دياجير الغرام

البارت الخامس عشر

اخذنا اجود و گعدنا ، جابلي عصير توت اسود و هو گهوة
-عود شنو يعني حسبالك زعطوطة ؟ ليش ما جبتلي گهوة

-مو زين بابا

-ببسي اريد

-ماكو

-زين گهوة

-ماكو حبيبتي مو زين

-ترى اشرب گهوة باليوم ثلاث گلاصات ليكن في معلوماتك

-اي عفية شاطرة

-ما احب التوت

-تحبينة

-ما احب انت شدراك احب ؟ والله حلوة يعني بكيفك احب و بكيفك اكره

-ادري تحبينة اشربي بدون عناد الجهال

چان يحاچيني ببرود كأنو ديحاجي طفلة صغيرة
-ترى عمري ٢٠ مو ٢

-ادري

-ما اشرب التوت

-عوفي

-مو بكيفك

-شربي

-انت شبيك ؟

-بيه انتي

-اججووددد

-عيونو

-ما اريد توت اجود ما اريد

-زين ذوقي و اذا ما عجبج من عيوني اجيبلج گهوة ها ؟

-والله ؟

-والله

شربت شوية چان بارد و منعش الله احس بردت ، كملت شرب من دون ما احجي شي ، ابتسم هو و كمل الگهوة

شوية و وصل طلبنا ، چان اكو صينية چبيرة كلش و فد مغلف صغير
-اجود : تاكلين الصاج هنا لو بالبيت ؟

-لا بالبيت

شال الصينية بأيد وحدة شنو من ايدين عندة ، شلت الصاج مالتي و ركبنا بالسيارة

وگفنا بأزدحام ، شميت ريحة الصاج اشتهيت
-اجود

-ها حبيبي

-اكل ؟

-عجل ما تاكلين ليش تسألين ؟

-حسبالي ما تقبل خاف ادمر السيارة

-فدوتج بابا اكلي

بديت اكل صاجية سألتة
-اجود

-حبيبو

-ليش تگلي بابا ؟ لعد شگد عمرك انت ؟

-ما تعرفين عمري ؟

هزيت راسي بلا و انا اكل

-٣٠

-عزا عجيز

-مشكور

-تدلل

چنت كامشة صاجية بأيدي عاضتها ، خطية هو ديسوق و انا اكل ، اخذت وحدة ثانية و مديته اله

دار عيونة عليه و گال
-ما اريد هاي