طوبى ☕شارع القهوة☕

الجزء الحادي والستين 6

‏بَلّغْ شَبيهتَكَ السّلامَ وَهَنِّها
‏بالنّومِ واشْهَدْ لي بأني ساهرُ ..🍃
🍃🍃🍃🍃🍃🍃
وفي شارع القهوة..
في من كان ساهر تحت ضي القمر حتى هو..
ماكانتش اول ليله يقعد فيها ساهر ياما سبقوها ليالي وليالي..
بس ماكانش زيه زي غيره من العشاق اللي يقدروا براحه يفكروا في المحبوب ويسرحوا فيه..
لاهو كان هارب من الشي هدا..ويقاوم فيه بكل قوة
هدا علاش كان شاد تليفونه
ولاهي بالفيس
من منشور لمنشور..من فيديو لفيديو
واغلب الفيديوهات اللي يشوف فيها كانت لشعراء يتغنوا
بالوطن..والفخر..وحال الدنيا
كان منسجم ويألف في ابيات ويحطها في التعليقات ويكون عليها تفاعل كبير
وفي عز انسجامه مع مناشير الشعر
تقابله مشاركه دايرتها بنت عمته لمنشور
في بيت شعر فصيح..
🍃كنتُ أدعوكَ يا الله في صِغري
‏رزقًا من الأُنسِ أو قطعًا من الحلوى

‏لمَّا كبرتُ عرفتُ الرِّزق يا ربِّي
‏بأنَّه الأمنُ والإيمان والسلوى

عجبه هلبه البيت وجي بينسخه بش ينزله ع صفحته..
بس عيونه جو ع اسم صاحب الصحه...
كان مكتوب باللغه الانجليزيه...
TOBA....
وصورت الحساب..كانت ليها هي..
واقفه وعاطيه بالظهر ومنزله راسها..
لابسه شاربه بيضا كبيره..وبلوزة واشعه سودا فيها ورد ابيض كبير..
تفكرها اللبسه هادي شافها بيها في المدرسه...
حس برعشه سرت في جسده..ونبضات قلبه تسارعت..
وضلوعه كأنهم تشابكوا وطبقوا عليه وكتموا نفسه..
طول طلع من الفيس..
ومازالوا عيونه ع الشاشه..وع وجهه باديه ملامح..
الضيق والوجع..
غمض عيونه..وتنهد من وسط قلبه تنهيده كلها ألم..
نزل التليفون ورفع راسه فوق..
بعدين فتح عيونه وقال بصوت يدوب طالع...
يارب...
🍃🍃🍃🍃🍃
وتعدي هالليله..ويلحقها نهار اليوم التاني..
كان الجمعه...
كان صبح هادي في كل حوش والاجواء روتينيه ومعتاده في كل حياش الشارع..
ماعدا..
حوش شنيبه..
بعد مافضي الحوش وماقعدش فيه الا اهله..
بدت تطلع هلبه حاجات كان مدسوسه...
🍃"معاش نبي ننزل لوطا بوي سامحني"
المهدي:يزن لوطا حوش جدك...
يزن قعد منزل راسه وهو ساكت ومضايق..
محمد؛بوي ماتضغطش عليه..معليشي خلينا هني اليوم احسن..
المهدي؛واختكم..اختكم قاعده صغيره ماتتحلمش لازم تقعد في جو ينسيها شويه..
محمد؛نزلها لوطا وخلينا حني هني ندبروا روسنا..
المهدي وهو حاط ايديه في جيوبه مرر نظره عليهم بعدين قال..
سدرة..
"جايه بابا"
شويه وطلعت عليهم وجت لبوها..
هو قعد مركز ع ملامح وجهها اللي كلها كآبه خدي يدها وشدها بحنان بعدين قال؛شويه وجايكم..
سدرة؛مش نازلين معانا..
شافوا لبعض وهما ساكتين..
المهدي:هيا بنتي..
شبحتله بعدين غيرت عيونها عنه وقالت؛هيا..
ومشي بيها من خداهم وطلعوا من الشقه..
محمد طلع مم جيب سروال التوته متاعه ورقه..وحطها ع الطاوله ومررها ليزن..
يزن لما شافها استغرب وقال؛شني هادي؟
محمد وفي عيونه لمعة الدموع؛من امي..
يزن شبح للورقه وعيونه غرقوا بالدموع..
بعدين خداها بإيديه اللي يرجفوا وفتحها وبدي يقرا فيها..
(السلام عليكم...يزن حبيبي..
ابني..ورجلي..وبطلي..وفخري..
لطالما افتخرت بك وبنجاحك الدائم وتفوقك الباهر..
افتخرت بقوتك وصلابتك ع صغر سنك..كنت اهابك..نعم اهابك..كما كنت اهاب اباك في صغره..تشبهه كثيرا في كل شي...واسأل الله ان يجعلك مثله...
حبيبي..اريد منك ان تكون الأول كعادتك..ناجح ومتفوقا دائما..متمسكا بصلاتك..واياك ان تنزع عنك ثوب اخلاقك الحميده مهما واجهت في حياتك..
اجعلني افخر بك في حياتي ومماتي حبيبي..تذكرني دوما واذكرني في دعائك..ولاتجعل احدا يعرفك الا ويقول عنك..
"رحم الله اما جابت وربت"
                                      نحبك هلبه...امك)
ناض بالورقه ومشي خش للدار بش يبكي براحته..
وخلا خوه الكبير...يمسح في دموع الألم..
وقلبه مفطور من الحزن...
🍃🍃🍃🍃🍃🍃
لوطا...
طلعت طوبى بالمفرش من الكوجينه لدار العيشه بش تفرشه فيها وتحط الفطور...
خشت للدار..
وفرشت المفرش..ووين جت بتطلع..
جت قدامها جوري وقالت؛ابله ديريلي التوكه متاعي هني..
واشرت ع جهة محدده من شعرها..
طوبى ؛حاضر..هاتي التوكه..
مدت جوري التوكه..
خدتها طوبى ولما جت بتحطها في شعر البنت..
وقفت..
وهي تشوف للتوكه بعقده حواجب...
حست روحها شايفه زيها قبل...وفيسع تفكرت امتى ووين...
كانت نسخه منها..وكأنها هي..
جوري:ابله طوبى..
طوبى استاقظت وقالت؛هي شويه بس..
وحطتها وسكرتها وهي تشوفلها زين بعدين قالت..
حلوة التوكه متاعك..شرتهالك ماما؟
شافت جوري لطوبى وقالت؛لالاخالتي مروة..
هزت طوبى راسها بعدين ابتسمت مجامله وقالت؛خشي حبيبتي قعمزي شويه وبنجيب الفطور..
جوري:حاضر..ومشت خشت للدار..
وعيون طوبى ع التوكه اللي في شعرها..
بعدين غيرتهم عنها وطلعت من الدار وهي متوجهه للكوجينه..
قابلوها المهدي وسدرة جايين من اخر الممر..
هي ابتسمت وقالت؛سدورة صباح الخير..
جت سدره لطوبى وشدت يدها وقالت؛صباح الخير..
المهدي؛صباح الخير طوبى..
طوبى شبحتله وقالت؛صباح النور..
هو قال:فاقوا كلهم؟
هزت راسها وقالت:ايه..عمي والجالي ونضال يفطروا في المربوعه لحق عليهم..
هو شبح لسدره بعدين شاف لطوبى..
طوبى حست انه يبي يقوللها حاجه قالت لسدره؛بري حبيبتي للدار قعمزي مع جوري لين نجيب الفطور..
المهدي؛بري بابا بري..
سدرة؛حاضر..
وطلقت يد طوبى ومشت..
وهما الزوز قعدوا يشبحولها لين خشت للدار..
شافت طوبى للمهدي وقالت؛حسيتك تبي تقولي حاجه..
هو قدملها بعدين وقف قدامها وطلع من جيبه ورقع مدهالها وقال؛هادي خلتها عايشه الله يرحمها لسدرة نبيك تقريهالها..
خدتها طوبى وقلبها موجوع وقالت:حاضر..
هو قال؛مش عارف شن فيها..ماقريتهاش..تنهد وقال..ان شاء الله تهون عليها شويه وماتزيدهاش..
طوبى بحزن؛ان شاء الله..
هو شاف لطوبى شويه بعدين قال؛شن حال اختك..
طوبى ودموعها عبوا عيونها؛زي ماهي ماتغير في حالها شي..
هو هز راسه بعدين لف ومشي متوجه للمربوعه من غير ماينطق بكلمه..
وطوبى تنهدت بحسره..بعدين خشت للكوجينه...
🍃🍃🍃🍃🍃🍃
في المحل متاعه..كان يرتب فيه ويجهز فيه للخدمه...
وهو يسمع للموشحات من الراديو ومنسجم معاهم..
شويه خش عليه زبون وهو يقول..
"ع السلامه"
التفت وشافله بعدين ابتسم ؛ع السلامه..صباح الخير..
عبد القيوم بإبتسامه؛صباح النور..شكلك بتستفتح بيا..
فراس بإبتسامه؛صبح باين من اولو..
عبدالقيوم؛خير ولاشر؟
فراس:وجه كي وجهك انتي يجي منو غير الخير..
ضحك عبد القيوم وقال؛بارك الله فيك ..
ومشي خش..
وفراس يقول:اقعد..اقعد..
قعمز عبد القيوم وشاف للمرايه..
هوقاله:كيفاش تبيها الحسانة؟
عبدالقيوم اشر بايديه ع جهة معينه من شعره وقال:من هنى بس ماتنزلش عليه واجد..
فراس:واللحيه..
مسح عليه بيده وقال؛لالا مانبيش نقربها..
فراس؛تمام..
ولبس عبد القيوم مريلة الحلاقه..
وبدي حلاقه..
ومعاها بدي الهدرزة اكثر حاجه مشهورين بيها الحلاقين بش يفوتوا الوقت..
فراس؛قولي عبد القيوم مرتاح في الشارع؟
عبد القيوم:اها..الحمد لله..
فراس:سمعت انك كنت ناوي تخليه..
