طوبى ☕شارع القهوة☕

الجزء_التسعون

#طوبى  "جنة طوبى"
#جمان_فريد
#الجزء_التسعون"وقد احسن بي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
............
قال شَيخ الإسلام #ابن_تَيمِيَة -رحِمَه اللّٰه- :  🎙️
إِذَا نَاجَى العَبدُ ربَّهُ في السَّحَرِ و استَغَاثَ بِهِ و قَالَ :
"يَا حَيُّ يَا قَيُّومُ لَا إِلهَ إلَّا أنتَ بِرَحمَتِكَ أَستَغِيث " أَعطَاهُ اللهُ مِنَ التَّمكِينِ مَا لَا يَعلَمهُ إلَّا اللهُ.
📜 مجموع الفتاوى (242/28) 🍂🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃إنَّ الإيمانَ إذا نزلَ بقلبِ امرأةٍ جعَلَ منها بطلًا لا يُغلَب🍃
______________________________________
تهمس بسرعه مع تسارع انفاسها من الخوف والقلب دقاته متلاحقه وقويه...
"ياحي ياقيوم ياحي قيوم"..
وبعد ماسمعت صوت ضرب النار نادت بصوت مخنوق..
"ياالله"...
وجنه في حضنها بدت تهدي وتسكت...
بلعت ريقها وقعدت تبعد فيها بالشويه وهي تشوفلها...
فجأه...
سمعت صوت ارتطام بالأرض كان قوي هلبه..
شافت لجنه لقتها تشوف لحد وراها..
"طوبى"..
التفتت طوبى بسرعه..توسعوا عيونها بدهشه...
لما شافت المهدي واقف يشوفلها بخوف..وفي جنبه عمر يشوف لخوه الجالي وهو طايح ع الأرض بنظرات صدمه...
🍃🍃🍃🍃🍃🍃🍃🍃🍃🍃🍃🍃🍃🍃🍃🍃
🔺️🔺️في وقت سابق🔺️🔺️
في حوش محمد شنيبه..
تحديدا الصاله..
كان المهدي مقعمز وفي حجره ولد اخته نسرين عاطيه تليفونه يتفرج فيه ع اغنيه اطفال..
ومقابله امه واخته خديجه وهي شاده ولدها"تيم" يسمعوله شن يقول..
المهدي بأسف:نفس المرض اللي جي لبنتها لكن في البنكرياس اكتشفوه متأخر بعد ماتزرع في الكبد والاعضاء التانيه القريبة عليه.
مغليه بأسف:لاحول ولاقوة إلا بالله..
خديجه:ان شاء الله ربي يشفيها مسكينه...
🍃وفي الدور الثاني..
في دار الولاد..
كانوا عمر ونسرين مقعمزين مع بعض يحكوا في موضوع يخصه..
عمر:بصراحه مش مفكر في شي رسمي قاعد نتعرف عليها وخلاص..
نسرين:شن رايك تخليني نهدرز عليها وندير معاها صحبه..
عمر بضحكه؛حتى هي طلبت مني نفس الطلب..
فجأه رن تليفونه..
عمر:شكلها هي..ناض للزيانه وخداه..شاف المتصل قال بضحكه..مش قتلك..
نسرين بضحكه:عطيني نرد عليها..
عمر:بري غادي..فتح الخط ورد..
"عمر تعالوا لخوك بيقتل المراة بيقتلها!"
عمر ناض بدون مايرد ع منيه ومشي طول فتح الباب وطلع يجري..
نسرين طلعت وراه تجري وهي تقول بخوف.
/عمر شن في شن قالتلك!!؟
عمر نزل يجري وهو يقول..
/الجالي يضرب في طوبى..
نسرين عقلها ماتحملش بصرخه قالت..
/نهار احرف!!!مهدي يامهدي...
🍃في الصاله..
سمعوها كيف تنادي بعياط
حط المهدي ولدها وناض يجري..
طلع وعمر وصل فيه نفس اللحظه..
عمر بلهفة خوف..
/خوك الجالي بيدير جريمه..
نسرين بعياط..
/ضاربها قبل ضاربها برا يامهدي لحق ع المرا!
طلع المهدي يجري وعمر لحقه بسرعه وهو يقول بصوت عالي..
/مفاتيحي يانسرين المفاتيح فوق..
ركبت نسرين تجري...
وخلوا مغليه تخبط ع رجليها وهي تقول..
/حي عليا حي..!!
وخديجه جنبها ضمت ولدها وهي ترعش مع بعضها من الخوف...
