#النقيب_حازم -
#البارت الاول
#النقيب_حازم (فصليه_ابن_الشيخ)
البارت االاول
النقيب حازم
مرحبا
اتمنى تنال اعجابكم وهي باللهجة العراقية
في بغداد الساعة 7 صباحا في بيت يعمه الهدوء وتغرقه راحة الريوك العراقي المشهور (كاهي وكيمر والجاي المهيل )
نورس:ترف...ترفة يلا كومي حبيبتي راح تتاخرين علة دوامج
ترف:اي ماما كمت..صباحوو يا احلى ام بالدنيا
نورس:صباح الورد على عيونج يلا حبيبتي كومي وكعدي اختج وياج بينما اصب الريوك
"حاضر ماما " حجت ترف وهية توخر الغطى عنها وتروح لجوري
ترف: جوري ..جوري. جوووووري
جوري: ها ها شكو منو مات وشوكت 😮
ترف خربت من الضحك على اختهة
"كومي كومي محد مات بس راح نتاخر عالدوام " حجت ترف وهية اعوف اختهة وتروح تطلع ملابس الدوام
اعرفكم عن نفسي اني ترف عمري 19 أول سنه كلية اداب قسم فرنسي
اني حلوة الحمد لله ماخذة جمال امي لان ماما كردية اني بيضة وعيوني لون اخضر طولي حلو 160 وزني 60 يعني شكلي مناسب
اني هادءة وماحب اتكلم هواي وما عندي اختلاط باحد من دوامي للبيت ومن البيت للدوام
اني البنت الكبيرة ماعندي اخوان اولاد عندي بس اخت وحدة اسمهة جوري 17سنه خامس علمي وهية هم حلوة وتشبهني فقط بلون العيون هية جريئة مو مثلي هادءة بالعكس هية اللي تخلي البيت كلة نشاط وصوت ضحكتهة يملا كل اركانة
جوري
بابا وماما الحمد لله عايشين بابا علي 48 سنه محاسب ببنك شخصيتة قوية وكولش يحبنة ومدللنة وما يقبل بالغلط ويعتبرنة كولشي بحياتة
ازوج هوة وماما بعد قصة حب طوويلة وبعد عناء يلا اخذهة بحكم انو اهلهة مينطون لعرب
وماما نورس38 ربة بيت اعتبرهة صديقتي قبل متكون امي ماضم اي شي عنهة طيبة وحنونة عمرهة ما قست علينة
بيتنة وحياتنة هادءة جدا ماكو شي معكرهة
كملت سبح وبدلت نزلت جوة لكيت بابا يقرا الأخبار عالنت وماما تصب جاي وجوري تجيب الريوك وية امي
"صباح الخير عليكم "
كلهم ردو:صباح النور
بست بابا وكعدنة ناكل وجوري كل شوي تحجي شي يضحكنة
كملنة وراح بابا لدوامة واني اخذت جوري بطريقي اوديهة للمدرسة لان اني عندي سيارة
وصلتهة وكتلهة تدير بالهة على نفسهة
ورحت لدوامي
هاذة روتيني اليومي
في مكان ما في محافظة ميسان في بيت اقل ما يقال عنه قصر من قصور حكايات الف ليلة وليلة
ينام بطلنا بغرفته الباردة المظلمة
يفز وهوة مزعوج يتوعد للي تجرأ يدك الباب هسة
:اليوم ناوي على موتة اكيد اللي اجة
فتح الباب وهوة ضايج
"خير شكو"
غدير:الشيخ يريدك ضروري
:ماشي جاي
نزلت غدير مثل الطلقة من خوفهة
اعرفكم
اني النقيب حازم ابن الشيخ حاكم شيخ عشيرة.......
