طوبى ☕شارع القهوة☕

الجزء_الثامن_والثمانين

#طوبى  "جنة طوبى"
#جمان_فريد
#الجزء_الثامن_والثمانين "سجن يوسف/مقاومه"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الحمد
قال رسول الله ﷺ:
« إذا قال العبدُ : ( الحمدُ لله كثيراً )  قال الله تعالى :
اكتبوا لعبدي رحمتي كثيراً ».
صحيح الترغيب (1578)📗 🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 مَررنا بالأسوء ليس صَعباً هذهِ المرة ، سَنتخطى🍃
________________________________________
13ديسمبر..سنة 2018...
يوم الثلاثاء...
الساعه 2:30بعد الظهر..
كانوا ربيع وسامي في سيارة وحده قدام العمارة اللي سكن فيها التارقي جديد يراجو فيه وهما يهدرزوا..
سامي:بتخبر المهدي اليوم؟
ربيع:ايه بعد مانروحوا من المطار ع طول..
سامي:خسارة والله كنت متونس بيه..يجيني مرة يهدرز عليا ولااني نمشيله شقته مسافة خطوتين..توا بالسيارة ونبي عشرة دقايق بش نوصل..
ربيع تنهد بضيق وقعد ساكت..
ومن قدام مدخل العمارة..
يطلع عبد القيوم وهو بكامل اناقته..لابس بالطو لونه رمادي الياقه متاعه كبيره مرفوعه شويه..تحته فانيليا رقبتها طويله لونها اسود ع سروال جينز اسود..مغطي عيونه بنظارات سود..والخاتم والساعه مايفارقوش يده كالعاده..
شافوه ربيع وسامي وهما مبتسمين.
سامي:جديده الطرحه هادي..
ربيع بضحكه؛امس طلعته غصب عنه وخليته يشري طرحات جدد..
سامي:من قبل لبسه مليح..
ربيع:ايه..واني زدته شويه خليته يغير الوان شويه قليل النادر يلبس غير الغامق..
وصل فيهم..دق ع السياره من فوق..
ضغط ربيع ع الزر اللي يفتح الكوفني..
مشي عبد القيوم للكوفني وحط الشنطه..سكره ومشي ركب من الخلف وهو يقول..
/السلام عليكم..وسكر الباب..
هما ردوا عليه..وعليكم السلام
سامي:شن جو؟
عبد القيوم:ماشي الحال الحمد لله..
ربيع:سيارتك رفعها عيسى؟
عبد القيوم وهو يشوف للطريق..
/من الصبح..هي توكل ياغالي معاش في وقت..
ربيع قال:توكلنا ع الله..وشغل السيارة وتحرك..
وعبد القيوم بعد ماتحركت السياره حس بضيق صدره زاد..مش هاين عليه يسيب البلاد اللي هي فيها..حاس نفسه وكأنه بيخلي روحه وراه...
ربيع وسامي يهدرزوا وهو مش معاهم بكل..يكلموا فيه مايردش عليهم..معاش كلموه وكل واحد فيهم واجعه حاله..
ربيع اللي عارف كل شي..وسامي اللي شبه فاهم كل شي بس كانت عنده رغبه يعرف التفاصيل المبهمه...
🍃وللمطار..
وصلت سلافه مع صاحبتها ميار ومعاهم اخ ميار...
كانت سلافه زايده في اناقة طلتها اليوم وصاحبتها ملاحظه بس مش عارفه السبب..
داروا الاجراءات ومشوا يستنوا في صاله الانتظار اللي يكون فيها الانتظار طويل...
كانت مقعمزة دور بعيونها عليه وتراجي فيه هو ماتراجيش امتى يحين موعد الرحله...
ميار:خيرك سلافه حساتك اليوم مش ع بعضك..
سلافه حركت راسها بالنفي وقالت..
/مافي شي..عادي..بس يعني بتعرفيني بكره الانتظار..
ميار:حلك تتعودي يابنتي..
سلافه بضحكه:صرلي سنتين هون ولسا بدي اتعود ع شغلات كتير..ورجعت دور بعيونها...لين بان عليهم..
خفت ابتسامتها وحلت محلها ملامح الانبهار...
اليوم كان انيق بزايد..مشيته..طريقه كلامه بيده اللي فيها الخاتم..نظراته الجاده وحواجبه اللي ديما معقودات..
الصفات اللي يحبوها اغلب النساء في الرجاله كلها فيه هو وبزايد..ممكن مايكونش وسيم هلبه بس جذاب جدا ومميز..
بدت ع وجهها ملامح الابتسامه وقالت لصاحبتها..
/شوي وراجعه..
وناضت ومشت ناحيته...
🍃في نفس الوقت اللي خش فيه حسين لصالة الانتظار حتى هو كان ناوي مصر...
طاحوا عيونه بالصدفه ع التارقي وسامي وربيع..تفاجئ..
وجي بيمشيلهم...لين شاف وحده جميله جدا ومظهرها مختلف وغير مألوف ماشيه ناحيتهم...ووصلت فيهم..
🍃"مرحبا"
التارقي كان عاطي بالظهر وسامي وربيع مقابلينه الزوز لما شافوها سهموا فيها..
الجمال السوري وماادراك مالجمال السوري زايد خفة دم ولطافه...
التفت التارقي وشافها ابتسم بجديه وقال..
/اهلا..
هي بإبتسامه؛كيفك؟
هو غير نظره عنها وقعد يوزع فيه ع المكان ويقول..
/الحمد لله
ويجوا عيونه ع حسين..
اللي كان يشوفله وهو يضحك بصدمه ويحرك في يده حركه دائريه وكأنه يقوله..
"وين وين وين"..
هو ارتبك هلبه..
وربيع وسامي مركزين معاه ومع سلافه..
سلافه؛كتير انبسطت لأنك غيرت رأيك..
هو غير نظره لأصحابه لقاهم يشوفوله وع وجوههم ملامح ابتسامة دهشه..
غير نظره لسلافه وقال..
/شويه..ومشي تباعد لمكان فاضي وهي مشت معاه وكانت مبتسمه وصاحبتها تراقب وهي مدهوشه..
عبد القيوم:تمنيت لو ماجيتي صبيتي عليا هنا..
عقدت حواجبها وهي تشوفله بتساؤل..
هو قال:صبيتي يعني وقفتي..
ضحكت وقالت..
/فهمت عليك..بعتذر لو احرجتك..
عبد القيوم:لا الاحراج ليك انتي..
هي تعكرت ضحكتها..
عبد القيوم:قصدي مش حلوة في حقك توقفي مع شاب وسط زحمه شباب فهمتي عليا..
ابتسمت وقالت..
/ايه شكرا..ع عموم رح نلتقي كتير بعدين وبنحكي.
هو هز راسه بدون مايرد عليها..
وهي قالت؛بعتذر مرة تانيه..ولفت ومشت وهي مبتسمه من قلبها اللي كان يدق بقوة..