نزلت نسرين تجري بالمفتاح..
طلعت من الحوش بكل شافت المهدي طالع يجري وهو يدس في سلاحه وقفت في مكانها مصدومه..
ماحستش بعمر لما جاها جبد منها المفتاح ولحق خوه...
🍃🍃🍃🍃
وفي حوش لطفي الواعر..
كانت اريج مقعمزه في الكوجينه جنب اختها تتفرج عليها كيف تزين في التورته..
اريج؛مبدعه يافرخه...
الاء بغرور:من غير شك..
اريج قلبت عيونها بعدين قالت..
/ايه حقه بكري نسمع فيك تكلمي في عمتي..
الاء:ايه ماقتلكش..قالتلي وليد مالاش علاقه بالرسايل واني ماصدقتهاش..
اريج؛مرات مش هو حق..
الاء:كان مش هو مني يعني!
ويرن تليفون اريج..خداته من ع الطاوله وشافت المتصل قالت..
/رقم غريب..
الاء وهي تخدم ع التورته قالت.
/ردي بالك زبونه..
اريج؛مادرتش خير لما حطيت رقمي
وفتحت الخط وكيف جت بتتكلم سمعت
" تعالولي يااريج بيقتلني تعالولي"
ويفصل الخط..وتنوض اريج زي المجنونه.تطلع بسرعه من الكوجينه وهي تقول بعياط..
/طوبى..الو..طوبى...
نزلت التليفون وهي تعيط وتنادي..
"يما...عمتي"
الاء وراها وهي مفزوعه تسأل فيها..
/خيرها خالتي خيرها!
اريج وقفت في مكانها وهي تعيط وتقول..
/قالتلي تعالولي بيقتلني بيقتلها المريض!
الاء وهي ترعش..
/اتصلي باسكندر ولاكلمي رؤوف..ديري حل..
اريج تماسكت وشافت لتليفونها حطت ع رقم خطيبها واتصلت بيه..
ع خشة مطيره وفردوس للحوش يجروا مفجوعات كانوا في المحل لما سمعوا عياطها...
مطيره بفجعه..
/شن في خيركم تعيطوا.!!
اريج بهلع:اسكندر..اسكندر طوبى توا كلمتني قالت تعالولي بيقتلها هداكا ..
خبطت فردوس بإيديها ع وجهها.
ومطيره خبطت ع صدرها وقالت..
/حي عليا!!..
🍃🍃🍃🍃
وعبد الرؤوف كان في وحده من المناطق فالعاصمه..
كان عنده لقاء مفاجئ مع شخص ليه فترة يراجي منه في خبر مهم للغايه..
:لازم تسافر الاسبوع الجاي ل***** غادي تلقاه في مكان حنعطيك الوصف متاعه لما توصل غادي..وهو حيسلمك كل شي..
عبد الرؤوف مرر نظره حواليه بضيق بعدين قال..
/تو نشوف كان نمشي اني ولانبعت حد..
ضيق عيونه لما شاف اسكندر جايه يجري..
وصل فيه خداه من ذراعه وقاله بغضب وخوف..
/كلموني توا قالوا طوبى متصله تستنجد ..
عبد الرؤوف بعصبيه وخوف..
/الكلب..كلم الجماعه بسرعه يااسكندر..
اسكندر:سبقونا غادي..
ومشوا يجروا الزوز لسيارة اسكندر ركبوا وتحرك اسكندر بسرعه وخلوا الراجل وراهم مستغرب...
🍃🍃🍃🍃
وتوصل سيارة عمر ويشوف الجيران طالعين برا يسمعوا .وماقي حد منهم تجرأ يقرب..
نزل يجري والمهدي معاه وهو مطلع سلاحه...
🍃ومن بعيد شويه الجماعه اللي حاطهم الجالي يراقبوا في الوضع..
:هادم خوته ولا..
:ايه هما..خلاص سكر سكر معاش تكلمه..
🍃خشوا المهدي وعمر يجروا..
عمر وصل في الباب الدخلاني فتحه..
وخشوا هو والمهدي..
شافوه يسحب وصوب عليهم.
عمر من الصدمه جي بيتكلم..حط المهدي يده ع فمه وسكته..بعدين طلقه ومشي بسرعه وخفه للجالي..
وصل فيه لما كان بيضرب خلاص..شده ورفع يده فوق..
طلعت الطلقه وجت في باب الفيرندا..
ع طول المهدي خبط خوه ع راسه من الخلف بالسلاح خلاه يفقد الوعي..ويطيح الجالي بقوة ع الارض...
