ما لحقت أتعمق في نومتي توووش خالتي جات داخله و بقت تصحي فيني ، فتحت عيوني و أنا بتثائب ، قلت ليها في شنو يااااخ ، قالت لي ناااايمه ليها شنو و راجلك هناك قالب الدنيا عليك ، قلت ليها راجلي منو ؟... طبعاً لحد اللحظات ديك نعسانه و ما فاهمه خالتي بتقول في شنو ، جنب السرير كان في جك مويه شالتو و رشتني منو و طوالي قمت مخلوعه ، قالت لي دا شنو العملتيهو دا !! انتِ ما مكلمه ناصر انك بايته هنا ولا شنو ؟؟؟طبعاً ياداب فهمت الحاصل ، قلت ليها كلمتو لكن شكلو نسى ، قالت لي بطلي كذب و ياريت يا ميمي تخلي حركاتك الطفوليه دي ، الموضوع ما هظار عشان ما تكلمي راجلك و تخليهو يقلق عليك ، قلت ليها منو القال ليك إنو قلقان علي !! أكيد عارف إني معاكم... قالت لي يعرف من وين و انتِ كذبتي عليهو و كذبتي علينا كلنا !! أمي لو عرفت دقيقه وحده ما حتخليك تقعدي هنا و كمان قافله تلفونك ليه يعني ؟؟، قلت ليها اففف ياخ الموضوع ما خطير !!قالت لي كيف ما خطير و هو قالب عليك الدنيا خاصة لمن اتصل على ناس بيتكم و قالوا إنك ما معاهم ، عارفه أهلك خافوا عليك قدر شنو !! عارفه راجلك قلق عليك قدر شنو ؟؟ دا كلو شايفاهو عادي و شايفه الموضوع ما خطير ؟ ...ما رديت عليها ، فجأه تلفونها رن ، قالت لي دي أمك و طوالي ردت عليها و قالت ليها اي صحيتها.....بتك مستهبله ساي و هظارها بايخ وقفت قلبكم و قلب راجلها ....قاعده هاك ليها ....شلت منها التلفون و إتكلمت مع أمي ، قالت لي دي حركات شنو دي يا مها !! ليه ما كلمتي ناصر إنك ماشه بيت حبوبتك و كمان قافله تلفونك و و و ....اتكلمت معاي كتير و أنا بس شغاله ليها نسيت ما كلمتو و تلفوني قفل براهو ، بعدها أبوي شال التلفون منها و نفس كلام أمي و في الختام قال لي ما شافعه انتِ عشان تتصرفي تصرفات هبله زي دي ...غيتو شاكلوني قدرتهم بعدها قفلوا مني ....خالتي قالت لي اوووعك تصري وشك و تعملي فيها زعلانه لأنك غلطانه ، هسي دي افتحي تلفونك و إتصلي علي ناصر إعتذري منو و طمنيهو عليك و حاجه زي دي ما تعمليها تاني ....المهم هي بعد مشت مني فتحت تلفوني و لقيت كميه من المكالمات من ناصر و من زيدان و أبوي ، قلت ما بتصل على ناصر ولا شي ، طفيت نور الغرفه و جيت اتغطيت بس ما نمت ، قلت في سري ههه قال ناصر قلقان علي 🤣🤣 هو آخر واحد ممكن يفكر فيني و أنا كذلك...المهم بقيت خاته تلفوني جنبي لأنو في إحساس قال لي إنو ناصر حـ يتصل ، عدة زي 5 دقايق و هو ما إتصل و تاني انتظرت 5 دقايق و برضو ما إتصل ، قعدت في نص السرير و فتحت الشبكه و دخلت الواتس ، لقيتو "متصل الآن " طبعاً الساعه كانت 1 بليل ، قلت أكيد بتكلم مع البت الحيوانه ديك ، خصصت ليهو استوري و كتبت فيها :" أخبروهو أنني لو خلقت بدون قلب لأحببته بمصاريني" 🙂🤚طبعاً شافها في نفس اللحظه..... إتوقعت إنو حـ يرسل لي و انو حيقول لي ليه كذبتي علي لمن قلتي لي ناصر ألحقني أو يسألني قاصده منو بالإستوري دا ...