"هو عليّ هَينُ" - (حُذيفة ورميم )

الاسكريبت الرابع 🤍

- يعني مش هتساعدني في غسيل السجاد ده يا حذيفة, يلا يا ذيفو علشان خاطري بطل كسل..
النهاردة أجازتنا وفرصة قبل العيد يا حبيبي..
سيب بقاا الكتاب إللي في إيدك ده مش زهقت منه..

- هو بصراحة ميتزهقش منه يا رميم دا شرح الأحاديث القدسية وأنا بصراحة بعشقها..

سحبت الستارة بتاعة البلكونة بحيث تقدر تقف بحرية وقالت وهي بتفرد السجادة على الأرض:-
- وأنا كمان بحبها أوي يا حذيفة وبدوب قلبي..
بس مش تتوه ويلا قوم معايا..

قال باعتراض:-
- طب ما أنا قولتلك سيبيها وأنا هوديها المغسلة، ليه التعب والفرهدة دي يا مسكر..

جلست وهي تهتف بحنين:-
- حبيت استرجع الذكريات وأنا في بيت بابا وكنا نجتمع كلنا ونغسل السجاد في البلكونة وكان لها طقوس جميلة أوي..

وقفت ووضعت إيدها في خصرها وقالت باعتراض:-
- أيه يا سي حذيفة دا الزوج المسلم المتعاون الهين اللين، افتكر كدا حبيبنا محمد .. زوجاته كانت بتحب قعدته ووجوده في البيت..
الرسول أشرف الخلق يا حذيفة باشا كان بيعاون أهل بيته، وكان بيخيط نعله، إنت فين منه ولا إحنا فين منه.

قام من مكانه بحرج, رميم بتتفنن في مواجهته ومبارزته..
قرب منها ولثم خدها وهو بيوصل خرطوم المياه وبدأ يفرد السجاد معاها وقال:-
- ماشي يا شقية .. بتعرفي تلجميني عالطول..
عليه أفضل الصلاة والسلام.. عندك حق يا رميم المفروض نمثل برسول الله ويبقى قدوة لنا في كل حاجة.

شردت رميم وقالت وهي بتضع المنظف:-
- بقينا في زمن صعب أوي يا حذيفة..
تعرف سمعت الستات والبنات حتى بتتكلم وبيشتكوا لبعض، الزوجة حاملة مسئولية كل حاجة، بل دلوقتي الأزواج بقوا يرموا حِمل زيادة عليهم..
أنا عارفة إن الحياة بقت صعبة وإن الزوج بيتعب بردوه، بس المشكلة مش في كدا يا حذيفة المشكلة أنه بقا يقلل من زوجته ومن دورها وبيستتفه مسؤوليتها، زي هو إنتِ بتعملي أيه يعني ولا إنتِ بتعملي زيادة عن الناس أيه..
في حين إن ممكن الكلمة تكفي، كلمة طيبة .. إبتسامة .. ممكن أخر النهار كوباية شاي مع بعض في البلكونة..
أنا شايفة إن الحياة بسيطة أوي يا حذيفة بس إحنا إللي صعبناها..
أكيد يا حذيفة حياتنا مش أصعب من حياة الرسول .. صح!!
هو كان قائد الأمة وعلى عاتقه مسؤولية كبيرة جدًا والعالم كله بيحاربه حتى أقرب الناس ليه..
ومع ذلك كان كل أما الصحابة تقابله في مكان كان دايمًا مبتسم .. يعني ولا مرة في المرات دي كان شايل همّ .. وكان بيداعب السيدة عائشة ويحملها على ظهره ويتسابق معاها بالناقة..
أنا مش عارفة إحنا مالنا يا حذيفة وأيه إللي حصلنا لما أسمع زوجات بتتمني إن جوزها يسافر وسفريته تغيب، وواحده تقول يارب ينزل مشوار ويغيب والتانية بتتغمّ يوم أجازته .. أنا حقيقي زعلت أوي يا حذيفة وكان نفسي أعملهم أي حاجة..

قعد حذيفة في وسط المايه وسند ظهره على سور البلكونه، وبعدين بدأ يرش على رميم قطرات المطر بمرح وهي بادلته بمرح أكبر واستمروا يلعبوا بالمايه ولما حسوا بالتعب وضعت رأسها على كتفه وهو حاوطها بحب، وقال وهو بيمسد على ذراعها:-
- صح فعلًا الرسول عن أثقل الناس همًا لكن أكثرهم تبسمًا..
علشان بعدنا عن معنى الزواج الحقيقي يا رميم..
بعدنا عن وجعلنا بينهم مودة ورحمة..
بعدنا عن لتسكنوا إليها..
بعدنا عن معنى إن الزواج ميثاق غليظ..
بقينا نبدأ بصحوبية وارتباط وتجاوزات ملهاش عدد في خطوبة علشان كدا مُحقت البركة يا رميم..
بس إللي عايز يمشي على خُطى ونهج حبيبنا محمد هي موجودة ويقدر يمشي عليها..
بقينا راحتنا ومكافأة أخر اليوم إن نقعد قدام السوشيال ميديا بلا هدف أشوف أخبار ده ومقاطع فيديو لا تعرف للنفع طريق بدل ما أقعد مع أسرتي وأشاركها كل حاجة..
بقينا غرباء عن بعض وإحنا وشنا في وش بعض يا رميم..
بقت الرجولة إن استقوى على مراتي ونسيت وصايا حبيبنا محمد استوصوا بالنساء خيرا وإن الرجولة في رحمتي بيها وحبي لها..

صمتت رميم بحزن لكن فجأة قفزت وقالت:-
- حذيفة أيه رأيك نعمل حملة توعية بطريقة مختلفة، زي ما ساعدتني كدا وقدرت إنك تحولني .. أنا هبدأ أساعد البنات وأقدملهم كل إللي أقدر عليه من قلبي ويكون عمل في ميزان حسناتي..

- مش هقدر أمنعك يا رميم .. إنتِ دلوقتي والحمد لله قرأتي كُتب لا بأس بها .. وبتخلصي باقة النت في أسبوع على سلاسل الدكتور حازم والدكتور محمد الغليظ والدكتورة هالة .. والمهندس أيمن عبد الرحيم وغيرهم كتير..
تقدري تفيدي غيرك بإللي اتعلمتيه بطريقتك..

قامت بحماس وطبعت قبلة قوية على خده وقالت:-
- تمام يا ذيفو اتفقنا يا حبيبي .. كمل إنت بقاا السجاد..
ومن النهاردة أنا هطبخ وإنت هتغسل المواعين..
أيه رأيك..

ركضت بقوة للداخل ليركض خلفها بعدما أفاق من صدمته وهو يصرخ بينما ضجّ المكان بصوت ضحكاتها
- رمـــــــــيـــــــــــم تعالي هنا يا شريرة..
إنتِ يا مسكرة .. استني بس عليا.

#سارة_نيل
#هو_عليّ_هيّن.
#حذيفة_ورميم.