🍃ويوصلوا سيارات دفع رباعي وتاندرا للمكان..
والجيران سمعوا من اخر الشارع مناوشات بالاسلحه..طول خشوا لحياشهم..
وينزل عبد الرؤوف من سيارة الدفع الرباعي وشاد كلاشن كوف..وخش بسرعه...
🍃لما خش داخل..
تفاجئ وين شاف المهدي وعمر..
المهدي مقعمز ع كرسي وهوشاد سلاحه ويشوف لخوه بألم..
وعمر واقف جنبه يكلم في نسرين ويطمن فيها..
عبد الرؤوف جاهم وهو يقول بغضب..
/وين طوبى وبنتها..
المهدي بدون مايشوفله قال..
/فوق..
🍃وطوبى كانت مع جنة في الجناح..
جنه ملفوفه ببطانيتها فوق السرير البنت كانت تلعب بإيديها لامدركه ولافاهمه شي من اللي صار..
عكس امها اللي كانت وهي تلبس في شاربتها قاعده تحت تأثير الموقف..مازال عقلها مش مستوعب اللي صار..
في لحظه كانت حتموت هي وبنتها!! ..
الجالي وصلت معاه انه بيقتل بنته !!..
خدت القفازات وقعدت تلبس فيهم وهي تشوف لبنتها من المرايه ودموعها ينزلوا..
وجعتها بنتها..وجعتها هلبه..وحست اتجاهها بالذنب بقوة حملت نفسها اختيار الشخص الغلط بش يكون اب ليها..!
التفتت ومشتلها ..طبست عليها وخدتها..وضمتها بخوف ودموعها تنزل..
سمعت صوت منبهات سيارة الاسعاف..
غمضت عيونها بأسى بعدين فتحتهم ومشت طلعت من الجناح..
🍃🍃🍃
نزلت من الدروج ومجرد مابانت عليها الصاله..
شافت ممرضين طالعين يجروا بباريلا والمهدي وعمر معاهم..
وصلت لوطا..شافت عبد الرؤوف..
بلهفه خوف قالت؛عبد الرؤوف..
هو طول جاها وقال..
/ماصارلكم شي!؟
طوبى هزت راسها بالنفي وقالت..
/لالا..بسرعه اركب المكتب ع اليمين..خود اللاب توب...الدولاب شكله كان فيه السلاح..
عبد الرؤوف:باهي باهي انتي بري قعمزي لين يوصل حسين
طوبى:باهي..مسحت دموعها وقالت..راك تنسى تسجيلات الكاميرات.
عبد الرؤوف:كله في بالي والله..بري قعمزي وجهك اصفر..
ع خشة حسين يجري وهو يقول بفزع..
/طوبى..
طوبى مشتله وهي تقول بصوت مخنوق..
/كويسه مافيا شي طلعني من هني بس ..
حسين بألم:باهي باهي..هي تعالي..
ومشت طوبى وهو معاها..
وعبد الرؤوف معاهم بنظراته اللي كلها اسف..
🍃طلعوا برا..
مررت طوبى نظرها ع السيارات المسلحه المنتشرة ف الشارع..
وفي رجال امن كانوا واقفين قدام الفيلا..
لما جت طالعه..حاوطوها تحسبا لأي شي..
لين ركبت السياره من الخلف وحسين سكر الباب...
🍃مطيره وهي تبكي قالت بوجع..
/ووك عليا بنيتي ووك عليك ماريتي يابنتي..وخدتها في حضنها
واريج جنبها تشوف لطوبى وهي تبكي..
وطوبى خشت حضن عمتها وجنه في حضنها ومازال اللي صار قاعد بين عيونها..
وتحرك حسين بالسيارة وتباعد بيها بعيد عن سجن عاشت فيه اسوأ ايام حياتها للآن...
🍃🍃🍃🍃🍃
"بارك الله فيكم"
عبد القيوم:فيك بارك الله واجبنا..السلام عليكم..
ومشي ومعاه فريق من الفنيين اللي كانوا يصلحوا في وحده من قابينات الضي..
هو ركب سيارته وهماسيارة تابعه للشركه وتحركوا ورا بعض متوجهين للمكان اللي يخدموا فيه..
عبد القيوم اليوم كان منهك..من الصبح لبعد المغرب وهو يخدم..وفي نفس الوقت باله مشغول بأم العيون الحايره عبد الرؤوف عطاه علم باللي ناوي يديره..
اتصل بيه من السياره..
نادى اكثر من مرة لين فصل..عقد حواجبه بقلق..
اتصل بعده بإسكندر..