عبد القيوم؛كنت بس ماقدرتش..
ابتسم وقال؛تعرف ليا سنين في ليبيا وتنقلت فيها من بلاصه لبلاصه..لعند ماجيت هنايا..سبحان الله الحومه هادي..او الشارع هدا تعلقت بيه برشه وكأني تربيت وكبرت فيه..
عبد القيوم بإبتسامه؛نفس الاحساس الشارع هذى فيه سحر عجيب..
فراس؛فيه ناس عجيبه نادرة اللي كيفهم انقرضوا..كيف حوش سي لطفي الواعر..
عبد القيوم؛ايه والله ع قد ماشفت وقابلت وعرفت في حياتي ماطحتش في ناس كيف هالناس..
فراس:قلوبهم كبيره وطيبين يعاملوك وكأنك منهم وفيهم من باقي العيله..
عبد القيوم بإبتسامه؛مزبوط..
فراس بضحكه؛تعرف كل حفظة نراجي في يوم الجمعه بش ناكل من غداهم البنين تبارك الله..
عبد القيوم؛اها الله يبارك ذقت طعام اغلب اهل الشارع مافيش اطعم من ايكالهم..
فراس؛فعلا..الله يطول في خالتي مطيره ديما تحسب فيها وتسأل عني وعن اهلي..وسي لطفي شبه يوميا يوقف عليا ويسألني عن حالي وعن حوالي ويحلفني كان محتاج شي نقوله..
عبد القيوم قعد يسمع وهو مبتسم وساكت..
سكت فراس شويه بعدين قال:حتى عيلة شنيبه ناس باهيه..
عبد القيوم؛المهدي ونضال من احسن الناس اللي عرفتهم هنا..
هو عقد حواجبه وقال:حتى الجالي..
تعكرت ملامح وجه عبد القيوم..
وفراس سرقله نظره سريعه بعدين قال؛عمل معاي خدمة العمر وساعدني مساعده كبيره..
قعد عبد القيوم ملتزم الصمت..وفراس وهو يحلق في شعره كان يسرقله في النظر..
بعدين قال..وعيلة الصيد ولدهم اشرف قدع ومحترم..
عبد القيوم؛اها اشرف محترم بكل..بس باقي ولادهم ماعنديش بيهم خلطه واجد..
فراس؛ماهم مايسكنوش هنايا ومحي الدين نادر مانشوفه في الشارع..
عبد القيوم:صح..
تنهد فراس بعدين قال؛بس اني اللي محيرني واحد شفته في العزي فيه شبه كبير من سي لطفي..شفته مرتين في الشارع قبل..
عبد القيوم؛هذى ولد عمي لطفي الكبير..
فراس؛توقعت..
عبد القيوم توقع  انه حيسأل عنه اكثر فسبقه وفتح موضوع بعيد عن الشارع بكل:قولي فراس انت كم لك في ليبيا..
ابتسم فراس وقال:15سنه..
🍃🍃🍃🍃🍃
مقعمز يشرب في قهوته بروحه والفطور قدامه..
ماباش يفطر لين يجي ولده..
وشويه وجي ولد وقعمز قدامه..
وقعد يصب لروحه في القهوة..
ركز ع ملامح وجهه بعدين قال؛روحت موخر امس؟
مهند؛ايه..
اياد؛سمعت حلقة امس..
مهند يشرب في القهوة بدون رد..
اياد بإبتسامه؛عجبتني اللفته اللي درتها لسدره..
شبحله وهز راسه ورجع رشف من القهوة..
عقد اياد حواجبه وقال:من هي مرجان؟
مهند حط الفنجان وقاله؛ماتعرفش تلف ودور..
ضحك اياد وهز راسه موافقه ع كلامه..
مهند قعد ساكت وهو يشرب في القهوة..
اياد؛علاش ماتبيشي تقول السبب..
مهند؛بوي ارجوك..
بدت ع وجه اياد ملامح الضيق وقاله؛Ok..براحتك..
ورجع يشرب في القهوة وهو يراقب فيه..
🍃وفي حوش لطفي الواعر..
اريج وهي مقعمزه ع سرير خالتها سدرة اللي خداته آلاء؛الاء نوضي بالله عليك ماتخليش امي تنشغل..
الاء وهي غامه روحها بالورغان؛خليني يااريج بالله عليك خليني..
اريج بضيق:باهي شن نقوللهم كان سألوني عنك..
هي قالت بنبرة باكيه؛قوليلهم ماتت.
ضربتها وقالت؛بعيد السو ياحق.يره..
قعدت الاء تبكي بصمت..
واريج ناضت وهي مضايقه وعيونها مليانات دموع بعدين مشت طلعت من حداها وسكرت الباب...
🍃🍃🍃🍃🍃
"شن سدرة معاش تبي خلاص"
سدرة؛ايه عمتي خلاص..
نسرين؛زيدي هادي ع خاطري اني..
سدرة بضيق؛والله معاد نقدر..
نسرين؛قتلك ع خاطري..
طوبى اللي كانت مركزه بنظرها ع توكة جوري تسمع في اللي يدور بين سدرة وعمتها قالت؛خودي بخاطر عمتك سدورة..
سدرة شبحت لطوبى..
وطوبى شافتلها وابتسمت..
رجعت سدره شافت لعمتها وخدت منها الخبزة اللي فيها شويه شاميه وكلتها..
نسرين بإبتسامه؛صحتين ياقلبي..
ناضت جوري وقالت؛بنمشي نوكل قطوستي..
سدرة وهي تاكل؛حتى اني..
طوبى ناضت وهي تقول؛هيا نوضوا نفطروهم مع بعض..
ناضوا الزوز وهما متحمسات..
طلعت جوري تجري..وسدرة لحقتها وهي تقول؛راجيني..
نسرين بحزن؛ياعمري قاعده صغيره..
طوبى تنهدت وقالت؛ تو تتعود وتعيش..
ومشت طلعت وراهم...
وخلت نسرين بروحها تفكر في همها وهم غيرها...
🍃طلعت طوبى مع البنات للقطاطيس..
ودارولهم فطورهم وقعدوا يتفرجوا عليهم وهما ياكلوا..
وطوبى كانت تهدرز مع البنات ع اساس انها القطاطيس مرة تاخد دور قطوسه سدره ومرة قطوسه جوري..
والزوز منسجمات ويضحكوا عليها..
ع طلعة الجالي اللي كان يسمع في اصواتهم..
وقف في الباب وقعد يتفرج عليهم..
وعيونه ع طوبى بس..
كيف تتكلم وهي مبتسمه بروح الاطفال وبرائتهم..
خلت سدرة تضحك من قلبها وتنسى حزنها..
لااراديا ارتسمت ع وجهه ابتسامه حلوة..وفي عيونه صورة طوبى بس..
وقلبه يدق..يدق..يدق...وخلاه يتنهد تنهيده غصب عنه طلعت..
فجأة سمع باب الحوش الخارجي دق..
طوبى التفتت وشبح جهة الصوت..
جو عيونها عليه ابتسمت وقالت؛انت هني!؟
ضحك ومشالهم وهو يقول؛عندكم علم تبانوا خمسة قطاطيس..
وقعمز ع رووس صباعه جنب طوبى وقرص خدها وهو يقول؛وهادي احلاهم..
طوبى ابتسمت بخجل وفنصت فيه..
والبنات يشوفلهم وهما مبتسمات..
الجالي ؛علاش تفنصي..شبح للبنات وقال..تو هادي مش قطوسه حلوة..
سدرة وجوري بأصوات متقطعه..
"احلى قطوسه..هلبه"
وطوبى غطت عيونها وهي تضحك بخجل...
🍃وهاللحظه الحلوة..
شافتها عيون مليان غيره وحقد وغضب...
قعدت تقدملهم بالخطوه وهي تشوف لطوبى بكره شديد..
جوري وين سمعت صوت الخطوات..
شافت جهة مصدر الصوت وقالت بمفاجأة..
"ماما"..
الجالي جمد في مكانه..
وطوبى شافتلها طول وناضت وقفت...
جت جوري لأمها وضمتها ونجاه تمسح ع شعر بنتها وهي تقوللها؛حبيبتي..
جوري:استاحشتك ماما..
نجاه؛واني اكثر ياعمري...
الجالي وقف ع حيله والتفت شافلها..
طوبى:حمد لله ع سلامتك..
شافت لطوبى بإبتسامه مصطنعه؛الله يسلمك..
الجالي:من جابك؟..
غير عيونها ليه وهي محافظه ع ابتسامتها المصطنعه وقالت؛صابرين..
هو قال:امتى طلعتي؟
نجاه؛ليا يومين..
وطوبى تمرر في نظرها بيناتهم..
شافت نجاه لبنتها وهي تقول:ارتحت يومين في الشقه وجيت اليوم بش نعزي في عيشه..
وسدرة وهي تمسح ع ظهر قطوستها كانت تشوف لجوري كيف شاده امها..
التفتت طوبى شافتلها لقتها مركزه معاهم قلبها وجعها..
خدت نجاه جوري من يدها وقالت:هيا تعالي نخشوا داخل تشوفي خالتو..
ومشت من قدامهم بتخش الكوجينه..
وعيون الجالي معاها..
التفتت طوبى شافتلها وقالت؛فطرتوا..
هو حرك عيونه لطوبى..
التفتت نجاه وشبحتلها بإبتسامه وقالت؛الصراحه لا..
طوبى:تمام تو نديرلكم فطور..
نجاة بإبتسامه؛صحيتي حبيبتي..
ومشت خشت ببنتها داخل..
طوبى بعد ماخشت قالت:شكلها حرجانه..
هو التفت لطوبى..
شبحتله وقالت؛ع خاطر ماحد دورها طلعت وانتم مش عارفين..
هو قال؛بروحك عارفه الوضع وشايفه اللي صار ياالله نفكروا في رواحنا..
طوبى:حمزة وضعه يبي اهتمام..
هو قال؛مش مقصرين..امس بس بوي كان عنده..ع العموم خلاص توا بنفضوله ونشوفوا شن يلزم حالته ونديروه..
