مزاد مش علنى بقلم / لولو_محمد ( كامله )

الحلقه الاولى

((((((( مزاد مش علنى ))))))
#لولو_محمد
الحلقه الاولى
على كبرى على النيل
حنان بنت فى العشرين لابسه عبايه سوده بكباسين و باين من تحتها بنطلون البجامه طرحه شبه مفكوكه و شبشب بصباع ماشيه بتزحف فى الارض من الارهاق تقف تمسح بايدها العرق و تبص على النيل و تمسك فى السور جامد شاب يعدى
الشاب / اموت انا فى العبايه السمره
حنان تتخض و تبص الشاب يغمزلها
الشاب / اللى واخد عقلك يا جميل
حنان تسيب المكان و تمشي أسرع
الشاب / استنى بس ... شكلى معجبتش و لا ايه
حنان تنزل الكبرى و تمشي فى الشوارع بين الناس بسرعه لحد ما توصل لشارع فاضي على ناصيته مسجد و فيه محلات بسيطه بس ما فيهوش رجل تقعد قدام بوابه عماره بتنهج تبص فى ايدها على عشره جنيه مطبقه تفردها و تبص على محل بقاله فى نص الشارع و تقعد تفكر تقوم و هى بتقدم رجل و تاخر رجل تروح تقف قدام المحل و تبص على ازايز الميه فى التلاجه و تبص على الحجه وفاء ست كبيره قاعده بتقرا فى المصحف و مش منتبهه لحاجه حنان ترجع تبص للتلاجه الاذان ياذن وفاء تقفل المصحف و تصدق و تقوم من على الكرسي و تروح ناحيه حنان
وفاء / هتاخدى حاجه يا حبيبتي قبل ما اروح اصلي
حنان تبصلها و تبص للعشره جنيه اللى فى ايدها
وفاء / طب بصي انا هسبقك على المسجد عشان لسه هتوضي نقى براحتك و ابقي سيبي الفلوس فى اى علبه هنا عن اذنك
وفاء تمشي تروح ناحيه المسجد و حنان متابعاها باستغراب تبص بعينها على العلب مليانه حلويات و المحل مليان و مفتوح و الاكل كلو قدامها و تفضل عينها تروح و تيجي بين الحاجه حنان تغمض عنيها و تروح المسجد ورا وفاء تروح الحمام تلاقى وفاء بتغسل رجليها و تقفل الحنفيه وفاء اول ما تشوف حنان تبتسم بحب
وفاء / الله ... انتى ما نقيتيش حاجه خالص ... على العموم جدعه المحل مش هيطير اتوضي عشان نصلى و بعدين اخدك اجبلك اللى انتى عوزاه
حنان تبص لوفاء باستغراب و ما بتردش وفاء تبتسم
وفاء / انا كبرت على الوقفه هروح اقعد هحجزلك جنبى على الله نلحق الصف الاول
وفاء تضحك و تمشي و حنان متابعاها بعنيها تبص على الحنفيات تفتح واحده و تشرب و تملا بطنها ميه و تمسح بقها و تبص فى مرايه مكسوره محطوطه فى جنب و ترجع تبص على الحنفيه و تشمر كمها و تتوضى و بعدين تروح بره تلاقي وفاء بتشاورلها تروح تقعد جنبها حنان تفضل بصالها الامام يقيم الصلاه وفاء تفضل تشاور لحنان حنان تبصلها و مش بتتحرك الامام يكبر وفاء تستقيم فى الصف حنان تجرى تقف جنبها و يصلوا سوا و اول ما يخلصوا صلاه
وفاء / حرما
حنان باصه مكان سجودها و مش مركزه وفاء تستغرب و تهز راسها مش عارفه و تقوم و تروح ناحيه باب المسجد تسمع صوت خضه واحده فيها صرخه و الكل بيجرى على حنان واقعه فى الارض و ما بتتحركش وفاء تجرى عليها و تحاول تفوقها
وفاء / اجرى يا نهى هاتى علبه عصير من التلاجه و اى باتيه و لا اى حاجه
بنت تجرى تطلع من المسجد و عامله المسجد تناول وفاء ازازه ميه ترش لحنان على وشها و تفوقها حنان تفوق و تشوفهم تصرخ
حنان / ابعدوا عنى ابعدوا عنى
نهى تدخل شايله علبه عصير و باتيه
وفاء / اهدى يا بنتى ... انتى كويسه يا ضنايا
حنان تبص للى حواليها الكل متابعها
