حياتي ( قيد التعديل)

الحلقة الرابعة

وهنا نفضت الفكرة من دماغها ومشيت من المدرج .

حسام قاعد في المكتب بتاعه وجاتله الممرضة.

_ خلصت نبطشيتك يا دكتور .. ومفيش حالات تانية .

_ امممم وانتي ؟

_ لأ أنا لسة فاضلي ساعتين .

_ خلاص أنا هلم نفسي بقي وأمشي .

_ أه صحيح في مزة برة عاوزاك .

_ مزة !؟ يابت اعدلي لسانك الله لا يسيئك .

_ منا مش عارفة يا دكتور .. اهم المزز دول اللي بيجيلهم اكتئاب ويتعالجوا عند حضرتك .

_ وانتي عشان مش مزة معندكيش مشاكل .

_ لأ يا دوك .. أنا مزة ونص .. بس مش زيهم عندي عقد وهاي وماي ..

_ بس يا مزة ونص انتي روحي الله يسترك كلتي دماغي .

_ طيب أعمل ايه مع المزة اللي برة .

_ برضو مزة ؟ مفيش فايدة .. المهم مقالتليكيش مين ؟

_ وهو أنا هسأل كل واحد انت جيت هنا قبل كدة ولا لا ؟

_ خلاص يا حجة صدعتيني .. دخليها يعني هقلها لأ .

ودخلت البنت اللي حسام استغرب وجودها .. لأنها ندي صاحبة مروة .

ندي وحسام بيحبوا بعض .. ومازالوا .. وكانوا مخطوبين بس حسام شرط عليها انهم لما يتجوزوا يجيب أخته مروة تعيش معاه وجوازه هيبقي مبرر أنهم في البيت يوافقوا ياخدها .. وهي كانت رافضة .. رغم انها بتحب صاحبتها بس كانت شايفة انه من حقها يبقي لها حياة وحدها هي وجوزها .. واتخانقوا وانفصلوا في النهاية لأن كل واحد كان مصمم علي موقفه .

نرجع للحظة دخول ندي .. قعدت ندي علي الكرسي بعد ما سلمت عليه .. كل واحد فيهم واحش التاني كتير بس كانت قعدة صمت .. الاتنين كانوا قاعدين ساكتين 5 دقايق محدش بينطق فيهم ..

حسام : احم احم .. تشربي ايه ؟

ندي : شكرا مش عاوزة .

_ لأ لازم تشربي حاجة _ ورفع سماعة التيليفون _ لو سمحتي يا نجوي هاتي واحد مانجة .

قفل وبعد كدة بصلها : مالك باصة ليا كدة ليه ؟

ندي بابتسامة جميلة : مفيش أصلك لسة فاكر ان المانجة عصيري المفضل .

حسام بتنهيدة : أنا مبنساش يا ندي خصوصا لو حاجة تخص حد يهمني .

_ إحنا اللي بينا انتهي يا حسام .. متحاولش ترجعه .

_ ولا بحاول أرجعه ولا نيلة المهم .. كنتي عاوزة إيه ؟

_ أه .. جيالك بخصوص مروة .

حسام اتخض خصوصا بعد الحلم الفظيع اللي شافه امبارح .. اتنفض من مكانه واتكلم بقلق : مالها يا ندي .. جرالها حاجة .. محتاجة حاجة .. قولي انطقي اتكلمي .