على قمة الحكيم

البارت التاسع والاربعون

_دقايق ودخلت عمتي بدت تساعدني وتعلمني شلون ارضعة بديت اسيطر علية .. كملت واخذتة الممرضة بستة ورجعتة طلعت واني ابجي ما ادري شبية بس مخنوكة .. شفت فاروق وكمال ومؤيد وامة والباقين ولد ما اعرفهم

فاروق : الحمدلله على سلامتج ام علي

نرمان : الله يسلمك

كمال : يتربى بعزكم

نرمان : تسلم

مؤيد : الحمدلله على سلامتج خوية يتربى بعزكم

نرمان : شكرا الله يخليك .. عبرتهم وطبيت للغرفة اجت ام مؤيد تحمدتلي بالسلامة وكعدت ادك سوالف ويا عمتي

ام مؤيد : سمعي خالة اني مثل امج واحنى امهات كبل نعرف بهاي السوالف اول ما اطلعين من المستشفى وترجعين بخير وسلامة .. اطكيلج بيضاية وتكعدين عليها

نرمان : من كالت هيج عفست وجهي لعبت روحي .. ليش عود

ام مؤيد : البيضاية اطب بالرحم تنضفة وتسلمج من شر

نرمان : لا خالي عوفي الوصخ و الشر اني اريدة

ام مؤيد : لج خالة سمعي كلامي عوفي التنعوص

نرمان : ميخالف خالة بس ارجع اسويها .. حجيت هيج اريدها تسكت .. كل عقلها اكعد على بيضة

اصيلة : اني بناتي معلمتهن بس يجيبن يطكن البيض ويكعدن علية

نرمان : كشت روحي .. حطيت راسي على السدية جسمي تعبان ويرجف .. شوية وطب حكيم بيدة اكل سفري .. سلم عليهم وكعد كبالي فتح الاكل جايب شوربة عدس ومعلاك ومقبلات

حكيم : اشربي الشوربة وراها اكلي

نرمان : حكيم نفسي مسدودة اريد اخذ ابني وارجع تعبانة .. شال الشوربة بيدة وبدة يوكلني غصب عني

حكيم : اكلي واخلي ابنج يرجع وياج للبيت

نرمان : بهت وجهي .. كول والله

حكيم : وعيونج

نرمان : ما جادلتة كمت اكل سريع اريد الاكل يخلص

حكيم : راح تغصين والله اطلعة وياج بس اهدي

نرمان : شبعت يلة اروح

حكيم : ام كمال بلا امر عليج لمي غراض نرمان نرجع للبيت

اصيلة : ماعندي شي لميتهن

نرمان : كمت من السرير لبست عباية اسلامية لفيت حجابي شلون ما جان وكفت انتضر حكيم شوية واجة كال ..

حكيم : اجرت حضانة مال طفل اخذة بيها للبيت وبس يتعافة بأذن الله ارجعها

نرمان : صدك حكيم

حكيم : والله حتى بطل اوكسجين راح اخذ وبين يوم ويوم اجيبلة ممرضة تشوفة

نرمان : الدنيا ما لمتني من الفرح دمعت عيوني ودي احضنة كدام العالم كلها وافتخر اني عندي رجال مثلة سند وامان وضهر ويعادل عائلة باكملها