بعد مسافه من التفكير قلت إني لو إتطلقت متأكده إنو أهلي ما حـ يخلوني في حالي ، مش أبوي في معنى قال ما عندو شغله بي تاني بس انا متأكده بكرا لمن يشوفني قاعده كدا ساي الوضع ما حـ يعجبو و أمـي كمان هي حـ تنق أكتر منو ، مستحيل ترضى تخليني أتم باقي عمري من دون زواج و أنا خلاص بطني طمت و اقتنعت إني غير صالحه للزواج ، طبعاً ناس حبوبه جوا لمن عرفوا من أمي الحصل ، حبوبه قالت لي غيتو انتِ كما خربتي بيتك ما بترتاحي و ياهو قربتي تخربيهو ، أووعك تقولي عايزا الطلاق ، سارا قالت والله يا جماعه انا شايفه الموضوع بسيط و ما كان يصلنا أصلاً ، موضوع زي دا يا مها بتحلى في بيتكم من دون ما نحنا نسمع بيهو ، يعني ناصر لمن عرف ليه ما ساقك و جابك لأهلك و قال ليك طلقانه ؟؟ لأنو عارف موضوع زي دا خاص بيكم الإتنين و لأنو زول فاهم و واعي ما جاب سيرة الموضوع لزول ، يعني لو ما انتِ جيتي و إتكلمتي ماف زول كان حيعرف بالحاجه دي ، و غير كدا لو كان هو قنع منك بعيداً عن السبب دا و نوى يطلقك كان طلقك طوالي ! بس هو شكلو ما عايز كدا ، قلت ليها يا سارا انتِ ما عارفه هو بقى يتعامل معاي كيف ، قال لي لو عايزا الطلاق طوالي بطلقك و قال إنو حيشوف حياتو على كل الأحوال ، بعد كلامو دا البقعدني معاهو شنو ؟؟
حبوبه قالت لي دا كلام زعل ساي ، و حاجات زي دي بتحصل في بيت الزوجيه و أنا ما شايفه أي سبب يخليك تطلعي من بيتك ، في نفسي قلت صحي الجمره بتحرق الواطيها ، بس ألومهم ليه و هم ما عايشين معانا في نفس البيت ولا عارفين شكل التعامل بيناتنا !! سارا قالت لي أهلو عارفين ؟؟
قلت ليها ما عارفه ، أمـي قالت ليها ما أظن كلمهم ولا حـ يكلمهم ، حبوبه قالت ليها أكيد ما حـ يكلمهم ، سارا قالت لي طيب يا مها انتِ عايزا الطلاق ؟؟
قلت ليها لو هو عايز.....قاطعتني رشا و قالت : لو هو عايز يطلقني خليهو يطلقني طوالي و يسلمني ورقتي ...قالت لي حفظنا النغمه دي ، سارا ضحكت و قالت لي معناها ما عايزا الطلاق لأنو مستحيل تسكتي و تغلفي جوابك كدا لو كنتِ عايزا الطلاق ، حبوبه قالت لـ سارا كدي اتصلي لي على ناصر دا ، نططت عيوني و قلت ليها لشنووو ؟؟
قالت لي انتِ مالك !!...سارا طوالي إتصلت عليهو و أدتها التلفون ، لمن فتح الخط قالت ليهو ناصر يا ولدي كيفك أنا حبوبتك إخلاص ....كويسين الحمدلله انت كيفك..... الحمدلله ، اها قول لي الحاصل شنو بينك و بين البت دي !؟...كلمتنا والله لكن قلت أسمع من الطرفين .......اها يعني من الآخر كدا بتدور تطلقها ؟؟!
