طالعت قمر اللي تو تنتبه لعمتها و سلمت عليها بهدوء
قالت لها عمتها فوز:وانت يا قمر ما نشوفتس و حن ما بيننا الا عشر دقايق !
قالت قمر بملامح جامدة: المدارس يا عمه و يالله يالله نلحق على اعمارنا و والله من بداية المدارس ما قد لحقنا نقعد او نزور احد
التفتت الى جدتها و قالت بابتسامة مشرقة: كيفك يا جده عساك بخير
امسكت جدتها بيدها
و هي تقول بود: الحمدلله على كل حال يا بنتي الا زاد البرد في الديره و معاد قدرت اتحمل رجيلاتي و عظامي ما خلوني انام بهالليل فجيت هنا ولان ما ودي اجي بهالديار الا وش اسوي عشانتس انتي اللي محليتها
ابتسمت قمر لجدتها و قالت: تسلمين يا جده
صفقت فوز بيدها فجأه و هي تطالع بالسماء: لنا الله
انفجعت الجده و رفعت عصاها باتجاه فوز بغضب : هششش ذا الوجه الله يفجعتس فجعتيني
فوز انصدمت و قالت : يمه وش فيتس تبغين تضربيني و انا بذا العمر و قد معي درزن عيال كلهم اطول مني!
رفعت الجده حواجبها بتحدي: ايه اضربتس تحسبين يوم كبرتي و قد عليتس عيال انتس خلاص معاد بيجيتس شيء مني !؟
ضحكت قمر و قالت: خلاص يا جدة مو قصدها عمتي تفجعك
رفعت الجده عصاها باتجاه قمر اللي قالت: بسم الله وش فيه!؟
قالت الجده بتهديد :قلت لتس لعاد اسمع كلام الخكر بكلامتس وش تقولين لي "تفجعك" تحاكيني كاني رجال !!!
قمر وقفت و قالت: يا جده خلاص وش فيتس اسفه معاد بعيدها !
نزلت الجده عصاها و رفعت راسها :ايه ذا الكلام الصح حتسي ابوتس و جدانس رحمة الله عليهم
باست راس جدتها وهي تضحك : معليه ي جده وش اسوي ذبحوني العرب اللي هنا كلهم يهرجون تسذا و خذيت منهم حكيهم غصبًا علي ما قالوا من عاشر قومًا اصبح منهم!؟
استندت الجده على عصاها :اي والله صح السانتس يا بنيتي والله يا خوفي اعود لديرتي و انا احتسي مثل حتساهم!
دخلت بنت عمتها رنا بهدوء و طالعت لقمر و انقلبت ملامحها بكره: وش جابك انتي بعد !
طالعت فيها قمر بلا مبالاة: وش جابني ؟ اجل كذا تعاملون الضيف عندكم يا عمه !؟ و بعدين يوم تقولين "انتي بعد" وش تقصدين جدتي!؟
انقلب وجه فوز بينما قالت رنا اللي ما توقعت هالرد: لا ما قصدت اقصد ااااء
وقفت الجده نوير بشموخ : ام محمد ! يا مسودة الوجه و الله يا فوز ان عيالتس ما بوجيهم حياء اجل تقول وش جابني ببيت بنيتي !!!
فوز وقفت بإحراج و امسكت بنتها مع اذنها و ضربتها على رقبتها بقوة و هي تقول: وش هالكلام يا رنا عيب عليتس وشلون تكلمين امي بهالطريقة و فوقها بنت اخوي!!
مشت رنا لا تروح و وجهها محمّر بفشلة
قالت لها فوز بتهديد : ويين ويين ! اقول تعالي جيبي جوالتس اول و عاد حسابتس بالغرفة
و بعد ما راحت رنا كان الجو محرج شوي تمنت قمر انها ما خلتهم يدققون بالكلمة بس وش تسوي المكان الوحيد اللي تقدر تقابل جدتها فيه هو بيت عمتها و كل ما جت تقعد عند جدتها تقعد رنا تزفها بالكلام و تبين لها انه مو مرغوب فيها تكره هذا الشيء لما ما يكون مرغوب فيها بمكان ...
امست عند جدتها ثلاث ايام انبسطت فيها كثير بينما جدتها جابت لها هدايا جلال صلاة و حناء و مسك
بعد صلاة المغرب
كانت قمر حاطه راسها بحضن جدتها بينما جدتها تهمهم و تحكي لها كالعاده قصصها ايام زمان يوم كانت شابه بينما تمسح على راس قمر
بينما قمر تسمع لجدتها و مغمضه عيونها لتهدر من لمسات جدتها الحانية بينما صوت القران يصدح بالغرفة و ريحة الريحان اللي ملئ عبقها المكان
قالت قمر بعد سكوت للجده: جده ابي اقول لتس شيء..
ابتسمت الجده و قالت:سمي يا بنيتي
قالت قمر بنظره هاديه: انا قررت ارجع معتس الشمال ...
سكتت الجده بينما قمر ناظرت فيها تنتظر اجابتها
و قالت الجده بهدوء: و امتس تدري بكلامتس ذا؟
قالت قمر: امي ما بتمانع اذا بكون معتس بروح اقعد معتس و بأدرس معك اخر ترم تعرفين اني مشتاقه لك و مشتاقه لديرتنا و حياتنا هناك ابغى على الاقل فتره..
ابتسمت جدتها وقالت : اللي تشوفينه يا بنيتي تدرين اني بيتي مفتوح لتس متى ما بغيتي تجين والله اني اشتاق لتس بالحيل بس الظروف فرقتنا
باست قمر يد جدتها الحاني و كملت الجده سوالفها
