طوبى ☕شارع القهوة☕

الجزء_السابع_والثمانين

#طوبى  "جنة طوبى"
#جمان_فريد
#الجزء_السابع_والثمانين "انتقام/لعبة الإنتقام"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الذكر
الله اكبر الله اكبر..لاإله إلا الله..
الله اكبر الله أكبر...ولله الحمد...🍀 🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃وَ عَسَى أنْ تكْرَهوُا شَيئاََ وَ هُو خَيرٌ لكُمْ🍃
__________________________________________
"في فترة معينه صارت معاك مشكله او حاجه شكلت عليك خطر معين!؟"
المهدي شاف لنسرين والزوز قعدوا يفكروا بعدين قالت نسرين...
/ممكن ف 2011لما شاركت في الحرب وقتها وجابولنا خبر موتك بعيد وبر..
شاف المهدي للدكتورة بترقب وقلق..
جهينه بتفكير؛في 2011..باهي وبعدها ماصار شي تاني!؟
نسرين قعدت تفكر وهي تحاول تذكر..
والمهدي بعد تفكير خطرت في باله نفس الذكرى اللي تفكرتها نسرين وقالت..
/تقريبا 2014 المهدي جاه القلب وقتها وتعب هلبه لدرجة جاته الاسعاف رفعاته من الحوش..
جهينه هزت راسها وهي تفكر..
المهدي:شن في بالزبط دكتورة؟
تنهدت جهينه وقالت..
/في لقاء اختك بسدره لما حضنتها نسرين وقعدت تبكي لاحظت الخوف في عيونها وكأنها فكرت في شي خوفها وتوقعت يكون صار..بعدين نظرتها لنسرين اللي نسرين فهمتها طول سؤال عنك..ولما شافاتك كانت فرحانه وفي نفس الوقت الخوف قاعد في عيونها..شفت لما جيتها كيف قعدت تشوفلك كيف مدت يدها كانت تبي تتلمسك بش تتأكد انك قدامها حق..
نسرين بعدم فهم..
/شن معناه هدا يادكتورة!؟
جهينه:قبل زيارتكم بفترة جو مرت عمها وخوها التاني من الرضاعه..اللي نعرفه ان مرت عمها اللي تكون امها حتى هي كانت اقربلها منه يعني مفروض تكون فاقدتها ومشتاقتلها هي اكثر..بس اللي صار انها لما شافاته فرحت فرحه مبالغ فيها وكأنها مش مصدقه انها شافاته قدامها زي ماحكالي يوسف..
نسرين؛حسين في فترة من 2011 ل2016 بعد الحرب هارب لمصر..
جهينه؛ايه زي ماحكالي يوسف..تنهدت تاني بعدين قالت..بنسبه 90% متوقعه ان سدرة عندها فقدان ذاكرة جزئي..
بدت ع وجوههم ملامح الصدمه من اللي سمعوه..
جهينه:والباين اخر حاجه متفكرتها يوم مرض الاخ المهدي..
هما الزوز قعدوا يشوفوا لبعض بعدم استيعاب..
جهينه:حني كنا متوقعين ان يكون في مضاعفات لاصابتها لكن ماقدرناش نجزموا بشي وبعد مافاقت قعدنا نراقبوا في ردود افعالها اللي زادت وضحت المشكله..
المهدي بعدم استيعاب..
/يعني اللي صار من نص 2014 لعند قبل الحادث ماتتفكر منه شي!؟
جهينه هزت راسها ايجابا بصمت..
نسرين بصدمه:باهي لعند امتى بتقعد ناسيه؟
جهينه؛الله اعلم..بس مش فتره طويله..المعروف ان العامل النفسي ليه دور كبير..لذلك اي شي سيء صار خلال الفترة اللي كانت فيها فالغيبوبه مفروض حاليا ماتعلمش بيه..يعني يااخ المهدي هدا لازم يكون اول واخر لقاء ليك بيها..
زاد انصدم المهدي من اللي سمعه سألها وقال..
/علاش!؟
جهينه؛التصرف الاخير اللي دارتهولك وكان مناقض تماما لحالتها قبله يبين انها تفكرت صاحبتها اللي كانت زوجتك يعني لما تشوفك مرة تانيه حتتسائل في نفسها وين صاحبتها وبما إنها قدرت تنطق واخيرا..من المحتمل تكرر المحاوله وتسأل عن صاحبتها وقتها اي اجابه منك غير الحقيقه مش حتكون مقنعه ليها..
بدت ع وجهه ملامح الضيق الشديد..
جهينه:سدرة لتوا قاعده مش عارفه شن صاير فيها بالزبط..قاعده تجمع في كل شي تشوف فيه وتسمع فينا وتحاول تفهم هي شن دير هني وعلاش مش كل اهلها معاها وهلبه هلبه اسئله دور في عقلها مطيحتها في دوامه..حني نبوها تطلع منها وحده وحده عليها لعند مايجي الوقت المناسب اللي يخلينا نخبروها عن اللي صار معاها وعن حالتها بالتفصيل...
نسرين بوجع وشي من الاحباط..
/معناها مازال مطول وضعها هدا..
جهينه:نسرين حالة صاحبتك من الحالات اللي نعتبروها نادرة ماتصيرش هلبه وغيبوبه ليها 9شهور صعب ترجع بعدها بكامل صحتها الا بعد فتره طويله من العلاج الجسدي والنفسي...
مررت نظرها بيناتهم لاحظت ع وجوههم ملامح اليأس والاحباط بالذات المهدي..لهذا قالت..
/نقولوا الحمد لله اللي فاقت من قال تفيق اصلا..
قام المهدي عيونه وشافلها..
جهينه بإبتسامه؛سدرة المنتهى مراة قويه هلبه حتتخطى كل شي بسرعه وترجع زي قبل..
بانت في عيونه نظره امل  حلوة..
ابتسمت نسرين لما شافتها..
جهينه غيرت نظرها لنسرين وقالت..