طبعاً في اللحظه دي رفعت راسي و عاينت ليها .....قالت ليهو اهااا .... والله هي ذاتا بتقول نفس كلامك دا و قالت القرار قرارك و انت بتقول القرار قرارها و انك حـ تعمل البريحها ، طيب انتوا وقت ما عايزين الطلاق دا الجابركم شنو و أساساً الوصلكم لدرب الطلاق شنو ؟؟
مش ياهو الموضوع داك ؟؟...شفت تقعدوا في الواطه دي و تحلوهو و ذاتو ما مفروض يطلع من بيناتكم.....اي أنا عارفاك يا ولدي ما بتوصل لينا كلام زي دا و الشينه ما بتطلع منك لكن هي كمان كلامك زعلها عشان كدا جات بيت أهلها و انت تاني ما اتصلت عليها ولا قلت ليها عينك في راسك عشان تفهم انك لسه باقي عليها ...... والله كلنا بقينا محتارين معاكم ، أنا شايفه إنو الأفضل تقعدوا مع بعض و تتفاهموا.....عاينت لي و قالت ليهو ولا أحسن أديك تتكلم معاها ، هاك التلفون يا مها ، طوالي قمت من مكاني و مشيت دخلت غرفتي و قفلت الباب علي ، قلت حبوبه دي بالغصب عايزا تشبكني فيهو و هو أكيد ما بقدر يقول ليها لا ، قلت على كيفو أنا ذاتي بقيت مجهجه و ما عارفه أختار شنو ، بعد مسافه طلعت من غرفتي لقيت ناس أمي لسه بتكلموا في الموضوع ، حبوبه قالت ليهم لو عايزين مصلحة البت دي أمنعوها من الطلاق ، قلت ليها تمام ما حأقول ليهو طلقني لكن بشرط ...كلهم عاينوا لي ، واصلت كلامي و قلت ليهم ما حأرجع ليهو حأقعد هنا ، حبوبه قالت لي و دا فرق من الطلاق شنو ؟؟ أمي قالت لي كدا الفايده شنو ؟؟
سارا قالت ليهم يمكن هم عايزين فتره كل واحد يرتب فيها أفكارو و يعرف نفسو عايز شنو و الفتره دي ممكن نسميها فترة نقاهه ، خليهم على راحتهم ، لو ما حسوا بفقدانهم بعض ما حـ يرجعوا لبعض ، الفتره الحياخدوها هم الإتنين حـ يقدروا من خلالها يقرروا انهم حـ يستمروا مع بعض ولا دي النهايه.....حسيت إنو سارا هي الوحيده البتفهم علي حتى و أنا ما قادره أفهم نفسي .... فعلاً أنا ما عايزا أطلب الطلاق و في نفس الوقت ما بقدر أرجع ليهو تاني و هو شبه بقى ما بحبني ، قلت ليها دا العايزاهو يا خالتي لكن هم ما بفهموني ، قالت لي لا لا حـ يفهموك ، عاينت ليهم التلاته و قالت ليهم عندكم مانع ؟؟
حبوبه قالت ليها لكن كدا ما بجي و.....رشا قاطعتها و قالت ليها بالعكس يا حبوبه أنا شايفه دا حل مناسب ، خليهم يبعدوا عن بعض شويه و المشاكل البيناتهم دي تخف بعدها الوضع بيناتهم حـ يرجع أحسن من الأول ، رشا عاينت لأمي و قالت لي ولا رايك شنو يا أمي ؟؟ عليك الله ما تضغطي عليها ، بعد مسافه هزت راسها و قالت طيب لكن أبوك حيوافق !؟ سارا قالت ليها خليهو علي و أصلاً الموضوع ما خطير يا جماعه ، انتوا براكم بتصعبوا الأمور و بتتعاملوا مع أي مشكله أو حدث بحذر شديد و بتعملوا من الحبه قبه مع إنو حاجه بسيطه !!