عمري 32 سنه خريج إدارة واقتصاد شكلي طويل وضخم اني من النوع اللي اهتم بشكلي وصحتي بحكم دوامي
عصبي وماحب الغلط اللي يمشي عدل وياي احترمة والينعوج اعدلة 😡
كلهة تهابني وتحترمني
حازم(تخيلوه بدون لحية بس شوارب لان ضابط 😇)
الوالد حاكم 67 سنه عقلة يوزن بلد ماكو حجاية تنردلة الكل يسكت بوجودة والكل ياخذ شورة ازوج الوالدة عن طريق بيبيتي الوالدة فضة 53سنه الكل بالكل هية جنتي
عندي اخوان اثنين حسن 30 سنه ملازم أول وخريج هندسة حاسبات مزوج من 3سنوات من سعاد بت عمي وللاسف طلع عقيم ميصير عندة جهال
حسن
حسن مثلي اعصاب وميتحمل خاصة من عرف نفسة عقيم صار ما يتحاجة بس طبعا وية الشيخ والشيخة غير شي
واحنة هم مقدرين وضعة
مرتة هاي قصة لوحدهة وحدة طايحة حظ تريد تحرك البيت بسمهة ويومية نسمع عياطها هية وحسن بسبب لسانهة حجاية والثانية وعيرتة بعقمة و هوة متحمل لان بت عمة وعيب واحنه تكول هية صابرة عليه رغم مرضة
اخوية الثاني أمير 25 سنه انسان فاشل بكلشي بالدراسة وبالشغل مفاد وياه لا حجي ولا كتل جم مرة ومرة يسوي مصيبة ونسدهة والعالم تحسب حساب ابوية وتحترمة وينسد الموضوع
عندي سناء اختي الجبيرة مزوجة ببغداد
واخر العنقود غدير 18 سنه مدللة الشيخ والشيخة بس اني كلش شديد وياهة ماريد اخربهة بالدلال الزايد والحجي اللي اسمعة واللي يجني عالفيس خلاني حيل اتشدد وياهة حتة من المدرسة لثالث متوسط وماخليتهة تكمل وحسن وياي بهالحجي
موبايل بعد حجي هواي يلا خليت عدهة وممنوع اي برنامج ينزل بيه طبة وطلعة الهة بالاسبوع مرة لان خطية بالبيت دايما هم تضوج بس وية واحد من الولد لو وية ابوية او امي لانها صغيرة وحلوة العين عليهة
اني مو معقد بس اخاف على أهل بيتي بحكم منصبي ومنصب اخوية وابوية كلشي يصير الدنيا مو امان
لبست الزي اخذت بيريتي وموبايلي ونزلت لكيت الشيخة والشيخ وحسن وسعاد وغدير كاعدين يتريكون صبحت عليهم وبست ايد الشيخ والوالدة
حازم:غدير ستكان جاي من يمج
غدير:صار خوية
حازم:آمر شيخ كالت غدير تريدني
شيخ حاكم:اي وانا ابوك خلص جايك والحكني للديوان انته وحسن
حسن وحازم: انشاء الله
راح حازم وحسن للشيخ
حازم :خير شيخ ضل بالي
حسن:كول يابة شصاير
شيخ حاكم: انة تعبت حيل من اخوكم يومية سالفة ويومية حارك دمي
حازم بعصبية :شسوة هالحيوان
شيخ حاكم: يريد يروح لبغداد لعرس صاحبة وانتو تدرون هاذة مو خوش آدمي يروح لبغداد وهم يسويلة سالفة
حازم:وهوة وين هسة
شيخ حاكم: طلع من الصبح قبل ما تكعدون
حسن: اني اربيه لهالحيوان اليوم انزع جلد من جلدة
حازم: لتخاف شيخ ولا يضل بالك اني اخلص شغلي واروح اني وحسن وراه
شيخ حاكم: اي روحو وجيبو حتة لو سحل
حسن وحازم:تحت امرك شيخ
حازم:من رخصتك شيخ اروح لدوامي
شيخ حاكم: مرخوص بوية
***************************
نرجع لبغداد
ترف
رجعت من الدوام ب3 الظهر دخلت لكيت عمي صادق و ياسر ومصطفى ولدة
طبعا عمي عندة 3 ولد
احمد الجبير 30 سنه عايش بالخارج ومزوج
مصطفى 28 خريج هندسة وخاطب حبيبتة وياه
بالجامعة
ياسر 23 يدرس خريج علوم سياسية بس ماكو تعيين عندة كوفي شراكة هوة و ولد صديقة
اني وياسر كولش اصدقاء احسة اخوية اللي الوقت سوة نحجي عن كليتي عن كولشي تقريبا يخص حياتنة بس مجرد اخوة اني مو مرتبطة ولا عمري فكرت بهيج سوالف
سلمت على عمي وعلى مصطفى وسألت عن خطيبتة
ترف:شلونك ياس عاش من شافك
ياسر: ولج جكمة البارحة نحجي