وفاء / اديها يا نهى الحاجه ... اقعدى يا بنت ارتاحى شويه ما تمشيش و انتى دايخه لتقعى فى الشارع و لا حاجه ... معاكى موبايل اتصلك بحد من اهلك يجي ياخدك
حنان الدموع تنزل من عنيها و تنهار و تقعد جنب اقرب عمود و تفضل تعيط فى صمت وفاء تتنهد و تروح تاخد الحاجه من نهى و تشاورلها تمشي وفاء تروح تقعد جنب حنان قاعده فى الارض بتعيط
وفاء / وحدى الله ما فيش حاجه ما لهاش حل استهدى انتى بس بالله و ارمى حمولك على اللى خلقك خدى اشربى و كلى وشك اصفر و شكلك تعبانه انتى منين
وفاء تعزم علي حنان بالحاجه حنان تبصلها
وفاء / يا بنتى خدى بدل ما تقعى مننا تانى
حنان تطلع العشره جنيه من جنبها و تفردها و تبصلها و تديها لوفاء
وفاء / خليهالك المرادى الحاجات عليا خدى يا بنتى ... خدى
حنان تمد ايدها بتردد تاخد الباتيه و هى بتبص لوفاء
وفاء / خديه
حنان تاخده و تفتحه و تاكل و هى بتعيط
وفاء / لا اله الا الله للدرجادى !! يا بنتى مفيش حاجه فى الدنيا مستاهله تعملى فى روحك كدا عشانها انتى لسه صغيره و الدنيا لسه قدامك
حنان تعيط اكتر
وفاء / هو الموضوع كبير اوى كدا
حنان تيجي تقوم وفاء تقعدها
وفاء / طب خليكي بس لحد ما تهدى هتمشي تعيطي فى الشارع
حنان تمسح دموعها و تتنهد وفاء تناولها العصير
وفاء / خدى اشربى ده كمان
حنان تهز راسها لا
وفاء / يا بنتى ما تقطعيش قلبي اكتر من كدا انا ست كبيره و عندى الضغط
حنان تبصلها
وفاء/ طب بصي احكيلى و ان شاء الله ربنا يقدرنى اساعدك
حنان / بجد ممكن تساعديني
وفاء / الله اكبر ابو الهول نطق .. ايوه و الله لو هقدر ما هتاخر احكيلى بس مالك و بطلى عياط و ما تعمليش فى نفسك كدا اقسم بالله قلبى وجعنى عليكي ايه فى الدنيا يستاهل القهره دى بس
حنان تبص الناحيه التانيه و تفتكر
....................
فى شقه فى حى شعبى
احمد ( شاب تلاتيني )/ خمسين الف ايه دا اتهبل فى عقله هو فاكرها ايه
سحر ( فتاه عشرينيه حامل زوجه احمد ) / الله مش خرج بيوت يا احمد و لا انت عاوزها تقعدلك بقي و توقف سوقها احمد ربنا ان فى حد رضي بيها اصلا
فتحيه ( والده احمد )/ انتوا بتتكلموا فى ايه يا ولاد المعلم فرج متجوز اتنين
سحر / المعلم فرج الجزار يقدر يفتح بدل البيت عشره و الشرع فى صفه
حنان تطلع من الاوضه
حنان / و ما دام انتى مع الشرع اوى كدا ما تخلى اخويا يتجوز عليكي و نشوف انتى رايك ايه
سحر / يا اختى يتجوز هو انا حيشاه لما ربنا يبقي يكرمه و يقدر يفتح بيتين يبقي يتجوز براحته
حنان / بس انا مش موافقه
سحر / بشوقك هو حد كان ضربك على ايدك و لا تكونيش فاكره انك لما تتجوزى المعلم هناكل لحمه ببلاش احنا بنعمل كل ده عشان مصلحتك انتى اصلك ما تعرفيش الناس بتشوف المطلقه ازاى و عندك اول المتمه مرات عمك اول ما نزلتى من الامارات جريت خدتك بالحضن فكراكى راجعه شايله و محمله و اول ما عرفت انك اطلقتى منعتك حتى من دخول بيتها و خافت على ابنها منك و بدل ما كان حيالله قارى فاتحه جريت كتبت كتابه و هتدخله قبل ما ترسمي عليه و تخطفيه
حنان / و ايه كمان مين تانى كان هاريني بوس و احضان و نفرشلك الارض رمل و اول ما عرف ان ما جبتش هدايا بطنها وجعتها و الحمل تعبها و روحنى افرد ضهرى يا احمد لحسن الحمل تاعبنى امى ؟؟؟
