جابر: وحتى لو عرف وحتى لو ردينا السعوديه بأي وجهه بروح اخطبها من جديد وبأي عذر واذا سويتها بأي حق بتوافق اماني
جلست ليلى بضيق : فرج الله قريب لا تحاتي
جابر : قومي قومي اجهزي بوديچ البيت ابوي يقول تجين تجلسين هاليومين عندهم
طارت ليلى من الفرح وهذا يعتبر ان ابوها بدا يسامحها وفزت وركضت وهي تجمع اغراضها بفرح وهي طايره من الفرح كانت هالشهور صعبه عليها حيل صعبه
_______________________.
وفي بيت الجد قايد
الكل ينتظر عقاب وبما فيهم خلف اللي انصدم اول ماقالوا له وهو يدري ان عقاب يبي هالطفل
جلس بهدوء ينتظر ودق التليفون وفز عزوز يرد : عقاب
اخذ عقاب نفس وقال: وجد سقطت بلغ اللي عندك وقلهم اني ماني جاي الليله بجلس معها بالمستشفى
وسكر كلمتين ولا قال غيرها
والتفت عزوز بهدوء وهو ضايق : سقطت وجد
ام ناصر: ياعوينتي يا عقاب راحت فرحته
ابو ناصر لله يعوضه الله يعوضه
ابو خلف : ماعليه العمر قدامه وبيعوضه الله
خلف : ماقالك وينه!؟ عزوز: يقول ماهو جاي
خلف : بأي مستشفى !؟ عزوز: المستشفى المعتاد
خلف : انا بروح له
مضاوي : اروح معك
خلف : ايه عشان تجلسين مع زوجته
مضاوي : يلا يلا
ام ناصر: بتروحين ماقلتي لزوجك
سكتت مضاوي اول ماتذكرت ضاري اللي ماتدري للحين زعلان او راضي: ماهو قايل شي
ركضت تلبس ووقفتها سحر: خليني اروح معكم احس عقاب منهار الحين
مضاوي: نروح الثنتين وش نسوي ما احد يخلينا ثنتين انا بروح وانتي مايصير تروحين مع خلف لحالك لكن ماعليك لا تخافين بحطهم بعيوني
سحر: زين
راحت مضاوي وهي اكثر شخص قريب من عيال نايف واولهم عقاب
اتجههوا للمستشفى وهم ساكتين محد يعلق ابد
_______________________.
وفي بيت ام ضاري
نامت ام ضاري بعد ما شبعت ضاري بالمحاضرات اللي فيها كلها توضح انه غلطان وهي ماتدري عن شي ابد وكرهته في نفسه وفي مضاوي بعد وتركته ياكل بنفسه من القهر
لكن كان مصر على قراره وان مضاوي انتهت بحياته خلااااااص لكن الهم الاكبر كيف يشرح لأمه هالشي
وقف واتجهه لغرفته اللي كانت خاليييه وهاديه بدون مضاوي رمى اغراضه وانسدح بكل قرته لكن فز بغضب وهو يرفع اللحاف وشاف تحته الراديو رماه بغضب : هاذي ماهي مخليتني بحالي ابد
غمض ونام وهو للحين زعلان منها
_______________________.
عند عقاب
بعد ما تطمن ان وجد نامت بعد ما بكت لين قالت امين نزل تحت وجلس عند باب المستشفى وهو مخنوق لكن التفت على صوت مضاوي: هذا هو عقاب
خلف : عقاب
وقف عقاب بهدوء: هلا ! وش جابكم
خلف: جبت مضاوي تبات عند زوجتك وبجلس معك انا
مضاوي : كيفها وجد
رفع عقاب يده بحيره : كيف بتكون !؟ اكيد تعبانه
مضاوي قربت وهي تمسح على ظهره : ماعليه يا حبيبي ماعليه بيعوضك الله والعمر قدامكم
عقاب هز راسه بهدوء وسكت وقالت مضاوي: كم غرفتها !؟ عقاب: ٢١٠
مضاوي : يلا انا بروح عندها
راحت وتقدم خلف وهو يخبط على كتف عقاب : يلا يا عقاب الحمدلله على سلامة زوجتك وان شاء الله انها اخر اوجاعكم وان شاء الله ربي بيعوضك
تنهد عقاب بضيق وقال: ادري ياخلف ادري بكل شي بتقولونه وسمعت هالجمل مليون مره لكن هالمره ماهي مثل كل مره هالمره روحي تعلقت بهالولد ياخلف والله ان حتى الاسم سميته
ضاق صدر خلف وقرب يحضنه: ماني لايمك ولا اقدر اواسيك ابد بهالكلام لكن اعتبره ابتلاء من ربي وما وراه الا فرج ورزق ماتدري وش الخيره وصدقني لو خيرك ربي بقدرك بتختار اللي يختاره عزوجل ولا تضيق ولا تزعل الفرج قريب
عقاب : على الله ياخلف على الله
خلف : والنعم بالله المهم وسع صدرك وصل ركعتين وكل شي بيصير زين
اخذ نفس عقاب : بروح المسجد
خلف :بجي معك
دخلوا الاثنين مسجد المستشفى وكلهم في صدورهم دعاء كبيييير يحتاج سجده ويحتاج قلب خاشع
وفعلاً كانت ليلتهم خاليه من كل شي الا من دعاهم وتوسلهم لله
_______________________.
ومن بكره
في الكويت نزلت ليلى وهي مبسوطه واول ماشافت ابوها ركضت بخجل وهي تحضنه من زمااااان ماشافته من زمان ما حضنته انهارت تبكي بحضنه انهارت وهي تردد ببكى: اشتقت لك حييييل يبه اشتقت لك حييييل
حضنها ابو نهيان وهو بعد اشتاق لها ومسح على شعرها وهو يهمس : الله يسسامحچ يا بنيتي ليتچ ماسويتي هاللي سويتيه فينا
ناظرته ليلى بنظرات حزن وابعد وهو يقول : ام نهيان شيخه حطو الغداء اللي تحبه ليلى لها
شيخه : شعليچ دلع واوامر
ناظرته ليلى بحب : ما اطلع من جزاه والله
مريم: تعالي تعالي ساعدينا
راحت لهم ليلى وهي ماتدري اذا ابوها سامحها او باقي لكن المهم تشوفه وتكون معه
رغم ان اللي صار ما كبح حبها لخلف بالعكس صار زاد و وصل للهُيام
_______________________.