كذلك حتى هو ماردش عليه..
قلبه انقبض من الخوف..
كمل الطريق وباله مشغول والخوف معبي قلبه..
وصل لمقر الشركه..درس قدامها..
خدي تليفونه ونزل..جي بيعاود ع رؤوف..اتصل بيه ربيع..
طول فتح الخط..
🍃🍃🍃🍃🍃
وصل حسين لحوش عمه..نزل فتح الباب..بعدين دخل السياره..
وفي الجنان فردوس وآلاء يستنوا وهما ع نار..
لما شافوها نازله بجنه جوها يجروا..
فردوس قعدت تحضن فيها وتبوس وهي تبكي..
والآء بدموع الم كانت شاده يد جنه الصغيره وتبوس فيها..
مطيره بصوت باكي..
/خشوا داخل خشوا صقع..
طوبى مدت جنه لفردوس وقالت..
/حسين اميمه في المصحه؟
حسين بضيق:ايه غادي.
طوبى؛ارفعني غادي لازم ندير تقرير طبي توا..
حسين بقلق:خليها غدوة وجهك تاعب..
طوبى مسحت وجهها وقالت..
/لالا مافيا شي..هيا اريج..هيا عمتي..
حسين ركز ع القفازات اللي لابستهم..بعدين شافها كيف ركبت السياره من الخلف..
خلاص حسمت الامر من غير ماتراجي رده..
ابتسم ابتسامه الم خفيفه وركب السيارة..
وركبوا معاهم اريج ومطيره وطلعت السيارة..
اما فردوس خشت بجنه ومعاها آلاء داخل..
لقوا غرفه واقفه حدا الباب تبكي وهي شاده مهاب اللي كان فايق عكس خوه..لما شافت جنة قالت بوجع..
/ياروحي بنيتي..دورت طوبى وقالت..امها وين!..
الاء رشفت وقالت..
/رفعها خالي حسين للمصحة بش دير تقرير طبي...
🍃🍃🍃🍃
وفي عياده صاحبها من معارف المهدي..
خش عبد الرؤوف ومعاه اسكندر..
سأل عن مكان الجالي ودلوه عليه..
ومشاله وغضب الدنيا كلها فيه..
🍃وقدام غرفة الجالي..
كان المهدي واقف ع صاحبها ويشرحله عن وضع خوه..
وعمر واقف بعيد شويه وهو شارد الذهن..
وصلوا عبد الرؤوف واسكندر..
اسكندر وقف بعيد شويه وهو يراقب في الوضع..
اما عبد الرؤوف قدملهم..
عمر شافه وقال..
/مهدي..
التفت المهدي وشاف عبد الرؤوف ولاحظ حالته..قال لصاحب العياده..لحظه..
ومشي لعبد الرؤوف..
وصلوا في بعض..
اشر عبد الرؤوف ع حجرة الجالي وقال..
/كان ماطلقهاش ورب العزه ماحازه مني واحد نطلع اللي داره فيها من عيونه..اصلا رأفة بحالته..ع عيون الخبزة والميه بيني وبينك ماخليتهمش يدكوه في مكانه الصحيح..
المهدي:حيطلقها خوي ونعرفه حيطلقها خلاص..وصدقني مش حنخليها يشدها ع ذمته اكثر مني..
عبد الرؤوف:مش هكي وبس يتنازل عن حضانه البنت ينساها..
غمض المهدي عيونه وهز راسه وهو يقول..
/حاضر.
عبد الرؤوف قعد يفرد في صوابعه بالواحد وهو يعد؛
/الكاميرات اللي حاطهم في حوشه صورت عاره كله..الجيران شاهدين..ومش صعبه نوصل في مايثبت انه مريض نفسي..
المهدي:عطيتك كلمة وكلمتي عمري ماوليت فيها..
هز عبد الرؤوف هز راسه وقال..
/هدا علاش قاعد محترمك..ولف ومشي طول..
وعيون المهدي وعمر لين ادرق عنهم هو واسكندر...
🍃🍃🍃
طلعوا من العياده واسكندر قال..
/كلمت حسين قال توا في مصحه القدس تبي دير تقرير طبي..
ابتسم عبد الرؤوف ابتسامه خفيفه وقال..
/الله يرحمك ياعمي لطفي..
وركبوا السيارة متوجهين للمصحه...
🍃🍃🍃🍃🍃
وفي المصحه..
تحت فحص طبيبه..
كانت طوبى في اصعب حالاتها..
شعور المراة اللي عاشت هالموقف الصعب..اكيد حيكون من ابشع ماتشعر بيه اي مراة في الدنيا..