سحر / الحق عليا انى نزلتلك فى عز تعبى اسلم عليكي واحده غيرى كانت سابتك زى الكلبه لما يبانلك صاحب لتكونى يا بت فاكره اننا فرحانين برجوعك دا احنا كنا ما صدقنا هم و انزاح
حنان / انت ساكت ليه يا اخويا
احمد / و انا مالى انا بخناقات الحريم انتى اصلا مش عامله حساب لوجودى
حنان / دى انا ... طب انتى يا اما
فتحيه / بيتك و مطرحك يا بنتى تنوريه فى اى وقت
حنان / و ايه رايك فى المعلم ياما اصل العجوز الاولانى ما ملاش عينكوا فبتبيعونى لعجوز تانى اصغر عيل فى عياله اكبر منى
احمد يقف و يتعصب
احمد / اتكلمى عدل يا بت و احنا كنا بعناكى اولانى لما هنبيعك تانى و لا كنا نعرف ان ابن الكلب ده راجل عجوز
حنان / ما دى المصيبه دى المصيبه يا اخويا لما تجوز اختك بتوكيل و تسفرها بطولها بلد غريب من غير حتى ما تكلف نفسك تسال عن جوز اختك و ترمونى سنه كامله ما تسلوش عايشه و لا ميته دى المصيبه
فتحيه / والله حاولت اوصلك حاولت اكلمك و قولت ما دام انتى مبسوطه ربنا يهنيكي
حنان / مبسوطه !! مبسوطه !! ما طبعا هكون مبسوطه عشان تعرفى تنامى مرتاحه و ما تفكريش فيا ما فكرتيش ياما مره ما فكرتيش غيابى سنه كامله من غير مكالمه تليفون واحده دى معناها ايه مش يمكن مت
فتحيه / والله حاولت و الله سالت
حنان / سالتى مين ... الحج شاهين ابو سحر سمسار البهايم اللى جابلكوا العريس و ضحك عليكوا و خلاكوا تبيعونى
سحر / اتكلمى عن ابويا عدل بدل ما اقسم بالله هو فى ايه يا احمد
احمد / عيب يا حنان دا قد ابوكى
حنان تبص لاحمد
حنان / تمام انا ادفعلى مهر نص مليون جنيه يلزمونى
سحر / نعم !!! احمد يا عمر
حنان / ايه مش حقى
احمد / و انتى ناقصك ايه يعنى عاوزه الفلوس دى فى ايه
حنان / عوزاها افتح مشروع اكل منه و اشوفلى مكان اعيش فيه عشان ما اتقلش عليكوا اكتر من كدا
محمود ( والد حنان ) يدخل
محمود / صوتك عالى ليه يا بت
سحر/ جيت فى وقتك يا حمايا تعال شوف بنتك المتربيه عاوزه تروح تعيش فى شقه بطولها و هى مطلقه اصل احنا ما سلمناش من كلام الناس و هى عايشه معانا لما هتروح بره و تعيش لوحدها امال احنا مستعجلين على جوازك ليه
حنان / هعيش هنا ماشي بس هصرف على نفسي و اساعد أهلى فى المصاريف مش هبقي عاله على حد
محمود / و انتى كان ناقصك حاجه
حنان / عاوزه حقى مهرى اللى ادفع فيا النص مليون جنيه
محمود / دفعته فى شقه اخوكى بدل التانيه اللى اتنصب عليه فيها و عملت قرض عشان اكمل العفش و التوضيب
حنان / تمام الشقه تتكتب باسمي
سحر / أحمد يا عمر باسم مين يا عنيا الشقه اتكتبت باسمي مش كفايا ما جاليش شبكه
احمد / اعتبريها يا ستي باسمك و ليكي عليا كل اول شهر هجبلك خمسميه جنيه الايجار لحد عندك
سحر / خمسميه جنيه ايه دا بدل ما تحوش فلوس العمليه لابنك اللى جاى و لا شكلك ناوى تولدنى فى مستشفي اى كلام لا اسمع اما اقولك
احمد / يا ستي ربنا هيفرجها و بعدين هى لما تتجوز المعلم
حنان/ انا مش هتجوز حد انت فاهم مش هتجوز حد
محمود / صوتك ما يعلاش انتى هتنسي نفسك و لا ايه
حنان / على فكره انا بنتك
محمود / بنتى تسمع كلامى و ما تخرجش عن طوعى انا خلاص اديت للراجل كلمه و الدخله الخميس الجاى
حنان / طب و انا
محمود / انا ابوكى و اعرف مصلحتك
حنان / و انا مش هتجوزه لو هتموتونى مش هتجوزه
