#طوبى "جنة طوبى"
#جمان_فريد
#الجزء_الثالث_والثمانين "حرب باردة/ستار حديدي2 "
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الدعاء 🌼
وانت بتدعي خليك طماع، ايوا طماع، إدعي بـ كُل
حاجه نفسك فيها، انسي المنطق وانت بتدعي
ومتشغلش بالك ازاي الدعوه دي هتحقق، النبي
بيقول"إذا تمنى أحدكم فليستكثر فإنما يسأل ربه"
سيدنا موسى طلب من ربنا 7 حاجات مره واحده
وكان الرد ساعتها "قَالَ قَدْ أُوتِيتَ سُؤْلَكَ يَا مُوسَىٰ"
إنسى أي حاجه وقول يارب! 🤍🤍🤍🍀
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃ضمد جراحك ثمّ عُد لحربك لا نصر لمحاربٍ ينزف 🍃
__________________________________________
▪▪▪▪قبل بضع دقائق▪▪▪▪
🍃في شارع القهوة..
قريب ع الورشه درسوا سيارتين..
بلال طلعلهم ع باله زباين..
بدت ع وجهه ملامح الاستغراب لما شاف اللي فيهم نازلين ومعاهم الالات ايقاعيه..
وفي واحد معاهم يقول..
/هيا هيا ياشباب ابدوا معاش في وقت..
طلعوا اصحاب المحل والمصور يتفرجوا..
وبدت الفرق تتجهز...لين عطي واحد فيهم الاشاره للتانيين وبدوا...
كانوا يقدموا واللي معاهم يصفق ويغني ..
واللي تبعهم من ناس شارع تبعهم..
🍃المهدي كان مقعمز في المطحن وهو مضايق من قصة زواج الجالي التانيه..
شاف للباب وهو عاقد حواجبه بإستغراب لما سمع النوبه..
محمود بإستغراب:شن هدا!؟
ناض المهدي ومشي طلع من المطحن ووراه محمود والشباب اللي يخدموا عندهم..
🍃وفي القهوة..
كانوا كل اللي فيها يتفرجوا وهما مستغربين وع راسهم نضال ونسيبهم ربيع..ومحمد المهدي..
التونسي في محله كان عنده زبون..يخدم وهو مستغرب..
من اللي داير نوبه في الشارع وواحد من اهم ناسها موته ماعداش عليه 6شهور!؟
ع حسب العرف والعادات اللي عرفها ع ناسها طبعا..
🍃في من طلعوا من الرواشن والبالكونات يتفرجوا وهما مستغربين..
ويشوفوا في واحد واقف مع جماعة النوبه يصفق ويغني معاهم..
🍃طلع محمد شنيبه من الحوش وهو يشوف للي صاير بإستغراب شديد..
مشي وقف جنب المهدي وقال..
/هدا شني!؟
المهدي وهو يشوف قدامه بعدم فهم:مش عارف!
وهداكا الراجل يغني مع الفرقه..
"يادنيا يادوارة ..طبعك دوم غدارة..
وشلون شلون..دنيتنا اعز الناس خانتنا...
🍃🍃🍃
في حوش لطفي الواعر..
كانوا كلهم طالعين للجنان ويسمعوا..
ويشوفوا لطوبى..
اللي كانت منزله نظرها للأرض وهي تسمع وحواجبها معقوده..
مطيره بغل:هالكلب..
فردوس بعدم استيعاب:معقوله!؟
مطيره؛اسمعي كلام الاغنيه تفهمي..يبي يقهرها..
اريج.بضحكه صدمه؛متخلف مش طبيعي..
وآلاء تشوف لطوبى بضيق وهي ساكته..
🍃وفي جنان حوش علي اللي كانت مقعمزة فيه اميمه تقرا..
تسمع وهي تفكر في طوبى..
بعدين قالت بإزدراء:مريض..
🍃في روشن دار الولاد في حوش محمد شنيبه..
كان الجالي واقف يتفرج وهو مبتسم مكرا..
🍃ولوطا الجيران مش فاهمين شي..
ولاعارفين هالفرقه لمن جايه وشن تبي..
شويه وتحرك الراجل اللي جايبهم وقعد يمشي والفرقه معاه وهما مازال يعزفوا ويغنوا..
ومافي حد فاهم حاجه...
🍃🍃🍃🍃
في صالة حوش شنيبه..
خديجه:مصيبه كان ولدها جايبها حق..
مغليه حاطه ايديها ع راسها وهي ساكته..
خديجه بغضب:مش عارفه شن يبي في راسه وين يبي يوصلنا مش عارفه..
سمعوا باب الحوش انفتح..
"جالي"
نزلت مغليه ايديها وقالت..
/يارب سترك..
ناضت خديجه ومشت طلعت برا وهي خايفه..
لقت بوها واقف يشوف للدروج بغضب..
شافتلهم..لقت الجالي نازل من فوق..
وصل لوطا وقال:نعم!
قدمله بوه وقال بغضب..
/انت اللي جايبهم!؟
تنهد وقال:ايه..
انفعل بوه وطلع عن طوره وقال..
/تي يا...يا..ومد يده بيضربه ع ذراعه..
الجالي تباعد وقال بحده..
/انتي جبرتني ع شي مانبيشي خليني ندير مانبي..الزواج يبي اشهار ولا وهاني شهرته..درت غلط درت عيب..لا! انت قررت واني نفدت وتمت..
بوه هز راسه بغضب بعدين قال..
/انت تبي تقتلني عارفك..فعايلك كلها لهني بتوصلني ياتجلطني ياتقتلني..
الجالي ابتسم تهكما بعدين مشي فات من جنب بوه وطلع..
التفت محمد بغضب وهو يقول..
/لعنة الله عليك..لعنة الله عليك دنيا وآخره..
وخديجه تشوف لبوها بقلق قالت..
/خلاص بوي هدي روحك..
التفت عليها وقال:انتي شن قاعده ديري اني! اطلعي اقلبي وجهك..انتلفي.من قدامي..
هي انصدمت..وزاد خوفها..مشت بسرعه خدت. عبايتها ووشاحها ومشت طلعت بسرعه..
محمد شنيبه بإنفعال وعصبيه..
/فديت منكم مليت..كبدي درهت خلاص..الواحد شن يدير معاكم! يتبرا منكم يهج ويسيبهالكم!
حسبي الله ونعم الوكيل..مشي للمربوعه وهو يقول..حسبي الله ونعم الوكيل..
ومغليه.تسمع فيه وهي تبكي بصمت..
🍃الجالي لما طلع من حداهم..
كان يسمع في لعن بوه وهو مبتسم ببرود عجيب..
مشي باتجاه الشقه وهو يسمع في اخته خديجه وهي طالعه تمتم وتقول..
"شني دخلي فيكم ان شاء الله تنحرقوا"
ابتسم تهكما وهو يحرك في راسه يمين ويسار..
وصل في الدروج وقعد يركب الدرجة بدرجتين..
لين وصل في الشقه..طلع المفتاح..وفتح الباب وخش وهو ينادي..
/نوجه..
هي جاته وكان باين ع وجهها الضيق..
سكر الباب وجاها وقف قدامها وقال..
/خيرك!
نجاة:شن معناه اللي درته!؟
بضحكه قال:فرحان بيك..
نجاة:بالاغنيه هادي!؟
الجالي:خيرها الاغنيه..مليحه..
وقعد يغني وهو يدور حواليها..
يادنيا يادوارة..طبعك دوم غدارة..
وشلون شلون دنيتنا..
نزل عند وذنها وكمل..
اعز الناس خانتنا...
تباعد وهو يضحك ورجع وقف قدامها وقال..
/هيا هيا بري وتي روحك بنمشوا للفندق..
هي استغربت..
الجالي:تو انتي مرتي علنا بإشهار ولازم نكون عادي ونبيتك اول ليلة في فندق..واشر ع الباب وهو يقول..زي مادرت مع هديكا بالزبط..
تفكرت نجاة هديكا الليله وكيف قدرت تجيبه لعندها. يقعد معاها للصبح ويخلي طوبى بروحها..
رفعت عيونها فيه وهي مبتسمه بمكر..بعدين قالت..
/باهي..ومشت خشت للدار..