لكن ولاااا هبب لي....انتبهت على نفسي و قلت دا شنو الهبل البتعملي فيهو دا يا مها ! فكرت احذف الإستوري بس متأكده انو الخسيس دا شغال بـ واتس عمر ....ختيت التلفون و رقدت و حاولت أنوم بس ما قدرت ، تاني شلت التلفون و كتبت في الإستوري : يومي كان حلو عشان انت كنت موجود ، كان يوووم خراااافي 😍💜المره دي ما شاف الإستوري في نفس اللحظه ، يمكن بعد دقيقه دقيقتين كدا حتى شافها ، انتظرت رد منو بس برضو ما اشتغل بي ، قلت ياااااخ انتِ مالك بيهو!! واحد بكرهك و بتكرهيهو عايزا منو شنوو !!؟؟ختيت التلفون و إتغطيت و نمت ....تاني يوم طبعاً سارا شمرت لـ حبوبه و هي جاطت فيني و شاكلتني قدرتها و قالت لي كيف يعني ما تكلميهو و تخليهو يقلق و يفتش عليك ، طبعاً أهلي اتصلوا تاني و تموا المقصر ، أبوي قال لحبوبه هسي دي خلوها ترجع بيتها ، أمي قالت لي من بيت حبوبتك لـ بيتك طوالي ، طبعا زعلت زعل ، قلت ليه يشاكلوني عشانو ، هم ما عارفين طبيعة علاقتنا أنا و ناصر و ما عارفين اننا ما بنطيق بعض و ما عارفين إنو ناصر لا قلق لا خاف علي و كلو تمثيل سااااي ، المهم جهزت نفسي و طلعت طوالي من بيت حبوبه حتى الشاي ما شربتو ، سارا جات لاحقاني و قالت لي يا بت انتظري أنا ذاتي طالعه حـ أوصلك معاي ، طبعا قلت ليها لا عشان هيبة الزعله ما تروح ...قالت لي لا في عينك يا زوله ، انتظريني هسي برجع ، قلت ليها بمشي براااي مشكوره ، عاينت لي بغيظ كدا و قالت لي حأجيب شنطتي ، والله ألقاك مشيتي يا مهاوي ما يحصل خير ... أول ما هي دخلت كدا أنا طوالي ركبت في عربيتها و قلت في سري مرمطة المواصلات دي أنا ما بقدر عليها ، المهم خالتي مشت و جات لقتني راكبه قالت لي كووويس انك ما عاندتي ، قبل ما نتحرك حبوبه جاتني بالشباك ، قالت لي دراما كوووين ، قلت ليها وارثاها ، ضحكت و ضربتني ضربه خفيفه على راسي و قالت لي تااااني لو جاياني تكلمي راجلك فاهمه عشان ما أجوط فيك ، قلت ليها تاني ما جاياك أساساً 🙂🤚قالت لي أنا ذااااتي وحده ما بتستأذن من راجلها ما بتدخل بيتي ، قلت ليها تماااام يا حجه إخلاص فهمت .... طبعاً لمن أزعل منها أو أمثل اني زعلانه منها بقول ليها إخلاص أو حجه إخلاص....سارا قالت لينا نقتكم دي حدها وين ؟! وراااي شغل أنا ! حبوبه قالت ليها خلاص امشن ودعتكن الله ، المهم إتحركنا و مشينا ، قالت لي ماشه القناة ؟؟ قلت ليها لا البيت ، برنامجي ببدا بعدين المسا ، قالت لي تمام بوصلك البيت ، المهم وصلتني البيت و المره دي نزلت معاي ، قالت لي عارفاك عنيده و متخلفه و ما حـ تعتذري من ناصر و لو إعتذرتي إعتذارك حيكون مسيخ زيك عشان كدا أرح أنا ذاتي بدخل معاك و بهدي الأوضاع بيناتكم ، المهم لمن دخلنا ما لقيناهو ، قالت لي خلاص معناها حأمشي و ناصر لو جا أرجوووكِ ما تتماسخي معاهو ، قلت ليها خلاص تمااام تماااام يا سرو! قالت لي يلا باي ، قدمتها لحد الباب و جيت راجعه ، دخلت إتدوشت و لبست لي بجامه و إتعطرت و قعدت أسرح في شعري ، بعدها مشيت المطبخ و بقيت اعمل لنفسي شاي و أنا بدندن ساي ، فجأه بقيت حاسه بحركه خفيفه حوليني ، وقفت دندنه عشان اتأكد انو في صوت حركه حوليني !!....بقيت حاسه انو في زول واقف وراي ، ختيت الكبايه على المسطبه و بحركه سريعه إتلفت وراي و كنت حأصرخ من دون ما اشوف منو الواقف وراي بس في يد إتختت على خشمي و يد تانيه كانت ماسكه يدي ، لمن انتبهت لقيتو ناصر ، اتنفست بعمق و زحيت يدو من خشمي ، قلت ليهو هسي في داعي لفلم الرعب دا ؟؟ ما رد علي ، كان بعاين لي بحده جوه عيوني ، قلت ليهو ما تقعد تبحلق فيني كدا !!...جيت متين انت و دخلت كيف من دون صوت !!؟برضو ما رد علي ، طبعاً حيرني !!بقيت واقفه و بعاين ليهو زي ما هو بعاين لي ! افتكرت انو في أي لحظه حـ يزهج و يتخارج من المطبخ بس ما حصل ! قلت ليهو شارب شنو انت اليوم ؟؟ ...برضو ما اتكلم معاي ، قلت ليهو يا دووودي بتكلم معاك أنا !!قال لي مية مره قلت ليك ما تقولي لي دودي ولا زفت !...قلت ليهو أخيراً فتحت خشمك دا !!؟قال لي ليه كنتِ ميته عشان تسمعي صوتي !؟ قلت ليهو الله يديني ثقتك دي ! المهم أنا ما فاضيه ليك ، قال لي و المطلوب ؟؟ ....عاينت لـ يدي و رجعت عاينت ليهو ، براحه سحب يدو ، حسيتو إتوتر طوالي طلع من المطبخ ، كبيت الشاي و طلعت شربتو في الهول ، طبعاً هو كان قاعد هناك ، عاين لي بغيظ و قال لي بطلي أنانيه ، كان حيحصل شنو يعني لو جبتي لي شاي معاك ؟قلت ليهو من وين حأعرف انك ما شربت !؟ قال لي شربت و عايز أشرب تاني المشكله وين ؟؟ قلت ليهو داك المطبخ ، المهم تاني ما اتكلم معاي رغم اني كنت متوقعه اني يشاكلني أو يسألني ليه كذبت عليهو و ليه ما قلت ليهو إني ماشه بيت ناس حبوبه ، بس خالص ما فتح معاي الموضوع ، قلت أحسن ذاتو ، بقى يقلب في القنوات ساي لحد ما جاب قناة MBC 4 كان شغال فيها مسلسل أميره بلا تاج ، طبعاً قربت أقول ليهو خليها بس اتذكرت انو بعمل عكس البقولو ليهو عشان كدا قلت ليهو ياخ MBC 4 دي حقو تحذفها عدييل ، بكرها ياخ !! المسلسلات التركيه دي بحسها عبيطه احسن منها المسلسلات الهنديه عشان كدا جيب زي ألوان أو جيب لينا فلم في ام بي سي تو أو ثري .... طبعاً لا عاين لي لا رد علي ، غير القنوات كدا لحد ما وقف في MBC 4 ، رفع الصوت و خلف رجل على رجل ، قربت أضحك بس مسكت نفسي ، قلت ليهو ناصر ماف داعي للئامه دي ، القناة دي أنا بكرها !! ما معقوله معاك ياخ !! قال لي أمشي احضري العايزاهو في غرفتك ....