طوبى ☕شارع القهوة☕

الجزء الرابع والثمانين

#طوبى  "جنة طوبى"
#جمان_فريد
#الجزء_الرابع_والثمانين "حرب باردة/حرب النجوم1 "
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الذكر🌼
قال رجلاً لرسول الله ‎ﷺ، إنَّ شرائع الإسلام قد كثرت عليَّ، فأخبرني بشيءٍ أتشبَّث به؟
قال ‎ﷺ: “لا يزال لسانُك رطبًا من ذكر الله”
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃" آهٍ من لَيْتَ، إنها أكبر عِلَلِ الدنيا."🍃
_________________________________________
وصل في المطحن وقف قدامه وقال..
/السلام عليكم..
ردوا عليه جميعهم السلام..والمهدي ناض وطلعله..
مد يده وصافحه وهو يقول..
/الحمد لله ع السلامه..
اشرف وهو عاقد حواجبه:الله يسلمك..طلق يد المهدي وحطها في جيبه وهو يقول..شن صاير بالزبط يامهدي..
المهدي اشرله ع كرسي قدام المطحن وقال..
/قعمز قبل..
تنهد اشرف ومشي قعمز وين ماقاله المهدي..
والمهدي خدي كرسي وقربه ليه وقعمز حداه..
بعدين قال..
/عمها مصكر راسه وقال بنت خوه وهو ادرى بمصلحتها..
غير اشرف عيونه عن المهدي وقعد يشوف يمينه بنظرات كلها غضب..
المهدي:طبعا سألت ودورت وعرفت انه مخلطه ع جماعة رديف مدعومين وشبه فهمت ان الموضوع ليه علاقه بواحد منهم..
شبحله اشرف وقال:لو من يكونوا وربي ماني فايتها البنت لو فيها موتي..
المهدي:بإذن الله مايصير شي اني تو نشوف الموضوع بروحي..
اشرف:حطني في صورة يامهدي اي شي يوصلك عطيني بيه علم .
المهدي وزع نظره ع الطريق وهو يهز في راسه بالموافقه..
🍃وفي حوش لطفي الواعر..
اللي كل قاعدين عايشين فيه ع أعصابهم واكثر صفاء..
كانوا يراجو في اتصال من نسرين او اشرف يعرفوا منهم شن صار مع المهدي..
فهالوقت خشت عليهم اميمه..
كانت مربعه ايديها وهي تقول..
/السلام عليكم..
كلهم ردوا عليها السلام..
هي مشت طول قعمزت جنب صفاء حطت يدها ع ظهرها وهي تمسح عليه ووزعت نظرها عليهم وهي تقول..
/ماصار شي جديد؟
فايزة بقلق ودموعها في عيونها حركت راسها يمين ويسار بالنفي..
وصفاء كانت في قمة توتر..
شبحتلها اميمه وقالت..
/ان شاء الله مايصيرش الا اللي فيه الخير..
صفاء بصوت يدوب طالع..
/يارب..
وخواتها وطوبى يشوفلها بقلق...
فجأه رن تليفونه بنغمة رساله..
كلهم وجهوا انظارهم ليها..
وهي طول قامت تليفونها بلهفه وخوف..
وفتحت الرساله وقعدت تقرا..
(اشرف فوتيه..فوتيه خير مانخليه يفوت الدنيا كلها)
قعدت ترجف من الخوف وهي جاحظه بنظرها في التليفون..
كلهم خافوا وين شافوا حالتها وامها قالت..
/شني ياصفاء؟!
طاحوا دموع صفاء وهي تقول بنبرة مرتعشه..
/في حد يهدد فيا بأشرف..يبوا يقتلوه ياماما..
كلهم انصدموا..
خدت اميمه منها التليفون وقرت الرساله..
عقدت حواجبها بخوف وقرت الرساله بصوت عالي..
امها حطت يدها ع فمها ودموعها ينزلوا بخوف..
صفاء وهي ترجف قالت..
/خلاص ياماما بنسيب اشرف..
مطيره:لايابنتي شن تقولي..! تو عمك المهدي يتصرف..
طوبى:كلمي نسرين يافايزة وقوليلها ع الرساله..
فردوس بقلق؛ايه قوليلها بسرعه..
صفاء وهي تبكي بخوف..
/واشرف اشرف تو يديروله حاجه!
طوبى:كلميه وخبريه انتي كان قاعد مع المهدي توا خبريه..
فايزة وهي تمسح في دموعها:ايه ايه كلميه..
صفاء ببكي:خايفه يتهور ياماما اشرف عصبي هلبه..
اميمه:المهدي معاه ياصفاء مايخليشي يتصرف من راسه..
اريج:خودي تليفونك وخبريه توا..
صفاء خدت نفس وهي تحاول تهدي روحها..
خدت التليفون من اميمه وناضت وطلعت من حداهم...
فايزه حطت ايديها ع جبهتها وهي تقول بألم وقهر.
/ااه ياربي امتى بنرتاح اني امتى..
فردوس خدتها في حضنها وهي تقول..
/قولي يارب فرج عليا ماتقوليش الكلام هدا..
وبناتها يشوفولها وهما يبكوا..
والباقي يشوفولها بنظرات اسف وحزن ع حالها...
🍃🍃🍃🍃🍃
وبعيد عنهم قدام أحد المقاهي المشهورة فالعاصمه ..
كان مالك مقعمز مع صحابه..
هما يهدرزوا وهو مستمع فقط..ليه فترة على هالحاله مهبي وجوه متغير ومش مالك الاول..
واكثر من مركز عليه صديقه المقرب"معين"..
كان في باله شي ويبي يتأكد منه قبل ليصارحه بيه..
وهما في عز هدرزتهم..درس سيارة قريبه عليهم ينزلوا منها بنات..
لبسهم ملفت هلبه..مكياج...وفي اللي مغطيه راسها وفي اللي لا..
وين شبحوهم عيونهم ماتحولتش من عليهم..
:شن هدا ياولاد
:سكودات هادم..اطلع طول..
:بيخشوا لمحل ولد الفايد..هي تنوضوا..
معين شبح لمالك لقاه سرحان قاله..
/كينج..ياهوو..
استاقظ وشبحله وهو عاقد حواجبه..
معين غمز وقال:في جو مليح خش لمحل ولد الفايد حاجه صح..
:ليك فترة وحداني انت نوض معانا نظم امورك..
مالك وهو يشوفلهم
جي بين عيونه عيون من اول ماشافهم وحاله منقلب..
شافهم خايفات ويبكوا رققوا قلبه ومسوه..
ومن بعدها وهو حاله ماهو حاله..
ومن لما ولت قريبه عليه وبدي يشوف فيها بإستمرار وعرفها عن قرب مش بس عاف جنس حواء..عاف مالك الأول وكرهه وتمناه لو ماكانش موجود...
معين؛مالك..اووو..
مالك غمض عيونه وحرك راسه بالنفي بعدين ناض وفتحهم وهو يقول:خاش داخل..
ومشي خش للمقهى متاعه وعيون صحابه بنظراتهم المستغربه معاه...
🍃🍃🍃🍃🍃
"سكري هاتفك معاش تفتحيه لين نجيبلك شفرة جديده"
صفاء بنبرة باكيه:اشرف..
"صفاء اسمعي الكلام"
صفاء بنبرة مخنوقه:اشرف مانبي يصير فيك شي نموت لو صارت فيك حاجه..
بانت نبرة حلوة في صوته وهو يقول..
"مايصيرلي شي معاش تفكري خلاص"
غمضت عيونها بشده وقالت..
/كان نفضوها احسن..
جاها صوته الغاضب وهو يقول..
"ماتعصبنيش عليك يابنت الناس بالله عليك"
هي بصوت باكي؛اشرف..
"تو شن تبيني نقول والله شاد روحي بالسيف..اسمعي غير نطلعوا من هاللي حني فيه بس تو نعرف شن ندير..صكري هاتفك ومعاش تفتحيه بكل"..
وسكر عليها..
هي من بين دموعها ارتسمت ع وجهها ابتسامه...غمضت عيونها وضمت شفايفها لداخل بقوة بعدين قالت برجاء..