عيون غريبه تشوف اثار اجرام الشخص المفروض يكون لهالمراة الامان والسكن والاحتواء والسند..هدا اهم جزء في القوامه اصلا...!
اميمه وهي واقفه تتفرج بصدمه..
تفكرت اللي صار معاها اللي خسرها جنينها عاشت اصعب لحظات عمرها وقتها...لكن ماكانتش متخيله انها حتشوف طوبى تعيش اضعافه...
وقتها تمنت لو قالت كل شي عرفاته مادرقت شي مش بس عن طوبى عن العيله كلها ومااهتمتش للعواقب..
الصدمه الاكبر لأميمه كانت لما سمعت سؤال الدكتورة..
الدكتورة بضيق:في اثار هني تبان قديمه شويه..وكأنها اعتداء ....معليشي..اعتداء..
قاطعتها طوبى لما قالت وهي مغمضه عيونها بشده..
/ايه..صح..
حطت اميمه حطت يدها ع فمها وهي مصدومه بشده ودموعها ينزلوا..
فتحت طوبى عيونها وقالت بضيق شديد..
/ياريت الموضوع هدا ماينذكرش بكل..اصلا مش حنستفيد منه شي مافيش من يحاسبه عليه..
الدكتوره هزت راسها وهي مضايقه هلبه وقالت..
/تمام...
🍃🍃🍃
كملوا الفحص..وبعدت ماطوبى لبست حجابها كامل شافت لأميمه..
جتها اميمه وضمتها بقوة وقعدت تبكي وقالت بهمس .
/سامحيني...
طبطبت طوبى ع ظهرها وهي شاده دموعها..
والدكتورة تشوف لطوبى بأسف...
🍃🍃🍃🍃🍃
قدام المصحه...
كانوا حسين وعبد القيوم واقفين يتكلموا عن اللي صاير..
حالة عبد القيوم كانت صعبه هلبه..هو كان معصب وخايف وقلبه الدم فيه كان يغلي من النار اللي والعه فيه
فوق هدا مجبر انه يخفي جزء كبير من مشاعره يبان زيه زي اي حد من معارفهم ووجعه اللي صار لبنتهموخلاص...!
شي يبي قدرة تحمل كبيره..
هو توا واقف ع حسين ويبي يشوفها..يبي يطمن عليها يراجي في طلعتها..يلمحها شويه بس يتأكد انها بخير..
🍃حسين؛ باهي اللي جدي معزوم في حوش بوي..الراجل معاش يتحمل بعد ماروح بيها هداكا النذل تعب هلبه..
عبد القيوم وهو عاقد حواجبه..
/حاولوا توصلوله اللي صار بطريقه ماتخليشي يعصب واجد..
حسين ؛نحاولوا..اني توا همي كله تطلق.. كان هالكلب بيسكر راسه والله معاد مدور نخليه وخشمه في اللبز يطلقها..
عبد القيوم احتفظ بصمته لأنه كان بيتكلم حينفعل ويبان انفعاله مبالغ فيه...
🍃داخل..
اميمه كانت ماشيه وهي شاده يد طوبى بقوة..
وطوبى تمشي وعقلها مش معاها..مازال تحت تاثير الموقف..مازال تسمع في صوته المخيف..ونظراته المرعبه...
وشكله وهو شاد جنة ويهدد فيها بيها..
هي توا مش مستوعبه انها معاش بتولي لسجنه..
استاقظت وشافت لعمتها وهي جايتها..ضمتها في حضنها وهي تدعي ع الجالي..وتواسي فيها في نفس الوقت..
هني طوبى تفكيرها تغيرت وجهته..
فكرت انها توا وسط اهلها واحبابها..محاوطينها ويحموا فيها..
حست وكأن في نسمه حلوة خشت لقلبها وبرداته...
بدت ع وجهها ملامح اطمئنان وامتنان وفي نفسها تقول..
"يارب..يامولاي ووليي..لك الحمد..لك الحمد"
☘☘☘☘
وطلعوا بيها برا..
مطيره؛حتى رؤوف واسكندر جو..
كلهم وجهوا نظرهم ليهم..
عبد الرؤوف واسكندر وحسين وعبدالقيوم..
طوبى وقتها مش عارفه علاش..وبدون ماتشعر..
معاش شافت غيره هو...
وهو شاف ناحيتهم لما تكلم حسين عنهم وقدملهم..
جو عيونه في عيونها..
نظراته هالمرة كانت مختلفه بس كانت شبه واضحه..