وهو بعدين مشي قعمز ع الصالون..طلع تليفونه من جيب جاكيته..وقعد يشوف للشاشه..وكأنه يستنى في شي..
🍃🍃🍃🍃
التفتوا لطوبى وفردوس تقول..
/ان شاء الله مايتهنوا..
طوبى تنهدت..بعدين رجعت لبست السماعات..ولفت ومشت تكمل دورتها ع الجنان..
هما كانوا في حالة قلق عليها..
ع بالهم هدا كبت..ثبات قبل الانهيار..الهدوء قبل العاصفه..
بس في الحقيقه..
طوبى كانت حاسه بقوة غريبه داخلها..مخليتها معاش تتأثر بقوة من أي شي يقهرها او يزعلها..
حدها ذرفت كم دمعه..لكن فيسع مسحتهم..وخدت نفس عميق بعدين طلعاته..
وين وصلت في الجنان الخلفي اللي كان كله زرع اخضر وشجر سمعتت سمعت اصوات العصافير اللي كان قوي وواضح بالذات في هالوقت من النهار..آخره..
حولت السماعات وقعدت تسمع في اصواتهم..
وقفت وغمضت عيونها وقعدت تسمع بكل حواسها...
بعدين قالت..
"سبحان الله وبحمده"
وفتحت عيونها وهي تردد فيها..بعدين كملت تتمشى..
تردد فيها ويجي بين عيونها كل شي بشع عاشاته..
كان يضيق صدرها ولسانها يبي يسكت..تعلي صوتها شويه وهي تسبح بش تغلب شعور هالضيقه..وفعلا غلباته وتبدد وحلت محله راحة عجيبه..خلت ابتسامه حلوة خفيفه ترتسم ع وجهها وهي تسبح..رجعت تسبح بهمس وهي تتمشى..
وكل مالها راحتها تزيد..والقوة اللي فداخلها تكبر أكثر...
🍃🍃🍃🍃🍃
"والله ماعرفت الامنك توا"
مختار وهو مقعمزة ع كرسيه الجلد ويشوف لصابرين بنظرات مريبه قال..
/صابرين..
صابرين بتوتر:والله العظيم مانعرف..اني مقاطعتها كارهة نسمع سيرتها..تي مش حاولت فيك بش تخليهم يحولوها من الادارة متاع الشركه نسيت!..شبحت جنبها وقالت..اسأل رضا..
مختار شبح لرضا اللي كان مركز بنظره في الفراغ وهو يسمع فيها وهي تقول..
/أسأله اخر مرة لما مشيت شفت صغارها في السوق حاولت معاي لكن اني مابيتش نعبرها..صح رضا ولا تكلم!؟
حرك رضا راسها ناحيتها وقعد يشوفلها بنظرات خافت منهم حست انه حيكذبها..
ومختار يشوف لرضا بصمت..
وهو بعد مالعب بأعصابها لثواني وجه نظره لمختار وقال..
/صح..حتى تتصل ماتبيش ترد عليها..
شبحتله بدهشة..
وهو مازال عيونه ع مختار..
هز مختار راسه وقال..
/باهي..اتصلي بيها قدامي وافهمي منها شن صار بالزبط..
هي هزت راسها وكانت في قمة التوتر..
قامت تليفونها..وخشت ع السجل وحطت ع رقم اختها واتصلت..
مختار:افتحي المايك..
فتحاته طول..وسمعوا البداله تقول..
"الرقم المطلوب مقفل"
هز مختار راسه وبعدين قال..
/اطلعي..
صابرين مشت طلعت وهي خايفه ومنغاضه في نفس الوقت من اختها اللي قاعده امورها تمشي زي ماتبي...
مختار:سكر الباب..
رضا مشي سكر الباب وولى وقف في مكانه..
مختار بحيره:مش عارف كيف تلخبطت الامور هكي..مش هدا اللي كنت متوقعه بكل..
رضا؛في شي جد في الموضوع..
مختار:اكيد وتو نعرفه..سكت شويه وهو يفكر بعدين قال..خل نخلوا تمشي زي ماهي حاليا مش مهم عندي مادام الطريق المختصرة اللي مشيت فيه باديه تسلك..شن صار في اللي قتلك عليه؟
رضا:قريب هلبه حتسمع اللي يسرك..
مختار:اهم شي نعرف مني يارضا..
رضا:حتعرف ان شاء الله وقريب هلبه..
مختار:طبعا كان الامور مشت زي مامتخططلها..لأن القدر ديما يجب يفاجئني..
رضا احتفظ بصمته..
مختار هز راسه بعدين قال..
/خلاص اطلع..
ورضا مشي بيطلع..
مختار:خلي الباب مفتوج..
فتح رضا الباب ع وسعه وطلع..
ومختار تمدد ع كرسي الجلد وخدي الريموت وشغل المنظومه وقعد يسمع في مقطوعه لسينفونيه هاديه بش يسترخي...
🍃🍃🍃🍃🍃
"نوبة!!؟"
صفاء بإزدراء:ايه..هي صح ماوقفتش في مكان واحد وماشفنا حد منهم وقف حداها لكن من بيجيبها ياماما غيرهم..
فايزة بكره..
/هو هدا..بلعاني شاف طوبى مادورتش اللي صار يبي يستفزها..
فتحت شنطتها وطلعت تليفونها بش تتصل بنسرين..
وصفاء تشوفلها..
ع جية مروة من الكوجينه قعمزت حداهم وهي تسأل في صفاء بعيونها..
صفاء اشرتلها بيدها بمعنى"استني"
فايزة؛ايوه نسرين..
"هلا فايزة شن الاخبار"
فايزة:الاخبار عندك..شن قصة النوبه هادي!..
"والله علمي علمك ربيع قالي لفت ع الشارع كله ماقعدتش في مكان واحد"
فايزة:باهي من جابها وعلاش!؟
"والله ماعندي معلومه"
فايزة؛نسرين..
"اسكتي مانبيش نفكر انه هو وراها من غير شي دمي محروق منه"
فايزة؛مافيش غيره يانسرين..اشمعنى تجي اليوم يعني..
تأففت نسرين بضيق وقالت..
"والله ماعارفه شن نقول"
فايزة بأسف:لاحول ولاقوة الا بالله..
وصفاء تشوف لأمها وهي مستاءة ومنقهرة ع طوبى..
ومروة كان حزينه ع حالها..
🍃🍃🍃🍃🍃
وهي فهالوقت..
طلعت من الحمام بعدت مادوشت ومشت للدار..
خشت وسكرت الباب..
نزلت الفوطه عن راسها وقعدت تنشف في شعرها..
بعدين حولتها وشافتها لقت فيها شعر قالت..
/عن قريب معاش تقدري تجبدي شي..
حطت الفوطه ع كرسي..ومشت وقفت ع الزيانه..خدت شيشة بخاخ في مية رقيه..بخت منها ع وجهها..بعدين شعرها من الفروة للأطراف..
حطت البخاخ وشافت للمرايه..جو عيونها ع سرير جنة لقتها تحرك في ايديها..
ابتسمت وقالت..
/نضتي فكرونتي..ولفت ومشتلها وقفت حدا سريرها وهي تشوفلها بضحكه وتقول..
/صح النوم ياروحي..محلاه هالوجه ياربي..محلا هالعيون اللي يشوفولي..محلا هالايديات اللي كان نلقى ناكلهم..
وجنه تشبحلها بس..
تنهدت طوبى وقالت..
/تعرفي جنونه..القرايه قريب تبدا..
مشت للزيانه وهي تقول..
/مضطرة نخليك سويعات لكن مش كل يوم..سامحيني ماما بس لازم نكمل ونتخرج..خدت كريمة مرطبه وقعدت تدهن في ايديها وهي تقول..نبي نولي ابله في روضة ولما تكبرس نحطك فيها وتقعدي معاي يومي كله..
التفتت وقالت بإبتسامة رجاء
/اكبري بسرعه ماما..بالله عليك..
رجعت شافت لإيديها وهي تدهن وقعدت تقول..
/نبي تكبري بش تولي صاحبتي نحكيلك ونشكيلك وانتي تنسي همي..
من يفهم ع ام ع غير بنتها ومن بيحس بيها زيها؟..
تنهدت بعدين شافت للمرايه بإبتسامه وعيونها مليانات دموع..