المهم مشيت خليتهم و قعدت في غرفتي ، سارا جات إتونست معاي مسافه ، كانت بتسألني هو عرف كيف و و و ...قلت ليها ما عارفه و حكيت ليها الحصل ، قالت لي المهم أخدوا فترتكم بعدها لو حسيتوا انكم عايزين بعض أرجعوا لبعض و لو لا ما حتكونوا خسرتو حاجه ، أهم شي الزول يتأنى في قراراتو عشان لمن يخت نقطة النهايه يختها بقناعه تامه من دون ندم بس أنا حاسه انكم حترجعوا لبعض و على فكره أنا قبل كدا حضرة الحلقه حقتكم من برنامج دردشات في اليوتيوب ، غيتو واضح انكم عايزين بعض و ناصر لو كان عايز يطلقك ماف شي بيمنعو ، قلت ليها و يمكن عندو نيه يطلقني بس ما عايز عشان أهلي ، قالت لي المسأله مسألة زمن و بكرا ترجعوا أحسن من الأول 💜
المهم اتونست معاي لغاية ما سمعت صوت ناس أبوي ، قالت لي ناس بيتكم ديل بحبوا يكبروا المواضيع ، المهم أبوك خليهو علي ، متأكدة اني حأقنعو بالفتره المحتاجنها إنتوا الإتنين ، و ناصر ذاتو حـ اتصل عليهو و أكلمو ، ماف داعي للإنفصال و البهدله....
المهم ما عارفه أبوي قال ليهم شنو بالظبط بس تاني ماف زول فتح معاي الموضوع ، قعدت في بيتنا أسبوعين و أنا قافله تلفوني ، يعني معزوله عن الناس إلا ناس بيتنا ، المهم يوم أمي أصرت إلا أمشي معاها ناس خالتو نعمات و طبعاً دي أم غسان ، قالت لي بقيتي ما بتطلعي من البيت عشان كدا أرح معاي و بعدين انتِ غسان دا من جا ما مشيتي حمدلتي ليهو السلامه ، قلت ليها لاقيتو قبل كدا يا أمي ، قالت لي ما وصلتي بيتهم ، نعمات دي ما بتقصر لكن جنها لوم ، لو البيت كلو جاها و نفر واحد بس ما وصلها بتطلع الناس كعبين و بتقول ما جوني ، المهم إستسلمت و مشيت معاها ، أول ما جينا داخلين غسان كان طالع ، سلم علينا و رجع دخل جوه مع إنو كان طالع !! المهم دخلنا و سلمنا على أمو و باقي ناس البيت ، وحده من أخواتو ضيفتنا و دخلت غرفتها طوالي ، طبعاً أخواتو مفتريات لأبعد درجه و ما بطلعوا من بيتهم لأي زول إلا ناس معينين بشبهوهم في الإفترى ، أمو قالت لي طولت ما شفتك يا مها ، غسان ولدي من جا من السفر طووول شديد معقوله ما سمعتي بيهو!؟
قلت ليها والله يا خالتو كنت مشغوله و بيت أهلي دا ذاتو ما جيتو كتير عشان أصلكم....المهم ضيفتنا و قعدت تتكلم لينا عن غسان و الحاجات الجابهم ليهم من سفرهم ، طبعاً هي بتحب الفشخره زي عيونها و أولادها ديل ما شايفه زول زيهم ، قالت لينا ولدي ما شاء الله بنى البيت و صلحو و رتب وضعو و هسي ما ناقصو شي غير العروس ، أمي قالت ليها ربنا يبارك ليهو و يزيدو و العروس بكرا بتجي ، قالت ليها والله أعمل ليهو عرس لا شافوهو لا سمعوا بيهو و العروس حتكون من إختياري ....فجأه كدا غسان جا داخل ، قعد و قال لأمي كيفك يا خالتو سهام و كيف عامله مع جري الشغل ، قالت ليهو أسكت ساي تعب زي التعب لكن الحمدلله ، المهم قعد يتونس معاها بس نظراتو علي و أنا الوضع ما كان عاجبني و كل مره بعمل لأمي حركه بعيوني عشان تفهم إنو لازم نمشي بعد دا ، غسان كان لمن يسألني بجاوب ليهو بإختصار ، خالتو نعمات قالت لي هسي يا مها من عرستي ليك كم شهر !...عاينت لأمي و قلت ليها 5 شهور ، قالت لي و لسه ماف حمل ؟؟