نظرات فيهم حزن وخوف..وفيهم شي تاني ماقدرتش تفسره..
للحظه مر قدامها شريط مواقف ليه...
في المدرسه لما جي يخدملهم في الضي وكيف رد حق خدمته...
اجتماعها بيه مع بوها وخالها يوم ماانكتب الحوش بإسمها وهو كان شاهد..نظرات بوها ليه وكيف وصاه عليهم..
شراكته ليهم في المطحن...
الموقف اللي جمعها بيه في عرس صفاء..
والموقف اللي جمعها بيه لما خداها الجالي..
واخر موقف لما تلاقوا في مطعم ربيع...
واخر شي تفكراته كان صوت من غير صورة...
《 "عبد القيوم عارف!؟ من امتى!؟"
/من فتره..وهو صاحب اقتراح التليفون.》
في كل شي كان موجود..في كل شده ليهم كان اول من يفزع..
لاتربطه بيهم علاقه نسب ولادم لكن ولا مرة من لما عرفوه خلاهم ولاتخلف عن معاونتهم..
علاش بوها يأمنه هو عليهم..مش من فراغ!!...
تلقائيا..ارتسمت ع وجهها ملامح ابتسامه امتنان خفيفه...
ماشافها حد غيره..
عقله كذب عيونه..لكن قلبه صدقهم..يبي يصدقهم...!
ملامح وجهه العاشقه تبدلت لملامح خوف لما شافها طاحت شبه فاقده الوعي في حضن عمتها..
قدم بخطوات سريعه بس لما استاقظ وقف عند حد معين وهو يشوف في اهلها حواليها..
لحظتها حس بالغيره..غار منهم كلهم...وغيرته من حسين وعبد الرؤوف بزايد..
غير نظره عنهم وشاف لجهة فيها ممرض يدف في كروسه فاضيه..
مشي ناحيته وقال..
/معليش..وجبدها منه وماسمعش شن يقول..
ومشالهم بيها ونادى..
"حسين"..
شافه حسين وجي بسرعه..خدي الكروسه وقربها ليهم وهما قعمزوا طوبى عليها..ورجعت دخلتها اميمه وحسين وعمتها واريج وراها..
وهو وعبد الرؤوف واسكندر اللي كان واقف بعيد قعدوا برا..
قدم عبد الرؤوف لعبد القيوم طبطب ع ذراعه وقاله..
/خلاص تمت..
عبد القيوم بإستغراب:
/كيف!؟
عبد الرؤوف بضحكه..
/قصدي خلاص هداكا بيطلقها تمت..
بلع عبد القيوم ريقه وقال..
/ان شاء الله تفتك...
قالها عادي..بس القلب من داخل داير هرجه...🌸
🍃🍃🍃🍃🍃
طوبى مابتش ترقد في المصحه ليلتها..خلتهم يديرولها تغذيه وبعد تمت روحوا بيها للحوش..
بعد سلام حار بينها وبين غرفه..مش للدار..
خشت طول لبنتها لقتها راقده في سريرها..طبست عليها باستها من خدها..بعدين قالت..
/افتكينا ياماما افتكينا واخيرا..روحنا لدارنا وسرايرنا وايامنا الحلوة..
وقفت ع حيلها مررت نظرها ع الدار وهي مستوعبه..
معقوله هي توا في حوش بوها!!؟ روحت!!!؟
معاش بتولي لهداكا السجن تاني خلاص!!..
من فرحتها ارتمت ع السرير بدون ماتحول الجلابيه ..
رقدت ع جنبها وهي تتحسس في السرير والمخده..
جي بين عيونها لما كان يجيهم في الليل يوقف ع الباب..كيف كانت تشتاق للنوم المريح خوف منه..
تفكرت لما حاول يقتلها بالوساده..وتفكرت لما شد جنه وهددها بيها.
ناضت قعمزت وهي تتنفس بسرعه من الخوف..وكأنه في اي لحظه حيحش عليها..
ووسط هدا كلها فكرها قلبها بشي مهم نساته..
طوبى بفجعه..
/حي ماصليتش العشي!..
ناضت ورمت جلابيتها وطلعت من الدار للحمام...
🍃وفي الصاله اهلها يتكلموا عن وضعها وهما يبكوا ع حالها ويدعوا ع الجالي وعيلته من وسط قلوبهم..
🍃🍃🍃🍃🍃
وهو بعد ساعات غاب فيهم عن الوعي..
فتح عيونه...
جي قدامهم اللحظه اللي صوب فيها عليهم السلاح..
شهق وقال بفجعه..
