طوبى ☕شارع القهوة☕

الجزء_الثامن_والثمانين

#طوبى  "جنة طوبى"
#جمان_فريد
#الجزء_الثامن_والثمانين "سجن يوسف/انهيار"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الحمد
قال رسول الله ﷺ:
« إذا قال العبدُ : ( الحمدُ لله كثيراً )  قال الله تعالى :
اكتبوا لعبدي رحمتي كثيراً ».
صحيح الترغيب (1578)📗
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 لله تلك الغصات التي ابتلعناها كالزجاج المكسور ؛ وجرحت حناجرنا ؛ لله نحن .. وإنا إليه لراجعون ..🍃
________________________________________
🔺️🔺️🔺️في وقت سابق🔺️🔺️🔺️
في ليله من ليالي شهر نوفمبر..
في مزرعة مختار..
كانوا في الهواء الطلق تحت المظلة الكبيره...
واحد مقعمز..والتاني واقف قدامه يتكلم..
🍃مختار وهو حاط يده في جيبه..
/سمعت انك تسعى بش تشوف بنتك بحكم محكمه..
الجالي:حقي..
مختار:اكيد مافيش كلام...وبعدين؟
الجالي قعد يشوفله وهو ساكت..
مختار:دعوى بيت الزوجيه..
الجالي:هادي خصوصيات مانسمح لحد يدخل فيها.
ابتسم مختار ابتسامه واسعه وهو يشوفله..
خلا الجالي يتوتر..
تنهد مختار وقال..
/اكيد عارف ان الدعوى ماديرلك شي..
الجالي قعد ملتزم الصمت..
مختار:اني جبتك بش نساعدك..
رفع الجالي حواجبه تعجبا..
مختار هز راسه وقال..
/ايه نساعدك بش تلم شمل عيلتك..حال بنتك وين نشوفها يوجعني ويوجعني حال اختي معاها..اللي حواليها سيورهم يشوفوا حياتهم..وجدها في اخر عمره..وسدرة اللي ممكن تكون عابيه عليها تبيلها بش ترجع لصحتها وغالبا مش حتولي زي قبل..وهي لو قعدت مسكرة راسها ع الغلط حتتعب هلبه وتندم القدام..
الجالي:كيف تبي تساعدني؟
مختار:قولي انت في شن كنت تفكر..
الجالي مرر نظره يمينه بعدين شاف لمختار وقال.
/كنت نبي نجبرها ترفع قضية طلاق ضرر وبعدين نعرف كيف نخليها تولي..
مختار ضيق عيونه وقال..
/رد بالك تقول كنت مفكر تلعب لعبة وسخه تمس شرفها!
الجالي بحده:مستحيل هادي ام بنتي..
مختار:مالا في شن كنت تفكر..
الجالي:القضايا اللي زي هادي تبي اثباتات قويه وهي ماعندهاش ولا اثبات لضرر يخليها تطلق..مع الممطاله والتمليل حتتعب واني وقتها حنضغط عليها بالبنت..
مختار:حتحاول تخطف جنة مثلا..
الجالي:حيكون اخر حل..
مختار بضحكه؛هدا اول حل مش الاخير انت كنت ناوي تخطفها من البدايه بش تجبرها تتنازل ع القضيه وتوليلك وهكي تكون انهكتها تماما..
الجالي رفع حاجبه وغير نظره عنه..
مختار ابتسم وهز راسه وقال..
/طول فيها وهي قصيرة الموضوع مش محتاج لهاللفه هادي كلها..اسمعني..خليك ماشي في الخطه متاعك مع شويه تعديلات..اولهم انك حتطلب من المحاميه متاعك تخدملك موضوع طلاق التراضي..
هو فتح عيونه ع وسعهم..
مختار:اسمع للنهايه..حتوتيلك ورقه ع اساس انك دايرها عند محرر عقود مكتوب فيها مجموعه من الشروط اللي لازم تتفقوا عليها قبل الطلاق..انت حتكتب شرط فيه انك تبي تشوف جنه 4مرات في الشهر  وتزيد عدد الساعات،زي مانشوف فيك طوبى حترفض الشرط وانت حترضى باللي تبيه..حتكون الراجل اللي استسلم للنصيب واللي تعب من المشاكل والاخد والرد..واللي مايبيش يخلي ع ذمته مراة ماتبيشي..واللي يفكر في مصلحة بنته ومايبيهاش تكبر وسط الصراعات..واللي عنده خطط تخص خدمته في الخارج وحياخد معاه المراة اللي حارب العالم ع خاطرها بش ياخدها..نقصد نجاة طبعا..هدا كله لازم يصدقوه اهلك قبل طوبى...