اما هو في نفسه قال..
"شن بيخلصني من حسين"..
ومشي لصحابه اللي كان واقف عليهم حسين..
وصل فيهم..
وسامي طول تكلم؛هادي نفسها السوريه السكانه..
عبد القيوم هز راسه وهو ساكت..
حسين؛طلعت خطير ياتارقي مغناطيس يجذب جذب..
عبد القيوم؛ريح جمالك وانت غاليه عليك التفسيرات الخبيثه والله مافي حاجه من اللي في بالكم..البنت تشوفوا فيها مش ليبيه بيئتها مش كيف بيئتنا في حاجات عندها عادي..
حسين بضحكه:باهي كيف بتسافر انت وياها؟!
عبد القيوم بملل قال...
/بالله فهموه ماعنديش نيه نشرحله هو بالذات..
ضحكوا وسامي قال..
/ياسيدي البنت هادي خطاطه وشافت لوحات الخط متاعه في المعرض عجبوها وطلبت منه يحضر ورشه خط بتندار في مصر...
حسين:معناها بيمشي تارقي يروح سوري..
ربيع بضحكه؛ومن نك لغ الزمن ل ع دلعونا ع دلعونا..
قعدوا يضحكوا..
وهو قال تهكما:بالشفا ياهلنا..
🍃من بعيد شويه..
ميار:بصراحه شخصيته واو..
سلافه:ولسا صوتوا ياميوش وهو عم يحكي ولا لما بيحكي اسمي ويقول سلافه..صوته والنبره تبعوا خشنه ورخيمه بنفس الوقت..بينقط رجوله ياميوش..
ميار:مالا شنو ياقلبي حتى هو ليبي..
سلافه بضحكه:قابلت كتير بهالسنتين بس بصراحه ماشفت  متلوا ابدا..
ميار بضحكه:بيني وبينك فصيله نادره حتى هني..
قعدوا يضحكوا..بعدين هي هدت ضحك ورجعت شافتله..
🍃وهو كان واقف مع صحابه يسمع في كلامهم وهو مركز مع حسين..يبان جو حلو..وهالشي يأكدله كلام ربيع اللي جابع من نسرين ان وضع خوها ومرته مستقر وبادي يتحسن..
غير نظره عن حسين وهو حاس بصهد نار قلبه يلفح في ضلوعه...قعد يستنى بفارغ الصبر امتى يجي وقت الرحله ويهرب من هني..بالك يقدر يتنفس لو طلع منها...!
🍃🍃🍃🍃🍃
وواحد من جماعة الفصيله الكاثره..
روح من الخدمه لحوشه ..كان اول يوم يمشي فيه يشوف الشركه متاعه الجديده اللي ليه مايقارب الشهر والنص فاتحها..كمل شغله بسرعه وروح طول وهو ملهوف وخايف..
🍃واول ماخش للفيلا من داخل تخترق انفه ريحة طبخ اشتاقلها هلبه..
تبع الريحه لين وصل للكوجينه..
كعادتها بنته حداها في القعماز وهي واقفه طيب..
بس هالمرة سمع حديث يدور بيناتهم..حديث غاية في اللطف والحلاوة..
طوبى:تو لما يوصل عمرك 11سنه نعلمك طيبي الحار زي مادارت معاي خالتك..واني صغيره هكي عمري 9 سنين درت كيكه وجت نصنص..ومع الوقت جبتها كويس وقعدت بعدها كل شويه تعلم فيا حاجه..خدت منها النفس الحلو متاعها مش بش شطارتها..خالتك سدرة بنوتي دير في كسكسي في حياتي ماذقت احلى منه..
قعدت جنه تناغي وطلع في اصوات..
طوبى:لاامك فاتت ابلتها غادي..قتلك قبل امك فالحة الفالحات..والتفتت لبنتها..غمزتلها وطلعت لسانها بعدين ضحكت..وجنه تشوفلها بنظرات كلها براءة ولطف..
وهو هايم في امها..كان يبي يمشيلها وياخدها لقلبه بس مايقدر ينفد رغبته هادي لأن رفضها واعر عليه وحتما هالمرة حيطلعه عن طوره..
وهي تتحرك وتحوس ومش حاسه بوجوده لعند ماجت لجنة بتاخدها شافاته واقف انتفضت بفجعه..
هو قال:شفتي جن؟
طوبى عقدت حواجبها وتجاهلاته..
خدت قعماز بنتها ومشت طلعت بيها من الكوجينه بدون ماتعبره..
هو لحقها وقال..
/علاش طيبتي اليوم بدون مانقولك..وعلاش درتي كسكسي بالذات..
ركبت الدروج وهي مبتسمه تهكما..
هو ركب وراها وقال..
/طوبى علاش تكابري..
زمت شفايفها بإنزعاج وهي تركب لين وصلت الدور التاني..
خشت طول لدار بنتها جت بتسكر الباب هو دفه وخش..
وهي مشت طول بالبنت وحطتها ع السرير وكانت متوترة بس حاولت تخفي توترها..ماتبيشي يشوفوها خايفه ولامتوتره ولاضعيفه.
طلعت جنة من القعماز وحطتها في سريرها..بعد ماحطتها ماحستش الا وهو لافها ليه وشادها من ذراعاتها بقوة وهو يقول..
/جاوبيني تكلمي..علاش طيبتي وعلاش درتي الحاجه اللي نحبها
طوبى وهي تتوجع..
/طيبت ع خاطري مليت من ماكله برا..ودرت كسكسي لأن مافيش غيره..انت مش جايب غيره..
خبطها بقوه ع ذراعاتها وشدتهم بقوة اكثر وهو يقول..
/كذابه..اني جايب كل شي مش منقص شي..
طوبى وهي تتوجع...
/ماشفتش ماشفت شي..ااه..
هو لما سمع صوتها تألمت طلقها شويه شويه وهو يقول..
/تعبتيني معاك تعبتيني..مش عارف شن ندير بش تسامحيني وتنسي..حتى دار الرسم اللي درتهالك مابيتيش تخشي تشوفيها...تشوفي قداش نحبك ومهتم بكل شي يهمك..اني ماعمري درت لحد هكي..عمري مااهتميت بحد هكي..حسي بيا..وقعد يضرب ع صدره وهو يقول..قدري اللي اني فيه..قدري اللي درته ع خاطرك وقاعد ندير فيه..
وهي تسمع فيه وتتحسس في ذراعاتها وماتبيش تشوفله..
رجع شدها مرة تانيه وقربها ليه وقعد يبوس في راسها..وهي تباعد فيه..
وهو يحاول يسيطر عليها..لكن هي قاوماته بقوة لين بعداته عنها..
قعد يشوفلها بنظرات حاده مليانه دموع..بعدين مشي طلع من حداها وكله غضب..
غمضت عيونها وهي تحاول تخفف خوفها وتدعي..
