المخلص "باللهجة العراقية "

البارت الخامس والثلاثون

-هذا سندي هذا الي افتخر لو مشيت واني رافعه راسي بفخر بوجودهم حضنته ودموعي تصب بشنو اجازي تعبهم وحبهم الي كرار الي من اتوفى بابا احمد جنت طفله وهو الي تكفلني وصار الي اب لو علي الي لو صحت اخ اشوفه كبالي الي يشتري بالمصروف مالته
اكل ويجي للصف مالتي ينطيني وكدامه لازم اكلهن
وهو يضل جوعان الي جنت امشي واني متباهيه عندي
سند واخو ما يخلي واحد ياذيني بكلمه دومهم رافعين
راسي واشكر الله على وجودهم..

-مرت علينا ضروف بس الله الي يعلم بيها وعدت وهم نفس حبهم الي بالحلوة والمرة هم وياي محد جان يتقرب مني محد يسمعني كلمه لان يعرفون بظهري مسنود من اعظم اخوه لو حجيت منا للصبح ما اوفي حقهم..

-مواقفهم الي تشهد واخرها جيه علي الي ما انطاه كلبه
يشوفني ابجي عليهم بعز الخطر الي عليهم اجه بنفسه
يتطمن عليه ويطمني عليهم..

-كمت غسلت وجهي واخذت بطل مي ورجعت يمه
جان صافن ناحيه الستاره مال بيتنا ويتنهد كعدت يمه.. شصار على السالفه؟!..

-زفر واستغفر.. بس ربج يحلها جبناء وغدارين والطمع كاتلهم ومنا خالي معند الا ينطيهم الفصل..

-خلي ينطيهم احسن من ما يصير عليكم شيء تفيدنا
الفلوس احنا لو غدروا بواحد منكم..

-وليش شنو وليه هي ليش ننطيهم هيج مبلغ يكسر الظهر على ذنب مو ذنبنا والله احرك ابهاتهم وما يشوفون فلس احمر بس اني شاك بشيء بس كون يطلع الي بالي صح ساعتها والله اذلهم واجرجرهم هم وعكلهم الباطلة واسحل بيهم الكاع..

-عزا بعيني شناوي علي والله اخابر خالي واخلي يتصرف وياك شنو انت ما تريد روحك..

-كل خير ناوي وحك ابو فاضل ولو طلع الي بالي صح
يا يابه شلون ساعتها راح يبرد كلبي هم بيهم وهم بكل
واحد مخلي على راسه عكال من تالي وكت ويدورلي
فصول وهجمان بيوت..

-وشنو هذا الي بالك علي اذا متفكر بروحك فكر بينا
فكر بنورا البنيه مكسورة لا تفجعها فدوه اروحلك..

-لا تخافين ما اسوي شيء هسه شكو تلطمين الدايح
وين شو اتاخر..

-على جيه حجيتها وسكتت افكر بكلامه وشنو الي ممكن يدور بباله يارب احفظ اخوتي بعينك التي لا تنام
يارب ما عندي غيرهم اهل وعزوه..

-انفتح الباب ودخل جعفر الي ضل صافن ما مصدك
وكامله علي سلم علي وتحاضنوا.. ولك سربوت الفرع
اظلم بلياك والله لو بس اكدر اسوق جان اجيتكم..

-اي خوش جذب مسفط هو نايم بالعسل ويكول ما
اكدر اسوق..

-تصحيح للمعلومة نايم بحضن اختك هو حجاها وعلي
دفره طايح الحظ مو اخذها وياي وانت ضل بهاي
سوالفك التعبانه..