الجالي قعد يسمع بتركيز وهو يفكر..
مختار:لازم تقعد عاقل الفترة هادي لازم ماديريش اي تصرف ارعن والافضل انك تقعد برا...
الجالي:وبعدين..
مختار:خليني نكمل ومعاش تقاطعني..بعد مايوصلهم موضوع الزياره اللي حتوصله محاميتك لخالها المحجوب المحجوب تحديدا..لازم تخلي الزياره تم في حوشه..حوشه حيكون بعيد عن الجميع..اهلك واهلها بش يسهل عليك تكمل في الخطه متاعك..طبعا مش من اول زياره..في الاولى انت حترفع معاك حد من عيلتك وتكون رافع الورقه اللي قتلك عليها..تطلب انك تشوفها وتهدرز معاها عن الطلاق وكيف مافهمتك خليك باين انك مستسلم ومتألم في نفس الوقت وهي حتلين معاك..
الجالي:مازال ماتعرفهاش..
مختار:لانعرفها كويس هي فاهمه انك مش متمسك بيها لشخصها المسأله عندك كانت خوف من كلام الناس وبعدين خديتها بالعناد لااكثر..فكرة انك طلقها ولت وارده عندها هلبه بعد خديت هديكا..شوف هو تحليل مش كلام سمعته منها متوقع هي كيف تفكر بس..وبصراحه اكبر هي تراجي امتى تفتك منك حتصدق وتقتنع طول صدقني..
بدت ع وجه الجالي ملامح الامتعاض..
ومختار كمل يشرحله عن باقي الخطوات والجالي يسمع وهو معجب ومذهول بحبكة مختار للخطه اللي كانت ماتخرش الميه زي مايقولوا..
مختار:ولاتفكر في عبد الرؤوف ولاغيره مافي حد يقدر يدير شي اني حاسبلها كويس كويس..
الجالي:امم..باهي عندي سؤال..علاش توا بس خطرلك تساعدني!؟ تبي الحق مش خاش راسي جو اختك واجعتك شنو..انت مش من النوع اللي يهموه خوات ولاعيله..
قعد مختار يشوفله بنظره تبان عاديه لكن تخوف للي يتمعن فيها..
بعدين قال..
/اني لو كنت في حياتهم قبل ماخليتش واحد زيك ياخد اختي..
ابتسم الجالي تهكما وهو يمرر في نظره ع المكان..
مختار:انت لازم تقتنع وتصدق كل اللي بنقوله كان تبي مصلحتك..
الجالي شافله شويه بعدين هز راسه بالموافقه...
🍃وطبعا ماخلاشي يطلع من غير مايخوفه..وتخويف مختار معروف يخلي الاوصال ترتعد من غير ماينزل قطرة دم وحده ولا يستخدم اي نوع من انواع العنف..يكفي يهدد بدمار مستقبله بش يخليه ينفد بخضوع بدون لعب او نقاش..🍃
وطلع الجالي من غادي وكل همه الهدف اللي يبي يوصله ان طوبى توليله ويعيشوا مع بعض وبنتهم بينتاهم..
بس اللي ماكانش حد يعرفه ساعتها ان حسين كان جاي لمختار المزرعه بخصوص شغل بعد ماخبروه الرجاله الموجودين في العمارة عن مكان وجوده..ولما قرب يوصل فاتت من جنبه سيارة شافها ولمح الجالي..وتأكد انها سيارته..
🔺️رجوعا ليوم 1ديسمبر..سنة 2018🔺️
الساعه 8:20ليلا..
في شارع القهوة..
كانوا عبد وربيع وسامي في مطعم ربيع يشوفوا للشارع..
والقلق بادي ع ملامح ع وجوههم..
سامي:امتى صار؟
ربيع:قبل ساعه من توا...
سامي؛بالك موضوع يخص خدمته..
عبد القيوم بقلق بالغ حرك راسه بالنفي  وقال..
/لا..اليوم موعد زيارة اللي اسمه الجالي لبنته..صارت حاجه غادي ..
ربيع وسامي وجهوا انظارهم ليه  وهما يفكروا في كلامه..
فجأه..