ترف :هاي عليمن جكمة شوف عمو شيكول صدك اني جكمة
حجتهة بدلال
صادق:هههههه يا كلب عمج يروحلج فدوة غير كمر انتي
اجت جوري تصرخ
جوري : اي عيني ترف كمر واني شنو بت البطة السودة
صادق وعلي وياسر ومصطفى :هههههههههه 😂😂
صادق:ولج ام لسان علكيفج
ترف :شنو هالاناقة ياسر
ياسر:اي والله عرس صديقي اليوم رايح اباركلة ومناك نطلع اني والشباب
ترف: هاا مبروك يوم الالك
جوري : يوم الالك يسوو
ياسر:😡تدرين ماحب هالدلع
جوري : عابت فوكاهة وين لاكي كيوتة مثلي تدلعك
كامت ترف واخذت جوري قبل ما تطور الأمور مثل كل مرة
استأذن ياسر يروح حتة ميتاخر
راح ياسر ومصطفى طلع وية خطيبتة وعلي وصادق يسولفون
والبنات بغرفتهن جوري تدرس وترف نايمة
*************************
بإحدى المناطق في بغداد
ياسر فرحان بصديقة ويركص ويغني اخذ سلاح وكام يرمي
فجأة اختفت ضحكتة وحس كلبة راح يوكف وهوة يشوف الدم اللي ملة الكاع
ارسلان جاف
بقى ياسر مصدوم من اللي صار
ياسر:اني شسويت يا الله
*************************
في ميسان
ساعة 8ليلا في بيت الشيخ حاكم والكل كاعد عالعشة
شخص غريب:الوو...اخوية حضرتك تقرب لأمير حاكم
حازم:الوو..اي نعم اني اخوه اتفضل
الشخص: للاسف اخوك جابوه للمستشفى
مضروب طلقة براسة ومكدرنة نسويلة شي
البقاء لله
صرخ بعلو صوتة
:لااااااا أمير
شيخ حاكم:حازم شبيك اخوك شبيه احجي
حسن:شبيه أمير؟
"امير مات"
هاي الجملة هزت كلوب كل الموجودين صح هوة جان مو خوش انسان بس يبقى ابن وشخص الة ذكريات بكل ركن داخل هالبيت الجبير والة مكانه بكلب كل واحد من اهلة
راح حازم وحسن و ولد عمهم لبغداد حتة يجيبون جثمان اخوهم
وبقى الشيخ حاكم واخوتة يحضرون الفاتحة وينصبون الجوادر لان الناس عرفت بالخبر وكل العشاير راح تجي تاخذ من خاطرهم
البيت مليان بالأسود والحزن غطى كلوب اللي يحبونة وبنفس الوقت اكو اللي يشمت بهاي العائلة ومنتظر وكعتهم
******************************
في بيت ابو احمد (عم ترف)
صادق:مصطفى ساعة 11 واخوك ماكو وجهازة مغلق كوم شوف وين راح
مصطفى: قابل وين يروح يا يابة شنو صغير وأطلع ادور عليه شوي ويجي
صادق: هاذة اخوك اخيرا اتصل
صادق:لك وين صرت متكلي متكول أهلي يضل بالهم صدك جذب يا ابني
ياسر:يابة اني واكع بمصيبة
صادق:يا ستار شصاير
ياسر:بابا اني قتلت شخص
صادق بصدمة: انته شجاي تحجي
ياسر:والله ماجان قصدي اني جنت ارمي واجت الطلقة بيه مو قصدي اكتلة
صادق:انته وين؟
ياسر:اني كاعد بفندق .....
صادق: تعرف هالولد منين شنو اسمه حتة نروح لاهلة
ياسر:لا ماعرفة
صادق: ماشي سد تلفونك واني اروح هسة لعمك نشوف شنسوي بهاي المصيبة اللي وكعتنة بيهة
سد صادق التلفون
"مصطفى اخوك كسر ظهري"
عاف ابنه وراح لاخو ولحكة مصطفى يريد يفهم شصاير و شنو هالحجي اللي كالة
بهالوقت المتأخر نورس وعلي وجوري نايمين بس ترف ام كلب ترف مكدرت تنام عدهة احساس بعدم الراحة كاعدة يم شباك عرفتهة تباوع للسما المليانة نجوم ومشغلة موسيقى هادئة بلكت تقلل
من هالشعور وتحس بالامان طفت التلفون وكامت تسد الشباك شافت سيارة عمهة طبكت بالباب
ترف:يا ستار شصاير بهاليل
ندك الجرس نزل علي يفتح الباب كعد كل اللي بالبيت
علي:خير خوية شجابك بهالليل شصاير
صادق: ابو ترف اني وكعت بمصيبة ماعرف شلون اطلع منهة
علي:خير ابو احمد احجي وانشاء الله ماكو شي صعب كلشي ينحل بحيل الله
نزل صادق راسة وكال: ياسر كتل واحد وهسة هوة شارد
