•23•
{ إن الحياة لا تُفرض عليك شيئاً ما ، ولكنها تضعك بقسوتها بين خيارين كلاهما نهايته موتك المُحتم }
#بقلمي
* في فيلا بدر الكابر
سيليا قاعدة على الكنبة وفاردة رجليها على مسند الكنبة بالكعب بتاعها ، عمالة تُنفخ اللبان وتفرقعة ببوقها بإستفزاز
سيا بعصبية : بكلمك أنا إنطقي !
سيليا بملل : مفيش يا مامي حابة أريح راسي من وجع الدماغ عندك إنتي وبابي يومين ، غلطت أنا كدا ؟
سيا بغضب : أيوة غلطتي ، إتخانقتي مع عزيز !
نزل بدر من فوق وهو بيقول بصوت عالي : أنا مش فاهم في إيه ! هي مينفعش تبات في بيت أبوها يومين لا إلا تبقى متخانقة مع الزفت دا ؟ وبعدين ياريت تبقى متخانقة معاه بجد
سيا إتأففت وهي بتقول : بدر من فضلك سيبني أتكلم معاها لإني فاهمة دماغ بنتك ، دي مبتقدرش تبعد عن عزيز دقيقة من كُتر حُبها فيه فجأة كدا عاوزة تبات معانا يومين ؟
قعد بدر وحط رجل على رجل وهو بياكل من الطبق اللي قُدامه وماسك الفون وبيقول بغضب : دا أنا هسود حياته ، البيه متصور وواحدة بتبوسه من بوقه
نفخت سيليا اللبانة بغيظ ف بصتلها سيا وهي بتقول : عشان كدا سيبتي البيت ؟
سيليا بغضب : مامي من فضلك أنا حقيقي مش قادرة أسمع أي حاجة ولا أتكلم حتى وياريت لو جه وطلب يشوفني أنا مش هنا ..
طلعت فوق وسيا بتقول : خُدي هنا يا بنت هو أنا السكرتيرة بتاعتك !
* في شقة العقرب
دخل الشقة ومعاه مياسة ، قفل الباب عليهم ووقفت هي مكتفة إيديها وبتهز جسمها بعصبية وبتقول : هو إنت بُرج الجوزاء ؟ أصل سوري يعني هما الوحيدين اللي عندهم إنفصام الشخصية دا
العقرب بإبتسامة : بس اللون الإسود كان عامل شُغل جامد مع اللحم الأبيض ( يُقصد قم*يص نومها )
مياسة بصدمة : إنت بني أدم مش مُحترم !
العقرب بإبتسامة : ما أنا قولتلك في العربية إني سااافل ، إنتي اللي مش مصدقاني مش عارف ليه
مياسة بغضب : وعاوز مني إيه ياريت تخلصني
وقف العقرب قُدامها ومسكها من كتافها وقال بجدية حزينة : شبهها .. من أول يوم شوفتك وأنا ..
سكت بحُزن ف عقدت مياسة حواجبها وهي بتقول : شبه مين ؟
رفع العقرب راسه وبص لعينيها مرة تانية وقال : مش سألتيني إمبارح قبل ما تمشي وقولتلك هجاوبك ، بعيداً عن بيلي طليقك وعن إتجوزك ليه وشغلنا إيه ، أنا كُل ما بخليكي تمشي وأديكي حُريتك مبقدرش غير إني أرجعك قُصاد عيني تاني
بلعت مياسة ريقها وهي بتسمعه ف قال هو بنبرة حزينة لكنها حلوة : زي العصفورة المحبوسة اللي صاحبها بيفتحلها القفص ف بتطير وبيخاف عليها من النسور والغربان اللي برا
عينيها كانت واسعة وهي بتسمعه ، بطرف صوباعه بعد خُصلات شعرها الشقرا اللي لازقة في شفايفها وقال : أصلها عصفورة رقيقة أوي ، صاحبها بيخاف عليها أوي
مياسة وجفونها بتترعش : شبه مين ؟
مسك العقرب طرف إيديها وسحبها معاه ناحية الكنبة ، قعدها قُدامه وهو بيتأمل ملامحها بعدها قال : أملي .. شبه أمل
مياسة بإستغراب : أمل !
العقرب وعينيه بدأت تتجمع فيها الدموع وبنبرة صوت مهزوزة ومبحوحة : هي السبب .. إني بقيت كدا ، فاكرة لما قولتيلي مرة إنك حاسة إن عيلتي ناس عادية وبسيطة وآنك متعرفيش أنا طالع كدا لمين ؟
هزت مياسة راسها وهي بتبُص لملامحه بتعمُق ف قال بتنهيدة طويلة : قت*لوها قُدامي ، قتلوا الحاجة الكويسة اللي جوايا وفضلالي
قربلها خطوة كمان ف إترعشت هي من ريحة برفانه ومن صوته البارد : أنا متولدتش الوحش اللي إنتي شيفاه قُدامك ، الأيام واحدة واحدة حولتني لكدا ، من الكبت والقهر اللي جوايا
خرج السلسة من رقبته ووراها لمياسة وهو بيقول : شايفة دي ؟ بضغط عليها بسناني كُل ما أحس إني هرتكب جريمة بشعة ، بحس إن جوايا غضب مبيروحش
مالت مياسة برأسها على جنب وهي بتقول : هو أي حد يموتله غالي عليه يتحول وحش ؟ أنا مقدرة شعورك جداً بس صدقني هي من أول ما إتولدت مكتوبلها تم*وت بالطريقة دي
قاطعها العقرب بغضب وكإن ملامحه بقت مُظلمة وقال : وأنا برضو لما إتولدت كان نكتوبلي أطلع كدا عشان أجيب حقها
غمض عينه وبلع ريقه ورجع بصلها تاني وقال : حسيت إني عاوز أحكيلك
إتنهدت مياسة وخدت نفسها بعدين قالتله : بما إنك حكيتلي .. أنا كمان هحكيلك إتجوزت نبيل إزاي
حط العقرب صوابعه على شفايفها وهو بيقول : مش عاوز أعرف ، بس كُنت عاوز أقولك إنه ميستاهلكيش وأنك ..
قاطع كلامه صوت الجرس بيضرب ف بص لمياسة ومياسة بصتله بقلق
شاور على شفايفه بصوباعه بمعنى إسكتي ، سحبها ووقفها وراه وهو بيخرج السلاح من بنطلونه من ورا ، بص من العين السحرية لقى يوسف أخوه واقف
راح إتنهد براحة وفتح الباب وهو بيقول : خضتني يابني
يوسف كان منزل راسه بحُزن ولاحظ العقرب دا ، ف قال بتكشيرة : أه يبقى في مصيبة ، إدخل إدخل
دخل يوسف وقفل العقرب الباب وراه ، بص يوسف لمياسة وقال بهدوء : عاملة إيه ؟
مياسة بإبتسامة : بخير الحمدلله ، إنت اللي مالك شكلك مش بخير
العقرب بهدوء : خُش وإحكيلي حصل معاك إيه ..
أنت تقرأ
▪︎ تنهيدة عشق ▪︎ ( مُكتملة )
Romance" عيسى المادة الخام للإختلال .. إسم قادر على أن يبُث الرُعب في جميع أوصالك ، أن يُحب عيسى يعني أن تحدث الفوضى .. أن يعشق العقرب عندئذ تعُم الحرائق ولا عزاء لقدسية العشق 🚫 "