/يارب ماتحرمنيش منه يارب..
🍃🍃🍃🍃🍃
"توا قالتلي وصلت للبنت رسالة تهديد يبوها تسيب اشرف ولايقتلوه"
المهدي وهو حاط يده في نصه ويتكلم بالهاتف قال..
/الموضوع ولى واضح يانسرين واضح..قوليلها ماتعدلش تو نتصرف..وسكر ع اخته..
وقعد واقف يفكر..لين رجعله اشرف وقاله..
/وصلت للتهديد..
شبحله وقال:خبروني..غير نظره عنه ورفع تليفونه وحط ع رقم معين واتصل بصاحبه...
واشرف وهو يمسح ع لحيته بتوتر كانوا عيونه عليه..
🍃🍃🍃🍃🍃
الساعه 9:00ليلا..
مقابل رخامة البار كانت مقعمزة تحكي لأمها وهي قلقه وتقول..
/من بكري نتصل بيها ماتردش والماسنجر متاعها مسكر زعمه خيرها!
فوزيه وهي تحاول تخفي قلقها..
/بالك مشغولين في شي بالك ملتمين في حوش جيرانهم!؟
مناسك بقلق..
/عادي ياماما قبل نتصل بيها وترد عادي..
فوزيه مسحت ايديها بالفوطه وهي تشوفلها بقلق..
ع خشة مالك اللي كان ماشي وهو يلعب بمفتاحه..
لما شافته بمناسك تبدلت ملامح وجهها للحده نزلت من الكرسي وهي تقول..
/انت شن داير!؟
شبحت فوزيه لمالك بإستغراب..
هو وقف في مكانه مصدوم في سؤالها..
قدمتله وهي تقول..
/واخد رقم من وراي مكلمها!؟
هو بعدم استيعاب:شن تقولي انتي!
هي بعصبيه قالت..
/قول الحق يامالك البنت من بكري نتصل بيها وماتردش عليا بكل..
مالك بقلق:كيف!!؟كيف ماتردش عليك!؟
هي بغضب ودموعها في عيونها..
/مالك قول شن داير!..
فوزيه:شن بيدير يامناسك!؟
مناسك وهي تشوفله بحده:اسأليه ياماما..
فوزيه؛مالك!
هو بشي من الانفعال..
/اقسم بالله ماداير حاجه...خيرها هي ماتردش!؟
مناسك زادت خافت وقالت..
/مش عارفه من الصبح نتصل ماتردش ولافتحت فيس ولاماسنجر..
مالك طول لف ومشي بسرعه..
فوزيه مشت وراه كم خطوه ووقفت وهي تقول..
/مالك تعالى هني وين ماشي!
مناسك بقلق:يارب خير يارب..
🍃🍃
ويمشي مالك طول بسيارته لشارع القهوة..
خشله وقعد يمشي فيه وهو يشوف لحياش الشارع ووضع الشارع كان صاير شي..والوضع كان هادي مافيش يقول ان في مشكله وحادث وأي شي مثير للقلق صاير..
اتصل بأخته طول...
"لالتوا ماتردش عليا يامالك"
مالك وهو يدور بعيونه في حياش الشارع ويقول..
/توا اني في شارعهم مافيه شي الجو هادي..
"ان شاء الله خير وخلاص..خلاص انت روح بوي جي ويسأل عليك"
هو تنهد بعدين هز راسه وقال..
/تمام تمام..مروح..وسكر ع اخته ورد التليفون لمكانه ..
دار نظره اخيره ع شقتهم اللي كانت مظلمه بعدين تنهد بقلق..ومشي طلع من الشارع...
🍃وفي هديكا الليله قعد القلق والخوف مسيطر ع كل من موجود في حوش لطفي الواعر..وكلهم كانوا يستنوا في خبر من المهدي اللي قاعد يدور بش يعرف حقيقة اللي صاير..
وهدا كله كان على عيون محمد ولده اللي كان دمه يغلي ويفور يبي يدير شي حتى هو مايقعدش مكتف ويتفرج..
🍃🍃🍃
في جنان حوش محمد شنيبه..
المهدي بضيق:كلمتهم قالوا بينا وبين جماعته مشاكل مانبوش نخشوا في عركة معاهم..
ربيع بقلق:كيف هكي!معقوله مايقدروش يديروا حل للشكالات هادم!..
المهدي تنهد بغضب وقعد ساكت..
ربيع وهو يمرر في نظره ع جنان قال..
/لاحول ولاقوة الا بالله..شبحله وقال بغضب..الكلب هداكا يبي العدم بنات خوه عرضه الوسخ يدير فيهم هكي..
المهدي حرك راسه يمين ويسار وهو مستاء..
🍃🍃🍃🍃🍃
وتعدي هالليله اللي كانت طويله حتى ع مالك اللي ماقدرش يرقد غمضة وهو يفكر في مروة وكل من يعينيلها..
☘ويجي تاني يوم والحال كما هو عليه..
🍀المهدي طلب من اشرف مايطلعش من الحوش واشرف بعد اصرار منه وافق ع مضض يقعد في الحوش..
🍀ومناسك مازال تتصل بمروة اللي مخليه تليفونها في الشنطه ع الصامت وماجتش جنبه نهائي..
وحالهم هما وامهم يرثى له...ونساوين عيلة الواعر يحاولوا ع قد مايقدروا يخففوا خوفهم ويهونوا عليهم...
🍀وهدا كله وحوش الصيد ماعندهم علم بأي شي..
القصة كلها حدود المعرفه بيها كان بين..
المهدي واشرف وربيع ومحمد المهدي ونضال...
لكن عبد القيوم اللي كان مقرب من بعض المذكورين ماعنده علم بشي في موضوع تاني كان شاغله وواخد كل وقته..
🍃🍃🍃🍃🍃
الساعه 4:00قبل العصر..
كانت مروة طالعة من الحمام وجهها يقطر مية وضوء..
تمشي وتفكر في حالهم..لين وصلت للصاله..
لقت طوبى مقعمزه وبنتها راقده في حجرها ..
كانت لابسة خاتم الذكر وتردد في ذكر معين..
مشت قعمزت جنبها وسمعتها بوضوح تردد..
"الصلاة على النبي"
طوبى حست بيها شبحتلها وابتسمت..
يدوب مروة ردت الابتسامه وقالت..
/راقده؟
طوبى شافت لجنة وقالت..
/توا بس..
مروة :ربي يحفظها..
طوبى بإبتسامه؛آمين..تسلميلي مروشه..
ابتسمت مروة بعدين خفتت ابتسامتها وقالت..
/خايفه هلبه خايفه..
طوبى حطت يدها ع يد مروة وشدت عليها وقالت..
/بإذن الله تطلعوا منها زي ماطلعتوا من اللي قبلها انتي ادعي ربي من قلبك اللي نجاكم من اللي قبلها ينجيكم من هادي..
مروة حطت يدها ع صدرها وقالت بنبرة باكيه..
/يارب....ااه بس..كنت متحمسه للقرايه خططنا اني وصفاء لهلبه حاجات بش نكونوا الاوئل اني وياها ونفرحوا ماما..لكن..مش عارفه علاش صار هكي..
طوبى:وشن اللي صار يامروة قاعدين في بداية السنه وهالمشكله حتنحز بكري بكري صدقيني وتكملوا انتي وصفاء اللي بديتوه..
مروة:ياريت نقدر نتفائل زيك..
طوبى:تقدري..اسمعيني شن بنقولك..صلي ع النبي لين يأذن العصر وبعدين صلي وادعي وطلعي اللي في قلبك كله وراجي شن بيصير..اسمعي مني مروشه..
تنهدت مروة بعدين هزت راسها بالموافقه..وبدت تردد في الصلاة على النبي..
وطوبى ابتسمت خفيفه وهي تشوفلها بعدين رجعت شافت لجنة اللي كانت مبتسمه وهي راقده..
كبرت ابتسامه طوبى اللي كانت حلوة بالمرة..حطت بنتها جنبها و غطتها..بعدين اتكت حداها ورجعت تصلي على النبي..