سحر / اعقلى يا حنان ابوكى خد الفلوس من الراجل و حطها فى توضيب المحل يعني لو ما سمعتيش الكلام ابوكى يا اختى اللى هيتحبس و ساعتها بقى دورى على اللى هياكلك انتى و امك ... لا مؤاخذه يا حماتى
محمود / و تاخذك ليه ما دى الحقيقه و بعدين هو الحج فرج راجل وحش طب دا مهنى حريمه و معيشهم احسن عيشه و هيعملك شقه لوحدك كامله من مجاميعه و مش بس كدا اتفقت معاه يعملك مصروف ايد الفين جنيه فى الشهر تلبسي و تتانتكى بيهم
سحر / مش خمسميه
حنان/ كتر خيركوا قلبكوا عليا
احمد / احنا بنعمل ده لمصلحتك ما تبصيلناش كدا
حنان / تجوزونى واحد من اعرفش عنه غير اسمه و اسافر بفستان الفرح بلد غريبه و اتفاجئ انه باعتلنا صوره ابنه و انه عنده اورطه عيال و متجوز تلاته غيرى غير اللى مطلقهم و مخلف منهم و اعيش خدامه فى بيته اقوله جوازنا باطل يجلدنى بالعقال لحد ما افقد الوعى و برده ما يتقيش ربنا و يغتصبنى و افضل فى العذاب ده سنه
احمد / انتى هتقعدى كل شويه تحكى اللى جرالك هناك ما خلصنا بقي و اديكي رجعتى بالسلامه اهو
حنان / انهى سلامه انهى سلامه و انت واخد مهرى مديه لمراتك و مش بس كدا دا انتوا بتجوزونى تانى و المرادى مش هتتفاجؤا انه عجوز و متجوز و مخلف لا دا انتوا عارفين و مباركين و قابضين كمان
محمود يضرب حنان بالقلم
محمود / ما تتكلمى عدل يا بنت الكلب انتى انا ساكتلك من الصبح
حنان تجرى على اوضتها
سحر / داهيه لتكون لسه عينها فى مصطفى
الكل يبص لسحر تحط ايدها على بقها و تسكت
.......................
فى المسجد
حنان قاعده مع ست كبيره
وفاء / و انتى كان فى بينك و بين مصطفى ابن عمك حاجه اصلا ايه اللى يخليها تقول كدا
حنان / ايوه سحر كانت صحبتى و عارفه عنى كل حاجه و انا و مصطفى كان فى بينا حب طفولى برئ بس فجاه و بعد ما اخويا خطبها و اتنصب عليه فى فلوس الشقه و حط اللى وراه و اللى قدامه و اداينا ابوها جابلى العريس و الكل اول ما سمع الرقم اتهبل و بقوا يضغطوا عليا اوافق مصطفى كلم ابويا و ابويا رفض قاله مهرها قدامك لو تقدر وفى و انا ما استخسرهاش فيك
وفاء / و طبعا مصطفى ما كانش يقدر يوفى
حنان / هو ما صدق اصلا تعرفى انى اتحايلت عليه ياخدنى و نهرب و نتجوز و نبقي نرجع بعدين و اكيد هيسامحونا
وفاء / رفض
حنان / قالى رجولتى تمنعى انى اعمل حاجه زى دى فيكى لكن ما منعتوش يسوق العربيه اللى بتوصلنى المطار لواحد انا مغصوبه عليه و ما اعرفوش و متجوزاه بتوكيل
وفاء / انا مش مصدقه طب لو كانوا تجار اعضاء و لا اعوذ بالله بتوع دعاره انا بجد مصدومه
حنان / انا شوفت هناك العذاب اشكال و اللوان اتمنيت الموت فى كل ثانيه تصدقى انا اول ما نزلت مصر نزلت على الارض اسجد شكر شوفى يا حجه وفاء انا كنت بحلم باليوم اللى اهج فيه من البلد دى و الفقر اللى بشوفه فيها بس هناك العز و القصر و اللبس و المجوهرات ما كانوش بيساوا لحظه تحطى راسك فيها على المخده و انتى مطمنه انا كان بيتبصلى بصه واحده رخيصه بتبيع جسمها بالفلوس
وفاء / اعوذ بالله
حنان / انتى عارفه ان ابنه حاول معايا اقولك ايه بس
وفاء / هى الحكايه من اولها حرام فى حرام انا ما شوفتش كدا طب انتى ناويه تعملى ايه دلوقت هتروحى فين و لمين