/ان شاء الله ربي يكتبلك قدر خير من قدر امك وتعيشي ايامك كلها وانتي فرحانه ومرتاحه..اسفه ياماما تمنيت لو قدرت نختارلك اب كويس رانا توا كلنا مع بعض..التفتت وقعدت تشوفلها وهي تقول بألم...اسفه انجبرت نخليك تعيشي بعيده عنه..وصدقيني هكي احسنلك ياماما..
رجعت شافت للمرايه ودموعها نزلوا..
مسحتهم..وخدت نفس عميق وطلعاته..بعدين شافت للمشط ع الزيانه خداته وقعدت تمشط في شعرها..
🍃🍃🍃🍃
"مأجر الولد اللي جايبهم بش يموه"
نسرين بغيظ؛خوك هدا يبي القتل من الاخير..
تنهد المهدي وقال..
/هو من جهة يتحدى في بوك ومن جهة يستفز في حوش الواعر..
نسرين:وكله بيجي ع راسه في الاخير..
المهدي؛نحس فيه معاش فارق معاه بكل بدي يتصرف بطريقه فيها لامبالاة..
نسرين قعدت ساكته وهي مضايقه..
المهدي هز راسه بعدين قال..
/بري ناديلي سدرة..
نسرين:حاضر..ومشت خشت داخل..
وهو قعد واقف في مكانه وسرح بتفكيره..
🍃🍃🍃🍃🍃
وفهالليله..
في نفس الفندق اللي قضت فيه طوبى اول ليلة مع الجالي بعد زواجهم..في نفس الحجرة كانتله اول ليله مع نجاة بعد زواجهم التاني علنا..
خلاها لين ترقد وقعد سهران وهو شاد تليفونه ويراجي..
وهمه عقله ان طوبى حدير زي نجاه..حتحاول تخرب عليهم الليله ودير اي شي بش تبعده عنها..
وقعد يراجي..
🍃وطوبى ليلتها ماقدرتش ترقد..
لاسهرتها غيره..ولا كوتها نار خيانه..
طوبى كانت سهرانه تفكر شن بدير القدام شن اللي لازم ديره..شن هو الاصح!؟..
لعند آذان الفجر وهي غارقه في تفكيرها لين خداها النوم منه...
🍀فاقت بعد اربع ساعات ع صوت جنة تبكي..
ناضت مفزوعه..ومشتلها خدتها وقعدت تهدي فيها بعدين رضعتها..
وبرا الدار..
كانوا الكل فايقين يفطروا.فردوس وبناتها وكلامهم عنها ..
اريج؛ماتضغطوش عليها اللي تبي ديره تو تقول عليه..
آلاء:امس في الليل مارقدتش بكل مرة مرة نوض نلقى فيها قاعده نايضه..
فردوس بضيق؛حسبي الله ونعم الوكيل..بعدين شافت لبناتها وقالت..ايه حناكم اتصلت امس وتلوم..
اريج؛تلوم؟
فردوس؛قالت خيرهم مايجوناش..
آلاء بكره:عارفتنا طايقين نشوفوهم..
فردوس:شن دخل حناك وجدك؟
اريج؛باهي اليوم نخطم عليك المعمل ونمشولهم..
الاء:ماتفكروش مش ماشيه..
فردوس:اسمعي كله بيحطوا في راسي اني ماتجبليش الدوة..
آلاء سكتت وهي مضايقه..
اريج؛خلاص امي تو تمشي معاي..
سكتت فردوس وقعدت تشرب في الحليب وهي مضايقه تفكر في معتز وتبي توصيهم عليه لكن مش قادره قلبها مليان منه..ع جفاه ونسيانه ليهم..مابطلتش لحظه وهي تفكر فيه وقلبه بسببها محروق حرق...
🍃🍃🍃🍃🍃
في الطريق..
كان يسوق وهو ساكت ومن داخل كله غضب..
وهي مرة مرة تسرقله في النظر تبي تتكلم ومش عارفه شن تقول خافت يهب فيها..
شويه هو تكلم وقال..
/غدوة تمشي تستقيلي بنسأل ونتأكد بروحي
نجاة:مانوليش في كلامي معاك تعرفني..
رجع لصمته من جديد..
لين وصلوا لللشارع درس قدام حوش بوه..وعيونه ع حوش الواعر..
نجاة شافاته..انغاضت هلبه لكن تمالكت نفسها وقالت..
/توصل بالسلامه حبيبي..
شبحلها بعدين هز راسه وشاف القدام..
نزلت وسكرت الباب..هو شبحلها واشرلها تخش..
هزت راسها ومشت لباب الحوش..
طلعت المفتاح من الشنطه..فتحت الباب وخشت..
التفتت شبحتله..لقاته يشوف لحوش الواعر..
من غيظها سكرت الباب بقوة..
غير نظره لباب حوشهم..بعدين تنهد..وتحرك بالسيارة..
🍃وفي حوش الواعر..
طوبى:بري حبيبتي عادي شن بيصيرلي كان قعدت بروحي!
فردوس بإبتسامه؛ماناش معطلين قبل الظهر نكونوا في الحوش.
طوبى؛إن شاء الله..ماتنسيش القائمة متاعي وكان تموا الفلوس اللي عطيتهولك خودي من عندك واني تو نردهولك بعدين..
فردوس:بري غادي..ومشت طلعت..
ضحكت طوبى ولحقتها..وقعدت واقفه في الجنان..
شافتها لما خشت لحوش جدها من الباب الفاصل..
كانت بتطلع هي وعمتها وسميره بس ياخدوا قضيه وبضاعه للحرارات..
ولت خشت طوبى للحوش ومشت طول للدار..
خشت..وجت لسرير جنه اللي كانت فايقه..حطتها في الشنطه وخدتها ومشت بيها للكوجينه..
حطتها ع الطاوله وقالت..
/جبتك معاي بش نديروا حاجه مع بعض..ومشت طلع في مكوناتها وهي تقول..بنديرها لخالتك غرفه بش نرضيها بيها..
عكرشت وجهها وقالت..الحاجه هادي اني معاش طايقه نسمع اسمها..بوك يحبها هلبه..
وقعدت طلع في الحاجات وهي ساكت بعدين وقفت وحطت يدها في نصها وقالت..
/وين يشوفها عيونه يولوا قلوب..ياكل منها لين قريب تطلع من عيونه..تعرفي يطلع من طاجين كامل بروحه..واني ياما درتها ع خاطره....وياريته غير جي بثمرة..
سكتت شويه بعدين قربت من بنتها وطبست عليها وقالت.
/عارفه غلط ندوي معاك في حاجات زي هادي..بس لما تكبري وتبدي تفهمي مش حنحكيلك دوة زي هادي غير توا نبي نفصفض بس..تو لما تكبري هو بروحه يخليك تحددي مشاعرك ناحيته..ياتحبيه..يا.....استغفر الله العظيم..هي توا خلينا من سيرته..وخل نبدوا نديروا المبروشه..
🌼🌼🌼🌼
وبدت دير في المبروشة وهي تحكي عن المكونات والطريقه لجنة اللي كانت تسمع ..
وشويه بدت تعيط من الجوع..رضعتها امها وردتها للدار وحطتها في سريرها بعدين ولت للكوجينه وكملت باقي شغلها..
بعد كملت...دارت لروحها الفطور وحطت معاه الداو متاعها..
وبدت تفطر..وبعد كملت خدت الدوا وشربت وراه مية الرقيه...
وبعد ماتمت حوسة الكوجينه طلعت ضمت الحوش...
🍀وتعدي الساعات..
وتحط الغدي ع النار كان خاطرها دير كسكسي بالبصله وجنبه طاجين جبن..
وفعلا بدت فيهم الزوز ودارتهم وكانت في قمة النشاط والحيويه..
بعد ماحطت غداها ع النار والطاجين في الكوشة..
دارت قهوة..وشغلت الراديو وقعدت تسمع في برنامج مهند
كان الموضوع حلو والنقاش بينه وبين زميلته اللي هي خطيبته في نفس الوقت حلو..
تنهدت طوبى وقالت..
/تمشي معاه اكثر من آلاء..يللا كله نصيب..
حطت الفنجان وقالت..خل نمشي نشوف جنونه...
🍃🍃🍃🍃
وفي هالوقت..
كانت آلاء في الفندق جايبه معاها الطلبيه..