🍃🍃🍃🍃🍃
"مقفل"
فوزيه بقلق:الحق حسني انشغلت..
دمعوا عيون مناسك وقعدت ساكته وهي تفكر بقلق..
ع جية مالك من داره...خش عليهم دار المعيشه وقف حدا الباب وهو يسأل..
/شن صار؟
فوزيه حركت راسها بالنفي وهي تقول..
/رقمها مقفل..
مالك؛بعد العصر بنرفعكم..
فوزيه:وين!..
مالك وهو طالع:لحوشهم يام لحوشهم..وطلع من حداهم..
مناسك بتوتر؛ايه مافيش غير هكي..
تنهدت فوزيه بضيق بعدين قالت..
/جيبيلي تليفوني خل نتصل ببوك ونخبره...
🍃🍃🍃🍃🍃
"رديلها العربون ولادبريلها انتي تصرفي"
هادي فايزة تكلم في موظفه عندها في المركز...
"يامدام نقولك دايرة مشكله في المركز وقاعده تهدد..
فايزة بعصبيه؛دير اللي بديره معاش هامني شي.
ع خشة فردوس ومطيره عليها بعد ماسمعوا صوتها تعارك..
فايزة بإنزعاج؛فوتوني ترا..وسكرت الخط..
مطيره؛خيرك شن في!؟
فايزة بعصبيه:خدمة الهم هادي لافي من يراعي ظروف ولافي من يقدر..
فردوس:باهي شن صاير بالزبط!
فايزة؛زبونه عروسة بيان نسيتها بكل معاش قعد فيا عقل بس نتفكر ولاندير شي..
خشت عليهم صفاء وهي تقول..
/خيركم!؟ خيرك ماما!..
فردوس بضيق:في زبونه في مركز امك شورها مدايرة مشكله غادي وتبي امك تمكيجها..
صفاء قعدت تشوف لأمها بضيق..
مطيره:خطرت عليا نفس القصه صارت قبل وقتها مشت طوبى خدت مكانك..
صفاء وفردوس قعدوا يشبحوا لمطيره..
وفايزة في عالم تاني تفكر في المصيبه اللي نزلت عليهم وخوفها ع بناتها مسيطر عليها..
مطيره:زعمه نقوللها..
فردوس؛مش عارفه...ماظنيش تقول باهي..
مطيره:خل نجرب..ومشت طول طلعت للصاله وصفاء لحقتها..
وقعدت فردوس واقفه تشوف لحالة فايزة بضيق وهاتفها جنبها يرن وهي مش مهتمه لأمره...
🍃🍃🍃🍃🍃
بعد العصر..
في مقهى الزعيم..
مقعمزين محمد المهدي وصاحبه مؤيد يحكوا في الموضوع نفسه..
مؤيد:فوته ياراجل ماتخليشي يركبك جميل..
محمد المهدي:مش مهم خل يركبني جميل..
مؤيد:مولي يدره الكبد وماينطاقش يامحمد فوته خيرلك..
كيف جاي محمد بيرد..سمع باب حوش لطفي انفتح..
شافوا جيهته..
لقوا سيارة سدرة طالعه..ركزوا فيها..
شافوا فيها طوبى وآلاء...بعدين محمد غير نظره لحوش لطفي لقي مروة وهي لابسه حجابها تسكر في البوابه قعد يشوفلها لين درقت من قدام عيونه..تنهد تلقائيا..
شبحله صاحبه وقال..
/اشبح شن صاير..
محمد غير عيونه للطريق وقال..
/هيا نوض..
زفر مؤيد وناض...ولما مشوا طلعوا من المقهى..
شافوا"الرنج روفر" خاشه...
قعد محمد واقف في مكانه يتبع فيها بعيونه لين وقفت قدام حوش سدره..
نزلوا منها فوزيه ومناسك اللي كانت عيون مؤيد وهي تلمع معاها لين خشت..
غيرمحمد نظره لمالك اللي كان مقعمز في السيارة وهو يشوفله بنظرات كلها كره وغيره..
شويه وطلعوا مناسك وفوزيه من الحوش..
هني نزل مالك ومشالهم وهو يقول..
/قصدكم مش في الحوش!؟
مناسك ودموعها في عيونها..
/ايه مهناش..
مالك قلبه بدي يدق بقوة من الخوف..
فوزيه بقلق:زعمه نشوفوا حوش جيرانهم..
مالك؛ايه يام بروا شوفوهم برا اني قاعد هني..
ومشوا طول مناسك وفوزيه لحوش لطفي..
ومالك ركب سيارته ووخر بيها لين وقف قدام حوش لطفي الواعر..
قعد يشوف لأمه واخته كيف يدقوا ع الباب..
شويه وانفتح..واللي فتحه مروة..
"مروة يابنتي وينك وينكم"
مالك من ورا النظارات قعد يدور بعيونه عليها يبيها تبان عليه..
خشوا امه واخته..وشافها وهي تكلم فيه في وجهها الحزن واضح..قلبه وجعه ماتحملش..هي بدون قصد منها شافت للسيارة جو عيونها عليه..
هو قلبه عداده ولى عالي..اما هي انحرجت وطول سكرت الباب..
تنهد من وسط قلبه..بعدين تنحنح وشبح القدام..لحظات...وتحرك بالسيارة...
ومازالوا عيون مؤيد ومحمد عليه لين طلع من الشارع..
محمد بحده:هيا..
ومشي طول..ومؤيد لحقه وخلا عقله مع مناسك..
🍃🍃🍃🍃
"بإذن الله تطلعي من هني راضيه"
:بالله عليك وخيتي متاعيني لايعجبهم العجب ولاالصيام في رجب..
طوبى بضحكه:يعجبهم غصب عنهم وقولي قالتها هديكا المزينه..
ابتسمت البنت بشي من الراحه..
والاء تتفرج ع طوبى وهي مبتسمه..
وطوبى شده حاجه من عدة الشغل وهي تقول..
/بسم الله توكلنا ع الله..
وبدت شغلها ع وجه البنيه وهي اللي ليها شهور ماشدتش عدت مكياج ولاقربت منه..
مجرد مابدت حست روحها تخدم بسلاسه وكأنه ماسيبتش بكل..
قعدوا بعض العاملات الجدد يتفرجوا عليها وهي تخدم..
حركة ايديها زي الرسامين وكأنها ترسم وتلون في لوحه قدامها..
كانت تخدم بثقه عاليه..
طوبى وقتها حستها بقوة..وهي اللي ليها وقت فاقده هالاحساس..
آلاء لااراديا قعدت تبتسم وهي تتفرج عليهل وخطرت عليها طوبى القديمه...
🍃🍃🍃🍃🍃
"عطيهم دي يسحون الكلي"
فايزة ودموعها ينزلوا..
/همي وغمي الناس هادوا نقعد عمري كله واني مبلية بيهم كل مانقول خلاص ارتحت يطلعولي بمصايبهم..
فوزيه قعدت تشوفلها بحزن..
ومناسك تشوف لمروة كيف تبكي بصمت وقلبها موجوع..
مطيره:كلاب لافيهم نخوة ولاغيريه ع عرضهم خنازيز هادم مش كلاب..
فوزيه:ايه والله صدقتي..
ويرن تليفون مناسك..
قاماته وشافت المتصل كان خوها..
فتحت الخط وردت قدامهم..
/ايوه مالك..
مروة طول شبحتلها..
شويه ناضت مناسك ومشت طلعت من حداهم..
فوزيه بعد ماكانت بنظرها معاها شبحت لصفاء وقالت..
/يفرجها ربي بنتي ويفككم منهم وان شاء الله تقري وتنجحي ونهيجوا في عرسك..
غصب عنهم ابتسموا..
فوزيه بضحكه:ايه ايه اضحكوا وقولوا يارب...تفراج بعون الله خلوا املكم بالله كبير وتفائلوا..
ابتسمت مروة بحب وهي تشوفلها وتفكرت كلام طوبى..
وفجأه..
تخش عليهم مناسك وهي تقول بإستعجال..
/عطوني اسم عمكم ووين يسكن..
