قلت ليهو ما عارفه والله هسي ياداب ماشه أقعد معاها و أفهم الحاصل ، قال لي تمام بس لو في شي و الموضوع كبير كلموني تمام ؟؟ قلت ليهو تمام ، المهم نزلت ليها تحت و قعدت معاها ، قلت ليها يلا أحكي !!
قالت لي أنا مش قبل كدا حكيت ليك عن حسام أخو فدوى ؟؟ قلت ليها أيوه متذكره ، قالت لي أنا ما قدرت أمسك نفسي و رغم إني ما متأكده إذا عندو مشاعر لي ولا لا بس مع ذلك مشيت و إعترفت ليهو .....قلت ليها شنووووو !!...طيب ردة فعلو كانت شنو ؟؟
قالت لي : ما قال حاجه و صحباتي جوا و قالوا لي لازم نمشي بعد دا ، قلت ليها كنتوا وين انتوا ؟؟ و متين الكلام دا ؟؟
قالت لي قبل يومين ، كنا في بيت ناس فدوى لأنو أبوها عملوا ليهو عمليه ، مشينا ليها أنا و الشله ، بعد ما سلمنا على ابوها و ناس البيت قعدنا في الصالون و كنا بنتونس مع بعض و أنا لمن زيدان اتصل علي طلعت برا عشان جوه كان في جوطه شديده و أصلاً كان معاهم ضيوف غيرنا ، المهم بعد ما اتكلمت مع زيدان و وريتو اتأخرت ليه و قفلت منو حسام جا ماري بجنبي لمن شافني سلم علي و سألني عن أخباري و كدا و بقى واقف بتونس معاي و سألني ليه بقيت متغيره الفتره الآخيره و فعلاً أنا في اخر فتره اتغيرت عليهو لمن حسيت إننا ما مناسبين لبعض و اني برهق نفسي و بستهلك طاقه على الفاضيه ، لمن أصر علي شديد و بقى يتكلم معاي بلطافه ما قدرت أمسك لساني و الفي قلبي قلتو ليهو ، أول ما إعترفت ليهو صحباتي جوا طالعين من جوه مع فدوى سلموا عليهو و قالوا لي خلينا نمشي بعد دا ....قلت ليها يمكن عشان اتفاجأ ما قدر يقول حاجه ، قالت لي كان ممكن يرسل أو يتصل ، قلت ليها ماف مشكله أديهو يومين تلاته كدا و لو طلع بحبك و جا إعترف ليك خير و اذا لا برضو خير لأنك حتكوني عرفتي انتِ شنو بالنسبه ليهو و ما حـ تستهلكي مشاعرك على الفاضي ....قالت لي أنا عرفت موقعي شنو ، أصلاً شنو الخلاني أتخيل إنو ممكن يعاين لـ وحده سمينه زيي !؟ معقوله يخلي البنات ديل كلهم و يجي يحبني أنا !؟؟
قلت ليها رشا مية مره قلت ليها ما تقولي كدا عن نفسك و ما تقللي من قيمتك ! هسي مالك انتِ حلاة الدنيا عليك ، قالت لي ما تكذبي ، أنا بسبب سمنتي دي ما قادره أشوف أو أحس اني سمحه ، ما أنا بس كل الناس شايفين إني عباره عن حاجه ضخمه متحركه....قالت كدا و قعدت تبكي ، قلت ليها عااايني انتِ دا منو القاعد يقول عنك كدا ؟؟ حسام سمعك كلام زي دا ؟؟
بعد مسافه قالت لي لا بس فدوى قالت عني كدا و قالت مستحيل أخوها يعاين لـ وحده زيي ، قلت ليها شنوووو !! فدوى صحبتك ما غيرهااا !!
قالت لي ايوه ، قلت ليها متين قالت الكلام دا و انتِ قلتي ليها شنو لمن قالت ليك كدا ؟؟
قالت لي هي ما قالتو في وشي ، كانت بتقول كدا قدام صحباتنا من يوم حست إني بحب أخوها ، قلت ليها ما قادره أصدق !! معقوله فدوى صحبتك الروح بالروح تقول كدا عنك !! اتصدمت فيها بالجد ، قالت لي أنا ذاتي ما اتوقعتها تقول كدا لكن لو جينا للحق هي كلامها صح ، منو الحـ تقبل إنو أخوها يعرس وحده سمينه زيي !!؟ خليها هي أخوها زاتو ما حـ يقبل ... قلت ليها غاظتني بالجد !! بغض النظر عن كل شي انتِ صحبتها و ما مفروض تقول كلام زي دا عنك !! ما عايزاك لأخوها كوم و كونها تتكلم عنك بالطريقه دي قدام صحباتكم كوم تاني خالص !!