"طوبى!"
عمر:جالي!..
هو شاف لخوه بخوف شده من يده بقوة وقال بذعر..
/طوبى !ماتت!؟
عمر بضيق؛لالا ماصارلها شي..
الجالي بلهفه:وبنتي؟
عمر:حتى هي..
رجع ارتمي ع السرير وغمض عيونهوعمر يشوفله بضيق وحزن...
🍃🍃🍃🍃
اول ليله لطوبى برا السجن عدت عليها بصعوبه..
تغفا شويه تفيق مفجوعه ويجي بين عيونها نفس المشهد في الحلم وتشوف في نهايته انه قتلهم..
تلفت تشوف بنتها وبعد ماتطمن عليها تمرر في نظرها ع الدار لتتأكد انها في حوش اهلها..
ترجع تحاول ترقد مرة تانيه..واريج والاء اللي كانوا يظاهروا بالنوم يراقبوا فيها بحزن..
🍃حتى اميمه ماقدرتش ترقد الا بصعوبه تبكي ع حال طوبى بألم وتقعد تلوم في روحها..
هما هكي الطيبين يركبوا لرواحهم في ذنوب هما بريئين منها..
بينما اللي راكبه الذنب..وهو غارق في الذنوب لأعلى راسها يبرأ في نفسه منها ويبررلها..
🍃خديجه:هي فرخة قليلة ادب لسانها طويل من هو الراجل اللي بيتحمل وحده تحط راسها من راسها وماديرلاش قدر!..
محي الدين:صدقتي..اللي يتحمل وحده زي هادي مايجيش راجل..
خديجه عقدت حواجبها وهي تشوفله..
وهو قال:ع العموم خوك تعرى وتورى وماعاد تقدروا درقوا عليه اكثر من هكي..احلام سعيده يامرتي المؤدبه..ورقد وعطاها بظهرها..
وخلاها تغلي من الغضب..ناضت من السرير وطلعت وخلت الدار..
وهو زاد تغطا ودفا نفسه وغمض عيونه ولحظات وغرق في النوم..
🍃🍃🍃🍃
"يطلقها ورجليه فوق راسه"
مغليه ببكي:ساد ما شاف منها هالعقرب اللي مش محترمه حد ولى مجرم في جرتها عطيها ماينزعها..
محمد:معاش تكذبي ع روحك يامراة ولدك وعارفه علته كويس وبارك الله فيها بنت الناس اللي رضت بيه من الاول  وسكتت على عيبه ومالقتش من يقدر واني اولهم..
مغليه؛تي هما مخرومين وسكارى يحطوا فيهم فوق روسهم..
محمد:والله كان رضتيه لبناتك باهي..
مغليه؛زيد دافع عليها زيد..شورها شربتهولك حتى انت..
ناض من حداها وهو يقول..
/اقعدي فيها..وطلع وخلاها تندب ع ولدها..
🍃🍃🍃🍃🍃🍃
"مهما كان يقعد خوي ياربيع "
ربيع بضيق:عندك حق..لكن صدقيني اللي درتيه كله صح ومافي حد يقدر يلومك عليه..انتي تخيلي لو دارها وقتلهم..قتل بنته تخيلي!..شن يصير فيك انتي بعدين شن تحسي..
شداته بقوة وانهارت ببكي.
وهو يطبطب عليها ويقول..
/قولي الحمد لله اللي جت على هكي...
🍃🍃🍃🍃🍃
ويقعد المهدي في العياده لليوم التاني فايق مارقدش غمضه..
بعد ماعدت ساعات الصباح الاولى..
طلعوا هو وعمر الجالي من العياده...
🍃في الطريق..
المهدي:والله العظيم والله..لو سكرت راسك اني نشهد عليك في المحكمه اني..
عمر:ستين دليل ضدك يطلقوها منك ويسقطوا الحضانه..سادك فضايح اكثر من هكي راك بتخسر حتى شغلك..
المهدي:من الاخير لازم تطلع برا تتعالج لازم..
وهو يسمع بصمت وتجهم..وفي داخله الم مع غضب كبير...
🍃رفعوه لحوازه عند المهدي قعد فيها هو وعمر..
حطهم المهدي وولى لشارع القهوة..
🍃🍃🍃🍃
"والله معاد كاسبك هالبصطاردي والله معاد طالعه من عتبه هالحوش معاه الا بعد ماتعفسي ع جثتي"
طوبى زادت ضماته وهي تقول.
/بعيد السو عليك حبيبي..خلاص ماعنده مايدير حيطلقني يحب ولايكره..