هما تفاجئوا..
فايزة:علاش!؟
مناسك بإستعجال:غير هيا ياخالتي مالك يراجي..
فايزة:لالا مانبيش ندخله في مشاكل لا..
مناسك وهي تكلم في خوها:باهي باهي..
بعدت التليفون وفتحت المايك وقالت..
/تسمع فيك..
"خالتي فايزة"
وقلب مروة بدت تتسارع دقاته..
فايزة:نعم ياولدي..
"وهاك بروحك قلتيها ولدي..يالله خليني نتصرف مش متهور نعرف شن دير ياخالتي وحداك امي واسأليها.."
ابتسموا الموجودات..
وفوزيه قالت:شن تبي دير باهي؟
"غير عطوني اسمه ووين يسكن ومادخلكم بشي"
سكتت فايزة وهي تشوف لبناتها..
"خالتي هيا معاش في وقت"
فوزيه؛قوليله يافايزة.
تنهدت فايزة بقلق وقالت..
/مانعرفش وين يسكن نقولك اسمه بس..
"مش مشكله"
عطاته فايزة الاسم بعدين قالت..
/بالله عليك ولدي ماضر روحك ارجوك..
"ماتفكري في شي خالتي"
فوزيه:ردبالك ع روحك
"حاضر يام..مناسك سكري المايك"
سكرت ومشت طلعت وعيون مروة معاها وصفاء لأول مرة تركز ع اختها ومش هي بس حتى تاله اللي من لما انفتح المايك وعيونها ع اختها..
فايزة بضيق:سامحيني بالله عليك..
فوزيه:ع شني العفو! ماتخافيش عليه مالك يعرف يتصرف وعنده معارف.
مطيره:ربي يحفظه بحفظه..
فوزيه وهي تحاول تخفي قلقها قالت..
/يارب..
ع جية مناسك اللي كانت تشوف لمروة قالت..
/ان شاء الله يقدر يدير شي..
ومشت قعمزت جنب فوزيه..
ومروة زاد قلقها وخوفها هالمرة بعد ماخش مالك في القصه..
🍃🍃🍃🍃🍃
"فايتنا بكل يامحمد "
محمد:الدنيا تشغل ياصاحبي..
:يللا مش مشكله المهم جيت وريناك..
محمد بإبتسامة مجامله..
/تسلم..قاصدك ياصاحبي في خدمه..
:ان شاء الله نقدر عليها عارفني نعزك ونفرح لما نخدمك..
محمد:بارك الله فيك..وبدي محمد يحكي في القصة بدون مايذكر اسماء فايزة وبناته وحكاله عن الشخص اللي مصاحبه عم بنات فايزة اللي اول ماسمع صاحبه اسمه قاله..
:لاياخالي موضوعك صعب هدا وراه جماعة مايقدر عليهم حد اني حدي واحد من هلبه يخدموا في الامن لانحل ولانربط..
محمد بضيق:بالك تعرف منهم حد يخش في الموضوع..
؛لاالكبار بكل ماعنديش بيهم خلطه الحق مانكذبش عليك..
محمد سكت وهو مضايق ع الاخر..
مؤيد؛خلاص نوض يامحمد..
؛تقول مقعمز ع شوك يامؤيد خيرك..راجي القهوة!..
ناض محمد وقال:لامعليشي مافيهاش كيف مرة تانيه ان شاء الله..
:ع راحتكم..
وناض مؤيد ومشي معاه صاحبه وجارهم سقدهم وخلاهم مروحين بخفي حنين..
🍃🍃🍃🍃🍃
"الله يبارك ع ايديك"
طوبى بإبتسامه؛عجبك؟
البنت بدهشه:غيرتيني هلبه..
طوبى:بصحة عليك..
شافتلها بإبتسامه وقالت..
/بالله اسمك..
طوبى:اني مانخدمش غير اليوم جت استثناء ع خاطر ظرف مدام فايزة..
:حرام والله خدمة ايديك دخلك ذهب..
طوبى اكتفت بالابتسامه رد عليها..
:بجديات مش مصدقه ان هادي اني..
ضحكت طوبى وقالت:من الاصل حلوة الله يبارك وحني برزنا جمالك بس
؛تسلمي ياذوق..
والاء والمراة اللي تخدم في المركز بسبب طوبى كانوا وهما مبتسماتبإعجاب..
وتركيز آلاء كله ع ملامح وجهه خالتها اللي شافت فيهم فرحة مميزة..
فرحة الانسان اللي يحس في روحه بدي يسترجع في شي غالي فقده من وقته..شي استرجاعه اصعب من فقده..
الثقه بالنفس..
🍃واللي كان سبب في فقدها قاعد يحاول يرجع يكسب ثقة بوه فيه ويخشله من باب حتما حينفتح في وجهه..
الجالي..اللي قاعد يلعب مع صغار خوه في الجنان وبوه اللي كان مقعمز قدام المربوعه الخارجيه يتفرج عليهم ويشوف في فرحة الصغار بوجود عمهم معاهم...غصبا عنه ارتسمت ع وجهه ابتسامه لمحها الجالي وخلاته يبتسم ابتسامه نصر جانبيه غير ملحوظه..
🍃ومش هو بس اللي كان يحاول يكسب..
حتى نجاة..اللي عزمت عزوزتها وحمواتها ع الغدي وطبعا كلهم جو ماعدا نسرين..
مغليه كانت مقعمزه بالسيف لولا اصرار ولدها ماجت..
اما خديجه اللي حضرت فكانت منسجمه ودايره روحها عاديه جدا..
☘خديجه:الاسبوع الجاي يبدا والاسبوع اللي بعده عرس ولد خالتي من توا قولي للجالي يطلعلك بش تاخدي حوايج ليك ولبنتك نبوك في كل يوم بلبسه..
نجاة بإبتسامه؛ان شاء الله..
خديجه؛حني حتى الحنه..
فنصت مغليه وهي تشوف لخديجه وبنتها متجاهله..
نجاة بضحكه:ان شاء الله..
خديجه؛عاد انتي توا كنتنا نبوا ولامانبوش لازم تطلعي قدام الناس باللي يليق بينا..
ابتسمت نجاة مجامله وقالت..
/أكيد..
مغليه:ماتدوي في شي حني بس اللي ندووا وشن مانقولوا تقولي معانا..الله غالب راد عليا الوقت تولي مرت ولد من ولادي ماعندي ماندير..
رفعت خديجه حاجبها وهي تشوف لنجاة..
ونجاه اللي كانت تغلي غضبا قالت في نفسها..
"سايري يانجاة سايري معليشي"...حاضر عمتي حاضر شن ماقلتي ع قلبي زي العسل انتي أم الغالي.
رفعت مغليه حاجبها وهي تشوفلها من فوق لتحت..
وخديجه تنهدت تهكما وقالت..
/خالاتي امتى يجوك يام؟
مغليه:نهار الاحد..
ونجاة تمرر في نظرها بيناتهم وهي تفكر..
~~~~~~~~
مغليه:كسرتيلي رقبني معاها معاش تعامليها هكي تصدق روحها..
خديجه؛اني نبي نكسر بيها راس بنت الواعر وعيلتها طوبى توا يام فاهمه انها وصلت لللي تبيه ع اساس فضحت بينا وطلعت روحها مظلومه قدام الناس..لكن اللي بيصير العكس بعدين يام وبنخليها تندم اشد الندم..
مغليه؛مافهمت شي..
خديجه:كل شي في وقته حلو ميمتي..
وصلوا الزوز في باب الحوش..
شافوا الجالي مقعمز وحواليه صغار طاهر يهدرز عليهم..
ابتسموا..غيرت خديجه نظرها لبوها لقاته يتفرج عليهم ابتسمت مكرا وقالت..
/بالسلامه..
بوها تجاهلها..
اما خوها والصغارحيوها بحركة اليد..
هي تنهدت ومشت طلعت من الحوش...
بعد ماطلعت امها جت بتخش...
سمعت باب الحوش انفتح مرة تانيه..
التفتت والجالي ومعاه الصغار وبوه شافوا للباب..