/انتي تقدري تشوفيها عادي ولو سألاتك عن عائشه تقدري تقولي اي شي يقنعها..ردي بالك تقولليها اي شي صار بعد 2014 احكيلها بس الذكريات والايام الحلوة..
نسرين؛وكان سألت عن بوها وعيلتها؟
جهينه:تو نقولك عن الاجابات اللي اتفقنا عليهم اني ويوسف..عموما هي مش حتسأل سؤال كامل ممكن توا حدها تذكر اسماء الاشخاص بس..قداش حتقعدوا هني؟
نسرين:اسبوع..
هزت جهينه راسها بإيجاب..
والمهدي مقابلها مركز بنظره في الفراغ ويفكر في اللي سمعه من جهينه...
🍃🍃🍃🍃🍃
"اهم جو البشاوات"
علي الواعر قعد يشوف بإبتسامه لولاد عبد الرؤوف اللي كانت مقعمزين جنب بعض في كروستهم طلتهم جنب طعامتها كانت انيقه..غرفه مهتمه بيهم لابعد حد..
عبد القيوم بإبتسامه .
/الله يبارك..لاقوة الا بالله..
حسين وهو يشوفلهم..
/حرام عليك ياراجل الجو مصقع..
عبد الرؤوف:ولادي جلاميد مايأثر فيهم شي..
ضحك عبد القيوم..
حسين؛خاف عليهم من العين العين دخل الراجل القبر..
عبد الرؤوف:امهم ديما ترقي فيهم في كل وقت..
علي:الله يبارك عليهم ويحفظهم..وين النتفه الاخرى ليا يومين ماريتهاش..
عبد القيوم ابتسم ابتسامه خفيفه..
عبد الرؤوف:امها خوافه للمليون..
حسين بضحكه:جو والله..تعرف شن خطر عليا ياجدي؟
علي؛نفس اللي خطرلي توا..زي هالوقت جت هي وبوها وامها الله يرحمهم كانت صغيره..هكي نتيفه..ملبسينها جناوح زرزور..
حسين بضحكه؛لا..فراشه...
علي:اللي هو المهم حاجه طير..
قعدوا يضحكوا..
"تعالوا اخر الاسبوع تلقيها واتيه"
كلهم شافوا جهة باب المحل..
لقوها طالعه هي ووحده مختمره مشوا مع بعض لين ووصلوا في سياره..
غيروا كلهم نظرهم عنها..
حسين كانت مستغرب في مشاعره اتجاهها تغيرت تماما شعوره الحالي تجاهها يشبه لحد كبير شعوره تجاه اميمه...
اما عبد القيوم كان خايف من نفسه هلبه..قلبه قاعد يحاول يفرض فكرة انها حتكون ليه قريب فرض ع عقله..حاس روحه معاش عنده القوة اللي كانت عنده قبل بش تخليه يسيطر عليه...
قعد مركز بنظره في الارض وهو عاقد حواجبه وقلبه يدق بقوة حاسه بيطلع من صدره..
قريب عليه جدها علي اللي كان بعيونه معاها لين ولت خشت للمحل مرة تانيه..
🍃غرفه؛عبد الرؤوف قاعد برا مع الصغار ولا؟
طوبى:ايه تلامحته..
غرفه بعصبيه:هالراجل بيطلعني عن طوري قتلك برا روح بيهم للحوش طول..
ضحكت طوبى..
وغرفه خشت داخل بش تكلمه في التليفون..
ع جية اميمه قالت..
/جنه في الحوش؟
طوبى:ايه دخلتها فردوس توا..
اميمه هزت راسها بعدين غيرت عيونها للوحه وقالت..
/الله يبارك ع الخط جميل هلبه..
التفتت طوبى وشافت للوحه..
اميمه؛الانسان هدا راقي ومحترم ومافيش بشهامته..
طوبى رجعت شافتلها وقالت..
/ربي يخليه لاهله ويفرحهم بيه..قداش نتمنى انه يطلع من الشارع..
اميمه بإستغراب:علاش!؟
طوبى بضيق:حلمت بيه حلم مش حلو حاسه بتصيرله حاجه من ورانا..
اميمه؛وعلاش ماهو الشراكه انفضت شن مازال في تاني..
طوبى؛مش عارفه قلبي مش مرتاح..هو ديما خاش في مشاكلنا في مرة لولا لطف ربي راهو راح فيها..تشوفي في عمته وبنت عمته قداش يحبوه ومتعلقين بيه ومش مرتاحين وهو بعيد عليهم..تخيلي تصير فيه حاجه فجرتنا!؟ حرام والله مايستاهل..
اميمه قعدت تشوفلها و ع طرف لسانها الكلام اللي سمعاته من صفيه بنت عمة التارقي..بس بلعاته في اخر لحظه لعده اسباب..
اولهم ان طوبى قاعده ع ذمة الجالي مايجوزش تكلمها عن مشاعر راجل تاني اتجاهها مهما كان شكل علاقتها براجلها سيء..
تانيهم ..حتى لو طوبى اطلقت من الجالي فكرة الزواج بعدها حتكون شبه مستحيله..لان الزواج حيسقط حضانة جنه..وطوبى  تفرط في روحها ولاتفرط في بنتها..
يعني القصه هادي مافيهاش امل بكل..الافضل ان طوبى ماتعرف عنها شي وعبد القيوم ينهيها وينساها..
تنهدت اميمه وقالت..
/عندك حق..
🍃🍃🍃🍃🍃
الساعه 8:00مساءا..
في وحده من اكبر صالات المناسبات في العاصمه..
دارت خديجه لمة جيابها..كل شي كان فاخر ومبالغ فيه هلبه وكأنه حفلة زواج..
نجمه ماكان عاجبها شي من اللي داراته..اما سلفاتها فكانوا منبهرات حتى سميره..
سميره اللي مااهتمتش هالمرة لوجود ابتسام..لكن ابتسام كانت تسرقلها في نظرات الغيره...
اما السلفه الجديده الصغيره اللي كانت امها ورا اطلالتها الساحرة الجميله انشغلت بالسلام ع اقارب اشرف وهدرزتهم عليها كلهم كان عندهم فضول يعرفوا شن دايره معاه..