أنا أول شي اتضايقت لأنها جابت لي سيرة الموضوع دا و تاني شي لأنها قالت كدا قدام ولدها !!...أمي قالت ليها لسه والله ، كل شي قسمه و نصيب ، قالت ليها فعلاً والله لكن هم ما مشوا فحصوا ؟؟ العيب من منو ؟؟
قلت ليها ما مشينا لأننا ما مستعجلين و الموضوع ما خطير ... قلت كلامي دا بنبرة زهج لكن بصوت هادي شويه ، وقفت على حيلي و قلت لأمي خلينا نمشي بعد دا ، خالتو نعمات قالت لي بري بري يا بت سهام بقيتي زعيله !! قلت ليها ما زعلت يا خالتو بس نحنا اتأخرنا ، أمي قالت ليها ماف زعل بس نمشي بعد دا ، المهم قدمتنا لحد الباب و رجعت ، أول ما طلعنا قلت لأمي هي مالها ؟؟بخصها في شنو !! ما عارفه ليه الناس بتتحشر في حاجه ما بتخصهم و هل شرط إنو أي اتنين عرسوا معناها لازم و بأي طريقه يكون عندهم طفل عشان البشر ديل يقفلوا خشومهم و ما يتحشروا في حاجه أصلاً ما بتخصهم !!؟
قالت لي عاد بنقدر على الناس !!....بقيت انقنق و أطنطن ليها لغاية ما وصلنا البيت ، لقينا رشا جات من الجامعه ، المره دي كانت مبسوطه و بتضحك ساي ، أمي قالت ماسكاك أم فريحانه ؟؟ قالت ليها لا ، قالت ليها طيب بتضحكي براك مالك ؟؟
قالت ليها مش بقولوا أضحك للحياه عشان تضحك ليك ؟ يلا انا قررت أتبع المقوله دي ...أنا عاينت ليها و رفعت ليها حاجبي ، قالت لي تعالي أوريك صورنا قبيل أنا و صحباتي لمن مشينا مطعم ، عرفتها عايزا تقول لي حاجه ، المهم مشيت معاها غرفتها ، أول ما دخلنا و هي قفلت الباب ، قلت ليها حسام مالو ؟؟ ضحكت و قالت لي يعني كنتِ عارفاني بكذب ؟؟ قلت ليها أكيد....جات قعدت جنبي بحماس و قالت لي مش كان قلت ليك إني إعترفت لـ حسام و هو سفهمي و انا قررت أنساهو ! قلت ليها اها....قالت لي والله رغم إنو كان صعب علي بس ضغطت على نفسي ، حذفت رقمو و بقيت ما بمشي مع فدوى أختو و باقي الشله ، الفتره ديك بالجد دخلت في إكتئاب ، و أي زول يسألني بقول ليهو مضغوطه مع القرايه ، حتى صحباتي لمن سألوني ليه اتغيرت و بقيت ما بمشي معاهم قلت ليهم نفس السبب دا مع أسباب واهيه اخترعتها من عندي ، المهم بعدها بقيت اتأقلم و أحاول أنسى حسام و أقطع علاقتي بـ فدوى ، طبعاً هو بعد ما كان إعترفت ليهو بأسبوعين حتى رد علي و قال لي انتِ بالنسبه لي زي فدوى ،رسالتو وجعتني وجع , غصبت نفسي و قلت ليهو انت كمان زي زيدان أخوي و أنا آسفه يا حسام لأنو الجمله ديك بالغلط طلعت مني ، صدقني إتلخبطت و ما كنت قاصده أقولها ليك انت ، المهم كدا سوء التفاهم وضح و نحنا حالياً زي الأخوان و انت أفضل أخ بعد زيدان 😀 قرا رسالتي بس ما رد عليها بقيت أوصل ليهو فكرة إني إتجاوزتو ، بخت إستوري ببين فيهو إني مبسوطه شديد و حوليني ناس متكيفه من وجودهم و ما ناقصني زول ولا محتاجه لزول ، طبعاً هو كان بشوف الإستوري حقي أول واحد و بقيت أحسو بنتظري متين أخت إستوري ، المهم استمريت كدا ، يوم هو جا الجامعه عشان يسوق فـدوى ، كان لمن يجي بسوقنا الإتنين ، فدوى جات و قالت لي حسام منتظرنا برا ، قلت ليها أمشي ليهو لأني طالعه مشوار ، قالت لي بإستغراب مشوار شنو ؟؟...