/حسبي الله ونعم الوكيل..حسبي الله ونعم الوكيل..حسبي الله وكفى..اللهم اعني ولاتعن عليا..
وقعدت شاده ذراعاتها اللي كانوا يوجعوا فيها هلبه..والتفتت لبنتها لقتها راقده..نزلوا دموعها وهي تشوفلها بألم...
🍃قاومت طوبى وهي مستعينه بالقوة التي لاتقهر..وبالصبر واحتساب الاجر..فكرة احتساب الاجر ع كل شي بشع ومؤلم قاعده تعيش فيه كانت تريح فيها هلبه..
نزلت للكوجينه وكملت تطيب غداها..ودارت السلاطه..
جهزتله غداه وغطاته..وجهزت سفرتها وركبت بيها فوق بش تتغدا جنب بنتها..
تغدت وكملت ونزلت بالسفره للكوجينه لقاته فيها ياكل..
تجاهلت وجوده رغم خوفها..وخشت غسلت ماعينها..ولما جت بتطلع..هو ناض شد يدها ورفعها ليه وطبع عليها قبله بعدين قال..
/يسلمولي..
جبدت يدها منه ومشت بسرعه طلعت وهي منقرفه..
ركبت تجري للدور التاني وخشت للحمام غسلت بدها كويس..بعدين ولت لدار جنه...
اتكت فيها وقعدت تقرا في القرآن وهو ماجاش جهة الدار نهائي..
لعند بعد صلاة العصر..
هو كان يخدم ع اللاب توب في الصالون..
سمع جرس الانترفون رن..رفع عيونه للباب واستغرب..
بعدين ناض ومشي للجهاز..وقف عليه وقام السماعه وقال..
/مني!؟
"بوك افتح"
بعد السماعه وهو يتأفف بملل..بعدين ضغط ع زر في الانترفون انفتح الباب الخارجي..
🍃خش محمد شنيبه وهو يمرر في نظره ع جنان الفيلا شاف كيف جدد فيه وغيره كله..وركز ع وجود الكاميرات..
سمع باب الفيلا الدخلاني انفتح وشاف الجالي طللع..
وقف في مكانه وهو يشوفله بإمتعاض..
الجالي لما وصل فيه كب ع راسه وتباعد وهو يقول..
/آنست..
محمد شنيبه؛مرتاح وعايش عادي ولاكأنك درت شي..
الجالي:شنو هو اللي درته لميت شمل عيلتي وحافظت ع حوشي من الخراب...
بوه غير عيونه عنه وشاف للباب وقال..
/بنخش..
الجالي؛تفضل تفضل..الحوش حوشك..
مشي محمد شنيبه بيخش والجالي وراه وهو مبتسم بمكر..
دخله وسكر الباب وراه..
رفعه للمربوعه وقعمز معاه..
محمد؛قول لمرتك تجي ببنتك نبي نشوفهم..
هو ناض وقال..
/حاضر...
ومشي طلع من حداه...
🍃طوبى وقتها كانت في الدار تصلي في صلاواتها الحاضره والفايته..بسبب وجود وقت فراغ كبير عندها قعدت تقضي فيهم ورا بعض لين قربت تكملهم..
بعد ماسلمت..خش عليها الجالي وهو يقول 
/بوي لوطا..
رفعت حواجبها بعدين نزلتهم وع وجهها ملامح الامتعاض..
هو قال:اسمعي ردي بالك تتمادي مع بوي..
ناضت وهي تقول..
/مصيبتي اني ماليا عرفوا يربوني لهدا اطمن.
قلب عيونه بملل بعدين قال..
/يبي يشوف جنه حتى هي نزليها..
ومشي طلع وخلاها..
طوبى وهي تحول في ملايه الصلاه قعدت تفكر وافكارها قادوها لشي خلاها تبتسم ابتسامه خفيفه..
🍃وفي المربوعه الجالي ولى قعمز مع بوه قعد يسأل فيه عن احواله وبوه يرد بكلمه وقص..
لعند ماخشت عليهم طوبى وجنه في يدها
الجالي وين شاف طوبى لابسه فستان لونه اخضر زيتي انيق..ورافعه شعرها الطويل ذيل حصان وحاطه لمسات خفيفه جدا من الزينه ع وجهها وفي حضنها جنه ملبستها حتى هي من نفس اللون..طار عقله فيهم..
وزاد على مابيه لما جت طوبى لشيبانها بوجه بشوش وابتسامه حلوه وهي تقول..
/السلام عليكم..مرحبتين عمي..
وطبست كبت ع راسه وعطاته جنه..
هو تعجب هلبه..ولما شاف جنه قلبه فرفح البنت كانت جميله ودمها خفيف ذوب في القلب..
قعد يلاعب فيها وطوبى تشوفلهم بإبتسامه..بعدين قالت..
/نستأذن شويه ومشت طلعت..
وخلت الجالي والعه فيه النار..
خشت للكوجينه بش ديرله الضيافه وهي تقول بهمس..
/يارب ساعدني..
"قهوته سادا"
هي بجفاف..
/متفكره..
اتكى ع الرخامه وقال..
/علاش ديري هكي!..
شافتله وقالت ببرود..
/قاعده نمثل زيك ..
الجالي قعد يشوفلها وهو يتأمل فيها..
هي تجاهلاته ولهت بشغلها..
وهو يتبع فيها بعيونه ويشوف في شعرها وجماله وطوله ولى اجمل واطول من قبل..نضارة بشرتها كانت بارزة اكثر من قبل..جسمها رشيق..عيونها الاسيويه الرسمه مخليتهم يبانوا حادات حدتهم جذابه للغايه..وياه ع لون العيون الحايره لون الفستان عكس عليهم ومخليهم يلمعوا..
الجالي مش قادر يستوعب ان مراة زي هادي مرته ومش قادر ينول منها حتى نظره رضا..او كلمة حلوة..
طوبى بشي من العصبيه؛ شن دير واقف هني امشي قعمز مع بوك !..
تنهد بعدين بلع ريقه ومشي طلع من الكوجينه..
لحقاته بعيونها لين تباعد..خدت نفس عميق وطلعاته بعدين كملت باقي شغلها..
وتت سفرة الضيافه..بعدين فتحت باب الجنان وطلعت وقعدت دور ع الفل اللي زرعه الجالي ع خاطرها..
مشت قطفت منه..وخشت نثراته ع السفره..
بعدين خدتها ومشت طلعت بيها للمربوعه..
🍃وضيفت طوبى شيبانيها وقعمزت هدرزت عليه وبأسلوبها الحلو نساته كل شي صار بيناتهم..معروف مفعول الكلام الحلو ع الرجاله بالذات محمد شنيبه واولاده..
والجالي يراقب في هدا كله وهو هايم في طوبى وناسي وجود بوه اللي لاحظ نظراته لمرته..عكس طوبى اللي كانت محرجه شويه..