قلت ليهو اففف منك ياخ و عملت نفسي متضايقه لأنو فاتح ام بي سي 4 و أنا من جواي مبسوطه شديد ، بقيت أحضر المسلسل بمزاج و كل ما أحسو حـ يتلفت علي بعمل نفسي زهجانه و إنو القناة ما عاجباني ، المهم حضرتها لحد ما خلصت بس ما قمت مشيت طوالي عشان ما يكشفني ، المهم فجأه كدا تلفونو رن و كان جنبي ، عاينت للإسم لقيتها نازك اختو ، عاين لي منتظرني أناولو التلفون بس ما عبرتو ، براهو جا شالو من جنبي ، أول ما بدا يتكلم معاها كدا جيت خطفت منو الريموت ، حمر لي و رجع يتكلم مع أختو ، قال ليها ما عندي مشكله بجيها بعد شويه ، عارفها أنا غلباويه و بتاعة حركات ، المهم بعد ما خلص قال لي جيبي الريموت ، عملتي نفسي ما سامعاهو ، نهرني و قال لي بتكلم معاك أنا جيبي الريموت دا ، قلت ليهو أبيت ، طبعاً أول ما وقف على حيلو عشان يجيني اتنفضت من مكاني و قمت جاريه على السلم و هو وراي لحد ما وصلت غرفتي ، دخلت سرعه و كنت حـ اقفل الباب بس هو ثبتو بـ يدو ، لزاهو و جا داخل ، بقيت منططه عيوني بس و هو بعاين لي بحده ، جا ماشي علي و أنا برجع منو لـ ورا ، سرع خطواتو شداني من يدي بقوه ، إتزهج فيني و قال لي ما بهاظر معاك أنا عشان تقعدي تتجاري لي ، الريموت دا جايباهو من بيتكم انتِ ولا جايبنوا ليك العواليق البتلفي معاهم ديلك ؟!!طبعاً قال كلامو دا بنبره حاده و عاليه لمن خلعني ! كأنو بس عايز ليهو فرصه عشان يتفشى فيني ! قلت ليهو شنو ؟؟ ديل منو البلف معاهم ديل ؟؟؟ما رد علي ، فكيت يدي بالقوه منو و قلت ليهو على فكره بكلامك دا انت بتشكك فيني و أنا ابداً ما بسمح لأي إنسان يشير على بالباطل ! لمن تقول كلام أبقى قدرو....مسكت يدو و فتحتها ليهو و ختيت ليهو الريموت و قلت ليهو هاك ريموتك الما جبتو من بيتنا و الما جابوهو لي العواليق البلف معاهم و ياريت تتفضل و تطلع برا غرفتي ، قال لي البيت بيتي و ما انتِ البتطرديني منو ، قلت ليهو تمام حـ أطلع أنا و أخلي ليك البيت ....طوالي إتحركت على الدولاب و طلعت شنطه وسط كدا و ختيتها في السرير و مشيت على الدولاب عشان اطلع ملابسي كنت واصله الحد من الضيق ، فجأه كدا و من دون مقدمات جا و لفتني عليهو في كسر من الثانيه و ضماني عليهو !!طبعاً كنت مخلوعه و ما مصدقه الحصل في كسر من الثانيه !! ما قال أي حاجه ! كان ضاميني على صدرو و ساكت و أنا كمان الكلام كان غالبني!! بس غضبي و زعلي كلو راح ! حسيت أعصابي هدت و رخت ، لمن غمضت عيوني جاني إحساس حلو ، زي لمن تكون نايم في مرجحانيه فيها لحاف حرير ناعم و ساقط و الهواء عليل و بارد و السماء فوقك مليانه نجوم و الجو هادي و رايق و المرجانيه ماشه بيك يمين و شمال بكل هدوء.....حسيت اني عايزا أنوم عديل ، حسيت نفسي مشيت عالم تاني خالص ، عالم ما إتمنيت أطلع منو ....بعد بمسافه قال لي شايف الوضع عجبك !!...