وهي برغم انه حشريتهم ضايقتها بس كانت ترد في ردود مقتضبه تبين قداش هي عاقله وشخصيتها راكزه رغم صغر سنها وكل مالها نجمه تعجبها اكثر واكثر...
وطبعا لانجاح ولاعواطف حضروا والاسباب معروفه..
🍃🍃
حضرت نجاة اللمه وكانت كعادتها صاحبه اطلاله ملفته للأنظار والناس لاحظوا انها تخطت اللي صار في حفلة دخول صفاء..وبعد ماانتشر خبر قرب طلاق الجالي لطوبى..وكانت تفسيراتهم وقرائتهم للاحداث تقول..
ان الجالي لما قرر يطلق طوبى وجعتها روحها وردت عليهم  باللي داراته يوم حفلة الدخول بس تبين انها مش فرحانه ومش مهتمه...وفي النهايه زادوا تأكدوا من حب الجالي الاسطوري لنجاة اللي خلاه يدير هدا كله بش ينولها وتكون حلاله برضا اهله وقدام كل الناس...
🍃🍃🍃🍃🍃
فتحت باب الدار...
كانت لابسه بيجامه شتويه ولافه ع راسها فوطه..
بعدما فتحت الباب ولت داخل...وطلعت تاني وهي رافعه حوض بلاستك متوسط الحجم في مية الرقيه اللي اغتسلت بيها...
مشت طلعت بيها من الدار للكوجينه..
وصلت في الباب البراني..حطت الحوض وفتحاته..
بعدين دفت الحوض برا وسكرت الباب..
وولت خشت مرة تانيه..توجهت للدار..خدت شيشه مية الرقيه للشراب بعدين طفت الضي ومشت لدار المعيشه..
كانوا فيها آلاء واريج...
الاء تحكي عن جية عزيز واريج تسمع..
ابتسمت طوبى وقعمزت حداهم وقعدت تفك في الفوطه وتنشف في شعرها..بعدين شافت لجنه لقتها تلعب باللعبه اللي جابها التارقي.."شكشاكه" ع هيئه شمس...
☘الاء:سلسال رقيق تعليقته فراشه وخاتم ع هيئه فراشه الماس..
طوبى شافتلها وقال..
/الله يبارك..جابهولك عزيز اليوم؟
الاء بإبتسامه؛لاهديه من عمتي الهام..
طوبى وهي تفرد في شعرها:الله يبارك..
اريج:شن تحسي ناحيته توا؟
الاء تنهدت وقالت..
/مش عارفه تصدقي..المهم اني مرتاحه هلبه..
اريج:مامالش قلبك ليه حتى شويه؟
شافت طوبى لآلاء بإنتباه..
آلاء ابتسمت وهي تفكر وتوصف في احساسها..
/امم..نحس بفراغ كبير لو عدا يوم ومابعتليش رساله..مرات نلقى روحي لا ارادايا خاشه ع الانستا متاعه بش نشوف صوره..ضحكت وقالت..اليوم لما شفته جاي حسيت روحي فرحت هلبه..وكأن في حاجه كانت ناقصه فيا وولتلي..
اريج بضحكه:وهادي البدايه للوشه..
الاء تنهدت وهي مبتسمه..
وطوبى تشوفلها بإبتسامه وهي تفكر في كلامها..
اريج تنهدت بحسرة بعدين قالت..
/خسارة فاتني الافتتاح..
طوبى:كان حلو ومرتب..
الاء:ايه حلو هلبه لولا داره الكبد اللي اسمها حنان هادي..
اريج؛خيرها!؟
الاء:دارت العار...
وقعدت تحكي ع تصرفاتها وكلامها عن التارقي..
وطوبى تحط في شعرها ع كتفها وهي تسمع فيها وتضحك ع تعليقاتها..
اريج:ماخفها..لاحظتها في عرس صفاء ماترقص كان قدام عمته وبنتها..
طوبى ضمت ايديهافي بعض ونزلتهم وقعدت تحرك في كتافها لقدام يمين ويسار وهي تقول بضحكه..
/خيركم معاها..هدا الحب راهو..
قعدوا يضحكوا ع حركتها..
والاء قالت بضحكه؛قولي كلب مش حب..
اريج:الحب يخليك تكابري وتهربي من مشاعرك لما تحسي بيه تلقي روحك تبي اللي تحبيه بروحه يعرف باللي فقلبك من غير ماتبيني..
طوبى بعدم فهم..
/وكيف بيعرف كان هكي!!؟
الاء:يحس بروحه..
طوبى وهي تمرر في نظرها بيناتهم بعدم اقتناع قالت..
/ياودي طلع صعب هلبه ومايجي منه كان وجع القلب والهبال..الحمد لله لاحبيت ولاانحبيت ولاعاد نقدر ولانبي اصلا..
الاء قعدت تشوفلها بحزن..
اما اريج قالت..
/هكي احسن والله احسن خير ماتقعدي بعدين نادمه اللي عطيتي قلبك لواحد مايسواش...ونزلوا دموعها..
الزوز قعدوا يشوفولها بخوف وقلق..
طوبى:خيرك اريج!؟ صايره معاك حاجه!؟
مسحت اريج دموعها وحطت خصلات شعرها ورا ودانها وقعدت تحكيلهم...
حكتلهم اللي صار بينها وبين نضال بس مابتش تحكي اللي صار مع اسكندر خافت يقولولها كلام يندمها...
آلاء بضيق:تبوا الحق اني مش راضيه عن اللي دير فيه سميره..
طوبى بعصبيه:خليها سميره ع تركينه..ريتيه يااريج ريتي كلهم زي بعض مافيش واحد يستاهل..طلعيه من قلبك امسحيه من حياتك مسح..
اريج رفعت حاجبها بحقد وقالت..
/بعد اللي قاله اليوم كرهته وكرهت قلبي اللي حب واحد زيه..
طوبى بكره:لولا الواحد خايف ع حسناته اللي يشحت فيهم شحاته راني ماخليت ماحطيت عليهم كلهم..