طوبى هزت راسها وقالت؛خل نخش ندير الفطور..
شافت لسدرة وقالت؛تجي معاي؟
سدرة؛باهي..
وناضت ومشت بتخش مع طوبى..
الجالي؛حدديلي العربي وحطيه في دار المكواه..
هي قالت؛حاضر..
وخشوا الزوز للكوجينه..
هو تنهد بضيق وخوف بعدين مشي بيتوجه للمربوعه الخارجيه..
قبل ليوصل فيها..فات من قدام نضال اللي كان مقعمز في الجنان القدامي..
قعد معاه بعيونه لين خش للمربوعه وهو يشوفله بشك..
🍃🍃🍃🍃🍃
وفي الصاله..
صابرين؛اليومين اللي فاتوا علينا بحرق الدم..
مغليه؛علاش؟
صابرين؛لطفيه ياخالتي مغليه هدا تفكرت ان ليها احفاد..
نجاه قعدت تشوف لبنتها وتمسح ع شعرها وباديه ع وجهها ملامح المسكنه..
نسرين؛شن دارت؟
صابرين؛قولي شن مادارت..دارتلنا العار في العياده غادي تهزب وتعيط تقول نجاه قاصده دير هكي ماهو هدا ولدها ضناها وحتى هي دفعت الثمن غالي..
بدي ع وجه نجاه الضيق..
ونسرين شبحتلها بشفقه..
مغليه؛الستر ياربي هادي خيرها!؟
صابرين؛ماهو بالها في حاجه تانيه ياخالتي مغليه..
مغليه بإستغراب؛حاجه شني؟
تنهدت نجاه..
وصابرين قالت؛عمي محمد امس جي للعياده بش يشوف حمزة شداته قريب نص وهاتك يادوة ولاقالت نسكت..
عقدت مغليه حواجبها ورفعت واحد فيهم..
نجاة؛المراة هادي مايهمها حد كان روحها استغلت طاهر الله يرحمه قبل لحاجه زي هادي وتوا تستغل في صغاره..
نسرين قعدت تشبح لنجاه وصابرين بإمتعاض..
مغليه ابتسمت بتهكم  وقالت؛طيح سعدها ومزالها كان اللي دير فيه ينفع راهو نفعها قبل..
صابرين؛حتى اني قلتها لنجاة..
نجاه:هي حاولت تفتن بيني وبينك هديكا اللي تقدريها وتحترمي فيها اكثر مني ماقالت نجي نهار نشوفها..
مغليه شافت لنسرين وقالت..ريتيها!؟؟
رفعت نسرين حواجبها ونزلتهم..
ع خشة طوبى بسفرة الفطور..
لما شافتها صابرين فزت تلقائيا وقدمتلها وقالت؛علاش متعبه روحك..
وجت بتاخد منها السفره..
طوبى:لالا شن ديري!؟
صابرين؛غير هاتي هاتي..
وخدتها منها..وطوبى متفاجئة هلبه..
ونسرين وامها مستغربات..
اما نجاه كانت تسحن ع اختها..
طوبى قالت وهي مازال متفاجئه:خل نفرش المفرش..
وفرشاته طوبى..وصابرين حطت السفره..
طوبى؛افطري معاهم عمتي..
نجاه؛مافطرتش لتوا؟
مغليه؛بكري ماعنديش نيه..هي تعالي نجاه..
ناضت نجاه وقعمزت بالشويه عليها..
نسرين؛قعمزي طوبى بكري مافطرتيش كويس تفطري في البنات بس..
طوبى:لا والله كولوا انتم صحتين بنركب نحدد حوايج الجالي..
نجاه حولت وشاحها وقالت:معليشي طوبى ميه..
طوبى:باهي..
ومشت طلعت من حداهم..
وهما بدوا يفطروا وكملوا هدرزة ع لطفيه...
شويه وولت طوبى بسفرة فيها مالقي ميه وطواسي..
وين مشت حطتها جنب نجاه..
عيونها جو ع شعرها...شافت نفس التوكه..
اللي شافتها عند جوري..
واللي شافتها قبل..في شنطة في الجالي..
صدرها ضاق..وحست بشي ركب لرقبتها وخنقها..
شبحتلها نجاه بنظرة تبان عاديه..بس من داخل كانت مخيفه هلبه..
قالت لطوبى:صحيتي..
طوبى استاقظت وقالت؛سلمك..
بعدين وقفت ع حيلها ومشت من حداهم وهي تفكر..
حطت يدها ع رقبتها وين وصلت في الباب..
بعدين طلعت..
ونجاه تشوفلها بنظرات مكر غير واضحه..
🍃وقفت طوبى جنب الباب وهي في عالم تاني..
تفكر في اللي قاله الجالي يومها عن التوكه لما لقتها في شنطته..وهل معقول تكون صدفه وجود زيها مع نجاه وبنتها جوري!!؟..
في شن قاعده تشكي ياطوبى!؟
لوين تبي افكارك توصلك..!؟
مستحيل اللي في عقلك يكون صح..اصلا مش منطقي مايخشش العقل..
لالا مايخشش العقل..
انتي اللي مش متقبله نجاه هدا علاش تفكري فيها غلط..
انتي اساسا كيف تفكري في الجالي هكي!؟
وبعدين التوكه هادي حكر ع نجاة وبنتها اكيد في منها هلبه..
وماتنسيش هو قالك بنت صاحبه يعني بتكون واخدها من هني..هما اصلا التوكات هادم موضة توا ايه موضه..
شفت منهم هلبه..وشفت هلبه لابسينهم..
خلاص طوبى خلاص..تعوذي من الشيطان ماتخليشي يخرب عليك حتى انتي...الحكايه مش ناقصه...
"جت تعزي!؟"
طوبى استاقظت لما سمعت الكلمه هادي..
🍃مغليه؛ايه دايره روحها جايه تعزي اشبح شن دارت للولد قلباته قلب بسببها توا بيطلق بنت خاله..
نجاه بصدمه؛حي غباره!؟
صابرين؛كيف تجي من اصله مصح وجهها!
شدت طوبى ع قبضة يدها بقوة من الغضب..
🍃نجاة؛جريئة هلبه البنت هادي ..
صابرين:مش ساهله بكل..
ونسرين تسمع وساكته..
نجاه؛برغم ان منظرها يوحي بالعكس..مقيوله السكوتي تحته كوتي..
مغليه؛فرق كبير بينها وبين بنت عمها...مطلعه روحها من اللي صار وساكته ومابتش تخش في شي هادي المراة اللي تبي تحافظ ع حوشها وراجلها..
نسرين شافت لنجاه ..
وصابرين قالت؛ايه صح طوبى مش زيها..تحسيها عاقله ومش متاع مشاكل..
نسرين؛طوبى طيبه وهاديه مش ملهط وشلولح قليل نادر ماتخش مشكله ولاتتعصب هدا علاش الجالي مرتاح معاها
نجاه رفعت حاجبها وشافت لنسرين..
وصابرين قالت؛ان شاء الله مايلعبوش بعقلها..
مغليه؛ان شاء الله ياربي...
التفتت نجاه لطاسة الميه اللي صبتها وشربت منها شويه..
خدتها وشربتها باقيها في مرة وحده..
وصابرين ونسرين يشبحولها من تحت لتحت..
مغليه وهي تاكل؛نديرولك برودو الغدي ولا؟
حطت الطاسه وقالت؛ايه هدا اللي نقدر عليه توا وياريت ديره طوبى الله يبارك عليها اللي تحط فيه يدها يجي حاجه تانيه..
مغليه بإبتسامه؛صدقتي..
🍃طوبى سمعت الجمله هادي وتباعدت عن الباب ومشت توجهت للحمام وهي مضايقه ع الاخر..
تكلموا عن بنت عمها وذموها وماقدرتش ادافع عنها ولاقدرت تاخد موقف..
قعدت تسحن في روحها لدرجة انها كانت حتبكي..
وصلت للحمام وخشتلها..
سكرت عليها الباب وحولت وشاحها..
حطاته ع الشماعه ورا الباب..
بعدين قامت اكمامها ووقفت ع اللاوندينو ..
فتحت الشيشمه وبدت تتوضى..
كانت توضا بعصبيه بس شويه شويه خفت..لعند ماكملت الوضوء..
سكرت الشيشمه وقامت عيونها في المرايه..
كارهه انعكاس صورتها في المرايه..كان مبينها ضعيفه لأبعد حد..
نزلت عيونها لسلسال طوبى اللي كانت لابساته..
حطت يدها عليه..وقعدت تتحسس نقشة الاسم بأصابعها..
فجأة دق الباب..
"ابله طوبى"
نزلت يدها وشافت للباب وقالت؛شويه وطالعه حبيبتي..
مشت للمناديل الورقيه..سحبت منهم شويه ومسحت وجهها شويه شويه..
بعدين لوحاته في السله..وخدت الوشاح ولبساته..
ونزلت اكمامها وفتحت الباب وطلعت...
🍃🍃🍃🍃🍃
الساعه 2:30بعد صلاة الجمعه...
في حوش الصيد..
ع وجبة الغدي..
كانوا ملتمات نجمه وكناينها ع راسهم خديجه وبناوبتها وهما يهدرزوا..
؛سبحان الله نصيبات..
خديجه؛ايه والله..ربي يكمل ع خير نجوحه انتي طيبه وربي عطاك ع قيس نيتك..
نجاخ ابتسمت مجامله..
وعواطف قالت؛صدقتي كل حد ع قيس نيته يامريت خوي..
نجمه لاحظت حرب التلقيح زي ماللي حواليها لاحظوا وقالت..
نجمه؛اني مش عارفه كيف بيصير كان قالوا نبوا العرس توا مانقدرش نفرح وجيراني متنكدين..
خديجه؛رغم انها الله يرحمها وصت مايحزنوش عليها لكن نقولك الاحسن ديروا في الصاله كان فيها كيف..
عواطف؛حتى اني فكرت هكي..نعرف صاله كبيره ع دورين فيها قاعتين قاعه فخمه والتانيه باهي..نحجزوا فيهم للحفله والحنه شن رايك نجوحه..
