلع منه فلاش وقال..
/هدا مايثبت ان تحذيري ليك جدي مش دوة بس..نزل يده وقال..بتقول علاش ماسلمتش اللي عندي عليك طول..بنقولك مانديرهاش..ولهلبة اسباب..اولهم لأنك خال صغاري..تانيهم لأنك خو مرتي..تالتهم ع خاطر عيلتك اللي ياما صار فيها من بعد فضيحتك الاولى مانبيهمش يرجعوا يعيشوا نفس الشي..واخرهم..كرامه للراجل اللي عطاني بنته ودارني ولده..وبسببي ذل نفسه وجاك...
لوح الفلاش ع المكتب وهو يقول..
/لو تصير فيا حاجه انت وراها..حتعطي الضي الاخضر لناس تانيه يسلموا كل شي للحكومه الالمانيه..وانت اللي تكتب نهايتك بيدك..
ولف ومشي فتح الباب وطلع وسكره وراه..
رمش مختار عيونه بشي من البطئ مرتين..
رفع حواجبه شويه..وحرك عيونه للفلاش...قعد يشوفله للحظات..
عقد حواجبه وقدمله..خداه..ومشي ورا مكتبه جبد اللاب توب..
وحطه قدامه..وفتحه..وقف ع حيله حول الغطا متاع الفلاش..
بعدين حطه في الفتحه الخاصه بيه فاللابتوب..
وبدي يضغط ع الازرار متاعه..لين خش ع محتويات الفلاش..
وشاف ماخلا عيونه يتوسعوا ع الآخر بصدمه..
من اللي جمع هالمعلومات..امتى لحقوا يجمعوها؟!!
هدا ليه وقت يجمع فيهم في الوقت اللي انشغلت فيه بغيره!!؟
مرة تانيه يامختار تحسبها غلط...مرة تانيه يامختار يخونك تفكيرك..
حرك عيونه لرقعة الشطرنج..
ركز بنظره ع قطعة الفيل اللي كانت موجوده في الطرف الابيض..رد نظره من جديد لشاشة اللاب توب..
حط ايديه الزوز ع الطاوله وغمض عيونه ونزل راسه للأسفل وبدي يتنفس بسرعه...
وفي لحظه..شد اللاب توب وبدي يخبط فيه ع الطاوله..
مرة ..واتنين..وتلاته..وبعدين لوحه ع طول يده جي ع رقعة الشطرنج وطاح وطيح معاه كل القطع الا زوز...
الملك الأبيض..والوزير متاعه...
🍃🍃🍃🍃🍃
في نفس الوقت..
طلع عبد الرؤوف من المكان اللي فيه مختار..
ومشي بإتجاه سيارته..
ابتسم لما بان عليه حسين شاد واحد من التوأم ويلاعب..
مشي طول ركب وقال..
/ديما ينوض قبل خوه الشفش هدا..
حسين شافله وقال..
/شن صار..
عبد الرؤوف:اللي بيصير ينعرف بعدين ياحسين..حسين..تلاته ولوا متشاركين في السر هدا..انت والحاج علي والمحجوب..ممكن يكون عند غيري مشكله ثقة فيك بحكم علاقتك بيه..لكن اني لأني نعرف الرجاله كويس خبرتك..
ابتسم حسين ابتسامه خفيفه وشاف لأواب اللي كان يلعب بمفتاحه بعدين قال..
/بارك الله فيك..
ابتسم عبد الرؤوف ابتسامه جانبيه غير نظره لمكان مختار بعدين شاف القدام وشغل سيارته وتحرك...

#العضيد
#طوبى

....يتبع....