بعد ما حطتها قعدت الموظفه صاحبتها يهدرزوا..
ع جية آرام للمطعم..وين شافت آلاء ضايقت هلبه..
وفكرت ان جياتها الاخيره مش بلاش قاصده من وراها شي..
ولأنها عارفه مهند قاعد مجروح منها..خافت...
ومن خوفها مشتلها طول..
وقفت عليها وقالت:معليشي..
الاء اتفاجئت والموظفه اللي معاها وهي مستغربه قالت..
/تفضلي ارومه..
آرام؛لانبيها هي شويه..شافت لآلاء وقالت..شويه لوسمحتي..
توترت آلاء ومشت معاها..
تباعدوا شويه والموظفه معاهم بنظرها..
🍃آرام:معليشي سؤال وجاوبيني عليه بصراحه شن مازال تبي من مهند؟
الاء وهي متعجبه؛نعم!؟
ارام بشي من الحده:اني فهمتك وعرفتك منه كويس قعدتي فتره من بعد هديكا المشكله ماجيتيش وبعد عرفتي ان العرس قريب وليتي تجي وتقعدي يخي..
الاء ابتسمت سخريه بعدين قالت..
/لاانتي تفكيرك شطح هلبه..
ارام؛ياريت والله نتمنى بس اللي عرفته عنك خلاني مانقدرش نصدقك..
الاء بنظرات حاده ودموعها في عيونها..
/شن اللي عرفتيه عني ترا!.
ارام:انتي تعرفيه كويس مانبيش نجرحك..ارجوك خلي مهند في حاله..خلينا في حالنا لو سمحتي..
ومشت وخلتها وآلاء قعدت تلحق فيها بنظراتها الغاضبه بعدين مشت وراها..
والموظفه تراقب فيهم..بعدين شافت مهند جاي للمطعم..
في اللحظه اللي فيها الاء وصلت في ارام وشدتها من ذراعها بش توقفها..
الموظفه توسعوا عيونها بذهول من اللي بيصير لما شافهم مهند..
الاء بغضب؛اسمعي انتي..مهند متاعك هدا ولايفرق معاي ولاقايماته من ارضه ياخدك ولاياخد غيرك معاش يهمني اني جايه هني نخدم خدمتي ونروح ..وكانك خايفه مني لهالدرجه علاش ترضي ع روحك تاخدي واحد عارفه ان قلبه مش معاك!؟
وصل فيهم مهند وسمع كلامها الاخير..خدي ارام من يدها وخلاها جنبه وقال لآلاء بإزدراء .
/انتي وحده مريضه ومش مزبوطه بكل...ربي يعينك ع نفسك..
وخدي خطيبته ومشي طلع بيها من الفندق..
وخلا الاء واقفه في مكانها..جامده من صدمتها في الكلام اللي سمعاته..
جتها صاحبتها وقالت..
/شن قالك..
نزلوا دموع آلاء مسحتهم وقالت..
/شي..ومشت بسرعه طلعت من الفندق..
فاتت من جنبهم وهي شاده دموعها بالقوة وتحاول تبان متماسكه..
ومهند لاهي بخطيبته يرضي فيها ويحاول يلطف جوها اللي فنظره آلاء عكراته..
🍃وآلاء لما ركبت السيارة شغلتها وتباعدت واللي شداته من دموع طلقت سراحه وقعدت تبكي بقهر..
🍃🍃🍃🍃🍃
"بنفسخ معاهم العقد وندفعولهم الشرط الجزائي مش مشكله"
تسمع فيه امه وهو يدير في مكالمات خاصه بالخدمه وكانت تحط في الغدي ع الطاوله..
هو بعد نهي المكالمه جاها..جبد كرسي وقعمز وهو يقول..
/جعان جوع..
قعمزت امه وقالت؛تغدا ولدي تغدا اللي تحبه كله درتهولك..
ابتسم وقال:يعطيك الصحه..
وبدي ياكل..وامه قعدت تاكل حتى هي..
بعد لحظات من الصمت قالت..
/بتنهي شغلك بوك كله؟
عزيز بلع؛امم..لامش كله بس اللي مايناسبنيش..
ورجع ياكل..
امه ابتسمت ورجعت تاكل بصمت..
شويه وهو قال؛بعد يتوزع الورث بنخلي وصاية خوتي لأمهم هكي احسن..
:حتى اني هدا رأيي..
هو قال؛اكيد بنقعد نواصلهم لكن في رزقهم مش حنتصرف الا اذا امهم خولتني بشي..
هزت امه راسه موافقة ليه وقعدت تاكل..
شويه ووقف ماكله بعدين شاف لأمه شويه وقال..
/امي..
شبحتله بإبتسامه..
ضحك وقال؛عارفك زابطة عارف..
امه:باهي قول اللي عندك..
شاف لأمه بشي من التوتر بعدين قال..
/نبيك تخطبيهالي..
امه قعدت تشوفله وهي ساكته..
عزيز؛اني حاولت وحسيت ان اللي ينفع معاها اني نخطبها طول بش تتأكد من حسن نيتي..
:ماعنديش مشكله وانت عارف ان هدا رأيي من البدايه.
ابتسم وقال:تمام نعطيك رقم امها تكلميها؟
ابتسمت وقالت؛حاضر..بعد الغدي ان شاء الله..
ابتسم لأمه بعدين رجع ياكل وعقله يسرح مرة مرة لما يفكر في آلاء..وامه تسرقله في النظر وهي مبتسمه..
🍃🍃🍃🍃🍃
واقفه في الكوجينه وهي شاده تليفونها..
تحاول تتصل بيه مكالمة ماسنجر ماقدرتش توصل فيه..
نزلت تليفونها بيأس وهي مضايقه وخايفه..
ع خشة وحده من سلفاتها..شافتها وقالت..
/خيرك عواطف؟
عواطف بضيق:معاش حصلته مسكر النت ليه اسبوع ومعاش اتصل بيا ..زعمه راجلك مايقدرش يوصل فيه؟
:والله شن بنقولك..هو لما يسافر مايدورش هلبه وهما مايدروش فيه متعودين بيه..
عواطف بضيق؛قصة والله...شبحت لسلفتها شويه بعدين قالت..نسألك ع حاجه تانيه؟
سلفتها وهي دير في المرضعه..
/على شني؟
عواطف بضيق؛مرته الاولى متعاركه مع عمته..
سكتت سلفتها وهي تشوفلها بعدم فهم..
ع خشة كوثر اللي وهي جايه للكوجينه دور ع عواطف وسمعت سؤالها..
بضحكه ساخره قالت..
/ومش أي عركه جنت فيها ع روحها..مراة قليلة ربايه وماتحترم في حد..سقدناها..
عواطف بعدم فهم..
/سقدتوها!؟
كوثر بإستغراب:ايه حبيبتي..اطلقت..
عواطف بعدم استيعاب..
/اطلقت كيف اطلقت!
سلفتها قعدت تشوفلها بأسف بعدين مشت طلعت من حداهم..
كوثر:وكيف يطلقوا الناس..ولد خوي طلقها وتلفها بعد ماخلاته يوصل حده..وطقت فيا اني عمته واميمته التانيه..
عواطف بصدمه..
/كيف..مافهمتش..طلاق شني!؟ هو ماقالش مطلق..!
كوثر عقدت حواجبها بعدم فهم وقالت..
/شني!!؟
عواطف بنبرة فيها رجفه..
/قالي مرته الاولى..قصدي فهمني انها قاعده ع ذمته وقال انتي وياها ماتتفاهموش..
كوثر قعدت ساكته وهي مصدومه وتفكر...بعدين هزت راسها ومشت طلعت وخلت عواطف في حالة صدمه وعدم استيعاب..
🍃🍃🍃🍃🍃
في الكوجينه متاع الشقه..
كان مقعمز يتغدا وهو يهدرز مع الشغاله..
رضا:ملصه قصدي بيها شد عضلي..
؛اه..فهمت..طيب من ايه؟
رضا:مش عارف..ياراقد غلط يامقعمز غلط ياتحركت حركة غلط..
ع خشة صابرين وهي هاده قالت..
/انت..جيب التليفون..
قعدت تشبحلها الشغاله بتعجب..
وهو ياكل ببرود وكأنه مافي شي حداه..
صابرين بعصبيه..