نجاح؛كان ربي راد وتم الموضوع نبي يوم واحد في الصاله بس..
نجمه؛احسن هكي الناس ماعندها كان العياط مانبوش نحلوا عيونهم علينا..
خديجه؛عندك حق عمتي..
وحده من الكناين قالت؛ان شاء الله ع خير يارب..
كلهم بأصوات متقطعه قالوا؛آمين..
ونجمه من داخلها كانت فرحانه ع الاخر..فرحانه اكثر من نجاح نفسها..وفي قلبها تدعي ربي يلحق عواطف بأختها وتطمن عليهم...
🍃وفي الحوش اللي فجنبهم..
ع طاولة الغدي..كانوا يتكلموا في موضوع مشابه..
عبد الرؤوف؛قال قبل رمضان في شهر 4وهي تحدد التاريخ اللي تبيه..
نبيله وهي مبتسمه بشي من الاحراج؛تو نشوف..
غرفه بضحكه؛حي عليك بنولي حماتك توا..
عبد الرؤوف؛ريحي جمالك..
نبيله بضحكه؛تبصر خليها..
غرفه بضحكه؛شفت كيف بدت تخاف مني..
نبيله قعدت تضحك..
عبد الرؤوف:الشكل هادي معاش تعطيها وجه..
غرفه؛اسمع اطلع منها خليني اني مع مرت خالي نتصافوا..
رفع الكاشيك بالقفا وقال؛تغدي واسكتي..
هي طبست راسها في صونيتها وقعدت تاكل وهي شاده ضحكتها..
ونبيله تضحك عليها..
🍃🍃🍃🍃🍃🍃
طلع من المربوعه ومحمد ولد خوه قدامه..
الجالي ؛وين ماشي؟
محمد؛عمتي نسرين ضبحت عليا..
الجالي؛اها..
وصل في دار المكواة خشلها وسكر الباب..
ومحمد كمل طريقه للكوجينه..
قبل يخشلها نادى..
عمتي نسرين...
"خش محمد خش"
خش محمد للكوجينه...
🍃في دار المكواة..
الجالي كان يبدل في حوايجه..
بعد كمل قعد يعلق في لبسته العربيه في العلاقه..
فجأة..
انفتح الباب..
لما شاف من فتحه انصدم..
هي سكرت الباب..
وهو لوح لبسته وقال بصدمه؛شن ديري انتي كلهم برا!
قدمتله وقالت؛اخر همي..اني خلاص معاش مدورة شي بعد اللي خسرته..
هو وجهه انخطف من الخوف وقاللها:اطلعي..
نجاه:مش طالعه..مش طالعه من هني قبل لتعطيني كلمه اخيره..بتعلن زواجنا ولالا..بتقول لماليك ولالا..بتكمل معاي ولالا..
هو بخوف:مش وقته توا بعدين ندووا في الموضوع هدا اطلعي..
نجاه من تحت سنونها:قتلك مش طالعه لين تقولي..لين تعطيني قرار نهائي يالجالي..
هو قعد يشوفلها والخوف مسيطر عليه ومش قادر يرد..
وهي تشوف بإبتسامه اسف ونظرات قهر وعيونها معبيات دموع بعدين قال؛صدقوا لما قالوا انك مش صاحب كلمه..
عقد حواجبه بغضب وقال؛نجاه تكلمي كويس!..
نجاة ودموعها ينزلوا؛نجاه خلاص يالجالي خلاص..بتمسحك من حياتها نهائي بتنساك وبتلعن اليوم اللي حباتك فيه وحتى انت  انساها....
🍃برا..
مشي محمد للريفودجي بس بيجيب راس غاز...
نزله..وجاب منه راس الغاز..
بعدين ركب ووصل لاخر الممر الطويل اللي يرفع للكوجينه..
ويشوف باب دار المكواة انفتح..
وطلعت من نجاه..
هو طول ولى وادرق ورا الحيط..وقعد يراقب فيها وهي ماشيه لين اختفت من قدام عيونه..
شويه وطلع عمه..
هو درق مرة تانيه..
وقعد يسمع في خطوات رجليه كيف قعدوا يتباعدوا..
بين راسه وشافه وهو مشي لين درق..
طلع من ورا الحيط..وهو موجوع ومضايق ع الآخر..
قعد يمشي لين طلع من الممر ووصل في الكوجينه..
نادى؛عمتي..
شويه طلعت طوبى وقالت؛هات ترا..
حس وكأن قلبه انعصر عصر..مدلها الراس..
وهي خداته وخشت داخل..
غمض عيونه بعدين فتحهم والتفت ومشي وهو يقول..
حسبي الله ونعم الوكيل..
🍃ونجاه في جناحها..
تلم في حوايج صغارها وهي تقول؛جوري ماما بري قولي لعمتك نسرين تتتصل بعمتك خديجه وتقوللها تجيب معاذ..
جوري:ماما تبكي انتي؟
نجاة؛لا حبيبتي غير بري هيا ياماما بش نروحوا..
جوري:حاضر..
ومشت طلعت من حدا امها وهي تجري..
ونجاه بعد ماطلعت بنتها قعدت تبكي وهي تقول بصوت منخفض..
والله مامخلياتك تتهنى انت وياها الله..
🍃وبعتت خديجه معاذ مع محمد ولدها..
وخداته نجاه وروحت بصغارها مع اختها ع قد ماشدت فيهم مغليه..لكن نجاة سكرت راسها ع المرواح...
وماارتاحش الجالي الا بعد ماروحت..
هو ماخداش كلامها ع محمل الجد لأنه عارفها تحبه لحد الجنون ومستحيل تخليه مهما حاولت وكان واثق من الحاجه هادي ثقه عمياء..
🍃اما طوبى..لما شافتها كيف ماطولتش وروحت بسرعه..
حست براحه...خلتها ترجع تفند شكوكها وتهزا ع روحها اللي فكرت هالتفكير...
🍃احيانا نفضل الغرق في بحر الوهم هربا من الواقع🍃
🍃🍃🍃🍃🍃🍃
الساعه 7:00مساءا..
كانت موتيه روحها بش بتروح لحوشها مع راجلها..
وهي واقفه في الجنان تراجي فيه..
جاها سلفها يسأل فيها عن..
المهدي:شن صار معاك؟
طوبى بضيق؛حسيت ان جوها باهي اليوم خقت نقرالها الرساله ترجع تكتئب..عطاته الرساله وقالت...خليها لين يجي وقت مناسب تقرهالها انت فيه..
هو خداها وحطها في جيبه وهز راسه بإيجاب وهو مضايق..
ع طلعة الجالي قال؛هي اطلعي طوبى..
طوبى؛هيا..تصبح ع خير عمي مهدي..
المهدي؛قدامك كل خير..
الجالي:تصبح ع خير..
ومشي طلع بعد طوبى وسكر الباب..
والمهدي مشي ولى للمربوعه الخارجيه بش يقعمز مع المعزين..
🍃برا..
ركبت طوبى السيارة..
ع طلعة محي الدين من حوشه متوجه لحوش نساباته..
شاف الجالي طالع..
رفع يده وحياه..والجالي ردها..
بعدين ركب السيارة..
شغلها وتحرك...
وعيون محي الدين معاهم لين وصل في باب حوش نساباته وخشله...
🍃🍃🍃🍃
في حوش لطفي الواعر..
"يابنتي نوضي كولي حتى شويه حرام عليك"
الاء ببكي:ياماما مانبيش مانبيش بالله عليك خليني.
فردوس ودموعها ينزلوا:تبي تموتي قوليلي تبي تموتي..
الاء ببكي؛ان شاء الله..
اريج بقلق؛حرام عليك الاء ماديريش فينا هكي والله ماناقصين..شوفي كيف خليتي امي تبكي..
فردوس بحزن ودموعها سيل:علاش ديري في روحك هكي بس..خلاص هكي ولاهكي ربك مش كاتب نصيب..
الاء ببكي؛اني حق.يره وتافهه اني اللي ضيعته ياماما اني.
فردوس: انتي ولامش انتي ربك هكي كاتب..هي بنتي تعوذي من الشيطان وكولي حتى شويه خودي بخاطري امك ماليهاش خاطر عندك؟
وجعتها امها...حاولت تسايرها وتريح قلبها..
مسحت دموعها وقالت؛باهي..ترا ميه..
عطتها امها طول طاسة الميه..
خدتها وقعدت تشرب فيها..
واريج قعمزت ع سرير خالتها طوبى اللي ولى سريرها وهي تشوفلها بحزن..
فجاة جتها رساله ع تليفونها...
خداته من جنبها وفتحت الرساله..قرتها بعدين ردت عليها...
🍃🍃🍃🍃🍃
مقعمزة ع سريرها وهي شاده المصحف وتقرا..
رن تليفونها..
وقفت قرايه..وخداته وشافت المتصل..
د.وسام يتصل بك..
تأففت بضجر..وسكرت الصوت..وحطت التليفون في مكانه..
ورجعت تقرا قرآن..
شويه ورجع رن من جديد..
هي قالت؛أستغفر الله العظيم...
وخدت التليفون وجت بتسكره..
بس لما شافت المتصل تراجعت..
وارتبكت وتوترت..
حطت المصحف جنبها..
وفتحت الخط وردت..
اميمه:السلام عليكم..
"وعليكم السلام..شن ياابله قررتي تقعمزي في الحوش"
هي دموعها عبوا عيونها وفاضوا وماقدرتش ترد..
"معناها نظرتي فيك ماخابتش وكنت ع حق لما عطيتكش تزكيه"
هي بنبرة باكيه؛دكتور..والله نفسيتي مدمرة ومش ناقصني..
"لأنك ضعيفه..شخصيتك ضعيفه وثقتك بنفسك معدومه..لو كنتي قويه..كنتي جيتي وراسك مرفوع وكملتي وتحديتي الكل وانا اولهم...لكن زي ماقتلك نظرتي فيك طلعت في محلها"
وقعدت اميمه ساكته مش قادرة ترد عليه..
هو قال..