تبان عليهم سيارة عبد الرؤوف جايه بسرعه..وصل في الباب ونزل وكان يبان معصب ع الاخر..
فتح بوابه حوش نسيبه ..
التارقي ناض وطلع برا ولحقه ربيع وسامي قعد في مكانه يتفرج..
ولى عبد الرؤوف ركب السياره وهو يشوف جهة حوش شنيبه بغضب...بعدين دخل السياره...
ولمحوا اريج جايه تجري وتبان تبكي وسكرت البوابه..
عبد القيوم قلبه غاص في احشائه من الخوف..
انفجع لما سمع صوتها وهي تعيط وتبكي وتقول..
"بنتي..نبي بنتي...جنة..جيبوهالي..جيبوها"
ربيع:لا ان شاء الله لا اللي فكرت فيه ان شاء الله يطلع غلط..
وينفتح باب حوش لطفي ويطلع الحاج علي ووراه عبد الرؤوف بعد ماسكر الباب..
علي كان كتلة غضب ملتهبه متوجهه لحوش شنيبه..
اشر بعكازه ع نضال وقال..
/تعالى ياكلب انت تعالى..
كل من كان حاضر في الشارع وقتها يشوفوا للي قاعد يصير
اللي متفاجئ واللي مصدوم واللي خايف..
طلع سامي ومشي وقف مع صحابه وهو يشوف في نضال كيف طلع من القهوة ويبان مفجوع وهو يقول..
/شن في ياحاج خيرك!؟
وصل فيه علي جبده من كبوطه وقاله..
/خوك المسخ وين مشي بالبنت تكلم..
"خلوني نطلع خلوني..نبي نعرف وين رفعها وين"
وصوت صراخ طوبى اللي يشق القلب كان مسموع في الشارع كله..
عبد القيوم بغضب شديد..
/وسخ وعمره ماكان راجل..النذل المنحط..
نضال بصدمه:تي خيركم انتم شن في!
دفه علي بقوة وقاله..
/دير في روحك مش عارف ياكلب..
عبد الرؤوف:انت كنت مع خوك الجالي لما مشي يشوف بنته!؟
نضال بصدمه؛لا والله لا..
علي بغضب:كذاب وولد ستين كذاب...
محمد المهدي برغم انه كان مفجوع لكن قال..
/غير صل ع النبي ياجدي وفهمونا شن صار..
سمعوا صوت تعيط وهي تقول..
"جنة"..
انظارهم توجهت للحوش ماعدا جدها اللي طبس للأرض وخدي حجر حجمه متوسط وضرب بيه مرض مطحن المهدي..
ع طلعة الصيد ومحمد شنيبه من حياشهم..
وفي من الجيران اللي كانوا يتفرجوا من شبابيكهم وفيرانداتهم...
🍃مغليه بخوف:خير دعاويهم هادم شن يبوا..
ونجاه جنبها واقفات في روشن دار عمر ونضال ويتفرجوا ع اللي صاير بخوف..
🍃محمد شنيبه بفجعه..
/شن في خيركم!؟
علي:زي العاده راقد ع ودانك وماتندري ع شي ولدك الكلب خطف البنت من امها..
انصدموا نضال ومحمد المهدي وجده من اللي سمعوه..
عبد الرؤوف؛مأجر بلطجيه النذل ضاربين المحجوب..
علي شاف لنضال بغضب وقال..
/قال انت كنت معاه..قال مطلع البنت ليك انت..
وقدمله طول بيضربه بالعكاز شده عبد الرؤوف..
نضال؛اقسم بالله العلي العظيم ياحاج ماكنت معاه ورب العزة...
ويسمعوا صوت بكي طوبى بالعبره..
عبد القيوم بدون مايحس ع نفسه قال بغضب والم شديد..
/الله يلعنه..اشر ع حوش لطفي وقال..هذي تصرفات بني ادم عاقل..اللي يدير في ام بنته هك هذى واحد طبيعي..نزل يده وقال..هذى واحد مريض..واحد لاعنده اخلاق ولاعقل..
ربيع؛عبد القيوم..
عبد القيوم بغضب:خليني بالله عليك...كل مصيبه يديرها اكبر من اللي قبلها مش لاقي من يردعه ولايحطله حد..شاف لمحمد شنيبه وقال..راضيك انت راضيك راضيك اللي داره ولدك في بنت الناس! ضحك عليها لما خداها وضحك عليها توا وقال بيطلقها خلاها تأمن فيه بش يخطف البنت..طفله قاعده ماعدتش السته الشهور ياخدها بالخونه من امها..يرضي مني هدا بس..حتى الكافر مايدير فعله!