غمزت ليها و قلت ليها حـ أغنج بيهو.... طبعاً قلت كدا قاصده عشان هي تفهم إني ما واقفه على أخوها و عشان توصل ليهو الكلام دا ، المهم أنا طلعت قبليها ، لمن شفت حسام عملت نفسي ما شايفاهو ، جا علي و قال لي فدوى وين ؟؟ قلت ليهو جوه ، قال لي تعالي أركبي طيب الشمس ، قلت ليهو لا لا أنا ما ماشه معاكم ، عندي مشوار و طوالي عاينت لـ ساعة يدي و قلت ليهو اتأخرت و طوالي مشيت بإستعجال عشان ما يوقفني تاني ....المهم بقيت اتجاهلو كدا و وصلت ليهو فكرة إني حابه زول تاني و أمورنا واضحه ، يوم لبست خاتم و ختيت صورة يدي إستوري ، لمن شافها قال لي مبروك رغم إنك ما عزمتيني ، طبعاً ما رديت على رسالتو دي إلا تاني يوم ، قلت ليهو الله يبارك فيك لكن لشنو ؟؟
قال لي الخطوبه ، قلت ليهو خطوبة منو ؟؟ قال لي الإستوري !! قلت ليهو اهاااا 😂 كنت بجرب في الختام لأنو اليوم دا ما حيكون بعيد ، قال لي واضح إنو أمورك وضحت بعد دا ، قلت ليهو نص نص ، قال لي من الجامعه ولا شنو ؟؟
قلت ليهو لا ، قال لي اهااا...و سكتنا على كدا و انا استمريت في البعمل فيهو لحد ما براااهو يوم لمن فاض بيهو و غلبو لمن جا الجامعه قال لي عايز اتكلم معاك ، قلت ليهو مستعجله أنا و كنت حأتحرك ، قال لي عايني من الآخر كدا أنا حبيتك و ما عندي مانع أصل البيت ....قلت ليها وااااي ما بصدق !!😍
قالت لي حسيت نفسي اتصلبت في مكاني و المشي غلبني بس عملت نفسي تقيله ، إتلفت عليهو و قلت ليهو لكن أنا في زول وافقت عليهو و قال حـ يصل البيت ....ما شفتي ملامح وشو إتغيرت كيف ....قلت ليها وااااي أنا منك يا متخلفه ، قال ليك شنو بعدها ؟؟
قالت لي رجع بدربو ، بس في نفس اليوم رسل لي و قال لي أنا ما عندي بيهو شغله و ما بعرف حاجه اسمها إنو عندك زول غيري و بعدين فهميني كيف إعترفتي لي و جيتي قلتي حصلت لخبطه و انك ما قاصده تقولي الكلام دا لي أنا ...قايلاني صدقت عذرك ؟
المهم في النهايه إتفقنا بس نهاي ما قلت ليهو إنو دي كلها كانت حركات مني و إنو ماف زول في حياتي ، قلت ليهو لقيت الولد داك ما بنفع معاي و إنتهينا ، المهم هو هسي منتظرني بس اديهو رقم أبوي عشان يصلح البيت..... طبعاً فرحت ليها شديد و قلت ليها طلعتي قاااادره و لفيتي ليهو راسو 😂😂
قالت لي أصلهم ما بجوا إلا بالطريقه دي ، الواحد أول ما يعرف إنو البت معجبه بيهو أو بتحبو برفع قزاز ، لكن والله أول ما تتجاهليهو و ما تشتغلي بيهو كتير ببقى ليهو حار عشان كدا أنا ندمت لأني إعترفت ليهو ، إحراجو كان حار شديد والله و ساعتها حسيت بالرخصه 😭😂😭😂😭 بس هسي الحمدلله حـ يجي و يتقدم لي ، قلت ليها فرحت ليك والله و ربنا يتم ليكم على خير....
