قيود عشك الشيخ

قيد السادس عشر

لو حاجية?!! شجاب صار باخوية هاا شراح يصير بية اخوي حسن ركبتة بين ادين سرمد شراح يكون لو حاجية وطلعت مني حرف واحد

اخخخ كلبي ياذيني فاطمة يمي لزمتها واستفسرت عن الصار بيناتهم وحجتلي الصار كلة غميت كصتي بقهر وتاكدت هاي خطة من ثقيف علمود يخليني احجي

شوية واجتني امي كالت راح يروحون وتتطلب مني حتى اروح اودعهم حجيت بتعب::- يمة فدوة اروح لطولج انا فدوة كليلهم نايمة ولله تعبانة حيل تعبانة ما بية حيل اكوم بعد

ما قبلت واصرت الا اكوم اسلم عليهم::- كومي يمة فشلة رجلج هذل شلون اكلة نامت بدون لا تودعك مو حجي هذا كومي ما ناقصني حجاية زايدة من ابوجن البية كافيني كومي يلا فشلة من الولد واكف بالباب

هزيت راسي وكمت بملل وتعب جسمي لهسة يوجعني وتعبانة ورجلية لساتها بيهن الرجفة ما راحت وصلت يمهم لكيتهم بالطارمة هو وسلام وابوي وياهم واكف

ابتسمت وحاولت ابين طبيعي عاف سلام وابوي وتقدم اتجاهي ابتسمت بوجه تنهد وحجة::- اسف عن صيحت عليج خوما زعلتي

ابتسمت ع حنيتة::- لا ما زعلت

::- خوش انا حجيت وي الوالد وكتلة انشالله الاسبوع الجاي العرس

عقدت حواجبي بعدم تصديق::- شنو الاسبوع الجاي مو ع اساس سبوعين

::- مالها داعي المماطلة وابوج اشوفنة ع اعصابة يسايرنا وبعدين غير طلبتي مني اقدم موعدة اذا ما تردين كليلي اجلة

ابتسمت::- لا هذا هو بكيفك

ابتسم وكرص خدودي وطبع قبلة ع راسي::- يلا رايحة انا اي شي تحتاجي اتصلي وكليلي ديري بالج ع روحج واكلي زيو

هزيت راسي باي بابتسامة هو راح وانا تنفست براحة حسيت جنت حابسة انفاسي كلها

وهيج مر يوم وانا لساتني بصدمتي بحيث كضيتة كلة نايمة لا اكل ولا شرب من الخوف وهول الموقف

ثاني يوم اتصل وكال جميلة وخالتي راح يجون الكم جهزنا الغدة

وفعلا اجو اول ما دخلت جميلة للبيت شفتها وطكيتها ركضة الها وهي فتحت اديها الية وحظنتني وانا حظنتها واحنا نضحك

سلامنا جان حار كعدنا سوة ع غدة وشقة وضحك حجت::- ول خايبة شمسوية لاخوية دوهتني احاولة شوكت لحكتي وانا قبل اكللجن عدلي بدلي تكللي لا الشيخ يقرالي قصة

ضحكت والبنات يضحكن وياي حجيت::- جا شعبالج انا زهرة

::- زهرة هي ام الوصخ ول خايبه صعدي لريلج مكابلتني وكاعدة

ضحكنا حجت::- الحجية تكول ما كدرت اجيج وتتعذر منكم الله شاهد ما تكدر تكوم وتكعد كوة

حجت امي::- لا ولله ما قصرتو وحشاكم من التقصير