اريج؛انتي كان تشوفي الهبله منيه شكلها فاتت كلامي عن عمر بالطويل..
آلاء بدهشه؛قصدك معاه هي توا؟
اريج؛ريته طالع من المركز لما مشيت غادي واصلا ليها فترة متغيره وتعامل فيا برسميه مش زي قبل..
طوبى؛عقلها في راسها تعرف خلاصها انتي اللي عليك درتيه تتحمل بروحها مسؤولية اختيارها..
آلاء:ايه صح خليها تجرب بش تعرف..
ع خشة فردوس عليهم وكانت باينه ع وجهها ملامح الصدمه قالت..
/كان نقوللكم!
كلهم وجهوا انظارهم ليها..
فردوس:توا خالتي صفيه تكلم في عمتي قالتلها المهدي ونسرين جو لسدره..
بدت ع وجوههم ملامح الدهشه..
فردوس:قالت سدرة نطقت اسم المهدي..
الاء بدهشه:حيي!
اريج وهو مصدومه:قالت فايزه نسرين مسافره لكن ماقالتش وين..
فردوس:هدا علاش بنت المهدي قاعده عندها...
🍃وهما يتكلموا وطوبى من بعد ماسمعت جملة
"قالت سدرة نطقت اسم المهدي" معاش سمعت شي بعدها..رجعلها هداكا الشعور اللي كانت تحس بيه زمان..شعور الاحساس بالذنب..
بدون ماتزيد كلمة ناضت خدت جنه ومشت طلعت من حداهم...وهما سكتوا عن الكلام وتبعوها بعيونهم لين طلعت من الدار...
🍃🍃🍃🍃🍃
مقعمز في كوجينة شقة صاحبه يشوفله كيف لاهي يطيب في العشي وهو يغني في اغنيه بلغته المميزة..كانت جديده غير عن اللي عرفها اول ماتعرف عليه..
شد منها كلمة وحده بس...(تاتريت)
ضحك وقال:اني ماشدتيش في راسي غير كلمة تاتريت شن معناها..
عبد القيوم بإبتسامه..
/ياسيدي معناها بالانجليزي star
ربيع بضحكه:اها okنجمه..باهي ترا اشرحلي عن شن تحكي الاغنيه..
تنهد عبد القيوم ورفع صونيه فيها دجاج وخضرا وقعد يصب فيها في الطنجرة وهو يقول..
/الاغنيه يغني فيها واحد يحكي عن حبيبته ويوصف فيها على انها نجمه بعيد مايقدرش يوصل فيها من بعدها..وبعدها عنه يزيده حب ع حبه ليها...
ربيع ابتسم وقال..
/تحكي عنك يعني..
عبد القيوم من الارتباك شد عروة الطنجره اللي كانت سخونه هلبه لسعاته بعد يده طول وملامح وجهه تعركشت من الوجع..
ربيع ضيق عيونه وهو يشوفله..
عبد القيوم قعد يحرك في يده بسرعه وكأنه يمروح بيها شافله وقال..
/لشن تلمح ربيع احكي دغري..
ربيع:كل مانجي بنحكي دغري ماتخلنيش..
نزل يده وقال؛هاني خليتك..ادوي..
ربيع تنهد وقال..
/اني ملاحظ وشبه فاهم..
عبد القيوم؛شن لاحظت وشن فهمت! مازال تحكي بالالغاز..
ربيع؛عبد القيوم البنت اللي حكيت عليها قبل واللي جاباتك هني..هي نفسها..
"بنت الواعر"
عبد القيوم قعد يشوف لربيع ومازال عاقد حواجبه..
وقلبه من داخل والعه فيه النار مايبيش غريب عنها  يجيب سيرتها...
ربيع:ماتحاولش تنكر مش حنصدقك..كله واضح واكثر علامه تأكد كلامي..عيونها..
عبد القيوم بعصبيه..
/خلاص اسكت..
ربيع ابتسم..
عبد القيوم؛انسى انسى بالمرة..ومعاش تحكي عليها نهائي تمام!؟
ربيع بضحكه:تمام للتانيه بس..اما اني ننسى مستحيل..وحط في بالك لو اللي تتمناه نلته مش حتلقى حد يفرحلك زيي..انتي عندي بمعزة خوتي عبدو..
نزل عيونه ليده الملسوعه ابتسم ابتسامه خفيفه بعدين قال..
/خرز ولاسبيقه..
ربيع:بينا..
ضحك عبد القيوم وهو مازال يشوف ليده..وربيع يشوفله ويضحك..
🍃🍃🍃🍃🍃
تاني يوم..
30نوفمبر...سنة 2018..
الساعه 11:30صباحا..
سويسرا...
كانت سدرة طالعه ع كرسيها المتحرك ورا زجاج باب احد الممرات الموجوده في المركز تتفرج ع المطر اللي تصب وهي مبتسمه..
وجنبها نسرين اللي كانت تحكيلها عن ايام زمان..
نسرين:فايزة كانت تحب تلعب تحتها وانت ديما تهزبي فيها تقولي توتمرضي وامك تقعد تعارك فيك..وعاد فايزة فيك ياوادي دير مافي راسها وما تعدل ع حد..
🍃والمهدي بعيد عنهم شويه كان واقف يراقب في سدره ويشوف لإبتسامتها وقلبه ذايب فيها..
بس في لحظه فات من جنبه شخص ماركزش عليه في البدايه بس بعدين انتبهله لما شافه ماشي ناحيتهم..
زاد ركز فيه عرفه..تبدلت ملامح وجهه للحده ورفع حاجبه..
☘وصل اياد في سدره وهو يشوف لنسرين بإبتسامه استغراب وقال..
/صباح الخير..
سدره رفعت عيونها وشافتله بإستغراب.
نسرين بشي من الارتباك قالت..
/صباح الخير دكتور..
اياد ابتسم وشاف لسدره..بعدين حطلها باقه الياسمين ع ايديها المحطوطات فوق رجليها..
نزلت سدره عيونها ليهم وهي مبتسمه..
اياد؛الوجه زاد نور..والجمال زاد عن حده..