/جيب التليفون خير ماقسما بالله تشوف شي مايعجبك..
رضا:زيدني سلاطه..
الشغاله وهي مرتابه مشت بتاخد الصونيه..
سبقتها صابرين وخدتها وحدفتها ع الارض بغل غلها..
هو نزل عيونه للأرض وقعد يشوف في اجزاء الصونيه بعدين قال..
/جيبي غيرها وعبيها..
؛حاضر..
صابرين قدمت للطاوله وخبطتها بيدها بقوة..
هو قام عيونه فيها..
وهي بحده قالت..
/تليفوني جيبه..
هو قعد يشبحلها بصمت..
صابرين بنفاذ صبر..
/خلاص تلفوا عصابي بنضربك والله نضربك..
الشغاله شدت ضحكتها..
هو ببرود اشر بيده وراها..
هي عقدت حواجبها بعدين التفتت..
لقت التليفون محطوط في ثلاجة الميه..
قريب ماتت من الصدمه..
هو قال:السلاطه..
الشغاله؛اهي..ومشتله بالصونيه حطتها قدامه..
كيف جي بياكل..
التفتت صابرين جبدتها منها وبغيظ شديد لوحتها ع الارض..
ومشت طلعت من الكوجينه بعصبيه وهي تهدد..
/يااني ياانت..
الشغاله قعدت تضحك..
وهو يدوب ابتسم بعدين قال..
/تمت السلاطه؟
🍃🍃🍃🍃🍃
"طيحلنا جهدنا قحوانك هدا"
طوبى بضحكه:اقحوان عمتي..
مطيره:اللي هو..في جرته عطلنا هالتعطيله..
فردوس بضحكه:المهم جبت كل شي مافي شي ناقص..
طوبى بإبتسامه؛مافي شي ناقص..
فردوس:كويس..ومشت طلعت من حداهم...
مطيره؛نشم في الروايح الحلوة..شن دايرة؟
طوبى:كسكسي وطاجين..
مطيره؛استاحشت تطييبك يابنت..خل نخش نصلي وبعدين نجي نوتي الصفره..
طوبى:لالا اني تو نويتها بري صلي وارتاحي..
مطيره؛باهي..
ومشت طلعت..
بعد ماطلعت عمتها..هي التفتت ع الحاجات اللي جابتهملها اختها..
فواكه وانواع اكل معينه ضمن نظام غذائي دارته الدكتورة..
طوبى؛خل توا نوتي الغدي بعدين نلهى بيهم..
🍃شويه سمعت باب الحوش انفتح..
طوبى:آلاء روحت..
وبعد لحظات خشت الاء وفاتت من قدام الكوجينه بسرعه شافتها طوبى بعدين سمعت باب الدار تسكر بقوة استغربت وقالت..
/ان شاء الله خير..
🍃🍃🍃🍃🍃
في وقت فراغها مقعمزه تقرا..
وهي في عز انسجامها مع المرجع اللي في يدها انحطت جنبها طاسة نسكافيه..لما سمعت صوتها شافت جنبها بعدين ابتسمت.
هناء بإبتسامه؛قلت نجيبلك حاجه تساعدك..
اميمه؛شكرا.
هناء؛اي مساعده اني موجوده اميمه درته الامتحان..
اميمه بضحكه؛هو جيتي وربي جابك الحق في حاجات بنسألك عليهم..
هناء بإبتسامه:حاضرة حبيبتي..تعالي معاي لمكتبي احسن..
اميمه وهي مبتسمه:تمام....
وخدت طاسة النسكافيه ومشت مع هناء..
☘هناء بعد ماعرفت بتفاصيل قصة اميمه اعجبت بشخصيتها وحبت تتقرب وتعرفها اكثر..غيرت معاملتها ليها وقعدوا يتلاقوا هلبه وصارت بينهم حوارات لطيفه قصيرة خلت سوء التفاهم ينتسى والشي هدا فرح الدكتور خالد☘
🍃🍃🍃🍃🍃🍃
الساعه 5:30عصرا..
طوبى واقفه في الجنان وفي يدها شاده حافظه ..
واريج اللي كيف روحت من الخدمه واقفه عليها تكلم فيها..
🍃اريج:اللي نعرفه ان عرس مهند قرب خلاص اكيد اليوم لما مشت للفندق شافت شي ضايقها..
طوبى بضيق:ع العموم انتي تفهمي منها..وبالله جنونه ردوا بالكم عليها..
اريج؛علاش مارفعتيهاش معاك ماطلعتش بكل بنيتي..
بضحكه قالت؛خريف وهوا خريف مش باهي ليها واني ماشيه ع رجليا..
اريج؛مرة تانيه في السيارة وارفعيها خل تشوف وجوه جديده..
طوبى مشت للباب وهي تقول..
/وشن فيه من جدبد وجه غرفه..
ضحكت اريج وقالت..
/سلمي عليها..
طوبى وصلت في الباب وقالت..
/يوصل..
خشت اريج..
وطوبى خدت نفس بعدين فتحت الباب وطلعت..
سكرت الباب وراها..ومشت وكل من في الشارع عيونهم معاها واولهم..
سلافها..المهدي..ونضال..
هي كانت تبان عاديه جدا..ولاكأن صايرة معاها حاجه..
لين تلاقت مع زوز مع الجارات..
الحشريه رقيه ومعاها وحده تانيه..
وين شافوها وقفوها وسلموا عليها بحرارة..
بعدين خلوها تكمل طريقها..ماقدرتش طوبى تخفي الابتسامه اللي بدت ع وجهها من اللي حست بيه لحظتها..
قصت الطريق..
شافت حوش اختها انفتح وسيارة راجلها طلعت..
نزل عبد الرؤوف وهو يشوف فيها جايه..
وصلت فيه وقالت؛السلام عليكم..
بإبتسامه قال:وعليكم السلام..زعيمه انتي..
ابتسمت طوبى وقالت؛الباب الدخلاني مفتوح..
هز راسه بإيجاب .
طوبى:خل نخش نخلعها..قصدي نفاجئها..
ومشت خشت للحوش..
لحقها عبد الرؤوف وهو يضحك سكر الباب الخارجي ومشي بيركب السيارة وهو يقول..
/صحة ليها..
🍃وهي خشت داخل بهدوء وبحذر..
سمعت غرفه تتكلم بتذمر من ولادها..
ضحكت وحركت راسها يمين ويسار..وتبعت الصوت لين خشت عليها الدار..
غرفه بتذمر:هدا من توا هكي مالا بعدين شن ديرولي ربي يصبرني وخلاص..
طوبى:يصبرهم هما..
انفجعت والتفتت شبحتلها بعيون متوسعه..
طوبى بضحكه؛حي ع منظرك مش عارفه كيف متحملينه الولاد وبوهم..
غرفه هدت ورفعت حاجبها وغيرت نظرها لصغارها وقدت تكمل في تلبيسهم..
طوبى:بالله فكيني من جو بنات الابتدائي هدا..راني من الساعه 11 نايضه مع بنتي نديرولك في المبروشه..
مشت قعمزت جنب الصغار وحطتها قدامها..بعدين حولت شاربتها وهي تقول..
/تخيلي انتي اني شن درت ع خاطرك مبروشه ياجاحده..الحلو المفضل لخيبتي القويه...
ضحكت غرفه غصب عنها..
طوبى:فيها مربى فرواله زي ماتحبيها..حصلتي دلع زي هكي قبل!.
غرفه بضحكه:بارده والله قبل خاطري نضربك لكن توا خلاص..
طوبى ابتسمت بعدين قالت..
/شن حال وليداتي..
غرفه؛زي ماتشوفي مشيبيني..
طوبى وهي تشوفلهم؛سلامتهم قنانيشي..
غرفه شافت لطوبى بشي من الضيق وقالت..
/شن بديري توا؟
شبحتلها وقالت..
/في شني؟
سكتت طوبى ورجعت تشوف للصغار..
غرفه؛اخلعيه وافتكي..في عندنا طلاق يشبه الخلع تنازلي وتفتكي..
غيرت طوبى نظرها لغرفه وقالت..
/وبعدين؟..هو يعيش حياته معاها وكأن شي لم يكن واللي يبوه وخططوله وصلوه بعد مافاتوا فوق مني..واني نكمل عمري متحسرة ع روحي..تزوجت بغش وكذب وطلعت ايديا ع راسي..مضحكه يعني..!