المهم بعدها مشيت غرفتي و فتحت تلفوني بعد أسبوعين ، لقيت كميه من رسايل الواتس في القروبات و رسايلي من رتاج و ورده ، إتصلت على رتاج و طمنتها علي و قلت ليها كنت قافله التلفون و ماخده إجازه عشان أرح راسي ، قالت لي كالعاده متناقشه مع ناصر قلت ليها فعلاً و هسي في بيت أهلي ، من دون ما تكتر قالت لي ربنا يهديكم و ان شاء الله ترجعي بيتك.....بقيت أحس انها بقت ما بتحب تسمعني و أنا بحكي أو بشكي ليها خاصة لو الموضوع بتعلق بـ ناصر ، قلت شكلي صدعت بيها عشان كدا ما حأحكي ليها تاني و أساساً هي واضح إنها ما عايزا تعرف تفاصيل الحصل ....المهم بعدها دخلت الواتس و قريت رسايلي ورده القبل 3 أيام ، طبعاً هي كانت متصله علي قبل كدا ، كاتبه لي : أمبارح جيتكم في البيت بس ما لقيتك و لمن سألت ناصر قال لي في بيت أهلها و حسيت إنو في شي !! مالكم تاني ؟؟
قلت معناها ناصر ما كلم أهلو و إلا أمو و نازك أختو ما كانوا ريحوني ، قلت ماف شي بس الفتره دي أنا عندي إجازه و قلت بدل أقضيها في البيت أحسن أمشي اقعد مع أهلي ....بعد دقيقتين جات و قالت لي اهااا كويسين هم ؟؟ قلت ليها كويسين ....أنا متأكده انها ما صدقتني لكن مشتني ، طبعاً ناصر لا اتصل لا رسل لي ....بعدها بيومين نزلت شغل و بقيت كل يوم أخت صوري استوري في الواتس دا غير بوستاتي الكلها سعاده في الفيس ، كنت مجتهده شديد عشان أعمل نفس العملتو رشا و بنبسط شديد لمن أعرف إنو ناصر شاف الإستوري حقي ، كل يوم بنصل صور سواء في الإستديو و مع الضيوف أو بكرا الإستديو في مطعم أو مول ، كنت بظهر عكس الحاسه بيهو تماماً ، يوم ختيت صورتي و كتبت عليها : ماف أي إحساس ممكن يساوي إحساس الحريه ✌️💜
المهم قبل يوم 31 ديسمبر ناس البيت قعدوا يخططوا يمشوا وين ، قالوا طولنا ما طلعنا و المره دي لازم نطلع في راس السنه و نحتفل ، بنات أعمامي و عماتي ذاتهم جونا عشان يختتوا معانا ، حبوبه قالت ليهم هووووي دائماً انتوا البتختاروا و نحنا وين وين بنجي و بنمشي معاكم ، المره دي أنا الحأختار ، كلنا عاينا ليها و قلنا ليها شنوووو !! وحده من بنات أعمامي قالت ليها بس ما تكوني عازمانا في البيت و عامله لينا شاي بالزلابيه ، قالت ليها لو بترضوا بعملها ليكم والله ، لكن انتوا كما طلعتوا و عملتوا حركات الصعاليق دي ما بترتاحوا ، ضحكنا و قلنا ليها هسي مش كنتِ بتخططي معانا ؟؟ قالت لينا أسوي شنو بتسمعوا مني انتوا ما ياما اتكلمت و قلت ليكم راس السنه دا كلام فارغ و غير الإنطلاقه و قلت الأدب ما فيهو شي ، سارا قالت ليها والله يا أمي أي زول حسب تفكيرو ، أنا بالنسبه لي راس السنه دا نهايه لـ سنه انطوت بـ حلوها و مره و دخلت سنه جديده و عمر جديد و دائماً البدايات بتدي الواحد أمل ، بت عمي قالت ليها و بعدين البقلوا في أدبهم ديل ما منتظرين راس السنه ، المن بيتهم ما إنسترت و ما إتربت ماف يوم بسترها و بتقدر تقل أدبها في كل أيام السنه ، أمي قالت لينا والله هو اليوم دا الشين فيهو و السمح فيهو و ذاتو في السنوات الآخيره غير القتل و السرقه و الإغتصابات ما فيهو شي......المهم هم بدوا يتجادولوا مع بعض و يتناقشوا و أي زول يقول وجهة نظرو في الآخر حبوبه قالت ليهم خلاص وقت مصرين تعالوا حديقة الكلاكلات لكن نرجع بدري ....