نسرين فنصت عيونها وقعدت تشوف للمهدي ..
سدره رفعت عيونها فيه وقعدت تشوفله..
واياد يشوفلها بإبتسامه..
سدرة بدت تحرك في شفايفها شويه وطلعت منها كلمه وحده..
"سوريا"
هو بدت ع وجهه ملامح الدهشه..قعمز حداها ع رووس صوابعه وقال بفرحه..
/ايه كنت غادي بعدين جبت امي بش تعالج..
سدرة قعدت تشوفله وهي عاقده حواجبها بتساؤل..
اياد بإيتسامه الم..
/حالها كويس نوعا ما..
سدرة نزلت عيونها للياسمين ورجعت تكلمت بصعوبه..
"ياسمين"
اياد؛مافي شي يشبهلك زي الياسمين..
سدره رفعت عيونها للزجاج وقعدت تشوف في اثر المطر ع الطبيعه اللي برا..
اياد وقف ع حيله وشاف للي تشوفله وقال..
/الشتي هني غير..البلاد هادي ماتكونش حلوة غير في الشتي..
سدرة لما سمعت كلامه جي بين عيونها بوها..
كان يحب الشتي هلبه..
رفعت عيونها في نسرين..ونسرين قعدت تشوفلها..
واياد يمرر في نظره عليهم..
سدرة بصعوبه قالت..
"بوي"
نسرين:في السعوديه..
تفاجأ اياد..
وسدرة استغربت..
نسرين:يدير في عمره مع جدي علي بيعتمر حتى عن امك..
خطر في بال سدره حديث دار بينها وبين بوها عن شي زي هدا..بس التساؤلات اللي غطت عن هالذكرى..
اني شكلي مريضه بشني مش عارفه!؟
لكن كيف واني هدا حالي بوي مش حداي!!؟
فجأه خطر ع بالها شي مازال اهم عندها..
رفعت عيونها في نسرين وقالت بصعوبه..
"طوبى"
نسرين وجهها انخطف لونه..
واياد شافلها بنظرات متجهمه...
حاولت نسرين ترسم ع وجهها ملامح الفرح وهي تقول..
/دارت امتحاناتها وامورها تمام..
سدرة غيرت عيونها للمنظر اللي برا..
اياد قعد مركز معاها لاحظ ملامح الضيق باديه ع وجهها.
اياد اشر لنسرين بمعنى..
"خلاص"
نسرين هزت راسها وشافت لسدره بحزن..
واياد جي ورا سدره شد الكرسي من الخلف وقال..
/تعالي نرفعك لمكان مازال احلى من هدا..
ومشي بيها وهو يغني..
فكرتينا يازهرة الياسمين..فكرتينا يازهرة الياسمين..
فكرتينا ببسمته وايام من ماضينا يازهرة الياسمين..
وسدرة تسمع فيه وهي تشوف للياسمين بإيتسامه..
مشوا من ممر تاني قدام عيونه بدون مايشوفوه..
كان حاس بقلبه التعبان غايص في احشائه..وروحه بتطلع منه...
جاته اخته وهي تشوفله بحزن وصلت فيه وقالت .
/راك تنسى هو خطيبها .
المهدي بصدمه والم..
/لكن هي ناسيه!
نسرين؛مؤقتا يامهدي..
شاف لأخته وقال بقهر..
/يعني هديكا الدكتورة تخليه هو يشوفها عادي يكون قريب عليها ويرفعها ويجيبها..واني نتفرج من بعيد..اني اللي لما رتني تكلمت يانسرين..تكلمت..شن معناه هدا!؟
نسرين بخوف:ارجوك سلم وخيي اهدا..اهدا..سدرة توا مريضه وتبي شن يساعدها ع العلاج واللي قاعد يصير توا كله في مصلحتها..
المهدي قعد يشوفلها بنظرات الم وقهر بعدين قال..
/تو تتعود عليه..ولما يجي الوقت اللي تعرف فيه حالتها هو يكون معاها ويقوللها انه خاطبها ومش بعيد يقرا فاتحتها..اكيد هما بيعطوهاله يعطوهاله عارف..سكت وهو يبلع في ريقه وعيونه يبلعوا في دموعه..بعدين شد ع قبضه يده وخبط بيها ع قلبه وقال..حظي معاها وعارفه..واضح من الاول غير اني فكرت تفكير مراهقين..
ونزل يده ومشي..واخته مشت وراه وهي تمسح في دموع الألم ع حاله...
🍃🍃🍃🍃🍃
الساعه 5:00عصرا..
في حوش لطفي الواعر..
كانت طوبى مع جنتها برواحهم..وباقي العيله في حوش غرفه عازمتهم يقعدوا عندها الجمعه كامله..
طوبى مشت تغدت وبعد الغدي روحت بش تقرا للإمتحانات اللي يفصلها عنهم اسبوعين..
وفي عز انسجامها مع القرايه..
سمعت جنه تقول..
"با"
شافتله طول وقعدت مركزه عليها..
عاودت جنه نطق نفس الحرفين..
"با"
طوبى حست بضيق شديد...
فجاه..سمعت صوت باب الحوش الخارجي يدق..
تنهدت وقالت..
/اشبح من فيهم جايه من غير المفتاح..
حطت الشيت وناضت وهي تقول..
/شويه وجايه مامتي..
ومشت طلعت من الصاله للشماعه خدت بالطو ووشاح لبستهم وطلعت..
لبست شبشب في رجليها وتوجهت للباب..
وصلت فيه وفتحت طول..
وتجمد في مكانها وين تشوف اللي كان وراه..
هو ابتسم وقال:شن جو..
هي قعدت تشوفله وخلاص..
هو عقد حواجبه بإستغراب..
استاقظت وقالت..
/اهلا..تفضل..
تباعدت..وهو خش..
قعدت مركزه بنظرها عليه..
كان لابس كبوط لونه بني ع ماليه رماديه وسروال جينز ازرق..ولابس نظارات سود ومغطي راسه بطاقية صوف..
سكرت الباب..
هو قال..