حنان / اهى بيوت ربنا واسعه ادخل اصلى و ادارى فيها و ارتاح هعمل ايه
وفاء / يعني هتعيشي فى الشارع
حنان / انا ما فكرتش غير انى اهرب قولت لامى هنزل اجيب ايسكريم على ما الكوافيره تيجي نفسي ريحاله ادتنى العشره جنيه دى و اهى هى اللى معايا فضلت امشي ارض تشيلنى و ارض تحطنى لحد ما العصر اذن دخلت اصلى
وفاء / اتاريكي دختى يا بنتى و وقعتى ... بصي انا عايشه لوحدى تعالى اقعدى معايا
حنان / اخاف اتقل عليكى انتى بس لو تقدرى تشوفيلى شغل هنا و لا هنا بلقمتى و سكنى والله ما طالبه اكتر من كدا
وفاء / ماشي تعالى اشتغلى عندى بلقمتك و سكنك تمام
حنان تبص لوفاء وفاء تقوم تقف حنان تقوم أسرع تسندها
وفاء / انا كان عندى بنت زيك بس راحت للى احسن منى و منك بيتهيالى نفس مقاسك تعالى نطلع ناكل لقمه و تغيرى هدومك و ترتاحى شويه تعالى يا بنتى تعالى ربنا يبعد عننا ولاد الحرام
......................
فى شقه وفاء
حنان و وفاء واقفين و فى شاب اربعيني واقف
عبد الله / يعني معكيش حتى بطاقه
حنان / انا هربت باللى عليا و بعدين انا اسفه انا الحجه قالتلى انها عايشه لوحدها انا ممكن امشي انا بجد اسفه انا مش
وفاء / هتروحى فين بس يا حنان استهدى بالله يا بنتى هو عبد الله كدا حمقى بس و الله قلبه ابيض ... اسمع يا عبد الله انا مقدره مشاعرك بس دى شقتى و من حقى ادخل فيها اللى يعجبنى و يا سيدي لو خايف على عيالك ابقي خليهم يباتوا معاك فى شقتك
عبد الله / ايوه بس انتى مصدقاها ازاى يعني ما يمكن وراها تنظيم عصابى و لا بتكدب
وفاء / روح اتاكد بنفسك
حنان تعيط
حنان / ابوس رجلك ما تدلهم على مكانى انا همشي هسيبلك البيت و امشي
عبد الله / شوفتى اول ما لقت نفسها هتتكشف عاوزه تهرب
وفاء / اتقى الله يا عبد الله ارحموا عزيز قوم ذل
عبد الله / و انتى بقي بتهربى كدا كنتى متوقعه ايه بقي ما يمكن ما كانش ربنا سترها معاكى و وقعتى فى ايد ناس تتمنى لو كنتى اتجوزتى الجزار بدل اللى بيعملوه فيكي انا مش فاهم البنات دول بيفكروا ازاى
حنان / ما فكرتش الدنيا اسودت فى عيني ما فكرتش و بعدين حضرتك لا عشت و لا شوفت اللى شوفته و لا حتى تعرفنى عشان تحكم عليا انا من ساعه ما رجعت مصر و انا كل اللى عوزاه انى اعيش فى حالى اكل لقمه حلال و اكفى الناس خيرى شرى انا رجعت مصر اجرى على اهلى احكيلهم شوفوا جرالى ايه لقيت ... اى واحده لما ناس بتضايقها او تعاكسها بتجرى تتحامى فى اهلها انا بقي ... انا اتحاميت فى بيت ربنا
عبد الله / انتى لا معاكى بطاقه و لا اى اثبات شخصيه دا غير انك قاصر مش عشرين سنه برده
حنان / هكملهم كمان كام شهر
عبد الله / ايوه يعني مش هتقدرى تشتغلى
وفاء / هتقف معايا فى الدكان
عبد الله / دى مسؤليه غير الأولى يا امى ما يمكن قاتله حد و لا سارقه حد
حنان / و الله ابدا طب بص انا هديك عنوانى تروح تسال عنى بس بالله عليك بحلفك بالله ما تسلمنى ليهم اقسم بالله ما كدبت فى حرف اقف معايا ربنا يوقف لبنتك ولاد الحلال
حنان تعيط وفاء تروح تطبطب عليها
وفاء / ارمى حمولك على اللى خلقك ربك كريم و مفيش احن منه قومى يا بنتى ادخلى ارتاحى و الاوضه فيها مفتاحها من جوه يعني نامى و اطمنى
حنان تكتب حاجه فى ورقه و تديها لعبد الله