خش عمر وهو لابس لبس الخدمه وفي يده شنطة كبيره...
صغار طاهر لما شافوه جوه يجروا وهما ينادوا..
"عمو"
هو سكر الباب وحط الشنطه وقال بضحكه..
/عيوني..
وامه وبوه وخوه يشوفوله بنظرات تعجب واستغراب..
سلم ع الصغار..بعدين وقف ع حيلة ومرر نظره عليهم وقال بضحكه..
/خيركم؟!
مغليه؛الشنطه!
عمر بضحكه؛خلاص بنقعد هني ماعندي علاش قاعد في حوش الجالي..
ضحكت مغليه بفرحة واضحه..
وهو طول مشالها وضمها وباس راسها وهي كانت تحضن فيه والدمعه في عيونها..
والجالي يشوف لخوه بإبتسامه وهو عاقد حواجبه بإستغراب..
ع خشة نضال اللي كان يضحك بفرح سكر الباب وقال..
/سريرك يراجي فيك..
التفتله عمر وقال بضحكه؛غير ان شاءالله حفظت اغاني جديده..
نضال ضحك وبدي يغني..
وحق الله عزيزة نفسي
نفسي مانواطيها لحد وحق الله..
عند المولى راهو قسمي هو اللي يعطي ويود
وحق الله..
اللي ينساني ننساه واللي يهواني نهواه
مافي حد احسن من حد وحق الله..
🍃كان يغني والابتسامه في وجهه لكن الدمعه واضحه في عينه..
عمر حس بيه..بس كلام الاغنيه مامسش فيه شي وجعه خوه فقط..
اما الجالي فكان شايف كلام الاغنيه بعيد عنه عزه النفس في نظره ان الواحد مايسلمش في حاجته مش انه يفرط فيها...
ومغليه الام..كانت موجوعه ع ولدها اللي تعرفه كامد في قلبه وداير روحه تجاوز التاجوريه لكن مع الاسف قاعده معششه في قلبه وعقله..
لكن محمد شنيبه..
/شن ماتشبحش فيا قدامك ولاكيف!
كلهم شبحوا لمحمد شنيبه..
ضحك نضال بإرتباك وقال..
/وعلاش مقعمز غادي ياغالي! قعمز قباله مرة تانيه..
امه وخوته شدوا ضحكتهم..
محمد شنيبه هز راسه وهو يشوفله بحده بعدين قال..
/ياخشوا داخل يااطلع برا صقع ع الصغار..
الجالي:صح..هيا تعالوا نروحوا..
وناض وهما مشوله...
عمر ضيق عيونه وهو يشوفلهم كيف مشوا معاه وسمعه يقول...
/تصبحوا خير..
ردوا عليه كلهم ماعدا بوه اللي مشي جهة الباب وطلع من الحوش..
غيروا نظرهم للباب وعمر قال..
/شن الوضع؟
نضال؛تحسه بدي ياخد عليه..
مغليه تهكما:هو اللي تسبب فيه لازم.ياخد عليه..
ولفت ومشت خشت للحوش..
تنهد نضال..بعدين خدي شنطة خوه وقاله..
/خش خش..راك مش حتفهم شي مهما فكرت..
ضحك عمر نص ضحك ومشي بيخش ونضال وراه وهو يردد في الاغنيه اللي غناها قبل شويه...
🍃🍃🍃🍃🍃🍃
وبدي ظلام الليل يحل...
بس ظلام المبنى المهجور اللي فيه عم بنات فايزة مع زوز شادينه مقيدينه يستجوبوا فيه كان أحلك..
:شن يبي منك !!؟
عم صفاء وهو في قمة الرعب..
/ليه عليا دين..دين..100ألف..
:وانت مالقيتش كيف تدفعه كل نعطيه بنت خوي..
هو قعد يشبحلهم وساكت.
ضربه واحد كف صدح صوته في المكان كله.
هو هز راسه وقال بنبرة مرتعشه..
/ايه ايه..
🍃هدا كله كان يسمع فيه مالك وهو مقعمز قريب عليهم من غير مايشوفه عم صفاء..
:الكلب هدا عطيني اسمه كامل..
وهو يرعش من الخوف عطاهم الاسم كامل..
وقف واحد فيهم ع حيله وقال..
/مار عليا الاسم..
:هدا واحد معفن قالوا يدعموا فيه جماعة******
:راجي شويه..
ومشي طول واحد منهم لمالك.
وصل فيه وقاله؛سمعت؟
مالك؛ايه معين عند اقارب غادي من الرووس الكبار.
تو نكلمه..المهم الكلب هدا نبيكم تملحوا جد اصله بطريحه تخليه راجل..
:تم ياغالي شورنا..
طبطب ع كتف صاحبه وقاله..
/منور حبيبي..في السيارة تلقوا المعلوم...
ولف ومشي بيطلع وهو يتصل بصاحبه..
🍃🍃🍃🍃🍃
"وجعوني صح لكن ماكنتش نبي خوك يدخل"
مناسك؛مالك واخد ع جو هدا فيزو..
فوزيه بقلق؛لايابنتي جو التهديدات والقتل ماعنداش فيه..
تنهدت مناسك وقالت..
/هكي ولاهكي كان حيدخل..ماما راهو مالك يحب مروة واضحه قباله..
تنهدت فوزيه وقالت؛عارفه..عمري ماريته هكي حاله الابعد ماخشت مروة لحياتنا..
سكتت مناسك وهي تفكر بحزن في حال خوها..
تأكدت من حبة لمروة بس السر اللي مدرقه حساته حيوقف بينه وبينها بقوة..
🍃ومروة في هالوقت كانت تراجي خبر منهم..
هي وامها وخواتها..حتى جيرانهم واحبابهم..
☘في الكوجينه..
فردوس بضيق؛مارقدت الا بالسيف..
طوبى تنهدت بضيق بعدين خدت حبة المكمل الغذائي وشربت الميه..
فردوس؛المهم توا انحلت المشكله في المركز..
طوبى وهي دس في الدوا..
/اليوم بس لكن بعدين كيف بيصير يوم الخميس عندها زوز عرايس..
فردوس بضيق:استغفر الله العظيم..العمام اللي هكي.يعطيهم ربي مايمسحهم..
طوبى:ع سيرة العمام..عمك يبي يتزوج خلاص.
فردوس بضحكه:ايه قالت عمتي..جدك قاله خودها في حوشك حوشي ماتخشاش مراة بعد صفيه..تهكما كملت تقول..ع اساس صفيه فيها خير من لما قعدت عند ولدها لاعاد دورت ولاعدلت..
طوبى بلامبالاة؛زي بعضه..ومشت طلعت من الكوجينه وهي تقول..تصبحي ع خير..
تنهدت فردوس وقالت..
/قدامك كل خير..ولحقتها حتى هي بعد ماطفت ضي الكوجينه وخلت المخفي مفتوح...
🍃🍃🍃🍃🍃🍃
تاني يوم..
مع ساعات الصباح الاولى..
كانوا طوبى واريج والاء يوتوا في ارواحهم بش بيمشوا لكلياتهم..
خشت طوبى للكوجينه وهي لابسه عبايه بنيه وشاربه بنفس اللون بس اخف..شافت بنتها في القعماز ضحكت وبدت تغني..
ياخواتي ياخواتي..ياخواتي بحبها دي حبيبة امها..
فردوس خشت عليها وقالت بضحكه..
/عاجبها جو الكوجينه..
طوبى وهي تاكل في التمر قالت بغرور مصطنع..
/بتجي لأمها فالحه..
خشت اريج وهي تقول..
/العب..
ضحكوا..
وجنه تسمع فيهم وتشوف في خيالاتهم وصوت امه كل ماتدوي كانت تركز معاه..
الاء فاتت من قدام الكوجينه وهي تقول..
/طلعت..
فردوس:تعالي افطري.
ماردتش الاء...
فردوس بضيق:ااه من هالبنت ااه..
قربت طوبى لبنتها باستها من جبينها وهي تقول..
/باي ماماتي...وخدت زوز تفاحات مغسولات وقالت بإستعجال..السلام عليكم..وطلعت تجري.