/راك تقولي حتى المرة هادي بروحك..
طوبى:يعني انت ماتعرفش..
حول نظاراته وهو يشوفلها بإبتسامه وحواجبه معقوده بعدين قدملها وشد خشمها وقال..
/لمن طالعه انتي قوليلي..نزل يده وقال..فيك لؤم وخباثه..
هي ضحكت وقال..
/بالك ليك انت..
ضحك بصوت عالي..حاوطها من رقبتها وضمها وهو يضحك ويقول..
/طول لسانك طول لسانك كارثه..حتى سدرة ماكانتش هكي..
هي قالت بضحكه..
خنقتني..
طلقها وشد يدها وقال..
/نبي نشوف جنه..
هزت راسها وقالت..باهي خش للمربوعه..
مختار شاف لباب الحوش الدخلاني..
وطوبى قعدت تشوفله وهي تحاول تفهم هو في شن يفكر وعلاش جي بعد اللي صار!..
تنهد وقال..
/باهي..ومشي للمربوعه الخارجيه..
وهي معاها بعيونها قعدت تشوفله كيف حول سبيدروه بعدين فتح الباب وخش..
تنهدت ومشت خشت للحوش..
🍃🍃🍃
قعمز في المربوعه وهو يمرر في نظره عليها..ثبت نظره في جهة معينه صار فيها موقف لين يموت ماينساه..
لما صارت حادثه سدره وهوجي قدام الناس يعرض ع بوه في المساعده وبوه طرده شر طرده...
بدت ع وجهه ملامح الحقد..بدلهم بسرعه لما صوت خطوات طوبى..
خشت عليه وهي رافعه قعماز جنه..
هو ابتسم وعيونه عليهم..
وصلت فيه وحطت القعماز جنبه..
عدل جلسته بحيث جي مقابلها..
والبنت لما شافتها ضحكت ضحكه حلوة بالمرة ترد الروح..بعدين رفعت يدها وناغت .
"يحبوك الصغار"
هو صدماته الجمله..جلده تقشعر..
شافلها بشي من البلاهه وقال..
/اني!
طوبى وهي تشوف لجنة بإبتسامه..
/هكي الباين..شوف كيف تشوفلك تبيك راهو..
هو رجع شاف لجنه وقال..
/اني مانحبهمش..
هي بدت ع وجهها ملامح الريبه..
شافلها وقال بضحكه..
/نقصد ماعنديش عليهم..اني ماعنديش ع الصغار هدا علاش ولا مرة رغبت نكون اب..الابوه صعبه هلبه..هلبه..
طوبى؛تبان حنون..
ابتسم وقال..
/مش عارف..ولا مرة حد وصفني هالوصف..شافلها ورفع حواجبه وقال..عادي ناخدها..
طوبى؛عادي..
هو قال:ياساتر..
ضحكت ضحكه خفيفه..
قرب القعماز ليه...وخدي جنه قالتله طوبى..
/سمي.
قال؛بسم الله..
ورفعها ليه...لما قربها من وجهه حطت يدها لحيته..
هو حس بشعور حلو بالمره خلاه يبوسها من خدها..
طوبى نزلت وشاحها وقعدت تشوفلهم بإبتسامه بعدين قالت..
/مازعلتش يعني..
مختار حط جنه في حضنه وقال..
/لازعلت وهلبه...لكن حاولت ماناخدش موقف منك..نشوف فيك زي المغرر بيك..يعني كبرتي ع ايدين ناس ماعطاتكش عني اي فكرة حلوة طبيعي ماتحطيش فيا الثقه..الذنب مش ذنبك الذنب ذنبهم في أي تصرف ديريهولي..
طوبى قعدت ساكته وهي تشوف لجنه..
مختار:قالوا بوها بدي يزور فيهابحكم المحكمه..
طوبى:طبيعي..
مختار:باهي وبعدين؟
طوبى:يعني مش عارف..
ضحك..
طوبى؛اللي جابلك قبل اكيد جابلك بعدين..
مختاربضحكه:لا والله نهائيا..
طوبى:قريب حنطلق..
مختار:كيف صار!؟
طوبى:مش مهم كيف المهم بيصير
مختار: بصدق ماعنديش فيه ثقه..
طوبى:اللوحه اللي شفتها عندك كيف خديتها منه؟!
مختار:هو قالي عنها في اول لقاء بينا واني طلبتها منه وهو جابها..كان في بينا شغل
طوبى:امتى؟
مختار:قبل وفاة بوك بفتره..
طوبى سكتت وهي تفكر..
مختار:نتمنى من قلبي يولي راجل المرة هادي ويكون قد قراره..طوبى لو تبيني ندخل حندخل..
طوبى:لا مش لازم هو واضح عليه ان عنده مشاريع تانيه في راسه يبي يفضي باله ليها..
مختار:زي شني!؟
طوبى؛اللي سمعته انه ناوي يستقر برا وبياخد معاه مرته وصغارها يعني فرصة الخدمه غادي تبي ذهن صافي وسمعه كويسه ونجاة معاه
مختار ابتسم ع جنب وقال..
/مش عارف كيف بوك وسدره لوحوك هالتلويحه
طوبى؛يقولوا المظاهر خداعه..
مختار هز راسه بعدين جي بيولي بجنة لقعمازها بدت تبكي..
هو استغرب..وطوبى اكثر منه..
مختار بخوف:مادرتلها شي..
طوبى لاحظاته وقالت..
/تبيك..
مختار رجعها لحضنه وقال..
/لازم نطلع..
ناضت طوبى وقالت:نوصلك بيها للباب هدا بعدين ناخدها منك بطريقتي .
مختار ناض بيها وهو متوتر وطوبى مركزة عليه...
ناضت معاه ومشوا مع بعض للباب..
🍃ويخش الحاج علي من الباب الفاصل وهو يسمع في اصوات هدرزه جايه من حوش ولده..
وقف في مكانه لما شاف مختار واقف في باب المربوعه وجنه في حضنه وطوبى واقفه حداهم تلاعب في جنه..
