ليلة في ديسمبر ... قيد الكتابة

12

بعد الكثير من المحاولات يعز عليك الوصول لنهاية بعد هذا الكم الهائل من المشاعر،يعز عليك انقطاع الاتصال،توقف الرسائل، يعز عليك هجران المحادثة، يعز عليك هذا الفقد، ويعز عليك ان كيف ال كان كل شيء،اصبح لا شيء.

يعز عليك أن التعب ماجاء الا من اللي كنت تناديه الطمأنينة.

يعز عليك قلبك اللي تعاطف، تأذى وتعَب...

الخرطوم&/السودان..

شهد،انا عارف إنه الندم في الوقت الضايع ما بفيد،والله يشهد إني م حصل ولا حيحصل إنه مكانتك عندي تِقل في يوم،يمكن غلطي الوحيد إني م جيت قلت ليك شعوري تجاهك بصورة مباشرة ودة الخلى الأمور توصل بينا لهنا،كل العايز اوضحو إنه دي ضريبة غلطي وإستعجالي وانا قادر اتحملها عقباتها كلها ،بس زي م قلتِ إنك م حتشوفيني اكتر من اخو زي اي واحد من اخوانك انا كمان جربت ولقيت نفسي م بقدر اشوف سندس اكتر من إنها بت خالي ،ما بقدر اقدم ليها المشاعر الهي متوقعاها مني ،ولا بقدر اظلمها معي ونعيش حياة سوداوية مبنية على حقوق وواجبات بس ،فكرة إني اللغي العرس دي اقل الخسائر الممكن اطلع بيها من الموضوع دة ،ف عشان كدة انا رسلت ليها ووضحت ليها موقفي واسبابي و لغيت كل شي وسافرت وم اعتقد إنه في شي يجيبني البلد دي تاني وكان حييين بنتلاقى،واعفي لي والله يطيب خواطرنا كلنا ♥️ 

وسط الجوطة الكانت حاصله في البيت فتحت تلفوني لقيت تسجيلات صوتيه من طارق ودة كان محتواها..

سندس جات طالعة قالت ليهم ي جماعة م شفتو تلفوني؟

خالتها قالت ليها ي بت تلفون شنو في النحن فيه دة إنتِ في التلفون؟

قالت ليها يععي حأعمل شنو مثلاً؟اعمل شنو؟عايزة تلفوني فتشو لي عشان عايزة اتكلم مع طارق وافهم منه،لغايه الان انا م فاهمة شي،وهو عندو ظرف كمان عمتي سلوى قالت لو م سافر حيتفصل شغل اهم طبعاً وانا م طايرة يخلص شغلو ويرجع نتم عرسنا م مخليني للأبد هو ..

شهاب وامجد جو داخلين علينا مع بعض ،رونق قالت ليهم اها عملتو شنو وصلتو ل طارق إتكلمتو معاهو؟قال ليكم شنو؟

شهاب قال ليها إتكلمنا معاهو والكلام القالو ليكم قالو لينا م نتناقش كتير في الموضوع احسن لغاية هنا

رونق قالت ليهو لكن دة م عدم إحترام ولعب شفع؟ليه يعمل كدة شايفكم جلاليب ساي وم شايفكم رجال ولا شنو؟في زول بلغي عرس كامل بعد لسبوع برسالة واتساب؟ليه شايف البن رخيصة ولا معيوبة ؟

امجد قال ليها رونق،نحن طارق دة إتصل علينا وقعدنا معاهو قعدة رجال ووضح لينا اسبابو ،لا لغى العرس بمكالمة ولا ب رسالة،م تقابضي ساي ،نحن عارفين الموضوع دة قبلكم