كلهم عاينوا لبعض و قعدوا يضحكوا ، قالت ليهم ماااالكم كمان !! زيدان قال ليهم ماف مشكله لـ مره وحده اسمعو كلام حبوبه ....المهم يوم 31 ديسمبر خالي إيهاب كان بتكلم معانا فيديو كول هو و مرتو من ماليزيا ، سلم علينا و سألنا و سألناهم عن أحوالهم و قالوا حـ يرجعوا قريب ان شاء الله ، قلنا ليهو إتمنينا إنك تحضر معانا السنه الجديده ، قال لينا ياريت والله طبعاً الزمن داك الساعه كانت 10 ص ، بعدها طلعت و مشيت شغلي ، كتبت في حسابي حق الفيس :
"أخدوا العبر من النهايات ما من البدايات ، لأنو البدايه مهما كانت مشرقه و مبهره فـ هي مزيفه و كاذبه ، أما النهايات مهما كانت باهته و قاسيه فهي صادقه "
فـ اختار صِدق يبكيك و لا تختار كذب يضحكك
بعد قدمت حلقتي و فتحت الفيس ، اتخيلوا لقيت ناصر عامل لاف على البوست حقي !! و ما رسل ولا علق ! قلت يمكن بالغلط !!
المهم لمن رجعت البيت لقيتهم بجهزوا في نفسهم و بيتنا ملان ، عملوا عصاير و أكلات خفيفه عشان نشيلهم معانا و من بعد المغرب طوالي طلعنا ، غشينا ناس حبوبه في الكلاكله القبه و منها مشينا الحديقه ، كانت زحمه مبالغه و الألعاب شغاله و أصوات ضحك و صريخ من جوه الألعاب ، أول ما قعدنا كدا حبوبه قالت عليكم الله شوفوا العواليق ديلك ، لمن إتلفتنا لقينا بت قاعده وسط ولدين و التلاته لاصقين في بعض ، حبوبه قالت هسي الزول لو مشى و كفت البت دي غلطان؟ قلنا ليها ياخ يا حبوبه ما عندنا بيهم شغله و بقينا نطلع في الأكل و نخت فيهو و طبعاً حبوبه بتحمر ليهم ساي لمن قاموا و مشوا من جنبنا ، طبعاً هم كانوا كل ما يعاينوا علينا يلقوها بتحمر ليهم و نهاي ما كانت بتنزل عيونها عنهم ....المهم بعد أكلنا وحده اسمها سماح بت عمي قالت لينا أرحكم نجرب الألعاب ، قلت ليهم اول شي نمشي السفينه ، رشا قالت لينا بري دي الموت الأحمر ما حـ اركبها معاكم ، قلت ليها أرح صورينا طيب ، المهم نحنا مشينا قطعنا تذاكر و انتظرنا الصف بعدها ركبنا و أول ما اشتغلت كلنا بدينا نصرخ و هي بتصور فينا و شغاله لينا بصوت عاالي تستاااااهلوا ، لمن نزلنا سماح قعدت تستفرغ و قالت توبه و رشا تضحك فينا ساي ، قالت لينا يلا أرحكم معاي السايقه ، قلت ليها بري أنا ما ماشه براك عارفه إنو عندي فوبيا من الإرتفاعات الشديده ، قالت لي هسسسسي السفينه دي ما طيرتك فوق ؟؟ ارتفاع ولا ما إرتفاع ؟؟
قلت ليها السفينه بترتفع لكن بتتحرك أفقياً ، لكن السايقه رأسياً و أعلى من السفينه بكتير ياخ أنا لو عاينت تحت ساي راسي بلف و بحس إني حـ أجي واقعه ، المهم جزو مشى مع رشا و جزو بقى لافي معاي في الحديقه ، الجو كان حلو و الشفع بتجارو يمين و شمال ، كل مكان بنمشي ليهو بنقيف نتصور فيهو و أنا كل الصور نزلتها في الفيس و الواتس ، المهم في نهاية الساعه 11 الناس كلها جهزت ألعابها الناريه و لمن بدا العد التنازلي أنا كنت بصور فيديو و رشا و بنات عمي و أعمامي كانوا ماسكين ألعابهم الناريه ....5 ، 4 ، 3 ، 2 ، 1....و طوالي إشتعلت الألعاب الناريه و السما كلها بقت عباره عن ألوان و دا غير صوت الكواريك و الصفافير ، طبعاً نزلت جزو من الفيديو في الواتس و كتبت سنه سعيده عليكم كلكم .... طبعاً ناصر كان بشوف كل الإستوري حقتي ، اتخيلوا قبل ما أطلع من الواتس هو رسل لي !!