محمد شنيبه اللي كان في قمة الغضب والخزي شاف لنضال وقال..
/تعالى..
عبد الرؤوف؛اسمعوا..
شافوله..
عبد الرؤوف وهو يأشر عليهم بسبابته تهديدا:كان لقيته قبل لتلقوه ماتلوموا الا انفسكم..نزل يده وقال..هيا ياحاج..
علي مرر نظره عليهم بإزدراء بعدين تفل قريب من موضع رجله..ولف ومشي هو وعبد الرؤوف للحوش..
محمد شنيبه بغضب شديد..
/نضال..
ومشي للحوش ولحقه نضال طول...
بعد ماخشوا ارتفعت اصوات همس الجيران بين مسترجع ومحوقل..وانفضت الزحمه..
محمد المهدي كان مستاء ع الاخر طول لف وولى لقهوة خاله..
اما عبد القيوم فات صحابه ومشي طول لحوش المهدي قاصد شقته..
ربيع بضيق شديد..
/زادت تعقدت اكثر من قبل..
سامي بعصبيه..
/واحد نذل ماعنداش ذرة رجوله..
وربيع قعد ساكت والضيق اللي يحس بيه كاد يكتم انفاسه..
من جهة اهل زوجته..ومن جهة صاحبه المقرب...وطوبى وجعاته هلبه هو فاهم وعارف كويس هي شن تحس..
🍃طوبى اللي دخلوها بالغصب للحوش..
نارها كل مالها تزيد تقوى..المراة بتهبل مش قادره تستوعب اللي صار..مش مستوعبه ان روحها...حياة قلبها..احلى حاجه في دنيتها مش معاها..خدوها منها..بعدوها عنها..
طوبى ببكي وألم شديد..
/شن صاير فيها توا!؟؟ زعمه تبكي..زعمه راقده..زعمه شن تحس شبعانه ولاجعانه...ااه ياربي كيف بندير..بنفر ياناس بنهبل...كيف هكي كيف ياربي..حاسه روحي نحلم نحلم اني نحلم..بالله عليكم نوضوني..شدت فردوس اللي كانت حداها تبكي وقعدت تترجا فيها وهي تقول..نوضيني فردوس نوضيتي قوليلي تعالي حدانا اني جنه فالكوجينه نايضه قبلك بنتك انشط منك..بالله عليك يافردوس..
وفردوس منهاره..
واللي حواليها معاش فيهم عزم..
رفعت ايدين فردوس وحطتهم ع صدرها وهي تقول بألم شديد وحرقه..
/نار هني يافردوس نار..ارحميني بالله عليك نوضيني بالله عليك..
غمضت عيونها بشده وهي شاده ايدين اختها وحطت راسهاع رجليها وهي مازال تبكي وتترجى فيها..
/بالله عليك نوضيني وخيتي تربحي..
مطيره ببكي:الله ينتقم منهم شر انتقام حسبي الله ونعم الوكيل..
غرفه ببكي:سادها ياربي سادها ماشافت ومارت ياربي علاش طوبى يصيرمعاها هكي علاش..وقعدت تبكي بالعبره..
فايزة من البكي والوجع مش قادره تواسي طوبى ولاتتكلم ولادير شي..مروة موجوعه عليها هلبه وحتى تاله..
بس سدرة المهدي كان قلبها الصغير يتقطع تقطيع..تبكي لين شفايفها يرجفوا ألما ع طوبى وجنه..وبكل معنى الكلمه كرهت عمها الجالي ونجاة وحتى صغار نجاة..
🍃🍃🍃🍃🍃
وفي حوش الصيد..
عواطف ببكي:احرق قلبه ياربي معقوله توصل بيه لهني معقوله..
نجمه بحزن:صدقوا اللي قالوا مش طبيعي صدقوا..
صفاء وهي تبكي..
/ياروحى طوبى روحها في بنتها ماتقدرش تعيش من غيرها.
نجمه:الله لايربح كل من يحرم ام من ضناها..هي مش هكي الكلب دارلهم العسل في الرواني بنطلق ومش عارف شنو..
صفاء بحقد..
/والله شكيت في الدوة هادي من الاول..هو بيموت على طوبى كيف رضي يطلقها هكي مش قادره ننسى شبحته ليها لما تلاقينا مرة في مطعم بالصدفه قريب ياكلها بعيونه..