علي قعد يمسح ع شعرها وهو مضايق ومنزعج من العمر اللي كبره وعجزه ع انه ياخد حق حفيدته..
🍃ومن الصاله للكوجينه.
غرفه؛قالب وجهه مايبيش يكلمني قالي لين نوريك ع تخوينه متاعك..وهو بعدها جي هدرز عليا عادي..
فردوس:تستاهلي..كان هدا راجل زي رؤوف يخونوه!
غرفه؛لاهو نبي ولارسول..يغلط زيه زي كل الرجاله..
فردوس:وباهي بعد عرفتي اللي هناك!؟
غرفه ابتسمت وقالت..
/مافيش زيه زي...
ضحكت فردوس بعدين تنهدت وقالت..
/الله يعوض طوبى براجل زي هالراجل..
غرفه؛توا غير تطلع من اللي هي فيه وتنسى شويه ماشافت وبعدين تفكر فالزواج..
فردوس بحسره؛عندك حق..مازال وقته الكلام هدا...
🍃🍃🍃🍃🍃
الساعه 12:45 قبل الظهر..
في الطريق..
معتز:هادي تاني مرة تو يستاقظوا بيا..
:اني نبي نفهم انت من شني خايف..وكان استاقظوا بيك وين  المشكله!
معتز؛تبي الصراحه..
:ومانبيش غيرها..
معتز؛خايف منك ومن اللي دار فيه معاي مانحسش فيه حب..
ضحك وقال..
/مش ساهل بكل انت..
معتز؛حتى انت..كلهم هكي يقولوا..
:من هما؟
معتز:اللي يعرفوك..انتبه للطريق وقال بخوف..وين رافعني..
سكت وهو مبتسم ع جنب..
معتز بقلق:بالله عليك روح بيا..
:لا..
معتز تأفف بضيق..
:ماتخافش مشوار صغيرون ونروح بيك..
معتز:وين؟
:لحوشي..
معتز بصدمه..
/وين..!؟
:خلاص اسكت خليني نعرف نسوق..
معتز؛قتلك خايف منك..
:ماتخافش مني اني زي بوك..وراهو عندي ليك مفاجأه في الحوش حلوة ع الاخر..
معتز بقلق؛ياريتني روحت طول..
🍃وبعد ماانقطعت مسافه لاباس بيها..
وصل بيه لشارع كله فلل..
خش بالسيارة داخل..
ونزل بعدين مشاله..فتح الباب وقاله..
/انزل..
معتز بخوف نزل وقال..
/كيف بندير توا !
شده من يده وقال..
/بتخش معاي..وخداه معاه وخش بيه للفيلا...
رفعه لصالون..وقعمزه وقال..
/ثواني وجاي..
ومشي طلع من حداه وخلاه يتفرج بإنبهار ع المكان..
🍃برا..
"شن صار جبته معاك"
ضحك وقال؛بعد مادهشني..في الصالون قاعد..خل نمشوله..
ومشوله الزوز خشوا عليه..
معتز لما شافهم ناض وقف..
ضحك وقال؛عجباتك هلبه شكلها..
معتز ابتسم بإحراج..
فاتن بضحكه :بطل براده..
ومشت لمعتز..
مختار:يقولوا تلتين الولد لخاله والولد طالعلي يوقف احتراما للجمال..
فاتن جت لمعتز سلمت عليه بالخد وقالت..
/اني فاتن..صديقة خالو..
معتز؛صديقته!
مختار:اعتبرها مرتي ياسيدي..
خدت فاتن وسادة كنبه حدفتها عليه..
هو تلقاها وحضنها بتنهيده..
ضحك معتز..
فجأه رن تليفون..لوح الوساده لفاتن شدتها..
بعدين طلع تليفونه وهو يقول..
/جو..ومشي طلع..
معتز؛منو؟
فاتن؛اصحاب خالو..شدت يده وقالت..تعالى معاي..
معتز:ماقلتش لحوش جدي اني ماشي معاه..
فاتن بضحكه...
/هو قاللهم..وخداته وخشت بيه داخل..
ومختار برا يستقبل في ضيوفه..
اهل خطيبة رضا..ورضا معاهم..وكذلك خالها ايهم...
🍃وفي العماره..
لفت صابرين الشال ع رقبتها وقالت..
/اليوم حنوريه انه معاش يعنيلي شي ونسيته بكل..
"يللا ياصابرين تأخرنا"
خدت شنطتها ومشت بسرعه طلعت من دارها..

#وقد_احسن_بي
#طوبى

....يتبع......