"تمام..ياريت تحددي مصيرك وتخلي المكان لغيرك الايام الجايه وبعدين شدي تركينه وابكي لين تموتي"
وسكر عليها..
وخلاها مصدومه..وغضباته...وادرينالين عندها وصله لأعلى مستوياته...
لوحت التليفون ع السرير جنبها..
بعدين خدت المصحف وفتحاته ورجعت تقرا..
وفي عقله قاعد يدور كلامه...
🍃🍃🍃🍃🍃
وتعدي ساعات اول الليل..
لين يتناصف..
وفي هالوقت..
في مكان ما...
كانت دور محادثه هاتفيه بين شخصين..
:اما انها ماصدقتش او ماتبيش تصدق..
"يجوز..انت حاول مرة تانيه وهالمرة زيد قرب"
:وهو كذلك...
🍃🍃🍃🍃🍃
تاني يوم...
السبت...
10مارس..2018..
الساعه 11:00صباحا..
في الفيلا متاعها..
قاعد دور عليها وضم قد ماتقدر ماتبيش تجهد نفسها..
وفي عز انشغالها..
يزن الانترفون..
هي استغربت..ومشت طول..
ردت..
طوبى:مني!؟
"السلام عليكم...اني خالتك جميله جارتكم اللي قدامكم"
استغربت طوبى وقالت؛لحظه بس..
وسكرت..بعدين مشت خدت وشاح لبساته..
ومشت طلعت برا..
وصلت في الباب وفتحاته..
شافت مراة عمرها في اواخر الاربعينات..
بإبتسامه من وجه بشوش قالت؛كيف حالك بنتي..
طوبى:الحمد لله..
هي قالت؛اني جارتكم جميله بوخريص..سكنت قدام من شهر ونص تقريبا تعرفت ع الجيران كلهم الا انتي..
طوبى ابتسمت وقالت:تفضلي..تفضلي..
خشت جميله..وطوبى خلت الباب المردود وقالت؛تفضلي خشي داخل..
هي قالت؛في الفرح ان شاء الله..بنتي اني جاياتك نعزمك ع لمة خشة الحوش هدا وين سخر ربي وبنديرها..
طوبى بإبتسامه؛عتبة خير ان شاء الله..
جميله؛ان شاء الله..بالله تعالي نبي نتعرف عليك..
طوبى؛والله نشوف راجلي قبل..
جميله؛حاولي فيه تختخيه باهي وتعالي..
طوبى بضحكه:ان شاء الله..
جميله بإبتسامه؛ماعرفتش اسمك..
طوبى ابتسمت وقالت؛طوبى..
هي قاله؛طوبة؟!
طوبى؛طوبى طوبى..مش طوبة..
جميله؛عليك اسماء غريبه..باهي هدا شن معناه..
طوبى بضحكه؛هادي شجرة كبيره في الجنه..
جميله:اها ماشاء الله..باهي عاشت الاسامي ياحنه المهم زي ماقتلك حاولي فيه هلبه وتعالي نهار الثلات ان شاء الله..
طوبى:بإذن الله..خشي اشربي قهوة..
جميله؛في الفرح بنتي في الفرح..هي بالسلامه..
وفتحت الباب وطلعت..
وطوبى ترد عليها؛بالسلامه..
بعدين سكرت الباب..ولفت ومشت خشت داخل...
🍃🍃🍃🍃🍃🍃
"هاه دكتورة بشري"
شبحتلها وقالت؛مامشتيش كشفتي بكل الفترة اللي فاتت..
غرفه بقلق:لالا ماتحركتش من الحوش الا لحوش ماليا وقدامنا خطوه وبالسيارة يخي..
الدكتورة بضحكه؛خيرك خايفه ..
غرفه؛سؤالك خوفني
الدكتورة؛اني سألتك ع خاطر عرفت حاجه لو كشفتي قبل كنتي عرفتيها..
غرفه بإستغراب:شن هي دكتورة؟
الدكتورة بآبتسامه:انتي حامل بتوأم ياغرفه..
فتحت عيونها ع وسعهم بمفاجأه وقالت؛قولي والله!..
الدكتورة بضحكه:والله..هاه ركزي ع الشاشه وشوفيهم بروحك..
شافت غرفه للشاشه وقلبها يدق بسرعه..
الدكتورة؛هدا واحد....وهدا التاني
حطت غرفه حطت ايديها ع فمها وهي مندهشه..
الدكتورة؛هدا علاش بطنك تبان كبيره هكي..
غرفه ضحكت وعيونها تعبوا دموع بعدين قالت؛واني اللي نحساب روحي سمنت هلبه..
الدكتورة ضحكت وقالت؛تجيبيهم ع خير ان شاء الله..
غرفه وهي مبتسمه بفرح ودموعها ع حفة عيونها؛آمين..
🍃🍃🍃🍃🍃
وطلعت من حجرة الدكتورة..
لقت عبد الرؤوف يراجي فيها في أخر الممر..
شافها مشالها طول..
شدها وقعد يمشي بيها وهو يقول:الامور تمام..
هي قالت؛ايه تمام الحمد لله..
🍃وطلع بيها من العياده للسيارة..
ركبها بعدين ركب..
وشغل السيارة وتحرك..
عبد الرؤوف؛مازال مايعرفوش جنس العيل؟
غرفه؛لافي اللي يعرفوا من توا بس اني مانبيش نعرف للشهر السابع ان شاء الله..
عبد الرؤوف؛اها..
هي بإبتسامه قالت:بس عرفت حاجه تانيه..
هو قال؛شن هي؟.
غرفه وهي تشوفله بإبتسامه:طلعت حامل بتوأم..
هو وقف السيارة ع تركينه..
وشبحلها وقال؛طلعتي شني؟.
غرفه بضحكه؛حامل بتوأم..
قعد يشبحلها وهو مش مصدق.
وهي تشوفله وتراجي في ردة فعله..
هو شبح القدام وشغل سيارته وتحرك..
بدت ع وجهها ملامح الاستغراب وقالت:مافرحتش؟
ماباش يرد عليها..
وهي سكتت وكانت مستغربه في ردة فعله هلبه..
وقعدوا الزوز ساكتين..
هي كانت تشوف للطريق وزاد استغرابها..
لقاته خاش بيها لطريق فاضيه..سفرتح زي مانقولوا..
درس..
ونزل..ومشالها..فتح الباب وقال..
انزلي..
غرفه بخوف؛عبد الرؤوف شن في!؟
عبد الرؤوف؛قتلك انزلي..
هي نزلت وكانت خايفه هلبه..
وهو سكر الباب..
وشافلها وقال؛سألتيني وقلتي مافرحتش؟
هي قعدت تشوفله بخوف..
هو قال:تو تعرفي..
وجاها ورفعها بين ايديه وهي تقول بفجعه؛حي شن بدير!..
وقعد يدور بيها..
وهي تضحك وتقول؛لالاتو نطيحوا اني وياهم ياهمي..
هو قعد يقول بضحكه؛تي اني رافعك يافرخه ماطيحوش..
🌸وقعد يدور وهو يضحك بفرحه..
وهي شاده فيه بقوة وتضحك من قلبها وفرحته زادت فرحتها اضعاف مضاعفه..
~~~~~~~
غرفه بضحكه؛طلقوا عليه الافلام اللي يتفرج عليهم معاي ..
نبيله بضحكه:اني بروحي بنطير من الفرحه ياعمري بنولي عمة لزوز في مرة وحده..الله يبارك الله يبارك..
غرفه ابتسمت وقالت؛نبي نمشي نفرح ماليا ونشوف فرحتهم وجه لوجه هكي..
نبيله طفت ع الغدي وقالت؛راجيني نلبس ونمشوا ع السريع..
غرفه بإبتسامه؛تمام..
🍃وفي حوش لطفي هداكا..
كانوا الكآبة والضيق سايدين ع الجو كله...
كل حد شاد تركينه ومقعمز فيها ولاهي بحاجه.
زي فردوس اللي مقعمزة في دار المعيشه وتخيط في قفطان حوش ليها هي..
شويه خش عليها ولدها وقال..
امي..
رفعت عيونها وقالت؛نعم؟
هو قال:شن صار في السبيدرو؟
تنهدت وقالت؛هونا تلقاه في المدخل..
هو قال:ان شاء الله هداكا اللي في  باكو ازرق..تبيني نلبس سبيدروا زي هدا!؟.
هي قالت؛خيره من يشكي جديد واخدتهولك..
هوقال :امي اني مانلبسش اي شي..
هي قالت؛لا توا بتلبس اللي يجي قدامك مانكش صغير تشوف في الظروف قدامك..
هو قال:تو نقول لجدي..
ولف بيمشي..هي طلقت اللي في يدها وناضتله..
شداته من مرفقه بقوة وقالت؛قسما بربي يامعتز لو قلت لجدك بالله العظيم نبعتك لحوش جدك حسن تقعد غادي..
فك ذراعه من يدها وقال:واني نبي نمشي نقعد غادي مليت من هني كل شي ناقص مافي شي مافيش فلوس..فقر في فقر..
هي قعدت تشبحله بغضب وعيونها مليانات دموع..
معتز؛بنتصل بعمي يجي يرفعني من هني..
هي قعدت تشوفله للحظات بعدين قالت؛برا انتلف برا ورد بالك مازال دورنا..
هو مااهتمش بكلامها كل همه انه يطلع من حوش لطفي
اللي بدت تصعب فيه ظروف الحياة حتى الماكله والشراب ولوا محسوبين...
🍃وهدا اللي مأرق تفكير الكل بالذات لطفي...
معاشه التقاعدي ليه يقعد بالشهور بش ينزل...
ووضع المطحن متاع العيله  معاش ولى زي زمان ومع منافسة مطحن عيلة شنيبه ليهم اللي اصبح مجهز بأحدث الالات والمواد والانواع تراجعوا مبيعاتهم واقبال الناس عليهم..
واللي يطلع من مدرسة سدرة كله بدي يتحول ليها للخارج مساعدة في استمرار علاجها تحشموا يخلوا المصاريف كلها ع خالها المحجوب...
