حياتي ( قيد التعديل)

الحلقة السابعة

طلب حسام رقم علي التيليفون وخلال ثواني رد : ألو ؟

= ألو يا جمايكا .. عامل إيه ؟

_ ألاه ؟؟ دكتور حسام .. يا مرحب يا مرحب بالناس الزينة عامل إيه ؟

= الحمد لله .. معلش عايزك في خدمة .

_ ألاه .. ده أنت تؤمر وإحنا ننفذ علي طول يادكترة .

= متشكر .. كنت عايزك تراقبلي حد كدة .

_ مين ده اللي مضايقك .

= لأ هو مش مضايقني بس عايز أعرف كل مشاويره والأماكن اللي بيروحها وكدة .

_ الاسم والعنوان ؟

= هبعتهملك واتس .. ومتخافش الفلوس هتوصلك .

_ عيب يا دكترة من غير فلوس أنا جميلك فوق رقبتي ليوم الدين .

= لأ يا عم قول عايز كام واللي تقوله هتاخده بس بالله عليك بسرعة الموضوع مهم .

قفل حسام بعد ما اتفقوا ولقي في دوشة تحت البلكونة وناس متجمعين بس مش عارف ليه .

_ يا سيد .. يا سيد .. إيه الزيطة اللي ..

= إلحق يا دكتور .. د/عمر صاحبك وقع من طوله هنا .

أخد حسام دقيقة يستوعب اللي سمعه وبعد كدة أكل السلالم يلحق صاحبه..

بعد نص ساعة .. نيرة وسهيلة كانوا بيرقصوا ولمياء قاعدة جنب مروة بتسكر .

لمياء: بقلك منفسكيش تجربي .

مروة : لأ شكرا مش عاوزة .

_ براحتك .. إيه ده التليفون بيرن وأنا مش مركزة ههههههههههههه.

مسكت لمياء الفون وردت وقعدت تتكلم بس مروة مش سامعاها من الصوت .

لمياء : مروان وصل خدي يا مروة امسكي لحد ما أجيبه بدل مهو تايه كدة .

وأخدت منها مروة كأس الويسكي وبصت فيه .. التلج .. اللون .. ريحة الكحول المعتادة.. ياتري إيه اللي بيحبوه فيه وليه بيشربوه بشراهة .. طيب ما أجرب .. يمكن يطلع حلو ؟

وأخدت أول كأس خمرة .. بقها اتحرق وزورها كمان وقعدت تكح .. أخدت نفسها بعد كدة بصت علي القزازة وأخدت بق كمان وبعد كدة كحت تاني .

لمياء : وبس يا سيدي وبعد كدة .. إيه ده أنت شربتي .

مروة وشها محمر ولسة بتكح : إيه ده ده حراق قوي إنتو إزاي بتشربوه كدة ؟

مروان : مهو مبيتشربش كدة يا حبيبتي ..

مروة لنفسها : إيه ده هو قال يا حبيبتي !؟

مروان : يا بنتي رحتي فين ؟

مروة : ها ؟

مروان : إنتي لحقتي ! ده لسة أول كاس .. بصي بيتفزع مرة واحدة زي الدوا المر .. بصي كدة .