غرفه غيرت عيونها لصغارها وهي تشوفلهم بضيق..
طوبى:اما خير ندير هكي..ولاناخد حقي وتار كرامتي..ونذوق المر اللي ذوقهولي بش يحسوا باللي داروه معاي؟
غرفه؛باهي عندك حق..لكن الجالي واحد مش طبيعي من الاخير توقعي منه كل شي..
طوبى:متوقعه منه كل شي..وبإذن الله زي ماجبروه ع قولتهم ياخد هديكا..حنخليهم يجبروه يطلقني ويعطيني حقوقي كامله..
غرفه؛يعني مش ناويه تخشي محاكم نهائي؟!
طوبى:مرات تستدعي الظروف نوصلها للمحاكم بس مش توا..
غرفه تنهدت وهزت راسها بإيجاب..
طوبى ابتسمت ع جنب وقالت..
/من هني لوقتها هديكا تنحرق شويه وتجرب..توا الفرق كبير..هي كانت مرته بالدرقه يخاف يشوفها حد معاه برواحهم..لكن اني توا نعتبر مرته قبلها وفي العلن ..
ابتسمت غرفه بمكر تلقائيا وهي تشوف في الفراغ..
طوبى؛ريتيها كيف!؟ تخيلتيها!؟..
ضحكت غرفه وقالت..
/خلها تستاهل..
وطوبى قعدت تضحك..
والصغار يسمعوا ويلعبوا بإيديهم..
طوبى:هي توا خلينا من هالسيرة المنكده وخل نمشوا للأنكد منها..مختار..
غرفه بضحكه:معترفه صار!
طوبى بملل:بشني بنعترف شن سمعتيني نشكر فيه قبل!
غرفه بضحكه؛باهي كملي..
طوبى تنهدت وقالت..
/يبي مسايرة..لازم نسايروه بش مايقعدش ورانا بمشاكله..اكيد انتي مش مستعده تخسري راجلك مرة تانيه!
غرفه قعدت تشوف لصغارها بضيق..
طوبى:مش طالبه منك تردي علاقتك بيه زي قبل بكل لكن ماتعاديشي وماتفتحيش عليك باب شره..وفي نفس الوقت ع خاطر سدره اللي نرجوا امتى توليلنا توا قبل بعدين..حني بعد فقدنا بوي ياغرفه وبعد المشاكل اللي صارت مع حسين معاش قعدلنا حد يقدر يحامي علينا ويديرلنا هيبة قدام الناس غيره هو..
غرفه:هيبة شني!؟ ناسيه الناس هني كيف يشوفوا فيه!؟
طوبى بإبتسامه متهكمه..
/الناس توا تشوف للفلوس والنفوذ بس..تعرفي رغم اللي داره الجالي ولا حيلقوله مبررات واعذار وينسوا كل شي..
غرفه هزت راسها بالموافقه ع كلامها بعدين قالت..
/باهي تمام..لكن مش خايفه المسايرة هادي توصلنا لمكان معاش نقدروا نولوا منه؟! مختار عينه ع الحوش والمطحن اي شي كان لبوي يبيه..
طوبى:والله عارفه ياغرفه..والله مانخليه يوصل للي يبيه لوفيها موتي ياغرفه..وصايا بوي مستحيل نخالفهم الا في حالة وحده..لو قعدتوا ديما تتعاملوا معاي بحساسيه بخصوص موضوع الحوش..وقتها حنتنازللكم عليه اكيد بوي مايبيش شتاتنا..
غرفه:كلمه وطلعت مني في لحظه غضب مش قاصدتها..اسمعي مهما ريتي وسمعتي ردي بالك ديريها طوبى..
طوبى ابتسمت بعدين قالت..
/باهي..صفقت بإيديها وقالت..هي نوضي ديري قهوة..
غرفه؛نوضي ديريها انتي..
طوبى:عينك..اني جاياتك ضيفه اليوم نوضي ياتنباله تحركي..
غرفه:مصح وجهك جايه لحوش اختك وتقولي ضيفه!
طوبى:تي وين تجينا ماتحركيش القشة وحني نعولوا عليك نوضي نوضي خيرلك نوضي...
ناضت غرفه وهي تضحك وقالت..
/باهي ياحصلة..حداك الصغار..
ومشت للكوجينه وهي تقول .
/ااه ياعظيماتي..
طوبى ضحكت وناضت قعمزت قريبه ع ولاد اختها..
بإبتسامه قالت..
/ياروحي محلاهم الله يبارك الله يبارك..وخيتي اني سلم هالعوينات..هيا اكبروا انتم وجنونه بش تلعبوا مع بعض وتقلبوا علينا الحوش بشطانتكم..حوشنا يبي دوشة صغار بش يولي زي ماكان..ابتسمت بألم..بعدين قالت بصوت عالي.
غرفه بديت نفرق فيهم ع بعض..اواب وجهه مدور ومهاب وجهه زي البيضاوي..
"زي شني!!"
ضحكت طوبى وقالت..
/جييي القهوة وتو نشرحلك..
🍃🍃🍃🍃🍃
"من جدك يافطيمه نوبة شنو اللي بنديروها؟"
:ياوخيتي هكي سمعنا..
مغليه:كلام مايخشش عقل..علاش بنديروها!؟ ولدي خداها بالسيف بش يسكت الناس بعد الاشاعات اللي طلعوها..تعرفونا قبل نبوها للمهدي لكن الجالي قال بعد دوة اللي طلعت عليها في جرتي نردها اني وخلاص..
رقيه رفعت حواجبها بعدم تصديق..
وباقي الجارات بين اللي اقتنع بكلامها وبين اللي ماأقتنعش..
مغليه:امس عقد عليها واليوم الصبح سافر لخدمته ومش مولي الا بعد شهر وفوق كانهو فرحان بيها علاش يخليها! قولوا كلام يصدقه العقل..
:صح ولدي قالي النوبه ماوقفتش في مكان واحد وجت من اول الشارع..
رقيه:غير كان نعرفوا من اللي دايرها..
مغليه:الله أعلم..
:باهي توا كيف بيدير ولدك؟
مغليه:كيف يدير..قال الزوز مش مقصر في حقهم ..
:يعني مازال مايبيش يطلق..
مغليه:بالذات بعد جابت البنت..
:يشوف فيها؟
مغليه تنهدت بحسرة وقالت..
/مريرتين وقالت مانخليشي يشوفها مرة تانيه لين يطلق..
الجارات بأسف..
"لاحول ولاقوة الا بالله"
مغليه بضيق:الله غالب وخلاص...
🍃🍃🍃🍃🍃
وقبل المغرب بشويه..
طلعت طوبى من حوش اختها وتوجهت لحوشهم..
ع طلعة الجارات من حوش شنيبه..كلهم انظارهم كانت عليها..
يشوفوا في مراة جوها عادي ولاكأنه صاير معاها شي..
قصوا الطريق ووصلوا فيها..
وبدوا بأصوات متقطعه يقولوا..
/كيف حالك..طوبى..
وقفت وردت عليهم بإبتسامه..
/الحمد لله...
وقعدت تسلم عليهم بالوحده وتسأل عن احوالهم..
كانت مبتسمه ابتسامه كلها راحه..مش نفسها اللي شافوها من فترة في حوش الصيد فيها شي متغير..
كلهم وقتها حسوا اتجاهها بالتعاطف وفي من وصله شعور الندم لما حس انه ظلمها..
بعد ماسلمت عليهم..مشت لحوشهم..وفتحت الباب وخشت..
والجارات كملوا طريقهم وهي كانت محور حديثهم..
🍃🍃🍃🍃🍃
رمت كندرتها وخشت للحوش..
سمعت صوت التلفزيون ..مشت طول بإتجاه دار المعيشه..
خشتلها لقت فردوس تتفرج وجنبها جنة راقده..
ابتسمت وقالت؛السلام عليكم..
فردوس شبحتلها بإبتسامه:وعليكم السلام...الجو مليح شكله..
طوبى بضحكه؛تعرفيها بهبارة ع الفاضي..
مشت قعمزت جنب بنتها وقالت..
/ماتعباتكش؟
فردوس:الله يبارك عليها بنتك هويديه..