رفعت راسي ليهو زي الهبله و أنا ما مستوعبه هو قال شنو قلت ليهو ايوه ، لمن عاين لي بإستهزاء كدا التقول ياداب سمعت كلامو و إنتبهت على نفسي ، بحركه سريعه زحيت نفسي منو ، ربع يدينو و ابتسم إبتسامة إستهتار كدا و قال لي طبعاً ما صدقتي إني حاضنك !!حرفياً ما عرفت اقول ليهو شنو ، الوضع كان محرج شديد بالنسبه لي ، ما مصدقه إني إستسلمت بالسرعه دي و إتهبلت فيهو !!حسيت نفسي حأسيح من شدة الإحراج فطوالي طلعت ليهو من الغرفه و أنا خاته يدي على قلبي و بردد في سري دا شنوو العملتو دا !!مشيت المطبخ شربت مويه و وقفت هناك ، جا لاحقني بنفس الإبتسامه ، قلت ليهو على فكره انت البديت الهبل دا و أنا حبيييت أتمو ليك ، قال لي تمام تمام ما تتوتري 😂قلت ليهو ما متوتره و أساساً أتوتر ليه ؟؟بقى ماشي علي و بعاين لي جوه عيوني و أنا بدعي الثبات ، لمن وصلني و بقى قريب شديد مني ، قلت ليهو بصوت متقطع مـ مـ مالك عايز شنو ؟؟مال علي و قرب أكتر و فجأه شال الكبايه الفي المسطبه الوراي و زح مني و قال لي حلااااوه هي ؟؟! طلعتي قاعده على الهبشه بس ! قلت ليهو يهبشك شيطان ان شاء الله ، قال لي جمعا يا رب و طوالي طلع و مشى ، جا راجع تاني و خت الكبايه و طلع فـ فهمت انو قاصد يعمل لي حركتو دي عشان يوترني ....المهم بعدها مشيت قعدت في الهول ، ما كان موجود هناك ، قلت معناها طلع ، فتحت قناة mbc bollywood ، كان شغال فيها فلم باجيراو ماستاني ...بقيت أعاين في الشاشه بس بالي في حته تانيه ، قدر ما حاولت اتجاوز و امسح لحظة ناصر لفتني و ضماني عليهو ما قدرت !....هو عمل كدا ليه ؟؟ وليه ما حس بالإحراج أو انو الحصل بغير قصد !! و أنا ليه ما إعترضت !؟ لا و كمان كنت فرحانه و حأنوم عديل !!طق اتذكرت إني كنت حأشيل ملابسي و امشي ليهو من البيت ، ضربت جبيني براحة يدي و قلت أكيد حيكون افتكر إني خليت المشيه من البيت لأنو حضني !! يعع منظري كان بايخ شديد قدامو ، قلت أول ما أرجع من شغلي طوالي حـ أشيل شنطتي و أمشي بيت أهلي عشان ما يقول انو سكتني أو هداني بحضنو الزفت دا 😏🤚المهم بعدها رتاج اتصلت علي و حكيت ليها الحصل ، ضحكت و قالت لي بتبالغي والله ! كذبتي عليهو و خوفتيهو ساي ، قلت ليها ياااا بت دا كذاب ساي ، بتصدقي إنو بخاف علي !!؟ قالت لي افهمي يا مها ، انتِ مرتو و قاعده معاهو في البيت فـ طبيعي يخاف و يقلق عليك لمن تتأخري و طبيعي جداً يموت من خوفو عليك لمن تمثلي و تكذبي عليهو و تقفلي تلفونك !!....قلت ليها ماااا مهم ، قالت لي تمام خليك كدا لحد ما يتشلب منك ، بكرا بلقى البت البتناسبوا و الحتحبو و يحبها و الحتهتم بيهو و تخاف عليهو ما زيك انتِ هاملاهو ساي و ما شغاله بيهو ، قلت ليها شااافع هو ؟؟ اعمل ليهو شنو يعني ، اجيب ليهو بزه ولا اهزو زي البيبي ؟!! قالت لي انتِ متخلفه و مخك مقفل ، قلت ليها شكراً ، قالت لي بعدها حصل شنو ؟؟ ما سألك تاني ؟؟!قلت ليها ما سألني لكن ما شفتي قبل شويه حصل شنو.....طوالي حكيت ليها ، قالت لي وااااي مبالغه ما بصدق 🙈🙈 حلفتك بالله احساسك كان شنو ؟؟كذبت و قلت ليها ولا شي لأني كنت بحاول افك نفسي منو بس هو مصر يشدني عليهو لمن حيرني ، قالت لي وااااي منو 🙈 لكن انتِ حيوانه و بتخربي ام الرومانسيه ذاتا ، أنا ما حصل شفت لي وحده متخلفه زيك ، قلت ليها قاعد يدفع ليك كم هو عشان تدافعي عنو ؟؟قالت لي مش ناصر ؟؟ ببلاش بدافع عنو ، فداهو روحي أنا نصوري العسل ، قلت ليها حأوصل ليهو كلامك دا ، قالت لي تكوني ما قصرتي ، أصلاً أنا السكات غلبني بعد دا ، ما بقدر أكتم أكتر من كدا ، ضحكت و قلت ليها كويس يا معفنه....قالت لي مهاااا جاده عليك الله ؟؟!قلت ليها بالنسبه لشنو ؟؟قالت لي يا انسانه أنا من قبيل بتغزل و بنبرش ليك في راجلك و انتِ مبسوطه و ما هاميك شي !!؟ معقوله ما غرتي عليهو و كلامي ما ضايقك ؟؟قلت ليها ابداً والله ، قالت لي أنا بس نفسي اعرف انتِ عايزا شنو من الحياة دي و ربنا مديك واحد زي ناصر معيشك احسن عيشه و نفس الخليتيهو في بيت ابوك لقيتيهو في بيت راجلك و الأحلى انك معرسه واحد عليهو هيبه و سماحه و كاريزما و طول و قوام و سمار و كمان ملتحي !! ياخ دا حلم بنات السودان كلهن ! قلت ليها كلهن إلا أنا 🙂قالت لي تمام قولي لي مواصفات الزول العايزاهو انتِ ، قولي لي كل الصفات العاجباك و ما لقيتيها في ناصر ....قلت ليها ما عايزا أي زول أنا و أساساً ما كنت مفكره في العرس لو ما أهلي أصر و زعلوا مني بسبب عدم تفكيري في الزواج ....سكتت مسافه بعدها قالت لي لسه بتفكري في غسان ؟؟طبعاً لمن جابت لي سيرتو حسيت بوخزه في قلبي ، قلت ليها غسان دا منو ، ما بعرف زول بالإسم دا ، قالت لي هو السبب صح ؟؟قلت ليها عايني وراي شغل لازم اجهز نفسي و أمشي ، قالت لي تمام بتصل عليك بعدين ....بعد قفلت منها بقيت اتذكر في غسان ولد جيرانا و حب الطفوله ....سرحت بعيد بذكرياتي معاهو من أيام الأساس و الثانوي و لمن كان بجي و بقيف لي جنب مدرستنا و لمن أكون راجعه مع صحباتي بكون ماشي ورانا و هم يقعدوا يشغلوها لي.....اتذكرت مقتطفات عن ذكرياتو في كل مراحل حياتي لحد اخر سنتين لي في المرحله الجامعيه لمن بدا يتغير علي و شويه شويه انسحب من حياتي من دون ما يفهمني شي و حتى لمن سافر ما أداني خبر و لحد يوم الليله انا ما عارفه حاجه عنو لأنو ما اتواصلت معاهو تاني...