ترف حست نبضهة وكف شنو هاذة اللي جاي تسمعة ياسر يقتل مستحيل اكيد اكو شي غلط
علي:شلون هيج صار ومنو هاذة الي نقتل
صادق: ولد صديق ميثم صاحب ياسر جان وياهم بالعرس ياسر يرمي واجت تايهة بيه وصار اللي صار والولد مات
نورس: انا لله وانا اليه راجعون الله يصبر اهلة
علي :لا حول ولا قوة الا بالله العلي العظيم
ابو احمد لازم نتصل على اهلنة ونخبرهم اللي صار ولازم نعرف هالولد منين حتة نعرف شنسوي
راحت ترف وجوري وامهن فوك وبقى صادق وعلي يتناقشون ويتصلون على اقاربهم
ترف:ماما شنو حيصير لياسر؟
نورس:ماعرف يا بنتي انشاء الله تعدي على خير
جوري وترف:انشاء الله
**************************
استمرت الفاتحة اسبوع كامل في ميسان بحكم مناصب الشيخ و ولدة
خلال الأسبوع هاذة شيخة فضة حالتهة تدهورت على ابنهة
الشيخ حاكم باقي قوي وثابت لكن داخلة ينزف دم على ابنة اللي راح
حسن محد يكدر يحجي وياه بسبب اعصابة ومتوعد للي قتل اخوه يمشي بالمثل(العين بالعين)
حازم ما جان اقل من اخوه يريد يشرب من دم اللي سوه هيج بس للاسف مايكدر هسة
اما ابو احمد وابو ترف خلال هالاسبوع عرفو من صديق ياسر اسم أمير وعنوانة وباليوم الثاني للفاتحة دزو أحد كبارية عشيرتهم و وياه شيوخ وناس خيرة وراح وياهم ابو ترف وهاذا اللي صار..
ابو عمار(الجبير): البقاء لله هاذة حكم الله شيخ
شيخ حاكم:ونعم بالله جيتكم على راسنة حجي ابو عمار
ابو عمار:سالم راسك شيخ
احنه جايين علمود العطوة يا شيخ احنه اهل ياسر اللي كتل المرحوم وهاذة عم الولد ابو ترف
هنا كام حازم وحسن على حيلة وكامو وياه كل ولد عمامة
حسن:والله لاشرب من دمك
حازم:حسن بسسس احترم الشيخ والعالم الكاعدة
حسن:يا خوي شلون اتحمل كتالين اخوي كبالي
شيخ حاكم:ولك حسن حشم ابوك والوادم الكاعدة
حسن:اعتذر منك يا شيخ
شيخ حاكم:يابو عمار احنه حجينة ويه عمة
ابو ترف :اللي تكول عليه يجرالك شيخ
شيخ حاكم:انشاء الله
كدامكم 10 ايام تجيبون جبيركم وانشاء الله يصير خير
ابو ترف:انشاء الله
نرفع الزحمة
شيخ حاكم:بعد وكت ابو ترف ابقو الليلة وانتو وانتو دربكم بعيد والدنيا ظلمت
ابو ترف: مشكورين شيخ تعذرنة والله العائلة وحدهة
شيخ حاكم: معذورين الله وياكم
******************
ثاني يوم وصل صادق وعلي لبغداد وكلمن راح لبيتة
ساعة4 العصر في بيت ترف
معد علي من النوم واجن بناتة واتجمعو حتة يتغدون كملو غدة كعدو علي ونورس يتناقشون باللي صار والبنات صعدن لغرفتهن
نورس:انته برأيك شتكول علي ممكن يطلبون دم؟
علي:ما اتوقع ابوهم مبين علي عاقل ورزن ما راح يطلب هيج شي
نورس: الحمد لله اذا نا يطلب دم يعني راح يطلبون فلوس وهاي مكدور عليهة
علي:انشاء الله يطلبون بس فلوس وما يصير الي ببالي
نورس:شنو اللي ببالك علي؟
علي:ماكو شي
اني كايم ابدل حتة اروح لبيت اخوي
نورس:ماشي عيني الله وياك
***************************
ترف:ياسر شلونك اخبارك
ياسر:الحمد لله
ترف انتي مصدكتني موو انتي اختي اوكفي وياي اني ما جان قصدي والله
ترف:شدكول انته صدك جذب ادري مو قصدك اللي صار صار واحنه كلنة واكفيين وياك ما نتركك ابد انته بس كول يا الله انشاء الله تنحل على خير
ياسر:انشاء الله
يلا ما اطول عليج اخذي راحتج
ترف:دير بالك على نفسك
الله وياك
سدت التلفون وهية تدعي الله يساعدهم ويزيح هاي الغمة عنهم
******************
خلصت ال10 أيام وراح شيخ عشيرة ياسر وابوه وعمه
.....
يتبع