🍃🍃🍃🍃
"غير اقعد تعشى عمي"
محمد شنيبه؛يوم تاني بنتي..
طوبى:معناها الخميس جيب عمي المهدي وعمر ونضال وتغدوا عندنا..
والجالي يسمع فيها وهو يشوفلها بعدم استيعاب..
محمد شنيبه؛والله شن بنقولك يابنتي..
طوبى؛قول باهي عمي...جالي تكلم خيرك ساكت..
شاف محمد لولده بطرف عينه..
الجالي استاقظ وقال..
/ايه صح صح..
محمد شنيبه:شن هو اللي صح..
الجالي وهو يشوف لطوبى..
/اللي قالاته..
طوبى انحرجت وقالت..
/خلاص عمي ارجوك ماتردنيش..
محمد هز راسه وقال..
/إن شاء الله..هي استودعانكم..
ومشي طلع..وطوبى لحقاته وهي تقول..
/خليك هني نبي نكلمه بروحي..
رفع حواجبه بتعجب..بعدين عقدهم ومشي لحقهم خاف تقول شي مش في صالحه..
لحق عليها لقاها واقفه ع بوه وهي تقوله..
/بالله سامحني..
محمد شنيبه؛خلاص بنتي اللي فات مات زي مايقولوا وربي يهدي سركم..
هزت راسها بإبتسامه مجامله..
هو قال:السلام عليكم..مسح ع خد جنه وهو مبتسم بعدين مشي بيطلع والجالي لحقه وهو يسقد فيه..
هي طول هربت للدروج..شافت لبنتها وقالت..
/امك قاعده تجازف يابنتي..يارب سترك..بعدين ركبت الدروج..
لين وصلت ببنتها الدار وسكرتها عليها..
شويه وطلعت وهي لابسه بيجامه شتويه وخشت طول للحمام وسكرت عليها بالمفتاح..
🍃🍃🍃🍃🍃
وبعد ساعات قضوها في السفر من مطار لمطار بش وصلوا للقاهره اللي ماكانتش عندها رحلات مباشره مع طرابلس وقتها..
حسين خدي الجالي لشقته..اما سلافه نزلت مع صاحبتها واخ صاحبتها في فندق..
🍃عبد القيوم؛مافيش اخطر منك والله..
ضحك حسين وقال؛كنت مجبور ندرق بش مانفتحش عيون الجماعه اللي غادي..ولما رادعت وضعي معاهم خديت راحتي..
عبد القيوم:ربي يباركلك في رزقك..
حسين؛اجمعين..ايه قولي افتح قلبك فضفض..شن قصتها السوريه هادي..
عبد القيوم بنفاد صبر:إنا لله وإنا إليه راجعون..والله العظيم مافي حاجه والقرآن الكريم مافي حاجه..
هو بضحكه؛لكن هي مش صافيه راهو نظراتها تشبه نظرات بنت شارعنا..
عبد القيوم؛كنك رايح معاد تحشم بكل وتدوي ع بنات الناس عادي..
حسين بضحكه:ماغلطت في حد بس قاعد نوقظ فيك..نبيك تعيش حياتك وتنسى..
عبد القيوم بضيق؛ياريت الموضوع هذى تسكره بكل لأني جاي هنا بش ننسى..
حسين ضيق عيونه وقال..
/جد في الامور جديد!؟
هو قال:قتلك سكره ياحسين..
حسين هز راسه وقال..
/حاضر..
عبد القيوم؛نبي نصلي..
حسين:الحمام غادي..واشرله بيده ع مكان معين..
عبد القيوم:مش هنا..نبي دلني ع جامع قريب..
حسين:اها..مالا هيا خل نمشوا مع بعض..
عبد القيوم هز راسه موافقه..ومشوا طلعوا مع بعض..وشعور الضيق اللي مفروض يتلاشى مجرد مايطلع من البلاد زاد اكثر واكثر...
🍃🍃🍃🍃🍃
"والله ياوخيتي ولدي مش بلاش الراجل كان ناوي يطلق خلاص ومرتب اموره وع اساس بيسافر بعدين اللي جاه جاه"
رقيه:قصدك دايرتله حاجه؟
خديجه:مالا شنو ياخالتي رقيه..والجو اللي داراته كله فيلم تبي الناس تصدق انه يبيها حق..
:لاحول ولاقوة الا بالله والله الواحد ماعارف شن يقول..وانتي يانجاه شن صار فيك يابنتي..
رقيه ضيقت عيونها وهي تشوف لنجاه..
نجاه:شن بيصير ياخالتي..الله غالب ماعندي ماندير هدا مامقدر عليا ربي وهي سيورها تلقى اللي دير فيه توا ولابعدين اللي حتى بنتها ماسلمتش من مكرها..
:هي من تصرفاتها في حفلة بنت فايزة ماعجبتنيش قبل نشوف فيها عاقله بس زي مايقولوا يامزوق من برا شن حالك من داخل..
خديجه:هي هادي..تو لو كان الجالي مش مهم عندها علاش دير العبيتر اللي داراته ليلتها ماهو من حرقتها..وماسدهاش اللي داراته لعبت لعبتها وخلاته يردها يحب ولايكره..
مغليه بحسره مصطنعه..
/الله لايسامح هداكا اليوم اللي لم بينا بينهم...
🍃🍃🍃🍃
وفي الحوش اللي مجاورهم..
كانت العيله ملتمه وعبد الفتاح هالمرة جاب ابتسام لاول مرة من غير مناسبه..ونجمه ماابدتش اي اعتراض كانت عاديه جدا...
زي ماسميره اللي تعودت كانت واخده الموضوع عادي..
في وسط لمة العيله..
كانت صفاء سرحانه بحزن..اشرف بيولي للخدمه وبيفارقها فتره طويله وهي مش عارفه كيف بتتحمل بعده..
دمعتها محبوسه في عيونها وقلبها واجعها ع الاخر..
استاقظت من سرحانها لما شافت ابتسام وهي ماشيه ببنتها بترفعها للحمام..وين قربت توصل للفم زلقت لكن شدت روحها..
كلهم سموا بالله عليها..وعبد الفتاح قعد معاها بعيونه لين طلعت..بعدين رجع شاف لسميره لقاها لاهيه بالهدرزة مع وحده من سلفاتها...وصفاء مركزة عليه..
شويه وولت ابتسام ببنتها..البنت مشت تلعب بالعاب التركيب مع الصغار الصغيرين..وابتسام ولت قعمزت في مكانها قريبه ع عبد الفتاح اللي انشغل بالهدرزة مع واحد من خوته..
شويه وقالت نجمه..
/بالله سمورة نوضي حتربي الكاكاويه..
ناضت سميره وهي تقول..
/حاضر عمتي..
مدتلها نجمه السفره..خدتها ومشت..وهي ماشيه عفست ع قطعة مكعب وجعتها هلبه لين عيطت من قوة الالم..