حنان / دا عنوانى بس انا حلفتك بالله تعتبرنى زى بنتك و ما تسلمنيش ليهم تانى
عبد الله ما يمدش ايده ياخد الورقه حنان تحطها على الترابيزة و تدخل تقفل على نفسها
وفاء/ انا مصدقاها و مرتاحالها
عبد الله / الولاد هيناموا عندى و كدا كدا ما اعتقدش هيجيلى نوم هفضل صاحي لو احتاجتى اى حاجه
وفاء / نام و ارتاح انا بتعامل مع ربنا
عبد الله / و نعم بالله تصبحى على خير يا امى
عبد الله يبوس ايدها و يتحرك ناحيه الباب يقف و يرجع ياخد الورقه و يمشي وفاء تبتسم
....................
فى الحاره
قدام محل محمود المعلم فرج واقف و وراه رجالته بيزعق
فرج / انا الكلام ده ما يكلش معايا انا كدا كدا مش هسيبها و هجيبها هجيبها انما شغل البت ماتت بالنسبالى و هاخد عزاها ده ما يخصنيش
محمود / هاتها و انا ادبحهالك بايدي انا اللى تخرج عن طوعى ما تغلاش على اللى خلقها
فرج / و برده الفلوس هترجع بالزوق بالعافيه هترجع فتلم نفسك كدا و تطلعها
محمود / منين بس يا معلم ما انت عارف البير و غطاه
فرج / يمين بالله اعلقك قدام المحل زى الدبيحه و اخلى اللى ما يشترى يتفرج عليك و مش بس كدا دا انا كمان هجيب ابنك الحيله اللى فرحنلى بيه ده قدامك
محمود / يا معلم انا حطيت كل الفلوس فى المحل اديني بس يومين تلاته
فرج / تماااااام حلو اوى و انا بقي الفلوس مش لزمانى انا عايز المحل ده ارض يا رجاله
الرجاله تدخل تدغدغ المحل و محمود يحاول يحوشهم يتلموا عليه يكتفوه عبد الله يدخل المنطقه يشوف الخناقه يبعد و يروح يقعد على قهوه و الستات بتصوت
عبد الله / هو فى ايه يا بلدينا
القهوجى / يا عم ما لناش دعوه اياكش ياكلوا بعض حتى
عبد الله / ما لناش دعوه ازاى الراجل باب رزقه بيتكسر
القهوجى / يا عم دا راجل لا مؤاخذه يستاهل اللى يجراله
عبد الله / مش فاهم لا مؤاخذه ازاى يعني
القهوجى / اتفق مع المعلم انه يجوزه بنته و خد منه خمسين باكو و هوب يوم الفرح البت فص ملح و داب فضلوا لحد الصبح بيلفوا بالعربيات فى الشوارع يدوروا عليها و مستحلفين لو لاقوها يخلصوا عليها
عبد الله / المعلم ابو جلبيه بيضه ده العريس
القهوجى / عليك نور دا متجوز و فاتح بدل البيت اتنين و عياله طوله و لا مؤاخذه و اخره المتمه رايح عاوز يتجوز عيله من دور عياله
صاحب القهوه / ما تلم لسانك اللى هيعلقك ده يا سي زفت
القهوجى / لا مؤاخذه يا معلمى
القهوجى يجرى على جوه
صاحب القهوه يسلم على عبد الله
شاكر / محسوبك المعلم شاكر صاحب القهوه دى
عبد الله / انعم و اكرم عبد الله السنوسي
شاكر/ الا ما تاخذنيش انت شكلك ما عداش عليا قبل كدا خير اؤمر
عبد الله / و الله انا مش عارف اقولك ايه انا اصلى ... انا كنت بدور على شقه شقه يعني فى حته رخيصه بس تكون نضيفه يعني
شاكر / محلوله دلوقت الخناقه تتفض و يجي سالم السمسار هو قعدته علاطول عندى بس من محبته فى محمود الكلب ده راح يتفرج اصله الشهاده لله راجل و لا مؤاخذه و ما حدش بيطئ امه
عبد الله / عشان بنته اللى هربت
شاكر / لا ..  عشان عينه فارغه ما يملاهاش الا التراب و بيريل على القرش حتى لو هيبيع لحمه اهى البت اللى هربت دى اقسم بالله ارجل من عيلتها كلها شايف النجار اللى هناك ده
عبد الله يبص