اما اريج بعد مادارت لروحها نص شاميه طلعت تجري بيه وهي تقول..
/سلام..
فردوس بعد ماتبعتها بعيونها قالت..
/ربي يفتح عليكم..
تنهدت من قلبها بعدين غيرت نظرها لجنه..ابتسمت وكذلك كانت ابتسامه من وسط القلب وقالت..
/مسمحها ومغلاها نجيلي هالوجيه...
🍃وبرا من الكوجينه في دار المعيشه..
كانت فايزة راقده بتعب..لكن بناتها فايقات في مراقدهم وكل وحده فيهم كانت خانقتها العبر..بدل مايكونوا في مدارسهم اليوم انجبروا يقعدوا محبوسات لأجل غير معروف...
🍃🍃🍃🍃🍃
الساعه 10:30صباحا..
في باحة كلية التربيه..
عبير:في عطلة نص السنه..
طوبى:قريب..
عبير:ايه..بعد مانتم الفصل بنكمل عنده..
طوبى:وكان راجيتو لين تخرجتي في مرة وحده مش خير؟
عبير بضحكه:هو هكي يبي..وحتى اني هكي نبي..
ضحكت طوبى..
عبير؛بيبو تجيني لعرسي ولا..
طوبى غيرت نظرها القدام وقعدت محتفظه بصمتها.
عبير:ياريت يابيبو تجي..
طوبى شبحتلها وقالت..
/حتى كان ماجيتش قلبي يقعد عندك.
ابتسمت عبير مجامله..وطوبى ردتها وغيرت نظرها القدام وهي تفكر...
🍃🍃
ولجامعة طرابلس قاطع _ب..
في مدرج من مدرجات كليه الاقتصاد..
كانوا اريج وصاحبتها مقعمزات يهدرزوا..
وفي نص الهدرزة..شافت صاحبتها للساعه وقالت..
/شن بيفوت المحاضرات..
اريج:مازال عشرة دقايق..خل نمشي ناخد بيروات جري جري..
وناضت بشنطتها وهي تقول:حوزي الكرسي..
صاحبتها بضحكه؛باهي..
طلعت اريج تجري..ولما قربت توصل في الباب لفت وعطت للباب بظهرها وهي تقول..
/نجيب ميه..
:ايه جيبي جيبي..
اريج هزت راسها..والتفتت بتطلع..
ع خشة حد وين تلاقت هي وياه جمدت في مكانها..
زي ماهو معاش قدر يقدم خطوه لما عيونه جو في عيونها..
كل من فالقاعه وجه نظره ناحيتهم..
وهما الزوز عيونهم مابتش تسيب بعضها..
هما يشوفوا في بعض شبه يوميا بس كانوا بعاد كل حد فيهم.عايش دور التجاهل والتناسي وفرحان بيه..
هو يقول..
اللي ينسانا نسيناه واللي يهوانا نهواه..
وهي تقول..
ولافارق عندي ومعاش يعنيلي شي..
بس فهاللحظه كل شي كل شي عيشوا انفسهم فيه بالغصب تلاشى وراح....
عيونها بانت فيهم لمعة الدموع وشويه شويه عبوهم..
اما هو فكانت نظراته مليانه كلام كلام ياكلام..
نظرته توجع توجع هلبه من الوجع اللي فيها...
هو خاف ينفضح قدامها استاقظ وتباعد عن الباب..
لما اختفوا عيونه عن عيونها هي استاقظت بلعت ريقها وجت بتطلع..
هو خش وقدم كم خطوه بعدين وقف وقال..
/وين ياطالبه..
الطلبه كلهم شبحوا لأريج..
هي كانت حاسه روحها بتنهار لكن بكل قوة تماسكت وقالت..
/مازال عشرة دقايق..
هو كمل طريقه للطاوله وقال..
/بعد العشرة دقايق ماتجيش ماتخشيش..سكري الباب..
هي هزت راسها..وسكرت الباب..
ومشت كم خطوة ثقيله ودموعها ينزلوا..
بعدين مسحتهم وسرعت خطواتها لين ولت تجري..
ومش عارفه كيف بسرعه..خدت البيروات من المكتبه..وبعدين الميه من الكافتيريا.
وتجري وتشوف للساعه..
خلاص مازال دقيقه..وين وصلت فيهم للباب عترت وكانت حطيح بس شدت روحها..ودقت ع الباب..
وكانت تاخد في انفاسها بشي من الصعوبه..
انفتح الباب واللي فتحه وحده من الطالبات..
خشت بدون ماتشوفله..لكن كانت تسمع فيه يهدرز والطلبه يضحكوا..
وصلت في مقعدها وقعمزت وصاحبتها تشوفلها بحزن..
اما هي حطت الشيش ع الطاوله وهي مازال تاخد في انفاسها.
وهو متجاهلها تجاهل ظاهري تام وقال..
نضال؛هي نبدوا اول محاضرة طول بنخشوا في الجديات وقتنا ضيق والمنهج مش شويه..جبت معاي شيتات للمحاضرة..تعالي ريمه وزعيهم..
ناضت الطالبه ومشتله خدت منه الشيتات..
هو بإبتسامه قال..
/نبيك زي السيمستر اللي فات الاولى 100%
هي بإبتسامه:ان شاء الله استاذ.
ومشت الطالبه توزع ع زملائها في مذكرات المحاضرة.
اريج كانت تبي تشبحله تبي تشوفه وخلاص..
قامت عيونها بحذر وشبحتله..
لقاته لاهي باللاب توب متاعه..
نزلت منها دمعه غصب عنها طول مسحتها وقالت في نفسها..
"خيرني ياربي شن جاني..شن جاني!"
وصاحبتها معاها بنظرها وهي موجوعه عليها...
🍃🍃🍃🍃🍃
واختها في كليتها مقعمزه مع وحده من زميلاتها اللي صار بينهم تقارب مؤخرا..
كانوا يحكوا عن القرايه ومايخصها..
وعيون وحده من الصديقات الكارهات عليها كانت توتي في روحها لحفلة شماته حتبداها بعد شويه مجرد ماتوصل فيها..
ومشت ناحيتها ووصلت فيها وقالت..
اكابر:لولو..
قامت آلاء عيونها فيها وهي تشوفلها بإبتسامه بارده قالت..
/ياهلا..
اكابر:شن جو بيبي؟
الاء:حلو زي وجهي..
ضحكت البنت اللي جنبها..
اكابر:امم من غير ماتقولي..تنهدت تهكما وقالت..باركتي لمهند..
الاء:باركتيله انتي؟
اكابر كانت تحاول دير روحها بارده وهي تقول..
/ايه وهدرزت حتى ع مرته الصراحه الزوز عساسيل وطالعيم ع بعض هلبه..ايه حقه اليوم سافروا لتركيا شهر عسل..
آلاء:ربي يهنيهم وعقبالك..
اكابر:ويعوضك خير بيبتي..
عيون الاء تعبوا دموع لكن قعدت محافظه ع ابتسامتها البارده..
اكابر:بايات..ولفت ومشت...
آلاء بإزدراء:مريضه..
:فوتيها وخلينا منها..قوليلي شن رايك في فكرة الكورس تخشي؟
الاء وهي تشوفلها قالت:نشوف وضعي ونرد عليك..
:تمام...
🍃🍃🍃🍃🍃
الساعه 2:00بعد الظهر..
ع طاولة الاكل كانوا مجتمعين يتغدوا..
لما خلاص قربوا يكملوا هي قالت..
نجاة:اختك قالت اطلعي خودي لبس ليك ولجوري لعراس الجيران وولد خالك..
الجالي هز راسه وقال؛تمام العشيه نطلعوا..
وناض ومشي من حداها..
هي ابتسمت وشبحت لصغارها اللي كانوا ياكلوا..
شافت بنتها تشوفلها وهي مبتسمه ردتلها الابتسامه بحركة انفها..
ضحكت جوري..
وقعدت امها تفكر..وسرحت بتفكيرها لبعيد..القدام واللي ناويه ديره فيه...
🍃🍃🍃🍃🍃
الساعه 5:30عصرا..