🍃طوبى وهي تحرك في راسها يمين ويسار:هالصيصان..شو حلوين عم بيدوروا حولا امن مبسوطين..
جنه قعدت تضحك..
طوبى شغلت الاغنيه في تليفونها وقعدت ترقص عليها وهي تشوف لجنه..
ومختار يتأمل فيها...
شويه قربت منه وهي مازال تغني لين خدتها من حضنه..
ابتسم وقال..سلام..
وكيف جي بيمشي طوبى عيطت.
هو شاف لصدره لقي شعرها عالق في سوسته كبوطه..
طوبى:شعري..
هو ضحك وضمها ليه بعدين قال..
/شويه بس..حول شعرها بلطف وقال..هاه خلاص..
وخرت وهي تضحك وحواجبها معقودات..
هو مسح ع شعرها بعدين قال..
/غدوة مسافر..نشوفك ع خير..
طوبى:توصل سالم..
هز راسه ومشي طلع بسرعه...
فتح الباب الخارجي وطلع..وسكره وراه..
طلعت طوبى من المربوعه وهي تقول لنفسها..
"يبان الطف من خلق ربي..لكن قلبي ديما خايف منه ومايبيش يصدقه..شن وراك المرة هادي بس.."
رفعت عيونها فوق وغمضتهم وهي تدعي في نفسها..
"ياربي وانت المهيمن علينا..فوقنا كلنا..ارادتك فوق كل اراده..اكفنا شر من خلقت بما شئت..واجعل في ضرهم لينا نفعنا يارب"
فتحت عيونها وشافت لبنتها..ابتسمت وهي تقول..
/روح مامتك انتي احلى حاجه في حياتي ياناس..وباستها من خدها..وولت حطتها في قعمازها وطلعت بيها من المربوعه..
🍃وبعيد عن حوشها بشويه..من ورا الباب االفاصل..
طلعت اميمه من الكوجينه بعد ماحطت سحلب ع النار..
شافت جدها مقعمز ع كرسي بروحه..
مشتله وين قربت منه قالت..
/جدي..
شافاته وكأنه يمسح في عيونه بعدين شافلها وقال..
/طوبى بروحها في الحوش ناديها تجي وتجيب بنتها نبي نشوفها..
اميمه بإبتسامه؛حاضر..غير خش داخل صقع..
هو هز راسه بعدين قال..
/بري توا..
اميمه بضحكه:حاضر..
ومشت طول للباب الفاصل وهو معاها بعيونه...
🍃🍃🍃🍃🍃
الساعه 11:00ليلا..
المطر كانت تصب..
وهي في مصلاها كانت تقرا في القرآن..
لما سمعت حس المطر سكرت المصحف وغمضت عيونها وقعدت تدعي..
/ربي يامحول الحال والأحوال حول حالي لأحسن حال يارب..واحفظلي بنتي ياربي..يارب..
فتحت عيونها ورجعت تقرا في القرآن وفي شي من الضيق قاعده تحس بيه..
هو طبيعي..غدوة موعد زيارة الجالي لبنته..اكيد يوم زي هدا حيكون ثقيل عليها..
☘وفي دار البنات..
كانت اريج تدعي وهي راقده في سريرها..
"يارب اخترلي ولاتخيرني فأنت خير من يختار"
وجنبها بمسافها الاء في سريرها تتراسل مع عزيز..
فجأه تجيها رسالة واتساب..تفتحها طول وتقراها..
( كـنـت أحـبـهـا وأهـتـم بـهـا كـثـيـرآ
لـكـنـهـا حـمـقـاء لـَم تـتـمـسـك بـَي جـيـدآ)
بغضب وهمس قالت..
/الحقير هدا..تو نحرش فيه بوه وعمامه يديروله حل..
وطلعت من الواتساب ورجعت لمحادثتها مع عزيز ع الماسنجر...
🍃🍃🍃🍃🍃
وعدت هالليله..
وطل اليوم اللي بعده...
🌼سدرة كان صبحها رايق وجميل..
مع صفيه ويوسف وإياد..
الثلاثه يهدرزوا حواليها ويشربوا في قهوة جنة اللي كانت تشم فيها سدره وتحس بشعور حلو بالمرة مخليها حيويه اكثر من قبل..
تراقب فيهم كيف يتكلموا وهي مركزه معاهم ويجي في خاطرها تتكلم حتى هي ويولي الكلام عندها ساهل..
هي فهاللحظات ناسيه حيرتها واسئلتها اللي مالهاش اجابه شافيه..عايشه جو اللمه اللي يفكرها بأيام حلوة ودافيه...
🍃وهو من بعيد كان يشوفلهم بألم وحب في نفس الوقت..
سعيد لسعادتها..ومتألم لأنه مش جزء منها..
اصلا هو ديما كان سبب ألم ليها وعمره ماكان سبب سعاده..هو هكي يشوف..
ماقدرش يقعد اكثر من هكي انسحب وطلع من المركز..
وقعد يمشي بطريقه للفندق وهو يفكر وملامح الحزن مسيطره ع وجهه..
وصل في الفندق وتوجه للغرفه اللي قاعده فيها اخته مع ولدها..
🍃المهدي:نسرين..
نسرين وهي تلبس في ولدها كبوطه قعدت تشوف لخوها وتراجي يكمل كلامه..
المهدي؛خاطرك تقعدي؟
قعدت تشوف لعيونه لحظات بعدين قالت..
/لا..
هو قال:خلاص يوم تاني ونروحوا..
هي هزت راسها موافقه بصمت..
وهو مشي طلع من حداها..
تنهدت بحزن بعدين ضمت ولدها ودموعها نزلوا...
🍃🍃🍃🍃🍃🍃
الساعه 4:00قبل العصر..
خش الجالي لحوش المحجوب وهو رافع زوز شناطي وحده كبيره شويه ووحده صغيره..
المحجوب بإستغراب..
/هدا شني؟
الجالي حط الشناطي وقال..
/حاجات ليها قعدوا فالفيلا جبتهم..فضيتها وبنعرضها للبيع..
المحجوب هز راسه واشرله بيده يخش..