المهم جهزت نفسي و طلبت ترحال و مشيت القناة ، اسم برنامجنا #ونسة_شباب و ضيوف حلقتنا كانوا حسن كسلا و عبير الشيخ ، كنا مفكرين نجيب معاهم إبراهيم ناجي الأصم بس عرفنا إنو برا السودان ، طبعاً ديل أبطال مسلسل عشم ، المهم دردشنا معاهم أنا و فريال زميلتي و حكوا لينا عن تجربتهم و مخططاتهم لقدام ، الحلقه كانت هاديه و رايقه و مليانه بالحكاوي ، في ختام الحلقه أخدنا سلفي نحنا الأربعه ، بعد ما خلصت و طلعت طلبت ترحال و مشيت البيت و طوالي شلت شنطتي قلت حأمشي لناس أمي ، طلعت لـ بتاع الترحال و مشيت ، أول ما وصلت بيت أهلي اتذكرت ناصر ، قلت هسي لو ناس أمي عرفوا إني ما كلمتو حـ يقوموا يشاكلوني و يعملوا لي موضوع ، المهم طلعت تلفوني و إتصلت عليهو ، أول ما فتح الخط قلت ليهو عاين أنا ماشه ناس أمي ، قال لي ما تمشي ، قلت ليهو ما على كيفك ، قال لي لا على كيفي قلت ليك ما تمشي يعني ما تمشي ، قلت ليهو أنا حالياً واقفه جنب بيت أهلي ، يعني مشيت و إنتهيت ، قال لي بنبره حاده نفس الطريق الجابك يرجعك ، قلت ليهو غلطانه أنا الإتصلت عشان اكلمك ياخ مش نحنا ما مركزين مع بعض و ذاتو ما مفروض نكلم بعض نحنا بنمشي وين أو بنجي من وين !! قال لي ما أعيد كلامي ...طوالي قفلت الخط و دخلت بيتنا ، طبعاً اتهجموا لمن شافوني شايله الشنطه ، سلمت عليهم و هم لسه مخلوعين ، أبوي قال لي خير إن شاء الله و عاين للشنطه!! قلت ليهو مشتاااقه ليكم بس والله و جايه اقعد كم يوم معاكم ، زيدان قال لي شكلك عامله ليك مصيبه ، قلت ليهو بررري مصيبة شنو !! أمي قالت لي متشكله مع ناصر ؟؟قلت ليها لا ...قبل ما زول يسألني تاني ، قلت ليهم يخوانا !! انتوا ما عايزني أجيكم ولا شنو ؟!! يعني لو زيارتي مضايقاكم كلموني عشان أمشي ، رشا ضحكت و قالت لي جنك دراما ، زيدان قال لي الهجوم خير وسيلة للدفاع صح ؟؟😂أمي قالت لي كدي أقعدي أقعدي ، قعدت و برضو قعدوا يحققوا معاي ، أمي قالت لي عشان اتأكد حـ اتصل على ناصر ....هنا بلعت ريقي ، أبوي قال لي والله نلقاك كذابه ما يحصل خير ... طبعاً قربت أعترف ليهم بس مسكت نفسي .... أمي اتصلت على ناصر و فتحت الإسبيكر ، بعد ما سلمت عليهو و سألتو عن أحوالو و كدا قالت ليهو انت يا ناصر مها دي استأذنت منك لمن جات هنا !!... طبعاً في اللحظه ديك كلهم عاينوا لي ، قلت الليله ووووبعلي ، بس اتفاجأت لمن ناصر قال ليها أيوه استأذنت مني ، قالت ليهو و قالت ليك انها عايزا تقعد معانا كم يوم ؟؟قال ليها أيوه كلمتني ، قالت ليهو تمام لو كدا ماف مشكله أنا خفت و قلت احتمال جات من دون إذنك لأنها بتاعة حركات قال ليها لا لا استأذنت....المهم بعد ما قفل منهم خلفت رجل على رجل و قلت ليهم شوفوا ليكم حجه تانيه عشان تطردوني بيها من البيت دا 🙂🤚زيدان قال لي لينا حق لأنك عنيده و متهوره ، المهم قعدت معاهم 3 أيام و ناصر ما سألني خالص ، لا رسل لا إتصل ، قلت أساساً دا العايزو ، طبعاً عاملين قروب للأسرتين ، واحد ضايفين فيهو أهلنا الكبار و واحد للشباب بس ، شايفه ورده أخت ناصر مرسله في القروب الخاص بينا ، لمن شفت رسايلها لقيتها كاتبه رأيكم شنو نطلع كلنا رحله !!