"سلم بنياتي ني..نجي بنياتي ني
كبر بنياتي اني...ااه محلا ريحتها احلا من احلا ريحه"
وطوبى تلاعب في بنتها..
وتاله وسدرة المهدي يتفرجوا عليها بنظرات كلها شغف..
وفايزة اللي كانت متكيه تشوفلها بإبتسامه باهته وبين عيونها سدرة لما كانت تلاعب في طوبى وتغنيلها..
فايزة الايام الاخيره حاسه بشوق غريب لسدرة حاسه بفقدانها اكثر من أي وقت ومش عارفه علاش هالفترة هادي بس بدت تحس بالمشاعر...
وتخش عليهم مطيره وهي تقول..
/مرت الساحلي وكنتها جو..
ناضت فايزة بسرعه ومشت طلعت من الصاله جري..
اما طوبى ضمت بنتها وحطت يدها عليها وقعدت تقرا وهي تسمع في فردوس ترحب بالجارات..
مطيره:هيا تاله سديره ماماتي نوضوا للدار..
الزوز ناضوا ومشوا طلعوا بسرعه..
ع خشة فردوس مع النساوين وهي تقول..
"تفضلوا تفضلوا"
🍃وفي دار المعيشه..
كانوا البنات مقعمزات حدا التلفزيون..
كل وحده فيهم فعالم بروحها..
ماعدا تاله وسدره اللي وحده فيهم حطت ع قناة رسوم متحركه وقعدوا يتفرجوا الزوز..
فجأة رن تليفون مروة..
كلهم شبحولها..
وبلهفه فتحت الخط وردت..
مروة؛هلا مناسك..
"هلا مروشه شن جوكم اليوم"
مروة:الحمد لله ماشي الحال..
"اليوم ماكانش في حاجات مهمه"
مروة:متأكده مناسك؟
"والله مافي حاجه مهمه مراجعات بس.."
مروة:باهي كويس..
"مروشه لتوا..ماصار شي في هداكا الموضوع مالك روح متأخر امس واليوم من الصبح طلع وقال لبوي بيعطل وماخبرنا بشي"
مروة بأحباط:مش مشكله يامناسك مخلينها على الله وهو اللي يفرج..
"ياريت لو نقدر نريحك يامروة"
مروة ابتسمت بألم:حبيبتي نسوكه مطيب قلبك..
وخواتها واريج الاء انتابهم شعور بالحزن والاحباط فوق اللي هما فيه..
وسدرة تشوف لبنات فايزة بحزن ع حالهم...
🍃وفي الصاله..
:قلنا لازم نستأذنوكم..
مطيره:ياوخيتي ربي يكملكم ع خير ويهني وليدكم..
:آمين بارك الله فيك..
طوبى:الحزن عندنا حني بس ياخالتي وفي الشرع مايجوزش فوق ثلاته ايام..ديروا عرسكم وافرحوا فرحتكم وماتحطوا في بالكم شي..
ابتسموا عمتها واختها وهما يشوفولها..
:الله يكملك بعقلك...خسرك ولد شنيبه وبدل الذهب بالفالصو..
:صحة وجه بعد صحة وجههم ماريتش يطلعوا ويخشوا عادي وتوا وحني جايينكم ريناهم طالعين وايديهم في بعض ويفتحلها في السياره لاحشم لاجعرة..
مطيره وفردوس كانوا يشوفوا لطوبى بضيق وغضب.
وطوبى تسمع وكانت تبان عاديه وكأنه اللي يحكوا عنه مايخصهاش والله بس يعلم باللي قاعد يصير داخلها..
:وكانهو يبيها من الاول علاش يبلوا في بنات الناس اهو مشي مشي وفي الاخير ودار مافي راسه وخداها..
طوبى:عرسكم اسبوع كامل ولا ايام معينه..
هما قعدوا يشبحولها شويه بعدين العزوز قالت..
/اسبوع كامل ان شاء الله..
طوبى بإبتسامه:الله يبارك..ربي يكمل ع خير..
:تسلمي..
ناضت طوبى ببنتها وهي تقول:نخش نحطها داخل ونجي..
ومشت طلعت ببنتها من الصاله..
:خسارتها والله خسارة وحده زيها يصير فيها هكي.
فردوس:ربك فوق وماينسى شي..
بأصوات متقطعه قالوا..
"صدقتي..ايه والله"
ومطيره التزمت الصمت لأنها كانت واصله لأقصى مراحل الغضب وكان تكلمت مش حتعرف شن يطلع منها..
🍃🍃🍃
وفي مطحن الزعيم..
المهدي:لقوه الصبح ملوح قدام العمارة واكل طريحة موت..
اشرف:صحه لإيديهم..
المهدي:مش معروف لتوا من دار فيه هكي في من قال نفسه اللي يبي منه الدين..
اشرف:باهي قداش دينه..
المهدي:تقريبا 100الف حاولت نوصل فيه صاحبهم قلت نعطيه نصهم ونتفاهموا ع موعد نكمل فيه الباقي لكن مالقيتلاش اثر.
عقد اشرف حواجبه بإستغراب وقال..
/معقوله يكون في حد تاني خاش في الموضوع!
المهدي:مش عارف..غالبا هكي..
اشرف قعد ساكت وهو يفكر..
والمهدي كذلك كان يفكر معاه...
🍃وبرا من المطحن قدام حوش المهدي..
درست "اللاند كروزر" نزل منها صاحبها وبعدين سكرها ومشي طول للحوش..
شافه ربيع وصى واحد من اللي يخدموا عنده ع المطعم بعدين لحقه...
🍃🍃
وصل عبد القيوم في باب الشقه فتحه وخش ولما جي بيكسره ينقز ربيع قدامه..
ربيع بضحكه؛يامرحبا..
عبد القيوم مشي خش بدون مايتكلم..
خش ربيع وسكر الباب وهو يقول..
/وين مغطس؟
عبد القيوم في الكوجينه..
/خدمه..
خش عليه لقاه واحد تفاحه ياكل فيها قاله..
/سأل عليك سامي..
هز عبد القيوم راسه وهو ياكل..
ربيع:شن يبي منك..
بلع عبد القيوم وقال..
/ياسيدي يبيني نشارك في معرض لخطاطين ليبين هو بيصوره وشاد فيا نشارك لأني تارقي..يعني.تارقي وخطاط باللغة العربيه حاجه فريده كيف ماقال هو..
ربيع برفعة حاجب:راك تقول قلت لا!؟
عبدالقيوم ؛لا وافقت لكن مش متحمس الشغل اللي شافه مش قوي واجد بش نخش بيه معرض مرة وحده..
رفع ربيع ايديه افقيا وقعد يحرك فيهم ويهز في راسه يمين ويسار وهو يقول..
/يامتواضع انت..ياملك التواضع يازعميته هدا اقل ماعندي وجو وحركات..
وعبد القيوم  يهز راسه بإيجاب وهويقول بعد كل كلمه..
/اها..اها...اها..
ضحك ربيع وقاله؛فوته الجو هدا ياراجل مليون مرة نقولك دير مشروع راك مش عادي..
عبد القيوم قعد ياكل في التفاحه بدون مايرد..
ربيع ضيق عيونه وقال..
/في حاجه تانيه شاغلاتك..
بلع عبد القيوم ولوح بقايا التفاح في القمامه بعدين شبح لصاحبه وقال..
/تزعل مني كان قتلك نبي نقعد وحدي!؟
ابتسم ربيع وقال..
/نهائي..ع العموم بيناتنا تليفون..
ابتسم عبد القيوم وهز راسه ..
ربيع:هوينا..
ومشي من حداه..وقعد عبد القيوم في مكانه لين سمع باب الشقه انفتح وتسكر..
بدت ع وجهه ملامح الغضب والضيق وطول مشي طلع من الكوجينه بطريقه لداره..
🍃🍃🍃🍃🍃
"زي ماتوقعت هو الشريك الحقاني للمطحن"
خدي مختار الورقه وهو مبتسم بنصر ويقول..