ويسمعها عبد الفتاح وينوض من مكانه ويمشيلها وهو مفجوع ويقول..
/خيرك!!؟ شن صارلك!..
خيم الصمت ع الجميع في الصاله..وانظارهم عليهم..
سميره وهي محرجه؛خيرك انت! عفست ع حاجه بس..
عبد الفتاح:ع شن عفستي..
سميره اللي كانت تبي الارض تنشق وتبلعها قالت..
/لعبه شورها مافي شي..ومشت طول طلعت هاربه من الصاله..
ولادها كانوا يشوفوا لمرت بوهم بنظرات شماته..
وبوهم ولى قعمز وهو يقول..
/لاحول ولاقوة الا بالله..
شاف لخوه لقاه يشوفله وهو شاد ضحكته..مرر نظره ع الباقي لقاهم بنفس الحاله..ماعدا ابتسام اللي مابتش تشوفله نهائي..انحرج..وعقد حواجبه وهو يقول..
/ماتحسبنيش في الكاكاويه يام ولت تعب فيا..
نجمه؛قلتهالك قبل انت ماتحب كان اللوز لكن انت اللي سيبته وبدلته بالكاكاويه..
كلهم فهموا عليها واولهم ابتسام..
وواحد من خوته بش يلطف الجو غير الموضوع وهما سايروه..
وولت سميره بسفرة الكاكاويه..
واحد من ولادها قال..وين اللوز يام؟
سميره:لوز شني!؟؟
قعدوا يضحكوا..
وعبد الفتاح يفنص في ولاده اللي داروا ارواحهم مايشوفوش فيه..
اما سميره قعمزت وهي تشوف لولادها بعدم فهم..
وابتسام ماسكه عصابها بالقوة..
صفاء اللي تفرجت ع المشهد كله في نفسها قالت وهي تشوف لإبتسام....
"تستاهلي اكثر"...
🍃وبعيد عن هاللمه واللي يصير فيها كانت عواطف حابسه روحها في دارها وعايشة حالة كآبه بدت تجيها وين يلتموا خوتها مع نساوينهم ف حوش العيله...
🍃🍃🍃🍃🍃
مقعمزه ع المصليه متاعها شاده المصحف وتقرا..
هو خش عليها وقعمز ع الكرسي وقعد يتفرج عليها ويسمع لين كملت...سكرت المصحف وضماته زي عادتها..بعدين ناضت ورداته لمكانه وحولت ملايتها..وطبست قامت الصلايه وين جت بتحطهم في مكانهم شافاته هالمرة ماانفجعتش حاولت دير روحها عاديه..
هو تبعها بعيونه وقال..
/من جهة ماتبنيش...ومن جهة تانيه ديري في كل شي تخلي شوقي ليك يزيد يقوى..فهميني شن قصدك من هدا كله..
قعمزت ع السرير وقالت..
/اول شي..انت في الكوجينه مش جايب غير الكسكسي مالقيتش غيره ع قد مادورت..انت قصدت دير هكي بش مانلقاش غيره نطيبه..وكنت عارف اني حنطيب اليوم لأني من امس لمحت اني ماكلة برا تعبت معدتي..
قعد يشوفلها وهو ساكت..
طوبى:تاني شي انت جيت قتلي ماتتماديش مع بوي واني درت اللي تبيه...جالي ارجوك معاش توهم روحك ومعاش تكذب الكذبه وتصدقها..
الجالي:طوبى علاش ماتعطنيش فرصه..
طوبى:امافرصه تبيني نعطيها لواحد دار فيا اللي انت درته! اللي درته لليوم خلاني كارهه كل ثانيه تجمعني بيك في مكان واحد..اني لعند توا مش مستوعبه اني قاعده معاك وانيي كنت نقول لو نموت مانوليله..لكن انت شدتيني من يدي اللي توجعني..عملتك هادي بروحها ساده تخليني مانطيقش نسمع اسمك..
تنهد بألم واتكا ع الكرسي وهو يشوفلها بحزن..
اما هي بعد ماشافتله بنظرات كره...تمددت ع السرير وتغطت وقعدت تشوف لسرير جنه ودموعها نزلوا..
وقعدوا ع حالهم للحظات ولحظات..لين غلبهم النوم...
🍃🍃🍃🍃🍃
تاني يوم..
الساعه 7:00صباحا..
في الجنان الخلفي لحوش الصيد..
كان اشرف واقف ع صفاء وهو يمسح في دموعها ويقول..
/ماتخلنيش مشغول عليك ياقلبي..
صفاء بعيون مدمعه:ماتعطلش عليا بالله عليك..
ضمها لقلبه وباس ع راسها بعدين قال..
/كل يوم نكلمك تليفون وع الماسنجر ونبعتلك صور..باهي..
ابتسمت وهزت راسها بإيجاب..
رجع باس راسها بعدين قال..
/هي خلاص خشي داخل صقع..
هي قالت؛ردبالك ع روحك..
اشرف بإبتسامه:حاضر ياروحي..
ابتسمت بخجل بعدين مشت خشت داخل وهي تبكي..
وهو تنهد بعدين مشي لسيارته..
🍃وعواطف من روشن الحمام كانت تراقب فيهم وتسمع بقهر..
🍃🍃🍃🍃🍃
مصر...القاهره...
الساعه 10:30صباحا..
كانت سلافه مع صاحبتها في المكان اللي بتقام فيه الورشه  تشرف ع التنظيم وتشوف في المدربين اللي بيعطوا دروس في الورشه كل واحد ياخد تلاته ايام..واولهم كان عبد القيوم...
اللي كان مقعمز مع خطاط مصري مشهور يتبادل معاه حديث يخص مجالهم..
الخطاط اعجب بحب عبد القيوم للخط العربي وتفاجى بيه انه مش متعلمه عن دراسه بل بالبحث والقراءة يعني جهد شخصي...
تراقب فيه سلافه بنظرات الاعجاب وكل تركيزها ع تفاصيله
🍀مر الوقت..
وبدت الورشه في يومها الاول مع عبد القيوم..
عرفت بيه سلافه وقدماته تقديم حلو...وهو ناض من مكانه وشكرها وقدم وقف جنب السبورة وقال..
/السلام عليكم..
ردوا عليه السلام..
ابتسم وقال..
/اول مرة نوقف هالوقفه واول مرة نعلم شي في حياتي..نبي نقول..ان الخط العربي عندي شغف مش مجرد هوايه..انا لاخديت دورات ولادرست الخط دراسه..شغفي هو اللي خلاني نبحث ونقرا ونتعلم اي شي عن الخط العربي..لين تعلمته بكل انواعه..وحتى في انواع رسم بالخط تعلمتهن..واكيد حتى انتم اللي جابكم هنا الشغف..
ردوا عليه بأصوات متقطعه موافقينه في كلامه..
وسلافه طول ماهي تشوفله وتسمعله كانت مبتسمه وعيونها يلمعوا..
