حياتي ( قيد التعديل)

الحلقة العاشرة

مروة : صح يا جميل .. هات كأس والنبي يا مروان ..

مروان : خدي .. بس متكتريش أنتي لسة في الأول ..

مروة : يا عم هو حد واخد منها حاجة .. كله محصل بعضه في الآخر ههههههه .. متيجي نرقص ؟

مروان : أه طبعا يلا .

وراحوا مع بعض يرقصوا .. وعلي أغنية كاريوكي انفجرت مروة واتجننت ورقصت بهستيريا ولمياء ومروان مصدومين أما سهيلة و نيرة مش فارق معاهم .. خلص الرقص وراحت مروة تشرب تاني .. قعدت تشرب تشرب نفسها تخلص من كل همومها ومتحسش بيها لحد ما خلاص جابت آخرها .

مروان : طيب إيه ؟ هتباتي عندها برضه ؟

مروة : لا لا لا مفيش الكلام ده أنا هروح .

مروان : هتروحي كدة إزاي دول ممكن يأذوكي .

مروة بسخرية من نفسها : مش هياخدوا بالهم .. دول مأخدوش بالهم إني خلعت الحجاب .

مروان : بس شكلك كدة مزة علي الآخر .

مروة بحب : عارفة عارفة .. يلا نروح .

روَّح مروان لمياء الأول ووقف معاها عند باب الفيلا وساب مروة في العربية .

لمياء : أنت اتغيرت أوي يا مروان .

مروان بتوتر : لأ متخافيش أنا زي زمان .

_ حسَّاك هتروح مني .

= ليه بس .. ده أنا .. أنا بحبك وأنتي عارفة .

_ خايفة لتسيبني .. وبتلمس في وشه .. مقدرش أعيش من غيرك .. وبعد كدة شدت علي ياقة قميص بدلته .. عارف لو حبيت غيري هعمل فيك وفيها إيه ؟

مروان بلع ريقه بخوف لأنها كانت شبه الساحرة الشريرة في أفلام الكرتون .. بصلها بقلق ورد : هتعملي إيه ؟

وقفت علي طراطيف صوابعها في الجزمة الكعب وهمست في ودانه : هقتلكم أنتم الاتنين .

كانت بترمي كلام والحدق يفهم .. برق عنيه وبص في عنيها اللي تشبه عيون الفهد .. نزلت علي رجلها وحضنته وباست صدره وبعدت عنه : see you soon my love .. good night .

عدل قميصه وشوحلها بإيده : good night .. baby .. bye .

وراح علي العربية ودخلها بسرعة وقعد ينهج .. في إيه يا مروان مالك ؟ عامل كدة ليه ؟ وأنت من إمتي ضعبف .. لازم تفهم لمياء إن زيها زي غيرها .. متعة وتسلية وليلة في شقة وخلاص .. أنت ورطت نفسك يا مروان ودي أبوها مش ساهل .. هي متقدرش تعمل حاجة بس هو يقدر ..

اتنهد ولسة هيتحرك وفجأة حس بحاجة بتلمس كتفه .. اتفزع وبص وراه وبعد كدة اتنهد : الله يخربيتك قطعتيلي خلف .. ظهرتي من فين يبنت المجنونة أنتي لسة هنا ؟

مروة : أومال هروح فين ؟ مش هتروحني ؟

مروان : ok .. يلا .

واتحركوا ومشيوا في طريق بيتها .