يعني مصادر دخل تانيه للحوش معاش في..ومع الوضع الاقتصادي المتأزم في البلاد معاش ولوا ملحقين ع شي..🍃
انغم قلب فردوس اكثر ماهو مغموم..
ولت قعمزت في مكانها وقعدت تبكي بصمت...
وعمتها وهي ضم في الجنان برا سمعت اللي صار بيناتهم 
وقعدت تقول بصوت منخفض:
الفجي فيها مسكينه..
فجأة دق الباب..
حطت اللي في يدها ومشت وقفت وراه وهي تقول:
منو؟
"غرفه عمتي افتحي"
🍃🍃🍃🍃🍃🍃
وبعيد عنهم...
في مطعم لأحدى الفنادق الكبيره في العاصمه..
كان في موعد بين مختار وفاتن..وهدرزة ع انفراد...
فاتن؛اني فاهمه عليه بس هو مايبيش يفهمني..مش عارفه علاش ديما يفكر اني ممكن قعدتي بروحي تخليني ندير في روحي حاجه ..
مختار؛عارفه روحك قداش مهمه عنده بنته الوحيده..
ابتسمت بتهكم وقعدت ساكته..
هو قال:عندك شك؟
هي قالت؛ماعلينا..اني مش مطوله هني اكثر من اسبوع هو اسبوع ومش عارفه كيف بنكمله..
مختار ضحكه ضحك خفيفه وقعد ساكت..
هي ضيقت عيونها وقالت؛وانت؟
قعد يشبحلها وهو يراجي فيها تكمل سؤالها..
فاتن:شن صار فيك مع اهلك؟
غير عيونه عنها ووزع نظره يساره بعدين قال؛مرفوض..
شبحلها وقال..مغضوب عليا ومرفوض منهم كلهم حتى اختي الوحيد اللي استقبلتني في حياتها وهي فرحانه طلعتني بسرعه بعد لقت روحها مخيرة بيني وبينهم..
تنهدت وقالت؛اني مش مستوعبه حقدهم عليك حتى الصغيره اللي لاشافاتك ولاعرفاتك نافرة منك
هو قال:قتلك قبل..سدرة اللي ربتها..
سكتت فاتن وهي تشوفله بعدم اقتناع بعدين قالت؛مختار نحس فيك مادرتش جهدك..
رفع حاجبه وقال؛في شني؟
فاتن؛فطلب السماح..كان مفروض انت تمشي بروحك تمشي لبوك..
مختار:قتلك مشيتله ولزني قدام الناس..
فاتن:مشيتله بش تعرض عليه المساعده في فرق..
عقد حواجبه وقال:شن تبي تقولي؟
فاتن؛مختار لما تغلط في حد وتبيه يسامحك لازم تعترف بغلطك وتعتذر عنه اول شي بش يقتنع اللي قدامك  بندمك..وانت لااعترفت بغلطك ولااعتذرت..
هو بشي من الانفعال؛قتلك كلهم رافضين وجودي ماعطونيش الفرصه اصلا..
هي قالت:باهي هدي هدي..
هو تنفس بعصبيه بعدين مرر نظره حواليه وحاول يهدي نفسه..
فاتن بضيق:يقعدوا اهلك مختار..حتى لو خدوا منك موقف صدقني في قلوبهم يحبوك يتمنوا تكون بخير ديما حتى لو كنت بعيد..
هو هز راسه وقال؛عارف..واني مهما داروا فيا حنقعد حواليهم..لأني عارف انهم حيحتاجوني..حتما حيحتاجوني واني مش حنتخلى عنهم زي ماهما داروا..
فاتن وهي تشوف بتركيز في عيون مختار حست بشي مش مريح..هزت راسها وهي تساير فيه وتقول؛هدا الصح..
وقلبها مقبوض...
🍃🍃🍃🍃🍃
"الله يبارك الله يبارك"
غرفه بإبتسامه فرح؛تسلمي عميمه..
فردوس وهي مبتسمه:ماشفتيش جنسهم؟
غرفه؛لالا مازال بكري ع السابع ان شاء الله نشوف بش ناخد الاكيده..
مطيره؛اهم شي يجوا صحيحين وطيبين وماتخمميش فيهم بنربوهم معاك.
ضحكوا...
غرفه بضحكه؛اكيد...بعدين مررت نظرها عليهم وقالت؛آلاء في الجامعه؟
اريج؛لا في الدار راقده تو نوضهالك..
وناضت بتطلع..
الاء؛نوضيها هالخميره نوضيها..
وفردوس تعكرت ابتسامتها وهي تفكر في بنتها اللي ماذاقت طعم النوم للهالحظه..
🍃واريج مشتلها الدار..
خشت لقتها مقعمزه ع سريرها..وتشوف للروشن وحاطه السماعات في ودانها..
ودموعها دارو مجرى ع خدودها..
جتها وقفت عليها حطت يدها ع كتفها..
استاقظت وشبحتلها..
اشرتلها نحول السماعات..
حولتهم وقالت؛شن تبي؟
اريج؛خالتي غرفه جايه بخبر حلو هلبه تبي تقولهولك اطلعيلها..
الاء؛خبر شنو؟
اريج ابتسمت وقالت؛طلعت حامل بتوأم..
وسط ملامحها الحزينه ارتسمت ابتسامه خفيفه وقالت؛الله!
اريج؛نوضي اغسلي وجهك واطلعيلها واسمعي منها بروحك..
نزلت عيونها وهزت راسها بالموافقه..
اريج تنهدت بضيق ومشت طلعت من حداها للكوجينه..
خشتلها..
خدت سفرة تقديم حطتها ع الطاوله..
وحطت كيسان عصير..
بعدين مشت فتحت الدولاب بش بطلع باكو عصير..
مالقتش..
سكراته..ومشت فتحت الثلاجه..
وجعها قلبها  وهي تشوفلها..
تلاجه حوش جدها اللي كانت ديما معبيه خير..
توا مافيهاش الا حاجات بسيطه..
شافت للباب لقت زوز باكوات عصير..
طلعتهم..وسكرتها..
اريج؛خل ندفيه شويه..
وصبت منهم في صواني فخار غارقات حجمهم مناسب للمكرويف..
دفتهم فيه شويه..
بعدين طلعتهم  وصبتهم في مالقي..
وخداته وصبت في الكيسان..وخدت السفره وطلعت..
فاتت من قدامها آلاء ماشيه للصاله..
هي تنهدت بضيق..
ومشت خشت  وراها بالعصير...
غرفه؛للوشه سمعتي؟
الاء وهي راسمه ع وجهها ابتسامه مصطنعه؛ايه ياقلبي مبروك تحلي عويناتك ع خير يارب..
وطبست عليها سلمت عليها بالخد..
وجنبهم اريج ضيف نبيله..
نبيله بإبتسامه؛في فرحك..
اريج بإبتسامه؛بعد مانشربوا عصير عرسك..
مطيره:ايه عاد خلاص شهر تلاته يجري..
ضحكت نبيله بخجل..
وكلهم يشوفولها بإبتسامه..
🍃🍃🍃🍃🍃
"ماما ياعمري لامتى بتقعدي هكي؟"
فايزة بحزن؛خليني ياماما بالله عليك..
صفاء بقلق؛اني خايفه تصيرلك حاجه لاقدر الله..
فايزة؛لاياروحي ماتخافيش..بس اني مش قادره ياماما..حاسه روحي انطفيت..بين عيوني عويشه وين مانمشي وشن ماندير والله لعند توا مش مستوعبه..وقلبي مقبوض ع سدرة وخايفه هلبه..
صفاء بدموع؛اني حاسه ان خالتي سدره حتفيق وتولي ديما نحس فيها مسافره وبتروح في الاخير..
فايزة ودموعها ينزلوا؛عويشه سافرت وروحت في تابوت..
صفاء مسحت دموعها وقالت؛كل حد وعمره ياماما حني ندعوا ربي يرحمها..ويرد خالتي سدره ومايفجعنا فيها..
فايزة من قلبها؛يارب..
صفاء شدت يد امها وقالت؛ماما اني ومروة وتاله خايفات عليك هلبه مش متعودات بيك هكي نعرفوك ديما قويه وصابره ياماما حني ناخدوا في قوتنا منك بعد ربي ماتخوفيناش عليك..
شدت فايزة ع يدها وقالت؛لازم تخلوني نعيش حزني ع عويشه..اني مانقدرش نكمد الحزن ياماما كان كمدته يقتلني..
صفاء:بعيد السو عليك..
مسحت فايزة دموعها وقالت؛انتم بس الهوا في قرايتكم كان تبوا تفرحوني وجيبولي نتايج ترفع راسي زي عادتكم..
صفاء بإبتسامه؛بإذن الله ياماما ونخلوهم يعرفوا شن ربت فايزة..
ابتسمت فايزة وقالت؛ربي يفرحني بيكم يارب..
صفاء:آمين..ناضت وقفت وهي تقول؛خل نمشي نزل الفرشات من فوق..
فايزة؛استري روحك وغطي راسك..
صفاء؛حاضر...
ومشت طلعت من حداها..وخلتها مبتسمه براحه..
🍃🍃🍃🍃🍃
"شروفه"
اشرف وهو في المربوعه يتفرج قناة رياضيه رد بصوت عالي:نعم...
جاته امه وقال؛بالله وليدي اركب نزل المركاب من فوق بندير سفنز نرفعه لحوش عمك شنيبه..
اشرف؛فوق يام فوق..سيبتوا المخزن اللي حداكم ورفعتوه فوق!!!؟
نجمه؛مانستعملوش فيه ديما بياخد مكان ع الفاضي في المخزن اللي لوطا وفي حاجات اولى منه..
ناض وهو معصب قال؛استغفر الله العظيم وخلاص..
ومشي طلع من حداها..
وهي مشت وراه وهي دير في حركات بوجهها ردا ع عصبيته..
وصلت معاه برا وقالت؛بالشويه عليك راك تجي متكردس انت وياه..
ماباش يرد عليها وركب فوق..
🍃وصل فوق ومشي لدار الخزين..
فتحها لقي المركاب قدامه..