عبد القيوم بإبتسامه..
/حلو...تمام خل نبدوا مع بعضنا رحلتنا مع اقرب الخطوط لقلبي..خط الثلث...
حول البالطو متاعه وسواه كويس وحطه ع الكرسي..وخدي قلم خطاط فتح وبدي يعطي من شغفه للناس لأول مرة..
هو قبل كان رافض الموضوع هدا رفض قاطع ع قد ماحاولوا فيه اصحابه واقاربه كان خايف يفقد شغفه اتجاه هوايته ويسيبها..بس اللي صار توا خلاه يفهم كلام سلافه لما قالت ان شغفه بيها حيزيد لما يعطيها مساحه اكبر من وقته..
وسلافه قاعده مبهوره بيه وبكل تفاصيله بالذات لما يتكلم بالفصحى...
بعد ماعدت ساعه ونص وهو يشرح عن خط الثلث قال..
/خل نكتب قدامكم كلمة كامله بخط الثلث ركزوا معاي..
وهو يمرر في نظره عليهم جو عيونه ع بنت لون عيونها يشبه عيون معشوقته..بلع ريقه وغير نظره عنها وقلبه يدق بقوة..
شاف للسبورة وبدي يكتب...
وكلهم مركزين معاه...
كان يكتب بطريقه مميزة..بان فيها وكأنه يكتب بكل مافيه...
وسلاف لاحظت هالشي..
وقعدوا معاه بالحرف وبالحركه..لين كمل..
هو لما كمل نزل يده وقعد يتفرج ع الكلمه اللي كتبها بنظرات كلها وجع..
واللي حواليه كانوا معجبين جدا بجمال خطه واتقانه..
بس سلافه وهي تشوف للكلمه حست انه ماكتبهاش عشوائيا..
هو ابتسم وقال..
"طوبى"
التفت عليهم وقال..ترا جربوا تكتبوه عندكم كيف ماتعلمنا...
وبدوا المشتركين يكتبوا في اسمها في دفاترهم..
وهو رجع يشوف للإسم مرة تانيه..وسلافه معاه بنظرات كلها ضيق...
🍃🍃🍃🍃🍃
"طوبى ولت للجالي!!"
مطيره بحسره:ايه ياولدي ولتله..
"كيف هكي!!.بعد اللي داره وبعد اللي صار توليله معقوله!!..انتم كيف خليتوها"
مطيره بألم:الله غالب ياولدي هدا اللي مقدره عليها ربي..
"لالاا ياعمتي ماتقنعنيش بالدوة هادي مستحيل طوبى دير هكي من غير سبب قاهر..بالله عليك عمتي تكلمي قولي الحق"
مطيره:الو...يوسف..الو..معاش نسمع فيك..
"ايوه عمتي..عمتي فكيني من طروحك"
مطيره؛معاش نسمع معاش نسمع في شي ..وسكرت عليه وقعدت تدعي..الله يعطيك بلي يرفعك ياجالي ويفك هالمسكينه وبنتها منك..
فردوس بحزن؛تو بيقعد ورا خوته لين يحكوله...
مطيره؛اني خايفه مايشدش روحه قدام اخته ماصدقنا بدت تتجاوب مع العلاج..
فردوس؛لالا مستحيل يدير هكي..
مطيره؛والله ماتندري يابنتي اللي صار يطلع الواحد من عقله ساد ماصار في خالك مسكين خلوا الراجل يبكي بدموعه اللي يقهرهم الزوز..تفي ع الكلب هداكا ياريتها عترت وردة ولا جابت هالجيبه المشومه..
🍃🍃🍃🍃🍃
"خالتي مابتش دخل حد في مشكلتها نوعيتها هكي تضايق لما تحمل حد مسؤوليتها"
عزيز:بس راجل زي هدا ياآلاء مرات يشكل عليها خطر بعدين واحد تسوله نفسه يخطف بنته بش يرد امها توقعي منه كل شي..
آلاء بقلق:بالله ماتزيد تخوفني من غير شي مش قادره نرقد الليل واني نخمم فيها..
عزيز بإستياء:ياريت يطلع بيدي ندير شي الموضوع توا ولى شخصي مايقدر حد يدخل فيه بعد ماولت بإرادتها او هكي بان قدام الناس..
الاء:هدا اللي مكتفنا حني..
عزيز؛لكن اسمعي مادام هو قاعد هني انتم مانتخلوهاش مفروض تمشوا تزوروها..
الاء:من قال يخلينا المصيبه اللي واخدها..
عزيز؛مش بكيفه غصب عنه حقكم تزوروها وتشوفوها..
تنهدت آلاء بقلق وهي تفكر في كلامه...
🍃ومن  كلية اللغات للآقتصاد..
كانت كيف تامه محاضره لأريج في احدى المدرجات والمحاضره اللي بعدها كانت لنضال..
الوحيده اللي لمت حاجاتها ومشت بتطلع..تقابلت هي وياه في الباب تخطاته وطلعت..وهو كان مخنوق مش بس مضايق..بعدين سكر باب المدرج وخش..
وماكانتش هادي اول محاضرة ماتحضرهاش خلال هالاسبوع..
🍃🍃🍃🍃🍃
الساعه 9:30ليلا...
في شقة مختار..
خشت امينه للصاله ع صابرين وهي جايبه سفره فيها زوز طواسي سحلب..
عطتها وحده..وخدت هي وحده وقعمزت..
والزوز قعدوا يتفرجوا ع مسلسل في مشهد لحفله خطوبه..
البطله حاضره حفله خطوبة الراجل اللي تحبه..
صابرين كانت عايشه المشهد ومركزه مع انفعالات البطله..في اخر المشهد طاحت البطله مغمى عليها ماتحملتش اللي شافاته..
هني صابرين انهارت بالبكي...اللي حاولت تكمده الايام اللي فاتوا طلعه مشهد في مسلسل..
حطت امينه طاستها ع الطاوله وجت لصابرين خدت طاستها وحطتها حتى هي ورجعتلها خدتها في حضنها وصابرين تبكي بالعبره وهي تقول..
/نحبه ياامينه نحبه هلبه..والله اول مرة في عمري..اول مرة نحب حد هكي ياامينه..حاسه روحي بنموت..ماسد ولى بعيد عليا..بيكون لغيري...ااه مااقسى هالعقاب ومااحره..مش قتلك ياأمينه..قتلك ربي عدل
امينه وهي تبكي..
/ماتعمليش في نفسك كده ياحبيبتي بكرا تنسي وتكملي حياتك صدقيني..
صابرين ببكي..
/زعمه ساهل ياامينه..ساهل ننساه..لالا مش ساهل بكل..تي هداكا يبيني نحضر الحفله يبيني نموت بالعرق ياامينه..بعدت عنها وهي شادتها وقالت بنبره مرتعشه..