شاكر / اهو ده اخو محمود اللى بينضرب شوفته اتنحرر هو و ابنه يحوشوا ابدا جوزوا البت عيله بنت تمنتاشر سنه لواحد بتوكيل سافرت سنه و رجعت بالعبايه اللى عليها و البت يا كبدى فضلت يجي شهر و اكتر تصحى الحته كلها على صوت صرختها اخر الليل من فزعتها و هى نايمه و ما صعبتش عليهم قرروا يبيعوها للمره التانيه
عبد الله / طب و امها
شاكر / و لا ليها لزمه اهى زى ما انت شايف اهو قاعده تعيط فى الارض اهى بالك انت اما الخناقه تتفض ابن الكلب ده هيطلع يفش غله فى الغلبانه قليله الحيله و يعمل عليها راجل اسفوخس على دى اشكال
الخناقه تتفض و الناس تمشي و محمود يجرى يبص على المحل كوم تراب و عبد الله متابع اللى بيحصل راجل يدخل
شاكر / و اهو سالم جه اهو ... بقولك ايه يا سالم الباشا حبيبي تشوفله احسن شقه و تزبطه فى السعر دا ضيفي
عبد الله / مفيش لزوم عن اذنكوا
عبد الله يمشي
شاكر / له حق يقرف من الحته باللى فيها ما هو على راى اللى قال اختار الجار قبل الدار ابو شكلكوا جيره تعر  ..  الحجر يا وله
القهوجى / جاهز يا معلمى
.......................
فى شقه وفاء
حنان قالبه الشقه و هاتك يا تنضيف باب الشقه يتفتح و وفاء تدخل
وفاء / برده عملتى اللى فى دماغك
حنان / انا خلصت الاوض و المطبخ اديني بس ساعه زمن و انا اخلصلك الصاله و الحمام و الاكل على النار نصايه و اطفى عليه خشي انتى يا امى ارتاحى و انا هخلص و اناديكي
وفاء / يا بت مش قولتلك بجيب واحده تنضف الشقتين
حنان / ما انا جيت اهو و لو سى عبد الله اذن اروح بكره انضفله شقته
وفاء / لا ما لكيش دعوه بعبد الله انتى انتى لو نضفتى مكان ما بتنامى يبقي كتر خيرك انما
حنان / احنا اتفقنا انك هتشغلينى بلقمتى انا مش معترضه كتر خيرك انا اقسم بالله ما كنت احلم انى اشوف النوم تانى دا انا بقالى سنين ما شوفتوش
حنان تعيط وفاء تروح تحضنها
وفاء / لا اله الا الله بقولك ايه فكيها كدا و خليني اساعدك قبل العيال ما تيجى من المدرسه و يقعدوا ينطتوا من هنا لهنا و يلبخولك الدنيا يلا يلا انا هساعدك
حنان / طب و الله ابدا ما تحطى ايدك فى حاجه خشي ارتاحى و انا ساعه زمن بالكتير و اناديكى خشي ارتاحى بس خشي
وفاء تطبطب على كتف حنان و تدخل اوضه و حنان تكمل تنضيف
........................
فى شقه محمود
احمد / و احنا يعني هنسكت على اللى حصل ده ايه مفيش حكومه فى البلد
سحر / اقعد يا حماده خلينا نفكر هنعمل ايه فى النيله اللى اختك وحلتنا فيها دى
محمود / هسدد القرض ازاى دلوقت دا انا قولت القرشين اللى اخدتهم من المعلم هيحركوا المحل و السوق يتعدل انما كدا لا زاد و لا ميه حتى تصليح المحل هيحتاج فلوس
سحر / منها لله حسبي الله و نعم الوكيل فيها
سحر ترفع ايديها و تدعى الدهب يشخلل فى ايدها محمود يشوفه
محمود / مبروك ما جالك
سحر / دول !!! دا دهب صيني يا عمى ... و احنا هنشوف الدهب الاصلى منين بس ما حضرتك عارف البير و غطاه
سحر تزغر لاحمد يسكت فتحيه تدخل تحط صينيه الاكل
سحر / تسلم ايدك يا حماتى ما تاخذينيش الحمل تاعبنى كنت قمت ساعدتك
فتحيه / لا سلامتك
سحر / طب ايه يا احمد مش تلحق تاكلك لقمه عشان تلحق توصلنى و تشوف اكل عيشك مش هيبقي من كله
الكل يبص لبعضه سحر تحط لاحمد اكل و هو ياكل و تغرف لنفسها و تاكل و فتحيه و محمود ما بيقربوش من الاكل
.....................