نجمه:ياعطه ماياكله ويريحها منه..
عواطف:العقربانه هديكا اكيده طارت لحوش ماليها..
نجمه:مالا شنو..
🍃🍃🍃🍃
"ولدك هدا رسمي مش صافي اشبح شن دايرتله"
محمد شنيبه؛انتي تسكري فمك مانبيش نسمع صوتك كل اللي حني فيه توا من تحت راسك ياجيفه..
خديجه بضيق:ربي يسامحك يابوي..
محمد بغضب:اسكتي قلت اسكتي.
مغليه وهي حاطه يدها ع راسها..
/هادي عمله ديريها ياجالي! معقوله ع خاطر وحده زي هادي دير في روحك وفينا هكي..
محمد شنيبه شاف لنضال وقال.
/لأخر مرة بنسألك ليك يد في الموضوع!؟
نضال بإنفعال..
/ان شاء الله تترزوا فيا كان درت حاجه زي هادي!! والله مانديرها ياناس والله مانديرها..
محمد شنيبه بغضب..
/شوف لوين وصلت نذاله ولدك الفاسد دخل اسم خوه في مصيبته..
ومغليه تسمع وتبكي وخديجه تشوفلها بقلق..
🍃وبعيد عنهم في دار المعيشه كانت نجاه مقعمزه وهي في حالة صدمه..وحواليها صغارها بين اللي خايف واللي يبكي من الخوف...
🍃🍃🍃🍃🍃
وفي الشارع..
درست سيارة اسكندر ونزلت منها سميرة تجري ونزل وراها سكر السياره ومشي للباب..
دق دقتين وانفتح الباب واللي كان وراه عبد الرؤوف..
وخر وخلا سميره تخش وخش بعده اسكندر وسكر الباب..
لحظات وكان التارقي طالع من حوش المهدي ومتوجه لحوش لطفي الواعر..
ع جية سيارة حسين..درس قريب من حوش عمه ونزل..
وتلاقوا هو والتارقي في الباب..
حسين بغضب وانفعال..
/كنت متوقعها والله حسيت..
عبد القيوم بحقد..
/الوسخ حتى انا صدقته...
دق حسين الباب..
وحتى هالمرة يفتح عبد الرؤوف ويدخلهم ويسكر الباب..
🍃🍃🍃🍃🍃
وشن يعدي هالليله الصعبه اللي ولت نهار على عيلة الواعر وكل من يعز عليهم..
طوبى كادت تنجن..تبكي وتعيط لين تتعب وترقد..وتفيق مفجوعه وهي دور ع بنتها وهما يحاولوا يهدوها..وماقدر حد علي احتوائها وقتها غير سميره لانها كانت اقوى عزم من اللي حواليها..
اميمه يومها ماعرفت بشي الا لما روحت من المصحه..فجعها الخبر وقلبها تقطع الم ع طوبى وحالها
🍃وحال قلب التارقي كان الاسوأ..فكرة انه عاجز يديرلها اي شي ع اقل يبرد شويه من نارها قاهراته فوق قهرته عليها..
يسمع في بكاها وعبراتها..صوت ألمها اللي يفتت في قلبه ومش قادر يدير شي..قداش تمنى ساعتها يشوف الجالي قدامه ويقت..له شر قت..له...
بس عاد من يقدر يوصل في الجالي!؟..فص ملح وذاب...
الكاميرات اللي مركبينها في شارع حوش المحجوب صورت سيارة الجالي وهي طالعه من الشارع بس ماكانش في كاميرات تصور اللي صار قبلها...
ومن بعد عمليات بحث عن السيارة لقوها في المكان اللي خلاها فيه فاضيه..حتى الراجل اللي كان معاه مش فيها...
وهالمعلومات مع قرب الفجر وصلت لإسكندر وهو وصلها لعبدالرؤوف وحسين كان واقف معاهم..
🍃حسين بضيق شديد..
/في بالي شي مش قادر نصدقه..
شافله عبد الرؤوف شويه بعدين قال..
/انت يوم جيتني تحذر من الجالي ياشايف شي ياعارف شي..
تنهد حسين بضيق وقال..
/من مدة شفت الجالي في الطريق اللي ترفع لمزرعة مختار..
غمض عبد الرؤوف عيونه بنفاد صبر..
اسكندر بعدم استيعاب...