مشي الجالي وخش للمربوعه والمحجوب وراه...
🍃هالمرة طلعت جنه بروحها طلعها المحجوب..
وتكلم هو وياه في الشرط اللي رفضاته طوبى وهو ماكانش عنده أي مانع.
الجالي:مرات مانكونش منتظم في الزيارة مرات نقعد فتره مانجيش بكل لهالسبب طلبت تكون في اكثر من يومين بش يكون عندي خيارات..يللا مش مشكله..المهم قوللها ان النفقه حتوصل في وقتها...وحقوقها حنبعتهم مع خوي المهدي..
المحجوب هز راسه بإيجاب وهو ساكت..
تنهد الجالي وقال:الله غالب...بالله خبرها اني بنطلعها لخوي نضال يشوفها هدرز قدامه عمر عليها وشد فيه يجي يشوفها حتى هو..
المحجوب قام تليفونه واتصل بطوبى وعطاها علم وهي وافقت عادي...
المحجوب حط تليفونه جنبه وقال..
/هيا نوض..
ناض الجالي ومشي حط جنة في الشنطه متاعها..
ورفعها..
وطلعوا هو والمحجوب من المربوعه...
ومنها من الحوش..وتوجهوا للمكان اللي فيه السياره..
وهما ماشيين في هدوء وبأمان الله..
مايندريش المحجوب الا وخبطه تجيه ع راسه من الخلف خلت الدنيا ظلم في عيونه..وطاح ع الارض..
الجالي قعد يجري ببنته للسيارة..انفتح بابها الخلفي ركب هو وياها وقال للي راكب القدام..
/تحرك..
وتحركت السيارة بسرعه..
الجالي التفت وهو يشوف شن صار وراه لقي المحجوب طايح في الطريق..
ابتسم مكرا بعدين شاف لبنته في وسط الشنطه وقال..
/مش قتلك ياروحي قريب نكونوا مع بعض..وماما حتى هي تو تلحقنا غير نبيك تصبري شويه بنتي..
تنهد وشاف القدام وهو يقول..
/برا طول طول طول...
🍃🍃🍃🍃
وفي حوش المحجوب..
تحديدا الكوجينه..
نبيله:مش عارفه اذا الوقت مناسب لمشروع زي هدا بس اني ننصحك تأجليه..
طوبى؛حتى اني قلت هكي مش في بابه..تنهدت بقلق وقالت..عطلوا ولا!؟
مشت نبيله طلعت من الكوجينه وطوبى وراها..
خدت تليفونها من فوق طاوله ف الممر..اتصلت براجلها...سمعت صوت النغمه قريب..
طوبى:هدا تليفون خالي..شكله نساه في المربوعه..
فجأه..
يسمعوا صوت تخبيط قوي ع الباب..نبيله انفجعت...
وطوبى حست بقلبها وقف من الخوف..
طلعت تجري وهي ترفع فشاربتها عن كتفها وحطتها ع راسها لفتها حوالين رقبتها اللي حست روحها بتطلع منها..
لين وصلت في الباب فتحاته..
ع وصول نبيله اللي كانت وراها..
شافوا رجاله ورا الباب واحد منهم قال..
/راجلك مضروب وطايح برا يااختي..
جحظوا عيون طوبى من الصدمه..
ونبيله مشت طلعت...
كانوا فيه حواليه رجاله تباعدوا عنه لما شافوها طالعه..
وهي لما شافت راجلها طايح ع الارض خبطت بيدها ع خدها بقوة..
وطوبى طلعت بعدها ورجليها مش حاملينها..
قعدت تشوف لمرت خالها وهي ماشيه لراجلها تجري..
حركت عيونها عنها يمين...مافيش اثر ...
بعدين يسار..مافيش ليهم اي اثر..
المراة حست نفسها وقتها انها ماتت..حست بالموت...
ومعاش حست بأي شي ليه علاقه بالحياة...
🍃🍃🍃🍃🍃
واللي سلب منها روحها كان يراقب في الطريق لعند ماوصلوا في طريق مزارع كان فيه مفترق طرق..
قال للراجل اللي يسوق بيه..درس غادي..
وصل الراجل للجهة المعلومه ودرس طول..
شويه جوه تلاته مسلحين..
فتحوا الباب الخلفي وقالوله.
/انزل..
هو لما شافهم هرب عنهم بعيونه وتجاهلهم من الخوف وخدي شنطة بنته ومشي..
لحقوه زوز...وهما ماشيين هو سمع صوت ضرب رصاص..
عرف شن صار في الراجل اللي كان معاه...
حاول يتغلب ع خوفه بكل قوة المهم يوصل في اللي يبيه..
وصلوا لسياره عاليه مظلمه..
فتح بابها واحد منهم وقال..
/اركب..
ركب الجالي بجنه...
وتسكر باب السياره..خبط واحد فيهم ع السياره..
تحركت طول...
وهما مشوا ركبوا سيارة تانيه وطلعوا وراها...
السياره اللي فيها الجالي وصلت في مكان فيه سيارتين تانيات عاليات..
تحركوا طول قدامهم..والسياره اللي فيها الجالي وراهم..
ووراها سياره تانيه..
وتوجهوا كلهم ورا بعض لوجهه محدده..
🍃هدا كله صار وجنه راقده مش حاسه بشي وبوها يتأمل فيها وهو مبتسم..
🍃وفي اول سياره من هالموكب..
كان نفس الشخص المخيف بالنسبه لصابرين مقعمز في الخلف..
قام تليفونه وقعد يكتب في رساله وصلت للشخص المعني اللي كان في قارة تانيه...
🍃 واقف يتفرج ع الثلج اللي يصب من ورا زجاج باب فيرندا شقته...يسمع في سينفونيه...ضوء القمر...
قام تليفونه لما وصلاته الرساله قراها..
بعدين رفع كاس الخمر اللي كان شاده في يده وشربه في مرة ..
ورجع يشوف للثلج وهو يصب بملامح اشد بروده من الثلج نفسه...

#انتقام
#طوبى

....يتبع...