/شفته كيف دلنا عليه بروحه قعد يسأل ويدور عليا مالقانيش لكن خلاني نلقاه..تعرف..جديات الخال داهيه كيف تحايل ولعبها صح..لكن ع مني..كان غيره اشطر..
رضا:الخطوة التانيه شن حتكون..
مختار:هدوء تام الحال يقعد كما هو عليه لفترة وبعدين نخشوا في اللي بعده..حط الورقه قدامه وقال..
/اني توا طالع عندي اجتماع مهم..برا وصل لصابرين قولللها راجل اختك الكبيره ولى عاطل عن العمل..
ومشي بيطلع وهو يقول..هي هكي تبي..وعندها حق.
وطلع من المكتب متاعه..
طلع بعده رضا وهو مستاء سكر المكتب وقعد وراه لين شافه طلع  من الشقه ومشي طول للكوجينه..
☘صابرين:كانوا يحبوا بعض..
الشغاله:هي بتحبوا بس هو لا..يعني عادي بيعاملها حلو وبيحترمها ويعزها بس حب ماشفتوش منه ليها بس هي كان باين ليها قوي..
صابرين تنهدت وقالت..
/هو هكي..ينحب ومايحبش..باهي علاش طلقها..
"وانتي شن دخلك"
شبحتله بحده من فوق لتحت..
رضا:هادي خصوصيات مش للكساد يافريال..
سكتت الشغاله وهي منحرجه..
صابرين بحده:وانت شن حشرك مالكش علاقه ندووا فاللي نبوه انت خليك في حالك..
رضا قدملها وقال..
/قتلك قبل ماتقارنيش نفسك بيها مدام فاتن مايسواها حد عنده..انتي زيك زي اي حاجه يمكلها امتى مايبي يستعملها وامتى مايبي يفوتها..
الشغاله شبحتله بصدمه..
اما صابرين ناضت وهي تقوله بغضب..
/كلمة زياده نقتلك ياحقير..ع خاطر انت تسوى ولاليك قيمه انت تبع مش اكثر زي كلب الحراسه بالزبط..
وتجيها صفعه من قوتها حست بدوخه لدرجه ان خرصتها"حلقها" طاحت وحلمة ودنها وخدها نزل منهم دم..
الشغاله وجعتها صابرين الصفعه كانت قويه هلبه..
رضا بغضب هادئ قال..
/انتي عند الاستاذ ماتسويش عفسة كندرتي وبري اسأليه وهو يقولك يارخيصه..يامنحطه ياتافهه باب رزق اختك سكرتيه ان شاء الله تكوني ارتحتي..
وجهت نظرها ليه وهي تشوفله بنظرات كره مليانه دموع..
هو بغضب وازدراء:وسخه.
ولف ومشي طلع من حداهم..
الشغاله قعدت تشوفلها بألم ومش قادره تتكلم...
وهي نزلت راسها ومشت بسرعه طلعت من الكوجينه...
🍃🍃🍃🍃🍃
الساعه 8:30مساءا..
في مقهى مالك...
كان مقعمز ع وحده من الطاولات هو وصاحبه..
معين؛انقرص قرصه باهيه لما سمعوا جماعته باللي ناوي يديره خزرطوه وخلوه يصرف نظر ع القصه كلها لكن قعد شاد في فلوسه اللي يبيهم وهما جو معاه في هادي وقالوا حقه..
مالك:قداش قال يبي؟
معين:100الف..
مالك؛الكلب هداكا مفروض مات..
معين؛مالك قولي من هما هادم اللي دير ع خاطرهم في هدا كله..
مالك عقد حواجبه وقال..
/ناس تهمني..
معين؛مولي دس عليا يامالك من لما عرفتك عمرك مادرتها معاش تأمن فيا خلاص!
مالك؛فوتها الدراما متاع الهنود متاعك وخلينا في المهم مالي يدك من خوتك؟
معين بدهشه؛من جدك تسأل مالك خيرك!؟
مالك هز راسه وقال:ok..ok..خلاص الفلوس ندبر فيهم..
معين:تبي نساعدك؟
مالك؛لا صحيت ساد اللي درته لتوا..
معين:تمام يامالك براحتك سيورك تجي وتحكي..
مالك بضحكه؛شن رايك نعشيك ع حسابي
معين:وغصب عنك مانخدكمش بلوشي..
مالك بضحكه:تافه..
🍃ورفع مالك صاحبه وعشاه في وحده من المطاعم..وبعدين روح للحوش..
لما روح..قعد مقعمز في الجنان وهو يفكر..
عقله مع مروة زعمه شن صاير فيها توا؟!
اكيد خايفه..اكيد تبكي..اكيد مقهورة..
كان حاس بقلبه ينحرق حرق...اول مرة يهمه حد لهالدرجه اخطا عيلته..
هو بدي يحس بأكثر من هكي مع مروة..
عيونه جو ع سيارته اللي يعشقها وماصدق خداها اخر موديل وجاته من برا بالريق اليابس زي مانقولوا عنده غيرها زوز بس هي احبهم واغلاهم..
لكن عاد في شي اغلى منها ولايغلا عليها!؟
ولاشي..
ابتسم بعدين تنهد وقال..
"اااه لو نعرف اخر اللي اني فيه بس"
🍃🍃🍃🍃🍃🍃
تاني يوم..
الساعه 10:00صباحا..
جي ع بالك مختار يفطر في جنان عمارته السمي مليانه عيونه وريحة الخريف المعبيه الجو.
هدا اللي يحبه مختار وينسجم معاه..
نزل صابرين يش تفطر معاه..وعاد صابرين نزلت وهي بكامل اناقتها لأن عندها شغل بتمشي تكمله لمختار وكان ضروري جدا لكن عاد..تفوت اللي داره رضا مستحيل!..
رفعت شعرها فوق قصدها بش يشوف اثر الصفعه..
وهو شاف وانصدم وقاللها..
/خيره وجهك!؟
صابرين شبحت لرضا بحده..
وهو مقعمز في مكانه يشرب في قهوته ولاهي بتليفونه..
استفزها وخلاها تقول..
/اسأل هداكا..
التفت مختار وشبح لرضا شويه بعدين ناداه..
"رضا"
حط فنجانه وناض ومشي ناحيتهم بدون مايشوفلها..
وقف ع مختار وقاله..
/نعم..
مختار:ضاربها..
رفعت حاجبها..
رضا:ايه..
مختار:السبب..
رضا:خشيت عليها الكوجينه لقيتها تسأل في فريال ع خصوصياتك..
مختار شبح لصابرين وهي بدي ع وجهها الخوف..
رضا:سكتتها طولت لسانها رديت عليها باللي تستاهله..
مختار قعد يشبحلها.
هي بلعت ريقها وقالت..
/مش هكي..
قاطعها وقال:رضا مايكذبش..
قامت عيونها وشبحتله بحده لقاته يشوف لمختار وهو مبتسم ابتسامه خفيفه..
صابرين:باهي تمام اني اسفه بس ياريت تنبه عليه معاش يدخل فيا..
رضا:ابدا ولا مرة دخلت فيها ندوي معاها لما تتعدى الحدود بس..
مختار:عارفك..صابرين طولي لسانك ع رضا مرة تانيه اني نحاسبك..اللي تشوفي فيه قدامك هدا ذراعي اليمين قيمته من قيمتي ياويلك تقللي من احترامه مره تانيه..
رضا بشي من البطئ وجه نفسه ناحيتها وشبحلها بإبتسامه قهرتها وغاظتها واستفزتها..وغرت عيونها الخضر بالدموع..
مختار:مايصيرلكش مش الشغل اليوم...ع العموم اني تو نتصرف..ناض وقال..رضا..
ومشي ومختار..
ورضا بعد ابتسم نفس الابتسامه مرة تانيه في وجه صابرين بش يزيد يقهرها لف ومشي ولحق مختار..
وصل في السياره وركب وهو يشوفلها كيف ماشيه تجري وخاشه العماره..
ابتسم ع جنب وقال في نفسه "المهم ماتمشيش"
بعدين شغل السياره وتحرك طول...

#الحرب_البارده
#طوبى

...يتبع...