فى شقه عبد الله
حنان تدخل اوضه مكتب مليانه كتب اشكال و اللوان و ورق فى كل حته تنبهر و تروح تقف قدام المكتبه فيها كتب من الارض للسقف تشد كتاب نساء حول الرسول و تفتحه و تبص فيه عبد الله يدخل و هو بيزعق
عبد الله / مين اللى فتح مكتبى قولت مليون مره
عبد الله يشوف حنان تتفزع
عبد الله / انتى بتعملى ايه هنا
حنان / كنت كنت  ... كنت بروق الشقه عشان انضفها
عبد الله / انتى حدودك شقه حماتى انما شقتى ما لكيش اى دعوه بيها خصوصا مكتبى انا مفيش مخلوق مسموحله يدخل مكتبى اقل ورقه هنا لو اتنقلت من مكانها شغلى كله هيروح تمام فمن فضلك بالزوق كدا ما تدخليش الاوضه دى تانى ما تفتحيش بابها من اساسه تمام
حنان / انا اسفه
حنان تيجي تمشي و الكتاب فى ايدها
عبد الله / الكتاب
حنان ترتبك و تروح تحطه على المكتب و تيجي تمشي
عبد الله / استنى
حنان تقف و تبصله عبد الله يمسك الكتاب و يديهولها تانى
عبد الله / اقريه حلو جدا منها تشغلى وقتك فى حاجه مفيده و منها تتعلمى و ليكي عليا كل كتاب تخلصيه و اسالك فيه ليكي منى ميه جنيه و لو الكتاب كبير هزود المبلغ
حنان تتفاجئ
عبد الله / اكيد هتحتاجى تجيبي لنفسك حاجه كدا و لا كدا يبقي ليكي مصروف يعني ما دام هتعيشي معانا
حنان تهز راسها و تاخد الكتاب و تمشي عبد الله يقلب فى الورق
.....................
على القهوه بعد فتره
محمود / ما انا لو بعت المحل انا و امك مش هنلاقى ناكل دا انا
احمد / ما انا لو بعت التاكس انا و سحر مش هنلاقى ناكل برده يابا
محمود / ليه ما ترجع تشتغل عند المعلم فارس الدوغرى تانى كان بيحبك و مدلعك
احمد / بقي بعد ما بقيت بشتغل فى ملكى ارجع اشتغل عند الناس يابا
محمود / و هو القرض ده مش هو اللى جابلك العربيه و لبس مراتك الدهب و ما تصيعش زيها و تقول دهب صيني عشان ما اروحش اجبلك نسخه الفواتير من محل هانى جورج الجواهرجى
احمد يتفاجئ
محمود / اصل مراتك زاكره سمك نسيت انها اول ما اشترتهم مشيت تعاير فى حريم الحته و تتباهى بمجايبك
احمد / دا كيد حريم يابا امال يعني هتقول جايبه دهب قشره
محمود / ماشي بيني و بينك الجواهرجى
احمد / جرا ايه يابا انت بتكدبنى و لا ايه
محمود / ما انا مش هخش السجن و اتبهدل فى اخر ايامى عشانك و اخرتها تديني ضهرك
احمد / اخص عليك يابا انا برده اعمل كدا طب اسال سحر كدا اسالها قالتلى هتعملك جمعيه تقبضها الاول و ليك عليا من دلوقت هنزل ورديتين بدل واحده
احمد يقوم
محمود / انا كلمت المعلم فارس و اتفقت معاه على تمن التاكس بالليل هيجيب العقود و نمضي ما تصيعش عليا
احمد / ان شاء الله يابا ان شاء الله عن اذنك عن اذنك
احمد يقوم يجرى يركب التاكس و يمشي و محمود متابعه
.........................