/ولا هو الكذاب..وينه حبه اللي يحكي عليه اقل شي يتصل يسأل..تعرفي ياامينه شن دارلي..دارلي حظر...حظر ف كل شي..ابتسمت تهكما وقالت..مالا شني توا بيبدا حياة جديده خطيبته دكتورة وبنت دكتور معروف ومن عيله معروفه شن مازال بيدير بيا اني اللي مانسوى شي.
خشت حضن امينه وقالت..اني مانسوى شي ياأمينه...
وامينه زادت ضمتها بقوة وباست راسها وقلبها يتقطع عليها..
وصابرين تبكي بقهر وحرقه وندم...ندم ع حياة كامله عاشتها وهي تغلط واهي اليوم قاعده تتحمل في العواقب الوخيمه...
🍃🍃🍃🍃🍃🍃
"شن حسك قلت!!؟"
محمد شنيبه:اللي سمعتيه..
مغليه بصدمه؛لاهادي بخاته عليكم كلكم..
هو بإنزعاج قال:بالله فكيني من وجع راس اني كنت نبيك نعطيك علم وهاك عرفتي..تصبحي ع خير..
ومشي طلع من حداها وخلاها قريب تفقد عقلها...
وطبعا طول نقلت الخبر لخديجه اللي كملت ليلتها وهي تحرق وتسحن ونجاه ماتندري على شي...
🍃🍃🍃🍃🍃🍃
تاني يوم..
الخميس..
13ديسمبر...سنة 2018..
الجالي ماطلعش بكل قعد مع بنته..وامها كانت تجهز لعزومة شيبانيها وسلافها..
من ليله امس جهزت كدا نوع ودستهم في الفريز واليوم من قبل الظهر باديه اطيب..والوجبه الرئيسيه كانت كسكسي لأنه مافيش غيره عندها..
ومع الساعه 2بعد الظهر كان كل شي واتي..
ركبت بسرعه للدور التاني..خدت دوش ولبست بيجامه جديده..مشطت شعرها وضماته بعدين بدت تلبس في جنه بعد ماكملت..خدت بنتها في حضنها وقعدت تقرا..
شويه وخش بوها وقال..
/جو توا..جيبيها..
هي عطاته جنه هو قرب اكثر بش يشم ريحتها..
بعدين خدي بنته ومشي طلع بيها..
وطوبى لبست عبايه وشاربه..ونزلت للكوجينه تجهز في السفر..
🍃في المربوعه..
خش عليهم الجالي بجنه كلهم ابتسموا من قلوبهم لما شافوها..
خداها جدها وقعد يلاعب فيها وبوها يشوفلهم بإبتسامه..
والمهدي يشوفله بنظرات متفحصه..
اما نضال فكانت نظرات ليه نظرات كره بعد اللي داره معاش تقبله..وسبب جيته هو نفسه اللي جاب المهدي..يبوا يطمنوا ع وضع طوبى وبنتها...
شويه وطلع الجالي بعد ماجاه اتصال من طوبى...
عمر:يبان جوه مليح..
نضال؛مالا شنو طول عمره عنده حظ..
محمد شنيبه قعد يشوف لجنه في حضنه والتزم الصمت.
عمر:الجالي عمره ماحيرتاح ولايتغير حاله للأحسن الا مع طوبى..
المهدي بسخرية؛ايه واضح هلبه..في مية دليل ودليل ع الحاجه عادي..
ابتسم نضال تهكما..
محمد شنيبه:خلاص انت وياه انهوا..
ع جية الجالي بالسفره حطها ع الارض وهو يقول..
/قدموا قدموا..
وهما قدموا وقعمزوا حوالين سفره فيها كل مالذ وطاب..
والمهدي وهو يشوف لصونية الكسكسي خطرت عليه الفنانه فيه..ابتسم ابتسامه خفيفه لاتكاد ترى..
والجالي يعزم فيهم وهما بدوا يتغدوا..
ع خشة طوبى بسفره المشروب وهي تقول..
/السلام عليكم..صحتين..حطت السفره قريبه عليهم وكلهم يشوفولها..
طوبى بإبتسامه:مشكورين اللي جيتو..
المهدي:كيف حالك؟.
طوبى:الحمد لله..كيف حالك انت وحال الصغار..
المهدي:الحمد لله..
عمر:شن حالك طوبى .
طوبى:الحمد لله..انت شن داير..
عمر بأبتسامه:ماشي الحال..
نضال:كيف حالك..
طوبى:ترا عمي هاتها عنك..
محمد شنيبه مد جنه لبوها والجالي عطاها لطوبى..
خدتها وهي تقول..
/صحتين..ومشت طلعت من حداهم..
والجالي والمهدي وعمر قعدوا يشوفوا لنضال كيف عقد حواجبه بضيق من تجاهل طوبى ليه..ومافي حد غير عمر عارف السبب..
🍃ورجالة عيلة شنيبه ياكلوا من ايدين طوبى..
ونساوينهم ياكلوا في ارواحهم غيظ منها..
مغليه:شيطانة الشيطانات هادي..ياكبدي منها..
خديجه؛قاعده تصدم فيا بيها..وحده خبيثه لفعه..
ع جية نجاه ومعاها جوري ومعاذ حمزة مشي لولاد عمه في شقتهم...
سلمت عليهم وقعمزت وهي تقول..
/كأنه مافي حد ؟
خديجه بإبتسامه ساخره..
/ايه ياحنه..كلهم من بوي لنضال معزومين عند الجالي.
نجاه:تتسهوكي!!؟
مغليه؛ياريت تسهويك..
نجاة بصدمه؛كيف معزومين!!؟ ومن عزمهم وعمي مشي عادي!!؟
مغليه:هي ياحنه اللي حلفت عليه وعمك مشي عادي..
نجاه سكتت الصدمه ربطت لسانها..ونار الحقد متاعها تجاه طوبى كانت تأكل في جزء فيها...
🍃🍃🍃🍃🍃🍃
وفي ارض الكنانه...
في مطعم قريب من المكان المقامه فيه الورشه..
كان عبد القيوم يتغدا مع المدربين في ورشة تعليم الخط وسلافه وميار معاهم..
الاحاديث اللي دور ع الطاوله بعيده عن الهوايه اللي جمعتهم..كانت عن السياسه او الوضع المعيشي..
وسلافه مركزه مع تفاصيل عبد القيوم..
لاحظت ان اي حاجه ليها علاقه بالفلفل الاسود ماياكلهاش..يحب يعصر ليم ع اي شي ياكله..يفضل العصير عن المشروب..وهو ياكل مستحيل يتكلم..ولاحظت انه مامسش اي نوع انواع الخبزة الموجوده ع الطاوله..
بعد الغدي..
كلهم طلبوا قهوة..الا هو طلب شاهي اخضر..
ميار اللي كانت مركزه عليها قربت من وذنها وقالت..
/خلي عيونك يعتقوا الراجل شويه..