خداه ورفعه..ومشي طلع من الدار..
وهو ماشي بيه بينزل لمح سطوح حوش سدره..
شاف صفاء تحول من في الفراشات الصغار اللي كانوا منشورات ع السياج..
طارتله..وركبت فيه نار الغيره..
🍃وهي بعد ماحولتهم..بنظره عابره شافت لسطوحهم..
جو عيونها عليه..
تفاجئت...
هو اشرلها براسه تنزل..
هي رفعت حواجبها تعجبا..بعدين طنشاته ومشت للجهه التانيه من السطوح..
هو عض ع شاربه بغضب..
ونزل المركاب لوطا وقعد واقف يراجي فيها تنزل..
قعدت ترتبت في الكراسي اللي كانت شاده بيهم الفرشات في تركينه..
وبعد ماكملت ولت خدت الفرشات ومشت بتنزل بيهم من غير ماتشوفله..
هو خدي المركاب وقال؛تمام..تمام..
ومشي نزل بيه لوطا...
وخش بيه للحوش..
وطول حطه في الكوجينه وهو يقول بصوت عالي..
نزلته...يام..
ومشي بطريقه لداره بسرعه...
🍃وهي بعد مانزلت..
فرشت الفرشات في اماكنهم...
وين وصلت في دارها وفرشت الفرشه متاعها في العتبه..
سمعت تليفونها يرن..
خشت للدار ومشت خداته ع الكامدينو من جنب صورة بوها..
لقاته رقم غريب..
فصلت عليه وحطاته في مكانه وجت بتطلع..
عاود اتصل مرة تانيه..
شبحتله...بعدين خداته..
فتحت الخط..وحطت التليفون ع وذنها من غير ماتتكلم..
"ردي بالك تسكري ردي بالك "
هي قالت:معليشي من معاي؟
"عارفه من معاك بلاجو استعباط"
صفاء؛شن تقول انت!؟
"صفاء ماطلعيش جنوني..يابنت الناس اني مش عيل راهو لما نفكر في بنت واني في عمري هدا معناها ناويها بالحلال"
صفاء:واللي ينوى الحلال يدير اللي انت دير فيه..
"شن هو اللي درته..اني مادرت شي غلط اني كنت نبي نعرفك ونعرف انتي شنو وعرفت واني والله نبيك من جدي اقسم بالله"
صفاء:فرق العمر بينا كبير 15 سنه راهو ركز..
"وكان شن المشكله!!..انتي مش صغيره راهو 18 سنه عمرك ولا؟"
صفاء:لا 17
"كله زي بعضه..اصلا اني نبي نخطبك بعد تطلعي من التانوي"
صفاء:اها وتقعمزني في الحوش وتخليني خدامه لالا اني مش هكي..
ضحك وقال..
"ياودي من قالك هكي..من قالك ان تفكيري متخلف ومتحجر بالعكس نشجعك ونوقف معاك لين تكملي قرايتك"
صفاء:ايه تبيني نخش معهد بش نكمل بسرعه ونقعمز في الحوش..
قعد يضحك..
وهي تسمع فيه وشاده ابتسامتها..
"جو عليك اقسم بالله..باهي قوليلي انتي شن طموحك"
هي قالت؛نولي استاذه محاضره في الجامعه..
"مليح بكل واني معاك"
صفاء؛ماندورش فيك معاي ولاضدي
"يابنت انتي راهو مافي حد كلمني هكي قبل ومشيتله"
صفاء؛معناها بعدين كان اعترضت ولاقلت لا ع حاجه مش عاجبتني تسكتني بكف..
هو قعد يضحك..
صفاء:مافيش بينا تكافؤ بكل معاش تحاول معاي..
"غير اهدي خيرك..بالعكس اني والله مش زي ماانتي شايفتيني بكل صدقيني حتلقيني بوك وخوك وكل شي في حياتك"
سكتت وشافت لصورة بوها وعيونها دمعوا..
"الو..صفاء"
هي قالت:علاش مافكرتش في بنات جيلك علاش تبي وحده صغيره وبعيده عليك في العمر..
"والله بدون قصد ومافي بالي مسألة العمر..لكن انتي خشيتي عقلي وخاطري ونبيك ياصفاء"
صفاء:اني نعرف اللي قصده شريف يجي من الباب..لكن انت جيت بطريقه غلط تحساب كان ماعندناش راجل نديروا مانبوا..
"عيب عليك شن الدوة اللي تقولي فيها هادي!؟"
صفاء؛قلت الحق..نعرفك حزار وبنت خوك ماتخليش فيها تختلط بولاد العيله ولاتبات في حوش جدها لان عندهم ولاد..اللي ماترضاشي لبنت خوك ترضاه لغيرها عادي..
قعد ساكت..
وهي قالت:معليشي طلبك مش عندي شوف غيري..
"اصبري استني..راك تكلمي في راجل ولد ناس ومتربي ونعرف حدود الله..اني ياصفاء نبي منك وعد تكوني ليا اني بس لين تطلعي من التانوي ورب العزة بعد ماتطلع نتيجة الشهاده نبعت ماليا طول ياصفاء"
سكتت..
وهو قال..
"اقسم بالله لو ريحتي قلبي توا وقلتي باهي معاد تشوفي رقمي ع تليفونك لين ندير حاجه رسميه"
هي قعدت تشوف لصورة بوها..
نزلت دمعتها وقالت؛نبي نصدق كلامك..
"والله ياصفاء صادق..صفاء راني راجل كبير مش عيل"
تنهدت وقالت؛باهي عطيتك وعد وان شاء الله ماتخلفاش..
"تمام..السلام عليكم"
وسكر..
هي حولت التليفون وشبحتله وقعدت تضحك من وسط دموعها..
شويه جتها رساله..
فتحتها وقرتها..
(مرة تانيه اركبي فوق في الليل في النهار معاش تركبي بكل)
ضحكت وقالت؛مجنون..
بعدين تنهدت ورجعت شافت لصورة بوها وابتسمت بحزن..
🍃🍃🍃🍃🍃
الساعه3:00بعد الظهر..
روح الجالي للفيلا..
من اول ماخش..وهو حاس براحه..
ريحة الحوش معطرات..وباين نظيف وكأنه يلمع..
وين قرب من الكوجينه..
شافها واقفه ع الرخامه دير في حاجه بعجينه..
خش عليها وقال؛السلام عليكم..
هي شبحتله وابتسمت؛وعليكم السلام..
حط شنطته ومشي قعمز ع الكرسي وقال:شن ديري؟
هي قالت؛دونات جي خاطري فيها..
ومشت تمصمص في ايديها وهي تقول؛ترفعني لحوش ماليك بعدين..
هو قال؛لالا نبي نرتاح ساد الايام اللي فاتوا مشوا تعب في تعب وحرق دم وقلة نوم..
هي قالت؛باهي..
وولعت الكوشه ع غداه..
الجالي:ضروريه المشيه؟
طوبى اتكت ع الرخامه بظهرها وقالت؛والله شن بنقولك الناس قاعده تجي وتعزي بس مادام انت تاعب ارتاح اليوم وغدوة نمشي بعد مانروح من المدرسه..
هو هز راسه وقعد ساكت..
وهي مشت طلعت الغدي وحطاته في السفره..
وحطتها قدامه..
الجالي؛مقلوبه..
طوبى بإبتسامه؛جي خاطري فيها درتها..
هو مرر نظره ع جسمها وقال؛ملاحظك زايده هلبه..
هي وجهها انخطف لونه وبلعت ريقها..
الجالي؛جسمك قبل قنين نبيك ترجعي زي قبل لانك كان بتقعدي هكي تفسدي ومازال قدامك حمل وجياب..
وبدي ياكل..
وهي تشوفله...
مش عارفه تضايق منه..ولامن روحها...
تضايق منه لأنه مش مركز فيها الا ع حاجات في نظرها تافهه جدا...
وتضايق من روحها لأنها لعند توا قاعده مدرقه عليه حاجه مهمه لو زادت درقتها عليه اكثر من هكي وكشفها بروحه مش حيصير خير..
التفتت للدونات ورجعت تكمل فيهم وهي تفكر..
وهو قال؛ايه حقه..جارنا اللي قدامنا اللي سكن جديد قال مداير عشي ع خشتهم الحوش وعزمونا تمشي؟
طوبى:ايه حقه اليوم مرته جت وعزمتني نسيت نقولك..
هو قال؛شن قلتيلها؟
طوبى:نسألك قبل..
الجالي:كان تبي تمشي باهي..لكن قبلها لازم تطلعي ناخدي لبسه تجي عليك..
التفتت وشبحتله وقالت؛مش لهالدرجه ماتبالغش!..
هو قال:ماتزعليش طوبى اني نبي نكون معاك صريح ع خاطرك انتي بالدرجه الاولى..وبعدين انتي حرة شن ماعجبك في روحك ديري..
ورجع ياكل عادي..
وهي تشوفله بضيق بعدين التفتت تكمل شغلها ع الدونات وهي مضايقه ع الاخر..
🍃وفي حوش ماليها اللي كانوا ملمومين.
تغدوا مع بعضهم وجبة جايبها عبد الرؤوف "زردة"الخبر اللي فرحه.
وجاب حتى حلويات شربوا الشاهي والقهوة بعد الغدي..
عاشوا اجواء حلوة بمعية هالخبر الحلو بالذات لطفي اللي كان مبتسم من قلبه لأول مرة بعد اللي صار لسدرة..
🍃كلموا طوبى وبلغوها وفرحت هلبه بالخبر..واعتذرت لما طلبوا منها تجي بحجة ان الجالي تاعب ومايبيش يطلع من الحوش..
🍃واتصلت بيها عزوزتها لامت عليها وهي بررت غيابها بنفس الحجه بش سكتت مغليه اللي همها الاول والاخير راحة ولادها..
🍃🍃🍃🍃
ويعدي هاليوم..
وتعبه ايام...
فيهم طوبى دارت احتفالية يوم المعلم في المدرسه برغم كل الضغوط اللي عاشت فيها..