؛؟؟... طبعاً معانا بنات و أولاد أهلهم ، هيفاء قالت ليها فكره حلوه ، ورده قالت ليها طيب اقترحوا اماكن مناسبه ، هيفاء قالت ليها طييب خلينا نفكر و نقترح عليك ، ورظه قالت يا مهااا البتقري رسايلنا و ما بتردي ! رسلت ليها ايموشن ضحك و قلت ليها معليش ، قالت لي أخبارك قلت ليها كووويسه الحمدلله و انتِ قالت لي كويسه + ناصر بقى كيف لأنو بتصل عليهو و ما برد ؟!طبعاً اتفاجأت ، قلت ليها ليه مالو ؟؟جات نازك ناطه و قالت لي أجي!! كيف يعني مالو !!؟ ناصر دا تعبان ليهو يومين ! أمبارح لمن كنت بتكلم معاهو كلام زي الناس ما قادر يتكلم إلا أداني دانه.... طبعاً قربت أقول ليها دانه هناك من متين لكن قلت هييي كفايه أفضح نفسي ، هيفاء قالت ليها مها شكله ما معاهو في نفس البيت 🌚قلت ليها فعلاً لأني جيت لأهلي ، نازك قالت لي من متين !؟ و دا ما معناهو إنو تهملي راجلك و ما تسألي عنو ..... طبعاً بنات أهلهم كانوا بتفاعلوا مع رسايل نازك كـ تشجيع ليها ، ما رديت على رسالتها ، هيفاء قالت لي ما تزعلي يا مها ، نازك قالت ليها البزعل شنووو هسي في كلامي دا !!بعدها بنات أهلو اتحشروا و بقوا يدوني نصايح ههه قالوا عشان أحافظ بيها على زواجي ، نازك قالت ليهم أخوي يا حليلو عيان و براهو في البيت غير بتي دانه الصغيره ما معاهو زول ، والله لو كلمني إنو قاعد براهو كنت مشيت ليهو ، طبعاً لاحظت إنو ناصر "متصل الآن" لمن شفت تفاصيل آخر رساله لي لقيتو قراها فـ عرفت إنو بقرا رسايلنا....وائل قال خييير يا جماعه في شنو رسايلكم تطاقش !!نازك قالت ليهو اقرا الرسايل و براك حتفهم ، وائل ما رد تاني ، أكيد قرا الرسايل بس ما حب يتدخل أو يكتر الكلام....فكرت أرسل لـ ناصر و اسأل عنو و اشوفو عيان عندو شنو ، بس إترددت قلت هسي يقول إني مركزه معاهو و خايفه عليهو......قعدت حكاية 5 دقايق كدا بعدها رسلت ليهو ، كيفك ؟؟طبعاً استلم الرساله و كان متصل الآن بس ما دخل قراها ، دخلت الدردشه و حذفت الرساله عندي و عندو و طلعت من الواتس و قفلت الشبكه...رُغم خوفي الغريب من فكرة الزواج، ورُغم هُروبي منه إلى حدّ غضب عائلتي، ورُغم أن فساتين الزفاف تتلألأ بقلبي لرغبتي في تجربتها، إلا أن الفكرة الوحيدة التي ستُرغمني بحُبٍ على خطو تلك الخطوة العسيرة مهما بلغ بي الوقت أو اشتدت الضغوطات؛ هي أن تكون أنت تستحق! أن تكون ممن نهرب إليهم لا منهم، أن أجد قلبُك به براح يعادل كل تعقيدات الكون، وأن ألمحُ بعينك حُبًا لن ينضب لي أبدًا، وأن آتيك مُخطئة فتقومني لا تهجرني مُعاقبًا، حينها ستجدني أقول لكَ والحُب يقطر من كلماتي: لماذا تأخر مُتعهد الزواج كل هذا الوقت، أشتاق أن ينضم اسمي لكَ!.- أمل حافظيتبع.....