قلت حركات رشا جابت فايده ، انتظرت شويه بعدها دخلت دردشتو ، كان كاتب لي سنه سعيده عليك يا رب و معاها ملصق قلب ، قلت ليهو و عليك يا رب ، قال لي مشيتوا وين ؟؟ قلت ليهو حديقة الكلاكلات ، و انت ؟؟
قال لي مع الشباب في شارع النيل ، قلت ليهو اهااا ....فجأه كدا قال لي ممكن نرجع ؟؟
قلبي عمل شحححح و قريت رسالتو دي تلاته مرات ، قلت ليهو ما عارفه يا ناصر ، انت القنعت مني ، قال لي عمري ما قنعت منك ، ممكن ننسى الفات و بمناسبة السنه الجديده دي نبدا صفحه جديده ؟؟
قلت ليهو ممكن 💜
بعدها بقيت أتونس معاهو و هو كان بحكي لي عن شعورو و الحصل معاهو في الفتره الغبت فيها ، نسيت كل الناس الحوليني و بقيت أتونس معاهو ، كان نفسي اسألو و اقول ليهو انت عرفت من وين بموضوع الحبوب دا بس قلت ما أعكر الجو ، لقدام حـ أعرف ، المهم بعدها نحنا وصلنا حبوبه و كنا حـ نمشي بس قالت إلا نبيت معاها و نمشي بكرا ، المهم إستسلمنا و قعدنا معاها ، نحنا البنات برانا إتقسمنا على غرفتين و أمي و سارا ناموا في غرفه وحده و زيدان و اتنين من أولاد عمي ناموا في الهول و رشا مشت نامت مع حبوبه ، طبعاً أبوي ما جا معانا أصلا هو خالص ما بحتفل بـ راس السنه ، طبعاً البنات أول ما رقدوا كدا ناموا ، أما أنا فـ بقيت مساهره مع ناصر ، بنتونس ساي لحد الساعه 2 قال لي مشتاق ليك شديد والله و ما عايز الدردشه دي تخلص بس كفاك نومي هسي و بكرا أنا بجي عليكم عشان أسوقك ، قلت ليهو نحنا هسي بايتين مع حبوبه و بكرا احتمال نرجع البيت الضهريه كدا لأنو لو ما فطرنا حبوبه ما حـ تخلينا نمشي ، قال لي ما مشكله بجيكم المسا ، قلت ليهو طيب + ناصر أنا بالجد آسفه ....قال لي قلنا شنو ؟؟؟
ما عايز السيره دي تتفتح تاني ....المهم تصبحي لي على خير ، قلت ليهو و انت من أهل الخير 💜
بعدها نمت و أنا مبسوطه من جواي و عايزا بكرا دا متين يجي ! حاسه نفسي زي البحلم بس حتى لو حلم ما عايزا أصحى منو ...
أتمسّك بك
لأنك الوحيد الّذي أحبّني في أشد حالاتي
ولأنّك من إستطاع أن يُعيد لي
شعُوري إتجاه الأشياء
إنني أُحبك أكثر من كُل شيءٍ حولي !💜
يتبع......