هي بهمس قالت..
/سدي بوزك..
شدت ميار ضحكتها وولت ركزت هالحديث اللي يدور بين الموجودين..
عبد القيوم بعد ماشرب الشاهي قعد يدور بعيونه ع الميه..
شاف شيشه لكن قريبه ع سلافه..
هي ابتسمت وخدتها..فتحتها وصبت منها في طاسه لين عبتها..وخدت الطاسه ومدتهاله..
هو ابتسم بشي من الاحراج  وخدي الطاسه من تحت وقال بدون مايشوفلها..
/شكرا.. وبدي يشرب..
وهي معاه بعيونها اللي نظراتها تعبر عن الاعجاب الشديد..
🍃🍃🍃🍃🍃
وروحوا محمد شنيبه وولاده من عند الجالي وهما راضيين والجالي كان طاير من الفرح..طلع معاهم وناوي يجيب هديه لطوبى بش يشكرها ع اللي داراته...
اما هي..
بعد مارقدت جنه..طلعت من دارها..وقعدت تشوف لدار النوم وهي تفكر وتقول في نفسها..
"عندي احساس ان مركب كاميرات حتى داخل الحوش..اصبري ياطوبى اصبري وماتتسرعيش وحاولي تتصرفي بحكمه"..
خدت نفس بعدين التفتت لدار المرسم..مشتلها..وفتحتها بهدوء..توسعوا عيونها بمفاجأة من اللي شافاته فيها..
كانت حلوة هلبه..ومغريه..حست في لحظه ان شغفها بالرسم انطفي من وقت طويل رجع اشتعل في قلبها مرة تانيه...
🍃والجالي وهوطالع من محل مجوهرات..
جاته رساله ع تليفونه..ركب سيارته وفتحها..
(مش عارفه كيف رضيت ع روحك تعيش مع مراة مش طايقاتك وقلبها عند غيرك)
قري الكلمات الاخيرات اكثر من مرة ونار الغيره والغضب يتناثروا من عيونه..
جاته رساله بعدها..
(متأكده انها مش طايقه تشوف في وجهك)
وتجيه رساله بعدها مباشره..
كانت صورة لطوبى مع حسين..الصورة نفسها اللي تسببت في فسخ خطوبة حسين وفي مقاطعه بين طوبى واميمه..
الجالي لما شافها جو بين عيونه كل المشاكل اللي صارت بينه وبين حسين بعد ماهجراته طوبى وطلبت الطلاق..
عيونه معاش ولوا يشوفوا في شي غير الغضب..
لوح التليفون جنبه وشغل السياره وتحرك للفيلا بسرعه..
🍃وطوبى بعد ماتفرجت ع دار المرسم طلعت منها وسكرت الباب..
ومشت لدار جنه..وقعمزت ع الكرسي وقعدت تفكر...
دقايق..وسمعت باب الفيلا انخبط بقوة..
عقدت حواجبها بخوف...
سمعت خطوات رجليه وهو يجري في الدروج..وقعدت تشوف للباب وتترقب في خشته عليها..
ويخش عليها وكان باين عليه انه مش طبيعي..
جاها جبدها من ذراعها وطلعها من الدار وسكر الباب..
طوبى وهي مفجوعه..
/شن في!؟
الجالي هو شادها بقوة من ذراعاتها..
/شن في بينك وبين الكلب حسين!؟
هي بصدمه..
/شن تخرف انت!؟
هو بصوت عالي..
/شن في بينك وبين حسين ياكلبه!
طوبى بخوف..
/والله مافي حاجه..والله العظيم..حسين طول عمره زي خوي..خوي بس..
قعد يوخر بيها ويقول..
/شن تحسابي روحك بتمشيه عليا!!من الاول شكيت في تصرفاته..شكيت في اللي يدير فيه كان يبيني نطلقك..حتى خطيبته سيبها بعد المشكله اللي صارت بيني وبينك..
حطها ع الحيط بقوة وقال..
/خنيتيني ياحقيره..درتيها وختيني ياكلبه..
طوبى استجمعت شجاعتها وقالت بقوة..
/مش اني اللي نخون..ماتربيتش ع الخيانه والوساخه والنفاق..اني لو نبي حسين راك ماخدتنيش..لو نبي حسين راهو خليتك طلقني غصب عنك..وانت عارف كويس اللي نقول فيه حق..عارف ان طوبى مستحيل تخون ايه مانحبكش ومش طايقاتك لكن مستحيل نخونك...ع خاطر ربي مش ع خاطرك..
تبدل غضبه للهفه وهو يقول..
/طوبى نموت فيك..نموت فيك..بنجن عليك...ماتحرمنيش منك..
هي قلبت وجهها عنه وبدت تبكي وتقول بعياط..
/مانبيكش اني مانبيكش..مش متحملاتك قارفه منك..بعد عليا..بعد...
هو اعصابه فلتوا معاش قدر يتحمل رفضها وهو مش متعود ع الرفض من اي حد فكيف بيتحمله من المراة اللي يحبها!
تباعد ورفع يده ونزل ع خدها بصفعه من قوتها طاحت ع الارض..طبس عليها وجبدها من شعرها ونهضها فوق وهو يقول..
/حتكوني ليا الليله تبي ولاماتبيش..
هي قعدت تشوفله بعيون مغرقتهم الدموع ونظراتهم كلها حده وقالت..
/زيد طيح نفسك زيد..وتجيها صفعه خدها التاني اقوى من الاولى..هي عيطت...بعدين جبدها من ذراعها ومشي بيها للجناح رماها ع الارض وقال بغضب ومكر..
/اقعدي محبوسه هني وانسي تشوفي جنه..
هي قريب انجنت من اللي سمعاته ناضت ومشت تجري بتطلع وهي تقول بعياط..
/لاجنة بنتي..نبي بنتي..
هو سكر الباب بقوة ..سمعت لفات المفتاح قعدت تخبط ع الباب زي المجنونه وهي تنادي بإسم بنتها..
وهو اللي كان فاقد السيطره ع اعصابه والغضب عامي عيونه نزل لوطا من غير مايهتم لصوت عياطها اللي ترفع فيه ريح الشتي...
🍃🍃🍃🍃
فتحت الباب وخشت ع بنتها الدار لقتها واقفه حدا الروشن..
جميله بقلق/تسمعي ولا!؟
منيه بخوف:ايه..زعمه شن صاير!؟
جميله بضيق:والله بان عليها من وجهها موليه غصبا عنها..
منيه تنهدت بخوف..
وجميله قالت..
/يارب تكون معاها مسكينه..حسبنا الله ونعم الوكيل..
ومشت طلعت وسكرت الباب..
ومنيه قامت تليفونها بتتصل عمر بش تقوله..لكن تراجعت في اخر لحظه خوفا من المشاكل اللي يوم من الايام كادت تشتتهم...

#سجن_ يوسف
#طوبى

...يتبع....