/لاعاد مش لهالدرجه ..
فتح عبد الرؤوف عيونه وشافله وهو يقول بغضب مكتوم..
/واكثر يااسكندر واكثر..المخلوق هدا عرفته بما فيه الكفايه..نقم عليها من اللي دارته معاه ع خاطر المطحن..
حسين بعدم فهم..
/شن دارت!؟
ع جية عبد القيوم سمع عبد الرؤوف يحكي في اللي صار ع موضوع المطحن اكثر شي شده في اللي قاله عبد الرؤوف..
عبد الرؤوف؛ماكانتش تبي التارقي ينضر قالت متأكده انه ناويله ع شي..
حسين بصدمه؛انتم علاش درقتوا عليا..
عبد الرؤوف:هي ماكانتش تبيك تعرف..عندها علم بالشغل اللي بينك وبين مختار..
سكت حسين وهو مضايق ع الاخر ماباش يعقب لأنه مش وقته بس قعد هالشي حاز في نفسه وزعله هلبه من طوبى..
🍃اما عبد القيوم ولى وقعمز في المربوعه وهو في حالة من الاستياء والشعور بالذنب..حس انه سبب في اللي صار معاها
في الوجع اللي تحس بيه وحرقه قلبها ع بنتها..
كره روحه هلبه..كره نفسه انه مافهمش عليها ولاقدر موقفها من البدايه..العناد سيطر عليه سيطره تامه...
فجأه..
يسمع صوتها اللي يشق قلبه وهي تعيط وتبكي مرة تانيه..
غمض عيونه بشده وحط ايديه ع وذانه..وفي وجع فضيع في صدره كان يحس بيه..
وحداه الحاج علي اللي حكم عليه العمر يغفى غصب عنه..
فاق مفجوع لما سمع عياط طوبى..وشاف لوضع التارقي..
وفي عز وجعه ع حفيدته كان مستغرب هلبه في حالة التارقي..
نزل عبد القيوم ايديه لما شاف حسين خاش يجري بش ياخد مفتاح سيارته..
علي بخوف؛شن في؟
حسين بإستعجال..
/طوبى اغمى عليها..
ناض عبد القيوم وقعد واقف في مكانه ونار تحرق في كل جزء فيه..
شاف الحاج علي وهو ماشي بيطلع من حداه..
قعد يسمع في صوت دوشتهم برا وهما مطلعينها..
ويسمع في دعاوي مطيره..وحسبنة فردوس..
ومات الف مرة وعاش وهو يسمع في مطيره تقول ببكي.
"ناري نار عليها مازال صغيره ع هالهم مازال صغيره ياربي علاش هكي يصير فيها..البنيه زي نسمه زي البلسم لاعمرها وجعت حد ولاضرت حد..من صغرها وهي تحب الخير لغيرها ومادير كان في الخير...علاش تعيش هدا كله بس!"
ولى قعمز بهده في مكانه..وقلبه يبكي دم عليها..بس دموع عيونه مصرين يقعدوا معاندينه ويزيدوا عذابه ويقعدوا متحجرات رافضات يخففوا عنه رافضات النزول...
🍃🍃🍃🍃🍃
واللي صار لطوبى من فجعتها في غياب بنتها المفاجئ انهيار عصبي...
هد القوة اللي تحملت بيها كل مافات عليها وعدا..
كله تقدر تتخطاه الا فراق جنه كبدها..اكبر سبب مخليها متمسكه بالحياة الدنيا...
🍃وفي مكان تاني بعيد عنها..
كان راقد المحجوب في وحده من العيادات..
الضربه ماتسببتش في اكثر من فقدان الوعي..فاق منها بس كان خاش في حالة مخلياته رافض يكلم ولايشوف حد حتى نبيله اللي كان قلبها ياكل فيها عليه وعلى طوبى..
🍃🍃🍃🍃🍃
"واحد واطي ماعنداش احساس ولاكرامه يبي يجبرها جبر ترجعله"
اميمه وهي ترشف..
/مريض هدا مش طبيعي..اني خايفه ع بنته منه..
هناء بقلق:ربي يحفظها ويردها لأمها..
اميمه غمضت عيونها ودعت من وسط قلبها..
/يارب...
🍃🍃🍃🍃🍃
وتعدي الساعات..
ومافيش اي خبر يريح البال...ولافي اي اثر للجالي..