ابتسمت طوبى وهي تشوفلها..بعدين شافت لأختها وقالت..
/اريج وآلاء وين؟
فردوس:بعد ماطلعتي بشويه مشوا لحوش جدهم..
هزت طوبى راسها وهي ساكته..بعدين فكت شاربتها وحولتها وهي تقول..
/غدوة ان شاء الله بنديروا سهريه نردوا بيها ايام زمان..
فردوس ابتسمت وقال..
/تقول مقعمزه في قلبي بكري خطروا عليا هديكا الايام..
تنهدت طوبى وقالت..
/نقولوا لنبيله تجي وسميره صاحبة عمتي..
فردوس:ايه فكرتيني نسيت بكل..غرفه يومها قالتلي خوها فتح الموضوع تاني مع رؤوف واني شبه اقتنعت شويه بالموضوع وقلت بنفتحه مع اريج لكن اللي صار الفترة اللي فاتت نساني..
طوبى:خلاص افتحي معاها الموضوع اليوم..
فردوس:هي ماحكتش عليه قدامك؟
طوبى؛تحسيها متردده..
فردوس تنهدت وقالت..
/ان شاء الله خير وخلاص..سكتت شويه وبعدين قالت..
واميمه.؟
طوبى قعدت تشوف للتلفزيون وهي ساكته شويه بعدين قالت..
/تو نقول لعمتي تقوللها..
فردوس:مرات ماترضاش تجي لين انتي تقوليلها..
طوبى وهي تشوف للتلفزيون:حوش عمها بابه مفتوح ليها بتجي مرحبتين بيها بتشد روحها سلامتها..
🍃🍃🍃🍃🍃🍃
"كيف هدا يضحك عليا ولاشني!!؟ والله لو يطلع حق دايرها ياويله"
هادي كوثر اللي قلبت حوش ع اللي فيه بعد ماعرفت انه كاذب ع نجاح وماقالش انه مطلق..
وفي الحقيقه هو ماكذبش..
🍃عواطف اللي كانت مقعمزه في دار مستخطيه وهي خاشة في حالة صدمه تسمع في اصوات نقاشاتهم العاليه ومش قادرة تستوعب شي من اللي صار معاها..
شويه وسمعت اصواتهم تعالت بفزع وهما ينادوا في اسم كوثر وفهمت وقتها ان علة كوثر ناضت عليها بسبب الغضب..
🍃🍃🍃🍃🍃
"مرة مرة تعالوا هدرزوا مش تقطعوا بكل"
اريج:ان شاء الله حنينه..
عمتهم؛زعمه تقدروا تجوا في عرس بنت عمتكم..
أريج؛مش عارفه..تو نشوفوا ونقولولكم..
آلاء:هي اريج عمي يكلكس..
اريج؛اطلعي للسيارة لاحقاتك..
آلاء؛باهي..تصبحوا ع خير..
ومشت طول طلعت..
جدتهم؛خيرها الاء من لما جت وجهها مقلوب جاية بالسيف؟
أريج؛بالعكس هي اللي شدت في المشي غير مرات تتعب في الخدمه..
الجده؛ربي يعاونها..
وعمتها مااقتنعتش باللي سمعاته من اريج..
اريج:بالله ديما فكروا معتز بأمي قولوله برا شوف امك واسأل عليها..
جدتها:والله يابنتي عيينا فيها خوك هو اللي مايبيش..
اريج بضيق:مش عارفه علاش هكي..كيف مش مستاحش امه مش فاقدها بكل..مش قادرة نستوعب..
عمتها؛مازال صغير وواخدته الدنيا تو يكبر ويفهم..
اريج بإبتسامة أسف؛مفروض يحس مش يفهم..وكان ماحسش توا عمره مايحس..هي تصبحوا ع خير..
ومشت طلعت من حداهم وهما ردوا عليها وكانوا متأسفين ع وضع معتز مع امه وخواته...
🍃🍃🍃🍃🍃
بعد صلاة المغرب..
في جامع المنطقه اللي فيها شارع القهوة..
كان الحاج علي قدام الجامع بالزبط واقف مع ولده وهما يشوفوا لمحمد شنيبه اللي كان واقف ع رجالة الجيران ويبان يتكلم بإنفعال..
🍃محمد شنيبه؛منكم جد جايين تسألوا ع حاجه زي هادي! صايرة بينا مشاكل صح لكن ماتوصلش لهني وبعدين ع عينكم امس من وقف فيها شفتوا واحد من ولادي جاي جيهتها!؟ زينا زيكم قعدوا نتفرجوا وحني مش فاهمين شي..
:حني علاش فكرنا هكي لأن في الشارع كله مافي حد عنده مناسبه غيركم انتم..
محمد شنيبه:مناسبة شني!؟ تو هادي مناسبه ياحاج ربي يهديكم وخلاص..
:غير وسع بالك ياحاج محمد حني جايين نستفسروا بس..
🍃علي وهو يشوفله بحده..
/اشبح شن قاعد يكذب ويحط عليهم..
عبد المطلب:هادي صنعتهم خليهم يطيحوا رواحهم برواحهم..هي تعال..
ومشي عبد المطلب وبوه معاه وطول الطريق وهما يهدرزوا..
وين قربوا يوصلوا للمطحن..
عبد المطلب:والله كان خلاص معاش تبي تولي اني نبي نشوغ حالي..
رفع علي حاجبه وقال:كيف بتشوف حالك؟
عبد المطلب وهو يوزع في نظره ع الشارع..
/فاهم عليا ياحاج..
هز علي الواعر راسه بعدين مشي خش للمطحن..
وعبد المطلب كمل طريقه للحوش..
🍃في المطحن..
علي:شن الوضع؟
واحد من عمال المطحن قال بأسف..
/مشيتلهم وحاولت معاهم وهما مسكرين روسهم قالوا اكتفوا باللي عندهم..قهوة الزعيم..وقهوة الامبراطور..الامبراطور هادي مسيطره ع السوق..
علي وهو يفكر بضيق هز راسه بعدين قال..
/باهي باهي..السلام عليكم..
ولف ومشي طلع من المطحن...
:الوضع مايبشرش بخير..
:شكله ربي مش كاتب لهالمطحن يكمل مهما يديروا..
:خسارة والله...
🍃🍃🍃🍃🍃
"إن شاء الله..إن شاء الله......قدامك كل خير...بالسلامه"
ونزلت التليفون وسكرت وهي مستغربه..
بعدين مشت طلعت من الكوجينه وقعدت دور في الحوش ودور..
لين لقت طوبى طالعه من دار بوها وامها..
فردوس:كملتي؟
طوبى هزت راسها بإيجاب وهي تسكر فالباب..
فردوس:تعالي شويه..ومشت..
وطوبى لحقتها وهي مستغربه..
خشوا الزوز للكوجينه وطلعوا منها للجنان..
طوبى:شن في؟
وقفت فردوس وقالت..
/توا في مراة كلمتني قالت تبي نحددلها موعد بش تحكي معاي في موضوع يخص آلاء..
طوبى:قصدك بتخطب؟
فردوس:مش عارفه هكي فهمت منها..وقلتلها نشوف شن عندي ونرد عليك..
طوبى:غدوة وبعده فوتيهم شوفي اي يوم من الاسبوع الجاي..
فردوس بتساؤل:الأحد؟
طوبى:كويس الاحد..
فردوس:خلاص نكلمها غدوة ان شاء الله..تنهدت وقالت..شوفي سبحان الله مواضيعهم جت مع بعضها..
طوبى:ان شاء الله خير..
فردوس:إن شاء الله...
طوبى:خليني نمشي نشوف جنه ..
فردوس:باهي بري..
ومشت طوبى خشت داخل وخلت اختها سرحانه بتفكيرها في مستقبل بناتها وكلام غرفه بهالخصوص قاعد يتردد في عقلها..
🍃🍃🍃🍃
"تبي مستشفى اللي درته اسعافات اوليه بس"
بنبرة قلق ردت اخت كوثر ع عواطف وهي تقول..
/ياحليلي..ومشت بسرعه طلعت من حداهم..
بعد ماطلعت..عواطف التفتت لكوثر وهي تشوفلها بغضب وحزن في نفس الوقت..
الغضب من زوجها اللي دارها وسيله بش يوصل لأهدافه..