وكرمت فيها بعض الاسماء من ابلات واساتذه مثاليين.. واسماء تانيه صحابها توقعوا رواحهم يتكرموا بس حتى اسمائهم مانذكرتش..
وهني انحطت هلبه اشارات استفهام عندهم وعند نائبة المديرة تحديدا...نجوى...
🍃ولأن كلام الجالي وجعها خدت قفطان مناسبه من اختها غرفه مشت حضرت بيه اللمه اللي ماقالت عليها لحد من اهل راجلها..
تعرفت ع الجارات وارتاحت لصاحبة الحوش وبنتها وحتى هما حبوها وكانت نهاية هالزيارة انهم خدوا ارقام بعض بش يقعدوا ع تواصل..
🍃من جهة تانيه..
تحدد موعد مقابله شرعيه لنجاح وعبد الحفيظ بش يحطوا فيها النقاط ع الحروف..
🌸عبد الحفيظ؛عارفه كويس اني مانبيكش ع خاطر ولدي وبس..
نجاح؛عارفه..بس الولد لازم يتعود عليا مانبيشي يحس انه خديته منك..
هو قال:راهو قاعد صغير هلبه مازال مايعرفش..
نجاح؛ولو...نبيه يقعد معانا من البدايه بش ناخد عليه حتى اني ياعبد الحفيظ..
ابتسم وقال؛حاضر..
نجاح:وحاجه اخيره..
هو قال؛اللي هي..
نجاح؛اني حنكون لولدك في مكان امه والام تنت وتحن يعني مانبيكش تتحسس مني لو هزبته او عصبت في حال دار شي غلط..اني نخاف ربي ياعبد الحفيظ وحنراعيه فيه صدقني..
هو بإبتسامه؛عارفك كويس يانجاح وعندي احساس انك حتكونيله خير من امه..
نجاح:إن شاء الله يارب..
وهو بإبتسامه قال؛يعني ع بركة الله..
هي ابتسمت بخجل ونزلت عيونها..
وهو قال؛ربي يتمم ع خير ان شاء الله..
نجاح بآبتسامة خجل:ان شاء الله..
🍃وبعد هكي تمت خطبة نجاح رسميا ويارب فرحة زي فرحة نجمه اللي ماعرفتش وين تحطها..
بس عواطف كانت مشاعرها متضاربه..
فرحانه..ومضايقه...بس تحاول ع قد ماتقدر تبان فرحانه بس ولاتبان في عيون اللي حواليها حاسده اختها ومتحسسه منها..
🍃ومن الفرح للحزن..
اللي اكيد قاعدين عايشين فيه المهدي وصغاره..
سكرت عائشه اسبوع متوفيه..
وهما ساعه يتقبلوا ويرضوا..
وساعة يكونوا مش مستوعبين ومش راضيين يصدقوا..
وبوهم يحاول يخفف عنهم ع قدر مايقدر..
اما نسرين اخته فكانت محاوطه سدرة بالاهتمام البالغ حتى انها بدت ترقد فيها معاها..وسدرة تبي اي حد يملي الفراغ اللي خلاته امها هربا من الشعور الرهيب بالفقدان اللي قاعده تحس بيه..شعور كبير هلبه ع بنيه في عمرها..
بس حتى هو كبير هلبه ع طفل رضيع يرفضوه والديه ومايقبلوشي..
ولد نسرين..يحي..ع اسم جده والد بوه...
اللي طلع من العياده وخداته خديجه معاها لحوشها..
وكانت فرحانه بيه..ومحي راجلها فرحان أكثر منها لادور من يكون بوه ولاشن ظروفه..لما شافه نسي الدنيا ومافيها.
وراما كانت فرحانه بيه اكثر منهم هما الزوز...
🍃والرفض..
يقعد احد اسوأ المشاعر اللي توصل للآنسان من الناس اللي يجبها..
زي نجاه اللي حست ان الجالي بدي يرفض في وجودها فحياته وان طلاقها منه مسألة وقت اكثر..
وبدت تخطط للإنتقام منه..بس بطريقتها هي...
🍃بس آلاء لما خططت للانتقام ونفداته..
كان من الناس اللي تسببتلها في الفراق عن حب حياتها اللي ولى رافض رفض قطعي وجوده في حياته..
وقداش تعذبت الاء الايام اللي فاتوا..
بس مش زي عذاب اختها اريج...
عذابها كان..عذاب ضمير...
🍃يوم الخميس
15مارس...سنة2018..
جامعة طرابلس قاطع_ب
كلية الاقتصاد..
نضال؛قاعد نجري ع موضوع علاج حمزة مافيشي غير فاضي للحاجه هادي..فجأه الجالي جبد يده وقال مشغول وعندي سفريات شغل مانقدرش نجري بيه والمهدي مسكين ربي يكون في عونه..
اريج؛معليشي حبيبي كله بأجره..
تنهد وقال؛الحمد لله ع كل حال.
شدت يده وقالت:شدة وتزول..
شبحلها وابتسم وهو ساكت..
هي بإبتسامه قالت:مايطلعش ع وجهك الا الضحكه بس.
هو قال؛قصدك واني هكي شين!؟
هي قالت:انت اصلا شين حبيبي غير عيوني من الحب يشوفوا فيك حلو..
هو قال؛عاجبك جمالك مالا! راك طوبو مافيك ماينشبح غير اني شورني مسحور ولاانتي اشبح شن درتيلي من مصيبه..
اريج:يقولوا طنجرة ولقت مغطاها..
قعد يضحك وهو يقول؛يخرب بيت جوك ياشمطاء..
اريج:نجك ليا نجك انت وضحك السمحه هذي..
وهو نزل راسه من الضحك..
وهي تشوفله بإبتسامه..
فجأة جتها رساله ع تليفونها..
هي قاماته وفتحتها..
وهو هدا ضحك وقعد يشوفلها وقال؛مني؟.
هي قالت؛بنيه صاحبتي قالتلي المحاضرة بتبدا..
هو طلق يدها وقال؛تمام بري..بس قبلها قوليلي امتى تطلعي..
هي ناضت وقالت:بعد ساعتين..
ناض وقال؛خل مالا اني نمشي نروح ماعندي ماندير هني ماتبي شي..
هي قالت:لاسلامتك..بس بنسألك ع موضوع الخدمه شن صار فيه؟
هو قال؛والله في بالي بس شفتي انتي الظروف اللي صارت..بس حاضر تو نبدا ندور الايام الجايه بإذن الله..
هي ابتسمت بالغصب وقال؛تمام..هي سلام توا..
هو قال؛سلام..
ومشت من حداه..وهو قعد معاها بعيونه لين درقت..
بعدين لف ومشي لسيارته..
وصل فيها..وركبها...شغلها..وطلع برا الجامعه..
بعد عشرة دقايق بالزبط..
مشت اريج تجري لسيارتها..
وطلعت بيها من الكليه بطريقها لأحد المعاهد..
وين قربت توصل فيه..
دارت اتصال..
اريج؛وصلت...
"تمام هاني طالعه"..
وسكرت ودرست قدام المعهد..
طلعت بنت من المعهد وركبت معاها..
:شن جوك اليوم..
اريج بإبتسامه؛تمام..
وطلعت بالبنت...ومشت بيها مسافه باهيه لين وصلتها لحوشها..
البنت قبل لتنزل؛وهادم فلوس اسبوع كامل..
خدتهم اريج وعدتهم..كانوا 70دينار..قالت للبنت؛تمام..موفقه..
:اجمعين...سلام..
ونزلت البنت...واريج تحركت طول لمنطقه قريبه من سكن البنت هادي..
درست قدام عماره..
وطلعت وحده مختمره...
ركبت معاها وقالت؛كيف حالك اروجه..
اريج؛تمام ابله عاليه كيف حالك انتي..
هي قالت؛الحمد لله..
ومشت بيها اريج لمدرسه من المدارس السلفيه..
درست بيها اريج قدامها..
الابله؛خودي اريج هادوا فلوس شهر كامل مقدما زي ماطلبتي..
خدتهم منها اريج وقالت؛بارك الله فيك..
:اني عطيتهولك توا لأني حاطه فيك الثقه..
اريج؛ماتخافيش ابله عاليه مهما كانت ظروفي حتلقيني قدام العمارة في نفس الموعد..
:فتح الله عليك وهداك..ورزقك زوجا صالحا يدس هالجمال..
ضحكت اريج وماردتش عليها..
هي قالت؛السلام عليكم..
اريج؛وعليكم السلام..
ونزلت الابله..
واريج كملت طريقها وهي تفكر في نضال اللي واثق فيها ومأمن فيها وهي قاعده تخدم بدون علمه..
بس الظروف احيانا تجبر الانسان يرتكب اخطاء كبيرة..
بالذات لو كانت عنده عزة نفس عاليه تخليه يرفض يمد يده للغير مهما كان محتاج..
🍃قبل لتروح خدت بجزء من الفلوس قضيه للحوش والباقي ناويه دسهم ع تركينه للحاجه الماسة الضروريه...
🍃🍃🍃🍃🍃
الساعه 5:15عصرا...
في كوجينه حوش الواعر..
مطيره تشوف في الثلاجه للبضاعه اللي جايبتها اريج:جدها جاب قضيه الحوش كلها هي علاش تصرف في الفلوس الفاضي..
فردوس:زياده الخير خيرين.
سكرت مطيره الثلاجه وقالت؛شن حال معتز؟
فردوس بضيق؛كلمت عمته بكري قالت جوه مليح فرحان اللي ولى قريب من صحابه..هالولد قلبه حجر مافيشي حن بكل..وعيونها دمعوا..
مطيره؛مازال قاعد صغير..
فردوس:لالا ياعمتي هو هكي..سبحانك ياربي يقولوا ثلتين الولد لخاله ماكذبوش..
مطيره؛غيري هالسيرة العكرة بالله عليك..
ع جية اريج تجري وقفت في الباب وقالت..
في وحده جت توا..
هما الزوز شبحولها بآستغراب..
مطيره؛من هي الوحده هادي؟
اريج وهي متفاجئه..
"قالت طليقة خالي مختار"

#رسائل_انتقام

#طوبى