سفر ومش مسافر لاجوا ولابرا..في طرابلس مش موجود..بدوا يدوروا عليه في الضواحي والمدن المجاورة...
وبوه وخوته وصلوا في صاحبه حكيم مخزن اسراره اللي اقسم بالله انه مايعرفش عنه أي شيء..
🍃وانقلب الشارع بالحدث اللي صار..وانقلبت معاه آراء الناس 180درجه..وطبعا في منهم مشي لحوش اصحاب المصيبه بش يعرف اكثر ويشبع فضوله...
🍀🍀🍀🍀
ويعدي يوم 2ديسمبر..ويلحقه يوم 3ديسمبر..
ومافيش نتيجه...الجالي وكأنه تبخر بالبنت ...
وامها خشت في حالة نفسيه..
بعد ماطلعت من المصحه..حبست روحها في الدار وهي راقده مع حوايجها والعابها وتسمع في اغنيتها المفضله..
والدموع مابطلتش نزول...
واحبابها خايفين عليها خوف كبير اول مرة طوبى يصير فيها هكي..حتى الصلاة معاش صلت!!...
🍃علي الواعر؛اني مستعد نمشيله مختار اني ونكب ع راسه كان يبي غير يرد البنت لأمها..المراة بتريح فيها..امانه ولدي بتريح مني ياناس..قبل ليموت كل ليله يوصي فيها ماوصانيش على غيرها..
عبد الرؤوف بألم؛مش في البلاد ياحاج مسافر..
رفع علي عيونه وقال..
/حسبنا الله ونعم الوكيل..
🍃وفي هالوقت حسين مع التارقي كانوا مع اسكندر في عمليات البحث عن الجالي في مدن الوسط الليبي لاكلوا ولاملوا احساسهم بالمسؤوليه مخليهم مستعدين يديروا أي شي المهم يريحوا بال طوبى...
🍃وطبعا هدا كله صاير واللي قاعدين في سويسرا مايجيبوا علم شي..
🍃بس اللي روح منها..اول ماتلقى الخبر انصدم بقوة..
ولكن اخته نسرين أنبت روحها تأنيب فضيع لأن حست ان ليها يد في اللي داره خوها..وهني شعرة الامل اللي قاعده عندها اتجاه صداقتها بسدره انقطعت تماما...
🍃🍃🍃🍃
"سكتت عليه وسايرته وشوف وين وصل"
محمد شنيبه؛خوك وانت تعرفه عقله خلاص معاش ولى عليه تصرفاته كلها ولت تصرفات حد مش بعقله..
المهدي بحسرة:والله مفروض مانلوم الا روحي اللي رضيت بزواجه من طوبى ..اني لو كنت نعرف قصته مع الزفته نجاة راهو والله العظيم ماخليتهم يفكروا فيها حتى التفكير.
محمد شنيبه بضيق..
/توا اللي صار صار ردان الفايت محال..المهم يطلع ويرد البنت لأمها وبعدين نتصرف معاه..
المهدي:وين يطلع ومن وين..ولدك مالاش اثر مش بعيد طالع بالبنت تهريب من البلاد.
محمد شنيبه بصدمه..
/كيف!..
المهدي:يديرها ويدير مااكبر منها..
وبوه يفكر في كلامه وهو مصدوم ومش مستوعب اللي داره الجالي ولوين وصلت بيه...
🍃🍃🍃🍃🍃
"والله كلمني معين بكري قال واحد من خوته قاله احتمال كبير يكون قاعد في طرابلس غير متكتمين عليه"
هز عبد الرؤوف راسه وهو ساكت..
اسكندر؛الدوة نفسها فكرت فيها..يعني في حد داسه..
مالك؛عليك نور..ومش اي حد راهو مش مخلي حد يوصل فيه..
عبد الرؤوف تباعد عنهم شويه وقام تليفونه حط ع رقم معين واتصل بيه..حط التليفون ع وذنه وقعد يراجي امتى ينفتح الخط..
ورد عليه صاحب الرقم..بعد عبارات السلام طول قال..
/طول هلبه الموضوع هداكا..
"قتلك قبل بيطول راهو مش ساهل بكل وانتي تبيه يكون في سريه تامه..اصبر علينا ياغالي"
عبد الرؤوف تنهد بضيق وقال..
/ربي يعاونكم..المهم ع قد ماتقدروا حاولوا تستعجلوا..
"ان شاء الله حبيبي ان شاء الله"

#سجن_يوسف
#طوبى

....يتبع....