والحزن ع حالها وحظها في هالدنيا..
احتارت..ومش عارفه شن دير..شن القرار اللي لازم تاخده!؟
قعمزت بتعب ع المندار وهي تشوف في الفراغ ودموع الحسرة بدت تجري ع خدودها...
🍃🍃🍃🍃🍃
طلعت وقفت ع الفيرندا..شافت تحت..
لقاته مداير تقعميزته المعروفه ويشرب في قهوة وهو لاهي بتليفونه..
ابتسمت بمكر ومشت خشت خدت اللاب توب متاعها..
طلعت من دارها..ومشت نزلت للكوجينه..
خشتلها لقت الشغاله توتي في سفرة عشي خفيف..
صابرين؛جو دقيقه دقيقه ومعاها وجيبيها وتعالي..
الشغاله بضحكه؛حاضر..
مشت صابرين باللاب توب طلعت وتوجهت للباب الشقه..
فتحاته وطلعت من العمارة للحديقه متاعها..
وقعمزت ورا الطاوله وحطت الللاب توب..
شبحتله لقاته قاعد لاهي بتليفونه.
رجعت نظرها للاب توب وقعدت تضرب ع ازراره بروس اصابعها لين اشتغلت اغنيه..اغنيه اختها نجاة الطليانيه المفضله حتى هي كانت تحبها وحفظتها مع اختها..
علت صوت..وحطت يدها تحت ذقنها ودارت روحها منسجمه معاها ومرة مرة تسرقله في النظر..
همها كله تستفزه وطلعه عن طوره وتخليه يغلط قدام مختار اللي كان موجود في الدور التاني وقتها..
شويه وطلعت الشغاله بسفرة العشي وحطتها الطاوله وين جت بتمشي..ناضت صابرين وشدتها وقعدت ترقص وترقص فيها وبدت تغني في الاغنيه..
صوت صابرين كان حلو..
هو رفع عيونه عن التليفون وشبحلها..
لقاها ترقص مع الشغاله وتغني والشغاله تضحك وخلاص..
قعدوا عيونه مع صابرين..حاول يغيرهم عنها ماقدرش...
في هالوقت طلع مختار وقف في الفيرندا وقعد يتفرج ع هبال صابرين..
لقي روحها تلقائيا يضحك..
وصابرين كل مالها تزيد تغني وتعلي في صوتها تبي رضا يدير ردة فعل..
بس هو اكتفي بالنظر ليها وخلاص..
اتكى مختار ع سياج الفيرندا وقعد يتفرج بإنسجام..
شويه شاف رضا ناض وقف قعد يتبع فيه بعيونه..
ورضا مشي بإتجاه صابرين اللي كانت مهيئة نفسها للمسرحيه اللي تبي ديرها..
هو فات من جنبها..وهي.تقول في نفسها..
"ايه ديرها وسكره سكره"
مختار رفع حواجبه تعجبا لماشاف رضا خدي سفرة عشاها ومشي قعمز بيها في مكانه..
تمت الاغنيه..هو بدي ياكل وعيونه في السفره وقعد يأشر بسبابته وهو يحرك فيها حركه دائريه بمعنى عاودي...
هي حطت يدها في نصها وتشوفله بغيظ..
والشغاله قالت بضحكه..
/هعملك غيرها..
ومشت خشت داخل..
ابتسم مختار بعدين وقف ع حيله وقال..
/صابرين..
هي انفجعت وقامت عيونها فوق..
مختار حط ايديه في جيوبه وقال..
/معاش كلمتي اختك؟
هي نزلت راسها والتفتت لرضا وهي تشوفله بمكر..
رضا قام راسه وقال..
/طيحت تليفونها في حوض سمك الزينه بكري..
هي تبدلت نظرتها ليه للحده..
مختار:كيف درتيها هادي!؟ اها قصدك ماتبيش تكلمي اختك خايفه عليها متلا!
رفعت راسها وجت بترد..
رضا:لالا مش بالقصد تسلحب من يدها..
التفتت وشبحتله وقالت قرفا بهمس..
/تسلحب!
مختار:عطيها تليفونك رضا خليها تتصل بيها..
رضا وقف مضغ وهو يشوف لصابرين اللي قعدت تشوفله بإبتسامه مكر..
هز راسه بالموافقه بعدين ناض ومشالها عطاها التليفون..
هي خداته..وكان باين عليها مش ناويه خير..
مختار:استني لين ننزل..
ومشي خش داخل..
رضا بحده؛تعرفي دير فيه حاجه تشوفي مني احرف اللي وريتهولك لتوا..
صابرين قعدت تشوفله بإستفزاز..
هو بحده قال..
/حذرتك!..
ع جية مختار..
هي تباعدت عن رضا ومشتله..وقعدت تضرب ع رقم اختها ومختار ربع ايديه وهو يشوفلها..
ورضا عيونه ع تليفونه...
اتصلت صابرين بأختها..
هالمرة الخط نادى لين فصل وماردتش..
مختار:عاوديلها..
عاودت وكذلك لين فصل الخط وماردتش..
مختار:اختك استقالت..
ابتسمت تهكما وقالت..
/مااستغربتش..
مختار:ع العموم تو نحاول نعرف بطريقة تانيه اللي صار..
شاف لرضا وقال..جيبلها تليفون وشفره توا الليله يكونوا عندها..
صابرين قعدت تشوف لرضا بإبتسامة مكر..
رضا وهو يشوف لمختار؛حاضر..
مختار:صابرين غدوة عندك شغل في مطعم ***** مع واحد تو نعطيك اسمه ورقمه والمكان اللي يخدم فيه الموضوع اللي بتشوفيه ع خاطره ضروري جدا يتم غدوة..
صابرين وهي تشوفله؛حاضر..
رضا وهو يشوفلها حس بشي من الضيق استغربه وماعرفش سببه...
مختار شبحله وقال:رضا بعد ربع ساعه عندي مشوار..
ومشي طول خش داخل..
رضا بحده؛التليفون..
هي وابتسامة ساخرة ع وجهها جاته..وقفت قدامه ورفعت يدها اللي فيها التليفون وطلقاته..
فنص فيها رضا..مدت يدها التانيه من تحت شدت بيها التليفون وهي تضحك..
هو جبده منها بقوه وجي بيمشي..
وقفاته لما قالت..
/ايه حقه وحده من صاحباتي مش عارفه شن شافت فيك عششت تبي رقمك نعطيها؟
التفت وهو يمرر في نظره ع المكان بعدين شبحلها وقال..
/في ناس نعرفهم يمشوا معاهم النماذج اللي تعرفيهم عطينا رقمها وتو نوصلها بيهم..
صابرين حست انه يقصدها بكلامه..
تبدلت ملامح وجهها للغضب والدموع عبوا عيونها..
هو قعد مركز ع عيونها وملامح الكبر باينه في وجهه..بعدين لف ومشي لمكانه..
وهي معاه بعيونها..قعدت تشوفله للحظات..
وهو ياكل..
بعدين بعصبيه سكرت اللابتوب وخداته ومشت بسرعه خشت داخل وهو وراها بنظره..
🍃🍃🍃🍃🍃
ونجاة فهالوقت..كانت عايشه مع ذكرياته وهي تسمع في نفس الاغنيه..وقعدت ترسم في احلامها اللي تتخيل فيها تتحقق واهم انها تقعد الزوجه الوحيده للجالي وتشاركه في كل شي يخصه مش بش الخدمه...
🍃اما هو فكان عايش مع ذكرياته..
الذكريات اللي جمعاته بطوبى..الذكريات الحلوة..
والتفاصيل الاحلى..
مش قادر يستوعب انها رافضة رجوعها ليه حقيقه مش مجرد ردة فعل..
توقع منها ردة فعل قويه بعد زواجه العلني من نجاة..جابها عليها...توقع ردة فعلها تكون رجوعها ليه بس اللي صار كان العكس تماما..
وهالشي قهره لأنه أكدله ان طوبى ماتكنلاش اي شعور ليه علاقة بالحب وهو مأثر فيها نهائي...
شد بقوة ع تعليقه السلسله متاعها اللي كانت اسمها بعدين قال..
/والله لما نخليك تحبيني غصبا عنك ياطوبى وتولي بروحك بروحك...
....يتبع....
#حرب_باردة
#طوبى
